📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.2 অযোধ্যাকাণ্ড - দ্বিতীয সর্গঃ
2.2 Ayodhyakanda - Dvitiya Sargah
Valmiki Bengali
শ্রীমদ্বাল্মীকীয রামাযণে অযোধ্যাকাণ্ডম্ ।
অথ দ্বিতীযস্সর্গঃ ।
ততঃ পরিষদং সর্বামামন্ত্র্য বসুধাধিপঃ ।
হিতমুদ্ধর্ষণং চৈবমুবাচ প্রথিতং বচঃ ॥ 1 ॥
দুন্দুভিস্বনকল্পেন গম্ভীরেণানুনাদিনা ।
স্বরেণ মহতা রাজা জীমূত ইব নাদযন্ ॥ 2 ॥
রাজলক্ষণযুক্তেন কান্তেনানুপমেন চ ।
উবাচ রসযুক্তেন স্বরেণ নৃপতির্নৃপান্ ॥ 3 ॥
বিদিতং ভবতামেতদ্যথা মে রাজ্যমুত্তমম্ ।
পূর্বকৈর্মম রাজেন্দ্রৈস্সুতবত্পরিপালিতম্ ॥ 4 ॥
সোঽহমিক্ষ্বাকুভি স্সর্বৈর্নরেন্দ্রৈঃ পরিপালিতম্ ।
শ্রেযসা যোক্তুকামোঽস্মি সুখার্হমখিলং জগত্ ॥ 5 ॥
মযাপ্যাচরিতং পূর্বৈঃ পন্থানমনুগচ্ছতা ।
প্রজা নিত্যমনিদ্রেণ যথাশক্ত্যভিরক্ষিতাঃ ॥ 6 ॥
ইদং শরীরং কৃত্স্নস্য লোকস্য চরতা হিতম্ ।
পাণ্ডুরস্যাঽতপত্রস্যচ্ছাযাযাং জরিতং মযা ॥ 7 ॥
প্রাপ্য বর্ষসহস্রাণি বহূন্যাযূংষি জীবতঃ ।
জীর্ণস্যাস্য শরীরস্য বিশ্রান্তিমভিরোচযে ॥ 8 ॥
রাজপ্রভাবজুষ্টাং হি দুর্বহামজিতেন্দ্রিযৈঃ ।
পরিশ্রান্তোঽস্মি লোকস্য গুর্বীং ধর্মধুরং বহন্ ॥ 9 ॥
সোঽহং বিশ্রমমিচ্ছামি পুত্রং কৃত্বা প্রজাহিতে ।
সন্নিকৃষ্টানিমান্সর্বাননুমান্য দ্বিজর্ষভান্ ॥ 10 ॥
অনুজাতো হি মাং সর্বৈর্গুণৈর্জ্যেষ্ঠো মমাত্মজঃ ।
পুরন্দরসমো বীর্যে রামঃ পরপুরঞ্জযঃ ॥ 11 ॥
তং চন্দ্রমিব পুষ্যেণ যুক্তং ধর্মভৃতাং বরম্ ।
যৌবরাজ্যে নিযোক্তাঽস্মি প্রীতঃ পুরুষপুঙ্গবম্ ॥ 12 ॥
অনুরূপস্স বৈ নাথো লক্ষ্মীবান্ লক্ষ্মণাগ্রজঃ ।
ত্রৈলোক্যমপি নাথেন যেন স্যান্নাথবত্তরম্ ॥ 13 ॥
অনেন শ্রেযসা সদ্যস্সংযোজ্যৈবমিমাং মহীম্ ।
গতক্লেশো ভবিষ্যামি সুতে তস্মিন্নিবেশ্য বৈ ॥ 14 ॥
যদিদং মেঽনুরূপার্থং মযা সাধু সুমন্ত্রিতম্ ।
ভবন্তো মেঽনুমন্যন্তাং কথং বা করবাণ্যহম্ ॥ 15 ॥
যদ্যপ্যেষা মম প্রীতির্হিতমন্যদ্বিচিন্ত্যতাম্ ।
অন্যা মধ্যস্থচিন্তা হি বিমর্দাভ্যধিকোদযা ॥ 16 ॥
ইতি ব্রুবন্তং মুদিতাঃ প্রত্যনন্দন্নৃপা নৃপম্ ।
বৃষ্টিমন্তং মহামেঘং নর্দন্ত ইব বর্হিণঃ ॥ 17 ॥
স্নিগ্ধোঽনুনাদী সঞ্জজ্ঞে তত্র হর্ষসমীরিতঃ ।
জনৌঘোদ্ঘুষ্টসন্নাদো বিমানং কম্পযন্নিব ॥ 18 ॥
তস্য ধর্মার্থবিদুষো ভাবমাজ্ঞায সর্বশঃ ।
ব্রাহ্মণা জনমুখ্যাশ্চ পৌরজানপদৈ স্সহ ॥ 19 ॥
সমেত্য মন্ত্রযিত্বা তু সমতাগতবুদ্ধযঃ ।
ঊচুশ্চ মনসা জ্ঞাত্বা বৃদ্ধং দশরথং নৃপম্ ॥ 20 ॥
অনেকবর্ষসাহস্রো বৃদ্ধস্ত্বমসি পার্থিব ।
স রামং যুবরাজানমভিষিঞ্চিস্ব পার্থিবম্ ॥ 21 ॥
ইচ্ছামো হি মহাবাহুং রঘুবীরং মহাবলম্ ।
গজেন মহতাঽযান্তং রামং ছত্রাবৃতাননম্ ॥ 22 ॥
ইতি তদ্বচনং শ্রুত্বা রাজা তেষাং মনঃপ্রিযম্ ।
অজানন্নিব জিজ্ঞাসুরিদং বচনমব্রবীত্ ॥ 23 ॥
শ্রুত্বৈব বচনং যন্মে রাঘবং পতিমিচ্ছথ ।
রাজান স্সংশযোঽযং মে কিমিদং ব্রূত তত্ত্বতঃ ॥ 24 ॥
কথং নু মযি ধর্মেণ পৃথিবীমনুশাসতি ।
ভবন্তো দ্রষ্টুমিচ্ছন্তি যুবরাজং মমাত্মজম্ ॥ 25 ॥
তে তমূচুর্মহাত্মানং পৌরজানপদৈস্সহ ।
বহবো নৃপ কল্যাণা গুণাঃ পুত্রস্য সন্তি তে ॥ 26 ॥
গুণান্ গুণবতো দেব দেবকল্পস্য ধীমতঃ ।
প্রিযানানন্দনান্কৃত্স্নান্প্রবক্ষ্যামোঽদ্য তান্ শৃণু ॥ 27 ॥
দিব্যৈর্গুণৈশ্শক্রসমো রামস্সত্যপরাক্রমঃ ।
ইক্ষ্বাকুভ্যোঽপি সর্বেভ্যো হ্যতিরিক্তো বিশাম্পতে ॥ 28 ॥
রাম স্সত্পুরুষো লোকে সত্যধর্মপরাযণঃ ।
সাক্ষাদ্রামাদ্বিনির্বৃত্তো ধর্মশ্চাপি শ্রিযা সহ ॥ 29 ॥
প্রজাসুখত্ত্বে চন্দ্রস্য বসুধাযাঃ ক্ষমাগুণৈঃ ।
বুদ্ধ্যা বৃহস্পতেস্তুল্যো বীর্যে সাক্ষাচ্ছচীপতেঃ ॥ 30 ॥
ধর্মজ্ঞঃ সত্যসন্ধশ্চ শীলবাননসূযকঃ ।
ক্ষান্তঃ সান্ত্বযিতা শ্লক্ষ্ণঃ কৃতজ্ঞো বিজিতেন্দ্রিযঃ ॥ 31 ॥
মৃদুশ্চ স্থিরচিত্তশ্চ সদা ভব্যোঽনসূযকঃ ।
প্রিযবাদী চ ভূতানাং সত্যবাদী চ রাঘবঃ ॥ 32 ॥
বহুশ্রুতানাং বৃদ্ধানাং ব্রাহ্মণানামুপাসিতা ।
তেনাস্যেহাঽতুলা কীর্তির্যশস্তেজশ্চ বর্ধতে ॥ 33 ॥
দেবাসুরমনুষ্যাণাং সর্বাস্ত্রেষু বিশারদঃ ।
সম্যগ্বিদ্যাব্রতস্নাতো যথাবত্সাঙ্গবেদবিত্ ॥ 34 ॥
গান্ধর্বে চ ভুবি শ্রেষ্ঠো বভূব ভরতাগ্রজঃ ।
কল্যাণাভিজন স্সাধুরদীনাত্মা মহামতিঃ ॥ 35 ॥
দ্বিজৈরভিবিনীতশ্চ শ্রেষ্ঠৈর্ধর্মার্থনৈপুণৈঃ ।
যদা ব্রজতি সঙ্গ্রামং গ্রামার্থে নগরস্য বা ॥ 36 ॥
গত্বা সৌমিত্রিসহিতো নাঽবিজিত্য নিবর্ততে ।
সঙ্গ্রামাত্পুনরাগম্য কুঞ্জরেণ রথেন বা ॥ 37 ॥
পৌরান্ স্বজনবন্নিত্যং কুশলং পরিপৃচ্ছতি ।
পুত্রেষ্বগ্নিষু দারেষু প্রেষ্যশিষ্যগণেষু চ ॥ 38 ॥
নিখিলেনানুপূর্ব্যাচ্চ পিতাপুত্রানিবৌরসান্ ।
শুশ্রূষন্তে চ ব শ্শিষ্যাঃ কচ্চিত্কর্মসু দংশিতাঃ ॥ 39 ॥
ইতি নঃ পুরুষব্যাঘ্র স্সদা রামোঽভিভাষতে ।
ব্যসনেষু মনুষ্যাণাং ভৃশং ভবতি দুঃখিতঃ ॥ 40 ॥
উত্সবেষু চ সর্বেষু পিতেব পরিতুষ্যতি ।
সত্যবাদী মহেষ্বাসো বৃদ্ধসেবী জিতেন্দ্রিযঃ ॥ 41 ॥
স্মিতপূর্বাভিভাষী চ ধর্মং সর্বাত্মনা শ্রিতঃ ।
সম্যগ্যোক্তা শ্রেযসাং চ ন বিগৃহ্য কথারুচিঃ ॥ 42 ॥
উত্তরোত্তরযুক্তৌ চ বক্তা বাচস্পতির্যথা ।
সুভ্রূঃ আযততাম্রাক্ষঃ সাক্ষাদ্বিষ্ণুরিব স্বযম্ ॥ 43 ॥
রামো লোকাভিরামোঽযং শৌর্যবীর্যপরাক্রমৈঃ ।
প্রজাপালনতত্ত্বজ্ঞো ন রাগোপহতেন্দ্রিযঃ ॥ 44 ॥
শক্তস্ত্রৈলোক্যমপ্যেকো ভোক্তুং কিন্নু মহীমিমাম্ ।
নাস্য ক্রোধঃ প্রসাদশ্চ নিরর্থোঽস্তি কদাচন ॥ 45 ॥
হন্ত্যেব নিযমাদ্বধ্যানবধ্যে ন চ কুপ্যতি ।
যুনক্ত্যর্থৈঃ প্রহৃষ্টশ্চ তমসৌ যত্র তুষ্যতি ॥ 46 ॥
শান্তৈ স্সর্বপ্রজাকান্তৈঃ প্রীতিসঞ্জননৈর্নৃণাম্ ।
গুণৈর্বিরুরুচে রামো দীপ্ত স্সূর্য ইবাংশুভিঃ ॥ 47 ॥
তমেবঙ্গুণসম্পন্নং রামং সত্যপরাক্রমম্ ।
লোকপালোপমং নাথমকামযত মেদিনী ॥ 48 ॥
বত্সশ্শ্রেযসি জাতস্তে দিষ্ট্যাঽসৌ তব রাঘব ।
দিষ্ট্যা পুত্রগুণৈর্যুক্তো মারীচ ইব কাশ্যপঃ ॥ 49 ॥
বলমারোগ্যমাযুশ্চ রামস্য বিদিতাত্মনঃ ।
দেবাসুরমনুষ্যেষু সগন্ধর্বোরগেষু চ ॥ 50 ॥
আশংসতে জনস্সর্বো রাষ্ট্রে পুরবরে তথা ।
আভ্যন্তরশ্চ বাহ্যশ্চ পৌরজানপদো জনঃ ॥ 51 ॥
স্ত্রিযো বৃদ্ধাস্তরুণ্যশ্চ সাযং প্রাতস্সমাহিতাঃ ।
সর্বান্ দেবান্ নমস্যন্তি রামস্যার্থে যশস্বিনঃ ॥ 52 ॥
তেষামাযাচিতং দেব ত্বত্প্রসাদাত্সমৃদ্ধ্যতাম্ ।
রামমিন্দীবরশ্যামং সর্বশত্রুনিবর্হণম্ ॥ 53 ॥
পশ্যামো যৌবরাজ্যস্থং তব রাজোত্তমাত্মজম্ ।
তং দেব দেবোপমমাত্মজং তে সর্বস্য লোকস্য হিতে নিবিষ্টম্ ।
হিতায নঃ ক্ষিপ্রমুদারজুষ্টং মুদাঽভষেক্তুং বরদ ত্বমর্হসি ॥ 54 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাণ্ডে দ্বিতীযস্সর্গঃ ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha dvitīyassargaḥ |
tataḥ pariṣadaṃ sarvāmāmantrya vasudhādhipaḥ |
hitamuddharṣaṇaṃ caivamuvāca prathitaṃ vacaḥ || 1 ||
dundubhisvanakalpena gambhīreṇānunādinā |
svareṇa mahatā rājā jīmūta iva nādayan || 2 ||
rājalakṣaṇayuktena kāntenānupamena ca |
uvāca rasayuktena svareṇa nṛpatirnṛpān || 3 ||
viditaṃ bhavatāmetadyathā me rājyamuttamam |
pūrvakairmama rājendraissutavatparipālitam || 4 ||
so'hamikṣvākubhi ssarvairnarendraiḥ paripālitam |
śreyasā yoktukāmo'smi sukhārhamakhilaṃ jagat || 5 ||
mayāpyācaritaṃ pūrvaiḥ panthānamanugacchatā |
prajā nityamanidreṇa yathāśaktyabhirakṣitāḥ || 6 ||
idaṃ śarīraṃ kṛtsnasya lokasya caratā hitam |
pāṇḍurasyā'tapatrasyacchāyāyāṃ jaritaṃ mayā || 7 ||
prāpya varṣasahasrāṇi bahūnyāyūṃṣi jīvataḥ |
jīrṇasyāsya śarīrasya viśrāntimabhirocaye || 8 ||
rājaprabhāvajuṣṭāṃ hi durvahāmajitendriyaiḥ |
pariśrānto'smi lokasya gurvīṃ dharmadhuraṃ vahan || 9 ||
so'haṃ viśramamicchāmi putraṃ kṛtvā prajāhite |
sannikṛṣṭānimānsarvānanumānya dvijarṣabhān || 10 ||
anujāto hi māṃ sarvairguṇairjyeṣṭho mamātmajaḥ |
purandarasamo vīrye rāmaḥ parapurañjayaḥ || 11 ||
taṃ candramiva puṣyeṇa yuktaṃ dharmabhṛtāṃ varam |
yauvarājye niyoktā'smi prītaḥ puruṣapuṅgavam || 12 ||
anurūpassa vai nātho lakṣmīvān lakṣmaṇāgrajaḥ |
trailokyamapi nāthena yena syānnāthavattaram || 13 ||
anena śreyasā sadyassaṃyojyaivamimāṃ mahīm |
gatakleśo bhaviṣyāmi sute tasminniveśya vai || 14 ||
yadidaṃ me'nurūpārthaṃ mayā sādhu sumantritam |
bhavanto me'numanyantāṃ kathaṃ vā karavāṇyaham || 15 ||
yadyapyeṣā mama prītirhitamanyadvicintyatām |
anyā madhyasthacintā hi vimardābhyadhikodayā || 16 ||
iti bruvantaṃ muditāḥ pratyanandannṛpā nṛpam |
vṛṣṭimantaṃ mahāmeghaṃ nardanta iva barhiṇaḥ || 17 ||
snigdho'nunādī sañjajñe tatra harṣasamīritaḥ |
janaughodghuṣṭasannādo vimānaṃ kampayanniva || 18 ||
tasya dharmārthaviduṣo bhāvamājñāya sarvaśaḥ |
brāhmaṇā janamukhyāśca paurajānapadai ssaha || 19 ||
sametya mantrayitvā tu samatāgatabuddhayaḥ |
ūcuśca manasā jñātvā vṛddhaṃ daśarathaṃ nṛpam || 20 ||
anekavarṣasāhasro vṛddhastvamasi pārthiva |
sa rāmaṃ yuvarājānamabhiṣiñcisva pārthivam || 21 ||
icchāmo hi mahābāhuṃ raghuvīraṃ mahābalam |
gajena mahatā'yāntaṃ rāmaṃ chatrāvṛtānanam || 22 ||
iti tadvacanaṃ śrutvā rājā teṣāṃ manaḥpriyam |
ajānanniva jijñāsuridaṃ vacanamabravīt || 23 ||
śrutvaiva vacanaṃ yanme rāghavaṃ patimicchatha |
rājāna ssaṃśayo'yaṃ me kimidaṃ brūta tattvataḥ || 24 ||
kathaṃ nu mayi dharmeṇa pṛthivīmanuśāsati |
bhavanto draṣṭumicchanti yuvarājaṃ mamātmajam || 25 ||
te tamūcurmahātmānaṃ paurajānapadaissaha |
bahavo nṛpa kalyāṇā guṇāḥ putrasya santi te || 26 ||
guṇān guṇavato deva devakalpasya dhīmataḥ |
priyānānandanānkṛtsnānpravakṣyāmo'dya tān śṛṇu || 27 ||
divyairguṇaiśśakrasamo rāmassatyaparākramaḥ |
ikṣvākubhyo'pi sarvebhyo hyatirikto viśāmpate || 28 ||
rāma ssatpuruṣo loke satyadharmaparāyaṇaḥ |
sākṣādrāmādvinirvṛtto dharmaścāpi śriyā saha || 29 ||
prajāsukhattve candrasya vasudhāyāḥ kṣamāguṇaiḥ |
buddhyā bṛhaspatestulyo vīrye sākṣācchacīpateḥ || 30 ||
dharmajñaḥ satyasandhaśca śīlavānanasūyakaḥ |
kṣāntaḥ sāntvayitā ślakṣṇaḥ kṛtajño vijitendriyaḥ || 31 ||
mṛduśca sthiracittaśca sadā bhavyo'nasūyakaḥ |
priyavādī ca bhūtānāṃ satyavādī ca rāghavaḥ || 32 ||
bahuśrutānāṃ vṛddhānāṃ brāhmaṇānāmupāsitā |
tenāsyehā'tulā kīrtiryaśastejaśca vardhate || 33 ||
devāsuramanuṣyāṇāṃ sarvāstreṣu viśāradaḥ |
samyagvidyāvratasnāto yathāvatsāṅgavedavit || 34 ||
gāndharve ca bhuvi śreṣṭho babhūva bharatāgrajaḥ |
kalyāṇābhijana ssādhuradīnātmā mahāmatiḥ || 35 ||
dvijairabhivinītaśca śreṣṭhairdharmārthanaipuṇaiḥ |
yadā vrajati saṅgrāmaṃ grāmārthe nagarasya vā || 36 ||
gatvā saumitrisahito nā'vijitya nivartate |
saṅgrāmātpunarāgamya kuñjareṇa rathena vā || 37 ||
paurān svajanavannityaṃ kuśalaṃ paripṛcchati |
putreṣvagniṣu dāreṣu preṣyaśiṣyagaṇeṣu ca || 38 ||
nikhilenānupūrvyācca pitāputrānivaurasān |
śuśrūṣante ca va śśiṣyāḥ kaccitkarmasu daṃśitāḥ || 39 ||
iti naḥ puruṣavyāghra ssadā rāmo'bhibhāṣate |
vyasaneṣu manuṣyāṇāṃ bhṛśaṃ bhavati duḥkhitaḥ || 40 ||
utsaveṣu ca sarveṣu piteva parituṣyati |
satyavādī maheṣvāso vṛddhasevī jitendriyaḥ || 41 ||
smitapūrvābhibhāṣī ca dharmaṃ sarvātmanā śritaḥ |
samyagyoktā śreyasāṃ ca na vigṛhya kathāruciḥ || 42 ||
uttarottarayuktau ca vaktā vācaspatiryathā |
subhrūḥ āyatatāmrākṣaḥ sākṣādviṣṇuriva svayam || 43 ||
rāmo lokābhirāmo'yaṃ śauryavīryaparākramaiḥ |
prajāpālanatattvajño na rāgopahatendriyaḥ || 44 ||
śaktastrailokyamapyeko bhoktuṃ kinnu mahīmimām |
nāsya krodhaḥ prasādaśca nirartho'sti kadācana || 45 ||
hantyeva niyamādvadhyānavadhye na ca kupyati |
yunaktyarthaiḥ prahṛṣṭaśca tamasau yatra tuṣyati || 46 ||
śāntai ssarvaprajākāntaiḥ prītisañjananairnṛṇām |
guṇairviruruce rāmo dīpta ssūrya ivāṃśubhiḥ || 47 ||
tamevaṅguṇasampannaṃ rāmaṃ satyaparākramam |
lokapālopamaṃ nāthamakāmayata medinī || 48 ||
vatsaśśreyasi jātaste diṣṭyā'sau tava rāghava |
diṣṭyā putraguṇairyukto mārīca iva kāśyapaḥ || 49 ||
balamārogyamāyuśca rāmasya viditātmanaḥ |
devāsuramanuṣyeṣu sagandharvorageṣu ca || 50 ||
āśaṃsate janassarvo rāṣṭre puravare tathā |
ābhyantaraśca bāhyaśca paurajānapado janaḥ || 51 ||
striyo vṛddhāstaruṇyaśca sāyaṃ prātassamāhitāḥ |
sarvān devān namasyanti rāmasyārthe yaśasvinaḥ || 52 ||
teṣāmāyācitaṃ deva tvatprasādātsamṛddhyatām |
rāmamindīvaraśyāmaṃ sarvaśatrunibarhaṇam || 53 ||
paśyāmo yauvarājyasthaṃ tava rājottamātmajam |
taṃ deva devopamamātmajaṃ te sarvasya lokasya hite niviṣṭam |
hitāya naḥ kṣipramudārajuṣṭaṃ mudā'bhaṣektuṃ varada tvamarhasi || 54 ||
ityārṣe śrīmadrāmāyaṇe vālmīkīya ādikāvye ayodhyākāṇḍe dvitīyassargaḥ ||
InfoLyter.in — Sacred Vedic Knowledge Portal · Free forever