📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.27 বালকাণ্ড - সপ্তবিংশ সর্গঃ
1.27 Balakanda - Saptavimsha Sargah
Valmiki Bengali
শ্রীমদ্বাল্মীকীয রামাযণে বালকাণ্ডম্ ।
অথ সপ্তবিংশস্সর্গঃ ।
অথ তাং রজনীমুষ্য বিশ্বামিত্রো মহাযশাঃ ।
প্রহস্য রাঘবং বাক্যমুবাচ মধুরাক্ষরম্ ॥ 1 ॥
পরিতুষ্টোঽস্মি ভদ্রং তে রাজপুত্র মহাযশঃ ।
প্রীত্যা পরমযা যুক্তো দদাম্যস্ত্রাণি সর্বশঃ ॥ 2 ॥
দেবাসুরগণান্বাপি সগন্ধর্বোরগানপি ।
যৈরমিত্রান্ প্রসহ্যাজৌ বশীকৃত্য জযিষ্যসি ॥ 3 ॥
তানি দিব্যানি ভদ্রং তে দদাম্যস্ত্রাণি সর্বশঃ ।
দণ্ডচক্রং মহদ্দিব্যং তব দাস্যামি রাঘব ॥ 4 ॥
ধর্মচক্রং ততো বীর কালচক্রং তথৈব চ ।
বিষ্ণুচক্রং তথাত্যুগ্রমৈন্দ্রমস্ত্রং তথৈব চ ॥ 5 ॥
বজ্রমস্ত্রং নরশ্রেষ্ঠ শৈবং শূলবরং তথা ।
অস্ত্রং ব্রহ্মশিরশ্চৈব ঐষীকমপি রাঘব ॥ 6 ॥
দদামি তে মহাবাহো ব্রাহ্মমস্ত্রমনুত্তমম্ ।
গদে দ্বে চৈব কাকুত্স্থ মোদকী শিখরী উভে ॥ 7 ॥
প্রদীপ্তে নরশার্দূল প্রযচ্ছামি নৃপাত্মজ ।
ধর্মপাশমহং রাম কালপাশং তথৈব চ ॥ 8 ॥
পাশং বারুণমস্ত্রং চ দদাম্যহমনুত্তমম্ ।
অশনী দ্বে প্রযচ্ছামি শুষ্কার্দ্রে রঘুনন্দন ॥ 9 ॥
দদামি চাস্ত্রং পৈনাকমস্ত্রং নারাযণং তথা ।
আগ্নেযমস্ত্রং দযিতং শিখরং নাম নামতঃ ॥ 10 ॥
বাযব্যং প্রথনং নাম দদামি চ তবানঘ ।
অস্ত্রং হযশিরো নাম ক্রৌঞ্চমস্ত্রং তথৈব চ ।
শক্তিদ্বযং চ কাকুত্স্থ দদামি তব রাঘব ॥ 11 ॥
কঙ্কালং মুসলং ঘোরং কাপালমথ কঙ্কণম্ ।
ধারযন্ত্যসুরা যানি দদাম্যেতানি সর্বশঃ ॥ 12 ॥
বৈদ্যাধরং মহাস্ত্রং চ নন্দনং নাম নামতঃ ।
অসিরত্নং মহাবাহো দদামি চ নৃপাত্মজ ॥ 13 ॥
গান্ধর্বমস্ত্রং দযিতং মানবং নাম নামতঃ ।
প্রস্বাপনপ্রশমনে দদ্মি সৌরং চ রাঘব ॥ 14 ॥
দর্পণং শোষণং চৈব সন্তাপনবিলাপনে ।
মদনং চৈব দুর্ধর্ষং কন্দর্পদযিতং তথা ॥ 15 ॥
পৈশাচমস্ত্রং দযিতং মোহনং নাম নামতঃ ।
প্রতীচ্ছ নরশার্দূল রাজপুত্র মহাযশঃ ॥ 16 ॥
তামসং নরশার্দূল সৌমনং চ মহাবল ।
সংবর্ধং চৈব দুর্ধর্ষং মৌসলং চ নৃপাত্মজ ॥ 17 ॥
সত্যমস্ত্রং মহাবাহো তথা মাযাধরং পরম্ ।
ঘোরং তেজঃ প্রভং নাম পরতেজোঽপকর্ষণম্ ॥ 18 ॥
সৌম্যাস্ত্রং শিশিরং নাম ত্বষ্টুরস্ত্রং সুদামনম্ ।
দারুণং চ ভগস্যাপি শিতেষু মথ মানবম্ ॥ 19 ॥
এতান্ রাম মহাবাহো কামরূপান্ মহাবলান্ ।
গৃহাণ পরমোদারান্ ক্ষিপ্রমেব নৃপাত্মজ ॥ 20 ॥
স্থিতস্তু প্রাঙ্মুখো ভূত্বা শুচির্মুনিবরস্তদা ।
দদৌ রামায সুপ্রীতো মন্ত্রগ্রামমনুত্তমম্ ॥ 21 ॥
সর্বসঙ্গ্রহণং যেষাং দৈবতৈরপি দুর্লভম্ ।
তান্যস্ত্রাণি তদা বিপ্রো রাঘবায ন্যবেদযত্ ॥ 22 ॥
জপতস্তু মুনেস্তস্য বিশ্বামিত্রস্য ধীমতঃ ।
উপতস্থুর্মহার্হাণি সর্বাণ্যস্ত্রাণি রাঘবম্ ॥ 23 ॥
ঊচুশ্চ মুদিতাস্সর্বে রামং প্রাঞ্জলযস্তদা ।
ইমে স্ম পরমোদারাঃ কিঙ্করাস্তব রাঘব ॥ 24 ॥
প্রতিগৃহ্য চ কাকুত্স্থঃ সমালভ্য চ পাণিনা ।
মানসা মে ভবিষ্যধ্বমিতি তানভ্যচোদযত্ ॥ 25 ॥
ততঃ প্রীতমনা রামো বিশ্বামিত্রং মহামুনিম্ ।
অভিবাদ্য মহাতেজা গমনাযোপচক্রমে ॥ 26 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাণ্ডে সপ্তবিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha saptaviṃśassargaḥ |
atha tāṃ rajanīmuṣya viśvāmitro mahāyaśāḥ |
prahasya rāghavaṃ vākyamuvāca madhurākṣaram || 1 ||
parituṣṭo'smi bhadraṃ te rājaputra mahāyaśaḥ |
prītyā paramayā yukto dadāmyastrāṇi sarvaśaḥ || 2 ||
devāsuragaṇānvāpi sagandharvoragānapi |
yairamitrān prasahyājau vaśīkṛtya jayiṣyasi || 3 ||
tāni divyāni bhadraṃ te dadāmyastrāṇi sarvaśaḥ |
daṇḍacakraṃ mahaddivyaṃ tava dāsyāmi rāghava || 4 ||
dharmacakraṃ tato vīra kālacakraṃ tathaiva ca |
viṣṇucakraṃ tathātyugramaindramastraṃ tathaiva ca || 5 ||
vajramastraṃ naraśreṣṭha śaivaṃ śūlavaraṃ tathā |
astraṃ brahmaśiraścaiva aiṣīkamapi rāghava || 6 ||
dadāmi te mahābāho brāhmamastramanuttamam |
gade dve caiva kākutstha modakī śikharī ubhe || 7 ||
pradīpte naraśārdūla prayacchāmi nṛpātmaja |
dharmapāśamahaṃ rāma kālapāśaṃ tathaiva ca || 8 ||
pāśaṃ vāruṇamastraṃ ca dadāmyahamanuttamam |
aśanī dve prayacchāmi śuṣkārdre raghunandana || 9 ||
dadāmi cāstraṃ painākamastraṃ nārāyaṇaṃ tathā |
āgneyamastraṃ dayitaṃ śikharaṃ nāma nāmataḥ || 10 ||
vāyavyaṃ prathanaṃ nāma dadāmi ca tavānagha |
astraṃ hayaśiro nāma krauñcamastraṃ tathaiva ca |
śaktidvayaṃ ca kākutstha dadāmi tava rāghava || 11 ||
kaṅkālaṃ musalaṃ ghoraṃ kāpālamatha kaṅkaṇam |
dhārayantyasurā yāni dadāmyetāni sarvaśaḥ || 12 ||
vaidyādharaṃ mahāstraṃ ca nandanaṃ nāma nāmataḥ |
asiratnaṃ mahābāho dadāmi ca nṛpātmaja || 13 ||
gāndharvamastraṃ dayitaṃ mānavaṃ nāma nāmataḥ |
prasvāpanapraśamane dadmi sauraṃ ca rāghava || 14 ||
darpaṇaṃ śoṣaṇaṃ caiva santāpanavilāpane |
madanaṃ caiva durdharṣaṃ kandarpadayitaṃ tathā || 15 ||
paiśācamastraṃ dayitaṃ mohanaṃ nāma nāmataḥ |
pratīccha naraśārdūla rājaputra mahāyaśaḥ || 16 ||
tāmasaṃ naraśārdūla saumanaṃ ca mahābala |
saṃvardhaṃ caiva durdharṣaṃ mausalaṃ ca nṛpātmaja || 17 ||
satyamastraṃ mahābāho tathā māyādharaṃ param |
ghoraṃ tejaḥ prabhaṃ nāma paratejo'pakarṣaṇam || 18 ||
saumyāstraṃ śiśiraṃ nāma tvaṣṭurastraṃ sudāmanam |
dāruṇaṃ ca bhagasyāpi śiteṣu matha mānavam || 19 ||
etān rāma mahābāho kāmarūpān mahābalān |
gṛhāṇa paramodārān kṣiprameva nṛpātmaja || 20 ||
sthitastu prāṅmukho bhūtvā śucirmunivarastadā |
dadau rāmāya suprīto mantragrāmamanuttamam || 21 ||
sarvasaṅgrahaṇaṃ yeṣāṃ daivatairapi durlabham |
tānyastrāṇi tadā vipro rāghavāya nyavedayat || 22 ||
japatastu munestasya viśvāmitrasya dhīmataḥ |
upatasthurmahārhāṇi sarvāṇyastrāṇi rāghavam || 23 ||
ūcuśca muditāssarve rāmaṃ prāñjalayastadā |
ime sma paramodārāḥ kiṅkarāstava rāghava || 24 ||
pratigṛhya ca kākutsthaḥ samālabhya ca pāṇinā |
mānasā me bhaviṣyadhvamiti tānabhyacodayat || 25 ||
tataḥ prītamanā rāmo viśvāmitraṃ mahāmunim |
abhivādya mahātejā gamanāyopacakrame || 26 ||
ityārṣe śrīmadrāmāyaṇe vālmīkīya ādikāvye bālakāṇḍe saptaviṃśassargaḥ ||
InfoLyter.in — Sacred Vedic Knowledge Portal · Free forever