📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.25 অযোধ্যাকাণ্ড - পঞ্চবিংশ সর্গঃ
2.25 Ayodhyakanda - Panchavimsha Sargah
Valmiki Bengali
শ্রীমদ্বাল্মীকীয রামাযণে অযোধ্যাকাণ্ডম্ ।
অথ পঞ্চবিংশস্সর্গঃ ।
সাঽবনীয তমাযাসমুপস্পৃশ্য জলং শুচিঃ ।
চকার মাতা রামস্য মঙ্গলানি মনস্বিনী ॥ 1 ॥
ন শক্যসে বারযিতুং গচ্ছেদানীং রঘূত্তম ।
শীঘ্রং চ বিনিবর্তস্ব বর্তস্ব চ সতাং ক্রমে ॥ 2 ॥
যং পালযসি ধর্মং ত্বং ধৃত্যা চ নিযমেন চ ।
স বৈ রাঘবশার্দূল ধর্মস্ত্বামভিরক্ষতু ॥ 3 ॥
যেভ্যঃ প্রণমসে পুত্র চৈত্যেষ্বাযতনেষু চ ।
তে চ ত্বামভিরক্ষন্তু বনে সহ মহর্ষিভিঃ ॥ 4 ॥
যানি দত্তানি তেঽস্ত্রাণি বিশ্বামিত্রেণ ধীমতা ।
তানি ত্বামভিরক্ষন্তু গুণৈস্সমুদিতং সদা ॥ 5 ॥
পিতৃশুশ্রূষযা পুত্র মাতৃশুশ্রূষযা তথা ।
সত্যেন চ মহাবাহো চিরং জীবাভিরক্ষিতঃ ॥ 6 ॥
সমিত্কুশ পবিত্রাণি বেদ্যশ্চাযতনানি চ ।
স্থণ্ডিলানি বিচিত্রাণি শৈলা বৃক্ষাঃ ক্ষুপা হ্রদাঃ ॥ 7 ॥
পতঙ্গাঃ পন্নগাস্সিংহাস্ত্বাং রক্ষন্তু নরোত্তম ।
স্বস্তিসাধ্যাশ্চ বিশ্বে চ মরুতশ্চ মহর্ষযঃ ।
স্বস্তি ধাতা বিধাতা চ স্বস্তি পূষা ভগোঽর্যমা ॥ 8 ॥
লোকপালাশ্চ তে সর্বে বাসবপ্রমুখাস্তথা ।
ঋতবশ্চৈব পক্ষাশ্চ মাসা স্সংবত্সরাঃ ক্ষপাঃ ॥ 9 ॥
দিনানি চ মুহূর্তাশ্চ স্বস্তি কুর্বন্তু তে সদা ।
স্মৃতির্ধৃতিশ্চ ধর্মশ্চ পাতু ত্বাং পুত্র সর্বতঃ ॥ 10 ॥
স্কন্দশ্চ ভগবান্দেব স্সোমশ্চ স বৃহস্পতিঃ ।
সপ্তর্ষযো নারদশ্চ তে ত্বাং রক্ষন্তু সর্বতঃ ॥ 11 ॥
যাশ্চাপি সর্বতস্সিধ্দা দিশশ্চ সদিগীশ্বরাঃ ।
স্তুতা মযা বনে তস্মিন্পান্তু ত্বাং পুত্র নিত্যশঃ ॥ 12 ॥
শৈলাস্সর্বে সমুদ্রাশ্চ রাজা বরুণ এব চ ।
দ্যৌরন্তরিক্ষং পৃথিবী নদ্যস্সর্বাস্তথৈব চ ॥ 13 ॥
নক্ষত্রাণি চ সর্বাণি গ্রহাশ্চ সহদেবতাঃ ।
অহোরাত্রে তথা সন্ধ্যে পান্তু ত্বাং বনমাশ্রিতম্ ॥ 14 ॥
ঋতবশ্চৈব ষট্পুণ্যা মাসাস্সংবত্সরাস্তথা ।
কলাশ্চ কাষ্ঠাশ্চ তথা তব শর্ম দিশন্তু তে ॥ 15 ॥
মহাবনে বিচরতো মুনিবেষস্য ধীমতঃ ।
তবাদিত্যাশ্চ দৈত্যাশ্চ ভবন্তু সুখদাস্সদা ॥ 16 ॥
রাক্ষসানাং পিশাচানাং রৌদ্রাণাং ক্রূরকর্মণাম্ ।
ক্রব্যাদানাং চ সর্বেষাং মা ভূত্পুত্রক তে ভযম্ ॥ 17 ॥
প্লবগা বৃশ্চিকা দংশামশকাশ্চৈব কাননে ।
সরীসৃপাশ্চ কীটাশ্চ মা ভূবন্গহনে তব ॥ 18 ॥
মহাদ্বিপাশ্চ সিংহাশ্চ ব্যাঘ্রা ঋক্ষাশ্চ দংষ্ট্রিণঃ ।
মহিষা শ্শৃঙ্গিণো রৌদ্রা ন তে দ্রুহ্যন্তু পুত্রক ॥ 19 ॥
নৃমাংসভোজনা রৌদ্রা যে চান্যে সত্বজাতযঃ ।
মা চ ত্বাং হিংসিষুঃ পুত্র মযা সম্পূজিতাস্ত্বিহ ॥ 20 ॥
আগমাস্তে শিবাস্সন্তু সিধ্যন্তু চ পরাক্রমাঃ ।
সর্বসম্পত্তযে রাম স্বস্তিমান্গচ্ছ পুত্রক ॥ 21 ॥
স্বস্তি তে ঽস্ত্বন্তরিক্ষেভ্যঃ পার্থিবেভ্যঃ পুনঃ পুনঃ ।
সর্বেভ্যশ্চৈব দেবেভ্যো যে চ বৈ পরিপন্থিনঃ ॥ 22 ॥
গুরুস্সোমশ্চ সূর্যশ্চ ধনদোঽথ যমস্তথা ।
পান্তু ত্বামর্চিতা রাম দণ্ডকারণ্যবাসিনম্ ॥ 23 ॥
অগ্নির্বাযুস্তথা ধূমো মন্ত্রাশ্চর্ষিমুখাচ্চ্যুতাঃ ।
উপস্পর্শনকালে তু পান্তু ত্বাং রঘুনন্দন ॥ 24 ॥
সর্বলোকপ্রভুর্ব্রহ্মা ভূতভর্তা তথর্ষযঃ ।
যে চ শেষাস্সুরাস্তে ত্বাং রক্ষন্তু বনবাসিনম্ ॥ 25 ॥
ইতি মাল্যৈস্সুরগণান্গন্ধৈশ্চাপি যশস্বিনী ।
স্তুতিভিশ্চানুরূপাভিরানর্চাঽযতলোচনা ॥ 26 ॥
জ্বলনং সমুপাদায ব্রাহ্মণেন মহাত্মনা ।
হাবযামাস বিধিনা রামমঙ্গলকারণাত্ ॥ 27 ॥
ঘৃতং শ্বেতানি মাল্যানি সমিধশ্শ্বেতসর্ষপান্ ।
উপসম্পাদযামাস কৌশল্যা পরমাঙ্গনা ॥ 28 ॥
উপাধ্যায স্সবিধিনা হুত্বা শান্তিমনামযম্ ।
হুতহব্যাবশেষেণ বাহ্যং বলিমকল্পযত্ ॥ 29 ॥
মধু দধ্যক্ষতঘৃতৈঃ স্বস্তিবাচ্যদ্বিজাংস্ততঃ ।
বাচযামাস রামস্য বনেস্বস্ত্যযনক্রিযাঃ ॥ 30 ॥
ততস্তস্মৈ দ্বিজেন্দ্রায রামমাতা যশস্বিনী ।
দক্ষিণাং প্রদদৌ কাম্যাং রাঘবং চেদমব্রবীত্ ॥ 31 ॥
যন্মঙ্গলং সহস্রাক্ষে সর্বদেবনমস্কৃতে ।
বৃত্রনাশে সমভবত্তত্তে ভবতু মঙ্গলম্ ॥ 32 ॥
যন্মঙ্গলং সুপর্ণস্য বিনতাঽকল্পযত্পুরা ।
অমৃতং প্রার্থযানস্য তত্তে ভবতু মঙ্গলম্ ॥ 33 ॥
অমৃতোত্পাদনে দৈত্যান্ ঘ্নতো বজ্রধরস্য যত্ ।
অদিতির্মঙ্গলং প্রাদাত্তত্তে ভবতু মঙ্গলম্ ॥ 34 ॥
ত্রীন্বিক্রমান্প্রক্রমতো বিষ্ণোরমিততেজসঃ ।
যদাসীন্মঙ্গলং রাম তত্তে ভবতু মঙ্গলম্ ॥ 35 ॥
ঋতবস্সাগরা দ্বীপা বেদা লোকা দিশশ্চ তে ।
মঙ্গলানি মহাবাহো দিশন্তু শুভমঙ্গলাঃ ॥ 36 ॥
ইতি পুত্রস্য শেষাংশ্চ কৃত্বা শিরসি ভামিনী ।
গন্ধৈশ্চাপি সমালভ্য রামমাযতলোচনা ॥ 37 ॥
ওষধীং চাপি সিদ্ধার্থাং বিশল্যকরণীং শুভাম্ ।
চকার রক্ষাং কৌশল্যা মন্ত্রৈরভিজজাপ চ ॥ 38 ॥
উবাচাতিপ্রহৃষ্টেব সা দুঃখবশবর্তিনী ।
বাঙ্গ্মাত্রেণ ন ভাবেন বাচাঽসংসজ্জমানযা ॥ 39 ॥
আনম্য মূর্ধ্নি চাঘ্রায পরিষ্বজ্য যশস্বিনী ।
অবদত্পুত্র সিদ্ধার্থো গচ্ছ রাম যথাসুখম্ ॥ 40 ॥
অরোগং সর্বসিদ্ধার্থমযোধ্যাং পুনরাগতম্ ।
পশ্যামি ত্বাং সুখং বত্স সুস্থিতং রাজবর্ত্মনি ॥ 41 ॥
প্রণষ্টদুঃখসঙ্কল্পা হর্ষবিদ্যোতিতাননা ।
দ্রক্ষ্যামি ত্বাং বনাত্প্রাপ্তং পূর্ণচন্দ্রমিবোদিতম্ ॥ 42 ॥
ভদ্রাসনগতং রাম বনবাসাদিহাগতম্ ।
দ্রক্ষ্যামি চ পুনস্ত্বাং তু তীর্ণবন্তং পিতুর্বচঃ ॥ 43 ॥
মঙ্গলৈরুপসপন্নো বনবাসাদিহাগতঃ ।
বধ্বা মম চ নিত্যং ত্বং কামান্সংবর্ধ যাহি ভোঃ ॥ 44 ॥
মযাঽর্চিতা দেবগণাশ্শিবাদযো মহর্ষযো ভূতমহাসুরোরগাঃ ।
অভিপ্রযাতস্য বনং চিরায তে হিতানি কাঙ্ক্ষন্তু দিশশ্চ রাঘব ॥ 45 ॥
ইতীব সাঽশ্রুপ্রতিপূর্ণলোচনা সমাপ্য চ স্বস্ত্যযনং যথাবিধি ।
প্রদক্ষিণং চৈব চকার রাঘবং পুনঃ পুনশ্চাপি নিপীড্য সস্বজে ॥ 46 ॥
তথা তু দেব্যা স কৃতপ্রদক্ষিণো নিপীড্য মাতুশ্চরণৌ পুনঃ পুনঃ ।
জগাম সীতানিলযং মহাযশা স্স রাঘবঃ প্রজ্বলিত স্স্বযা শ্রিযা ॥ 47 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাণ্ডে পঞ্চবিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha pañcaviṃśassargaḥ |
sā'vanīya tamāyāsamupaspṛśya jalaṃ śuciḥ |
cakāra mātā rāmasya maṅgalāni manasvinī || 1 ||
na śakyase vārayituṃ gacchedānīṃ raghūttama |
śīghraṃ ca vinivartasva vartasva ca satāṃ krame || 2 ||
yaṃ pālayasi dharmaṃ tvaṃ dhṛtyā ca niyamena ca |
sa vai rāghavaśārdūla dharmastvāmabhirakṣatu || 3 ||
yebhyaḥ praṇamase putra caityeṣvāyataneṣu ca |
te ca tvāmabhirakṣantu vane saha maharṣibhiḥ || 4 ||
yāni dattāni te'strāṇi viśvāmitreṇa dhīmatā |
tāni tvāmabhirakṣantu guṇaissamuditaṃ sadā || 5 ||
pitṛśuśrūṣayā putra mātṛśuśrūṣayā tathā |
satyena ca mahābāho ciraṃ jīvābhirakṣitaḥ || 6 ||
samitkuśa pavitrāṇi vedyaścāyatanāni ca |
sthaṇḍilāni vicitrāṇi śailā vṛkṣāḥ kṣupā hradāḥ || 7 ||
pataṅgāḥ pannagāssiṃhāstvāṃ rakṣantu narottama |
svastisādhyāśca viśve ca marutaśca maharṣayaḥ |
svasti dhātā vidhātā ca svasti pūṣā bhago'ryamā || 8 ||
lokapālāśca te sarve vāsavapramukhāstathā |
ṛtavaścaiva pakṣāśca māsā ssaṃvatsarāḥ kṣapāḥ || 9 ||
dināni ca muhūrtāśca svasti kurvantu te sadā |
smṛtirdhṛtiśca dharmaśca pātu tvāṃ putra sarvataḥ || 10 ||
skandaśca bhagavāndeva ssomaśca sa bṛhaspatiḥ |
saptarṣayo nāradaśca te tvāṃ rakṣantu sarvataḥ || 11 ||
yāścāpi sarvatassidhdā diśaśca sadigīśvarāḥ |
stutā mayā vane tasminpāntu tvāṃ putra nityaśaḥ || 12 ||
śailāssarve samudrāśca rājā varuṇa eva ca |
dyaurantarikṣaṃ pṛthivī nadyassarvāstathaiva ca || 13 ||
nakṣatrāṇi ca sarvāṇi grahāśca sahadevatāḥ |
ahorātre tathā sandhye pāntu tvāṃ vanamāśritam || 14 ||
ṛtavaścaiva ṣaṭpuṇyā māsāssaṃvatsarāstathā |
kalāśca kāṣṭhāśca tathā tava śarma diśantu te || 15 ||
mahāvane vicarato muniveṣasya dhīmataḥ |
tavādityāśca daityāśca bhavantu sukhadāssadā || 16 ||
rākṣasānāṃ piśācānāṃ raudrāṇāṃ krūrakarmaṇām |
kravyādānāṃ ca sarveṣāṃ mā bhūtputraka te bhayam || 17 ||
plavagā vṛścikā daṃśāmaśakāścaiva kānane |
sarīsṛpāśca kīṭāśca mā bhūvangahane tava || 18 ||
mahādvipāśca siṃhāśca vyāghrā ṛkṣāśca daṃṣṭriṇaḥ |
mahiṣā śśṛṅgiṇo raudrā na te druhyantu putraka || 19 ||
nṛmāṃsabhojanā raudrā ye cānye satvajātayaḥ |
mā ca tvāṃ hiṃsiṣuḥ putra mayā sampūjitāstviha || 20 ||
āgamāste śivāssantu sidhyantu ca parākramāḥ |
sarvasampattaye rāma svastimāngaccha putraka || 21 ||
svasti te 'stvantarikṣebhyaḥ pārthivebhyaḥ punaḥ punaḥ |
sarvebhyaścaiva devebhyo ye ca vai paripanthinaḥ || 22 ||
gurussomaśca sūryaśca dhanado'tha yamastathā |
pāntu tvāmarcitā rāma daṇḍakāraṇyavāsinam || 23 ||
agnirvāyustathā dhūmo mantrāścarṣimukhāccyutāḥ |
upasparśanakāle tu pāntu tvāṃ raghunandana || 24 ||
sarvalokaprabhurbrahmā bhūtabhartā tatharṣayaḥ |
ye ca śeṣāssurāste tvāṃ rakṣantu vanavāsinam || 25 ||
iti mālyaissuragaṇāngandhaiścāpi yaśasvinī |
stutibhiścānurūpābhirānarcā'yatalocanā || 26 ||
jvalanaṃ samupādāya brāhmaṇena mahātmanā |
hāvayāmāsa vidhinā rāmamaṅgalakāraṇāt || 27 ||
ghṛtaṃ śvetāni mālyāni samidhaśśvetasarṣapān |
upasampādayāmāsa kauśalyā paramāṅganā || 28 ||
upādhyāya ssavidhinā hutvā śāntimanāmayam |
hutahavyāvaśeṣeṇa bāhyaṃ balimakalpayat || 29 ||
madhu dadhyakṣataghṛtaiḥ svastivācyadvijāṃstataḥ |
vācayāmāsa rāmasya vanesvastyayanakriyāḥ || 30 ||
tatastasmai dvijendrāya rāmamātā yaśasvinī |
dakṣiṇāṃ pradadau kāmyāṃ rāghavaṃ cedamabravīt || 31 ||
yanmaṅgalaṃ sahasrākṣe sarvadevanamaskṛte |
vṛtranāśe samabhavattatte bhavatu maṅgalam || 32 ||
yanmaṅgalaṃ suparṇasya vinatā'kalpayatpurā |
amṛtaṃ prārthayānasya tatte bhavatu maṅgalam || 33 ||
amṛtotpādane daityān ghnato vajradharasya yat |
aditirmaṅgalaṃ prādāttatte bhavatu maṅgalam || 34 ||
trīnvikramānprakramato viṣṇoramitatejasaḥ |
yadāsīnmaṅgalaṃ rāma tatte bhavatu maṅgalam || 35 ||
ṛtavassāgarā dvīpā vedā lokā diśaśca te |
maṅgalāni mahābāho diśantu śubhamaṅgalāḥ || 36 ||
iti putrasya śeṣāṃśca kṛtvā śirasi bhāminī |
gandhaiścāpi samālabhya rāmamāyatalocanā || 37 ||
oṣadhīṃ cāpi siddhārthāṃ viśalyakaraṇīṃ śubhām |
cakāra rakṣāṃ kauśalyā mantrairabhijajāpa ca || 38 ||
uvācātiprahṛṣṭeva sā duḥkhavaśavartinī |
vāṅgmātreṇa na bhāvena vācā'saṃsajjamānayā || 39 ||
ānamya mūrdhni cāghrāya pariṣvajya yaśasvinī |
avadatputra siddhārtho gaccha rāma yathāsukham || 40 ||
arogaṃ sarvasiddhārthamayodhyāṃ punarāgatam |
paśyāmi tvāṃ sukhaṃ vatsa susthitaṃ rājavartmani || 41 ||
praṇaṣṭaduḥkhasaṅkalpā harṣavidyotitānanā |
drakṣyāmi tvāṃ vanātprāptaṃ pūrṇacandramivoditam || 42 ||
bhadrāsanagataṃ rāma vanavāsādihāgatam |
drakṣyāmi ca punastvāṃ tu tīrṇavantaṃ piturvacaḥ || 43 ||
maṅgalairupasapanno vanavāsādihāgataḥ |
vadhvā mama ca nityaṃ tvaṃ kāmānsaṃvardha yāhi bhoḥ || 44 ||
mayā'rcitā devagaṇāśśivādayo maharṣayo bhūtamahāsuroragāḥ |
abhiprayātasya vanaṃ cirāya te hitāni kāṅkṣantu diśaśca rāghava || 45 ||
itīva sā'śrupratipūrṇalocanā samāpya ca svastyayanaṃ yathāvidhi |
pradakṣiṇaṃ caiva cakāra rāghavaṃ punaḥ punaścāpi nipīḍya sasvaje || 46 ||
tathā tu devyā sa kṛtapradakṣiṇo nipīḍya mātuścaraṇau punaḥ punaḥ |
jagāma sītānilayaṃ mahāyaśā ssa rāghavaḥ prajvalita ssvayā śriyā || 47 ||
ityārṣe śrīmadrāmāyaṇe vālmīkīya ādikāvye ayodhyākāṇḍe pañcaviṃśassargaḥ ||
InfoLyter.in — Sacred Vedic Knowledge Portal · Free forever