|| ṣaṣṭhaḥ sargaḥ ||
|| kuṇṭhavaikuṇṭhaḥ ||
atha tāṃ gantumaśaktāṃ ciramanuraktāṃ latāgṛhe dṛṣṭvā |
37
taccaritaṃ govinde manasijamande sakhī prāha || 37 ||
|| gītaṃ 12 ||
paśyati diśi diśi rahasi bhavantam |
tadadharamadhuramadhūni pibantam ||
1
nātha hare jagannātha hare sīdati rādhā vāsagṛhe - dhruvam || 1 ||
tvadabhisaraṇarabhasena valantī |
2
patati padāni kiyanti calantī || 2 ||
vihitaviśadabisakisalayavalayā |
3
jīvati paramiha tava ratikalayā || 3 ||
muhuravalokitamaṇḍanalīlā |
4
madhuripurahamiti bhāvanaśīlā || 4 ||
tvaritamupaiti na kathamabhisāram |
5
haririti vadati sakhīmanuvāram || 5 ||
śliṣyati cumbati jaladharakalpam |
6
harirupagata iti timiramanalpam || 6 ||
bhavati vilambini vigalitalajjā |
7
vilapati roditi vāsakasajjā || 7 ||
śrījayadevakaveridamuditam |
8
rasikajanaṃ tanutāmatimuditam || 8 ||
vipulapulakapāliḥ sphītasītkāramanta-rjanitajaḍimakākuvyākulaṃ vyāharantī |
38
tava kitava vidhatte'mandakandarpacintāṃ rasajaladhinimagnā dhyānalagnā mṛgākṣī || 38 ||
aṅgeṣvābharaṇaṃ karoti bahuśaḥ patre'pi sañcāriṇi prāptaṃ tvāṃ pariśaṅkate vitanute śayyāṃ ciraṃ dhyāyati |
39
ityākalpavikalpatalparacanāsaṅkalpalīlāśata-vyāsaktāpi vinā tvayā varatanurnaiṣā niśāṃ neṣyati || 39 ||
kiṃ viśrāmyasi kṛṣṇabhogibhavane bhāṇḍīrabhūmīruhi bhrāta ryāhi nadṛṣṭigocaramitassānandanandāspadam|
40
radhāyāvacanaṃ tadadhvagamukhānnandāntikegopato govindasyajayanti sāyamatithiprāśastyagarbhāgiraḥ|| 40 ||
|| iti gītagovinde vāsakasajjāvarṇane kuṇṭhavaikuṇṭho nāma ṣaṣṭhaḥ sargaḥ ||