Narayaniyam Dashaka 41 - Putanadahanam Tatha Krishnalalanahladam

ॐ

নারাযণীযং দশক 41 - পূতনাদহনং তথা কৃষ্ণলালনাহ্লাদম্

Vishnu Bengali

ব্রজেশ্বরৈঃ শৌরিবচো নিশম্য সমাব্রজন্নধ্বনি ভীতচেতাঃ ।

নিষ্পিষ্টনিশ্শেষতরুং নিরীক্ষ্য কঞ্চিত্পদার্থং শরণং গতস্বাম্ ॥1॥

নিশম্য গোপীবচনাদুদন্তং সর্বেঽপি গোপা ভযবিস্মযান্ধাঃ ।

ত্বত্পাতিতং ঘোরপিশাচদেহং দেহুর্বিদূরেঽথ কুঠারকৃত্তম্ ॥2॥

ত্বত্পীতপূতস্তনতচ্ছরীরাত্ সমুচ্চলন্নুচ্চতরো হি ধূমঃ ।

শঙ্কামধাদাগরবঃ কিমেষ কিং চান্দনো গৌল্গুলবোঽথবেতি ॥3॥

মদঙ্গসঙ্গস্য ফলং ন দূরে ক্ষণেন তাবত্ ভবতামপি স্যাত্ ।

ইত্যুল্লপন্ বল্লবতল্লজেভ্যঃ ত্বং পূতনামাতনুথাঃ সুগন্ধিম্ ॥4॥

চিত্রং পিশাচ্যা ন হতঃ কুমারঃ চিত্রং পুরৈবাকথি শৌরিণেদম্ ।

ইতি প্রশংসন্ কিল গোপলোকো ভবন্মুখালোকরসে ন্যমাঙ্ক্ষীত্ ॥5॥

দিনেদিনেঽথ প্রতিবৃদ্ধলক্ষ্মীরক্ষীণমাঙ্গল্যশতো ব্রজোঽযম্ ।

ভবন্নিবাসাদযি বাসুদেব প্রমোদসান্দ্রঃ পরিতো বিরেজে ॥6॥

গৃহেষু তে কোমলরূপহাসমিথঃকথাসঙ্কুলিতাঃ কমন্যঃ ।

বৃত্তেষু কৃত্যেষু ভবন্নিরীক্ষাসমাগতাঃ প্রত্যহমত্যনন্দন্ ॥7॥

অহো কুমারো মযি দত্তদৃষ্টিঃ স্মিতং কৃতং মাং প্রতি বত্সকেন ।

এহ্যেহি মামিত্যুপসার্য পাণী ত্বযীশ কিং কিং ন কৃতং বধূভিঃ ॥8॥

ভবদ্বপুঃস্পর্শনকৌতুকেন করাত্করং গোপবধূজনেন ।

নীতস্ত্বমাতাম্রসরোজমালাব্যালম্বিলোলম্বতুলামলাসীঃ ॥9॥

নিপাযযন্তী স্তনমঙ্কগং ত্বাং বিলোকযন্তী বদনং হসন্তী ।

দশাং যশোদা কতমাং ন ভেজে স তাদৃশঃ পাহি হরে গদান্মাম্ ॥10॥

Roman (IAST) Transliteration

vrajeśvaraiḥ śaurivaco niśamya samāvrajannadhvani bhītacetāḥ |

niṣpiṣṭaniśśeṣataruṃ nirīkṣya kañcitpadārthaṃ śaraṇaṃ gatasvām ||1||

niśamya gopīvacanādudantaṃ sarve'pi gopā bhayavismayāndhāḥ |

tvatpātitaṃ ghorapiśācadehaṃ dehurvidūre'tha kuṭhārakṛttam ||2||

tvatpītapūtastanataccharīrāt samuccalannuccataro hi dhūmaḥ |

śaṅkāmadhādāgaravaḥ kimeṣa kiṃ cāndano gaulgulavo'thaveti ||3||

madaṅgasaṅgasya phalaṃ na dūre kṣaṇena tāvat bhavatāmapi syāt |

ityullapan vallavatallajebhyaḥ tvaṃ pūtanāmātanuthāḥ sugandhim ||4||

citraṃ piśācyā na hataḥ kumāraḥ citraṃ puraivākathi śauriṇedam |

iti praśaṃsan kila gopaloko bhavanmukhālokarase nyamāṅkṣīt ||5||

dinedine'tha prativṛddhalakṣmīrakṣīṇamāṅgalyaśato vrajo'yam |

bhavannivāsādayi vāsudeva pramodasāndraḥ parito vireje ||6||

gṛheṣu te komalarūpahāsamithaḥkathāsaṅkulitāḥ kamanyaḥ |

vṛtteṣu kṛtyeṣu bhavannirīkṣāsamāgatāḥ pratyahamatyanandan ||7||

aho kumāro mayi dattadṛṣṭiḥ smitaṃ kṛtaṃ māṃ prati vatsakena |

ehyehi māmityupasārya pāṇī tvayīśa kiṃ kiṃ na kṛtaṃ vadhūbhiḥ ||8||

bhavadvapuḥsparśanakautukena karātkaraṃ gopavadhūjanena |

nītastvamātāmrasarojamālāvyālambilolambatulāmalāsīḥ ||9||

nipāyayantī stanamaṅkagaṃ tvāṃ vilokayantī vadanaṃ hasantī |

daśāṃ yaśodā katamāṃ na bheje sa tādṛśaḥ pāhi hare gadānmām ||10||