📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
মুকুন্দমালা স্তোত্রম্
Mukundamala Stotram
Stotram Kulasekhara Alvar Bengali
ঘুষ্যতে যস্য নগরে রঙ্গযাত্রা দিনে দিনে ।
তমহং শিরসা বন্দে রাজানং কুলশেখরম্ ॥
শ্রীবল্লভেতি বরদেতি দযাপরেতি
ভক্তপ্রিযেতি ভবলুণ্ঠনকোবিদেতি ।
নাথেতি নাগশযনেতি জগন্নিবাসে-
-ত্যালাপনং প্রতিপদং কুরু মে মুকুন্দ ॥ 1 ॥
জযতু জযতু দেবো দেবকীনন্দনোঽযং
জযতু জযতু কৃষ্ণো বৃষ্ণিবংশপ্রদীপঃ ।
জযতু জযতু মেঘশ্যামলঃ কোমলাঙ্গো
জযতু জযতু পৃথ্বীভারনাশো মুকুন্দঃ ॥ 2 ॥
মুকুন্দ মূর্ধ্না প্রণিপত্য যাচে
ভবন্তমেকান্তমিযন্তমর্থম্ ।
অবিস্মৃতিস্ত্বচ্চরণারবিন্দে
ভবে ভবে মেঽস্তু ভবত্প্রসাদাত্ ॥ 3 ॥
নাহং বন্দে তব চরণযোর্দ্বন্দ্বমদ্বন্দ্বহেতোঃ
কুম্ভীপাকং গুরুমপি হরে নারকং নাপনেতুম্ ।
রম্যারামামৃদুতনুলতা নন্দনে নাপি রন্তুং
ভাবে ভাবে হৃদযভবনে ভাবযেযং ভবন্তম্ ॥ 4 ॥
নাস্থা ধর্মে ন বসুনিচযে নৈব কামোপভোগে
যদ্যদ্ভব্যং ভবতু ভগবন্ পূর্বকর্মানুরূপম্ ।
এতত্প্রার্থ্যং মম বহুমতং জন্মজন্মান্তরেঽপি
ত্বত্পাদাম্ভোরুহযুগগতা নিশ্চলা ভক্তিরস্তু ॥ 5 ॥
দিবি বা ভুবি বা মমাস্তু বাসো
নরকে বা নরকান্তক প্রকামম্ ।
অবধীরিত শারদারবিন্দৌ
চরণৌ তে মরণেঽপি চিন্তযামি ॥ 6 ॥
কৃষ্ণ ত্বদীয পদপঙ্কজপঞ্জরান্ত-
-মদ্যৈব মে বিশতু মানসরাজহংসঃ ।
প্রাণপ্রযাণসমযে কফবাতপিত্তৈঃ
কণ্ঠাবরোধনবিধৌ স্মরণং কুতস্তে ॥ 7 ॥
চিন্তযামি হরিমেব সন্ততং
মন্দমন্দ হসিতাননাম্বুজং
নন্দগোপতনযং পরাত্পরং
নারদাদিমুনিবৃন্দবন্দিতম্ ॥ 8 ॥
করচরণসরোজে কান্তিমন্নেত্রমীনে
শ্রমমুষি ভুজবীচিব্যাকুলেঽগাধমার্গে ।
হরিসরসি বিগাহ্যাপীয তেজোজলৌঘং
ভবমরুপরিখিন্নঃ খেদমদ্য ত্যজামি ॥ 9 ॥
সরসিজনযনে সশঙ্খচক্রে
মুরভিদি মা বিরম স্বচিত্ত রন্তুম্ ।
সুখতরমপরং ন জাতু জানে
হরিচরণস্মরণামৃতেন তুল্যম্ ॥ 10 ॥
মা ভীর্মন্দমনো বিচিন্ত্য বহুধা যামীশ্চিরং যাতনাঃ
নামী নঃ প্রভবন্তি পাপরিপবঃ স্বামী ননু শ্রীধরঃ ।
আলস্যং ব্যপনীয ভক্তিসুলভং ধ্যাযস্ব নারাযণং
লোকস্য ব্যসনাপনোদনকরো দাসস্য কিং ন ক্ষমঃ ॥ 11 ॥
ভবজলধিগতানাং দ্বন্দ্ববাতাহতানাং
সুতদুহিতৃকলত্রত্রাণভারার্দিতানাম্ ।
বিষমবিষযতোযে মজ্জতামপ্লবানাং
ভবতু শরণমেকো বিষ্ণুপোতো নরাণাম্ ॥ 12 ॥
ভবজলধিমগাধং দুস্তরং নিস্তরেযং
কথমহমিতি চেতো মা স্ম গাঃ কাতরত্বম্ ।
সরসিজদৃশি দেবে তাবকী ভক্তিরেকা
নরকভিদি নিষণ্ণা তারযিষ্যত্যবশ্যম্ ॥ 13 ॥
তৃষ্ণাতোযে মদনপবনোদ্ধূত মোহোর্মিমালে
দারাবর্তে তনযসহজগ্রাহসঙ্ঘাকুলে চ ।
সংসারাখ্যে মহতি জলধৌ মজ্জতাং নস্ত্রিধামন্
পাদাম্ভোজে বরদ ভবতো ভক্তিনাবং প্রযচ্ছ ॥ 14 ॥
মাদ্রাক্ষং ক্ষীণপুণ্যান্ ক্ষণমপি ভবতো ভক্তিহীনান্পদাব্জে
মাশ্রৌষং শ্রাব্যবন্ধং তব চরিতমপাস্যান্যদাখ্যানজাতম্ ।
মাস্মার্ষং মাধব ত্বামপি ভুবনপতে চেতসাপহ্নুবানা-
-ন্মাভূবং ত্বত্সপর্যাব্যতিকররহিতো জন্মজন্মান্তরেঽপি ॥ 15 ॥
জিহ্বে কীর্তয কেশবং মুররিপুং চেতো ভজ শ্রীধরং
পাণিদ্বন্দ্ব সমর্চযাচ্যুতকথাঃ শ্রোত্রদ্বয ত্বং শৃণু ।
কৃষ্ণং লোকয লোচনদ্বয হরের্গচ্ছাঙ্ঘ্রিযুগ্মালযং
জিঘ্র ঘ্রাণ মুকুন্দপাদতুলসীং মূর্ধন্নমাধোক্ষজম্ ॥ 16 ॥
হে লোকাঃ শৃণুত প্রসূতিমরণব্যাধেশ্চিকিত্সামিমাং
যোগজ্ঞাঃ সমুদাহরন্তি মুনযো যাং যাজ্ঞবল্ক্যাদযঃ ।
অন্তর্জ্যোতিরমেযমেকমমৃতং কৃষ্ণাখ্যমাপীযতাং
তত্পীতং পরমৌষধং বিতনুতে নির্বাণমাত্যন্তিকম্ ॥ 17 ।
হে মর্ত্যাঃ পরমং হিতং শৃণুত বো বক্ষ্যামি সঙ্ক্ষেপতঃ
সংসারার্ণবমাপদূর্মিবহুলং সম্যক্প্রবিশ্য স্থিতাঃ ।
নানাজ্ঞানমপাস্য চেতসি নমো নারাযণাযেত্যমুং
মন্ত্রং সপ্রণবং প্রণামসহিতং প্রাবর্তযধ্বং মুহুঃ ॥ 18 ॥
পৃথ্বীরেণুরণুঃ পযাংসি কণিকাঃ ফল্গুঃ স্ফুলিঙ্গোঽলঘু-
-স্তেজো নিঃশ্বসনং মরুত্তনুতরং রন্ধ্রং সুসূক্ষ্মং নভঃ ।
ক্ষুদ্রা রুদ্রপিতামহপ্রভৃতযঃ কীটাঃ সমস্তাঃ সুরাঃ
দৃষ্টে যত্র স তাবকো বিজযতে ভূমাবধূতাবধিঃ ॥ 19 ॥
বদ্ধেনাঞ্জলিনা নতেন শিরসা গাত্রৈঃ সরোমোদ্গমৈঃ
কণ্ঠেন স্বরগদ্গদেন নযনেনোদ্গীর্ণবাষ্পাম্বুনা ।
নিত্যং ত্বচ্চরণারবিন্দযুগল ধ্যানামৃতাস্বাদিনা-
-মস্মাকং সরসীরুহাক্ষ সততং সম্পদ্যতাং জীবিতম্ ॥ 20 ॥
হে গোপালক হে কৃপাজলনিধে হে সিন্ধুকন্যাপতে
হে কংসান্তক হে গজেন্দ্রকরুণাপারীণ হে মাধব ।
হে রামানুজ হে জগত্ত্রযগুরো হে পুণ্ডরীকাক্ষ মাং
হে গোপীজননাথ পালয পরং জানামি ন ত্বাং বিনা ॥ 21 ॥
ভক্তাপাযভুজঙ্গগারুডমণিস্ত্রৈলোক্যরক্ষামণিঃ
গোপীলোচনচাতকাম্বুদমণিঃ সৌন্দর্যমুদ্রামণিঃ ।
যঃ কান্তামণি রুক্মিণী ঘনকুচদ্বন্দ্বৈকভূষামণিঃ
শ্রেযো দেবশিখামণির্দিশতু নো গোপালচূডামণিঃ ॥ 22 ॥
শত্রুচ্ছেদৈকমন্ত্রং সকলমুপনিষদ্বাক্যসম্পূজ্যমন্ত্রং
সংসারোত্তারমন্ত্রং সমুপচিততমঃ সঙ্ঘনির্যাণমন্ত্রম্ ।
সর্বৈশ্বর্যৈকমন্ত্রং ব্যসনভুজগসন্দষ্টসন্ত্রাণমন্ত্রং
জিহ্বে শ্রীকৃষ্ণমন্ত্রং জপ জপ সততং জন্মসাফল্যমন্ত্রম্ ॥ 23 ॥
ব্যামোহ প্রশমৌষধং মুনিমনোবৃত্তি প্রবৃত্ত্যৌষধং
দৈত্যেন্দ্রার্তিকরৌষধং ত্রিভুবনী সঞ্জীবনৈকৌষধম্ ।
ভক্তাত্যন্তহিতৌষধং ভবভযপ্রধ্বংসনৈকৌষধং
শ্রেযঃপ্রাপ্তিকরৌষধং পিব মনঃ শ্রীকৃষ্ণদিব্যৌষধম্ ॥ 24 ॥
আম্নাযাভ্যসনান্যরণ্যরুদিতং বেদব্রতান্যন্বহং
মেদশ্ছেদফলানি পূর্তবিধযঃ সর্বে হুতং ভস্মনি ।
তীর্থানামবগাহনানি চ গজস্নানং বিনা যত্পদ-
-দ্বন্দ্বাম্ভোরুহসংস্মৃতির্বিজযতে দেবঃ স নারাযণঃ ॥ 25 ॥
শ্রীমন্নাম প্রোচ্য নারাযণাখ্যং
কে ন প্রাপুর্বাঞ্ছিতং পাপিনোঽপি ।
হা নঃ পূর্বং বাক্প্রবৃত্তা ন তস্মিন্
তেন প্রাপ্তং গর্ভবাসাদিদুঃখম্ ॥ 26 ॥
মজ্জন্মনঃ ফলমিদং মধুকৈটভারে
মত্প্রার্থনীয মদনুগ্রহ এষ এব ।
ত্বদ্ভৃত্যভৃত্য পরিচারক ভৃত্যভৃত্য
ভৃত্যস্য ভৃত্য ইতি মাং স্মর লোকনাথ ॥ 27 ॥
নাথে নঃ পুরুষোত্তমে ত্রিজগতামেকাধিপে চেতসা
সেব্যে স্বস্য পদস্য দাতরি সুরে নারাযণে তিষ্ঠতি ।
যং কঞ্চিত্পুরুষাধমং কতিপযগ্রামেশমল্পার্থদং
সেবাযৈ মৃগযামহে নরমহো মূকা বরাকা বযম্ ॥ 28 ॥
মদন পরিহর স্থিতিং মদীযে
মনসি মুকুন্দপদারবিন্দধাম্নি ।
হরনযনকৃশানুনা কৃশোঽসি
স্মরসি ন চক্রপরাক্রমং মুরারেঃ ॥ 29 ॥
তত্ত্বং ব্রুবাণানি পরং পরস্মা-
-ন্মধু ক্ষরন্তীব সতাং ফলানি ।
প্রাবর্তয প্রাঞ্জলিরস্মি জিহ্বে
নামানি নারাযণ গোচরাণি ॥ 30 ॥
ইদং শরীরং পরিণামপেশলং
পতত্যবশ্যং শ্লথসন্ধিজর্জরম্ ।
কিমৌষধৈঃ ক্লিশ্যসি মূঢ দুর্মতে
নিরামযং কৃষ্ণরসাযনং পিব ॥ 31 ॥
দারা বারাকরবরসুতা তে তনূজো বিরিঞ্চিঃ
স্তোতা বেদস্তব সুরগণো ভৃত্যবর্গঃ প্রসাদঃ ।
মুক্তির্মাযা জগদবিকলং তাবকী দেবকী তে
মাতা মিত্রং বলরিপুসুতস্ত্বয্যতোঽন্যন্ন জানে ॥ 32 ॥
কৃষ্ণো রক্ষতু নো জগত্ত্রযগুরুঃ কৃষ্ণং নমস্যাম্যহং
কৃষ্ণেনামরশত্রবো বিনিহতাঃ কৃষ্ণায তস্মৈ নমঃ ।
কৃষ্ণাদেব সমুত্থিতং জগদিদং কৃষ্ণস্য দাসোঽস্ম্যহং
কৃষ্ণে তিষ্ঠতি সর্বমেতদখিলং হে কৃষ্ণ রক্ষস্ব মাম্ ॥ 33 ॥
তত্ত্বং প্রসীদ ভগবন্ কুরু ময্যনাথে
বিষ্ণো কৃপাং পরমকারুণিকঃ কিল ত্বম্ ।
সংসারসাগরনিমগ্নমনন্তদীন-
-মুদ্ধর্তুমর্হসি হরে পুরুষোত্তমোঽসি ॥ 34 ॥
নমামি নারাযণপাদপঙ্কজং
করোমি নারাযণপূজনং সদা ।
বদামি নারাযণনাম নির্মলং
স্মরামি নারাযণতত্ত্বমব্যযম্ ॥ 35 ॥
শ্রীনাথ নারাযণ বাসুদেব
শ্রীকৃষ্ণ ভক্তপ্রিয চক্রপাণে ।
শ্রীপদ্মনাভাচ্যুত কৈটভারে
শ্রীরাম পদ্মাক্ষ হরে মুরারে ॥ 36 ॥
অনন্ত বৈকুণ্ঠ মুকুন্দ কৃষ্ণ
গোবিন্দ দামোদর মাধবেতি ।
বক্তুং সমর্থোঽপি ন বক্তি কশ্চি-
-দহো জনানাং ব্যসনাভিমুখ্যম্ ॥ 37 ॥
ধ্যাযন্তি যে বিষ্ণুমনন্তমব্যযং
হৃত্পদ্মমধ্যে সততং ব্যবস্থিতম্ ।
সমাহিতানাং সততাভযপ্রদং
তে যান্তি সিদ্ধিং পরমাং চ বৈষ্ণবীম্ ॥ 38 ॥
ক্ষীরসাগরতরঙ্গশীকরা-
-ঽঽসারতারকিতচারুমূর্তযে ।
ভোগিভোগশযনীযশাযিনে
মাধবায মধুবিদ্বিষে নমঃ ॥ 39 ॥
যস্য প্রিযৌ শ্রুতিধরৌ কবিলোকবীরৌ
মিত্রে দ্বিজন্মবরপদ্মশরাবভূতাম্ ।
তেনাম্বুজাক্ষচরণাম্বুজষট্পদেন
রাজ্ঞা কৃতা কৃতিরিযং কুলশেখরেণ ॥ 40 ॥
ইতি কুলশেখর প্রণীতং মুকুন্দমালা ।
Roman (IAST) Transliteration
ghuṣyate yasya nagare raṅgayātrā dine dine |
tamahaṃ śirasā vande rājānaṃ kulaśekharam ||
śrīvallabheti varadeti dayāpareti
bhaktapriyeti bhavaluṇṭhanakovideti |
nātheti nāgaśayaneti jagannivāse-
-tyālāpanaṃ pratipadaṃ kuru me mukunda || 1 ||
jayatu jayatu devo devakīnandano'yaṃ
jayatu jayatu kṛṣṇo vṛṣṇivaṃśapradīpaḥ |
jayatu jayatu meghaśyāmalaḥ komalāṅgo
jayatu jayatu pṛthvībhāranāśo mukundaḥ || 2 ||
mukunda mūrdhnā praṇipatya yāce
bhavantamekāntamiyantamartham |
avismṛtistvaccaraṇāravinde
bhave bhave me'stu bhavatprasādāt || 3 ||
nāhaṃ vande tava caraṇayordvandvamadvandvahetoḥ
kumbhīpākaṃ gurumapi hare nārakaṃ nāpanetum |
ramyārāmāmṛdutanulatā nandane nāpi rantuṃ
bhāve bhāve hṛdayabhavane bhāvayeyaṃ bhavantam || 4 ||
nāsthā dharme na vasunicaye naiva kāmopabhoge
yadyadbhavyaṃ bhavatu bhagavan pūrvakarmānurūpam |
etatprārthyaṃ mama bahumataṃ janmajanmāntare'pi
tvatpādāmbhoruhayugagatā niścalā bhaktirastu || 5 ||
divi vā bhuvi vā mamāstu vāso
narake vā narakāntaka prakāmam |
avadhīrita śāradāravindau
caraṇau te maraṇe'pi cintayāmi || 6 ||
kṛṣṇa tvadīya padapaṅkajapañjarānta-
-madyaiva me viśatu mānasarājahaṃsaḥ |
prāṇaprayāṇasamaye kaphavātapittaiḥ
kaṇṭhāvarodhanavidhau smaraṇaṃ kutaste || 7 ||
cintayāmi harimeva santataṃ
mandamanda hasitānanāmbujaṃ
nandagopatanayaṃ parātparaṃ
nāradādimunibṛndavanditam || 8 ||
karacaraṇasaroje kāntimannetramīne
śramamuṣi bhujavīcivyākule'gādhamārge |
harisarasi vigāhyāpīya tejojalaughaṃ
bhavamaruparikhinnaḥ khedamadya tyajāmi || 9 ||
sarasijanayane saśaṅkhacakre
murabhidi mā virama svacitta rantum |
sukhataramaparaṃ na jātu jāne
haricaraṇasmaraṇāmṛtena tulyam || 10 ||
mā bhīrmandamano vicintya bahudhā yāmīściraṃ yātanāḥ
nāmī naḥ prabhavanti pāparipavaḥ svāmī nanu śrīdharaḥ |
ālasyaṃ vyapanīya bhaktisulabhaṃ dhyāyasva nārāyaṇaṃ
lokasya vyasanāpanodanakaro dāsasya kiṃ na kṣamaḥ || 11 ||
bhavajaladhigatānāṃ dvandvavātāhatānāṃ
sutaduhitṛkalatratrāṇabhārārditānām |
viṣamaviṣayatoye majjatāmaplavānāṃ
bhavatu śaraṇameko viṣṇupoto narāṇām || 12 ||
bhavajaladhimagādhaṃ dustaraṃ nistareyaṃ
kathamahamiti ceto mā sma gāḥ kātaratvam |
sarasijadṛśi deve tāvakī bhaktirekā
narakabhidi niṣaṇṇā tārayiṣyatyavaśyam || 13 ||
tṛṣṇātoye madanapavanoddhūta mohormimāle
dārāvarte tanayasahajagrāhasaṅghākule ca |
saṃsārākhye mahati jaladhau majjatāṃ nastridhāman
pādāmbhoje varada bhavato bhaktināvaṃ prayaccha || 14 ||
mādrākṣaṃ kṣīṇapuṇyān kṣaṇamapi bhavato bhaktihīnānpadābje
māśrauṣaṃ śrāvyabandhaṃ tava caritamapāsyānyadākhyānajātam |
māsmārṣaṃ mādhava tvāmapi bhuvanapate cetasāpahnuvānā-
-nmābhūvaṃ tvatsaparyāvyatikararahito janmajanmāntare'pi || 15 ||
jihve kīrtaya keśavaṃ muraripuṃ ceto bhaja śrīdharaṃ
pāṇidvandva samarcayācyutakathāḥ śrotradvaya tvaṃ śṛṇu |
kṛṣṇaṃ lokaya locanadvaya harergacchāṅghriyugmālayaṃ
jighra ghrāṇa mukundapādatulasīṃ mūrdhannamādhokṣajam || 16 ||
he lokāḥ śṛṇuta prasūtimaraṇavyādheścikitsāmimāṃ
yogajñāḥ samudāharanti munayo yāṃ yājñavalkyādayaḥ |
antarjyotirameyamekamamṛtaṃ kṛṣṇākhyamāpīyatāṃ
tatpītaṃ paramauṣadhaṃ vitanute nirvāṇamātyantikam || 17 |
he martyāḥ paramaṃ hitaṃ śṛṇuta vo vakṣyāmi saṅkṣepataḥ
saṃsārārṇavamāpadūrmibahulaṃ samyakpraviśya sthitāḥ |
nānājñānamapāsya cetasi namo nārāyaṇāyetyamuṃ
mantraṃ sapraṇavaṃ praṇāmasahitaṃ prāvartayadhvaṃ muhuḥ || 18 ||
pṛthvīreṇuraṇuḥ payāṃsi kaṇikāḥ phalguḥ sphuliṅgo'laghu-
-stejo niḥśvasanaṃ maruttanutaraṃ randhraṃ susūkṣmaṃ nabhaḥ |
kṣudrā rudrapitāmahaprabhṛtayaḥ kīṭāḥ samastāḥ surāḥ
dṛṣṭe yatra sa tāvako vijayate bhūmāvadhūtāvadhiḥ || 19 ||
baddhenāñjalinā natena śirasā gātraiḥ saromodgamaiḥ
kaṇṭhena svaragadgadena nayanenodgīrṇabāṣpāmbunā |
nityaṃ tvaccaraṇāravindayugala dhyānāmṛtāsvādinā-
-masmākaṃ sarasīruhākṣa satataṃ sampadyatāṃ jīvitam || 20 ||
he gopālaka he kṛpājalanidhe he sindhukanyāpate
he kaṃsāntaka he gajendrakaruṇāpārīṇa he mādhava |
he rāmānuja he jagattrayaguro he puṇḍarīkākṣa māṃ
he gopījananātha pālaya paraṃ jānāmi na tvāṃ vinā || 21 ||
bhaktāpāyabhujaṅgagāruḍamaṇistrailokyarakṣāmaṇiḥ
gopīlocanacātakāmbudamaṇiḥ saundaryamudrāmaṇiḥ |
yaḥ kāntāmaṇi rukmiṇī ghanakucadvandvaikabhūṣāmaṇiḥ
śreyo devaśikhāmaṇirdiśatu no gopālacūḍāmaṇiḥ || 22 ||
śatrucchedaikamantraṃ sakalamupaniṣadvākyasampūjyamantraṃ
saṃsārottāramantraṃ samupacitatamaḥ saṅghaniryāṇamantram |
sarvaiśvaryaikamantraṃ vyasanabhujagasandaṣṭasantrāṇamantraṃ
jihve śrīkṛṣṇamantraṃ japa japa satataṃ janmasāphalyamantram || 23 ||
vyāmoha praśamauṣadhaṃ munimanovṛtti pravṛttyauṣadhaṃ
daityendrārtikarauṣadhaṃ tribhuvanī sañjīvanaikauṣadham |
bhaktātyantahitauṣadhaṃ bhavabhayapradhvaṃsanaikauṣadhaṃ
śreyaḥprāptikarauṣadhaṃ piba manaḥ śrīkṛṣṇadivyauṣadham || 24 ||
āmnāyābhyasanānyaraṇyaruditaṃ vedavratānyanvahaṃ
medaśchedaphalāni pūrtavidhayaḥ sarve hutaṃ bhasmani |
tīrthānāmavagāhanāni ca gajasnānaṃ vinā yatpada-
-dvandvāmbhoruhasaṃsmṛtirvijayate devaḥ sa nārāyaṇaḥ || 25 ||
śrīmannāma procya nārāyaṇākhyaṃ
ke na prāpurvāñchitaṃ pāpino'pi |
hā naḥ pūrvaṃ vākpravṛttā na tasmin
tena prāptaṃ garbhavāsādiduḥkham || 26 ||
majjanmanaḥ phalamidaṃ madhukaiṭabhāre
matprārthanīya madanugraha eṣa eva |
tvadbhṛtyabhṛtya paricāraka bhṛtyabhṛtya
bhṛtyasya bhṛtya iti māṃ smara lokanātha || 27 ||
nāthe naḥ puruṣottame trijagatāmekādhipe cetasā
sevye svasya padasya dātari sure nārāyaṇe tiṣṭhati |
yaṃ kañcitpuruṣādhamaṃ katipayagrāmeśamalpārthadaṃ
sevāyai mṛgayāmahe naramaho mūkā varākā vayam || 28 ||
madana parihara sthitiṃ madīye
manasi mukundapadāravindadhāmni |
haranayanakṛśānunā kṛśo'si
smarasi na cakraparākramaṃ murāreḥ || 29 ||
tattvaṃ bruvāṇāni paraṃ parasmā-
-nmadhu kṣarantīva satāṃ phalāni |
prāvartaya prāñjalirasmi jihve
nāmāni nārāyaṇa gocarāṇi || 30 ||
idaṃ śarīraṃ pariṇāmapeśalaṃ
patatyavaśyaṃ ślathasandhijarjaram |
kimauṣadhaiḥ kliśyasi mūḍha durmate
nirāmayaṃ kṛṣṇarasāyanaṃ piba || 31 ||
dārā vārākaravarasutā te tanūjo viriñciḥ
stotā vedastava suragaṇo bhṛtyavargaḥ prasādaḥ |
muktirmāyā jagadavikalaṃ tāvakī devakī te
mātā mitraṃ balaripusutastvayyato'nyanna jāne || 32 ||
kṛṣṇo rakṣatu no jagattrayaguruḥ kṛṣṇaṃ namasyāmyahaṃ
kṛṣṇenāmaraśatravo vinihatāḥ kṛṣṇāya tasmai namaḥ |
kṛṣṇādeva samutthitaṃ jagadidaṃ kṛṣṇasya dāso'smyahaṃ
kṛṣṇe tiṣṭhati sarvametadakhilaṃ he kṛṣṇa rakṣasva mām || 33 ||
tattvaṃ prasīda bhagavan kuru mayyanāthe
viṣṇo kṛpāṃ paramakāruṇikaḥ kila tvam |
saṃsārasāgaranimagnamanantadīna-
-muddhartumarhasi hare puruṣottamo'si || 34 ||
namāmi nārāyaṇapādapaṅkajaṃ
karomi nārāyaṇapūjanaṃ sadā |
vadāmi nārāyaṇanāma nirmalaṃ
smarāmi nārāyaṇatattvamavyayam || 35 ||
śrīnātha nārāyaṇa vāsudeva
śrīkṛṣṇa bhaktapriya cakrapāṇe |
śrīpadmanābhācyuta kaiṭabhāre
śrīrāma padmākṣa hare murāre || 36 ||
ananta vaikuṇṭha mukunda kṛṣṇa
govinda dāmodara mādhaveti |
vaktuṃ samartho'pi na vakti kaści-
-daho janānāṃ vyasanābhimukhyam || 37 ||
dhyāyanti ye viṣṇumanantamavyayaṃ
hṛtpadmamadhye satataṃ vyavasthitam |
samāhitānāṃ satatābhayapradaṃ
te yānti siddhiṃ paramāṃ ca vaiṣṇavīm || 38 ||
kṣīrasāgarataraṅgaśīkarā-
-''sāratārakitacārumūrtaye |
bhogibhogaśayanīyaśāyine
mādhavāya madhuvidviṣe namaḥ || 39 ||
yasya priyau śrutidharau kavilokavīrau
mitre dvijanmavarapadmaśarāvabhūtām |
tenāmbujākṣacaraṇāmbujaṣaṭpadena
rājñā kṛtā kṛtiriyaṃ kulaśekhareṇa || 40 ||
iti kulaśekhara praṇītaṃ mukundamālā |
InfoLyter.in — Sacred Vedic Knowledge Portal · Free forever