📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.17 অরণ্যকাণ্ড - সপ্তদশ সর্গঃ
3.17 Aranyakanda - Saptadasha Sargah
Valmiki Bengali
শ্রীমদ্বাল্মীকীয রামাযণে অরণ্যকাণ্ডম্ ।
অথ সপ্তদশস্সর্গঃ ।
কৃতাভিষেকো রামস্তু সীতা সৌমিত্রিরেব চ ।
তস্মাদ্গোদাবরীতীরাত্ততো জগ্মুস্বমাশ্রমম্ ॥ 1 ॥
আশ্রমং তমুপাগম্য রাঘবস্সহ লক্ষ্মণঃ ।
কৃত্বা পৌর্বাহ্ণিকং কর্ম পর্ণশালামুপাগমত্ ॥ 2 ॥
উবাস সুখিতস্তত্র পূজ্যমানো মহর্ষিভিঃ ।
লক্ষ্মণেন সহ ভ্রাত্রা চকার বিবিধাঃ কথাঃ ॥ 3 ॥
স রামঃ পর্ণশালাযামাসীনস্সহ সীতযা ।
বিররাজ মহাবাহুশ্চিত্রযা চন্দ্রমাঃ ইব ॥ 4 ॥
তদাঽঽসীনস্য রামস্য কথাসংসক্তচেতসঃ ।
তং দেশং রাক্ষসী কাচিদাজগাম যদৃচ্ছযা ॥ 5 ॥
সা তু শূর্পণখা নাম দশগ্রীবস্য রাক্ষসঃ ।
ভগিনী রামমাসাদ্য দদর্শ ত্রিদশোপমম্ ॥ 6 ॥
সিংহোরস্কং মহাবাহুং পদ্মপত্রনিভেক্ষণম্ ।
আজানুবাহুং দীপ্তাস্যমতীব প্রিযদর্শনম্ ॥ 7 ॥
গজবিক্রান্তগমনং জটামণ্ডলধারিণম্ ।
সুকুমারং মহাসত্ত্বং পার্থিবব্যঞ্জনান্বিতম্ ॥ 8 ॥
রামমিন্দীবরশ্যামং কন্দর্পসদৃশপ্রভম্ ।
বভূবেন্দ্রোপমং দৃষ্ট্বা রাক্ষসী কামমোহিতা ॥ 9 ॥
সুমুখং দুর্মুখী রামং বৃত্তমধ্যং মহোদরী ।
বিশালাক্ষং বিরূপাক্ষী সুকেশং তাম্রমূর্ধজা ॥ 10 ॥
প্রীতিরূপং বিরূপা সা সুস্বরং ভৈরবস্বরা ।
তরুণং দারুণা বৃদ্ধা দক্ষিণং বামভাষিণী ॥ 11 ॥
ন্যাযবৃত্তং সুদুর্বৃত্তা প্রিযমপ্রিযদর্শনা ।
শরীরজসমাবিষ্টা রাক্ষসী বাক্যমব্রবীত্ ॥ 12 ॥
জটী তাপসরূপেণ সভার্যশ্শরচাপধৃত্ ।
আগতস্ত্বমিমং দেশং কথং রাক্ষসসেবিতম্ ॥ 13 ॥
কিমাগমনকৃত্যং তে তত্ত্বমাখ্যাতুমর্হসি ।
এবমুক্তস্তু রাক্ষস্যা শূর্পণখ্যা পরন্তপঃ ॥ 14 ॥
ঋজুবুদ্ধিতযা সর্বমাখ্যাতুমুপচক্রমে ।
অনৃতং ন হি রামস্য কদাচিদপি সম্মতম্ ॥ 15 ॥
বিশেষেণাঽশ্রমস্থস্য সমীপে স্ত্রীজনস্য চ ।
আসীদ্ধশরথো নাম রাজা ত্রিদশবিক্রমঃ ॥ 16 ॥
তস্যাহমগ্রজঃ পুত্রো রামো নাম জনৈশ্শ্রুতঃ ।
ভ্রাতাঽযং লক্ষ্মণো নাম যবীযান্মামনুব্রতঃ ॥ 17 ॥
ইযং ভার্যা চ বৈদেহী মম সীতেতি বিশ্রুতা ।
নিযোগাত্ তু নরেন্দ্রস্য পিতুর্মাতুশ্চ যন্ত্রিতঃ ॥ 18 ॥
ধর্মার্থং ধর্মকাঙ্ক্ষী চ বনং বস্তুমিহাগতঃ ।
ত্বাং তু বেদিতুমিচ্ছামি কস্য ত্বং কাসি কস্য বা ॥ 19 ॥
ত্বং হি তাবন্মনোজ্ঞাঙ্গী রাক্ষসী প্রতিভাসি মে ।
ইহ বা কিন্নিমিত্তং ত্বমাগতা ব্রূহি তত্ত্বতঃ ॥ 20 ॥
সাব্রবীদ্ বচনং শ্রুত্বা রাক্ষসী মদনার্দিতা ।
শ্রূযতাং রাম বক্ষ্যামি তত্ত্বার্থং বচনং মম ॥ 21 ॥
অহং শূর্পণখা নাম রাক্ষসী কামরূপিণী ।
অরণ্যং বিচরামীদমেকা সর্বভযঙ্করা ॥ 22 ॥
রাবণো নাম মে ভ্রাতা বলীযান্রাক্ষসেশ্বরঃ ।
বীরো বিশ্রবসঃ পুত্রো যদি তে শ্রোত্রমাগতঃ ॥ 23 ॥
প্রবৃদ্ধনিদ্রশ্চ সদা কুম্ভকর্ণো মহাবলঃ ।
বিভীষণস্তু ধর্মাত্মা ন তু রাক্ষসচেষ্টিতঃ ॥ 24 ॥
প্রখ্যাতবীর্যৌ চ রণে ভ্রাতরৌ খরদূষণৌ ।
তানহং সমতিক্রান্তা রাম ত্বা পূর্বদর্শনাত্ ॥ 25 ॥
সমুপেতাস্মি ভাবেন ভর্তারং পুরুষোত্তমম্ ।
অহং প্রভাবসম্পন্না স্বচ্ছন্দবলগামিনী ॥ 26 ॥
চিরায ভব মে ভর্তা সীতযা কিং করিষ্যসি ।
বিকৃতা চ বিরূপা চ ন চেযং সদৃশী তব ॥ 27 ॥
অহমেবানুরূপা তে ভার্যা রূপেণ পশ্য মাম্ ।
ইমাং বিরূপামসতীং করালাং নির্ণতোদরীম্ ॥ 28 ॥
অনেন তে সহ ভ্রাত্রা ভক্ষযিষ্যামি মানুষীম্ ।
ততঃ পর্বতশৃঙ্গাণি বনানি বিবিধানি চ ॥ 29 ॥
পশ্যন্সহ মযা কান্ত দণ্ডকান্বিচরিষ্যসি ।
ইত্যেবমুক্তঃ কাকুত্স্থঃ প্রহস্য মদিরেক্ষণাম্ ॥ 30 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে সপ্তদশস্সর্গঃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha saptadaśassargaḥ |
kṛtābhiṣeko rāmastu sītā saumitrireva ca |
tasmādgodāvarītīrāttato jagmusvamāśramam || 1 ||
āśramaṃ tamupāgamya rāghavassaha lakṣmaṇaḥ |
kṛtvā paurvāhṇikaṃ karma parṇaśālāmupāgamat || 2 ||
uvāsa sukhitastatra pūjyamāno maharṣibhiḥ |
lakṣmaṇena saha bhrātrā cakāra vividhāḥ kathāḥ || 3 ||
sa rāmaḥ parṇaśālāyāmāsīnassaha sītayā |
virarāja mahābāhuścitrayā candramāḥ iva || 4 ||
tadā''sīnasya rāmasya kathāsaṃsaktacetasaḥ |
taṃ deśaṃ rākṣasī kācidājagāma yadṛcchayā || 5 ||
sā tu śūrpaṇakhā nāma daśagrīvasya rākṣasaḥ |
bhaginī rāmamāsādya dadarśa tridaśopamam || 6 ||
siṃhoraskaṃ mahābāhuṃ padmapatranibhekṣaṇam |
ājānubāhuṃ dīptāsyamatīva priyadarśanam || 7 ||
gajavikrāntagamanaṃ jaṭāmaṇḍaladhāriṇam |
sukumāraṃ mahāsattvaṃ pārthivavyañjanānvitam || 8 ||
rāmamindīvaraśyāmaṃ kandarpasadṛśaprabham |
babhūvendropamaṃ dṛṣṭvā rākṣasī kāmamohitā || 9 ||
sumukhaṃ durmukhī rāmaṃ vṛttamadhyaṃ mahodarī |
viśālākṣaṃ virūpākṣī sukeśaṃ tāmramūrdhajā || 10 ||
prītirūpaṃ virūpā sā susvaraṃ bhairavasvarā |
taruṇaṃ dāruṇā vṛddhā dakṣiṇaṃ vāmabhāṣiṇī || 11 ||
nyāyavṛttaṃ sudurvṛttā priyamapriyadarśanā |
śarīrajasamāviṣṭā rākṣasī vākyamabravīt || 12 ||
jaṭī tāpasarūpeṇa sabhāryaśśaracāpadhṛt |
āgatastvamimaṃ deśaṃ kathaṃ rākṣasasevitam || 13 ||
kimāgamanakṛtyaṃ te tattvamākhyātumarhasi |
evamuktastu rākṣasyā śūrpaṇakhyā parantapaḥ || 14 ||
ṛjubuddhitayā sarvamākhyātumupacakrame |
anṛtaṃ na hi rāmasya kadācidapi sammatam || 15 ||
viśeṣeṇā'śramasthasya samīpe strījanasya ca |
āsīddhaśaratho nāma rājā tridaśavikramaḥ || 16 ||
tasyāhamagrajaḥ putro rāmo nāma janaiśśrutaḥ |
bhrātā'yaṃ lakṣmaṇo nāma yavīyānmāmanuvrataḥ || 17 ||
iyaṃ bhāryā ca vaidehī mama sīteti viśrutā |
niyogāt tu narendrasya piturmātuśca yantritaḥ || 18 ||
dharmārthaṃ dharmakāṅkṣī ca vanaṃ vastumihāgataḥ |
tvāṃ tu veditumicchāmi kasya tvaṃ kāsi kasya vā || 19 ||
tvaṃ hi tāvanmanojñāṅgī rākṣasī pratibhāsi me |
iha vā kinnimittaṃ tvamāgatā brūhi tattvataḥ || 20 ||
sābravīd vacanaṃ śrutvā rākṣasī madanārditā |
śrūyatāṃ rāma vakṣyāmi tattvārthaṃ vacanaṃ mama || 21 ||
ahaṃ śūrpaṇakhā nāma rākṣasī kāmarūpiṇī |
araṇyaṃ vicarāmīdamekā sarvabhayaṅkarā || 22 ||
rāvaṇo nāma me bhrātā balīyānrākṣaseśvaraḥ |
vīro viśravasaḥ putro yadi te śrotramāgataḥ || 23 ||
pravṛddhanidraśca sadā kumbhakarṇo mahābalaḥ |
vibhīṣaṇastu dharmātmā na tu rākṣasaceṣṭitaḥ || 24 ||
prakhyātavīryau ca raṇe bhrātarau kharadūṣaṇau |
tānahaṃ samatikrāntā rāma tvā pūrvadarśanāt || 25 ||
samupetāsmi bhāvena bhartāraṃ puruṣottamam |
ahaṃ prabhāvasampannā svacchandabalagāminī || 26 ||
cirāya bhava me bhartā sītayā kiṃ kariṣyasi |
vikṛtā ca virūpā ca na ceyaṃ sadṛśī tava || 27 ||
ahamevānurūpā te bhāryā rūpeṇa paśya mām |
imāṃ virūpāmasatīṃ karālāṃ nirṇatodarīm || 28 ||
anena te saha bhrātrā bhakṣayiṣyāmi mānuṣīm |
tataḥ parvataśṛṅgāṇi vanāni vividhāni ca || 29 ||
paśyansaha mayā kānta daṇḍakānvicariṣyasi |
ityevamuktaḥ kākutsthaḥ prahasya madirekṣaṇām || 30 ||
ityārṣe śrīmadrāmāyaṇe vālmīkīya ādikāvye araṇyakāṇḍe saptadaśassargaḥ ||
InfoLyter.in — Sacred Vedic Knowledge Portal · Free forever