ānandarūpa bhagavannayi te'vatāre
prāpte pradīptabhavadaṅganirīyamāṇaiḥ |
kāntivrajairiva ghanāghanamaṇḍalairdyā-
1
māvṛṇvatī viruruce kila varṣavelā ||1||
āśāsu śītalatarāsu payodatoyai-
rāśāsitāptivivaśeṣu ca sajjaneṣu |
naiśākarodayavidhau niśi madhyamāyāṃ
2
kleśāpahastrijagatāṃ tvamihāvirāsīḥ ||2||
bālyaspṛśā'pi vapuṣā dadhuṣā vibhūtī-
rudyatkirīṭakaṭakāṅgadahārabhāsā |
śaṅkhārivārijagadāparibhāsitena
3
meghāsitena parilesitha sūtigehe ||3||
vakṣaḥsthalīsukhanilīnavilāsilakṣmī-
mandākṣalakṣitakaṭākṣavimokṣabhedaiḥ |
tanmandirasya khalakaṃsakṛtāmalakṣmī-
4
munmārjayanniva virejitha vāsudeva ||4||
śauristu dhīramunimaṇḍalacetaso'pi
dūrasthitaṃ vapurudīkṣya nijekṣaṇābhyām ||
ānandavāṣpapulakodgamagadgadārdra-
5
stuṣṭāva dṛṣṭimakarandarasaṃ bhavantam ||5||
deva prasīda parapūruṣa tāpavallī-
nirlūnadātrasamanetrakalāvilāsin |
khedānapākuru kṛpāgurubhiḥ kaṭākṣai-
6
rityādi tena muditena ciraṃ nuto'bhūḥ ||6||
mātrā ca netrasalilāstṛtagātravalyā
stotrairabhiṣṭutaguṇaḥ karuṇālayastvam |
prācīnajanmayugalaṃ pratibodhya tābhyāṃ
7
māturgirā dadhitha mānuṣabālaveṣam ||7||
tvatpreritastadanu nandatanūjayā te
vyatyāsamāracayituṃ sa hi śūrasūnuḥ |
tvāṃ hastayoradhṛta cittavidhāryamāryai-
8
rambhoruhasthakalahaṃsakiśoraramyam ||8||
jātā tadā paśupasadmani yoganidrā |
nidrāvimudritamathākṛta pauralokam |
tvatpreraṇāt kimiva citramacetanairyad-
9
dvāraiḥ svayaṃ vyaghaṭi saṅghaṭitaiḥ sugāḍham ||9||
śeṣeṇa bhūriphaṇavāritavāriṇā'tha
svairaṃ pradarśitapatho maṇidīpitena |
tvāṃ dhārayan sa khalu dhanyatamaḥ pratasthe
10
so'yaṃ tvamīśa mama nāśaya rogavegān ||10||