Chanakya Niti - Ashtamo'dhyayah

ॐ

চাণক্য নীতি - অষ্টমোঽধ্যাযঃ

Bengali

অধমা ধনমিচ্ছন্তি ধনমানৌ চ মধ্যমাঃ ।

উত্তমা মানমিচ্ছন্তি মানো হি মহতাং ধনম্ ॥ 01 ॥

ইক্ষুরাপঃ পযো মূলং তাম্বূলং ফলমৌষধম্ ।

ভক্ষযিত্বাপি কর্তব্যাঃ স্নানদানাদিকাঃ ক্রিযাঃ ॥ 02 ॥

দীপো ভক্ষযতে ধ্বান্তং কজ্জলং চ প্রসূযতে ।

যদন্নং ভক্ষযতে নিত্যং জাযতে তাদৃশী প্রজা ॥ 03 ॥

বিত্তং দেহি গুণান্বিতেষু মতিমন্নান্যত্র দেহি ক্বচিত্

প্রাপ্তং বারিনিধের্জলং ঘনমুখে মাধুর্যযুক্তং সদা ।

জীবান্স্থাবরজঙ্গমাংশ্চ সকলান্সঞ্জীব্য ভূমণ্ডলং

ভূযঃ পশ্য তদেব কোটিগুণিতং গচ্ছন্তমম্ভোনিধিম্ ॥ 04 ॥

চাণ্ডালানাং সহস্রৈশ্চ সূরিভিস্তত্ত্বদর্শিভিঃ ।

একো হি যবনঃ প্রোক্তো ন নীচো যবনাত্পরঃ ॥ 05 ॥

তৈলাভ্যঙ্গে চিতাধূমে মৈথুনে ক্ষৌরকর্মণি ।

তাবদ্ভবতি চাণ্ডালো যাবত্স্নানং ন চাচরেত্ ॥ 06 ॥

অজীর্ণে ভেষজং বারি জীর্ণে বারি বলপ্রদম্ ।

ভোজনে চামৃতং বারি ভোজনান্তে বিষাপহম্ ॥ 07 ॥

হতং জ্ঞানং ক্রিযাহীনং হতশ্চাজ্ঞানতো নরঃ ।

হতং নির্ণাযকং সৈন্যং স্ত্রিযো নষ্টা হ্যভর্তৃকাঃ ॥ 08 ॥

বৃদ্ধকালে মৃতা ভার্যা বন্ধুহস্তগতং ধনম্ ।

ভোজনং চ পরাধীনং তিস্রঃ পুংসাং বিডম্বনাঃ ॥ 09 ॥

নাগ্নিহোত্রং বিনা বেদা ন চ দানং বিনা ক্রিযা ।

ন ভাবেন বিনা সিদ্ধিস্তস্মাদ্ভাবো হি কারণম্ ॥ 10 ॥

ন দেবো বিদ্যতে কাষ্ঠে ন পাষাণে ন মৃণ্মযে ।

ন ভাবেন বিনা সিদ্ধিস্তস্মাদ্ভাবো হি কারণম্ ॥ 11 ॥

কাষ্ঠপাষাণধাতূনাং কৃত্বা ভাবেন সেবনম্ ।

শ্রদ্ধযা চ তথা সিদ্ধিস্তস্য বিষ্ণুপ্রসাদতঃ ॥ 12 ॥

ন দেবো বিদ্যতে কাষ্ঠে ন পাষাণে ন মৃন্মযে ।

ভাবে হি বিদ্যতে দেবস্তস্মাদ্ভাবো হি কারণম্ ॥ 13 ॥

শান্তিতুল্যং তপো নাস্তি ন সন্তোষাত্পরং সুখম্ ।

অপত্যং চ কলত্রং চ সতাং সঙ্গতিরেব চ ॥ 14 ॥

গুণো ভূষযতে রূপং শীলং ভূষযতে কুলম্ ।

প্রাসাদশিখরস্থোঽপি কাকঃ কিং গরুডাযতে ॥ 15 ॥

নির্গুণস্য হতং রূপং দুঃশীলস্য হতং কুলম্ ।

অসিদ্ধস্য হতা বিদ্যা হ্যভোগেন হতং ধনম্ ॥ 16 ॥

শুদ্ধং ভূমিগতং তোযং শুদ্ধা নারী পতিব্রতা ।

শুচিঃ ক্ষেমকরো রাজা সন্তোষো ব্রাহ্মণঃ শুচিঃ ॥ 17 ॥

অসন্তুষ্টা দ্বিজা নষ্টাঃ সন্তুষ্টাশ্চ মহীভৃতঃ ।

সলজ্জা গণিকা নষ্টা নির্লজ্জাশ্চ কুলাঙ্গনা ॥ 18 ॥

কিং কুলেন বিশালেন বিদ্যাহীনেন দেহিনাম্ ।

দুষ্কুলং চাপি বিদুষো দেবৈরপি স পূজ্যতে ॥ 19 ॥

বিদ্বান্প্রশস্যতে লোকে বিদ্বান্ সর্বত্র পূজ্যতে ।

বিদ্যযা লভতে সর্বং বিদ্যা সর্বত্র পূজ্যতে ॥ 20 ॥

মাংসভক্ষ্যৈঃ সুরাপানৈর্মুখৈশ্চাক্ষরবর্জিতৈঃ ।

পশুভিঃ পুরুষাকারৈর্ভারাক্রান্তা হি মেদিনী ॥ 21 ॥

অন্নহীনো দহেদ্রাষ্ট্রং মন্ত্রহীনশ্চ ঋত্বিজঃ ।

যজমানং দানহীনো নাস্তি যজ্ঞসমো রিপুঃ ॥ 22 ॥

Roman (IAST) Transliteration

adhamā dhanamicchanti dhanamānau ca madhyamāḥ |

uttamā mānamicchanti māno hi mahatāṃ dhanam || 01 ||

ikṣurāpaḥ payo mūlaṃ tāmbūlaṃ phalamauṣadham |

bhakṣayitvāpi kartavyāḥ snānadānādikāḥ kriyāḥ || 02 ||

dīpo bhakṣayate dhvāntaṃ kajjalaṃ ca prasūyate |

yadannaṃ bhakṣayate nityaṃ jāyate tādṛśī prajā || 03 ||

vittaṃ dehi guṇānviteṣu matimannānyatra dehi kvacit

prāptaṃ vārinidherjalaṃ ghanamukhe mādhuryayuktaṃ sadā |

jīvānsthāvarajaṅgamāṃśca sakalānsañjīvya bhūmaṇḍalaṃ

bhūyaḥ paśya tadeva koṭiguṇitaṃ gacchantamambhonidhim || 04 ||

cāṇḍālānāṃ sahasraiśca sūribhistattvadarśibhiḥ |

eko hi yavanaḥ prokto na nīco yavanātparaḥ || 05 ||

tailābhyaṅge citādhūme maithune kṣaurakarmaṇi |

tāvadbhavati cāṇḍālo yāvatsnānaṃ na cācaret || 06 ||

ajīrṇe bheṣajaṃ vāri jīrṇe vāri balapradam |

bhojane cāmṛtaṃ vāri bhojanānte viṣāpaham || 07 ||

hataṃ jñānaṃ kriyāhīnaṃ hataścājñānato naraḥ |

hataṃ nirṇāyakaṃ sainyaṃ striyo naṣṭā hyabhartṛkāḥ || 08 ||

vṛddhakāle mṛtā bhāryā bandhuhastagataṃ dhanam |

bhojanaṃ ca parādhīnaṃ tisraḥ puṃsāṃ viḍambanāḥ || 09 ||

nāgnihotraṃ vinā vedā na ca dānaṃ vinā kriyā |

na bhāvena vinā siddhistasmādbhāvo hi kāraṇam || 10 ||

na devo vidyate kāṣṭhe na pāṣāṇe na mṛṇmaye |

na bhāvena vinā siddhistasmādbhāvo hi kāraṇam || 11 ||

kāṣṭhapāṣāṇadhātūnāṃ kṛtvā bhāvena sevanam |

śraddhayā ca tathā siddhistasya viṣṇuprasādataḥ || 12 ||

na devo vidyate kāṣṭhe na pāṣāṇe na mṛnmaye |

bhāve hi vidyate devastasmādbhāvo hi kāraṇam || 13 ||

śāntitulyaṃ tapo nāsti na santoṣātparaṃ sukham |

apatyaṃ ca kalatraṃ ca satāṃ saṅgatireva ca || 14 ||

guṇo bhūṣayate rūpaṃ śīlaṃ bhūṣayate kulam |

prāsādaśikharastho'pi kākaḥ kiṃ garuḍāyate || 15 ||

nirguṇasya hataṃ rūpaṃ duḥśīlasya hataṃ kulam |

asiddhasya hatā vidyā hyabhogena hataṃ dhanam || 16 ||

śuddhaṃ bhūmigataṃ toyaṃ śuddhā nārī pativratā |

śuciḥ kṣemakaro rājā santoṣo brāhmaṇaḥ śuciḥ || 17 ||

asantuṣṭā dvijā naṣṭāḥ santuṣṭāśca mahībhṛtaḥ |

salajjā gaṇikā naṣṭā nirlajjāśca kulāṅganā || 18 ||

kiṃ kulena viśālena vidyāhīnena dehinām |

duṣkulaṃ cāpi viduṣo devairapi sa pūjyate || 19 ||

vidvānpraśasyate loke vidvān sarvatra pūjyate |

vidyayā labhate sarvaṃ vidyā sarvatra pūjyate || 20 ||

māṃsabhakṣyaiḥ surāpānairmukhaiścākṣaravarjitaiḥ |

paśubhiḥ puruṣākārairbhārākrāntā hi medinī || 21 ||

annahīno dahedrāṣṭraṃ mantrahīnaśca ṛtvijaḥ |

yajamānaṃ dānahīno nāsti yajñasamo ripuḥ || 22 ||