Shri Durga Chandrakala Stuti

ॐ

শ্রী দুর্গা চন্দ্রকলা স্তুতি

Durga Bengali

ধ্যানম্

উমাকান্তে রমাকান্তে এষামাসী-ন্মতিস্সমা ।

নমামি দীক্ষিতেন্দ্রাং স্তান্ নযষট্ক-বিশারদাম্ ॥

বেধোহরীশ্বরস্তুত্যাং বিহর্ত্রীং বিন্ধ্যভূধরে ।

হরপ্রাণেশ্বরীং বন্দে হন্ত্রীং বিবুধবিদ্বিষাম্ ॥ 1 ॥

অভ্যর্থনেন সরসীরুহসম্ভবস্য

ত্যক্ত্বোদিতা ভগবদক্ষিপিধানলীলাম্ ।

বিশ্বেশ্বরী বিপদপাকমনে পুরস্তাত্

মাতা মমাস্তু মধুকৈটভযোর্নিহন্ত্রী ॥ 2 ॥

প্রাঙ্নির্জরেষু নিহতৈর্নিজশক্তিলেশৈঃ

একীভবদ্ভিরুদিতাঽখিললোকগুপ্ত্যৈ ।

সম্পন্নশস্ত্রনিকরা চ তদাযুধস্থৈঃ

মাতা মমাস্তু মহিষান্তকরী পুরস্তাত্ ॥ 3 ॥

প্রালেযশৈলতনযা তনুকান্তিসম্পত্

কোশোদিতা কুবলযচ্ছবিচারুদেহা ।

নারাযণী নমদভীপ্সিতকল্পবল্লী

সুপ্রীতিমাবহতু শুম্ভনিশুম্ভহন্ত্রী ॥ 4 ॥

বিশ্বেশ্বরীতি মহিষান্তকরীতি যস্যাঃ

নারাযণীত্যপি চ নামভিরঙ্কিতানি ।

সূক্তানি পঙ্কজভুবা চ সুরর্ষিভিশ্চ

দৃষ্টানি পাবকমুখৈশ্চ শিবাং ভজে তাম্ ॥ 5 ॥

উত্পত্তিদৈত্যহননস্তবনাত্মকানি

সংরক্ষকাণ্যখিলভূতহিতায যস্যাঃ ।

সূক্তান্যশেষনিগমান্তবিদঃ পঠন্তি

তাং বিশ্বমাতরমজস্রমভিষ্টবীমি ॥ 6 ॥

যে বৈপ্রচিত্তপুনরুত্থিতশুম্ভমুখ্যৈঃ

দুর্ভিক্ষঘোরসমযেন চ কারিতাসু ।

আবিষ্কৃতাস্ত্রিজগদার্তিষু রূপভেদাঃ

তৈরম্বিকা সমভিরক্ষতু মাং বিপদ্ভ্যঃ ॥ 7 ॥

সূক্তং যদীযমরবিন্দভবাদি দৃষ্টং

আবর্ত্য দেব্যনুপদং সুরথঃ সমাধিঃ ।

দ্বাবপ্যবাপতুরভীষ্টমনন্যলভ্যং

তামাদিদেবতরুণীং প্রণমামি মূর্ধ্না ॥ 8 ॥

মাহিষ্মতীতনুভবং চ রুরুং চ হন্তুং

আবিষ্কৃতৈর্নিজরসাদবতারভেদৈঃ ।

অষ্টাদশাহতনবাহতকোটিসঙ্খ্যৈঃ

অম্বা সদা সমভিরক্ষতু মাং বিপদ্ভ্যঃ ॥ 9 ॥

এতচ্চরিত্রমখিলং লিখিতং হি যস্যাঃ

সম্পূজিতং সদন এব নিবেশিতং বা ।

দুর্গং চ তারযতি দুস্তরমপ্যশেষং

শ্রেযঃ প্রযচ্ছতি চ সর্বমুমাং ভজে তাম্ ॥ 10 ॥

যত্পূজনস্তুতিনমস্কৃতিভির্ভবন্তি

প্রীতাঃ পিতামহরমেশহরাস্ত্রযোঽপি ।

তেষামপি স্বকগুণৈর্দদতী বপূংষি

তামীশ্বরস্য তরুণীং শরণং প্রপদ্যে ॥ 11 ॥

কান্তারমধ্যদৃঢলগ্নতযাঽবসন্নাঃ

মগ্নাশ্চ বারিধিজলে রিপুভিশ্চ রুদ্ধাঃ ।

যস্যাঃ প্রপদ্য চরণৌ বিপদস্তরন্তি

সা মে সদাঽস্তু হৃদি সর্বজগত্সবিত্রী ॥ 12 ॥

বন্ধে বধে মহতি মৃত্যুভযে প্রসক্তে

বিত্তক্ষযে চ বিবিধে য মহোপতাপে ।

যত্পাদপূজনমিহ প্রতিকারমাহুঃ

সা মে সমস্তজননী শরণং ভবানী ॥ 13 ॥

বাণাসুরপ্রহিতপন্নগবন্ধমোক্ষঃ

তদ্বাহুদর্পদলনাদুষযা চ যোগঃ ।

প্রাদ্যুম্নিনা দ্রুতমলভ্যত যত্প্রসাদাত্

সা মে শিবা সকলমপ্যশুভং ক্ষিণোতু ॥ 14 ॥

পাপঃ পুলস্ত্যতনযঃ পুনরুত্থিতো মাং

অদ্যাপি হর্তুমযমাগত ইত্যুদীতম্ ।

যত্সেবনেন ভযমিন্দিরযাঽবধূতং

তামাদিদেবতরুণীং শরণং গতোঽস্মি ॥ 15 ॥

যদ্ধ্যানজং সুখমবাপ্যমনন্তপুণ্যৈঃ

সাক্ষাত্তমচ্যুত পরিগ্রহমাশ্ববাপুঃ ।

গোপাঙ্গনাঃ কিল যদর্চনপুণ্যমাত্রাঃ

সা মে সদা ভগবতী ভবতু প্রসন্না ॥ 16 ॥

রাত্রিং প্রপদ্য ইতি মন্ত্রবিদঃ প্রপন্নান্

উদ্বোধ্য মৃত্যুবধিমন্যফলৈঃ প্রলোভ্য ।

বুদ্ধ্বা চ তদ্বিমুখতাং প্রতনং নযন্তীং

আকাশমাদিজননীং জগতাং ভজে তাম্ ॥ 17 ॥

দেশকালেষু দুষ্টেষু দুর্গাচন্দ্রকলাস্তুতিঃ ।

সন্ধ্যযোরনুসন্ধেযা সর্বাপদ্বিনিবৃত্তযে ॥ 18 ॥

ইতি শ্রীমদপয্যদীক্ষিতবিরচিতা দুর্গাচন্দ্রকলাস্তুতিঃ ॥

Roman (IAST) Transliteration

dhyānam

umākānte ramākānte eṣāmāsī-nmatissamā |

namāmi dīkṣitendrāṃ stān nayaṣaṭka-viśāradām ||

vedhoharīśvarastutyāṃ vihartrīṃ vindhyabhūdhare |

haraprāṇeśvarīṃ vande hantrīṃ vibudhavidviṣām || 1 ||

abhyarthanena sarasīruhasambhavasya

tyaktvoditā bhagavadakṣipidhānalīlām |

viśveśvarī vipadapākamane purastāt

mātā mamāstu madhukaiṭabhayornihantrī || 2 ||

prāṅnirjareṣu nihatairnijaśaktileśaiḥ

ekībhavadbhiruditā'khilalokaguptyai |

sampannaśastranikarā ca tadāyudhasthaiḥ

mātā mamāstu mahiṣāntakarī purastāt || 3 ||

prāleyaśailatanayā tanukāntisampat

kośoditā kuvalayacchavicārudehā |

nārāyaṇī namadabhīpsitakalpavallī

suprītimāvahatu śumbhaniśumbhahantrī || 4 ||

viśveśvarīti mahiṣāntakarīti yasyāḥ

nārāyaṇītyapi ca nāmabhiraṅkitāni |

sūktāni paṅkajabhuvā ca surarṣibhiśca

dṛṣṭāni pāvakamukhaiśca śivāṃ bhaje tām || 5 ||

utpattidaityahananastavanātmakāni

saṃrakṣakāṇyakhilabhūtahitāya yasyāḥ |

sūktānyaśeṣanigamāntavidaḥ paṭhanti

tāṃ viśvamātaramajasramabhiṣṭavīmi || 6 ||

ye vaipracittapunarutthitaśumbhamukhyaiḥ

durbhikṣaghorasamayena ca kāritāsu |

āviṣkṛtāstrijagadārtiṣu rūpabhedāḥ

tairambikā samabhirakṣatu māṃ vipadbhyaḥ || 7 ||

sūktaṃ yadīyamaravindabhavādi dṛṣṭaṃ

āvartya devyanupadaṃ surathaḥ samādhiḥ |

dvāvapyavāpaturabhīṣṭamananyalabhyaṃ

tāmādidevataruṇīṃ praṇamāmi mūrdhnā || 8 ||

māhiṣmatītanubhavaṃ ca ruruṃ ca hantuṃ

āviṣkṛtairnijarasādavatārabhedaiḥ |

aṣṭādaśāhatanavāhatakoṭisaṅkhyaiḥ

ambā sadā samabhirakṣatu māṃ vipadbhyaḥ || 9 ||

etaccaritramakhilaṃ likhitaṃ hi yasyāḥ

sampūjitaṃ sadana eva niveśitaṃ vā |

durgaṃ ca tārayati dustaramapyaśeṣaṃ

śreyaḥ prayacchati ca sarvamumāṃ bhaje tām || 10 ||

yatpūjanastutinamaskṛtibhirbhavanti

prītāḥ pitāmaharameśaharāstrayo'pi |

teṣāmapi svakaguṇairdadatī vapūṃṣi

tāmīśvarasya taruṇīṃ śaraṇaṃ prapadye || 11 ||

kāntāramadhyadṛḍhalagnatayā'vasannāḥ

magnāśca vāridhijale ripubhiśca ruddhāḥ |

yasyāḥ prapadya caraṇau vipadastaranti

sā me sadā'stu hṛdi sarvajagatsavitrī || 12 ||

bandhe vadhe mahati mṛtyubhaye prasakte

vittakṣaye ca vividhe ya mahopatāpe |

yatpādapūjanamiha pratikāramāhuḥ

sā me samastajananī śaraṇaṃ bhavānī || 13 ||

bāṇāsuraprahitapannagabandhamokṣaḥ

tadbāhudarpadalanāduṣayā ca yogaḥ |

prādyumninā drutamalabhyata yatprasādāt

sā me śivā sakalamapyaśubhaṃ kṣiṇotu || 14 ||

pāpaḥ pulastyatanayaḥ punarutthito māṃ

adyāpi hartumayamāgata ityudītam |

yatsevanena bhayamindirayā'vadhūtaṃ

tāmādidevataruṇīṃ śaraṇaṃ gato'smi || 15 ||

yaddhyānajaṃ sukhamavāpyamanantapuṇyaiḥ

sākṣāttamacyuta parigrahamāśvavāpuḥ |

gopāṅganāḥ kila yadarcanapuṇyamātrāḥ

sā me sadā bhagavatī bhavatu prasannā || 16 ||

rātriṃ prapadya iti mantravidaḥ prapannān

udbodhya mṛtyuvadhimanyaphalaiḥ pralobhya |

buddhvā ca tadvimukhatāṃ pratanaṃ nayantīṃ

ākāśamādijananīṃ jagatāṃ bhaje tām || 17 ||

deśakāleṣu duṣṭeṣu durgācandrakalāstutiḥ |

sandhyayoranusandheyā sarvāpadvinivṛttaye || 18 ||

iti śrīmadapayyadīkṣitaviracitā durgācandrakalāstutiḥ ||