Bhartrihareh Shataka Trishati - Niti Shatakam

ॐ

ভর্তৃহরেঃ শতক ত্রিশতি - নীতি শতকম্

Shatakam Bhartrihari Bengali

দিক্কালাদ্যনবচ্ছিন্নানন্তচিন্মাত্রমূর্তযে ।

স্বানুভূত্যেকমানায নমঃ শান্তায তেজসে ॥ 1.1 ॥

বোদ্ধারো মত্সরগ্রস্তাঃ প্রভবঃ স্মযদূষিতাঃ ।

অবোধোপহতাঃ চান্যে জীর্ণমঙ্গে সুভাষিতম্ ॥ 1.2 ॥

অজ্ঞঃ সুখং আরাধ্যঃ

সুখতরং আরাধ্যতে বিশেষজ্ঞঃ ।

জ্ঞানলবদুর্বিদগ্ধং

ব্রহ্মাপি তং নরং ন রঞ্জযতি ॥ 1.3 ॥

প্রসহ্য মণিং উদ্ধরেন্মকরবক্ত্রদংষ্ট্রান্তরাত্

সমুদ্রং অপি সন্তরেত্প্রচলদূর্মিমালাকুলম্ ।

ভুজঙ্গং অপি কোপিতং শিরসি পুষ্পবদ্ধারযেত্

ন তু প্রতিনিবিষ্টমূর্খজনচিত্তং আরাধযেত্ ॥ 1.4 ॥

লভেত সিকতাসু তৈলং অপি যত্নতঃ পীডযন্

পিবেচ্চ মৃগতৃষ্ণিকাসু সলিলং পিপাসার্দিতঃ ।

ক্বচিদপি পর্যটন্শশবিষাণং আসাদযেত্

ন তু প্রতিনিবিষ্টমূর্খচিত্তং আরাধযেত্ ॥ 1.5 ॥

ব্যালং বালমৃণালতন্তুভিরসৌ রোদ্ধুং সমুজ্জৃম্ভতে

ছেত্তুং বজ্রমণিং শিরীষকুসুমপ্রান্তেন সন্নহ্যতি ।

মাধুর্যং মধুবিন্দুনা রচযিতুং ক্ষারামুধেরীহতে

নেতুং বাঞ্ছন্তি যঃ খলান্পথি সতাং সূক্তৈঃ সুধাস্যন্দিভিঃ ॥ 1.6 ॥

স্বাযত্তং একান্তগুণং বিধাত্রা

বিনির্মিতং ছাদনং অজ্ঞতাযাঃ ।

বিশেষতঃ সর্ববিদাং সমাজে

বিভূষণং মৌনং অপণ্ডিতানাম্ ॥ 1.7 ॥

যদা কিঞ্চিজ্জ্ঞোঽহং দ্বিপ ইব মদান্ধঃ সমভবং

তদা সর্বজ্ঞোঽস্মীত্যভবদবলিপ্তং মম মনঃ

যদা কিঞ্চিত্কিঞ্চিদ্বুধজনসকাশাদবগতং

তদা মূর্খোঽস্মীতি জ্বর ইব মদো মে ব্যপগতঃ ॥ 1.8 ॥

কৃমিকুলচিত্তং লালাক্লিন্নং বিগন্ধিজুগুপ্সিতং

নিরুপমরসং প্রীত্যা খাদন্নরাস্থি নিরামিষম্ ।

সুরপতিং অপি শ্বা পার্শ্বস্থং বিলোক্য ন শঙ্কতে

ন হি গণযতি ক্ষুদ্রো জন্তুঃ পরিগ্রহফল্গুতাম্ ॥ 1.9 ॥

শিরঃ শার্বং স্বর্গাত্পশুপতিশিরস্তঃ ক্ষিতিধরং

মহীধ্রাদুত্তুঙ্গাদবনিং অবনেশ্চাপি জলধিম্ ।

অধোঽধো গঙ্গেযং পদং উপগতা স্তোকম্

অথবাবিবেকভ্রষ্টানাং ভবতি বিনিপাতঃ শতমুখঃ ॥ 1.10 ॥

শক্যো বারযিতুং জলেন হুতভুক্চ্ছত্রেণ সূর্যাতপো

নাগেন্দ্রো নিশিতাঙ্কুশেন সমদো দণ্ডেন গোগর্দভৌ ।

ব্যাধির্ভেষজসঙ্গ্রহৈশ্চ বিবিধৈর্মন্ত্রপ্রযোগৈর্বিষং

সর্বস্যৌষধং অস্তি শাস্ত্রবিহিতং মূর্খস্য নাস্ত্যৌষধিম্ ॥ 1.11 ॥

সাহিত্যসঙ্গীতকলাবিহীনঃ

সাক্ষাত্পশুঃ পুচ্ছবিষাণহীনঃ ।

তৃণং ন খাদন্নপি জীবমানস্

তদ্ভাগধেযং পরমং পশূনাম্ ॥ 1.12 ॥

যেষাং ন বিদ্যা ন তপো ন দানং

জ্ঞানং ন শীলং ন গুণো ন ধর্মঃ ।

তে মর্ত্যলোকে ভুবি ভারভূতা

মনুষ্যরূপেণ মৃগাশ্চরন্তি ॥ 1.13 ॥

বরং পর্বতদুর্গেষু

ভ্রান্তং বনচরৈঃ সহ

ন মূর্খজনসম্পর্কঃ

সুরেন্দ্রভবনেষ্বপি ॥ 1.14 ॥

শাস্ত্রোপস্কৃতশব্দসুন্দরগিরঃ শিষ্যপ্রদেযাগমা

বিখ্যাতাঃ কবযো বসন্তি বিষযে যস্য প্রভোর্নির্ধনাঃ ।

তজ্জাড্যং বসুধাদিপস্য কবযস্ত্বর্থং বিনাপীশ্বরাঃ

কুত্স্যাঃ স্যুঃ কুপরীক্ষকা হি মণযো যৈরর্ঘতঃ পাতিতাঃ ॥ 1.15 ॥

হর্তুর্যাতি ন গোচরং কিং অপি শং পুষ্ণাতি যত্সর্বদাঽপ্য্

অর্থিভ্যঃ প্রতিপাদ্যমানং অনিশং প্রাপ্নোতি বৃদ্ধিং পরাম্ ।

কল্পান্তেষ্বপি ন প্রযাতি নিধনং বিদ্যাখ্যং অন্তর্ধনং

যেষাং তান্প্রতি মানং উজ্ঝত নৃপাঃ কস্তৈঃ সহ স্পর্ধতে ॥ 1.16 ॥

অধিগতপরমার্থান্পণ্ডিতান্মাবমংস্থাস্

তৃণং ইব লঘু লক্ষ্মীর্নৈব তান্সংরুণদ্ধি ।

অভিনবমদলেখাশ্যামগণ্ডস্থলানাং

ন ভবতি বিসতন্তুর্বারণং বারণানাম্ ॥ 1.17 ॥

অম্ভোজিনীবনবিহারবিলাসং এব

হংসস্য হন্তি নিতরাং কুপিতো বিধাতা ।

ন ত্বস্য দুগ্ধজলভেদবিধৌ প্রসিদ্ধাং

বৈদগ্ধীকীর্তিং অপহর্তুং অসৌ সমর্থঃ ॥ 1.18 ॥

কেযূরাণি ন ভূষযন্তি পুরুষং হারা ন চন্দ্রোজ্জ্বলা

ন স্নানং ন বিলেপনং ন কুসুমং নালঙ্কৃতা মূর্ধজাঃ ।

বাণ্যেকা সমলঙ্করোতি পুরুষং যা সংস্কৃতা ধার্যতে

ক্ষীযন্তে খলু ভূষণানি সততং বাগ্ভূষণং ভূষণম্ ॥ 1.19 ॥

বিদ্যা নাম নরস্য রূপং অধিকং প্রচ্ছন্নগুপ্তং ধনং

বিদ্যা ভোগকরী যশঃসুখকরী বিদ্যা গুরূণাং গুরুঃ ।

বিদ্যা বন্ধুজনো বিদেশগমনে বিদ্যা পরা দেবতা

বিদ্যা রাজসু পূজ্যতে ন তু ধনং বিদ্যাবিহীনঃ পশুঃ ॥ 1.20 ॥

ক্ষান্তিশ্চেত্কবচেন কিং কিং অরিভিঃ ক্রোধোঽস্তি চেদ্দেহিনাং

জ্ঞাতিশ্চেদনলেন কিং যদি সুহৃদ্দিব্যৌষধং কিং ফলম্ ।

কিং সর্পৈর্যদি দুর্জনাঃ কিং উ ধনৈর্বিদ্যাঽনবদ্যা যদি

ব্রীডা চেত্কিং উ ভূষণৈঃ সুকবিতা যদ্যস্তি রাজ্যেন কিম্ ॥ 1.21 ॥

দাক্ষিণ্যং স্বজনে দযা পরিজনে শাঠ্যং সদা দুর্জনে

প্রীতিঃ সাধুজনে নযো নৃপজনে বিদ্বজ্জনে চার্জবম্ ।

শৌর্যং শত্রুজনে ক্ষমা গুরুজনে কান্তাজনে ধৃষ্টতা

যে চৈবং পুরুষাঃ কলাসু কুশলাস্তেষ্বেব লোকস্থিতিঃ ॥ 1.22 ॥

জাড্যং ধিযো হরতি সিঞ্চতি বাচি সত্যং

মানোন্নতিং দিশতি পাপং অপাকরোতি ।

চেতঃ প্রসাদযতি দিক্ষু তনোতি কীর্তিং

সত্সঙ্গতিঃ কথয কিং ন করোতি পুংসাম্ ॥ 1.23 ॥

জযন্তি তে সুকৃতিনো

রসসিদ্ধাঃ কবীশ্বরাঃ ।

নাস্তি যেষাং যশঃকাযে

জরামরণজং ভযম্ ॥ 1.24 ॥

সূনুঃ সচ্চরিতঃ সতী প্রিযতমা স্বামী প্রসাদোন্মুখঃ

স্নিগ্ধং মিত্রং অবঞ্চকঃ পরিজনো নিঃক্লেশলেশং মনঃ ।

আকারো রুচিরঃ স্থিরশ্চ বিভবো বিদ্যাবদাতং মুখং

তুষ্টে বিষ্টপকষ্টহারিণি হরৌ সম্প্রাপ্যতে দেহিনা ॥ 1.25 ॥

প্রাণাঘাতান্নিবৃত্তিঃ পরধনহরণে সংযমঃ সত্যবাক্যং

কালে শক্ত্যা প্রদানং যুবতিজনকথামূকভাবঃ পরেষাম্ ।

তৃষ্ণাস্রোতো বিভঙ্গো গুরুষু চ বিনযঃ সর্বভূতানুকম্পা

সামান্যঃ সর্বশাস্ত্রেষ্বনুপহতবিধিঃ শ্রেযসাং এষ পন্থাঃ ॥ 1.26 ॥

প্রারভ্যতে ন খলু বিঘ্নভযেন নীচৈঃ

প্রারভ্য বিঘ্নবিহতা বিরমন্তি মধ্যাঃ ।

বিঘ্নৈঃ পুনঃ পুনরপি প্রতিহন্যমানাঃ

প্রারব্ধং উত্তমজনা ন পরিত্যজন্তি ॥ 1.27 ॥

অসন্তো নাভ্যর্থ্যাঃ সুহৃদপি ন যাচ্যঃ কৃশধনঃ

প্রিযা ন্যায্যা বৃত্তির্মলিনং অসুভঙ্গেঽপ্যসুকরম্ ।

বিপদ্যুচ্চৈঃ স্থেযং পদং অনুবিধেযং চ মহতাং

সতাং কেনোদ্দিষ্টং বিষমং অসিধারাব্রতং ইদম্ ॥ 1.28 ॥

ক্ষুত্ক্ষামোঽপি জরাকৃশোঽপি শিথিলপ্রাণোঽপি কষ্টাং দশাম্

আপন্নোঽপি বিপন্নদীধিতিরিতি প্রাণেষু নশ্যত্স্বপি ।

মত্তেভেন্দ্রবিভিন্নকুম্ভপিশিতগ্রাসৈকবদ্ধস্পৃহঃ

কিং জীর্ণং তৃণং অত্তি মানমহতাং অগ্রেসরঃ কেসরী ॥ 1.29 ॥

স্বল্পস্নাযুবসাবশেষমলিনং নির্মাংসং অপ্যস্থি গোঃ

শ্বা লব্ধ্বা পরিতোষং এতি ন তু তত্তস্য ক্ষুধাশান্তযে ।

সিংহো জম্বুকং অঙ্কং আগতং অপি ত্যক্ত্বা নিহন্তি দ্বিপং

সর্বঃ কৃচ্ছ্রগতোঽপি বাঞ্ছন্তি জনঃ সত্ত্বানুরূপং ফলম্ ॥ 1.30 ॥

লাঙ্গূলচালনং অধশ্চরণাবপাতং

ভূমৌ নিপত্য বদনোদরদর্শনং চ ।

শ্বা পিণ্ডদস্য কুরুতে গজপুঙ্গবস্তু

ধীরং বিলোকযতি চাটুশতৈশ্চ ভুঙ্ক্তে ॥ 1.31 ॥

পরিবর্তিনি সংসারে

মৃতঃ কো বা ন জাযতে ।

স জাতো যেন জাতেন

যাতি বংশঃ সমুন্নতিম্ ॥ 1.32 ॥

কুসুমস্তবকস্যেব

দ্বযী বৃত্তির্মনস্বিনঃ ।

মূর্ধ্নি বা সর্বলোকস্য

শীর্যতে বন এব বা ॥ 1.33 ॥

সন্ত্যন্যেঽপি বৃহস্পতিপ্রভৃতযঃ সম্ভাবিতাঃ পঞ্চষাস্

তান্প্রত্যেষ বিশেষবিক্রমরুচী রাহুর্ন বৈরাযতে ।

দ্বাবেব গ্রসতে দিবাকরনিশাপ্রাণেশ্বরৌ ভাস্করৌ

ভ্রাতঃ পর্বণি পশ্য দানবপতিঃ শীর্ষাবশেষাকৃতিঃ ॥ 1.34 ॥

বহতি ভুবনশ্রেণিং শেষঃ ফণাফলকস্থিতাং

কমঠপতিনা মধ্যেপৃষ্ঠং সদা স চ ধার্যতে ।

তং অপি কুরুতে ক্রোডাধীনং পযোধিরনাদরাদ্

অহহ মহতাং নিঃসীমানশ্চরিত্রবিভূতযঃ ॥ 1.35 ॥

বরং পক্ষচ্ছেদঃ সমদমঘবন্মুক্তকুলিশপ্রহারৈর্

উদ্গচ্ছদ্বহুলদহনোদ্গারগুরুভিঃ ।

তুষারাদ্রেঃ সূনোরহহ পিতরি ক্লেশবিবশে

ন চাসৌ সম্পাতঃ পযসি পযসাং পত্যুরুচিতঃ ॥ 1.36 ॥

সিংহঃ শিশুরপি নিপততি

মদমলিনকপোলভিত্তিষু গজেষু ।

প্রকৃতিরিযং সত্ত্ববতাং

ন খলু বযস্তেজসো হেতুঃ ॥ 1.37 ॥

জাতির্যাতু রসাতলং গুণগণৈস্তত্রাপ্যধো গম্যতাং

শীলং শৈলতটাত্পতত্বভিজনঃ সন্দহ্যতাং বহ্নিনা ।

শৌর্যে বৈরিণি বজ্রং আশু নিপতত্বর্থোঽস্তু নঃ কেবলং

যেনৈকেন বিনা গুণস্তৃণলবপ্রাযাঃ সমস্তা ইমে ॥ 1.38 ॥

ধনং অর্জয কাকুত্স্থ

ধনমূলং ইদং জগত্ ।

অন্তরং নাভিজানামি

নির্ধনস্য মৃতস্য চ ॥ 1.39 ॥

তানীন্দ্রিযাণ্যবিকলানি তদেব নাম

সা বুদ্ধিরপ্রতিহতা বচনং তদেব ।

অর্থোষ্মণা বিরহিতঃ পুরুষঃ ক্ষণেন

সোঽপ্যন্য এব ভবতীতি বিচিত্রং এতত্ ॥ 1.40 ॥

যস্যাস্তি বিত্তং স নরঃ কুলীনঃ

স পণ্ডিতঃ স শ্রুতবান্গুণজ্ঞঃ ।

স এব বক্তা স চ দর্শনীযঃ

সর্বে গুণাঃ কাঞ্চনং আশ্রযন্তি ॥ 1.41 ॥

দৌর্মন্ত্র্যান্নৃপতির্বিনশ্যতি যতিঃ সঙ্গাত্সুতো লালনাত্

বিপ্রোঽনধ্যযনাত্কুলং কুতনযাচ্ছীলং খলোপাসনাত্ ।

হ্রীর্মদ্যাদনবেক্ষণাদপি কৃষিঃ স্নেহঃ প্রবাসাশ্রযান্

মৈত্রী চাপ্রণযাত্সমৃদ্ধিরনযাত্ত্যাগপ্রমাদাদ্ধনম্ ॥ 1.42 ॥

দানং ভোগো নাশস্তিস্রো

গতযো ভবন্তি বিত্তস্য ।

যো ন দদাতি ন ভুঙ্ক্তে

তস্য তৃতীযা গতির্ভবতি ॥ 1.43 ॥

মণিঃ শাণোল্লীঢঃ সমরবিজযী হেতিদলিতো

মদক্ষীণো নাগঃ শরদি সরিতঃ শ্যানপুলিনাঃ ।

কলাশেষশ্চন্দ্রঃ সুরতমৃদিতা বালবনিতা

তন্নিম্না শোভন্তে গলিতবিভবাশ্চার্থিষু নরাঃ ॥ 1.44 ॥

পরিক্ষীণঃ কশ্চিত্স্পৃহযতি যবানাং প্রসৃতযে

স পশ্চাত্সম্পূর্ণঃ কলযতি ধরিত্রীং তৃণসমাম্ ।

অতশ্চানৈকান্ত্যাদ্গুরুলঘুতযাঽর্থেষু ধনিনাম্

অবস্থা বস্তূনি প্রথযতি চ সঙ্কোচযতি চ ॥ 1.45 ॥

রাজন্দুধুক্ষসি যদি ক্ষিতিধেনুং এতাং

তেনাদ্য বত্সং ইব লোকং অমুং পুষাণ

তস্মিংশ্চ সম্যগনিশং পরিপোষ্যমাণে

নানাফলৈঃ ফলতি কল্পলতেব ভূমিঃ ॥ 1.46 ॥

সত্যানৃতা চ পরুষা প্রিযবাদিনী চ

হিংস্রা দযালুরপি চার্থপরা বদান্যা ।

নিত্যব্যযা প্রচুরনিত্যধনাগমা চ

বারাঙ্গনেব নৃপনীতিরনেকরূপা ॥ 1.47 ॥

আজ্ঞা কীর্তিঃ পালনং ব্রাহ্মণানাং

দানং ভোগো মিত্রসংরক্ষণং চ

যেষাং এতে ষড্গুণা ন প্রবৃত্তাঃ

কোঽর্থস্তেষাং পার্থিবোপাশ্রযেণ ॥ 1.48 ॥

যদ্ধাত্রা নিজভালপট্টলিখিতং স্তোকং মহদ্বা ধনং

তত্প্রাপ্নোতি মরুস্থলেঽপি নিতরাং মেরৌ ততো নাধিকম্ ।

তদ্ধীরো ভব বিত্তবত্সু কৃপণাং বৃত্তিং বৃথা সা কৃথাঃ

কূপে পশ্য পযোনিধাবপি ঘটো গৃহ্ণাতি তুল্যং জলম্ ॥ 1.49 ॥

ত্বং এব চাতকাধারোঽ

সীতি কেষাং ন গোচরঃ ।

কিং অম্ভোদবরাস্মাকং

কার্পণ্যোক্তং প্রতীক্ষসে ॥ 1.50 ॥

রে রে চাতক সাবধানমনসা মিত্র ক্ষণং শ্রূযতাম্

অম্ভোদা বহবো বসন্তি গগনে সর্বেঽপি নৈতাদৃশাঃ ।

কেচিদ্বৃষ্টিভিরার্দ্রযন্তি বসুধাং গর্জন্তি কেচিদ্বৃথা

যং যং পশ্যসি তস্য তস্য পুরতো মা ব্রূহি দীনং বচঃ ॥ 1.51 ॥

অকরুণত্বং অকারণবিগ্রহঃ

পরধনে পরযোষিতি চ স্পৃহা ।

সুজনবন্ধুজনেষ্বসহিষ্ণুতা

প্রকৃতিসিদ্ধং ইদং হি দুরাত্মনাম্ ॥ 1.52 ॥

দুর্জনঃ পরিহর্তব্যো

বিদ্যযাঽলকৃতোঽপি সন্ ।

মণিনা ভূষিতঃ সর্পঃ

কিং অসৌ ন ভযঙ্করঃ ॥ 1.53 ॥

জাড্যং হ্রীমতি গণ্যতে ব্রতরুচৌ দম্ভঃ শুচৌ কৈতবং

শূরে নির্ঘৃণতা মুনৌ বিমতিতা দৈন্যং প্রিযালাপিনি ।

তেজস্বিন্যবলিপ্ততা মুখরতা বক্তর্যশক্তিঃ স্থিরে

তত্কো নাম গুণো ভবেত্স গুণিনাং যো দুর্জনৈর্নাঙ্কিতঃ ॥ 1.54 ॥

লোভশ্চেদগুণেন কিং পিশুনতা যদ্যস্তি কিং পাতকৈঃ

সত্যং চেত্তপসা চ কিং শুচি মনো যদ্যস্তি তীর্থেন কিম্ ।

সৌজন্যং যদি কিং গুণৈঃ সুমহিমা যদ্যস্তি কিং মণ্ডনৈঃ

সদ্বিদ্যা যদি কিং ধনৈরপযশো যদ্যস্তি কিং মৃত্যুনা ॥ 1.55 ॥

শশী দিবসধূসরো গলিতযৌবনা কামিনী

সরো বিগতবারিজং মুখং অনক্ষরং স্বাকৃতেঃ ।

প্রভুর্ধনপরাযণঃ সততদুর্গতঃ সজ্জনো

নৃপাঙ্গণগতঃ খলো মনসি সপ্ত শল্যানি মে ॥ 1.56 ॥

ন কশ্চিচ্চণ্ডকোপানাম্

আত্মীযো নাম ভূভুজাম্ ।

হোতারং অপি জুহ্বানং

স্পৃষ্টো বহতি পাবকঃ ॥ 1.57 ॥

মৌনোমূকঃ প্রবচনপটুর্বাটুলো জল্পকো বা

ধৃষ্টঃ পার্শ্বে বসতি চ সদা দূরতশ্চাপ্রগল্ভঃ ।

ক্ষান্ত্যা ভীরুর্যদি ন সহতে প্রাযশো নাভিজাতঃ

সেবাধর্মঃ পরমগহনো যোগিনাং অপ্যগম্যঃ ॥ 1.58 ॥

উদ্ভাসিতাখিলখলস্য বিশৃঙ্খলস্য

প্রাগ্জাতবিস্তৃতনিজাধমকর্মবৃত্তেঃ ।

দৈবাদবাপ্তবিভবস্য গুণদ্বিষোঽস্য

নীচস্য গোচরগতৈঃ সুখং আপ্যতে ॥ 1.59 ॥

আরম্ভগুর্বী ক্ষযিণী ক্রমেণ

লঘ্বী পুরা বৃদ্ধিমতী চ পশ্চাত্ ।

দিনস্য পূর্বার্ধপরার্ধভিন্না

ছাযেব মৈত্রী খলসজ্জনানাম্ ॥ 1.60 ॥

মৃগমীনসজ্জনানাং তৃণজলসন্তোষবিহিতবৃত্তীনাম্ ।

লুব্ধকধীবরপিশুনা নিষ্কারণবৈরিণো জগতি ॥ 1.61 ॥

বাঞ্ছা সজ্জনসঙ্গমে পরগুণে প্রীতির্গুরৌ নম্রতা

বিদ্যাযাং ব্যসনং স্বযোষিতি রতির্লোকাপবাদাদ্ভযম্ ।

ভক্তিঃ শূলিনি শক্তিরাত্মদমনে সংসর্গমুক্তিঃ খলে

যেষ্বেতে নিবসন্তি নির্মলগুণাস্তেভ্যো নরেভ্যো নমঃ ॥ 1.62 ॥

বিপদি ধৈর্যং অথাভ্যুদযে ক্ষমা

সদসি বাক্পটুতা যুধি বিক্রমঃ ।

যশসি চাভিরুচির্ব্যসনং শ্রুতৌ

প্রকৃতিসিদ্ধং ইদং হি মহাত্মনাম্ ॥ 1.63 ॥

প্রদানং প্রচ্ছন্নং গৃহং উপগতে সম্ভ্রমবিধিঃ

প্রিযং কৃত্বা মৌনং সদসি কথনং চাপ্যুপকৃতেঃ ।

অনুত্সেকো লক্ষ্ম্যাং অনভিভবগন্ধাঃ পরকথাঃ

সতাং কেনোদ্দিষ্টং বিষমং অসিধারাব্রতং ইদম্ ॥ 1.64 ॥

করে শ্লাঘ্যস্ত্যাগঃ শিরসি গুরুপাদপ্রণযিতা

মুখে সত্যা বাণী বিজযি ভুজযোর্বীর্যং অতুলম্ ।

হৃদি স্বচ্ছা বৃত্তিঃ শ্রুতিং অধিগতং চ শ্রবণযোর্

বিনাপ্যৈশ্বর্যেণ প্রকৃতিমহতাং মণ্ডনং ইদম্ ॥ 1.65 ॥

সম্পত্সু মহতাং চিত্তং ভবত্যুত্পলকোমলম্ ।

আপত্সু চ মহাশৈলশিলা সঙ্ঘাতকর্কশম্ ॥ 1.66 ॥

সন্তপ্তাযসি সংস্থিতস্য পযসো নামাপি ন জ্ঞাযতে

মুক্তাকারতযা তদেব নলিনীপত্রস্থিতং রাজতে ।

স্বাত্যাং সাগরশুক্তিমধ্যপতিতং তন্মৌক্তিকং জাযতে

প্রাযেণাধমমধ্যমোত্তমগুণঃ সংসর্গতো জাযতে ॥ 1.67 ॥

প্রীণাতি যঃ সুচরিতৈঃ পিতরং স পুত্রো

যদ্ভর্তুরেব হিতং ইচ্ছতি তত্কলত্রম্ ।

তন্মিত্রং আপদি সুখে চ সমক্রিযং যদ্

এতত্ত্রযং জগতি পুণ্যকৃতো লভন্তে ॥ 1.68 ॥

একো দেবঃ কেশবো বা শিবো বা

হ্যেকং মিত্রং ভূপতির্বা যতির্বা ।

একো বাসঃ পত্তনে বা বনে বা

হ্যেকা ভার্যা সুন্দরী বা দরী বা ॥ 1.69 ॥

নম্রত্বেনোন্নমন্তঃ পরগুণকথনৈঃ স্বান্গুণান্খ্যাপযন্তঃ

স্বার্থান্সম্পাদযন্তো বিততপৃথুতরারম্ভযত্নাঃ পরার্থে ।

ক্ষান্ত্যৈবাক্ষেপরুক্ষাক্ষরমুখরমুখান্দুর্জনান্দূষযন্তঃ

সন্তঃ সাশ্চর্যচর্যা জগতি বহুমতাঃ কস্য নাভ্যর্চনীযাঃ ॥ 1.70 ॥

ভবন্তি নম্রাস্তরবঃ ফলোদ্গমৈর্

নবাম্বুভির্দূরাবলম্বিনো ঘনাঃ ।

অনুদ্ধতাঃ সত্পুরুষাঃ সমৃদ্ধিভিঃ

স্বভাব এষ পরোপকারিণাম্ ॥ 1.71 ॥

শ্রোত্রং শ্রুতেনৈব ন কুণ্ডলেন

দানেন পাণির্ন তু কঙ্কণেন ।

বিভাতি কাযঃ করুণপরাণাং

পরোপকারৈর্ন তু চন্দনেন ॥ 1.72 ॥

পাপান্নিবারযতি যোজযতে হিতায

গুহ্যং নিগূহতি গুণান্প্রকটীকরোতি ।

আপদ্গতং চ ন জহাতি দদাতি কালে

সন্মিত্রলক্ষণং ইদং প্রবদন্তি সন্তঃ ॥ 1.73 ॥

পদ্মাকরং দিনকরো বিকচীকরোতি

চন্দ্রপ্রভোল্লাসযতি কৈরবচক্রবালম্ ।

নাভ্যর্থিতো জলধরোঽপি জলং দদাতি

সন্তঃ স্বযং পরহিতে বিহিতাভিযোগাঃ ॥ 1.74 ॥

একে সত্পুরুষাঃ পরার্থঘটকাঃ স্বার্থং পরিত্যজন্তি যে

সামান্যাস্তু পরার্থং উদ্যমভৃতঃ স্বার্থাবিরোধেন যে ।

তেঽমী মানুষরাক্ষসাঃ পরহিতং স্বার্থায নিঘ্নন্তি যে

যে তু ঘ্নন্তি নিরর্থকং পরহিতং তে কে ন জানীমহে ॥ 1.75 ॥

ক্ষীরেণাত্মগতোদকায হি গুণা দত্তা পুরা তেঽখিলা

ক্ষীরোত্তাপং অবেক্ষ্য তেন পযসা স্বাত্মা কৃশানৌ হুতঃ ।

গন্তুং পাবকং উন্মনস্তদভবদ্দৃষ্ট্বা তু মিত্রাপদং

যুক্তং তেন জলেন শাম্যতি সতাং মৈত্রী পুনস্ত্বীদৃশী ॥ 1.76 ॥

ইতঃ স্বপিতি কেশবঃ কুলং ইতস্তদীযদ্বিষাম্

ইতশ্চ শরণার্থিনাং শিখরিণাং গণাঃ শেরতে ।

ইতোঽপি বডবানলঃ সহ সমস্তসংবর্তকৈঃ

অহো বিততং ঊর্জিতং ভরসহং সিন্ধোর্বপুঃ ॥ 1.77 ॥

তৃষ্ণাং ছিন্ধি ভজ ক্ষমাং জহি মদং পাপে রতিং মা কৃথাঃ

সত্যং ব্রূহ্যনুযাহি সাধুপদবীং সেবস্ব বিদ্বজ্জনম্ ।

মান্যান্মানয বিদ্বিষোঽপ্যনুনয প্রখ্যাপয প্রশ্রযং

কীর্তিং পালয দুঃখিতে কুরু দযাং এতত্সতাং চেষ্টিতম্ ॥ 1.78 ॥

মনসি বচসি কাযে পুণ্যপীযূষপূর্ণাস্

ত্রিভুবনং উপকারশ্রেণিভিঃ প্রীণযন্তঃ ।

পরগুণপরমাণূন্পর্বতীকৃত্য নিত্যং

নিজহৃদি বিকসন্তঃ সন্ত সন্তঃ কিযন্তঃ ॥ 1.79 ॥

কিং তেন হেমগিরিণা রজতাদ্রিণা বা

যত্রাশ্রিতাশ্চ তরবস্তরবস্ত এব ।

মন্যামহে মলযং এব যদাশ্রযেণ

কঙ্কোলনিম্বকটুজা অপি চন্দনাঃ স্যুঃ ॥ 1.80 ॥

রত্নৈর্মহার্হৈস্তুতুষুর্ন দেবা

ন ভেজিরে ভীমবিষেণ ভীতিম্ ।

সুধাং বিনা ন পরযুর্বিরামং

ন নিশ্চিতার্থাদ্বিরমন্তি ধীরাঃ ॥ 1.81 ॥

ক্বচিত্পৃথ্বীশয্যঃ ক্বচিদপি চ পরঙ্কশযনঃ

ক্বচিচ্ছাকাহারঃ ক্বচিদপি চ শাল্যোদনরুচিঃ ।

ক্বচিত্কন্থাধারী ক্বচিদপি চ দিব্যাম্বরধরো

মনস্বী কার্যার্থী ন গণযতি দুঃখং ন চ সুখম্ ॥ 1.82 ॥

ঐশ্বর্যস্য বিভূষণং সুজনতা শৌর্যস্য বাক্সংযমো

জ্ঞানস্যোপশমঃ শ্রুতস্য বিনযো বিত্তস্য পাত্রে ব্যযঃ ।

অক্রোধস্তপসঃ ক্ষমা প্রভবিতুর্ধর্মস্য নির্বাজতা

সর্বেষাং অপি সর্বকারণং ইদং শীলং পরং ভূষণম্ ॥ 1.83 ॥

নিন্দন্তু নীতিনিপুণা যদি বা স্তুবন্তু

লক্ষ্মীঃ সমাবিশতু গচ্ছতু বা যথেষ্ঠম্ ।

অদ্যৈব বা মরণং অস্তু যুগান্তরে বা

ন্যায্যাত্পথঃ প্রবিচলন্তি পদং ন ধীরাঃ ॥ 1.84 ॥

ভগ্নাশস্য করণ্ডপিণ্ডিততনোর্ম্লানেন্দ্রিযস্য ক্ষুধা

কৃত্বাখুর্বিবরং স্বযং নিপতিতো নক্তং মুখে ভোগিনঃ ।

তৃপ্তস্তত্পিশিতেন সত্বরং অসৌ তেনৈব যাতঃ যথা

লোকাঃ পশ্যত দৈবং এব হি নৃণাং বৃদ্ধৌ ক্ষযে কারণম্ ॥ 1.85 ॥

আলস্যং হি মনুষ্যাণাং

শরীরস্থো মহান্রিপুঃ ।

নাস্ত্যুদ্যমসমো বন্ধুঃ

কুর্বাণো নাবসীদতি ॥ 1.86 ॥

ছিন্নোঽপি রোহতি তর্ক্ষীণোঽপ্যুপচীযতে পুনশ্চন্দ্রঃ ।

ইতি বিমৃশন্তঃ সন্তঃ সন্তপ্যন্তে ন দুঃখেষু ॥ 1.87 ॥

নেতা যস্য বৃহস্পতিঃ প্রহরণং বজ্রং সুরাঃ সৈনিকাঃ

স্বর্গো দুর্গং অনুগ্রহঃ কিল হরেরৈরাবতো বারণঃ ।

ইত্যৈশ্বর্যবলান্বিতোঽপি বলভিদ্ভগ্নঃ পরৈঃ সঙ্গরে

তদ্ব্যক্তং ননু দৈবং এব শরণং ধিগ্ধিগ্বৃথা পৌরুষম্ ॥ 1.88 ॥

কর্মাযত্তং ফলং পুংসাং

বুদ্ধিঃ কর্মানুসারিণী ।

তথাপি সুধিযা ভাব্যং

সুবিচার্যৈব কুর্বতা ॥ 1.89 ॥

খল্বাতো দিবসেশ্বরস্য কিরণৈঃ সন্তাডিতো মস্তকে

বাঞ্ছন্দেশং অনাতপং বিধিবশাত্তালস্য মূলং গতঃ ।

তত্রাপ্যস্য মহাফলেন পততা ভগ্নং সশব্দং শিরঃ

প্রাযো গচ্ছতি যত্র ভাগ্যরহিতস্তত্রৈব যান্ত্যাপদঃ ॥ 1.90 ॥

রবিনিশাকরযোর্গ্রহপীডনং

গজভুজঙ্গমযোরপি বন্ধনম্ ।

মতিমতাং চ বিলোক্য দরিদ্রতাং

বিধিরহো বলবানিতি মে মতিঃ ॥ 1.91 ॥

সৃজতি তাবদশেষগুণকরং

পুরুষরত্নং অলঙ্করণং ভুবঃ ।

তদপি তত্ক্ষণভঙ্গি করোতি

চেদহহ কষ্টং অপণ্ডিততা বিধেঃ ॥ 1.92 ॥

পত্রং নৈব যদা করীরবিটপে দোষো বসন্তস্য কিম্

নোলূকোঽপ্যবলোকতে যদি দিবা সূর্যস্য কিং দূষণম্ ।

ধারা নৈব পতন্তি চাতকমুখে মেঘস্য কিং দূষণম্

যত্পূর্বং বিধিনা ললাটলিখিতং তন্মার্জিতুং কঃ ক্ষমঃ ॥ 1.93 ॥

নমস্যামো দেবান্ননু হতবিধেস্তেঽপি বশগা

বিধির্বন্দ্যঃ সোঽপি প্রতিনিযতকর্মৈকফলদঃ ।

ফলং কর্মাযত্তং যদি কিং অমরৈঃ কিং চ বিধিনা

নমস্তত্কর্মভ্যো বিধিরপি ন যেভ্যঃ প্রভবতি ॥ 1.94 ॥

ব্রহ্মা যেন কুলালবন্নিযমিতো ব্রহ্মাডভাণ্ডোদরে

বিষ্ণুর্যেন দশাবতারগহনে ক্ষিপ্তো মহাসঙ্কটে ।

রুদ্রো যেন কপালপাণিপুটকে ভিক্ষাটনং কারিতঃ

সূর্যো ভ্রাম্যতি নিত্যং এব গগনে তস্মৈ নমঃ কর্মণে ॥ 1.95 ॥

নৈবাকৃতিঃ ফলতি নৈবা কুলং ন শীলং

বিদ্যাপি নৈব ন চ যত্নকৃতাপি সেবা ।

ভাগ্যানি পূর্বতপসা খলু সঞ্চিতানি

কালে ফলন্তি পুরুষস্য যথৈব বৃক্ষাঃ ॥ 1.96 ॥

বনে রণে শত্রুজলাগ্নিমধ্যে

মহার্ণবে পর্বতমস্তকে বা ।

সুপ্তং প্রমত্তং বিষমস্থিতং বা

রক্ষন্তি পুণ্যানি পুরাকৃতানি ॥ 1.97 ॥

যা সাধূংশ্চ খলান্করোতি বিদুষো মূর্খান্হিতান্দ্বেষিণঃ

প্রত্যক্ষং কুরুতে পরীক্ষং অমৃতং হালাহলং তত্ক্ষণাত্ ।

তাং আরাধয সত্ক্রিযাং ভগবতীং ভোক্তুং ফলং বাঞ্ছিতং

হে সাধো ব্যসনৈর্গুণেষু বিপুলেষ্বাস্থাং বৃথা মা কৃথাঃ ॥ 1.98 ॥

গুণবদগুণবদ্বা কুর্বতা কার্যজাতং

পরিণতিরবধার্যা যত্নতঃ পণ্ডিতেন ।

অতিরভসকৃতানাং কর্মণাং আবিপত্তের্

ভবতি হৃদযদাহী শল্যতুল্যো বিপাকঃ ॥ 1.99 ॥

স্থাল্যাং বৈদূর্যময্যাং পচতি তিলকণাংশ্চন্দনৈরিন্ধনৌঘৈঃ

সৌবর্ণৈর্লাঙ্গলাগ্রৈর্বিলিখতি বসুধাং অর্কমূলস্য হেতোঃ ।

কৃত্বা কর্পূরখণ্ডান্বৃত্তিং ইহ কুরুতে কোদ্রবাণাং সমন্তাত্

প্রাপ্যেমাং কর্ম্ভূমিং ন চরতি মনুজো যস্তোপ মন্দভাগ্যঃ ॥ 1.100 ॥

মজ্জত্বম্ভসি যাতু মেরুশিখরং শত্রুং জযত্বাহবে

বাণিজ্যং কৃষিসেবনে চ সকলা বিদ্যাঃ কলাঃ শিক্ষতাম্ ।

আকাশং বিপুলং প্রযাতু খগবত্কৃত্বা প্রযত্নং পরং

নাভাব্যং ভবতীহ কর্মবশতো ভাব্যস্য নাশঃ কুতঃ ॥ 1.101 ॥

ভীমং বনং ভবতি তস্য পুরং প্রধানং

সর্বো জনঃ স্বজনতাং উপযাতি তস্য ।

কৃত্স্না চ ভূর্ভবতি সন্নিধিরত্নপূর্ণা

যস্যাস্তি পূর্বসুকৃতং বিপুলং নরস্য ॥ 1.102 ॥

কো লাভো গুণিসঙ্গমঃ কিং অসুখং প্রাজ্ঞেতরৈঃ সঙ্গতিঃ

কা হানিঃ সমযচ্যুতির্নিপুণতা কা ধর্মতত্ত্বে রতিঃ ।

কঃ শূরো বিজিতেন্দ্রিযঃ প্রিযতমা কাঽনুব্রতা কিং ধনং

বিদ্যা কিং সুখং অপ্রবাসগমনং রাজ্যং কিং আজ্ঞাফলম্ ॥ 1.103 ॥

অপ্রিযবচনদরিদ্রৈঃ প্রিযবচনধনাঢ্যৈঃ স্বদারপরিতুষ্টৈঃ ।

পরপরিবাদনিবৃত্তৈঃ ক্বচিত্ক্বচিন্মণ্ডিতা বসুধা ॥ 1.104 ॥

কদর্থিতস্যাপি হি ধৈর্যবৃত্তের্

ন শক্যতে ধৈর্যগুণঃ প্রমার্ষ্টুম্ ।

অধোমুখস্যাপি কৃতস্য বহ্নের্

নাধঃ শিখা যাতি কদাচিদেব ॥ 1.105 ॥

কান্তাকটাক্ষবিশিখা ন লুনন্তি যস্য

চিত্তং ন নির্দহতি কৃপকৃশানুতাপঃ ।

কর্ষন্তি ভূরিবিষযাশ্চ ন লোভপাশৈর্

লোকত্রযং জযতি কৃত্স্নং ইদং স ধীরঃ ॥ 1.106 ॥

একেনাপি হি শূরেণ

পাদাক্রান্তং মহীতলম্ ।

ক্রিযতে ভাস্করেণৈব

স্ফারস্ফুরিততেজসা ॥ 1.107 ॥

বহ্নিস্তস্য জলাযতে জলনিধিঃ কুল্যাযতে তত্ক্ষণান্

মেরুঃ স্বল্পশিলাযতে মৃগপতিঃ সদ্যঃ কুরঙ্গাযতে ।

ব্যালো মাল্যগুণাযতে বিষরসঃ পীযূষবর্ষাযতে

যস্যাঙ্গেঽখিললোকবল্লভতমং শীলং সমুন্মীলতি ॥ 1.108 ॥

লজ্জাগুণৌঘজননীং জননীং ইব স্বাম্

অত্যন্তশুদ্ধহৃদযাং অনুবর্তমানাম্ ।

তেজস্বিনঃ সুখং অসূনপি সন্ত্যজনতি

সত্যব্রতব্যসনিনো ন পুনঃ প্রতিজ্ঞাম্ ॥ 1.109 ॥

Roman (IAST) Transliteration

dikkālādyanavacchinnānantacinmātramūrtaye |

svānubhūtyekamānāya namaḥ śāntāya tejase || 1.1 ||

boddhāro matsaragrastāḥ prabhavaḥ smayadūṣitāḥ |

abodhopahatāḥ cānye jīrṇamaṅge subhāṣitam || 1.2 ||

ajñaḥ sukhaṃ ārādhyaḥ

sukhataraṃ ārādhyate viśeṣajñaḥ |

jñānalavadurvidagdhaṃ

brahmāpi taṃ naraṃ na rañjayati || 1.3 ||

prasahya maṇiṃ uddharenmakaravaktradaṃṣṭrāntarāt

samudraṃ api santaretpracaladūrmimālākulam |

bhujaṅgaṃ api kopitaṃ śirasi puṣpavaddhārayet

na tu pratiniviṣṭamūrkhajanacittaṃ ārādhayet || 1.4 ||

labheta sikatāsu tailaṃ api yatnataḥ pīḍayan

pibecca mṛgatṛṣṇikāsu salilaṃ pipāsārditaḥ |

kvacidapi paryaṭanśaśaviṣāṇaṃ āsādayet

na tu pratiniviṣṭamūrkhacittaṃ ārādhayet || 1.5 ||

vyālaṃ bālamṛṇālatantubhirasau roddhuṃ samujjṛmbhate

chettuṃ vajramaṇiṃ śirīṣakusumaprāntena sannahyati |

mādhuryaṃ madhubindunā racayituṃ kṣārāmudherīhate

netuṃ vāñchanti yaḥ khalānpathi satāṃ sūktaiḥ sudhāsyandibhiḥ || 1.6 ||

svāyattaṃ ekāntaguṇaṃ vidhātrā

vinirmitaṃ chādanaṃ ajñatāyāḥ |

viśeṣataḥ sarvavidāṃ samāje

vibhūṣaṇaṃ maunaṃ apaṇḍitānām || 1.7 ||

yadā kiñcijjño'haṃ dvipa iva madāndhaḥ samabhavaṃ

tadā sarvajño'smītyabhavadavaliptaṃ mama manaḥ

yadā kiñcitkiñcidbudhajanasakāśādavagataṃ

tadā mūrkho'smīti jvara iva mado me vyapagataḥ || 1.8 ||

kṛmikulacittaṃ lālāklinnaṃ vigandhijugupsitaṃ

nirupamarasaṃ prītyā khādannarāsthi nirāmiṣam |

surapatiṃ api śvā pārśvasthaṃ vilokya na śaṅkate

na hi gaṇayati kṣudro jantuḥ parigrahaphalgutām || 1.9 ||

śiraḥ śārvaṃ svargātpaśupatiśirastaḥ kṣitidharaṃ

mahīdhrāduttuṅgādavaniṃ avaneścāpi jaladhim |

adho'dho gaṅgeyaṃ padaṃ upagatā stokam

athavāvivekabhraṣṭānāṃ bhavati vinipātaḥ śatamukhaḥ || 1.10 ||

śakyo vārayituṃ jalena hutabhukcchatreṇa sūryātapo

nāgendro niśitāṅkuśena samado daṇḍena gogardabhau |

vyādhirbheṣajasaṅgrahaiśca vividhairmantraprayogairviṣaṃ

sarvasyauṣadhaṃ asti śāstravihitaṃ mūrkhasya nāstyauṣadhim || 1.11 ||

sāhityasaṅgītakalāvihīnaḥ

sākṣātpaśuḥ pucchaviṣāṇahīnaḥ |

tṛṇaṃ na khādannapi jīvamānas

tadbhāgadheyaṃ paramaṃ paśūnām || 1.12 ||

yeṣāṃ na vidyā na tapo na dānaṃ

jñānaṃ na śīlaṃ na guṇo na dharmaḥ |

te martyaloke bhuvi bhārabhūtā

manuṣyarūpeṇa mṛgāścaranti || 1.13 ||

varaṃ parvatadurgeṣu

bhrāntaṃ vanacaraiḥ saha

na mūrkhajanasamparkaḥ

surendrabhavaneṣvapi || 1.14 ||

śāstropaskṛtaśabdasundaragiraḥ śiṣyapradeyāgamā

vikhyātāḥ kavayo vasanti viṣaye yasya prabhornirdhanāḥ |

tajjāḍyaṃ vasudhādipasya kavayastvarthaṃ vināpīśvarāḥ

kutsyāḥ syuḥ kuparīkṣakā hi maṇayo yairarghataḥ pātitāḥ || 1.15 ||

harturyāti na gocaraṃ kiṃ api śaṃ puṣṇāti yatsarvadā'py

arthibhyaḥ pratipādyamānaṃ aniśaṃ prāpnoti vṛddhiṃ parām |

kalpānteṣvapi na prayāti nidhanaṃ vidyākhyaṃ antardhanaṃ

yeṣāṃ tānprati mānaṃ ujjhata nṛpāḥ kastaiḥ saha spardhate || 1.16 ||

adhigataparamārthānpaṇḍitānmāvamaṃsthās

tṛṇaṃ iva laghu lakṣmīrnaiva tānsaṃruṇaddhi |

abhinavamadalekhāśyāmagaṇḍasthalānāṃ

na bhavati bisatanturvāraṇaṃ vāraṇānām || 1.17 ||

ambhojinīvanavihāravilāsaṃ eva

haṃsasya hanti nitarāṃ kupito vidhātā |

na tvasya dugdhajalabhedavidhau prasiddhāṃ

vaidagdhīkīrtiṃ apahartuṃ asau samarthaḥ || 1.18 ||

keyūrāṇi na bhūṣayanti puruṣaṃ hārā na candrojjvalā

na snānaṃ na vilepanaṃ na kusumaṃ nālaṅkṛtā mūrdhajāḥ |

vāṇyekā samalaṅkaroti puruṣaṃ yā saṃskṛtā dhāryate

kṣīyante khalu bhūṣaṇāni satataṃ vāgbhūṣaṇaṃ bhūṣaṇam || 1.19 ||

vidyā nāma narasya rūpaṃ adhikaṃ pracchannaguptaṃ dhanaṃ

vidyā bhogakarī yaśaḥsukhakarī vidyā gurūṇāṃ guruḥ |

vidyā bandhujano videśagamane vidyā parā devatā

vidyā rājasu pūjyate na tu dhanaṃ vidyāvihīnaḥ paśuḥ || 1.20 ||

kṣāntiścetkavacena kiṃ kiṃ aribhiḥ krodho'sti ceddehināṃ

jñātiścedanalena kiṃ yadi suhṛddivyauṣadhaṃ kiṃ phalam |

kiṃ sarpairyadi durjanāḥ kiṃ u dhanairvidyā'navadyā yadi

vrīḍā cetkiṃ u bhūṣaṇaiḥ sukavitā yadyasti rājyena kim || 1.21 ||

dākṣiṇyaṃ svajane dayā parijane śāṭhyaṃ sadā durjane

prītiḥ sādhujane nayo nṛpajane vidvajjane cārjavam |

śauryaṃ śatrujane kṣamā gurujane kāntājane dhṛṣṭatā

ye caivaṃ puruṣāḥ kalāsu kuśalāsteṣveva lokasthitiḥ || 1.22 ||

jāḍyaṃ dhiyo harati siñcati vāci satyaṃ

mānonnatiṃ diśati pāpaṃ apākaroti |

cetaḥ prasādayati dikṣu tanoti kīrtiṃ

satsaṅgatiḥ kathaya kiṃ na karoti puṃsām || 1.23 ||

jayanti te sukṛtino

rasasiddhāḥ kavīśvarāḥ |

nāsti yeṣāṃ yaśaḥkāye

jarāmaraṇajaṃ bhayam || 1.24 ||

sūnuḥ saccaritaḥ satī priyatamā svāmī prasādonmukhaḥ

snigdhaṃ mitraṃ avañcakaḥ parijano niḥkleśaleśaṃ manaḥ |

ākāro ruciraḥ sthiraśca vibhavo vidyāvadātaṃ mukhaṃ

tuṣṭe viṣṭapakaṣṭahāriṇi harau samprāpyate dehinā || 1.25 ||

prāṇāghātānnivṛttiḥ paradhanaharaṇe saṃyamaḥ satyavākyaṃ

kāle śaktyā pradānaṃ yuvatijanakathāmūkabhāvaḥ pareṣām |

tṛṣṇāsroto vibhaṅgo guruṣu ca vinayaḥ sarvabhūtānukampā

sāmānyaḥ sarvaśāstreṣvanupahatavidhiḥ śreyasāṃ eṣa panthāḥ || 1.26 ||

prārabhyate na khalu vighnabhayena nīcaiḥ

prārabhya vighnavihatā viramanti madhyāḥ |

vighnaiḥ punaḥ punarapi pratihanyamānāḥ

prārabdhaṃ uttamajanā na parityajanti || 1.27 ||

asanto nābhyarthyāḥ suhṛdapi na yācyaḥ kṛśadhanaḥ

priyā nyāyyā vṛttirmalinaṃ asubhaṅge'pyasukaram |

vipadyuccaiḥ stheyaṃ padaṃ anuvidheyaṃ ca mahatāṃ

satāṃ kenoddiṣṭaṃ viṣamaṃ asidhārāvrataṃ idam || 1.28 ||

kṣutkṣāmo'pi jarākṛśo'pi śithilaprāṇo'pi kaṣṭāṃ daśām

āpanno'pi vipannadīdhitiriti prāṇeṣu naśyatsvapi |

mattebhendravibhinnakumbhapiśitagrāsaikabaddhaspṛhaḥ

kiṃ jīrṇaṃ tṛṇaṃ atti mānamahatāṃ agresaraḥ kesarī || 1.29 ||

svalpasnāyuvasāvaśeṣamalinaṃ nirmāṃsaṃ apyasthi goḥ

śvā labdhvā paritoṣaṃ eti na tu tattasya kṣudhāśāntaye |

siṃho jambukaṃ aṅkaṃ āgataṃ api tyaktvā nihanti dvipaṃ

sarvaḥ kṛcchragato'pi vāñchanti janaḥ sattvānurūpaṃ phalam || 1.30 ||

lāṅgūlacālanaṃ adhaścaraṇāvapātaṃ

bhūmau nipatya vadanodaradarśanaṃ ca |

śvā piṇḍadasya kurute gajapuṅgavastu

dhīraṃ vilokayati cāṭuśataiśca bhuṅkte || 1.31 ||

parivartini saṃsāre

mṛtaḥ ko vā na jāyate |

sa jāto yena jātena

yāti vaṃśaḥ samunnatim || 1.32 ||

kusumastavakasyeva

dvayī vṛttirmanasvinaḥ |

mūrdhni vā sarvalokasya

śīryate vana eva vā || 1.33 ||

santyanye'pi bṛhaspatiprabhṛtayaḥ sambhāvitāḥ pañcaṣās

tānpratyeṣa viśeṣavikramarucī rāhurna vairāyate |

dvāveva grasate divākaraniśāprāṇeśvarau bhāskarau

bhrātaḥ parvaṇi paśya dānavapatiḥ śīrṣāvaśeṣākṛtiḥ || 1.34 ||

vahati bhuvanaśreṇiṃ śeṣaḥ phaṇāphalakasthitāṃ

kamaṭhapatinā madhyepṛṣṭhaṃ sadā sa ca dhāryate |

taṃ api kurute kroḍādhīnaṃ payodhiranādarād

ahaha mahatāṃ niḥsīmānaścaritravibhūtayaḥ || 1.35 ||

varaṃ pakṣacchedaḥ samadamaghavanmuktakuliśaprahārair

udgacchadbahuladahanodgāragurubhiḥ |

tuṣārādreḥ sūnorahaha pitari kleśavivaśe

na cāsau sampātaḥ payasi payasāṃ patyurucitaḥ || 1.36 ||

siṃhaḥ śiśurapi nipatati

madamalinakapolabhittiṣu gajeṣu |

prakṛtiriyaṃ sattvavatāṃ

na khalu vayastejaso hetuḥ || 1.37 ||

jātiryātu rasātalaṃ guṇagaṇaistatrāpyadho gamyatāṃ

śīlaṃ śailataṭātpatatvabhijanaḥ sandahyatāṃ vahninā |

śaurye vairiṇi vajraṃ āśu nipatatvartho'stu naḥ kevalaṃ

yenaikena vinā guṇastṛṇalavaprāyāḥ samastā ime || 1.38 ||

dhanaṃ arjaya kākutstha

dhanamūlaṃ idaṃ jagat |

antaraṃ nābhijānāmi

nirdhanasya mṛtasya ca || 1.39 ||

tānīndriyāṇyavikalāni tadeva nāma

sā buddhirapratihatā vacanaṃ tadeva |

arthoṣmaṇā virahitaḥ puruṣaḥ kṣaṇena

so'pyanya eva bhavatīti vicitraṃ etat || 1.40 ||

yasyāsti vittaṃ sa naraḥ kulīnaḥ

sa paṇḍitaḥ sa śrutavānguṇajñaḥ |

sa eva vaktā sa ca darśanīyaḥ

sarve guṇāḥ kāñcanaṃ āśrayanti || 1.41 ||

daurmantryānnṛpatirvinaśyati yatiḥ saṅgātsuto lālanāt

vipro'nadhyayanātkulaṃ kutanayācchīlaṃ khalopāsanāt |

hrīrmadyādanavekṣaṇādapi kṛṣiḥ snehaḥ pravāsāśrayān

maitrī cāpraṇayātsamṛddhiranayāttyāgapramādāddhanam || 1.42 ||

dānaṃ bhogo nāśastisro

gatayo bhavanti vittasya |

yo na dadāti na bhuṅkte

tasya tṛtīyā gatirbhavati || 1.43 ||

maṇiḥ śāṇollīḍhaḥ samaravijayī hetidalito

madakṣīṇo nāgaḥ śaradi saritaḥ śyānapulināḥ |

kalāśeṣaścandraḥ suratamṛditā bālavanitā

tannimnā śobhante galitavibhavāścārthiṣu narāḥ || 1.44 ||

parikṣīṇaḥ kaścitspṛhayati yavānāṃ prasṛtaye

sa paścātsampūrṇaḥ kalayati dharitrīṃ tṛṇasamām |

ataścānaikāntyādgurulaghutayā'rtheṣu dhaninām

avasthā vastūni prathayati ca saṅkocayati ca || 1.45 ||

rājandudhukṣasi yadi kṣitidhenuṃ etāṃ

tenādya vatsaṃ iva lokaṃ amuṃ puṣāṇa

tasmiṃśca samyaganiśaṃ paripoṣyamāṇe

nānāphalaiḥ phalati kalpalateva bhūmiḥ || 1.46 ||

satyānṛtā ca paruṣā priyavādinī ca

hiṃsrā dayālurapi cārthaparā vadānyā |

nityavyayā pracuranityadhanāgamā ca

vārāṅganeva nṛpanītiranekarūpā || 1.47 ||

ājñā kīrtiḥ pālanaṃ brāhmaṇānāṃ

dānaṃ bhogo mitrasaṃrakṣaṇaṃ ca

yeṣāṃ ete ṣaḍguṇā na pravṛttāḥ

ko'rthasteṣāṃ pārthivopāśrayeṇa || 1.48 ||

yaddhātrā nijabhālapaṭṭalikhitaṃ stokaṃ mahadvā dhanaṃ

tatprāpnoti marusthale'pi nitarāṃ merau tato nādhikam |

taddhīro bhava vittavatsu kṛpaṇāṃ vṛttiṃ vṛthā sā kṛthāḥ

kūpe paśya payonidhāvapi ghaṭo gṛhṇāti tulyaṃ jalam || 1.49 ||

tvaṃ eva cātakādhāro'

sīti keṣāṃ na gocaraḥ |

kiṃ ambhodavarāsmākaṃ

kārpaṇyoktaṃ pratīkṣase || 1.50 ||

re re cātaka sāvadhānamanasā mitra kṣaṇaṃ śrūyatām

ambhodā bahavo vasanti gagane sarve'pi naitādṛśāḥ |

kecidvṛṣṭibhirārdrayanti vasudhāṃ garjanti kecidvṛthā

yaṃ yaṃ paśyasi tasya tasya purato mā brūhi dīnaṃ vacaḥ || 1.51 ||

akaruṇatvaṃ akāraṇavigrahaḥ

paradhane parayoṣiti ca spṛhā |

sujanabandhujaneṣvasahiṣṇutā

prakṛtisiddhaṃ idaṃ hi durātmanām || 1.52 ||

durjanaḥ parihartavyo

vidyayā'lakṛto'pi san |

maṇinā bhūṣitaḥ sarpaḥ

kiṃ asau na bhayaṅkaraḥ || 1.53 ||

jāḍyaṃ hrīmati gaṇyate vratarucau dambhaḥ śucau kaitavaṃ

śūre nirghṛṇatā munau vimatitā dainyaṃ priyālāpini |

tejasvinyavaliptatā mukharatā vaktaryaśaktiḥ sthire

tatko nāma guṇo bhavetsa guṇināṃ yo durjanairnāṅkitaḥ || 1.54 ||

lobhaścedaguṇena kiṃ piśunatā yadyasti kiṃ pātakaiḥ

satyaṃ cettapasā ca kiṃ śuci mano yadyasti tīrthena kim |

saujanyaṃ yadi kiṃ guṇaiḥ sumahimā yadyasti kiṃ maṇḍanaiḥ

sadvidyā yadi kiṃ dhanairapayaśo yadyasti kiṃ mṛtyunā || 1.55 ||

śaśī divasadhūsaro galitayauvanā kāminī

saro vigatavārijaṃ mukhaṃ anakṣaraṃ svākṛteḥ |

prabhurdhanaparāyaṇaḥ satatadurgataḥ sajjano

nṛpāṅgaṇagataḥ khalo manasi sapta śalyāni me || 1.56 ||

na kaściccaṇḍakopānām

ātmīyo nāma bhūbhujām |

hotāraṃ api juhvānaṃ

spṛṣṭo vahati pāvakaḥ || 1.57 ||

maunomūkaḥ pravacanapaṭurbāṭulo jalpako vā

dhṛṣṭaḥ pārśve vasati ca sadā dūrataścāpragalbhaḥ |

kṣāntyā bhīruryadi na sahate prāyaśo nābhijātaḥ

sevādharmaḥ paramagahano yogināṃ apyagamyaḥ || 1.58 ||

udbhāsitākhilakhalasya viśṛṅkhalasya

prāgjātavistṛtanijādhamakarmavṛtteḥ |

daivādavāptavibhavasya guṇadviṣo'sya

nīcasya gocaragataiḥ sukhaṃ āpyate || 1.59 ||

ārambhagurvī kṣayiṇī krameṇa

laghvī purā vṛddhimatī ca paścāt |

dinasya pūrvārdhaparārdhabhinnā

chāyeva maitrī khalasajjanānām || 1.60 ||

mṛgamīnasajjanānāṃ tṛṇajalasantoṣavihitavṛttīnām |

lubdhakadhīvarapiśunā niṣkāraṇavairiṇo jagati || 1.61 ||

vāñchā sajjanasaṅgame paraguṇe prītirgurau namratā

vidyāyāṃ vyasanaṃ svayoṣiti ratirlokāpavādādbhayam |

bhaktiḥ śūlini śaktirātmadamane saṃsargamuktiḥ khale

yeṣvete nivasanti nirmalaguṇāstebhyo narebhyo namaḥ || 1.62 ||

vipadi dhairyaṃ athābhyudaye kṣamā

sadasi vākpaṭutā yudhi vikramaḥ |

yaśasi cābhirucirvyasanaṃ śrutau

prakṛtisiddhaṃ idaṃ hi mahātmanām || 1.63 ||

pradānaṃ pracchannaṃ gṛhaṃ upagate sambhramavidhiḥ

priyaṃ kṛtvā maunaṃ sadasi kathanaṃ cāpyupakṛteḥ |

anutseko lakṣmyāṃ anabhibhavagandhāḥ parakathāḥ

satāṃ kenoddiṣṭaṃ viṣamaṃ asidhārāvrataṃ idam || 1.64 ||

kare ślāghyastyāgaḥ śirasi gurupādapraṇayitā

mukhe satyā vāṇī vijayi bhujayorvīryaṃ atulam |

hṛdi svacchā vṛttiḥ śrutiṃ adhigataṃ ca śravaṇayor

vināpyaiśvaryeṇa prakṛtimahatāṃ maṇḍanaṃ idam || 1.65 ||

sampatsu mahatāṃ cittaṃ bhavatyutpalakomalam |

āpatsu ca mahāśailaśilā saṅghātakarkaśam || 1.66 ||

santaptāyasi saṃsthitasya payaso nāmāpi na jñāyate

muktākāratayā tadeva nalinīpatrasthitaṃ rājate |

svātyāṃ sāgaraśuktimadhyapatitaṃ tanmauktikaṃ jāyate

prāyeṇādhamamadhyamottamaguṇaḥ saṃsargato jāyate || 1.67 ||

prīṇāti yaḥ sucaritaiḥ pitaraṃ sa putro

yadbhartureva hitaṃ icchati tatkalatram |

tanmitraṃ āpadi sukhe ca samakriyaṃ yad

etattrayaṃ jagati puṇyakṛto labhante || 1.68 ||

eko devaḥ keśavo vā śivo vā

hyekaṃ mitraṃ bhūpatirvā yatirvā |

eko vāsaḥ pattane vā vane vā

hyekā bhāryā sundarī vā darī vā || 1.69 ||

namratvenonnamantaḥ paraguṇakathanaiḥ svānguṇānkhyāpayantaḥ

svārthānsampādayanto vitatapṛthutarārambhayatnāḥ parārthe |

kṣāntyaivākṣeparukṣākṣaramukharamukhāndurjanāndūṣayantaḥ

santaḥ sāścaryacaryā jagati bahumatāḥ kasya nābhyarcanīyāḥ || 1.70 ||

bhavanti namrāstaravaḥ phalodgamair

navāmbubhirdūrāvalambino ghanāḥ |

anuddhatāḥ satpuruṣāḥ samṛddhibhiḥ

svabhāva eṣa paropakāriṇām || 1.71 ||

śrotraṃ śrutenaiva na kuṇḍalena

dānena pāṇirna tu kaṅkaṇena |

vibhāti kāyaḥ karuṇaparāṇāṃ

paropakārairna tu candanena || 1.72 ||

pāpānnivārayati yojayate hitāya

guhyaṃ nigūhati guṇānprakaṭīkaroti |

āpadgataṃ ca na jahāti dadāti kāle

sanmitralakṣaṇaṃ idaṃ pravadanti santaḥ || 1.73 ||

padmākaraṃ dinakaro vikacīkaroti

candraprabhollāsayati kairavacakravālam |

nābhyarthito jaladharo'pi jalaṃ dadāti

santaḥ svayaṃ parahite vihitābhiyogāḥ || 1.74 ||

eke satpuruṣāḥ parārthaghaṭakāḥ svārthaṃ parityajanti ye

sāmānyāstu parārthaṃ udyamabhṛtaḥ svārthāvirodhena ye |

te'mī mānuṣarākṣasāḥ parahitaṃ svārthāya nighnanti ye

ye tu ghnanti nirarthakaṃ parahitaṃ te ke na jānīmahe || 1.75 ||

kṣīreṇātmagatodakāya hi guṇā dattā purā te'khilā

kṣīrottāpaṃ avekṣya tena payasā svātmā kṛśānau hutaḥ |

gantuṃ pāvakaṃ unmanastadabhavaddṛṣṭvā tu mitrāpadaṃ

yuktaṃ tena jalena śāmyati satāṃ maitrī punastvīdṛśī || 1.76 ||

itaḥ svapiti keśavaḥ kulaṃ itastadīyadviṣām

itaśca śaraṇārthināṃ śikhariṇāṃ gaṇāḥ śerate |

ito'pi baḍavānalaḥ saha samastasaṃvartakaiḥ

aho vitataṃ ūrjitaṃ bharasahaṃ sindhorvapuḥ || 1.77 ||

tṛṣṇāṃ chindhi bhaja kṣamāṃ jahi madaṃ pāpe ratiṃ mā kṛthāḥ

satyaṃ brūhyanuyāhi sādhupadavīṃ sevasva vidvajjanam |

mānyānmānaya vidviṣo'pyanunaya prakhyāpaya praśrayaṃ

kīrtiṃ pālaya duḥkhite kuru dayāṃ etatsatāṃ ceṣṭitam || 1.78 ||

manasi vacasi kāye puṇyapīyūṣapūrṇās

tribhuvanaṃ upakāraśreṇibhiḥ prīṇayantaḥ |

paraguṇaparamāṇūnparvatīkṛtya nityaṃ

nijahṛdi vikasantaḥ santa santaḥ kiyantaḥ || 1.79 ||

kiṃ tena hemagiriṇā rajatādriṇā vā

yatrāśritāśca taravastaravasta eva |

manyāmahe malayaṃ eva yadāśrayeṇa

kaṅkolanimbakaṭujā api candanāḥ syuḥ || 1.80 ||

ratnairmahārhaistutuṣurna devā

na bhejire bhīmaviṣeṇa bhītim |

sudhāṃ vinā na parayurvirāmaṃ

na niścitārthādviramanti dhīrāḥ || 1.81 ||

kvacitpṛthvīśayyaḥ kvacidapi ca paraṅkaśayanaḥ

kvacicchākāhāraḥ kvacidapi ca śālyodanaruciḥ |

kvacitkanthādhārī kvacidapi ca divyāmbaradharo

manasvī kāryārthī na gaṇayati duḥkhaṃ na ca sukham || 1.82 ||

aiśvaryasya vibhūṣaṇaṃ sujanatā śauryasya vāksaṃyamo

jñānasyopaśamaḥ śrutasya vinayo vittasya pātre vyayaḥ |

akrodhastapasaḥ kṣamā prabhaviturdharmasya nirvājatā

sarveṣāṃ api sarvakāraṇaṃ idaṃ śīlaṃ paraṃ bhūṣaṇam || 1.83 ||

nindantu nītinipuṇā yadi vā stuvantu

lakṣmīḥ samāviśatu gacchatu vā yatheṣṭham |

adyaiva vā maraṇaṃ astu yugāntare vā

nyāyyātpathaḥ pravicalanti padaṃ na dhīrāḥ || 1.84 ||

bhagnāśasya karaṇḍapiṇḍitatanormlānendriyasya kṣudhā

kṛtvākhurvivaraṃ svayaṃ nipatito naktaṃ mukhe bhoginaḥ |

tṛptastatpiśitena satvaraṃ asau tenaiva yātaḥ yathā

lokāḥ paśyata daivaṃ eva hi nṛṇāṃ vṛddhau kṣaye kāraṇam || 1.85 ||

ālasyaṃ hi manuṣyāṇāṃ

śarīrastho mahānripuḥ |

nāstyudyamasamo bandhuḥ

kurvāṇo nāvasīdati || 1.86 ||

chinno'pi rohati tarkṣīṇo'pyupacīyate punaścandraḥ |

iti vimṛśantaḥ santaḥ santapyante na duḥkheṣu || 1.87 ||

netā yasya bṛhaspatiḥ praharaṇaṃ vajraṃ surāḥ sainikāḥ

svargo durgaṃ anugrahaḥ kila harerairāvato vāraṇaḥ |

ityaiśvaryabalānvito'pi balabhidbhagnaḥ paraiḥ saṅgare

tadvyaktaṃ nanu daivaṃ eva śaraṇaṃ dhigdhigvṛthā pauruṣam || 1.88 ||

karmāyattaṃ phalaṃ puṃsāṃ

buddhiḥ karmānusāriṇī |

tathāpi sudhiyā bhāvyaṃ

suvicāryaiva kurvatā || 1.89 ||

khalvāto divaseśvarasya kiraṇaiḥ santāḍito mastake

vāñchandeśaṃ anātapaṃ vidhivaśāttālasya mūlaṃ gataḥ |

tatrāpyasya mahāphalena patatā bhagnaṃ saśabdaṃ śiraḥ

prāyo gacchati yatra bhāgyarahitastatraiva yāntyāpadaḥ || 1.90 ||

raviniśākarayorgrahapīḍanaṃ

gajabhujaṅgamayorapi bandhanam |

matimatāṃ ca vilokya daridratāṃ

vidhiraho balavāniti me matiḥ || 1.91 ||

sṛjati tāvadaśeṣaguṇakaraṃ

puruṣaratnaṃ alaṅkaraṇaṃ bhuvaḥ |

tadapi tatkṣaṇabhaṅgi karoti

cedahaha kaṣṭaṃ apaṇḍitatā vidheḥ || 1.92 ||

patraṃ naiva yadā karīraviṭape doṣo vasantasya kim

nolūko'pyavalokate yadi divā sūryasya kiṃ dūṣaṇam |

dhārā naiva patanti cātakamukhe meghasya kiṃ dūṣaṇam

yatpūrvaṃ vidhinā lalāṭalikhitaṃ tanmārjituṃ kaḥ kṣamaḥ || 1.93 ||

namasyāmo devānnanu hatavidheste'pi vaśagā

vidhirvandyaḥ so'pi pratiniyatakarmaikaphaladaḥ |

phalaṃ karmāyattaṃ yadi kiṃ amaraiḥ kiṃ ca vidhinā

namastatkarmabhyo vidhirapi na yebhyaḥ prabhavati || 1.94 ||

brahmā yena kulālavanniyamito brahmāḍabhāṇḍodare

viṣṇuryena daśāvatāragahane kṣipto mahāsaṅkaṭe |

rudro yena kapālapāṇipuṭake bhikṣāṭanaṃ kāritaḥ

sūryo bhrāmyati nityaṃ eva gagane tasmai namaḥ karmaṇe || 1.95 ||

naivākṛtiḥ phalati naivā kulaṃ na śīlaṃ

vidyāpi naiva na ca yatnakṛtāpi sevā |

bhāgyāni pūrvatapasā khalu sañcitāni

kāle phalanti puruṣasya yathaiva vṛkṣāḥ || 1.96 ||

vane raṇe śatrujalāgnimadhye

mahārṇave parvatamastake vā |

suptaṃ pramattaṃ viṣamasthitaṃ vā

rakṣanti puṇyāni purākṛtāni || 1.97 ||

yā sādhūṃśca khalānkaroti viduṣo mūrkhānhitāndveṣiṇaḥ

pratyakṣaṃ kurute parīkṣaṃ amṛtaṃ hālāhalaṃ tatkṣaṇāt |

tāṃ ārādhaya satkriyāṃ bhagavatīṃ bhoktuṃ phalaṃ vāñchitaṃ

he sādho vyasanairguṇeṣu vipuleṣvāsthāṃ vṛthā mā kṛthāḥ || 1.98 ||

guṇavadaguṇavadvā kurvatā kāryajātaṃ

pariṇatiravadhāryā yatnataḥ paṇḍitena |

atirabhasakṛtānāṃ karmaṇāṃ āvipatter

bhavati hṛdayadāhī śalyatulyo vipākaḥ || 1.99 ||

sthālyāṃ vaidūryamayyāṃ pacati tilakaṇāṃścandanairindhanaughaiḥ

sauvarṇairlāṅgalāgrairvilikhati vasudhāṃ arkamūlasya hetoḥ |

kṛtvā karpūrakhaṇḍānvṛttiṃ iha kurute kodravāṇāṃ samantāt

prāpyemāṃ karmbhūmiṃ na carati manujo yastopa mandabhāgyaḥ || 1.100 ||

majjatvambhasi yātu meruśikharaṃ śatruṃ jayatvāhave

vāṇijyaṃ kṛṣisevane ca sakalā vidyāḥ kalāḥ śikṣatām |

ākāśaṃ vipulaṃ prayātu khagavatkṛtvā prayatnaṃ paraṃ

nābhāvyaṃ bhavatīha karmavaśato bhāvyasya nāśaḥ kutaḥ || 1.101 ||

bhīmaṃ vanaṃ bhavati tasya puraṃ pradhānaṃ

sarvo janaḥ svajanatāṃ upayāti tasya |

kṛtsnā ca bhūrbhavati sannidhiratnapūrṇā

yasyāsti pūrvasukṛtaṃ vipulaṃ narasya || 1.102 ||

ko lābho guṇisaṅgamaḥ kiṃ asukhaṃ prājñetaraiḥ saṅgatiḥ

kā hāniḥ samayacyutirnipuṇatā kā dharmatattve ratiḥ |

kaḥ śūro vijitendriyaḥ priyatamā kā'nuvratā kiṃ dhanaṃ

vidyā kiṃ sukhaṃ apravāsagamanaṃ rājyaṃ kiṃ ājñāphalam || 1.103 ||

apriyavacanadaridraiḥ priyavacanadhanāḍhyaiḥ svadāraparituṣṭaiḥ |

paraparivādanivṛttaiḥ kvacitkvacinmaṇḍitā vasudhā || 1.104 ||

kadarthitasyāpi hi dhairyavṛtter

na śakyate dhairyaguṇaḥ pramārṣṭum |

adhomukhasyāpi kṛtasya vahner

nādhaḥ śikhā yāti kadācideva || 1.105 ||

kāntākaṭākṣaviśikhā na lunanti yasya

cittaṃ na nirdahati kṛpakṛśānutāpaḥ |

karṣanti bhūriviṣayāśca na lobhapāśair

lokatrayaṃ jayati kṛtsnaṃ idaṃ sa dhīraḥ || 1.106 ||

ekenāpi hi śūreṇa

pādākrāntaṃ mahītalam |

kriyate bhāskareṇaiva

sphārasphuritatejasā || 1.107 ||

vahnistasya jalāyate jalanidhiḥ kulyāyate tatkṣaṇān

meruḥ svalpaśilāyate mṛgapatiḥ sadyaḥ kuraṅgāyate |

vyālo mālyaguṇāyate viṣarasaḥ pīyūṣavarṣāyate

yasyāṅge'khilalokavallabhatamaṃ śīlaṃ samunmīlati || 1.108 ||

lajjāguṇaughajananīṃ jananīṃ iva svām

atyantaśuddhahṛdayāṃ anuvartamānām |

tejasvinaḥ sukhaṃ asūnapi santyajanati

satyavratavyasanino na punaḥ pratijñām || 1.109 ||