gṛtsamada uvāca |
vighneśavīryāṇi vicitrakāṇi
bandījanairmāgadhakaiḥ smṛtāni |
śrutvā samuttiṣṭha gajānana tvaṃ
1
brāhme jaganmaṅgalakaṃ kuruṣva || 1 ||
evaṃ mayā prārthita vighnarāja-
-ścittena cotthāya bahirgaṇeśaḥ |
taṃ nirgataṃ vīkṣya namanti devāḥ
2
śambhvādayo yogimukhāstathāham || 2 ||
śaucādikaṃ te parikalpayāmi
heramba vai dantaviśuddhimevam |
vastreṇa samprokṣya mukhāravindaṃ
3
devaṃ sabhāyāṃ viniveśayāmi || 3 ||
dvijādisarvairabhivanditaṃ ca
śukādibhirmodasumodakādyaiḥ |
sambhāṣya cālokya samutthitaṃ taṃ
4
sumaṇḍapaṃ kalpya niveśayāmi || 4 ||
ratnaiḥ sudīptaiḥ pratibimbitaṃ taṃ
paśyāmi cittena vināyakaṃ ca |
tatrāsanaṃ ratnasuvarṇayuktaṃ
5
saṅkalpya devaṃ viniveśayāmi || 5 ||
siddhyā ca buddhyā saha vighnarāja
pādyaṃ kuru premabhareṇa sarvaiḥ |
suvāsitaṃ nīramatho gṛhāṇa
6
cittena dattaṃ ca sukhoṣṇabhāvam || 6 ||
tataḥ suvastreṇa gaṇeśamādau
samprokṣya dūrvādibhirarcayāmi |
cittena bhāvapriya dīnabandho
7
mano vilīnaṃ kuru te padābje || 7 ||
karpūrakailādisuvāsitaṃ tu
sukalpitaṃ toyamatho gṛhāṇa |
ācamya tenaiva gajānana tvaṃ
8
kṛpākaṭākṣeṇa vilokayāśu || 8 ||
pravālamuktāphalahāṭakādyaiḥ
susaṃskṛtaṃ hyantarabhāvakena |
anarghyamarghyaṃ saphalaṃ kuruṣva
9
mayā pradattaṃ gaṇarāja ḍhuṇḍhe || 9 ||
saugandhyayuktaṃ madhuparkamādyaṃ
saṅkalpitaṃ bhāvayutaṃ gṛhāṇa |
punastathācamya vināyaka tvaṃ
10
bhaktāṃśca bhakteśa surakṣayāśu || 10 ||
suvāsitaṃ campakajātikādyai-
-stailaṃ mayā kalpitameva ḍhuṇḍhe |
gṛhāṇa tena pravimardayāmi
11
sarvāṅgamevaṃ tava sevanāya || 11 ||
tataḥ sukhoṣṇena jalena cāha-
-manekatīrthāhṛtakena ḍhuṇḍhe |
cittena śuddhena ca snāpayāmi
12
snānaṃ mayā dattamatho gṛhāṇa || 12 ||
tataḥ payaḥsnānamacintyabhāva
gṛhāṇa toyasya tathā gaṇeśa |
punardadhisnānamanāmaya tvaṃ
13
cittena dattaṃ ca jalasya caiva || 13 ||
tato ghṛtasnānamapāravandya
sutīrthajaṃ vighnahara prasīda |
gṛhāṇa cittena sukalpitaṃ tu
14
tato madhusnānamatho jalasya || 14 ||
suśarkarāyuktamatho gṛhāṇa
snānaṃ mayā kalpitameva ḍhuṇḍhe |
tato jalasnānamaghāpahantṛ
15
vighneśa māyābhramaṃ vārayāśu || 15 ||
suyakṣapaṅkasthamatho gṛhāṇa
snānaṃ pareśādhipate tataśca |
kaumaṇḍalīsambhavajaṃ kuruṣva
16
viśuddhamevaṃ parikalpitaṃ tu || 16 ||
tatastu sūktairmanasā gaṇeśaṃ
sampūjya dūrvādibhiralpabhāvaiḥ |
apārakairmaṇḍalabhūtabrahma-
17
-ṇaspatyakaistaṃ hyabhiṣecayāmi || 17 ||
tataḥ suvastreṇa tu proñchanaṃ tvaṃ
gṛhāṇa cittena mayā sukalpitam |
tato viśuddhena jalena ḍhuṇḍhe
18
hyācāntamevaṃ kuru vighnarāja || 18 ||
agnau viśuddhe tu gṛhāṇa vastre
hyanarghyamaulye manasā mayā te |
datte paricchādya nijātmadehaṃ
19
tābhyāṃ mayūreśa janāṃśca pālaya || 19 ||
ācamya vighneśa punastathaiva
cittena dattaṃ mukhamuttarīyam |
gṛhāṇa bhaktapratipālaka tvaṃ
20
namo yathā tārakasaṃyutaṃ tu || 20 ||
yajñopavītaṃ triguṇasvarūpaṃ
sauvarṇamevaṃ hyahināthabhūtam |
bhāvena dattaṃ gaṇanātha tattvaṃ
21
gṛhāṇa bhaktoddhṛtikāraṇāya || 21 ||
ācāntamevaṃ manasā pradattaṃ
kuruṣva śuddhena jalena ḍhuṇḍhe |
punaśca kaumaṇḍalakena pāhi viśvaṃ
22
prabho khelakaraṃ sadā te || 22 ||
udyaddineśābhamatho gṛhāṇa
sindūrakaṃ te manasā pradattam |
sarvāṅgasaṃlepanamādarādvai
23
kuruṣva heramba ca tena pūrṇam || 23 ||
sahasraśīrṣaṃ manasā mayā tvaṃ
dattaṃ kirīṭaṃ tu suvarṇajaṃ vai |
anekaratnaiḥ khacitaṃ gṛhāṇa
24
brahmeśa te mastakaśobhanāya || 24 ||
vicitraratnaiḥ kanakena ḍhuṇḍhe
yutāni cittena mayā pareśa |
dattāni nānāpadakuṇḍalāni
25
gṛhāṇa śūrpaśrutibhūṣaṇāya || 25 ||
śuṇḍāvibhūṣārthamanantakhelin
suvarṇajaṃ kañcukamāgṛhāṇa |
ratnaiśca yuktaṃ manasā mayā ya-
26
-ddattaṃ prabho tatsaphalaṃ kuruṣva || 26 ||
suvarṇaratnaiśca yutāni ḍhuṇḍhe
sadaikadantābharaṇāni kalpya |
gṛhāṇa cūḍākṛtaye pareśa
27
dattāni dantasya ca śobhanārtham || 27 ||
ratnaiḥ suvarṇena kṛtāni tāni
gṛhāṇa catvāri mayā prakalpya |
sambhūṣaya tvaṃ kaṭakāni nātha
28
caturbhujeṣu hyaja vighnahārin || 28 ||
vicitraratnaiḥ khacitaṃ suvarṇa-
-sambhūtakaṃ gṛhya mayā pradattam |
tathāṅgulīṣvaṅgulikaṃ gaṇeśa
29
cittena saṃśobhaya tatpareśa || 29 ||
vicitraratnaiḥ khacitāni ḍhuṇḍhe
keyūrakāṇi hyatha kalpitāni |
suvarṇajāni pramathādhinātha
30
gṛhāṇa dattāni tu bāhuṣu tvam || 30 ||
pravālamuktāphalaratnajaistvaṃ
suvarṇasūtraiśca gṛhāṇa kaṇṭhe |
cittena dattā vividhāśca mālā
31
urodare śobhaya vighnarāja || 31 ||
candraṃ lalāṭe gaṇanātha pūrṇaṃ
vṛddhikṣayābhyāṃ tu vihīnamādyam |
saṃśobhaya tvaṃ varasaṃyutaṃ te
32
bhaktipriyatvaṃ prakaṭīkuruṣva || 32 ||
cintāmaṇiṃ cintitadaṃ pareśa
hṛddeśagaṃ jyotirmayaṃ kuruṣva |
maṇiṃ sadānandasukhapradaṃ ca
33
vighneśa dīnārthada pālayasva || 33 ||
nābhau phaṇīśaṃ ca sahasraśīrṣaṃ
saṃveṣṭanenaiva gaṇādhinātha |
bhaktaṃ subhūṣaṃ kuru bhūṣaṇena
34
varapradānaṃ saphalaṃ pareśa || 34 ||
kaṭītaṭe ratnasuvarṇayuktāṃ
kāñcīṃ sucittena ca dhārayāmi |
vighneśa jyotirgaṇadīpanīṃ te
35
prasīda bhaktaṃ kuru māṃ dayābdhe || 35 ||
heramba te ratnasuvarṇayukte
sunūpure mañjirake tathaiva |
sukiṅkiṇīnādayute subuddhyā
36
supādayoḥ śobhaya me pradatte || 36 ||
ityādi nānāvidhabhūṣaṇāni
tavecchayā mānasakalpitāni |
sambhūṣayāmyeva tvadaṅgakeṣu
37
vicitradhātuprabhavāni ḍhuṇḍhe || 37 ||
sucandanaṃ raktamamoghavīryaṃ
sugharṣitaṃ hyaṣṭakagandhamukhyaiḥ |
yuktaṃ mayā kalpitamekadanta
38
gṛhāṇa te tvaṅgavilepanārtham || 38 ||
lipteṣu vaicitryamathāṣṭagandhai-
-raṅgeṣu te'haṃ prakaromi citram |
prasīda cittena vināyaka tvaṃ
39
tataḥ suraktaṃ ravimeva phāle || 39 ||
ghṛtena vai kuṅkumakena raktān
sutaṇḍulāṃste parikalpayāmi |
phāle gaṇādhyakṣa gṛhāṇa pāhi
40
bhaktān subhaktipriya dīnabandho || 40 ||
gṛhāṇa bho campakamālatīni
jalapaṅkajāni sthalapaṅkajāni |
cittena dattāni ca mallikāni
41
puṣpāṇi nānāvidhavṛkṣajāni || 41 ||
puṣpopari tvaṃ manasā gṛhāṇa
heramba mandāraśamīdalāni |
mayā sucittena prakalpitāni
42
hyapārakāṇi praṇavākṛte tu || 42 ||
dūrvāṅkurānvai manasā pradattāṃ-
-stripañcapatrairyutakāṃśca snigdhān |
gṛhāṇa vighneśvara saṅkhyayā tvaṃ
43
hīnāṃśca sarvopari vakratuṇḍa || 43 ||
daśāṅgabhūtaṃ manasā mayā te
dhūpaṃ pradattaṃ gaṇarāja ḍhuṇḍhe |
gṛhāṇa saurabhyakaraṃ pareśa
44
siddhyā ca buddhyā saha bhaktapāla || 44 ||
dīpaṃ suvartyā yutamādarātte
dattaṃ mayā mānasakaṃ gaṇeśa |
gṛhāṇa nānāvidhajaṃ ghṛtādi-
45
-tailādisambhūtamamoghadṛṣṭe || 45 ||
bhojyaṃ ca lehyaṃ gaṇarāja peyaṃ
coṣyaṃ ca nānāvidhaṣaḍrasāḍhyam |
gṛhāṇa naivedyamatho mayā te
46
sukalpitaṃ puṣṭipate mahātman || 46 ||
suvāsitaṃ bhojanamadhyabhāge
jalaṃ mayā dattamatho gṛhāṇa |
kamaṇḍalusthaṃ manasā gaṇeśa
47
pibasva viśvādikatṛptikārin || 47 ||
tataḥ karodvartanakaṃ gṛhāṇa
saugandhyayuktaṃ mukhamārjanāya |
suvāsitenaiva sutīrthajena
48
sukalpitaṃ nātha gṛhāṇa ḍhuṇḍhe || 48 ||
punastathācamya suvāsitaṃ ca
dattaṃ mayā tīrthajalaṃ pibasva |
prakalpya vighneśa tataḥ paraṃ te
49
samproñchanaṃ hastamukhe karomi || 49 ||
drākṣādirambhāphalacūtakāni
khārjūrakārkandhukadāḍimāni |
susvādayuktāni mayā prakalpya
50
gṛhāṇa dattāni phalāni ḍhuṇḍhe || 50 ||
punarjalenaiva karādikaṃ te
saṅkṣālayāmi manasā gaṇeśa |
suvāsitaṃ toyamatho pibasva
51
mayā pradattaṃ manasā pareśa || 51 ||
aṣṭāṅgayuktaṃ gaṇanātha dattaṃ
tāmbūlakaṃ te manasā mayā vai |
gṛhāṇa vighneśvara bhāvayuktaṃ
52
sadā sakṛttuṇḍaviśodhanārtham || 52 ||
tato mayā kalpitake gaṇeśa
mahāsane ratnasuvarṇayukte |
mandārakārpāsakayuktavastrai-
53
-ranarghyasañchāditake prasīda || 53 ||
tatastvadīyāvaraṇaṃ pareśa
sampūjayāmi manasā yathāvat |
nānopacāraiḥ paramapriyaistu
54
tvatprītikāmārthamanāthabandho || 54 ||
gṛhāṇa lambodara dakṣiṇāṃ te
hyasaṅkhyabhūtāṃ manasā pradattām |
sauvarṇamudrādikamukhyabhāvāṃ
55
pāhi prabho viśvamidaṃ gaṇeśa || 55 ||
rājopacārānvividhāngṛhāṇa
hastyaśvachatrādikamādarādvai |
cittena dattān gaṇanātha ḍhuṇḍhe
56
hyapārasaṅkhyān sthirajaṅgamāṃste || 56 ||
dānāya nānāvidharūpakāṃste
gṛhāṇa dattānmanasā mayā vai |
padārthabhūtān sthirajaṅgamāṃśca
57
heramba māṃ tāraya mohabhāvāt || 57 ||
mandārapuṣpāṇi śamīdalāni
dūrvāṅkurāṃste manasā dadāmi |
heramba lambodara dīnapāla
58
gṛhāṇa bhaktaṃ kuru māṃ pade te || 58 ||
tato haridrāmabiraṃ gulālaṃ
sindūrakaṃ te parikalpayāmi |
suvāsitaṃ vastu suvāsabhūtai-
59
-rgṛhāṇa brahmeśvara śobhanārtham || 59 ||
tataḥ śukādyāḥ śivaviṣṇumukhyā
indrādayaḥ śeṣamukhāstathānye |
munīndrakāḥ sevakabhāvayuktāḥ
60
sabhāsanasthaṃ praṇamanti ḍhuṇḍhim || 60 ||
vāmāṅgake śaktiyutā gaṇeśaṃ
siddhistu nānāvidhasiddhibhistam |
atyantabhāvena susevate tu
61
māyāsvarūpā paramārthabhūtā || 61 ||
gaṇeśvaraṃ dakṣiṇabhāgasaṃsthā
buddhiḥ kalābhiśca subodhikābhiḥ |
vidyābhirevaṃ bhajate pareśa
62
māyāsu sāṅkhyapradacittarūpāḥ || 62 ||
pramodamodādayaḥ pṛṣṭhabhāge
gaṇeśvaraṃ bhāvayutā bhajante |
bhakteśvarā mudgalaśambhumukhyāḥ
63
śukādayastaṃ sma puro bhajante || 63 ||
gandharvamukhyā madhuraṃ jaguśca
gaṇeśagītaṃ vividhasvarūpam |
nṛtyaṃ kalāyuktamatho purastā-
64
-ccakrustathā hyapsaraso vicitram || 64 ||
ityādinānāvidhabhāvayuktaiḥ
saṃsevitaṃ vighnapatiṃ bhajāmi |
cittena dhyātvā tu nirañjanaṃ vai
65
karomi nānāvidhadīpayuktam || 65 ||
caturbhujaṃ pāśadharaṃ gaṇeśaṃ
tathāṅkuśaṃ dantayutaṃ tamevam |
trinetrayuktaṃ tvabhayaṅkaraṃ taṃ
66
mahodaraṃ caikaradaṃ gajāsyam || 66 ||
sarpopavītaṃ gajakarṇadhāraṃ
vibhūtibhiḥ sevitapādapadmam |
dhyāyedgaṇeśaṃ vividhaprakāraiḥ
67
supūjitaṃ śaktiyutaṃ pareśam || 67 ||
tato japaṃ vai manasā karomi
svamūlamantrasya vidhānayuktam |
asaṅkhyabhūtaṃ gaṇarāja haste
68
samarpayāmyeva gṛhāṇa ḍhuṇḍhe || 68 ||
ārārtikāṃ karpūrakādibhūtā-
-mapāradīpāṃ prakaromi pūrṇām |
cittena lambodara tāṃ gṛhāṇa
69
hyajñānadhvāntāghaharāṃ nijānām || 69 ||
vedeṣu vighneśvarakaiḥ sumantraiḥ
sumantritaṃ puṣpadalaṃ prabhūtam |
gṛhāṇa cittena mayā pradatta-
70
-mapāravṛttyā tvatha mantrapuṣpam || 70 ||
apāravṛtyā stutimekadantaṃ
gṛhāṇa cittena kṛtāṃ gaṇeśa |
yuktāṃ śrutismārtabhavaiḥ purāṇaiḥ
71
sarvaiḥ pareśādhipate mayā te || 71 ||
pradakṣiṇā mānasakalpitāstā
gṛhāṇa lambodara bhāvayuktāḥ |
saṅkhyāvihīnā vividhasvarūpā
72
bhaktān sadā rakṣa bhavārṇavādvai || 72 ||
natiṃ tato vighnapate gṛhāṇa
sāṣṭāṅgakādyāṃ vividhasvarūpām |
saṅkhyāvihīnāṃ manasā kṛtāṃ te
73
siddhyā ca buddhyā paripālayāśu || 73 ||
nyūnātiriktaṃ tu mayā kṛtaṃ ce-
-ttadarthamante manasā gṛhāṇa |
dūrvāṅkurānvighnapate pradattān
74
sampūrṇamevaṃ kuru pūjanaṃ me || 74 ||
kṣamasva vighnādhipate madīyān
sadāparādhān vividhasvarūpān |
bhaktiṃ madīyāṃ saphalāṃ kuruṣva
75
samprārthayāmi manasā gaṇeśa || 75 ||
tataḥ prasannena gajānanena
dattaṃ prasādaṃ śirasābhivandya |
svamastake taṃ paridhārayāmi
76
cittena vighneśvaramānato'smi || 76 ||
utthāya vighneśvara eva tasmā-
-dgatastatastvantaradhānaśaktyā |
śivādayastaṃ praṇipatya sarve
77
gatāḥ sucittena ca cintayāmi || 77 ||
sarvānnamaskṛtya tato'hameva
bhajāmi cittena gaṇādhipaṃ tam |
svasthānamāgatya mahānubhāvai-
78
-rbhaktairgaṇeśasya ca khelayāmi || 78 ||
evaṃ trikāleṣu gaṇādhipaṃ taṃ
cittena nityaṃ paripūjayāmi |
tenaiva tuṣṭaḥ pradadātu bhāvaṃ
79
viśveśvaro bhaktimayaṃ tu mahyam || 79 ||
gaṇeśapādodakapānakaṃ ca
hyucchiṣṭagandhasya sulepanaṃ tu |
nirmālyasandhāraṇakaṃ subhojyaṃ
80
lambodarasyāstu hi bhuktaśeṣam || 80 ||
yaṃ yaṃ karomyeva tadeva dīkṣā
gaṇeśvarasyāstu sadā gaṇeśa |
prasīda nityaṃ tava pādabhaktaṃ
81
kuruṣva māṃ brahmapate dayālo || 81 ||
tatastu śayyāṃ parikalpayāmi
mandārakārpāsakavastrayuktām |
suvāsapuṣpādibhirarcitāṃ
82
te gṛhāṇa nidrāṃ kuru vighnarāja || 82 ||
siddhyā ca buddhyā sahitaṃ gaṇeśa
sunidritaṃ vīkṣya tathāhameva |
gatvā svavāsaṃ ca karomi nidrāṃ
83
dhyātvā hṛdi brahmapatiṃ tadīyaḥ || 83 ||
etādṛśaṃ saukhyamamoghaśakte
dehi prabho mānasajaṃ gaṇeśa |
mahyaṃ ca tenaiva kṛtārtharūpo
84
bhavāmi bhaktirasalālaso'ham || 84 ||
gārgya uvāca |
evaṃ nityaṃ mahārāja gṛtsamado mahāyaśāḥ |
85
cakāra mānasīṃ pūjāṃ yogīndrāṇāṃ guruḥ svayam || 85 ||
ya etāṃ mānasīṃ pūjāṃ kariṣyati narottamaḥ |
86
paṭhiṣyati sadā so'pi gāṇapatyo bhaviṣyati || 86 ||
śrāvayiṣyati yo martyaḥ śroṣyate bhāvasaṃyutaḥ |
87
sa krameṇa mahīpāla brahmabhūto bhaviṣyati || 87 ||
yaṃ yamicchati taṃ taṃ vai saphalaṃ tasya jāyate |
88
ante svānandagaḥ so'pi yogivandyo bhaviṣyati || 88 ||
iti śrīmadāntye maudgalye gaṇeśamānasapūjā sampūrṇam |