kalpānokahapuṣpajālavilasannīlālakāṃ mātṛkāṃ
kāntāṃ kañjadalekṣaṇāṃ kalimalapradhvaṃsinīṃ kālikām |
kāñcīnūpurahāradāmasubhagāṃ kāñcīpurīnāyikāṃ
1
kāmākṣīṃ karikumbhasannibhakucāṃ vande maheśapriyām || 1 ||
kāśābhāṃ śukabhāsurāṃ pravilasatkośātakī sannibhāṃ
candrārkānalalocanāṃ surucirālaṅkārabhūṣojjvalām |
brahmaśrīpativāsavādimunibhiḥ saṃsevitāṅghridvayāṃ
2
kāmākṣīṃ gajarājamandagamanāṃ vande maheśapriyām || 2 ||
aiṃ klīṃ sauriti yāṃ vadanti munayastattvārtharūpāṃ parāṃ
vācāmādimakāraṇaṃ hṛdi sadā dhyāyanti yāṃ yoginaḥ |
bālāṃ phālavilocanāṃ navajapāvarṇāṃ suṣumnāśritāṃ
3
kāmākṣīṃ kalitāvataṃsasubhagāṃ vande maheśapriyām || 3 ||
yatpādāmbujareṇuleśamaniśaṃ labdhvā vidhatte vidhi-
-rviśvaṃ tatparipāti viṣṇurakhilaṃ yasyāḥ prasādācciram |
rudraḥ saṃharati kṣaṇāttadakhilaṃ yanmāyayā mohitaḥ
4
kāmākṣīmaticitracārucaritāṃ vande maheśapriyām || 4 ||
sūkṣmātsūkṣmatarāṃ sulakṣitatanuṃ kṣāntākṣarairlakṣitāṃ
vīkṣāśikṣitarākṣasāṃ tribhuvanakṣemaṅkarīmakṣayām |
sākṣāllakṣaṇalakṣitākṣaramayīṃ dākṣāyaṇīṃ sākṣiṇīṃ
5
kāmākṣīṃ śubhalakṣaṇaiḥ sulalitāṃ vande maheśapriyām || 5 ||
oṅkārāṅgaṇadīpikāmupaniṣatprāsādapārāvatīṃ
āmnāyāmbudhicandrikāmaghatamaḥpradhvaṃsahaṃsaprabhām |
kāñcīpaṭṭaṇapañjarāntaraśukīṃ kāruṇyakallolinīṃ
6
kāmākṣīṃ śivakāmarājamahiṣīṃ vande maheśapriyām || 6 ||
hrīṅkārātmakavarṇamātrapaṭhanādaindrīṃ śriyaṃ tanvatīṃ
cinmātrāṃ bhuvaneśvarīmanudinaṃ bhikṣāpradānakṣamām |
viśvāghaughanivāriṇīṃ vimalinīṃ viśvambharāṃ mātṛkāṃ
7
kāmākṣīṃ paripūrṇacandravadanāṃ vande maheśapriyām || 7 ||
vāgdevīti ca yāṃ vadanti munayaḥ kṣīrābdhikanyeti ca
kṣoṇībhṛttanayeti ca śrutigiro yāṃ āmananti sphuṭam |
ekānekaphalapradāṃ bahuvidhā''kārāstanūstanvatīṃ
8
kāmākṣīṃ sakalārtibhañjanaparāṃ vande maheśapriyām || 8 ||
māyāmādimakāraṇaṃ trijagatāmārādhitāṅghridvayāṃ
ānandāmṛtavārirāśinilayāṃ vidyāṃ vipaściddhiyām |
māyāmānuṣarūpiṇīṃ maṇilasanmadhyāṃ mahāmātṛkāṃ
9
kāmākṣīṃ karirājamandagamanāṃ vande maheśapriyām || 9 ||
kāntā kāmadughā karīndragamanā kāmārivāmāṅkagā
kalyāṇī kalitāvatārasubhagā kastūrikācarcitā
kampātīrarasālamūlanilayā kāruṇyakallolinī
10
kalyāṇāni karotu me bhagavatī kāñcīpurīdevatā || 10 ||
iti śrī kāmākṣī stotram |