hāranūpurakirīṭakuṇḍalavibhūṣitāvayavaśobhinīṃ
kāraṇeśavaramaulikoṭiparikalpyamānapadapīṭhikām |
kālakālaphaṇipāśabāṇadhanuraṅkuśāmaruṇamekhalāṃ
1
phālabhūtilakalocanāṃ manasi bhāvayāmi paradevatām || 1 ||
gandhasāraghanasāracārunavanāgavallirasavāsinīṃ
sāndhyarāgamadhurādharābharaṇasundarānanaśucismitām |
mandharāyatavilocanāmamalabālacandrakṛtaśekharīṃ
2
indirāramaṇasodarīṃ manasi bhāvayāmi paradevatām || 2 ||
smeracārumukhamaṇḍalāṃ vimalagaṇḍalambimaṇimaṇḍalāṃ
hāradāmapariśobhamānakucabhārabhīrutanumadhyamām |
vīragarvaharanūpurāṃ vividhakāraṇeśavarapīṭhikāṃ
3
māravairisahacāriṇīṃ manasi bhāvayāmi paradevatām || 3 ||
bhūribhāradharakuṇḍalīndramaṇibaddhabhūvalayapīṭhikāṃ
vārirāśimaṇimekhalāvalayavahnimaṇḍalaśarīriṇīm |
vārisāravahakuṇḍalāṃ gaganaśekharīṃ ca paramātmikāṃ
4
cārucandravilocanāṃ manasi bhāvayāmi paradevatām || 4 ||
kuṇḍalatrividhakoṇamaṇḍalavihāraṣaḍdalasamullasa-
tpuṇḍarīkamukhabhedinīṃ ca pracaṇḍabhānubhāsamujjvalām |
maṇḍalenduparivāhitāmṛtataraṅgiṇīmaruṇarūpiṇīṃ
5
maṇḍalāntamaṇidīpikāṃ manasi bhāvayāmi paradevatām || 5 ||
vāraṇānanamayūravāhamukhadāhavāraṇapayodharāṃ
cāraṇādisurasundarīcikuraśekarīkṛtapadāmbujām |
kāraṇādhipatipañcakaprakṛtikāraṇaprathamamātṛkāṃ
6
vāraṇāntamukhapāraṇāṃ manasi bhāvayāmi paradevatām || 6 ||
padmakāntipadapāṇipallavapayodharānanasaroruhāṃ
padmarāgamaṇimekhalāvalayanīviśobhitanitambinīm |
padmasambhavasadāśivāntamayapañcaratnapadapīṭhikāṃ
7
padminīṃ praṇavarūpiṇīṃ manasi bhāvayāmi paradevatām || 7 ||
āgamapraṇavapīṭhikāmamalavarṇamaṅgalaśarīriṇīṃ
āgamāvayavaśobhinīmakhilavedasārakṛtaśekharīm |
mūlamantramukhamaṇḍalāṃ muditanādabindunavayauvanāṃ
8
mātṛkāṃ tripurasundarīṃ manasi bhāvayāmi paradevatām || 8 ||
kālikātimirakuntalāntaghanabhṛṅgamaṅgalavirājinīṃ
cūlikāśikharamālikāvalayamallikāsurabhisaurabhām |
vālikāmadhuragaṇḍamaṇḍalamanoharānanasaroruhāṃ
9
kālikāmakhilanāyikāṃ manasi bhāvayāmi paradevatām || 9 ||
nityameva niyamena jalpatāṃ – bhuktimuktiphaladāmabhīṣṭadām |
10
śaṅkareṇa racitāṃ sadā japennāmaratnanavaratnamālikām || 10 ||