Narayaniyam Dashaka 53 - Dhenukasuravadham

ॐ

নারাযণীযং দশক 53 - ধেনুকাসুরবধম্

Vishnu Bengali

অতীত্য বাল্যং জগতাং পতে ত্বমুপেত্য পৌগণ্ডবযো মনোজ্ঞম্ ।

উপেক্ষ্য বত্সাবনমুত্সবেন প্রাবর্তথা গোগণপালনাযাম্ ॥1॥

উপক্রমস্যানুগুণৈব সেযং মরুত্পুরাধীশ তব প্রবৃত্তিঃ ।

গোত্রাপরিত্রাণকৃতেঽবতীর্ণস্তদেব দেবাঽঽরভথাস্তদা যত্ ॥2॥

কদাপি রামেণ সমং বনান্তে বনশ্রিযং বীক্ষ্য চরন্ সুখেন ।

শ্রীদামনাম্নঃ স্বসখস্য বাচা মোদাদগা ধেনুককাননং ত্বম্ ॥3॥

উত্তালতালীনিবহে ত্বদুক্ত্যা বলেন ধূতেঽথ বলেন দোর্ভ্যাম্ ।

মৃদুঃ খরশ্চাভ্যপতত্পুরস্তাত্ ফলোত্করো ধেনুকদানবোঽপি ॥4॥

সমুদ্যতো ধৈনুকপালনেঽহং কথং বধং ধৈনুকমদ্য কুর্বে ।

ইতীব মত্বা ধ্রুবমগ্রজেন সুরৌঘযোদ্ধারমজীঘনস্ত্বম্ ॥5॥

তদীযভৃত্যানপি জম্বুকত্বেনোপাগতানগ্রজসংযুতস্ত্বম্ ।

জম্বূফলানীব তদা নিরাস্থস্তালেষু খেলন্ ভগবন্ নিরাস্থঃ ॥6॥

বিনিঘ্নতি ত্বয্যথ জম্বুকৌঘং সনামকত্বাদ্বরুণস্তদানীম্ ।

ভযাকুলো জম্বুকনামধেযং শ্রুতিপ্রসিদ্ধং ব্যধিতেতি মন্যে ॥7॥

তবাবতারস্য ফলং মুরারে সঞ্জাতমদ্যেতি সুরৈর্নুতস্ত্বম্ ।

সত্যং ফলং জাতমিহেতি হাসী বালৈঃ সমং তালফলান্যভুঙ্ক্থাঃ ॥8॥

মধুদ্রবস্রুন্তি বৃহন্তি তানি ফলানি মেদোভরভৃন্তি ভুক্ত্বা ।

তৃপ্তৈশ্চ দৃপ্তৈর্ভবনং ফলৌঘং বহদ্ভিরাগাঃ খলু বালকৈস্ত্বম্ ॥9॥

হতো হতো ধেনুক ইত্যুপেত্য ফলান্যদদ্ভির্মধুরাণি লোকৈঃ ।

জযেতি জীবেতি নুতো বিভো ত্বং মরুত্পুরাধীশ্বর পাহি রোগাত্ ॥10॥

Roman (IAST) Transliteration

atītya bālyaṃ jagatāṃ pate tvamupetya paugaṇḍavayo manojñam |

upekṣya vatsāvanamutsavena prāvartathā gogaṇapālanāyām ||1||

upakramasyānuguṇaiva seyaṃ marutpurādhīśa tava pravṛttiḥ |

gotrāparitrāṇakṛte'vatīrṇastadeva devā''rabhathāstadā yat ||2||

kadāpi rāmeṇa samaṃ vanānte vanaśriyaṃ vīkṣya caran sukhena |

śrīdāmanāmnaḥ svasakhasya vācā modādagā dhenukakānanaṃ tvam ||3||

uttālatālīnivahe tvaduktyā balena dhūte'tha balena dorbhyām |

mṛduḥ kharaścābhyapatatpurastāt phalotkaro dhenukadānavo'pi ||4||

samudyato dhainukapālane'haṃ kathaṃ vadhaṃ dhainukamadya kurve |

itīva matvā dhruvamagrajena suraughayoddhāramajīghanastvam ||5||

tadīyabhṛtyānapi jambukatvenopāgatānagrajasaṃyutastvam |

jambūphalānīva tadā nirāsthastāleṣu khelan bhagavan nirāsthaḥ ||6||

vinighnati tvayyatha jambukaughaṃ sanāmakatvādvaruṇastadānīm |

bhayākulo jambukanāmadheyaṃ śrutiprasiddhaṃ vyadhiteti manye ||7||

tavāvatārasya phalaṃ murāre sañjātamadyeti surairnutastvam |

satyaṃ phalaṃ jātamiheti hāsī bālaiḥ samaṃ tālaphalānyabhuṅkthāḥ ||8||

madhudravasrunti bṛhanti tāni phalāni medobharabhṛnti bhuktvā |

tṛptaiśca dṛptairbhavanaṃ phalaughaṃ vahadbhirāgāḥ khalu bālakaistvam ||9||

hato hato dhenuka ityupetya phalānyadadbhirmadhurāṇi lokaiḥ |

jayeti jīveti nuto vibho tvaṃ marutpurādhīśvara pāhi rogāt ||10||