Chanakya Niti - Prathamo'dhyayah

ॐ

চাণক্য নীতি - প্রথমোঽধ্যাযঃ

Chanakya Bengali

প্রণম্য শিরসা বিষ্ণুং ত্রৈলোক্যাধিপতিং প্রভুম্ ।

নানাশাস্ত্রোদ্ধৃতং বক্ষ্যে রাজনীতিসমুচ্চযম্ ॥ 01 ॥

অধীত্যেদং যথাশাস্ত্রং নরো জানাতি সত্তমঃ ।

ধর্মোপদেশবিখ্যাতং কার্যাকার্যং শুভাশুভম্ ॥ 02 ॥

তদহং সম্প্রবক্ষ্যামি লোকানাং হিতকাম্যযা ।

যেন বিজ্ঞাতমাত্রেণ সর্বজ্ঞাত্বং প্রপদ্যতে ॥ 03 ॥

মূর্খশিষ্যোপদেশেন দুষ্টস্ত্রীভরণেন চ ।

দুঃখিতৈঃ সম্প্রযোগেণ পণ্ডিতোঽপ্যবসীদতি ॥ 04 ॥

দুষ্টা ভার্যা শঠং মিত্রং ভৃত্যশ্চোত্তরদাযকঃ ।

সসর্পে চ গৃহে বাসো মৃত্যুরেব ন সংশযঃ ॥ 05 ॥

আপদর্থে ধনং রক্ষেদ্দারান্ রক্ষেদ্ধনৈরপি ।

আত্মানং সততং রক্ষেদ্দারৈরপি ধনৈরপি ॥ 06 ॥

আপদর্থে ধনং রক্ষেচ্ছ্রীমতাং কুত আপদঃ ।

কদাচিচ্চলতে লক্ষ্মীঃ সঞ্চিতোঽপি বিনশ্যতি ॥ 07 ॥

যস্মিন্দেশে ন সম্মানো ন বৃত্তির্ন চ বান্ধবাঃ ।

ন চ বিদ্যাগমোঽপ্যস্তি বাসং তত্র ন কারযেত্ ॥ 08 ॥

ধনিকঃ শ্রোত্রিযো রাজা নদী বৈদ্যস্তু পঞ্চমঃ ।

পঞ্চ যত্র ন বিদ্যন্তে ন তত্র দিবসং বসেত্ ॥ 09 ॥

লোকযাত্রা ভযং লজ্জা দাক্ষিণ্যং ত্যাগশীলতা ।

পঞ্চ যত্র ন বিদ্যন্তে ন কুর্যাত্তত্র সংস্থিতিম্ ॥ 10 ॥

জানীযাত্প্রেষণে ভৃত্যান্বান্ধবান্ ব্যসনাগমে ।

মিত্রং চাপত্তিকালেষু ভার্যাং চ বিভবক্ষযে ॥ 11 ॥

আতুরে ব্যসনে প্রাপ্তে দুর্ভিক্ষে শত্রুসঙ্কটে ।

রাজদ্বারে শ্মশানে চ যস্তিষ্ঠতি স বান্ধবঃ ॥ 12 ॥

যো ধ্রুবাণি পরিত্যজ্য অধ্রুবং পরিষেবতে ।

ধ্রুবাণি তস্য নশ্যন্তি চাধ্রুবং নষ্টমেব হি ॥ 13 ॥

বরযেত্কুলজাং প্রাজ্ঞো বিরূপামপি কন্যকাম্ ।

রূপশীলাং ন নীচস্য বিবাহঃ সদৃশে কুলে ॥ 14 ॥

নদীনাং শস্ত্রপাণীনান্নখীনাং শ‍ঋঙ্গিণাং তথা ।

বিশ্বাসো নৈব কর্তব্যঃ স্ত্রীষু রাজকুলেষু চ ॥ 15 ॥

বিষাদপ্যমৃতং গ্রাহ্যমমেধ্যাদপি কাঞ্চনম্ ।

অমিত্রাদপি সদ্বৃত্তং বালাদপি সুভাষিতম্ ॥ 16 ॥

স্ত্রীণাং দ্বিগুণ আহারো লজ্জা চাপি চতুর্গুণা ।

সাহসং ষড্গুণং চৈব কামশ্চাষ্টগুণঃ স্মৃতঃ ॥ 17 ॥

Roman (IAST) Transliteration

praṇamya śirasā viṣṇuṃ trailokyādhipatiṃ prabhum |

nānāśāstroddhṛtaṃ vakṣye rājanītisamuccayam || 01 ||

adhītyedaṃ yathāśāstraṃ naro jānāti sattamaḥ |

dharmopadeśavikhyātaṃ kāryākāryaṃ śubhāśubham || 02 ||

tadahaṃ sampravakṣyāmi lokānāṃ hitakāmyayā |

yena vijñātamātreṇa sarvajñātvaṃ prapadyate || 03 ||

mūrkhaśiṣyopadeśena duṣṭastrībharaṇena ca |

duḥkhitaiḥ samprayogeṇa paṇḍito'pyavasīdati || 04 ||

duṣṭā bhāryā śaṭhaṃ mitraṃ bhṛtyaścottaradāyakaḥ |

sasarpe ca gṛhe vāso mṛtyureva na saṃśayaḥ || 05 ||

āpadarthe dhanaṃ rakṣeddārān rakṣeddhanairapi |

ātmānaṃ satataṃ rakṣeddārairapi dhanairapi || 06 ||

āpadarthe dhanaṃ rakṣecchrīmatāṃ kuta āpadaḥ |

kadāciccalate lakṣmīḥ sañcito'pi vinaśyati || 07 ||

yasmindeśe na sammāno na vṛttirna ca bāndhavāḥ |

na ca vidyāgamo'pyasti vāsaṃ tatra na kārayet || 08 ||

dhanikaḥ śrotriyo rājā nadī vaidyastu pañcamaḥ |

pañca yatra na vidyante na tatra divasaṃ vaset || 09 ||

lokayātrā bhayaṃ lajjā dākṣiṇyaṃ tyāgaśīlatā |

pañca yatra na vidyante na kuryāttatra saṃsthitim || 10 ||

jānīyātpreṣaṇe bhṛtyānbāndhavān vyasanāgame |

mitraṃ cāpattikāleṣu bhāryāṃ ca vibhavakṣaye || 11 ||

āture vyasane prāpte durbhikṣe śatrusaṅkaṭe |

rājadvāre śmaśāne ca yastiṣṭhati sa bāndhavaḥ || 12 ||

yo dhruvāṇi parityajya adhruvaṃ pariṣevate |

dhruvāṇi tasya naśyanti cādhruvaṃ naṣṭameva hi || 13 ||

varayetkulajāṃ prājño virūpāmapi kanyakām |

rūpaśīlāṃ na nīcasya vivāhaḥ sadṛśe kule || 14 ||

nadīnāṃ śastrapāṇīnānnakhīnāṃ śa‍ṛṅgiṇāṃ tathā |

viśvāso naiva kartavyaḥ strīṣu rājakuleṣu ca || 15 ||

viṣādapyamṛtaṃ grāhyamamedhyādapi kāñcanam |

amitrādapi sadvṛttaṃ bālādapi subhāṣitam || 16 ||

strīṇāṃ dviguṇa āhāro lajjā cāpi caturguṇā |

sāhasaṃ ṣaḍguṇaṃ caiva kāmaścāṣṭaguṇaḥ smṛtaḥ || 17 ||