Laghu Stavah — InfoLyter.in

ॐ

লঘু স্তবঃ

Laghu Stavah

Bengali

ঐন্দ্রস্যেব শরাসনস্য দধতী মধ্যেললাটং প্রভাং

শৌক্লীং কান্তিমনুষ্ণগোরিব শিরস্যাতন্বতী সর্বতঃ ।

এষাসৌ ত্রিপুরা হৃদি দ্যুতিরিবোষ্ণাংশোঃ সদাহঃ স্থিতাত্

ছিন্দ্যান্নঃ সহসা পদৈস্ত্রিভিরঘং জ্যোতির্মযী বাঙ্মযী ॥ 1 ॥

যা মাত্রা ত্রপুসীলতাতনুলসত্তন্তূত্থিতিস্পর্ধিনী

বাগ্বীজে প্রথমে স্থিতা তব সদা তাং মন্মহে তে বযম্ ।

শক্তিঃ কুণ্ডলিনীতি বিশ্বজননব্যাপারবদ্ধোদ্যমাঃ

জ্ঞাত্বেত্থং ন পুনঃ স্পৃশন্তি জননীগর্ভেঽর্ভকত্বং নরাঃ ॥ 2 ॥

দৃষ্ট্বা সম্ভ্রমকারি বস্তু সহসা ঐ ঐ ইতি ব্যাহৃতং

যেনাকূতবশাদপীহ বরদে বিন্দুং বিনাপ্যক্ষরম্ ।

তস্যাপি ধ্রুবমেব দেবি তরসা জাতে তবানুগ্রহে

বাচঃসূক্তিসুধারসদ্রবমুচো নির্যান্তি বক্ত্রাম্বুজাত্ ॥ 3 ॥

যন্নিত্যে তব কামরাজমপরং মন্ত্রাক্ষরং নিষ্কলং

তত্সারস্বতমিত্যবৈতি বিরলঃ কশ্চিদ্বুধশ্চেদ্ভুবি ।

আখ্যানং প্রতিপর্ব সত্যতপসো যত্কীর্তযন্তো দ্বিজাঃ

প্রারম্ভে প্রণবাস্পদপ্রণযিতাং নীত্বোচ্চরন্তি স্ফুটম্ ॥ 4 ॥

যত্সদ্যো বচসাং প্রবৃত্তিকরণে দৃষ্টপ্রভাবং বুধৈঃ

তার্তীযং তদহং নমামি মনসা ত্বদ্বীজমিন্দুপ্রভম্ ।

অস্ত্যৌর্বোঽপি সরস্বতীমনুগতো জাড্যাম্বুবিচ্ছিত্তযে

গোশব্দো গিরি বর্ততে সনিযতং যোগং বিনা সিদ্ধিদঃ ॥ 5 ॥

একৈকং তব দেবি বীজমনঘং সব্যঞ্জনাব্যঞ্জনং

কূটস্থং যদি বা পৃথক্ ক্রমগতং যদ্বা স্থিতং ব্যুত্ক্রমাত্ ।

যং যং কামমপেক্ষ্য যেন বিধিনা কেনাপি বা চিন্তিতং

জপ্তং বা সফলীকরোতি সততং তং তং সমস্তং নৃণাম্ ॥ 6 ॥

বামে পুস্তকধারিণীমভযদাং সাক্ষস্রজং দক্ষিণে

ভক্তেভ্যো বরদানপেশলকরাং কর্পূরকুন্দোজ্জ্বলাম্ ।

উজ্জৃম্ভাম্বুজপত্রকান্তিনযনস্নিগ্ধপ্রভালোকিনীং

যে ত্বামম্ব ন শীলযন্তি মনসা তেষাং কবিত্বং কুতঃ ॥ 7 ॥

যে ত্বাং পাণ্ডুরপুণ্ডরীকপটলস্পষ্টাভিরামপ্রভাং

সিঞ্চন্তীমমৃতদ্রবৈরিব শিরো ধ্যাযন্তি মূর্ধ্নি স্থিতাম্ ।

অশ্রান্তা বিকটস্ফুটাক্ষরপদা নির্যাতি বক্ত্রাম্বুজাত্

তেষাং ভারতি ভারতী সুরসরিত্কল্লোললোলোর্মিবত্ ॥ 8 ॥

যে সিন্দূরপরাগপিঞ্জপিহিতাং ত্বত্তেজসাদ্যামিমাং

উর্বীং চাপি বিলীনযাবকরসপ্রস্তারমগ্নামিব ।

পশ্যন্তি ক্ষণমপ্যনন্যমনসস্তেষামনঙ্গজ্বর-

-ক্লান্তস্রস্তকুরঙ্গশাবকদৃশো বশ্যা ভবন্তি স্ফুটম্ ॥ 9 ॥

চঞ্চত্কাঞ্চনকুণ্ডলাঙ্গদধরামাবদ্ধকাঞ্চীস্রজং

যে ত্বাং চেতসি তদ্গতে ক্ষণমপি ধ্যাযন্তি কৃত্বা স্থিরাম্ ।

তেষাং বেশ্মসু বিভ্রমাদহরহঃ স্ফারীভবন্ত্যশ্চিরং

মাদ্যত্কুঞ্জরকর্ণতালতরলাঃ স্থৈর্যং ভজন্তে শ্রিযঃ ॥ 10 ॥

আর্ভট্যা শশিখণ্ডমণ্ডিতজটাজূটাং নৃমুণ্ডস্রজং

বন্ধূকপ্রসবারুণাম্বরধরাং প্রেতাসনাধ্যাসিনীম্ ।

ত্বাং ধ্যাযন্তি চতুর্ভুজাং ত্রিনযনামাপীনতুঙ্গস্তনীং

মধ্যে নিম্নবলিত্রযাঙ্কিততনুং ত্বদ্রূপসংবিত্তযে ॥ 11 ॥

জাতোঽপ্যল্পপরিচ্ছদে ক্ষিতিভুজাং সামান্যমাত্রে কুলে

নিঃশেষাবনিচক্রবর্তিপদবীং লব্ধ্বা প্রতাপোন্নতঃ ।

যদ্বিদ্যাধর বৃন্দবন্দিতপদঃ শ্রীবত্সরাজোঽভবত্

দেবি ত্বচ্চরণাম্বুজ প্রণতিজঃ সোঽযং প্রসাদোদযঃ ॥ 12 ॥

চণ্ডি ত্বচ্চরণাম্বুজার্চনকৃতে বিল্বাদিলোল্লুণ্ঠন-

-ত্রুট্যত্কণ্টককোটিভিঃ পরিচযং যেষাং ন জগ্মুঃ করাঃ ।

তে দণ্ডাঙ্কুশচক্রচাপকুলিশশ্রীবত্সমত্স্যাঙ্কিতৈঃ

জাযন্তে পৃথিবীভুজঃ কথমিবাম্ভোজপ্রভৈঃ পাণিভিঃ ॥ 13 ॥

বিপ্রাঃ ক্ষোণিভুজো বিশস্তদিতরে ক্ষীরাজ্যমধ্বাসবৈঃ ।

ত্বাং দেবি ত্রিপুরে পরাপরমযীং সন্তর্প্য পূজাবিধৌ ।

যাং যাং প্রার্থযতে মনঃ স্থিরধিযাং তেষাং ত এব ধ্রুবং

তাং তাং সিদ্ধিমবাপ্নুবন্তি তরসা বিঘ্নৈরবিঘ্নীকৃতাঃ ॥ 14 ॥

শব্দানাং জননী ত্বমত্র ভুবনে বাগ্বাদিনীত্যুচ্যসে

ত্বত্তঃ কেশববাসব প্রভৃতযোঽপ্যাবির্ভবন্তি স্ফুটম্ ।

লীযন্তে খলু যত্র কল্পবিরমে ব্রহ্মাদযস্তেঽপ্যমী

সা ত্বং কাচিদচিন্ত্যরূপমহিমা শক্তিঃ পরা গীযসে ॥ 15 ॥

দেবানাং ত্রিতযং ত্রযী হুতভুজাং শক্তিত্রযং ত্রিঃ স্বরাঃ

ত্রৈলোক্যং ত্রিপদী ত্রিপুষ্করমথো ত্রিব্রহ্ম বর্ণাস্ত্রযঃ ।

যত্কিঞ্চিজ্জগতি ত্রিধা নিযমিতং বস্তু ত্রিবর্গাদিকং

তত্সর্বং ত্রিপুরেতি নাম ভগবত্যন্বেতি তে তত্ত্বতঃ ॥ 16 ॥

লক্ষ্মীং রাজকুলে জযাং রণভুবি ক্ষেমঙ্করীমধ্বনি

ক্রব্যাদদ্বিপসর্পভাজি শবরীং কান্তারদুর্গে গিরৌ ।

ভূতপ্রেতপিশাচজম্বুকভযে স্মৃত্বা মহাভৈরবীং

ব্যামোহে ত্রিপুরাং তরন্তি বিপদস্তারাং চ তোযপ্লবে ॥ 17 ॥

মাযা কুণ্ডলিনী ক্রিযা মধুমতী কালী কলামালিনী

মাতঙ্গী বিজযা জযা ভগবতী দেবী শিবা শাম্ভবী ।

শক্তিঃ শঙ্করবল্লভা ত্রিনযনা বাগ্বাদিনী ভৈরবী

হ্রীঙ্কারী ত্রিপুরা পরাপরমযী মাতা কুমারীত্যসি ॥ 18 ॥

আঈপল্লবিতৈঃ পরস্পরযুতৈর্দ্বিত্রিক্রমাদ্যক্ষরৈ

কাদ্যৈঃ ক্ষান্তগতৈঃ স্বরাদিভিরথ ক্ষান্তৈশ্চ তৈঃ সস্বরৈঃ ।

নামানি ত্রিপুরে ভবন্তি খলু যান্যত্যন্তগুহ্যানি তে

তেভ্যো ভৈরবপত্নি বিংশতিসহস্রেভ্যঃ পরেভ্যো নমঃ ॥ 19 ॥

বোদ্ধব্যা নিপুণং বুধৈঃ স্তুতিরিযং কৃত্বা মনস্তদ্গতং

ভারত্যাস্ত্রিপুরেত্যনন্যমনসা যত্রাদ্যবৃত্তে স্ফুটম্ ।

একদ্বিত্রিপদক্রমেণ কথিতস্তত্পাদসঙ্খ্যাক্ষরৈঃ

মন্ত্রোদ্ধার বিধির্বিশেষসহিতঃ সত্সম্প্রদাযান্বিতঃ ॥ 20 ॥

সাবদ্যং নিরবদ্যমস্তু যদি বা কিং বানযা চিন্তযা

নূনং স্তোত্রমিদং পঠিষ্যতি জনো যস্যাস্তি ভক্তিস্ত্বযি ।

সঞ্চিন্ত্যাপি লঘুত্বমাত্মনি দৃঢং সঞ্জাযমানং হঠাত্

ত্বদ্ভক্ত্যা মুখরীকৃতেন রচিতং যস্মান্মযাপি ধৃবম্ ॥ 21 ॥

ইতি শ্রীকালিদাস বিরচিত পঞ্চস্তব্যাং প্রথমঃ লঘুস্তবঃ ।

Roman (IAST) Transliteration

aindrasyeva śarāsanasya dadhatī madhyelalāṭaṃ prabhāṃ

śauklīṃ kāntimanuṣṇagoriva śirasyātanvatī sarvataḥ |

eṣāsau tripurā hṛdi dyutirivoṣṇāṃśoḥ sadāhaḥ sthitāt

chindyānnaḥ sahasā padaistribhiraghaṃ jyotirmayī vāṅmayī || 1 ||

yā mātrā trapusīlatātanulasattantūtthitispardhinī

vāgbīje prathame sthitā tava sadā tāṃ manmahe te vayam |

śaktiḥ kuṇḍalinīti viśvajananavyāpārabaddhodyamāḥ

jñātvetthaṃ na punaḥ spṛśanti jananīgarbhe'rbhakatvaṃ narāḥ || 2 ||

dṛṣṭvā sambhramakāri vastu sahasā ai ai iti vyāhṛtaṃ

yenākūtavaśādapīha varade binduṃ vināpyakṣaram |

tasyāpi dhruvameva devi tarasā jāte tavānugrahe

vācaḥsūktisudhārasadravamuco niryānti vaktrāmbujāt || 3 ||

yannitye tava kāmarājamaparaṃ mantrākṣaraṃ niṣkalaṃ

tatsārasvatamityavaiti viralaḥ kaścidbudhaścedbhuvi |

ākhyānaṃ pratiparva satyatapaso yatkīrtayanto dvijāḥ

prārambhe praṇavāspadapraṇayitāṃ nītvoccaranti sphuṭam || 4 ||

yatsadyo vacasāṃ pravṛttikaraṇe dṛṣṭaprabhāvaṃ budhaiḥ

tārtīyaṃ tadahaṃ namāmi manasā tvadbījaminduprabham |

astyaurvo'pi sarasvatīmanugato jāḍyāmbuvicchittaye

gośabdo giri vartate saniyataṃ yogaṃ vinā siddhidaḥ || 5 ||

ekaikaṃ tava devi bījamanaghaṃ savyañjanāvyañjanaṃ

kūṭasthaṃ yadi vā pṛthak kramagataṃ yadvā sthitaṃ vyutkramāt |

yaṃ yaṃ kāmamapekṣya yena vidhinā kenāpi vā cintitaṃ

japtaṃ vā saphalīkaroti satataṃ taṃ taṃ samastaṃ nṛṇām || 6 ||

vāme pustakadhāriṇīmabhayadāṃ sākṣasrajaṃ dakṣiṇe

bhaktebhyo varadānapeśalakarāṃ karpūrakundojjvalām |

ujjṛmbhāmbujapatrakāntinayanasnigdhaprabhālokinīṃ

ye tvāmamba na śīlayanti manasā teṣāṃ kavitvaṃ kutaḥ || 7 ||

ye tvāṃ pāṇḍurapuṇḍarīkapaṭalaspaṣṭābhirāmaprabhāṃ

siñcantīmamṛtadravairiva śiro dhyāyanti mūrdhni sthitām |

aśrāntā vikaṭasphuṭākṣarapadā niryāti vaktrāmbujāt

teṣāṃ bhārati bhāratī surasaritkallolalolormivat || 8 ||

ye sindūraparāgapiñjapihitāṃ tvattejasādyāmimāṃ

urvīṃ cāpi vilīnayāvakarasaprastāramagnāmiva |

paśyanti kṣaṇamapyananyamanasasteṣāmanaṅgajvara-

-klāntasrastakuraṅgaśābakadṛśo vaśyā bhavanti sphuṭam || 9 ||

cañcatkāñcanakuṇḍalāṅgadadharāmābaddhakāñcīsrajaṃ

ye tvāṃ cetasi tadgate kṣaṇamapi dhyāyanti kṛtvā sthirām |

teṣāṃ veśmasu vibhramādaharahaḥ sphārībhavantyaściraṃ

mādyatkuñjarakarṇatālataralāḥ sthairyaṃ bhajante śriyaḥ || 10 ||

ārbhaṭyā śaśikhaṇḍamaṇḍitajaṭājūṭāṃ nṛmuṇḍasrajaṃ

bandhūkaprasavāruṇāmbaradharāṃ pretāsanādhyāsinīm |

tvāṃ dhyāyanti caturbhujāṃ trinayanāmāpīnatuṅgastanīṃ

madhye nimnavalitrayāṅkitatanuṃ tvadrūpasaṃvittaye || 11 ||

jāto'pyalpaparicchade kṣitibhujāṃ sāmānyamātre kule

niḥśeṣāvanicakravartipadavīṃ labdhvā pratāponnataḥ |

yadvidyādhara bṛndavanditapadaḥ śrīvatsarājo'bhavat

devi tvaccaraṇāmbuja praṇatijaḥ so'yaṃ prasādodayaḥ || 12 ||

caṇḍi tvaccaraṇāmbujārcanakṛte bilvādilolluṇṭhana-

-truṭyatkaṇṭakakoṭibhiḥ paricayaṃ yeṣāṃ na jagmuḥ karāḥ |

te daṇḍāṅkuśacakracāpakuliśaśrīvatsamatsyāṅkitaiḥ

jāyante pṛthivībhujaḥ kathamivāmbhojaprabhaiḥ pāṇibhiḥ || 13 ||

viprāḥ kṣoṇibhujo viśastaditare kṣīrājyamadhvāsavaiḥ |

tvāṃ devi tripure parāparamayīṃ santarpya pūjāvidhau |

yāṃ yāṃ prārthayate manaḥ sthiradhiyāṃ teṣāṃ ta eva dhruvaṃ

tāṃ tāṃ siddhimavāpnuvanti tarasā vighnairavighnīkṛtāḥ || 14 ||

śabdānāṃ jananī tvamatra bhuvane vāgvādinītyucyase

tvattaḥ keśavavāsava prabhṛtayo'pyāvirbhavanti sphuṭam |

līyante khalu yatra kalpavirame brahmādayaste'pyamī

sā tvaṃ kācidacintyarūpamahimā śaktiḥ parā gīyase || 15 ||

devānāṃ tritayaṃ trayī hutabhujāṃ śaktitrayaṃ triḥ svarāḥ

trailokyaṃ tripadī tripuṣkaramatho tribrahma varṇāstrayaḥ |

yatkiñcijjagati tridhā niyamitaṃ vastu trivargādikaṃ

tatsarvaṃ tripureti nāma bhagavatyanveti te tattvataḥ || 16 ||

lakṣmīṃ rājakule jayāṃ raṇabhuvi kṣemaṅkarīmadhvani

kravyādadvipasarpabhāji śabarīṃ kāntāradurge girau |

bhūtapretapiśācajambukabhaye smṛtvā mahābhairavīṃ

vyāmohe tripurāṃ taranti vipadastārāṃ ca toyaplave || 17 ||

māyā kuṇḍalinī kriyā madhumatī kālī kalāmālinī

mātaṅgī vijayā jayā bhagavatī devī śivā śāmbhavī |

śaktiḥ śaṅkaravallabhā trinayanā vāgvādinī bhairavī

hrīṅkārī tripurā parāparamayī mātā kumārītyasi || 18 ||

āīpallavitaiḥ parasparayutairdvitrikramādyakṣarai

kādyaiḥ kṣāntagataiḥ svarādibhiratha kṣāntaiśca taiḥ sasvaraiḥ |

nāmāni tripure bhavanti khalu yānyatyantaguhyāni te

tebhyo bhairavapatni viṃśatisahasrebhyaḥ parebhyo namaḥ || 19 ||

boddhavyā nipuṇaṃ budhaiḥ stutiriyaṃ kṛtvā manastadgataṃ

bhāratyāstripuretyananyamanasā yatrādyavṛtte sphuṭam |

ekadvitripadakrameṇa kathitastatpādasaṅkhyākṣaraiḥ

mantroddhāra vidhirviśeṣasahitaḥ satsampradāyānvitaḥ || 20 ||

sāvadyaṃ niravadyamastu yadi vā kiṃ vānayā cintayā

nūnaṃ stotramidaṃ paṭhiṣyati jano yasyāsti bhaktistvayi |

sañcintyāpi laghutvamātmani dṛḍhaṃ sañjāyamānaṃ haṭhāt

tvadbhaktyā mukharīkṛtena racitaṃ yasmānmayāpi dhṛvam || 21 ||

iti śrīkālidāsa viracita pañcastavyāṃ prathamaḥ laghustavaḥ |