caṇḍamuṇḍa vadho nāma saptamodhyāyaḥ ||
dhyānaṃ
dhyāyeṃ ratna pīṭhe śukakala paṭhitaṃ śruṇvatīṃ śyāmalāṅgīṃ|
nyastaikāṅghriṃ saroje śaśi śakala dharāṃ vallakīṃ vāda yantīṃ
kahalārābaddha mālāṃ niyamita vilasaccolikāṃ rakta vastrāṃ|
mātaṅgīṃ śaṅkha pātrāṃ madhura madhumadāṃ citrakodbhāsi bhālāṃ|
ṛṣiruvāca|
ājñaptāste tatodaityā-ścaṇḍamuṇḍapurogamāḥ|
caturaṅgabalopetā yayurabhyudyatāyudhāḥ||1||
dadṛśuste tato devī-mīṣaddhāsāṃ vyavasthitām|
siṃhasyopari śailendra-śṛṅge mahatikāñcane||2||
tedṛṣṭvātāṃsamādātu-mudyamaṃñcakrurudyatāḥ
ākṛṣṭacāpāsidharā-stathā'nye tatsamīpagāḥ||3||
tataḥ kopaṃ cakāroccai-rambikā tānarīnprati|
kopena cāsyā vadanaṃ maṣīvarṇamabhūttadā||4||
bhrukuṭīkuṭilāttasyā lalāṭaphalakāddrutam|
kālī karāla vadanā viniṣkrāntā'sipāśinī ||5||
vicitrakhaṭvāṅgadharā naramālāvibhūṣaṇā|
dvīpicarmaparīdhānā śuṣkamāṃsā'tibhairavā||6||
ativistāravadanā jihvālalanabhīṣaṇā|
nimagnāraktanayanā nādāpūritadiṅmukhā ||6||
sā vegenā'bhipatitā ghūtayantī mahāsurān|
sainye tatra surārīṇā-mabhakṣayata tadbalam ||8||
pārṣṇigrāhāṅkuśagrāhi-yodhaghaṇṭāsamanvitān|
samādāyaikahastena mukhe cikṣepa vāraṇān ||9||
tathaiva yodhaṃ turagai rathaṃ sārathinā saha|
nikṣipya vaktre daśanaiścarvayatyatibhairavaṃ ||10||
ekaṃ jagrāha keśeṣu grīvāyāmatha cāparaṃ|
pādenākramyacaivānyamurasānyamapothayat ||11||
tairmuktānica śastrāṇi mahāstrāṇi tathāsuraiḥ|
mukhena jagrāha ruṣā daśanairmathitānyapi ||12||
balināṃ tadbalaṃ sarvamasurāṇāṃ durātmanāṃ
mamardābhakṣayaccānyānanyāṃścātāḍayattathā ||13||
asinā nihatāḥ kecitkecitkhaṭvāṅgatāḍitāḥ|
jagmurvināśamasurā dantāgrābhihatāstathā ||14||
kṣaṇena tadbhalaṃ sarva masurāṇāṃ nipātitaṃ|
dṛṣṭvā caṇḍo'bhidudrāva tāṃ kālīmatibhīṣaṇāṃ ||15||
śaravarṣairmahābhīmairbhīmākṣīṃ tāṃ mahāsuraḥ|
chādayāmāsa cakraiśca muṇḍaḥ kṣiptaiḥ sahasraśaḥ ||16||
tānicakrāṇyanekāni viśamānāni tanmukham|
babhuryathārkabimbāni subahūni ghanodaraṃ ||17||
tato jahāsātiruṣā bhīmaṃ bhairavanādinī|
kālī karālavadanā durdarśaśanojjvalā ||18||
utthāya ca mahāsiṃhaṃ devī caṇḍamadhāvata|
gṛhītvā cāsya keśeṣu śirastenāsinācchinat ||19||
atha muṇḍo'bhyadhāvattāṃ dṛṣṭvā caṇḍaṃ nipātitam|
tamapyapāta yadbhamau sā khaḍgābhihataṃruṣā ||20||
hataśeṣaṃ tataḥ sainyaṃ dṛṣṭvā caṇḍaṃ nipātitam|
muṇḍañca sumahāvīryaṃ diśo bheje bhayāturam ||21||
śiraścaṇḍasya kālī ca gṛhītvā muṇḍa meva ca|
prāha pracaṇḍāṭṭahāsamiśramabhyetya caṇḍikām ||22||
mayā tavā tropahṛtau caṇḍamuṇḍau mahāpaśū|
yuddhayajñe svayaṃ śumbhaṃ niśumbhaṃ cahaniṣyasi ||23||
ṛṣiruvāca||
tāvānītau tato dṛṣṭvā caṇḍa muṇḍau mahāsurau|
uvāca kālīṃ kalyāṇī lalitaṃ caṇḍikā vacaḥ ||24||
yasmāccaṇḍaṃ ca muṇḍaṃ ca gṛhītvā tvamupāgatā|
cāmuṇḍeti tato lòke khyātā devī bhaviṣyasi ||25||
|| jaya jaya śrī mārkaṇḍeya purāṇe sāvarnike manvantare devi mahatmye caṇḍamuṇḍa vadho nāma saptamodhyāya samāptam ||
āhuti
oṃ klīṃ jayantī sāṅgāyai saśaktikāyai saparivārāyai savāhanāyai kālī cāmuṇḍā devyai karpūra bījādhiṣṭhāyai mahāhutiṃ samarpayāmi namaḥ svāhā ||