📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.44 অযোধ্যাকাণ্ড - চতুশ্চত্বারিংশ সর্গঃ
2.44 Ayodhyakanda - Chatushchatvarimsha Sargah
Valmiki Bengali
শ্রীমদ্বাল্মীকীয রামাযণে অযোধ্যাকাণ্ডম্ ।
অথ চতুশ্চত্বারিংশস্সর্গঃ ।
বিলপন্তী তথা তাং তু কৌসল্যাং প্রমদোত্তমাম্ ।
ইদং ধর্মে স্থিতা ধর্ম্যং সুমিত্রা বাক্যমব্রবীত্ ॥ 1 ॥
তবার্যে সদ্গুণৈর্যুক্তঃ পুত্র স্স পুরুষোত্তমঃ ।
কিং তে বিলপিতেনৈবং কৃপণং রুদিতেন বা ॥ 2 ॥
যস্তবার্যে গতঃ পুত্রস্ত্যক্ত্বা রাজ্যং মহাবলঃ ।
সাধু কুর্বন্ মহাত্মানং পিতরং সত্যবাদিনম্ ॥ 3 ॥
শিষ্টৈরাচরিতে সম্যক্ছশ্বত্প্রেত্যফলোদযে ।
রামো ধর্মে স্থিত শ্রেষ্ঠো ন স শোচ্যঃ কদাচন ॥ 4 ॥
বর্ততে চোত্তমাং বৃত্তিং লক্ষ্মণোঽস্মিন্ সদানঘঃ ।
দযাবান্ সর্বভূতেষু লাভস্তস্য মহাত্মনঃ ॥ 5 ॥
অরণ্যবাসে যদ্দুঃখং জানতী বৈ সুখোচিতা ।
অনুগচ্ছতি বৈদেহী ধর্মাত্মানং তবাত্মজম্ ॥ 6 ॥
কীর্তিভূতাং পতাকাং যো লোকে ভ্রমযতি প্রভুঃ ।
ধর্মসত্যব্রতধনঃ কিং ন প্রাপ্তস্তবাত্মজঃ ॥ 7 ॥
ব্যক্তং রামস্য বিজ্ঞায শৌচং মাহাত্ম্যমুত্তমম্ ।
ন গাত্রমংশুভি স্সূর্য স্সন্তাপযিতুমর্হতি ॥ 8 ॥
শিবস্সর্বেষু কালেষু কাননেভ্যো বিনিস্সৃতঃ ।
রাঘবং যুক্তশীতোষ্ণস্সেবিষ্যতি সুখোঽনিলঃ ॥ 9 ॥
শযানমনঘং রাত্রৌ পিতেবাভিপরিষ্বজন্ ।
রশ্মিভি স্সংস্পৃশন্ শীতৈশ্চন্দ্রমাহ্লাদযিষ্যতি ॥ 10 ॥
দদৌ চাস্ত্রাণি দিব্যানি যস্মৈ ব্রহ্মা মহৌজসে ।
দানবেন্দ্রং হতং দৃষ্ট্বা তিমিধ্বজসুতং রণে ॥ 11 ॥
স শূরঃ পুরুষব্যাঘ্রঃ স্ববাহুবলমাশ্রিতঃ ।
অসন্ত্রস্তোঽপ্যরণস্থো বেশ্মনীব নিবত্স্যতি ॥ 12 ॥
যস্যেষুপথমাসাদ্য বিনাশং যান্তি শত্রবঃ ।
কথং ন পৃথিবী তস্য শাসনে স্থাতুমর্হতি ॥ 13 ॥
যা শ্রী শ্শৌর্যং চ রামস্য যা চ কল্যাণসত্বতা ।
নিবৃত্তারণ্যবাস স্স ক্ষিপ্রং রাজ্যমবাপ্স্যতি ॥ 14 ॥
সূর্যস্যাপি ভবেত্সূর্যো হ্যগ্নেরগ্নি প্রভোঃ প্রভুঃ ।
শ্রিযঃ শ্রীশ্চ ভবেদগ্র্যা কীর্তিঃ কীর্ত্যাঃ ক্ষমাক্ষমা ॥ 15 ॥
দৈবতং দৈবতানাং চ ভূতানাং ভূতসত্তমঃ ।
তস্য কে হ্যগুণা দেবি বনে বাপ্যথবা পুরে ॥ 16 ॥
পৃথিব্যা সহ বৈদেহ্যা শ্রিযা চ পুরুষর্ষভঃ ।
ক্ষিপ্রং তিসৃভিরেতাভি স্সহ রামোঽভিষেক্ষ্যতে ॥ 17 ॥
দুঃখজং বিসৃজন্ত্যস্রং নিষ্ক্রামন্তমুদীক্ষ্য যম্ ।
অযোধ্যাযাং জনাস্সর্বে শোকবেগসমাহতাঃ ॥ 18 ॥
কুশচীরধরং দেবং গচ্ছন্তমপরাজিতম্ ।
সীতেবানুগতা লক্ষ্মী স্তস্য কিং নাম দুর্লভম্ ॥ 19 ॥
ধনুর্গ্রহবরো যস্য বাণখড্গাস্ত্রভৃত্স্বযম্ ।
লক্ষ্মণো ব্রজতি হ্যগ্রে তস্য কিং নাম দুর্লভম্ ॥ 20 ॥
নিবৃত্তবনবাসং তং দ্রষ্টাসি পুনরাগতম্ ।
জহিশোকং চ মোহং চ দেবি সত্যং ব্রবীমি তে ॥ 21 ॥
শিরসা চরণাবেতৌ বন্দমানমনিন্দিতে পুনর্দ্রক্ষ্যসি কল্যাণি পুত্রং চন্দ্রমিবোদিতম্ ॥ 22 ॥
পুনঃ প্রবিষ্টং দৃষ্ট্বা তমভিষিক্তং মহাশ্রিযম্ ।
সমুত্স্রক্ষ্যসি নেত্রাভ্যাং ক্ষিপ্রমানন্দজং পযঃ ॥ 23 ॥
মা শোকো দেবি দুঃখং বা ন রামে দৃশ্যতেঽশিবম্ ।
ক্ষিপ্রং দ্রক্ষ্যসি পুত্রং ত্বং সসীতং সহলক্ষ্মণম্ ॥ 24 ॥
ত্বযা শেষো জনশ্চৈব সমাশ্বাস্যো যদাঽনঘে ।
কিমিদানীমিদং দেবি করোষি হৃদি বিক্লবম্ ॥ 25 ॥
নার্হা ত্বং শোচিতুং দেবি যস্যাস্তে রাঘবস্সুতঃ ।
ন হি রামাত্পরো লোকে বিদ্যতে সত্পথে স্থিতঃ ॥ 26 ॥
অভিবাদযমানং তং দৃষ্ট্বা সসুহৃদং সুতম্ ।
মুদাঽশ্রৃ মোক্ষ্যসে ক্ষিপ্রং মেঘলেখেব বার্ষিকী ॥ 27 ॥
পুত্রস্তে বরদঃ ক্ষিপ্রমযোধ্যাং পুনরাগতঃ ।
পাণিভ্যাং মৃদুপীনাভ্যাং চরণৌ পীডযিষ্যতি ॥ 28 ॥
অভিবাদ্য নমস্যন্তং শূরং সসুহৃদং সুতম্ ।
মুদাঽস্রৈঃ প্রোক্ষ্যসি পুনর্মেঘরাজিরিবাচলম্ ॥ 29 ॥
আশ্বাসযন্তী বিবিধৈশ্চ বাক্যৈ র্বাক্যোপচারে কুশলাঽনবদ্যা ।
রামস্য তাং মাতরমেবমুক্ত্বা দেবী সুমিত্রা বিররাম রামা ॥ 30 ॥
নিশম্য তল্লক্ষ্মণমাতৃবাক্যং রামস্য মাতুর্নরদেবপত্ন্যাঃ ।
সদ্যশ্শরীরে বিননাশ শোকঃ শরদ্গতো মেঘ ইবাল্পতোযঃ ॥ 31 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাণ্ডে চতুশ্চত্বারিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha catuścatvāriṃśassargaḥ |
vilapantī tathā tāṃ tu kausalyāṃ pramadottamām |
idaṃ dharme sthitā dharmyaṃ sumitrā vākyamabravīt || 1 ||
tavārye sadguṇairyuktaḥ putra ssa puruṣottamaḥ |
kiṃ te vilapitenaivaṃ kṛpaṇaṃ ruditena vā || 2 ||
yastavārye gataḥ putrastyaktvā rājyaṃ mahābalaḥ |
sādhu kurvan mahātmānaṃ pitaraṃ satyavādinam || 3 ||
śiṣṭairācarite samyakchaśvatpretyaphalodaye |
rāmo dharme sthita śreṣṭho na sa śocyaḥ kadācana || 4 ||
vartate cottamāṃ vṛttiṃ lakṣmaṇo'smin sadānaghaḥ |
dayāvān sarvabhūteṣu lābhastasya mahātmanaḥ || 5 ||
araṇyavāse yadduḥkhaṃ jānatī vai sukhocitā |
anugacchati vaidehī dharmātmānaṃ tavātmajam || 6 ||
kīrtibhūtāṃ patākāṃ yo loke bhramayati prabhuḥ |
dharmasatyavratadhanaḥ kiṃ na prāptastavātmajaḥ || 7 ||
vyaktaṃ rāmasya vijñāya śaucaṃ māhātmyamuttamam |
na gātramaṃśubhi ssūrya ssantāpayitumarhati || 8 ||
śivassarveṣu kāleṣu kānanebhyo vinissṛtaḥ |
rāghavaṃ yuktaśītoṣṇasseviṣyati sukho'nilaḥ || 9 ||
śayānamanaghaṃ rātrau pitevābhipariṣvajan |
raśmibhi ssaṃspṛśan śītaiścandramāhlādayiṣyati || 10 ||
dadau cāstrāṇi divyāni yasmai brahmā mahaujase |
dānavendraṃ hataṃ dṛṣṭvā timidhvajasutaṃ raṇe || 11 ||
sa śūraḥ puruṣavyāghraḥ svabāhubalamāśritaḥ |
asantrasto'pyaraṇastho veśmanīva nivatsyati || 12 ||
yasyeṣupathamāsādya vināśaṃ yānti śatravaḥ |
kathaṃ na pṛthivī tasya śāsane sthātumarhati || 13 ||
yā śrī śśauryaṃ ca rāmasya yā ca kalyāṇasatvatā |
nivṛttāraṇyavāsa ssa kṣipraṃ rājyamavāpsyati || 14 ||
sūryasyāpi bhavetsūryo hyagneragni prabhoḥ prabhuḥ |
śriyaḥ śrīśca bhavedagryā kīrtiḥ kīrtyāḥ kṣamākṣamā || 15 ||
daivataṃ daivatānāṃ ca bhūtānāṃ bhūtasattamaḥ |
tasya ke hyaguṇā devi vane vāpyathavā pure || 16 ||
pṛthivyā saha vaidehyā śriyā ca puruṣarṣabhaḥ |
kṣipraṃ tisṛbhiretābhi ssaha rāmo'bhiṣekṣyate || 17 ||
duḥkhajaṃ visṛjantyasraṃ niṣkrāmantamudīkṣya yam |
ayodhyāyāṃ janāssarve śokavegasamāhatāḥ || 18 ||
kuśacīradharaṃ devaṃ gacchantamaparājitam |
sītevānugatā lakṣmī stasya kiṃ nāma durlabham || 19 ||
dhanurgrahavaro yasya bāṇakhaḍgāstrabhṛtsvayam |
lakṣmaṇo vrajati hyagre tasya kiṃ nāma durlabham || 20 ||
nivṛttavanavāsaṃ taṃ draṣṭāsi punarāgatam |
jahiśokaṃ ca mohaṃ ca devi satyaṃ bravīmi te || 21 ||
śirasā caraṇāvetau vandamānamanindite punardrakṣyasi kalyāṇi putraṃ candramivoditam || 22 ||
punaḥ praviṣṭaṃ dṛṣṭvā tamabhiṣiktaṃ mahāśriyam |
samutsrakṣyasi netrābhyāṃ kṣipramānandajaṃ payaḥ || 23 ||
mā śoko devi duḥkhaṃ vā na rāme dṛśyate'śivam |
kṣipraṃ drakṣyasi putraṃ tvaṃ sasītaṃ sahalakṣmaṇam || 24 ||
tvayā śeṣo janaścaiva samāśvāsyo yadā'naghe |
kimidānīmidaṃ devi karoṣi hṛdi viklabam || 25 ||
nārhā tvaṃ śocituṃ devi yasyāste rāghavassutaḥ |
na hi rāmātparo loke vidyate satpathe sthitaḥ || 26 ||
abhivādayamānaṃ taṃ dṛṣṭvā sasuhṛdaṃ sutam |
mudā'śrṛ mokṣyase kṣipraṃ meghalekheva vārṣikī || 27 ||
putraste varadaḥ kṣipramayodhyāṃ punarāgataḥ |
pāṇibhyāṃ mṛdupīnābhyāṃ caraṇau pīḍayiṣyati || 28 ||
abhivādya namasyantaṃ śūraṃ sasuhṛdaṃ sutam |
mudā'sraiḥ prokṣyasi punarmegharājirivācalam || 29 ||
āśvāsayantī vividhaiśca vākyai rvākyopacāre kuśalā'navadyā |
rāmasya tāṃ mātaramevamuktvā devī sumitrā virarāma rāmā || 30 ||
niśamya tallakṣmaṇamātṛvākyaṃ rāmasya māturnaradevapatnyāḥ |
sadyaśśarīre vinanāśa śokaḥ śaradgato megha ivālpatoyaḥ || 31 ||
ityārṣe śrīmadrāmāyaṇe vālmīkīya ādikāvye ayodhyākāṇḍe catuścatvāriṃśassargaḥ ||
InfoLyter.in — Sacred Vedic Knowledge Portal · Free forever