📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.19 অরণ্যকাণ্ড - একোনবিংশ সর্গঃ
3.19 Aranyakanda - Ekonavimsha Sargah
Valmiki Bengali
শ্রীমদ্বাল্মীকীয রামাযণে অরণ্যকাণ্ডম্ ।
অথ একোনবিংশস্সর্গঃ ।
তাং তথা পতিতাং দৃষ্ট্বা বিরূপাং শোণিতোক্ষিতাম্ ।
ভগিনীং ক্রোধসন্তপ্তঃ খরঃ পপ্রচ্ছ রাক্ষসঃ ॥ 1 ॥
উত্তিষ্ঠ তাবদাখ্যাহি প্রমোহং জহি সম্ভ্রমম্ ।
ব্যক্তমাখ্যাহি কেন ত্বমেবং রূপা বিরূপিতা ॥ 2 ॥
কঃ কৃষ্ণসর্পমাসীনমাশীবিষমনাগসম্ ।
তুদত্যভিসমাপন্নমঙ্গুল্যগ্রেণ লীলযা ॥ 3 ॥
কঃ কালপাশং সমাসজ্য কণ্ঠে মোহান্ন বুধ্যতে ।
যস্ত্বামদ্য সমাসাদ্য পীতবান্বিষমুত্তমম্ ॥ 4 ॥
বলবিক্রমসম্পন্না কামগা কামরূপিণী ।
ইমামবস্থাং নীতা ত্বং কেনান্তকসমাগতা ॥ 5 ॥
দেবগন্ধর্বভূতানামৃষীণাং চ মহাত্মনাম্ ।
কোঽযমেবং বিরূপাং ত্বাং মহাবীর্যশ্চকার হ ॥ 6 ॥
ন হি পশ্যাম্যহং লোকে যঃ কুর্যান্মম বিপ্রিযম্ ।
অমরেষু সহস্রাক্ষং মহেন্দ্রং পাকশাসনম্ ॥ 7 ॥
অদ্যাহং মার্গণৈঃ প্রাণানাদাস্যে জীবিতান্তকৈঃ ।
সলিলে ক্ষীরমাসক্তং নিষ্পিবন্নিব সারসঃ ॥ 8 ॥
নিহতস্য মযা সঙ্খ্যে শরসঙ্কৃত্তমর্মণঃ ।
সফেনং রুধিরং রক্তং মেদিনী কস্য পাস্যতি ॥ 9 ॥
কস্য পত্ররথাঃ কাযান্মাংসমুত্কৃত্য সঙ্গতাঃ ।
প্রহৃষ্টা ভক্ষযিষ্যন্তি নিহতস্য মযা রণে ॥ 10 ॥
তং ন দেবা ন গন্ধর্বা ন পিশাচা ন রাক্ষসাঃ ।
মযাপকৃষ্টং কৃপণং শক্তাস্ত্রাতুং মহাহবে ॥ 11 ॥
উপলভ্য শনৈস্সঞ্জ্ঞাং তং মে শংসিতুমর্হসি ।
যেন ত্বং দুর্বিনীতেন বনে বিক্রম্য নির্জিতা ॥ 12 ॥
ইতি ভ্রাতুর্বচশ্শ্রুত্বা ক্রুদ্ধস্য চ বিশেষতঃ ।
ততশ্শূর্পণখা বাক্যং সবাষ্পমিদমব্রবীত্ ॥ 13 ॥
তরুণৌ রূপসম্পন্নৌ সুকুমারৌ মহাবলৌ ।
পুণ্ডরীকবিশালাক্ষৌ চীরকৃষ্ণাজিনাম্বরৌ ॥ 14 ॥
ফলমূলাশনৌ দান্তৌ তাপসৌ ধর্মচারিণৌ ।
পুত্রৌ দশরথস্যাস্তাং ভ্রাতরৌ রামলক্ষ্মণৌ ॥ 15 ॥
গন্ধর্বরাজপ্রতিমৌ পার্থিবব্যঞ্জনান্বিতৌ ।
দেবৌ বা মানুষৌ বা তৌ ন তর্কযিতুমুত্সহে ॥ 16 ॥
তরুণী রূপসম্পন্না সর্বাভরণভূষিতা ।
দৃষ্টা তত্র মযা নারী তযোর্মধ্যে সুমধ্যমা ॥ 17 ॥
তাভ্যামুভাভ্যাং সম্ভূয প্রমদামধিকৃত্য তাম্ ।
ইমামবস্থাং নীতাহং যথানাথাসতী তথা ॥ 18 ॥
তস্যাশ্চানৃজুবৃত্তাযাস্তযোশ্চ হতযোরহম্ ।
সফেনং পাতুমিচ্ছামি রুধিরং রণমূর্ধনি ॥ 19 ॥
এষ মে প্রথমঃ কামঃ কৃতস্তাত ত্বযা ভবেত্ ।
তস্যাস্তযোশ্চ রুধিরং পিবেযমহমাহবে ॥ 20 ॥
ইতি তস্যাং ব্রুবাণাযাং চতুর্দশ মহাবলান্ ।
ব্যাদিদেশ খরঃ ক্রুদ্ধো রাক্ষসানন্তকোপমান্ ॥ 21 ॥
মানুষৌ শস্ত্রসম্পন্নৌ চীরকৃষ্ণাজিনাম্বরৌ ।
প্রবিষ্টৌ দণ্ডকারণ্যং ঘোরং প্রমদযা সহ ॥ 22 ॥
তৌ হত্বা তাং চ দুর্বৃত্তামপাবর্তিতুমর্হথ ।
ইযং চ রুধিরং তেষাং ভগিনী মম পাস্যতি ॥ 23 ॥
মনোরথোঽযমিষ্টোঽস্যা ভগিন্যা মম রাক্ষসাঃ ।
শীঘ্রং সম্পাদ্যতাং তৌ চ প্রমথ্য স্বেন তেজসা ॥ 24 ॥
ইতি প্রতিসমাদিষ্টা রাক্ষসাস্তে চতুর্দশ ।
তত্র জগ্মুস্তযা সার্ধং ঘনা বাতেরিতা যথা ॥ 25 ॥
ততস্তু তে তং সমুদগ্রতেজসং তথাপিঽতীক্ষ্ণপ্রদরা নিশাচরাঃ ।
ন শেকুরেনং সহসা প্রমর্দিতুং বনদ্বিপা দীপ্তমিবাগ্নিমুত্থিতম্ ॥ 26 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে একোনবিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha ekonaviṃśassargaḥ |
tāṃ tathā patitāṃ dṛṣṭvā virūpāṃ śoṇitokṣitām |
bhaginīṃ krodhasantaptaḥ kharaḥ papraccha rākṣasaḥ || 1 ||
uttiṣṭha tāvadākhyāhi pramohaṃ jahi sambhramam |
vyaktamākhyāhi kena tvamevaṃ rūpā virūpitā || 2 ||
kaḥ kṛṣṇasarpamāsīnamāśīviṣamanāgasam |
tudatyabhisamāpannamaṅgulyagreṇa līlayā || 3 ||
kaḥ kālapāśaṃ samāsajya kaṇṭhe mohānna budhyate |
yastvāmadya samāsādya pītavānviṣamuttamam || 4 ||
balavikramasampannā kāmagā kāmarūpiṇī |
imāmavasthāṃ nītā tvaṃ kenāntakasamāgatā || 5 ||
devagandharvabhūtānāmṛṣīṇāṃ ca mahātmanām |
ko'yamevaṃ virūpāṃ tvāṃ mahāvīryaścakāra ha || 6 ||
na hi paśyāmyahaṃ loke yaḥ kuryānmama vipriyam |
amareṣu sahasrākṣaṃ mahendraṃ pākaśāsanam || 7 ||
adyāhaṃ mārgaṇaiḥ prāṇānādāsye jīvitāntakaiḥ |
salile kṣīramāsaktaṃ niṣpibanniva sārasaḥ || 8 ||
nihatasya mayā saṅkhye śarasaṅkṛttamarmaṇaḥ |
saphenaṃ rudhiraṃ raktaṃ medinī kasya pāsyati || 9 ||
kasya patrarathāḥ kāyānmāṃsamutkṛtya saṅgatāḥ |
prahṛṣṭā bhakṣayiṣyanti nihatasya mayā raṇe || 10 ||
taṃ na devā na gandharvā na piśācā na rākṣasāḥ |
mayāpakṛṣṭaṃ kṛpaṇaṃ śaktāstrātuṃ mahāhave || 11 ||
upalabhya śanaissañjñāṃ taṃ me śaṃsitumarhasi |
yena tvaṃ durvinītena vane vikramya nirjitā || 12 ||
iti bhrāturvacaśśrutvā kruddhasya ca viśeṣataḥ |
tataśśūrpaṇakhā vākyaṃ sabāṣpamidamabravīt || 13 ||
taruṇau rūpasampannau sukumārau mahābalau |
puṇḍarīkaviśālākṣau cīrakṛṣṇājināmbarau || 14 ||
phalamūlāśanau dāntau tāpasau dharmacāriṇau |
putrau daśarathasyāstāṃ bhrātarau rāmalakṣmaṇau || 15 ||
gandharvarājapratimau pārthivavyañjanānvitau |
devau vā mānuṣau vā tau na tarkayitumutsahe || 16 ||
taruṇī rūpasampannā sarvābharaṇabhūṣitā |
dṛṣṭā tatra mayā nārī tayormadhye sumadhyamā || 17 ||
tābhyāmubhābhyāṃ sambhūya pramadāmadhikṛtya tām |
imāmavasthāṃ nītāhaṃ yathānāthāsatī tathā || 18 ||
tasyāścānṛjuvṛttāyāstayośca hatayoraham |
saphenaṃ pātumicchāmi rudhiraṃ raṇamūrdhani || 19 ||
eṣa me prathamaḥ kāmaḥ kṛtastāta tvayā bhavet |
tasyāstayośca rudhiraṃ pibeyamahamāhave || 20 ||
iti tasyāṃ bruvāṇāyāṃ caturdaśa mahābalān |
vyādideśa kharaḥ kruddho rākṣasānantakopamān || 21 ||
mānuṣau śastrasampannau cīrakṛṣṇājināmbarau |
praviṣṭau daṇḍakāraṇyaṃ ghoraṃ pramadayā saha || 22 ||
tau hatvā tāṃ ca durvṛttāmapāvartitumarhatha |
iyaṃ ca rudhiraṃ teṣāṃ bhaginī mama pāsyati || 23 ||
manoratho'yamiṣṭo'syā bhaginyā mama rākṣasāḥ |
śīghraṃ sampādyatāṃ tau ca pramathya svena tejasā || 24 ||
iti pratisamādiṣṭā rākṣasāste caturdaśa |
tatra jagmustayā sārdhaṃ ghanā vāteritā yathā || 25 ||
tatastu te taṃ samudagratejasaṃ tathāpi'tīkṣṇapradarā niśācarāḥ |
na śekurenaṃ sahasā pramardituṃ vanadvipā dīptamivāgnimutthitam || 26 ||
ityārṣe śrīmadrāmāyaṇe vālmīkīya ādikāvye araṇyakāṇḍe ekonaviṃśassargaḥ ||
InfoLyter.in — Sacred Vedic Knowledge Portal · Free forever