📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.62 অরণ্যকাণ্ড - দ্বিষষ্টিতম সর্গঃ
3.62 Aranyakanda - Dvishashtitama Sargah
Valmiki Bengali
শ্রীমদ্বাল্মীকীয রামাযণে অরণ্যকাণ্ডম্ ।
অথ দ্বিষষ্টিতমস্সর্গঃ ।
সীতামপশ্যন্ধর্মাত্মা শোকোপহতচেতনঃ ।
বিললাপ মহাবাহূ রামঃ কমললোচনঃ ॥ 1 ॥
পশ্যন্নিব চ তাং সীতামপশ্যন্মদনার্দিতঃ ।
উবাচ রাঘবো বাক্যং বিলাপাশ্রযদুর্বচম্ ॥ 2 ॥
ত্বমশোকস্য শাখাভিঃ পুষ্পপ্রিযতযা প্রিযে ।
আবৃণোষি শরীরং তে মম শোকবিবর্ধিনী ॥ 3 ॥
কদলীস্কন্ধসদৃশৌ কদল্যা সংবৃতাবুভৌ ।
ঊরূ পশ্যামি তে দেবি নাসি শক্তা নিগূহিতুম্ ॥ 4 ॥
কর্ণিকারবনং ভদ্রে হসন্তী দেবি সেবসে ।
অলং তে পরিহাসেন মম বাধাবহেন বৈ ॥ 5 ॥
পরিহাসেন কিং সীতে পরিশ্রান্তস্য মে প্রিযে ।
অযং স পরিহাসোঽপি সাধু দেবি ন রোচতে ॥ 6 ॥
বিশেষেণাশ্রমস্থানে হাসোঽযং ন প্রশস্যতে ।
অবগচ্ছামি তে শীলং পরিহাসপ্রিযং প্রিযে ॥ 7 ॥
আগচ্ছ ত্বং বিশালাক্ষি শূন্যোঽযমুটজস্তব ।
সুব্যক্তং রাক্ষসৈস্সীতা ভক্ষিতা বা হৃতাপি বা ॥ 8 ॥
ন হি সা বিলপন্তং মামুপসম্প্রৈতি লক্ষ্মণ ।
এতানি মৃগযূথানি সাশ্রুনেত্রাণি লক্ষ্মণ ॥ 9 ॥
শংসন্তীব হি বৈদেহীং ভক্ষিতাং রজনীচরৈঃ ।
হা মমার্যে ক্ব যাতাসি হা সাধ্বি বরবর্ণিনি ॥ 10 ॥
হা সকামা ত্বযা দেবী কৈকেযী সা ভবিষ্যতি ।
সীতযা সহ নির্যাতো বিনা সীতামুপাগতঃ ॥ 11 ॥
কথং নাম প্রবেক্ষ্যামি শূন্যমন্তঃপুরং পুনঃ ।
নির্বীর্য ইতি লোকো মাং নির্দযশ্চেতি বক্ষ্যতি ॥ 12 ॥
কাতরত্বং প্রকাশং হি সীতাপনযনেন মে ।
নিবৃত্তবনবাসশ্চ জনকং মিথিলাধিপম্ ॥ 13 ॥
কুশলং পরিপৃচ্ছন্তং কথং শক্ষ্যে নিরীক্ষিতুম্ ।
বিদেহরাজো নূনং মাং দৃষ্ট্বা বিরহিতং তযা ॥ 14 ॥
সুতাস্নেহেন সন্তপ্তো মোহস্য বশমেষ্যতি ।
অথবা ন গমিষ্যামি পুরীং ভরতপালিতাম্ ॥ 15 ॥
স্বর্গোঽপি সীতযা হীনশ্শূন্য এব মতো মম ।
মামিহোত্সৃজ্য হি বনে গচ্ছাযোধ্যাং পুরীং শুভাম্ ॥ 16 ॥
ন ত্বহং তাং বিনা সীতাং জীবেযং হি কথঞ্চন ।
গাঢমাশ্লিষ্য ভরতো বাচ্যো মদ্বচনাত্ত্বযা ॥ 17 ॥
অনুজ্ঞাতোঽসি রামেণ পালযেতি বসুন্ধরাম্ ।
অম্বা চ মম কৈকেযী সুমিত্রা চ ত্বযা বিভো ॥ 18 ॥
কৌসল্যা চ যথান্যাযমভিবাদ্যা মমাঽজ্ঞযা ।
রক্ষণীযা প্রযত্নেন ভবতা সূক্তকারিণা ॥ 19 ॥
সীতাযাশ্চ বিনাশোঽযং মম চামিত্রকর্শন ।
বিস্তরেণ জনন্যা মে বিনিবেদ্যস্ত্বযা ভবেত্ ॥ 20 ॥
ইতি বিলপতি রাঘবে সুদীনে বনমুপগম্য তযা বিনা সুকেশ্যা ।
ভযবিকলমুখস্তু লক্ষ্মণোঽপি ব্যথিতমনা ভৃশমাতুরো বভূব ॥ 21 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে দ্বিষষ্টিতমস্সর্গঃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha dviṣaṣṭitamassargaḥ |
sītāmapaśyandharmātmā śokopahatacetanaḥ |
vilalāpa mahābāhū rāmaḥ kamalalocanaḥ || 1 ||
paśyanniva ca tāṃ sītāmapaśyanmadanārditaḥ |
uvāca rāghavo vākyaṃ vilāpāśrayadurvacam || 2 ||
tvamaśokasya śākhābhiḥ puṣpapriyatayā priye |
āvṛṇoṣi śarīraṃ te mama śokavivardhinī || 3 ||
kadalīskandhasadṛśau kadalyā saṃvṛtāvubhau |
ūrū paśyāmi te devi nāsi śaktā nigūhitum || 4 ||
karṇikāravanaṃ bhadre hasantī devi sevase |
alaṃ te parihāsena mama bādhāvahena vai || 5 ||
parihāsena kiṃ sīte pariśrāntasya me priye |
ayaṃ sa parihāso'pi sādhu devi na rocate || 6 ||
viśeṣeṇāśramasthāne hāso'yaṃ na praśasyate |
avagacchāmi te śīlaṃ parihāsapriyaṃ priye || 7 ||
āgaccha tvaṃ viśālākṣi śūnyo'yamuṭajastava |
suvyaktaṃ rākṣasaissītā bhakṣitā vā hṛtāpi vā || 8 ||
na hi sā vilapantaṃ māmupasampraiti lakṣmaṇa |
etāni mṛgayūthāni sāśrunetrāṇi lakṣmaṇa || 9 ||
śaṃsantīva hi vaidehīṃ bhakṣitāṃ rajanīcaraiḥ |
hā mamārye kva yātāsi hā sādhvi varavarṇini || 10 ||
hā sakāmā tvayā devī kaikeyī sā bhaviṣyati |
sītayā saha niryāto vinā sītāmupāgataḥ || 11 ||
kathaṃ nāma pravekṣyāmi śūnyamantaḥpuraṃ punaḥ |
nirvīrya iti loko māṃ nirdayaśceti vakṣyati || 12 ||
kātaratvaṃ prakāśaṃ hi sītāpanayanena me |
nivṛttavanavāsaśca janakaṃ mithilādhipam || 13 ||
kuśalaṃ paripṛcchantaṃ kathaṃ śakṣye nirīkṣitum |
videharājo nūnaṃ māṃ dṛṣṭvā virahitaṃ tayā || 14 ||
sutāsnehena santapto mohasya vaśameṣyati |
athavā na gamiṣyāmi purīṃ bharatapālitām || 15 ||
svargo'pi sītayā hīnaśśūnya eva mato mama |
māmihotsṛjya hi vane gacchāyodhyāṃ purīṃ śubhām || 16 ||
na tvahaṃ tāṃ vinā sītāṃ jīveyaṃ hi kathañcana |
gāḍhamāśliṣya bharato vācyo madvacanāttvayā || 17 ||
anujñāto'si rāmeṇa pālayeti vasundharām |
ambā ca mama kaikeyī sumitrā ca tvayā vibho || 18 ||
kausalyā ca yathānyāyamabhivādyā mamā'jñayā |
rakṣaṇīyā prayatnena bhavatā sūktakāriṇā || 19 ||
sītāyāśca vināśo'yaṃ mama cāmitrakarśana |
vistareṇa jananyā me vinivedyastvayā bhavet || 20 ||
iti vilapati rāghave sudīne vanamupagamya tayā vinā sukeśyā |
bhayavikalamukhastu lakṣmaṇo'pi vyathitamanā bhṛśamāturo babhūva || 21 ||
ityārṣe śrīmadrāmāyaṇe vālmīkīya ādikāvye araṇyakāṇḍe dviṣaṣṭitamassargaḥ ||
InfoLyter.in — Sacred Vedic Knowledge Portal · Free forever