📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.43 অরণ্যকাণ্ড - ত্রিচত্বারিংশ সর্গঃ
3.43 Aranyakanda - Trichatvarimsha Sargah
Valmiki Bengali
শ্রীমদ্বাল্মীকীয রামাযণে অরণ্যকাণ্ডম্ ।
অথ ত্রিচত্বারিংশস্সর্গঃ ।
সা তং সম্প্রেক্ষ্য সুশ্রোণী কুসুমান্যপচিন্বতী ।
হেমরাজতবর্ণাভ্যাং পার্শ্বাভ্যামুপশোভিতম্ ॥ 1 ॥
প্রহৃষ্টা চানবদ্যাঙ্গী মৃষ্টহাটকবর্ণিনী ।
ভর্তারমপি চক্রন্দ লক্ষ্মণং চাপি সাযুধম্ ॥ 2 ॥
তযাঽঽহূতৌ নরব্যাঘ্রৌ বৈদেহ্যা রামলক্ষ্মণৌ ।
বীক্ষমাণৌ তু তৌ দেশং তদা দদৃশতুর্মৃগম্ ॥ 3 ॥
শঙ্কমানস্তু তং দৃষ্ট্বা লক্ষ্মণো রামমব্রবীত্ ।
তমেবৈনমহং মন্যে মারীচং রাক্ষসং মৃগম্ ॥ 4 ॥
চরন্তোমৃগযাং হৃষ্টাঃ পাপেনোপাধিনা বনে ।
অনেন নিহতা রাজন্ রাজানঃ কামরূপিণা ॥ 5 ॥
অস্য মাযাবিদো মাযামৃগরূপমিদং কৃতম্ ।
ভানুমত্পুরুষব্যাঘ্র গন্ধর্বপুরসন্নিভম্ ॥ 6 ॥
মৃগো হ্যেবংবিধো রত্নবিচিত্রো নাস্তি রাঘব ।
জগত্যাং জগতীনাথ মাযৈষা হি ন সংশযঃ ॥ 7 ॥
এবং ব্রুবাণং কাকুত্স্থং প্রতিবার্য শুচিস্মিতা ।
উবাচ সীতা সংহৃষ্টা চর্মণা হৃতচেতনা ॥ 8 ॥
আর্যপুত্রাভিরামোঽসৌ মৃগো হরতি মে মনঃ ।
আনযৈনং মহাবাহো ক্রীডার্থং নো ভবিষ্যতি ॥ 9 ॥
ইহাশ্রমপদেঽস্মাকং বহবঃ পুণ্যদর্শনাঃ ।
মৃগাশ্চরন্তি সহিতাশ্চমরাস্সৃমরাস্তথা ॥ 10 ॥
ঋক্ষাঃ পৃষতসঙ্ঘাশ্চ বানরাঃ কিন্নরাস্তথা ।
বিচরন্তি মহাবাহো রুপশ্রেষ্ঠা মনোহরাঃ ॥ 11 ॥
ন চাস্য সদৃশো রাজন্দৃষ্টপূর্বো মৃগো মযা ।
তেজসা ক্ষমযা দীপ্ত্যা যথাঽযং মৃগসত্তমঃ ॥ 12 ॥
নানাবর্ণবিচিত্রাঙ্গো রত্নবিন্দুসমাচিতঃ ।
দ্যোতযন্বনমব্যগ্রং শোভতে শশিসন্নিভঃ ॥ 13 ॥
অহো রূপমহো লক্ষ্মীস্স্বরসম্পচ্চ শোভনা ।
মৃগোঽদ্ভুতো বিচিত্রাঙ্গো হৃদযং হরতীব মে ॥ 14 ॥
যদি গ্রহণমভ্যেতি জীবন্নেব মৃগস্তব ।
আশ্চর্যভূতং ভবতি বিস্মযং জনযিষ্যতি ॥ 15 ॥
সমাপ্তবনবাসানাং রাজ্যস্থানাং চ নঃ পুনঃ ।
অন্তঃপুরবিভূষার্থো মৃগ এষ ভবিষ্যতি ॥ 16 ॥
ভরতস্যার্যপুত্রস্য শ্বশ্রূণাং মম চ প্রভো ।
মৃগরূপমিদং ব্যক্তং বিস্মযং জনযিষ্যতি ॥ 17 ॥
জীবন্ন যদি তেঽভ্যেতি গ্রহণং মৃগসত্তমঃ ।
অজিনং নরশার্দূল রুচিরং মে ভবিষ্যতি ॥ 18 ॥
নিহতস্যাস্য সত্ত্বস্য জাম্বূনদমযত্বচি ।
শষ্পবৃস্যাং বিনীতাযামিচ্ছাম্যহমুপাসিতুম্ ॥ 19 ॥
কামবৃত্তমিদং রৌদ্রং স্ত্রীণামসদৃশং মতম্ ।
বপুষা ত্বস্য সত্ত্বস্য বিস্মযো জনিতো মম ॥ 20 ॥
তেন কাঞ্চনবর্ণেন মণিপ্রবরশৃঙ্গিণা ।
তরুণাদিত্যবর্ণেন নক্ষত্রপথবর্চসা ॥ 21 ॥
বভূব রাঘবস্যাপি মনো বিস্মযমাগতম্ ।
এবং সীতাবচঃ শ্রুত্বা তং দৃষ্ট্বা মৃগমদ্ভুতম্ ॥ 22 ॥
লোভিতস্তেন রূপেণ সীতযা চ প্রচোদিতঃ ।
উবাচ রাঘবো হৃষ্টো ভ্রাতরং লক্ষ্মণং বচঃ ॥ 23 ॥
পশ্য লক্ষ্মণ বৈদেহ্যাঃ স্পৃহাং মৃগগতামিমাম্ ।
রূপশ্রেষ্ঠতযা হ্যেষ মৃগোঽদ্য ন ভবিষ্যতি ॥ 24 ॥
ন বনে নন্দনোদ্ধেশে ন চৈত্ররথসংশ্রযে ।
কুতঃপৃথিব্যাং সৌমিত্রে যোঽস্য কশ্চিত্সমো মৃগঃ ॥ 25 ॥
প্রতিলোমানুলোমাশ্চ রুচিরা রোমরাজযঃ ।
শোভন্তে মৃগমাশ্রিত্য চিত্রাঃ কনকবিন্দবঃ ॥ 26 ॥
পশ্যাস্য জৃম্ভমাণস্য দীপ্তামগ্নিশিখোপমাম্ ।
জিহ্বাং মুখান্নিস্সরন্তীং মেঘাদিব শতহ্রদাম্ ॥ 27 ॥
মসারগল্লর্কমুখশ্শঙ্খমুক্তানিভোদরঃ ।
কস্য নামাভিরূপ্যোঽসৌ ন মনো লোভযেন্মৃগঃ ॥ 28 ॥
কস্য রূপমিদং দৃষ্ট্বা জাম্বূনদ মযপ্রভম্ ।
নানারত্নমযং দিব্যং ন মনো বিস্মযং ব্রজেত্ ॥ 29 ॥
মাংসহেতোরপি মৃগান্বিনোদার্থং চ ধন্বনঃ ।
ঘ্নন্তি লক্ষ্মণ রাজানো মৃগযাযাং মহাবনে ॥ 30 ॥
ধনানি ব্যবসাযেন বিচীযন্তে মহাবনে ।
ধাতবো বিবিধাশ্চাপি মণিরত্নসুবর্ণিনঃ ॥ 31 ॥
তত্সারমখিলং নৃণাং ধনং নিচযবর্ধনম্ ।
মনসা চিন্তিতং সর্বং যথা শুক্রস্য লক্ষ্মণ ॥ 32 ॥
অর্থী যেনার্থকৃত্যেন সংব্রজত্যবিচারযন্ ।
তমর্থমর্থশাস্ত্রজ্ঞাঃ প্রাহুরর্থ্যাশ্চ লক্ষ্মণ ॥ 33 ॥
এতস্য মৃগরত্নস্য পরার্ধ্যে কাঞ্চনত্বচি ।
উপবেক্ষ্যতি বৈদেহী মযা সহ সুমধ্যমা ॥ 34 ॥
ন কাদলী ন প্রিযকী ন প্রবেণী ন চাবিকী ।
ভবেদেতস্য সদৃশী স্পর্শনেনেতি মে মতিঃ ॥ 35 ॥
এষ চৈব মৃগশ্শ্রীমান্ যশ্চ দিব্যো নভশ্চরঃ ।
উভাবেতৌ মৃগৌ দিব্যৌ তারামৃগমহীমৃগৌ ॥ 36 ॥
যদি বাঽযং তথা যন্মাং ভবেদ্বদসি লক্ষ্মণ ।
মাযৈষা রাক্ষসস্যেতি কর্তব্যোস্য বধো মযা ॥ 37 ॥
এতেন হি নৃশংসেন মারীচেনাকৃতাত্মনা ।
বনে বিচরতা পূর্বং হিংসিতা মুনিপুঙ্গবাঃ ॥ 38 ॥
উত্থায বহবো যেন মৃগযাযাং জনাধিপাঃ ।
নিহতাঃ পরমেষ্বাসাস্তস্মাদ্বধ্যস্ত্বযং মৃগঃ ॥ 39 ॥
পুরস্তাদিহ বাতাপিঃ পরিভূয তপস্বিনঃ ।
উদরস্থো দ্বিজান্হন্তিস্বগর্ভোঽশ্বতরীমিব ॥ 40 ॥
স কদাচিচ্চিরাল্লোভাদাসসাদ মহামুনিম্ ।
অগস্ত্যং তেজসা যুক্তং ভক্ষস্তস্য বভূব হ ॥ 41 ॥
সমুত্থানে ব তদ্রূপং কর্তুকামং সমীক্ষ্য তম্ ।
উত্স্মযিত্বা তু ভগবান্বাতাপিমিদমব্রবীত্ ॥ 42 ॥
ত্বযাঽবিগণ্য বাতাপে পরিভূতাস্স্বতেজসা ।
জীবলোকে দ্বিজশ্রেষ্ঠাস্তস্মাদসি জরাং গতঃ ॥ 43 ॥
তদেবং ন ভবেদ্রক্ষোবাতাপিরিব লক্ষ্মণ ।
মদ্বিধং যোঽতিমন্যেত ধর্মনিত্যং জিতেন্দ্রিযম্ ॥ 44 ॥
ভবেদ্ধতোঽযং বাতাপিরগস্ত্যেনেব মাং গতঃ ।
ইহ ত্বং ভব সন্নদ্দো যন্ত্রিতো রক্ষ মৈথিলীম্ ॥ 45 ॥
অস্যামাযত্তমস্মাকং যত্কৃত্যং রঘুনন্দন ।
অহমেনং বধিষ্যামি গ্রহীষ্যাম্যপি বা মৃগম্ ॥ 46 ॥
যাবদ্গচ্ছামি সৌমিত্রে মৃগমানযিতুং দ্রুতম্ ।
পশ্য লক্ষ্মণ বৈদেহীং মৃগত্বচি গতস্পৃহাম্ ॥ 47 ॥
ত্বচা প্রধানযা হ্যেষ মৃগোঽদ্য ন ভবিষ্যতি ।
অপ্রমত্তেন তে ভাব্যমাশ্রমস্থেন সীতযা ॥ 48 ॥
যাবত্পৃষতমেকেন সাযকেন নিহন্ম্যহম্ ।
হত্বৈতচ্চর্ম চাদায শীঘ্রমেষ্যামি লক্ষ্মণ ॥ 49 ॥
প্রদক্ষিণেনাতিবলেন পক্ষিণা জটাযুষা বুদ্ধিমতা চ লক্ষ্মণ ।
ভবাপ্রমত্তঃ পরিগৃহ্য মৈথিলীং প্রতিক্ষণং সর্বত এব শঙ্কিতঃ ॥ 50 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে ত্রিচত্বারিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha tricatvāriṃśassargaḥ |
sā taṃ samprekṣya suśroṇī kusumānyapacinvatī |
hemarājatavarṇābhyāṃ pārśvābhyāmupaśobhitam || 1 ||
prahṛṣṭā cānavadyāṅgī mṛṣṭahāṭakavarṇinī |
bhartāramapi cakranda lakṣmaṇaṃ cāpi sāyudham || 2 ||
tayā''hūtau naravyāghrau vaidehyā rāmalakṣmaṇau |
vīkṣamāṇau tu tau deśaṃ tadā dadṛśaturmṛgam || 3 ||
śaṅkamānastu taṃ dṛṣṭvā lakṣmaṇo rāmamabravīt |
tamevainamahaṃ manye mārīcaṃ rākṣasaṃ mṛgam || 4 ||
carantomṛgayāṃ hṛṣṭāḥ pāpenopādhinā vane |
anena nihatā rājan rājānaḥ kāmarūpiṇā || 5 ||
asya māyāvido māyāmṛgarūpamidaṃ kṛtam |
bhānumatpuruṣavyāghra gandharvapurasannibham || 6 ||
mṛgo hyevaṃvidho ratnavicitro nāsti rāghava |
jagatyāṃ jagatīnātha māyaiṣā hi na saṃśayaḥ || 7 ||
evaṃ bruvāṇaṃ kākutsthaṃ prativārya śucismitā |
uvāca sītā saṃhṛṣṭā carmaṇā hṛtacetanā || 8 ||
āryaputrābhirāmo'sau mṛgo harati me manaḥ |
ānayainaṃ mahābāho krīḍārthaṃ no bhaviṣyati || 9 ||
ihāśramapade'smākaṃ bahavaḥ puṇyadarśanāḥ |
mṛgāścaranti sahitāścamarāssṛmarāstathā || 10 ||
ṛkṣāḥ pṛṣatasaṅghāśca vānarāḥ kinnarāstathā |
vicaranti mahābāho rupaśreṣṭhā manoharāḥ || 11 ||
na cāsya sadṛśo rājandṛṣṭapūrvo mṛgo mayā |
tejasā kṣamayā dīptyā yathā'yaṃ mṛgasattamaḥ || 12 ||
nānāvarṇavicitrāṅgo ratnabindusamācitaḥ |
dyotayanvanamavyagraṃ śobhate śaśisannibhaḥ || 13 ||
aho rūpamaho lakṣmīssvarasampacca śobhanā |
mṛgo'dbhuto vicitrāṅgo hṛdayaṃ haratīva me || 14 ||
yadi grahaṇamabhyeti jīvanneva mṛgastava |
āścaryabhūtaṃ bhavati vismayaṃ janayiṣyati || 15 ||
samāptavanavāsānāṃ rājyasthānāṃ ca naḥ punaḥ |
antaḥpuravibhūṣārtho mṛga eṣa bhaviṣyati || 16 ||
bharatasyāryaputrasya śvaśrūṇāṃ mama ca prabho |
mṛgarūpamidaṃ vyaktaṃ vismayaṃ janayiṣyati || 17 ||
jīvanna yadi te'bhyeti grahaṇaṃ mṛgasattamaḥ |
ajinaṃ naraśārdūla ruciraṃ me bhaviṣyati || 18 ||
nihatasyāsya sattvasya jāmbūnadamayatvaci |
śaṣpabṛsyāṃ vinītāyāmicchāmyahamupāsitum || 19 ||
kāmavṛttamidaṃ raudraṃ strīṇāmasadṛśaṃ matam |
vapuṣā tvasya sattvasya vismayo janito mama || 20 ||
tena kāñcanavarṇena maṇipravaraśṛṅgiṇā |
taruṇādityavarṇena nakṣatrapathavarcasā || 21 ||
babhūva rāghavasyāpi mano vismayamāgatam |
evaṃ sītāvacaḥ śrutvā taṃ dṛṣṭvā mṛgamadbhutam || 22 ||
lobhitastena rūpeṇa sītayā ca pracoditaḥ |
uvāca rāghavo hṛṣṭo bhrātaraṃ lakṣmaṇaṃ vacaḥ || 23 ||
paśya lakṣmaṇa vaidehyāḥ spṛhāṃ mṛgagatāmimām |
rūpaśreṣṭhatayā hyeṣa mṛgo'dya na bhaviṣyati || 24 ||
na vane nandanoddheśe na caitrarathasaṃśraye |
kutaḥpṛthivyāṃ saumitre yo'sya kaścitsamo mṛgaḥ || 25 ||
pratilomānulomāśca rucirā romarājayaḥ |
śobhante mṛgamāśritya citrāḥ kanakabindavaḥ || 26 ||
paśyāsya jṛmbhamāṇasya dīptāmagniśikhopamām |
jihvāṃ mukhānnissarantīṃ meghādiva śatahradām || 27 ||
masāragallarkamukhaśśaṅkhamuktānibhodaraḥ |
kasya nāmābhirūpyo'sau na mano lobhayenmṛgaḥ || 28 ||
kasya rūpamidaṃ dṛṣṭvā jāmbūnada mayaprabham |
nānāratnamayaṃ divyaṃ na mano vismayaṃ vrajet || 29 ||
māṃsahetorapi mṛgānvinodārthaṃ ca dhanvanaḥ |
ghnanti lakṣmaṇa rājāno mṛgayāyāṃ mahāvane || 30 ||
dhanāni vyavasāyena vicīyante mahāvane |
dhātavo vividhāścāpi maṇiratnasuvarṇinaḥ || 31 ||
tatsāramakhilaṃ nṛṇāṃ dhanaṃ nicayavardhanam |
manasā cintitaṃ sarvaṃ yathā śukrasya lakṣmaṇa || 32 ||
arthī yenārthakṛtyena saṃvrajatyavicārayan |
tamarthamarthaśāstrajñāḥ prāhurarthyāśca lakṣmaṇa || 33 ||
etasya mṛgaratnasya parārdhye kāñcanatvaci |
upavekṣyati vaidehī mayā saha sumadhyamā || 34 ||
na kādalī na priyakī na praveṇī na cāvikī |
bhavedetasya sadṛśī sparśaneneti me matiḥ || 35 ||
eṣa caiva mṛgaśśrīmān yaśca divyo nabhaścaraḥ |
ubhāvetau mṛgau divyau tārāmṛgamahīmṛgau || 36 ||
yadi vā'yaṃ tathā yanmāṃ bhavedvadasi lakṣmaṇa |
māyaiṣā rākṣasasyeti kartavyosya vadho mayā || 37 ||
etena hi nṛśaṃsena mārīcenākṛtātmanā |
vane vicaratā pūrvaṃ hiṃsitā munipuṅgavāḥ || 38 ||
utthāya bahavo yena mṛgayāyāṃ janādhipāḥ |
nihatāḥ parameṣvāsāstasmādvadhyastvayaṃ mṛgaḥ || 39 ||
purastādiha vātāpiḥ paribhūya tapasvinaḥ |
udarastho dvijānhantisvagarbho'śvatarīmiva || 40 ||
sa kadāciccirāllobhādāsasāda mahāmunim |
agastyaṃ tejasā yuktaṃ bhakṣastasya babhūva ha || 41 ||
samutthāne va tadrūpaṃ kartukāmaṃ samīkṣya tam |
utsmayitvā tu bhagavānvātāpimidamabravīt || 42 ||
tvayā'vigaṇya vātāpe paribhūtāssvatejasā |
jīvaloke dvijaśreṣṭhāstasmādasi jarāṃ gataḥ || 43 ||
tadevaṃ na bhavedrakṣovātāpiriva lakṣmaṇa |
madvidhaṃ yo'timanyeta dharmanityaṃ jitendriyam || 44 ||
bhaveddhato'yaṃ vātāpiragastyeneva māṃ gataḥ |
iha tvaṃ bhava sannaddo yantrito rakṣa maithilīm || 45 ||
asyāmāyattamasmākaṃ yatkṛtyaṃ raghunandana |
ahamenaṃ vadhiṣyāmi grahīṣyāmyapi vā mṛgam || 46 ||
yāvadgacchāmi saumitre mṛgamānayituṃ drutam |
paśya lakṣmaṇa vaidehīṃ mṛgatvaci gataspṛhām || 47 ||
tvacā pradhānayā hyeṣa mṛgo'dya na bhaviṣyati |
apramattena te bhāvyamāśramasthena sītayā || 48 ||
yāvatpṛṣatamekena sāyakena nihanmyaham |
hatvaitaccarma cādāya śīghrameṣyāmi lakṣmaṇa || 49 ||
pradakṣiṇenātibalena pakṣiṇā jaṭāyuṣā buddhimatā ca lakṣmaṇa |
bhavāpramattaḥ parigṛhya maithilīṃ pratikṣaṇaṃ sarvata eva śaṅkitaḥ || 50 ||
ityārṣe śrīmadrāmāyaṇe vālmīkīya ādikāvye araṇyakāṇḍe tricatvāriṃśassargaḥ ||
InfoLyter.in — Sacred Vedic Knowledge Portal · Free forever