2.64 Ayodhyakanda - Chatuhshashtitama Sargah

ॐ

2.64 অযোধ্যাকাণ্ড - চতুঃষষ্টিতম সর্গঃ

Valmiki Bengali

শ্রীমদ্বাল্মীকীয রামাযণে অযোধ্যাকাণ্ডম্ ।

অথ চতুঃষষ্টিতমস্সর্গঃ ।

বধমপ্রতিরূপং তু মহর্ষেস্তস্য রাঘবঃ ।

বিলপন্নেব ধর্মাত্মা কৌসল্যাং পুনরব্রবীত্ ॥ 1 ॥

তদজ্ঞানান্মহত্পাপং কৃত্বাহং সঙ্কুলেন্দ্রিযঃ ।

একস্ত্বচিন্তযং বুধ্যা কথং নু সুকৃতং ভবেত্ ॥ 2 ॥

ততস্তং ঘটমাদায পূর্ণং পরমবারিণা ।

আশ্রমং তমহং প্রাপ্য যথাঽখ্যাতপথং গতঃ ॥ 3 ॥

তত্রাহং দুর্বলাবন্ধৌ বৃদ্ধাবপরিণাযকৌ ।

অপশ্যং তস্য পিতরৌ লূনপক্ষাবিব দ্বিজৌ ॥ 4 ॥

তন্নিমিত্তাভিরাসীনৌ কথাভিরপরিশ্রমৌ ।

তামাশাং মত্কৃতে হীনাবুদাসীনাবনাথবত্ ॥ 5 ॥

শোকোপহতচিত্তশ্চ ভযসন্ত্রস্তচেতনঃ ।

তচ্চাঽশ্রমপদং গত্বা ভূযশ্শোকমহং গতঃ ॥ 6 ॥

পদশব্দং তু মে শ্রুত্বা মুনির্বাক্যমভাষত ।

কিং চিরাযসি মে পুত্র পানীযং ক্ষিপ্রমানয ॥ 7 ॥

যন্নিমিত্তমিদং তাত সলিলে ক্রীডিতং ত্বযা ।

উত্কণ্ঠিতা তে মাতেযং প্রবিশ ক্ষিপ্রমাশ্রমম্ ॥ 8 ॥

যদ্ব্যলীকং কৃতং পুত্র মাত্রা তে যদি বা মযা ।

ন তন্মনসি কর্তব্যং ত্বযা তাত তপস্বিনা ॥ 9 ॥

ত্বং গতিস্ত্বগতীনাং চক্ষুস্ত্বং হীনচক্ষুষাম্ ।

সমাসক্তাস্ত্বযি প্রাণাঃ কিং ত্বং নো নাভিভাষসে ॥ 10 ॥

মুনিমব্যক্তযা বাচা তমহং সজ্জমানযা ।

হীনব্যঞ্জনযা প্রেক্ষ্য ভীতচিত্ত ইবাব্রুবম্ ॥ 11 ॥

মনসঃ কর্ম চেষ্টাভিরভিসংস্তভ্য বাগ্বলম্ ।

আচচক্ষে ত্বহং তস্মৈ পুত্রব্যসনজং ভযম্ ॥ 12 ॥

ক্ষত্রিযোঽহং দশরথো নাহং পুত্রো মহাত্মনঃ ।

সজ্জনাবমতং দুঃখমিদং প্রাপ্তং স্বকর্মজম্ ॥ 13 ॥

ভগবংশ্চাপহস্তোঽহং সরযূতীরমাগতঃ ।

জিঘাংসুশ্শ্বাপদং কঞ্চিন্নিপানে চাঽগতং গজম্ ॥ 14 ॥

ততশ্শ্রুতো মযা শব্দো জলে কুম্ভস্য পূর্যতঃ ।

দ্বিপোঽযমিতি মত্বাঽযং বাণেনাভিহতো মযা ॥ 15 ॥

গত্বা নদ্যাস্তত স্তীরমপশ্যমিষুণা হৃদি ।

বিনির্ভিন্নং গতপ্রাণং শযানং ভুবি তাপসম্ ॥ 16 ॥

ভগবচ্ছশব্দমালক্ষ্য মযা গজজিঘাংসুনা ।

বিসৃপ্টোঽম্ভসি নারাচস্তেন তে নিহতস্সুতঃ ॥ 17 ॥

ততস্তস্যৈব বচনাদুপেত্য পরিতপ্যতঃ ।

স মযা সহসা বাণ উধৃতো মর্মতস্তদা ॥ 18 ॥

স চোধৃতেন বাণেন তত্রৈব স্বর্গমাস্থিতঃ ।

ভবন্তৌ পিতরৌ শোচন্নন্ধাবিতি বিলপ্য চ ॥ 19 ॥

অজ্ঞানাদ্ভবতঃ পুত্র স্সহসাঽভিহতো মযা ।

শেষমেবং গতে যত্স্যাত্তত্প্রসীদতু মে মুনিঃ ॥ 20 ॥

স তচ্চ্রুত্বা বচঃ ক্রূরং মযোক্তমঘশংসিনা ।

নাশকত্তীব্রমাযাসমকর্তুং ভগবানৃষিঃ ॥ 21 ॥

স বাষ্পপূর্ণবদনো নিশ্শ্বসন্শোককর্শিতঃ ।

মামুবাচ মহাতেজাঃ কৃতাঞ্জলিমুপস্থিতম্ ॥ 22 ॥

যদ্যেতদশুভং কর্ম ন ত্বং মে কথযেস্স্বযম্ ।

ফলেন্মূর্ধা স্ম তে রাজন্ সদ্য শ্শতসহস্রধা ॥ 23 ॥

ক্ষত্রিযেণ বধো রাজন্ বানপ্রস্থে বিশেষতঃ ।

জ্ঞানপূর্বং কৃত স্স্থানাচ্চ্যাবযেদপি বজ্রিণম্ ॥ 24 ॥

সপ্তধা তু ফলেন্মূর্ধা মুনৌ তপসি তিষ্ঠতি ।

জ্ঞানাদ্বিসৃজতশ্শস্ত্রং তাদৃশে ব্রহ্মাবাদিনি ॥ 25 ॥

অজ্ঞানাদ্ধিকৃতং যস্মাদিদং তেনৈব জবসি ।

অপি হ্যদ্য কুলং ন স্যাদিক্ষ্বাকূণাং কুতো ভবান্ ॥ 26 ॥

নয নৌ নৃপ তং দেশমিতি মাং চাভ্যভাষত ।

অদ্য তং দ্রষ্টুমিচ্ছাবঃ পুত্রং পশ্চিমদর্শনম্ ॥ 27 ॥

রুধিরেণাবসিক্তাঙ্গং প্রকীর্ণাজিনবাসসম্ ।

শযানং ভুবি নিস্সঞ্জ্ঞং ধর্ম রাজবশং গতম্ ॥ 28 ॥

অথাহমেকস্তং দেশং নীত্বা তৌ ভৃশদুঃখিতৌ ।

অস্পর্শযমহং পুত্রং তং মুনিং সহ ভার্যযা ॥ 29 ॥

নাভিবাদযসে মাদ্য ন চ মাঽমভিভাষসে ।

কিং নু শেষে তু ভূমৌ ত্বং বত্স কিং কুপিতো হ্যসি ॥ 30 ॥

ন ত্বহং তে প্রিযং পুত্র মাতরং পশ্য ধার্মিক ।

কিং নু নালিঙ্গসে পুত্র সুকুমার বচো বদ ॥ 31 ॥

কস্য বা¶রাত্রেঽহং শ্রোষ্যামি হৃদযঙ্গমম্ ।

অধীযানস্য মধুরং শাস্ত্রং বান্যদ্বিশেষতঃ ॥ 32 ॥

কো মাং সন্দ্যামুপাস্যৈব স্নাত্বা হুতহুতাশনঃ ।

শ্লাঘযিষ্যত্যুপাসীনঃ পুত্র শোকভযার্দিতম্ ॥ 33 ॥

কন্দমূলফলং হৃত্বা কো মাং প্রিযমিবাতিথিম্ ।

ভোজযিষ্যত্যকর্মণ্যমপ্রগ্রহমনাযকম্ ॥ 34 ॥

ইমামন্ধাং চ বৃদ্ধাং চ মাতরং তে তপস্বিনীম্ ।

কথং বত্স ভরিষ্যামি কৃপণাং পুত্রগর্ধিনীম্ ॥ 35 ॥

তিষ্ঠ মাং মাগমঃ পুত্র যমস্য সদনং প্রতি ।

শ্বো মযা সহ গন্তাসি জনন্যা চ সমেধিতঃ ॥ 36 ॥

ততো বৈবস্বতং দৃষ্ট্বা তং প্রবক্ষ্যামি ভারতীম্ ।

ক্ষমতাং ধর্মরাজো মে বিভৃযাত্পিতরাবযম্ ॥ 37 ॥

দাতুমর্হতি ধর্মাত্মা লোকপালো মহাযশাঃ ।

ঈদৃশস্য মমাক্ষয্যা মেকামভযদক্ষিণাম্ ॥ 38 ॥

অপাপোঽসি যদা পুত্র নিহতঃ পাপকর্মণা ।

তেন সত্যেন গচ্ছাঽঽশু যে লোকাশ্শস্ত্রযোধিনাম্ ॥ 39 ॥

যান্তি শূরা গতিং যাং চ সঙ্গ্রামেষ্বনিবর্তিনঃ ।

হতাস্ত্বভিমুখাঃ পুত্র গতিং তাং পরমাং ব্রজ ॥ 40 ॥

যাং গতিং সগরশ্শৈব্যো দিলীপো জনমেজযঃ ।

নহুষো দুন্দুমারশ্চ প্রাপ্তাস্তাং গচ্ছ পুত্রক ॥ 41 ॥

যা গতি স্সর্বসাধূনাং স্বাধ্যাযাত্তপসাচ যা ।

যা ভূমিদস্যাহিঽতাগ্নেরেকপত্নী ব্রতস্য চ ॥ 42 ॥

গোসহস্রপ্রদাতৃণাং যা যা গুরুভৃতামপি ।

দেহন্যাসকৃতাং যা চ তাং গতিং গচ্ছ পুত্রক ॥ 43 ॥

ন হি ত্বস্মিন্কুলে জাতো গচ্ছত্যকুশলাং গতিম্ ।

স তু যাস্যতি যেন ত্বং নিহতো মম বান্ধবঃ ॥ 44 ॥

এবং স কৃপণং তত্র পর্যদেবযতাসকৃত্ ।

ততোঽস্মৈ কর্তুমুদকং প্রবৃত্তস্সহভার্যযা ॥ 45 ॥

স তু দিব্যেন রূপেণ মুনিপুত্রস্স্বকর্মভিঃ ।

স্বর্গমধ্যারুহত্ক্ষিপ্রং শক্রেণ সহ ধর্মবিত্ ॥ 46 ॥

আবভাষে চ বৃদ্ধৌ তৌ সহ শক্রেণ তাপসঃ ।

আশ্বাস্যচ মুহূর্তং তু পিতরৌ বাক্যমব্রবীত্ ॥ 47 ॥

স্থানমস্মি মহত্প্রাপ্তো ভবতোঃ পরিচারণাত্ ।

ভবন্তাবপি চ ক্ষিপ্রং মম মূলমুপৈষ্যতঃ ॥ 48 ॥

এবমুক্ত্বা তু দিব্যেন বিমানেন বপুষ্মতা ।

আরুরোহ দিবং ক্ষিপ্রং মুনিপুত্রো জিতেন্দ্রিযঃ ॥ 49 ॥

স কৃত্বা তূদকং তূর্ণং তাপস স্সহ ভার্যযা ।

মামুবাচ মহাতেজাঃ কৃতাঞ্জলিমুপস্থিতম্ ॥ 50 ॥

অদ্যৈব জহিং মাং রাজন্মরণে নাস্তি মে ব্যথা ।

যচ্ছরেণৈকপুত্রং মাং ত্বমকর্ষীরপুত্রকম্ ॥ 51 ॥

ত্বযা তু যদবিজ্ঞানান্নিহতো মে সুতশ্শুচিঃ ।

তেন ত্বামভিশপ্স্যামি সুদুঃখমতিদারুণম্ ॥ 52 ॥

পুত্রব্যসনজং দুঃখং যদেতন্মম সাম্প্রতম্ ।

এবং ত্বং পুত্রশোকেন রাজন্কালং করিষ্যসি ॥ 53 ॥

অজ্ঞানাত্তু হতো যস্মাত্ক্ষত্রিযেণ ত্বযা মুনিঃ ।

তস্মাত্ত্বাং নাবিশত্যাশু ব্রহ্মহত্যা নরাধিপ ॥ 54 ॥

ত্বামপ্যেতাদৃশো ভাবঃ ক্ষিপ্রমেব গমিষ্যতি ।

জীবিতান্তকরো ঘোরো দাতারমিব দক্ষিণা ॥ 55 ॥

এবং শাপং মযি ন্যস্য বিলপ্য করুণং বহু ।

চিতামারোপ্য দেহং তন্মিথুনং স্বর্গমভ্যযাত্ ॥ 56 ॥

তদেতচ্ছিন্তযানেন স্মৃতং পাপং মযা স্বযম্ ।

তদা বাল্যাত্কৃতং দেবি শব্দবেধ্যনুশিক্ষিণা ॥ 57 ॥

তস্যাযং কর্মণো দেবি বিপাকস্সমুপস্থিতঃ ।

অপথ্যৈস্সহম্ভুক্তে ব্যাধিরন্নরসে যথা ॥ 58 ॥

তস্মান্মামাগতং ভদ্রে তস্যোদারস্য তদ্বচঃ ।

যদহং পুত্রশোকেন সন্ত্যক্ষ্যাম্যদ্য জীবিতম্ ॥ 59 ॥

চক্ষুভ্যাং ত্বাং ন পশ্যামি কৌসল্যে সাধু মাং স্ফৃশ ।

ইত্যুক্ত্বা স রুদংস্ত্রস্তো ভার্যামাহ চ ভূমিপঃ ॥ 60 ॥

এতন্মে সদৃশং দেবি যন্মযা রাঘবে কৃতম্ ।

সদৃশং তত্তু তস্যৈব যদনেন কৃতং মযি ॥ 61 ॥

দুর্বৃত্তমপি কঃ পুত্রং ত্যজেদ্ভুবি বিচক্ষণঃ ।

কশ্চ প্রব্রাজ্যমানো বা নাসূযেত্পিতরং সুতঃ ॥ 62 ॥

যদি মাং সংস্পৃশেদ্রামস্সকৃদদ্য লভেত বা ।

যমক্ষযমনুপ্রাপ্তা দ্রক্ষ্যন্তি ন হি মানবাঃ ॥ 63 ॥

চক্ষুষা ত্বাং ন পশ্যামি স্মৃতির্মম বিলুপ্যতে ।

দূতা বৈবস্বতস্যৈতে কৌসল্যে ত্বরযন্তি মাম্ ॥ 64 ॥

অতস্তু কিং দুঃখতরং যদহং জীবিতক্ষযে ।

ন হি পশ্যামি ধর্মজ্ঞং রামং সত্যপরাক্রমম্ ॥ 65 ॥

তস্যাদর্শনজশ্শোকস্সুতস্যাপ্রতিকর্মণঃ ।

উচ্ছোষযতি মে প্রাণান্বারিস্তোকমিবাতপঃ ॥ 66 ॥

ন তে মনুষ্যা দেবাস্তে যে চারুশুভকুণ্ডলম্ ।

মুখং দ্রক্ষ্যন্তি রামস্য বর্ষে পঞ্চদশে পুনঃ ॥ 67 ॥

পদ্মপত্রেক্ষণং সুভ্রু সুদংষ্ট্রং চারুনাসিকম্ ।

ধন্যা দ্রক্ষ্যন্তি রামস্য তারাধিপনিভং মুখম্ ॥ 68 ॥

সদৃশং শারদস্যেন্দোঃ পুল্লস্য কমলস্য চ ।

সুগন্ধি মম নাথস্য ধন্যা দ্রক্ষ্যন্তি তন্মুখম্ ॥ 69 ॥

নিবৃত্তবনবাসং তমযোধ্যাং পুনরাগতম্ ।

দ্রক্ষ্যন্তি সুখিনো রামং শুক্রং মার্গগতং যথা ॥ 70 ॥

কৌসল্যে চিত্তমোহেন হৃদযং সীদতীব মে ।

বেদযে ন চ সংযুক্তান্ শব্দস্পর্শরসানহম্ ॥ 71 ॥

চিত্তনাশাদ্বিপদ্যন্তে সর্বাণ্যেন্দ্রিযাণি মে ।

ক্ষীণস্নেহস্য দীপস্য সংসক্তা রশ্মযো যথা ॥ 72 ॥

অযমাত্মভবশ্শোকো মামনাথমচেতনম্ ।

সংসাদযতি বেগেন যথা কূলং নদীরযঃ ॥ 73 ॥

হা রাঘব মহাবাহো হা মমাঽযাসনাশন ।

হা পিতৃপ্রিয মে নাথ হাঽদ্য ক্বাসি গতস্সুত ॥ 74 ॥

হা কৌসল্যে নশিষ্যামি হা সুমিত্রে তপস্বিনি ।

হা নৃশংসে মমামিত্রে কৈকেযি কুলপাংসনি ॥ 75 ॥

ইতি রামস্য মাতুশ্চ সুমিত্রাযাশ্চ সন্নিধৌ ।

রাজা দশরথ শ্শোচঞ্জীবিতান্তমুপাগমত্ ॥ 76 ॥

যদা তু দীনং কথযন্নরাধিপঃ প্রিযস্য পুত্ত্রস্য বিবাসনাতুরঃ ।

গতেঽর্ধরাত্রে ভৃশদুঃখপীডিতস্তদা জহৌ প্রাণমুদারদর্শনঃ ॥ 77 ॥

ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাণ্ডে চতুঃষষ্টিতমস্সর্গঃ ॥

Roman (IAST) Transliteration

śrīmadvālmīkīya rāmāyaṇe ayodhyākāṇḍam |

atha catuḥṣaṣṭitamassargaḥ |

vadhamapratirūpaṃ tu maharṣestasya rāghavaḥ |

vilapanneva dharmātmā kausalyāṃ punarabravīt || 1 ||

tadajñānānmahatpāpaṃ kṛtvāhaṃ saṅkulendriyaḥ |

ekastvacintayaṃ budhyā kathaṃ nu sukṛtaṃ bhavet || 2 ||

tatastaṃ ghaṭamādāya pūrṇaṃ paramavāriṇā |

āśramaṃ tamahaṃ prāpya yathā'khyātapathaṃ gataḥ || 3 ||

tatrāhaṃ durbalāvandhau vṛddhāvapariṇāyakau |

apaśyaṃ tasya pitarau lūnapakṣāviva dvijau || 4 ||

tannimittābhirāsīnau kathābhirapariśramau |

tāmāśāṃ matkṛte hīnāvudāsīnāvanāthavat || 5 ||

śokopahatacittaśca bhayasantrastacetanaḥ |

taccā'śramapadaṃ gatvā bhūyaśśokamahaṃ gataḥ || 6 ||

padaśabdaṃ tu me śrutvā munirvākyamabhāṣata |

kiṃ cirāyasi me putra pānīyaṃ kṣipramānaya || 7 ||

yannimittamidaṃ tāta salile krīḍitaṃ tvayā |

utkaṇṭhitā te māteyaṃ praviśa kṣipramāśramam || 8 ||

yadvyalīkaṃ kṛtaṃ putra mātrā te yadi vā mayā |

na tanmanasi kartavyaṃ tvayā tāta tapasvinā || 9 ||

tvaṃ gatistvagatīnāṃ cakṣustvaṃ hīnacakṣuṣām |

samāsaktāstvayi prāṇāḥ kiṃ tvaṃ no nābhibhāṣase || 10 ||

munimavyaktayā vācā tamahaṃ sajjamānayā |

hīnavyañjanayā prekṣya bhītacitta ivābruvam || 11 ||

manasaḥ karma ceṣṭābhirabhisaṃstabhya vāgbalam |

ācacakṣe tvahaṃ tasmai putravyasanajaṃ bhayam || 12 ||

kṣatriyo'haṃ daśaratho nāhaṃ putro mahātmanaḥ |

sajjanāvamataṃ duḥkhamidaṃ prāptaṃ svakarmajam || 13 ||

bhagavaṃścāpahasto'haṃ sarayūtīramāgataḥ |

jighāṃsuśśvāpadaṃ kañcinnipāne cā'gataṃ gajam || 14 ||

tataśśruto mayā śabdo jale kumbhasya pūryataḥ |

dvipo'yamiti matvā'yaṃ bāṇenābhihato mayā || 15 ||

gatvā nadyāstata stīramapaśyamiṣuṇā hṛdi |

vinirbhinnaṃ gataprāṇaṃ śayānaṃ bhuvi tāpasam || 16 ||

bhagavacchaśabdamālakṣya mayā gajajighāṃsunā |

visṛpṭo'mbhasi nārācastena te nihatassutaḥ || 17 ||

tatastasyaiva vacanādupetya paritapyataḥ |

sa mayā sahasā bāṇa udhṛto marmatastadā || 18 ||

sa codhṛtena bāṇena tatraiva svargamāsthitaḥ |

bhavantau pitarau śocannandhāviti vilapya ca || 19 ||

ajñānādbhavataḥ putra ssahasā'bhihato mayā |

śeṣamevaṃ gate yatsyāttatprasīdatu me muniḥ || 20 ||

sa taccrutvā vacaḥ krūraṃ mayoktamaghaśaṃsinā |

nāśakattīvramāyāsamakartuṃ bhagavānṛṣiḥ || 21 ||

sa bāṣpapūrṇavadano niśśvasanśokakarśitaḥ |

māmuvāca mahātejāḥ kṛtāñjalimupasthitam || 22 ||

yadyetadaśubhaṃ karma na tvaṃ me kathayessvayam |

phalenmūrdhā sma te rājan sadya śśatasahasradhā || 23 ||

kṣatriyeṇa vadho rājan vānaprasthe viśeṣataḥ |

jñānapūrvaṃ kṛta ssthānāccyāvayedapi vajriṇam || 24 ||

saptadhā tu phalenmūrdhā munau tapasi tiṣṭhati |

jñānādvisṛjataśśastraṃ tādṛśe brahmāvādini || 25 ||

ajñānāddhikṛtaṃ yasmādidaṃ tenaiva javasi |

api hyadya kulaṃ na syādikṣvākūṇāṃ kuto bhavān || 26 ||

naya nau nṛpa taṃ deśamiti māṃ cābhyabhāṣata |

adya taṃ draṣṭumicchāvaḥ putraṃ paścimadarśanam || 27 ||

rudhireṇāvasiktāṅgaṃ prakīrṇājinavāsasam |

śayānaṃ bhuvi nissañjñaṃ dharma rājavaśaṃ gatam || 28 ||

athāhamekastaṃ deśaṃ nītvā tau bhṛśaduḥkhitau |

asparśayamahaṃ putraṃ taṃ muniṃ saha bhāryayā || 29 ||

nābhivādayase mādya na ca mā'mabhibhāṣase |

kiṃ nu śeṣe tu bhūmau tvaṃ vatsa kiṃ kupito hyasi || 30 ||

na tvahaṃ te priyaṃ putra mātaraṃ paśya dhārmika |

kiṃ nu nāliṅgase putra sukumāra vaco vada || 31 ||

kasya vā¶rātre'haṃ śroṣyāmi hṛdayaṅgamam |

adhīyānasya madhuraṃ śāstraṃ vānyadviśeṣataḥ || 32 ||

ko māṃ sandyāmupāsyaiva snātvā hutahutāśanaḥ |

ślāghayiṣyatyupāsīnaḥ putra śokabhayārditam || 33 ||

kandamūlaphalaṃ hṛtvā ko māṃ priyamivātithim |

bhojayiṣyatyakarmaṇyamapragrahamanāyakam || 34 ||

imāmandhāṃ ca vṛddhāṃ ca mātaraṃ te tapasvinīm |

kathaṃ vatsa bhariṣyāmi kṛpaṇāṃ putragardhinīm || 35 ||

tiṣṭha māṃ māgamaḥ putra yamasya sadanaṃ prati |

śvo mayā saha gantāsi jananyā ca samedhitaḥ || 36 ||

tato vaivasvataṃ dṛṣṭvā taṃ pravakṣyāmi bhāratīm |

kṣamatāṃ dharmarājo me bibhṛyātpitarāvayam || 37 ||

dātumarhati dharmātmā lokapālo mahāyaśāḥ |

īdṛśasya mamākṣayyā mekāmabhayadakṣiṇām || 38 ||

apāpo'si yadā putra nihataḥ pāpakarmaṇā |

tena satyena gacchā''śu ye lokāśśastrayodhinām || 39 ||

yānti śūrā gatiṃ yāṃ ca saṅgrāmeṣvanivartinaḥ |

hatāstvabhimukhāḥ putra gatiṃ tāṃ paramāṃ vraja || 40 ||

yāṃ gatiṃ sagaraśśaibyo dilīpo janamejayaḥ |

nahuṣo dundumāraśca prāptāstāṃ gaccha putraka || 41 ||

yā gati ssarvasādhūnāṃ svādhyāyāttapasāca yā |

yā bhūmidasyāhi'tāgnerekapatnī vratasya ca || 42 ||

gosahasrapradātṛṇāṃ yā yā gurubhṛtāmapi |

dehanyāsakṛtāṃ yā ca tāṃ gatiṃ gaccha putraka || 43 ||

na hi tvasminkule jāto gacchatyakuśalāṃ gatim |

sa tu yāsyati yena tvaṃ nihato mama bāndhavaḥ || 44 ||

evaṃ sa kṛpaṇaṃ tatra paryadevayatāsakṛt |

tato'smai kartumudakaṃ pravṛttassahabhāryayā || 45 ||

sa tu divyena rūpeṇa muniputrassvakarmabhiḥ |

svargamadhyāruhatkṣipraṃ śakreṇa saha dharmavit || 46 ||

ābabhāṣe ca vṛddhau tau saha śakreṇa tāpasaḥ |

āśvāsyaca muhūrtaṃ tu pitarau vākyamabravīt || 47 ||

sthānamasmi mahatprāpto bhavatoḥ paricāraṇāt |

bhavantāvapi ca kṣipraṃ mama mūlamupaiṣyataḥ || 48 ||

evamuktvā tu divyena vimānena vapuṣmatā |

āruroha divaṃ kṣipraṃ muniputro jitendriyaḥ || 49 ||

sa kṛtvā tūdakaṃ tūrṇaṃ tāpasa ssaha bhāryayā |

māmuvāca mahātejāḥ kṛtāñjalimupasthitam || 50 ||

adyaiva jahiṃ māṃ rājanmaraṇe nāsti me vyathā |

yacchareṇaikaputraṃ māṃ tvamakarṣīraputrakam || 51 ||

tvayā tu yadavijñānānnihato me sutaśśuciḥ |

tena tvāmabhiśapsyāmi suduḥkhamatidāruṇam || 52 ||

putravyasanajaṃ duḥkhaṃ yadetanmama sāmpratam |

evaṃ tvaṃ putraśokena rājankālaṃ kariṣyasi || 53 ||

ajñānāttu hato yasmātkṣatriyeṇa tvayā muniḥ |

tasmāttvāṃ nāviśatyāśu brahmahatyā narādhipa || 54 ||

tvāmapyetādṛśo bhāvaḥ kṣiprameva gamiṣyati |

jīvitāntakaro ghoro dātāramiva dakṣiṇā || 55 ||

evaṃ śāpaṃ mayi nyasya vilapya karuṇaṃ bahu |

citāmāropya dehaṃ tanmithunaṃ svargamabhyayāt || 56 ||

tadetacchintayānena smṛtaṃ pāpaṃ mayā svayam |

tadā bālyātkṛtaṃ devi śabdavedhyanuśikṣiṇā || 57 ||

tasyāyaṃ karmaṇo devi vipākassamupasthitaḥ |

apathyaissahambhukte vyādhirannarase yathā || 58 ||

tasmānmāmāgataṃ bhadre tasyodārasya tadvacaḥ |

yadahaṃ putraśokena santyakṣyāmyadya jīvitam || 59 ||

cakṣubhyāṃ tvāṃ na paśyāmi kausalye sādhu māṃ sphṛśa |

ityuktvā sa rudaṃstrasto bhāryāmāha ca bhūmipaḥ || 60 ||

etanme sadṛśaṃ devi yanmayā rāghave kṛtam |

sadṛśaṃ tattu tasyaiva yadanena kṛtaṃ mayi || 61 ||

durvṛttamapi kaḥ putraṃ tyajedbhuvi vicakṣaṇaḥ |

kaśca pravrājyamāno vā nāsūyetpitaraṃ sutaḥ || 62 ||

yadi māṃ saṃspṛśedrāmassakṛdadya labheta vā |

yamakṣayamanuprāptā drakṣyanti na hi mānavāḥ || 63 ||

cakṣuṣā tvāṃ na paśyāmi smṛtirmama vilupyate |

dūtā vaivasvatasyaite kausalye tvarayanti mām || 64 ||

atastu kiṃ duḥkhataraṃ yadahaṃ jīvitakṣaye |

na hi paśyāmi dharmajñaṃ rāmaṃ satyaparākramam || 65 ||

tasyādarśanajaśśokassutasyāpratikarmaṇaḥ |

ucchoṣayati me prāṇānvāristokamivātapaḥ || 66 ||

na te manuṣyā devāste ye cāruśubhakuṇḍalam |

mukhaṃ drakṣyanti rāmasya varṣe pañcadaśe punaḥ || 67 ||

padmapatrekṣaṇaṃ subhru sudaṃṣṭraṃ cārunāsikam |

dhanyā drakṣyanti rāmasya tārādhipanibhaṃ mukham || 68 ||

sadṛśaṃ śāradasyendoḥ pullasya kamalasya ca |

sugandhi mama nāthasya dhanyā drakṣyanti tanmukham || 69 ||

nivṛttavanavāsaṃ tamayodhyāṃ punarāgatam |

drakṣyanti sukhino rāmaṃ śukraṃ mārgagataṃ yathā || 70 ||

kausalye cittamohena hṛdayaṃ sīdatīva me |

vedaye na ca saṃyuktān śabdasparśarasānaham || 71 ||

cittanāśādvipadyante sarvāṇyendriyāṇi me |

kṣīṇasnehasya dīpasya saṃsaktā raśmayo yathā || 72 ||

ayamātmabhavaśśoko māmanāthamacetanam |

saṃsādayati vegena yathā kūlaṃ nadīrayaḥ || 73 ||

hā rāghava mahābāho hā mamā'yāsanāśana |

hā pitṛpriya me nātha hā'dya kvāsi gatassuta || 74 ||

hā kausalye naśiṣyāmi hā sumitre tapasvini |

hā nṛśaṃse mamāmitre kaikeyi kulapāṃsani || 75 ||

iti rāmasya mātuśca sumitrāyāśca sannidhau |

rājā daśaratha śśocañjīvitāntamupāgamat || 76 ||

yadā tu dīnaṃ kathayannarādhipaḥ priyasya puttrasya vivāsanāturaḥ |

gate'rdharātre bhṛśaduḥkhapīḍitastadā jahau prāṇamudāradarśanaḥ || 77 ||

ityārṣe śrīmadrāmāyaṇe vālmīkīya ādikāvye ayodhyākāṇḍe catuḥṣaṣṭitamassargaḥ ||