asya śrīlalitā triśatīstotra mahāmantrasya, bhagavān hayagrīva ṛṣiḥ, anuṣṭup chandaḥ, śrīlalitāmahātripurasundarī devatā, aiṃ bījaṃ, sauḥ śaktiḥ, klīṃ kīlakaṃ, mama caturvidhapuruṣārthaphalasiddhyarthe jape viniyogaḥ |
aimityādibhiraṅganyāsakaranyāsāḥ kāryāḥ |
dhyānam |
atimadhuracāpahastā-
-maparimitāmodabāṇasaubhāgyām |
aruṇāmatiśayakaruṇā-
-mabhinavakulasundarīṃ vande |
śrī hayagrīva uvāca |
kakārarūpā kalyāṇī kalyāṇaguṇaśālinī |
1
kalyāṇaśailanilayā kamanīyā kalāvatī || 1 ||
kamalākṣī kalmaṣaghnī karuṇāmṛtasāgarā |
2
kadambakānanāvāsā kadambakusumapriyā || 2 ||
kandarpavidyā kandarpajanakāpāṅgavīkṣaṇā |
3
karpūravīṭisaurabhyakallolitakakuptaṭā || 3 ||
kalidoṣaharā kañjalocanā kamravigrahā |
4
karmādisākṣiṇī kārayitrī karmaphalapradā || 4 ||
ekārarūpā caikākṣaryekānekākṣarākṛtiḥ |
5
etattadityanirdeśyā caikānandacidākṛtiḥ || 5 ||
evamityāgamābodhyā caikabhaktimadarcitā |
6
ekāgracittanirdhyātā caiṣaṇārahitādṛtā || 6 ||
elāsugandhicikurā cainaḥkūṭavināśinī |
7
ekabhogā caikarasā caikaiśvaryapradāyinī || 7 ||
ekātapatrasāmrājyapradā caikāntapūjitā |
8
edhamānaprabhā caijadanekajagadīśvarī || 8 ||
ekavīrādisaṃsevyā caikaprābhavaśālinī |
9
īkārarūpā ceśitrī cepsitārthapradāyinī || 9 ||
īdṛgityavinirdeśyā ceśvaratvavidhāyinī |
10
īśānādibrahmamayī ceśitvādyaṣṭasiddhidā || 10 ||
īkṣitrīkṣaṇasṛṣṭāṇḍakoṭirīśvaravallabhā |
11
īḍitā ceśvarārdhāṅgaśarīreśādhidevatā || 11 ||
īśvarapreraṇakarī ceśatāṇḍavasākṣiṇī |
12
īśvarotsaṅganilayā cetibādhāvināśinī || 12 ||
īhāvirahitā ceśaśaktirīṣatsmitānanā |
13
lakārarūpā lalitā lakṣmīvāṇīniṣevitā || 13 ||
lākinī lalanārūpā lasaddāḍimapāṭalā |
14
lalantikālasatphālā lalāṭanayanārcitā || 14 ||
lakṣaṇojjvaladivyāṅgī lakṣakoṭyaṇḍanāyikā |
15
lakṣyārthā lakṣaṇāgamyā labdhakāmā latātanuḥ || 15 ||
lalāmarājadalikā lambimuktālatāñcitā |
16
lambodaraprasūrlabhyā lajjāḍhyā layavarjitā || 16 ||
hrīṃkārarūpā hrīṃkāranilayā hrīṃpadapriyā |
17
hrīṃkārabījā hrīṃkāramantrā hrīṃkāralakṣaṇā || 17 ||
hrīṃkārajapasuprītā hrīṃmatī hrīṃvibhūṣaṇā |
18
hrīṃśīlā hrīṃpadārādhyā hrīṃgarbhā hrīṃpadābhidhā || 18 ||
hrīṃkāravācyā hrīṃkārapūjyā hrīṃkārapīṭhikā |
19
hrīṃkāravedyā hrīṃkāracintyā hrīṃ hrīṃśarīriṇī || 19 ||
hakārarūpā haladhṛkpūjitā hariṇekṣaṇā |
20
harapriyā harārādhyā haribrahmendravanditā || 20 ||
hayārūḍhāsevitāṅghrirhayamedhasamarcitā |
21
haryakṣavāhanā haṃsavāhanā hatadānavā || 21 ||
hatyādipāpaśamanī haridaśvādisevitā |
22
hastikumbhottuṅgakucā hastikṛttipriyāṅganā || 22 ||
haridrākuṅkumādigdhā haryaśvādyamarārcitā |
23
harikeśasakhī hādividyā hālāmadālasā || 23 ||
sakārarūpā sarvajñā sarveśī sarvamaṅgalā |
24
sarvakartrī sarvabhartrī sarvahantrī sanātanā || 24 ||
sarvānavadyā sarvāṅgasundarī sarvasākṣiṇī |
25
sarvātmikā sarvasaukhyadātrī sarvavimohinī || 25 ||
sarvādhārā sarvagatā sarvāvaguṇavarjitā |
26
sarvāruṇā sarvamātā sarvabhūṣaṇabhūṣitā || 26 ||
kakārārthā kālahantrī kāmeśī kāmitārthadā |
27
kāmasañjīvanī kalyā kaṭhinastanamaṇḍalā || 27 ||
karabhorūḥ kalānāthamukhī kacajitāmbudā |
28
kaṭākṣasyandikaruṇā kapāliprāṇanāyikā || 28 ||
kāruṇyavigrahā kāntā kāntidhūtajapāvaliḥ |
29
kalālāpā kambukaṇṭhī karanirjitapallavā || 29 ||
kalpavallīsamabhujā kastūrītilakāñcitā |
30
hakārārthā haṃsagatirhāṭakābharaṇojjvalā || 30 ||
hārahārikucābhogā hākinī halyavarjitā |
31
haritpatisamārādhyā haṭhātkārahatāsurā || 31 ||
harṣapradā havirbhoktrī hārdasantamasāpahā |
32
hallīsalāsyasantuṣṭā haṃsamantrārtharūpiṇī || 32 ||
hānopādānanirmuktā harṣiṇī harisodarī |
33
hāhāhūhūmukhastutyā hānivṛddhivivarjitā || 33 ||
hayyaṅgavīnahṛdayā harigopāruṇāṃśukā |
34
lakārākhyā latāpūjyā layasthityudbhaveśvarī || 34 ||
lāsyadarśanasantuṣṭā lābhālābhavivarjitā |
35
laṅghyetarājñā lāvaṇyaśālinī laghusiddhidā || 35 ||
lākṣārasasavarṇābhā lakṣmaṇāgrajapūjitā |
36
labhyetarā labdhabhaktisulabhā lāṅgalāyudhā || 36 ||
lagnacāmarahastaśrīśāradāparivījitā |
37
lajjāpadasamārādhyā lampaṭā lakuleśvarī || 37 ||
labdhamānā labdharasā labdhasampatsamunnatiḥ |
38
hrīṃkāriṇī hrīṃkārādyā hrīṃmadhyā hrīṃśikhāmaṇiḥ || 38 ||
hrīṃkārakuṇḍāgniśikhā hrīṃkāraśaśicandrikā |
39
hrīṃkārabhāskararucirhrīṃkārāmbhodacañcalā || 39 ||
hrīṃkārakandāṅkurikā hrīṃkāraikaparāyaṇā |
40
hrīṃkāradīrghikāhaṃsī hrīṃkārodyānakekinī || 40 ||
hrīṃkārāraṇyahariṇī hrīṃkārāvālavallarī |
41
hrīṃkārapañjaraśukī hrīṃkārāṅgaṇadīpikā || 41 ||
hrīṃkārakandarāsiṃhī hrīṃkārāmbhojabhṛṅgikā |
42
hrīṃkārasumanomādhvī hrīṃkāratarumañjarī || 42 ||
sakārākhyā samarasā sakalāgamasaṃstutā |
43
sarvavedāntatātparyabhūmiḥ sadasadāśrayā || 43 ||
sakalā saccidānandā sādhyā sadgatidāyinī |
44
sanakādimunidhyeyā sadāśivakuṭumbinī || 44 ||
sakālādhiṣṭhānarūpā satyarūpā samākṛtiḥ |
45
sarvaprapañcanirmātrī samanādhikavarjitā || 45 ||
sarvottuṅgā saṅgahīnā saguṇā sakaleṣṭadā |
46
kakāriṇī kāvyalolā kāmeśvaramanoharā || 46 ||
kāmeśvaraprāṇanāḍī kāmeśotsaṅgavāsinī |
47
kāmeśvarāliṅgitāṅgī kāmeśvarasukhapradā || 47 ||
kāmeśvarapraṇayinī kāmeśvaravilāsinī |
48
kāmeśvaratapaḥsiddhiḥ kāmeśvaramanaḥpriyā || 48 ||
kāmeśvaraprāṇanāthā kāmeśvaravimohinī |
49
kāmeśvarabrahmavidyā kāmeśvaragṛheśvarī || 49 ||
kāmeśvarāhlādakarī kāmeśvaramaheśvarī |
50
kāmeśvarī kāmakoṭinilayā kāṅkṣitārthadā || 50 ||
lakāriṇī labdharūpā labdhadhīrlabdhavāñchitā |
51
labdhapāpamanodūrā labdhāhaṅkāradurgamā || 51 ||
labdhaśaktirlabdhadehā labdhaiśvaryasamunnatiḥ |
52
labdhavṛddhirlabdhalīlā labdhayauvanaśālinī || 52 ||
labdhātiśayasarvāṅgasaundaryā labdhavibhramā |
53
labdharāgā labdhapatirlabdhanānāgamasthitiḥ || 53 ||
labdhabhogā labdhasukhā labdhaharṣābhipūritā |
54
hrīṃkāramūrtirhrīṃkārasaudhaśṛṅgakapotikā || 54 ||
hrīṃkāradugdhābdhisudhā hrīṃkārakamalendirā |
55
hrīṃkāramaṇidīpārcirhrīṃkārataruśārikā || 55 ||
hrīṃkārapeṭakamaṇirhrīṃkārādarśabimbitā |
56
hrīṃkārakośāsilatā hrīṃkārāsthānanartakī || 56 ||
hrīṃkāraśuktikāmuktāmaṇirhrīṃkārabodhitā |
57
hrīṃkāramayasauvarṇastambhavidrumaputrikā || 57 ||
hrīṃkāravedopaniṣad hrīṃkārādhvaradakṣiṇā |
58
hrīṃkāranandanārāmanavakalpakavallarī || 58 ||
hrīṃkārahimavadgaṅgā hrīṃkārārṇavakaustubhā |
59
hrīṃkāramantrasarvasvā hrīṃkāraparasaukhyadā || 59 ||
uttarapīṭhikā (phalaśṛtiḥ)
hayagrīva uvāca |
ityevaṃ te mayākhyātaṃ devyā nāmaśatatrayam |
1
rahasyātirahasyatvādgopanīyaṃ tvayā mune || 1 ||
śivavarṇāni nāmāni śrīdevyā kathitāni hi |
2
śaktyakṣarāṇi nāmāni kāmeśakathitāni ca || 2 ||
ubhayākṣaranāmāni hyubhābhyāṃ kathitāni vai |
3
tadanyairgrathitaṃ stotrametasya sadṛśaṃ kimu || 3 ||
nānena sadṛśaṃ stotraṃ śrīdevīprītidāyakam |
4
lokatraye'pi kalyāṇaṃ sambhavennātra saṃśayaḥ || 4 ||
sūta uvāca |
iti hayamukhagītaṃ stotrarājaṃ niśamya
pragalitakaluṣo'bhūccittaparyāptimetya |
nijagurumatha natvā kumbhajanmā taduktaṃ
5
punaradhikarahasyaṃ jñātumevaṃ jagāda || 5 ||
agastya uvāca |
aśvānana mahābhāga rahasyamapi me vada |
6
śivavarṇāni kānyatra śaktivarṇāni kāni hi || 6 ||
ubhayorapi varṇāni kāni vā vada deśika |
7
iti pṛṣṭaḥ kumbhajena hayagrīvo'vadatpunaḥ || 7 ||
hayagrīva uvāca |
tava gopyaṃ kimastīha sākṣādambānuśāsanāt |
8
idaṃ tvatirahasyaṃ te vakṣyāmi śṛṇu kumbhaja || 8 ||
etadvijñānamātreṇa śrīvidyā siddhidā bhavet |
9
katrayaṃ hadvayaṃ caiva śaivo bhāgaḥ prakīrtitaḥ || 9 ||
śaktyakṣarāṇi śeṣāṇi hrīṅkāra ubhayātmakaḥ |
10
evaṃ vibhāgamajñātvā ye vidyājapaśālinaḥ || 10 ||
na teṣāṃ siddhidā vidyā kalpakoṭiśatairapi |
11
caturbhiḥ śivacakraiśca śakticakraiśca pañcabhiḥ || 11 ||
navacakraiśca saṃsiddhaṃ śrīcakraṃ śivayorvapuḥ |
12
trikoṇamaṣṭakoṇaṃ ca daśakoṇadvayaṃ tathā || 12 ||
caturdaśāraṃ caitāni śakticakrāṇi pañca ca |
13
binduścāṣṭadalaṃ padmaṃ padmaṃ ṣoḍaśapatrakam || 13 ||
caturaśraṃ ca catvāri śivacakrāṇyanukramāt |
14
trikoṇe baindavaṃ śliṣṭaṃ aṣṭāre'ṣṭadalāmbujam || 14 ||
daśārayoḥ ṣoḍaśāraṃ bhūgṛhaṃ bhuvanāśrake |
15
śaivānāmapi śāktānāṃ cakrāṇāṃ ca parasparam || 15 ||
avinābhāvasambandhaṃ yo jānāti sa cakravit |
16
trikoṇarūpiṇī śaktirbindurūpaparaḥ śivaḥ || 16 ||
avinābhāvasambandhaṃ tasmādbindutrikoṇayoḥ |
17
evaṃ vibhāgamajñātvā śrīcakraṃ yaḥ samarcayet || 17 ||
na tatphalamavāpnoti lalitāmbā na tuṣyati |
18
ye ca jānanti loke'smin śrīvidyācakravedinaḥ || 18 ||
sāmanyavedinaḥ sarve viśeṣajño'tidurlabhaḥ |
19
svayaṃvidyāviśeṣajño viśeṣajñaṃ samarcayet || 19 ||
tasmai deyaṃ tato grāhyamaśaktastasya dāpayet |
20
andhaṃ tamaḥ praviśanti ye'vidyāṃ samupāsate || 20 ||
iti śrutirapāhaitānavidyopāsakānpunaḥ |
21
vidyānyopāsakāneva nindatyāruṇikī śrutiḥ || 21 ||
aśrutā saśrutāsaśca yajvāno ye'pyayajvanaḥ |
22
svaryanto nāpekṣante indramagniṃ ca ye viduḥ || 22 ||
sikatā iva saṃyanti raśmibhiḥ samudīritāḥ |
23
asmāllokādamuṣmāccetyāha cāraṇyakaśrutiḥ || 23 ||
yasya no paścimaṃ janma yadi vā śaṅkaraḥ svayam |
24
tenaiva labhyate vidyā śrīmatpañcadaśākṣarī || 24 ||
iti mantreṣu bahudhā vidyāyā mahimocyate |
25
mokṣaikahetuvidyā tu śrīvidyā nātra saṃśayaḥ || 25 ||
na śilpādijñānayukte vidvacchabdhaḥ prayujyate |
26
mokṣaikahetuvidyā sā śrīvidyaiva na saṃśayaḥ || 26 ||
tasmādvidyāvidevātra vidvānvidvānitīryate |
27
svayaṃ vidyāvide dadyātkhyāpayettadguṇānsudhīḥ || 27 ||
svayaṃvidyārahasyajño vidyāmāhātmyavedyapi |
28
vidyāvidaṃ nārcayeccetko vā taṃ pūjayejjanaḥ || 28 ||
prasaṅgādidamuktaṃ te prakṛtaṃ śṛṇu kumbhaja |
29
yaḥ kīrtayetsakṛdbhaktyā divyanāmaśatatrayam || 29 ||
tasya puṇyamahaṃ vakṣye śṛṇu tvaṃ kumbhasambhava |
30
rahasyanāmasāhasrapāṭhe yatphalamīritam || 30 ||
tatphalaṃ koṭiguṇitamekanāmajapādbhavet |
31
kāmeśvarīkāmeśābhyāṃ kṛtaṃ nāmaśatatrayam || 31 ||
nānyena tulayedetat stotreṇānyakṛtena ca |
32
śriyaḥ paramparā yasya bhāvi vā cottarottaram || 32 ||
tenaiva labhyate caitatpaścācchreyaḥ parīkṣayet |
33
asyā nāmnāṃ triśatyāstu mahimā kena varṇyate || 33 ||
yā svayaṃ śivayorvaktrapadmābhyāṃ pariniḥsṛtā |
34
nityaṃ ṣoḍaśasaṅkhyākānviprānādau tu bhojayet || 34 ||
abhyaktāṃstilatailena snātānuṣṇena vāriṇā |
35
abhyarcya gandhapuṣpādyaiḥ kāmeśvaryādināmabhiḥ || 35 ||
sūpāpūpaiḥ śarkarādyaiḥ pāyasaiḥ phalasaṃyutaiḥ |
36
vidyāvido viśeṣeṇa bhojayetṣoḍaśa dvijān || 36 ||
evaṃ nityārcanaṃ kuryādādau brāhmaṇabhojanam |
37
triśatīnāmabhiḥ paścādbrāhmaṇānkramaśo'rcayet || 37 ||
tailābhyaṅgādikaṃ datvā vibhave sati bhaktitaḥ |
38
śuklapratipadārabhya paurṇamāsyavadhi kramāt || 38 ||
divase divase viprā bhojyā viṃśatisaṅkhyayā |
39
daśabhiḥ pañcabhirvāpi tribhirekena vā dinaiḥ || 39 ||
triṃśatṣaṣṭiḥ śataṃ viprāḥ sambhojyāstriśataṃ kramāt |
40
evaṃ yaḥ kurute bhaktyā janmamadhye sakṛnnaraḥ || 40 ||
tasyaiva saphalaṃ janma muktistasya kare sthirā |
41
rahasyanāmasāhasrabhojane'pyevameva hi || 41 ||
ādau nityabaliṃ kuryātpaścādbrāhmaṇabhojanam |
42
rahasyanāmasāhasramahimā yo mayoditaḥ || 42 ||
sa śīkarāṇuratnaikanāmno mahimavāridheḥ |
43
vāgdevīracite nāmasāhasre yadyadīritam || 43 ||
tatphalaṃ koṭiguṇitaṃ nāmno'pyekasya kīrtanāt |
44
etadanyairjapaiḥ stotrairarcanairyatphalaṃ bhavet || 44 ||
tatphalaṃ koṭiguṇitaṃ bhavennāmaśatatrayāt |
45
vāgdevīracite stotre tādṛśo mahimā yadi || 45 ||
sākṣātkāmeśakāmeśīkṛte'smingṛhyatāmiti |
46
sakṛtsaṅkīrtanādeva nāmnāmasmin śatatraye || 46 ||
bhaveccittasya paryāptirnyūnamanyānapekṣiṇī |
47
na jñātavyamito'pyanyatra japtavyaṃ ca kumbhaja || 47 ||
yadyatsādhyatamaṃ kāryaṃ tattadarthamidaṃ japet |
48
tattatphalamavāpnoti paścātkāryaṃ parīkṣayet || 48 ||
ye ye prayogāstantreṣu taistairyatsādhyate phalam |
49
tatsarvaṃ sidhyati kṣipraṃ nāmatriśatakīrtanāt || 49 ||
āyuṣkaraṃ puṣṭikaraṃ putradaṃ vaśyakārakam |
50
vidyāpradaṃ kīrtikaraṃ sukavitvapradāyakam || 50 ||
sarvasampatpradaṃ sarvabhogadaṃ sarvasaukhyadam |
51
sarvābhīṣṭapradaṃ caiva devyā nāmaśatatrayam || 51 ||
etajjapaparo bhūyānnānyadicchetkadācana |
52
etatkīrtanasantuṣṭā śrīdevī lalitāmbikā || 52 ||
bhaktasya yadyadiṣṭaṃ syāttattatpūrayate dhruvam |
53
tasmātkumbhodbhava mune kīrtaya tvamidaṃ sadā || 53 ||
nāparaṃ kiñcidapi te boddhavyamavaśiṣyate |
54
iti te kathitaṃ stotraṃ lalitāprītidāyakam || 54 ||
nāvidyāvedine brūyānnābhaktāya kadācana |
56
na śaṭhāya na duṣṭāya nāviśvāsāya karhicit || 56 ||
yo brūyāttriśatīṃ nāmnāṃ tasyānartho mahānbhavet |
57
ityājñā śāṅkarī proktā tasmādgopyamidaṃ tvayā || 57 ||
lalitāpreritenaiva mayoktaṃ stotramuttamam |
58
rahasyanāmasāhasrādapi gopyamidaṃ mune || 58 ||
sūta uvāca |
evamuktvā hayagrīvaḥ kumbhajaṃ tāpasottamam |
stotreṇānena lalitāṃ stutvā tripurasundarīm |
59
ānandalaharīmagnamānasaḥ samavartata || 59 ||
iti brahmāṇḍapurāṇe uttarakhaṇḍe hayagrīvāgastyasaṃvāde lalitopākhyāne stotrakhaṇḍe śrīlalitātriśatīstotraratnam |