paśupatīndupatiṃ dharaṇīpatiṃ bhujagalokapatiṃ ca satīpatim |
1
praṇatabhaktajanārtiharaṃ paraṃ bhajata re manujā girijāpatim ||1||
na janako jananī na ca sodaro na tanayo na ca bhūribalaṃ kulam |
2
avati ko'pi na kālavaśaṃ gataṃ bhajata re manujā girijāpatim ||2||
murajaḍiṇḍimavādyavilakṣaṇaṃ madhurapañcamanādaviśāradam |
3
pramathabhūtagaṇairapi sevitaṃ bhajata re manujā girijāpatim ||3||
śaraṇadaṃ sukhadaṃ śaraṇānvitaṃ śiva śiveti śiveti nataṃ nṛṇām |
4
abhayadaṃ karuṇāvaruṇālayaṃ bhajata re manujā girijāpatim ||4||
naraśiroracitaṃ maṇikuṇḍalaṃ bhujagahāramudaṃ vṛṣabhadhvajam |
5
citirajodhavalīkṛtavigrahaṃ bhajata re manujā girijāpatim ||5||
makhavināśakaraṃ śaśiśekharaṃ satatamadhvarabhājiphalapradam |
6
pralayadagdhasurāsuramānavaṃ bhajata re manujā girijāpatim ||6||
madamapāsya ciraṃ hṛdi saṃsthitaṃ maraṇajanmajarāmayapīḍitam |
7
jagadudīkṣya samīpabhayākulaṃ bhajata re manujā girijāpatim ||7||
harivirañcisurādhipapūjitaṃ yamajaneśadhaneśanamaskṝtam |
8
trinayanaṃ bhuvanatritayādhipaṃ bhajata re manujā girijāpatim ||8||
paśupateridamaṣṭakamadbhutaṃ viracitaṃ pṛthivīpatisūriṇā |
9
paṭhati saṃśaṛṇute manujaḥ sadā śivapurīṃ vasate labhate mudam ||9||
iti śrīpaśupatyaṣṭakaṃ sampūrṇam ||