📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
4.25 কিষ্কিন্ধাকাণ্ড - পঞ্চবিংশ সর্গঃ
4.25 Kishkindhakanda - Panchavimsha Sargah
Valmiki Bengali
শ্রীমদ্বাল্মীকীয রামাযণে কিষ্কিন্ধাকাণ্ডম্ ।
অথ পঞ্চবিংশস্সর্গঃ ।
সুগ্রীবং চৈব তারাং চ সাঙ্গদং সহলক্ষ্মণঃ ।
সমানশোকঃ কাকুত্স্থ স্সান্ত্বযন্নিদমব্রবীত্ ॥ 1 ॥
ন শোকপরিতাপেন শ্রেযসা যুজ্যতে মৃতঃ ।
যদত্রানন্তরং কার্যং তত্সমাধাতুমর্হথ ॥ 2 ॥
লোকবৃত্তমনুষ্ঠেযং কৃতং বো বাষ্পমোক্ষণম্ ।
ন কালাদুত্তরং কিঞ্চিত্কর্ম শক্যমুপাসিতুম্ ॥ 3 ॥
নিযতিঃ কারণং লোকে নিযতিঃ কর্মসাধনম্ ।
নিযতিস্সর্বভূতানাং নিযোগেষ্বিহ কারণম্ ॥ 4 ॥
ন কর্তা কস্যচিত্কশ্চিন্নিযোগে চাপিনেশ্বরঃ ।
স্বভাবে বর্ততে লোকস্তস্য কালঃ পরাযণম্ ॥ 5 ॥
ন কালঃ কালমত্যেতি ন কালঃ পরিহীযতে ।
স্বভাবং চ সমাসাদ্য ন কশ্চিদতিবর্ততে ॥ 6 ॥
ন কালস্যাস্তি বন্ধুত্বং ন হেতুর্ন পরাক্রমঃ ।
ন মিত্রজ্ঞাতিসম্বন্ধঃ কারণং নাত্মনো বশঃ ॥ 7 ॥
কিং তু কালপরীণামো দ্রষ্টব্যস্সাধু পশ্যতা ।
ধর্মশ্চার্থশ্চ কামশ্চ কালক্রমসমাহিতাঃ ॥ 8 ॥
ইতস্স্বাং প্রকৃতিং বালী গতঃপ্রাপ্তঃ ক্রিযাফলম্ ।
ধর্মার্থকাম সংযোগৈঃ পবিত্রং প্লবগেশ্বরঃ ॥ 9 ॥
স্বধর্মস্য চ সংযোগাজ্জিতস্তেন মহাত্মনা ।
স্বর্গঃ পরিগৃহীতশ্চ প্রাণানপরিরক্ষতা ॥ 10 ॥
এষা বৈ নিযতিশ্শেষ্ঠা যাং গতো হরিযূথপঃ ।
তদলং পরিতাপেন প্রাপ্তকালমুপাস্যতাম্ ॥ 11 ॥
বচনান্তে তু রামস্য লক্ষ্মণঃ পরবীরহা ।
অবদত্প্রশ্রিতং বাক্যং সুগ্রীবং গতচেতসম্ ॥ 12 ॥
কুরু ত্বমস্য সুগ্রীব প্রেতকার্যমনন্তরম্ ।
তারাঙ্গদাভ্যাং সহিতো বালিনো দহনং প্রতি ॥ 13 ॥
সমাজ্ঞাপয কাষ্ঠানি শুষ্কানি চ বহূনি চ ।
চন্দনাদীনি দিব্যানি বালিসংস্কারকারণাত্ ॥ 14 ॥
সমাশ্বাসয চৈনং ত্বমঙ্গদং দীনচেতসম্ ।
মা ভূর্বালিশবুদ্ধিস্ত্বং ত্বদধীনমিদং পুরম্ ॥ 15 ॥
অঙ্গদস্ত্বানযেন্মাল্যং বস্ত্রাণি বিবিধানি চ ।
ঘৃতং তৈলমথো গন্ধান্যচ্চাত্র সমনন্তরম্ ॥ 16 ॥
ত্বং তার শিবিকাং শীঘ্রমাদাযাগচ্ছ সম্ভ্রমাত্ ।
ত্বরা গুণবতী যুক্তা হ্যস্মিন্কালে বিশেষতঃ ॥ 17 ॥
সজ্জীভবন্তু প্লবগাশ্শিবিকাবাহনোচিতাঃ ।
সমর্থা বলিনশ্চৈব নির্হরিষ্যন্তি বালিনম্ ॥ 18 ॥
এবমুক্ত্বা তু সুগ্রীবং সুমিত্রানন্দবর্ধনঃ ।
তসৌ ভ্রাতৃসমীপস্থো লক্ষ্মণঃ পরবীরহা ॥ 19 ॥
লক্ষ্মণস্য বচশ্শ্রুত্বা তারস্সম্ভ্রান্তমানসঃ ।
প্রবিবেশ গুহাং শীঘ্রং শিবিকাসক্তমানসঃ ॥ 20 ॥
আদায শিবিকাং তারস্স তু পর্যাপতত্পুনঃ ।
বানরৈরুহ্যমানাং তাং শূরৈরুদ্বহনোচিতৈঃ ॥ 21 ॥
দিব্যাং ভদ্রাসনযুতাং শিবিকাং স্যন্দনোপমাম্ ।
পক্ষিকর্মভিরাচিত্রাং দ্রুমকর্মবিভূষিতাম্ ॥ 22 ॥
আচিতাং চিত্রপত্তীভি স্সুনিবিষ্টাং সমন্ততঃ ।
বিমানমিব সিদ্ধানাং জালবাতাযনান্বিতাম্ ॥ 23 ॥
সুনিযুক্তাং বিশালাং চ সুকৃতাং বিশ্বকর্মণা ।
দারুপর্বতকোপেতাং চারুকর্মপরিষ্কৃতাম্ ॥ 24 ॥
বরাভরণহারৈশ্চ চিত্রমাল্যোপশোভিতাম্ ।
গুহাগহনসঞ্ছন্নাং রক্তচন্দনভূষিতাম্ ॥ 25 ॥
পুষ্পৌঘৈস্সমভিচ্ছন্নাং পদ্মমালাভিরেব চ ।
তরুণাদিত্যবর্ণাভির্ভ্রাজমানাভিরাবৃতাম্ ॥ 26 ॥
ঈদৃশীং শিবিকাং দৃষ্ট্বা রামো লক্ষ্মণমব্রবীত্ ।
ক্ষিপ্রং বিনীযতাং বালী প্রেতকার্যং বিধীযতাম্ ॥ 27 ॥
ততো বালিনমুদ্যম্য সুগ্রীবশ্শিবিকাং তদা ।
আরোপযত বিক্রোশন্নঙ্গদেন সহৈব তু ॥ 28 ॥
আরোপ্য শিবিকাং চৈব বালিনং গতজীবিতম্ ।
অলঙ্কারৈশ্চ বিবিধৈর্মাল্যৈর্বস্ত্রৈশ্চ ভূষিতম্ ॥ 29 ॥
আজ্ঞাপযত্তদা রাজা সুগ্রীব প্লবগেশ্বরঃ ।
ঔর্ধ্বদৈহিকমার্যস্য ক্রিযতামনুরূপতঃ ॥ 30 ॥
বিশ্রাণযন্তো রত্নানি বিবিধানি বহূন্যপি ।
অগ্রতঃ প্লবগা যান্তু শিবিকা সমনন্তরম্ ॥ 31 ॥
রাজ্ঞামৃদ্দিবিশেষা হি দৃশ্যন্তে ভুবি যাদৃশাঃ ।
তাদৃশৈরিহ কুর্বন্তু বানরা ভর্তৃসত্ক্রিযাম্ ॥ 32 ॥
তাদৃশং বালিনঃ ক্ষিপ্রং প্রাকুর্বন্নৌর্ধ্বদৈহিকম্ ।
অঙ্গদং পরিগৃহ্যাঽশু তারপ্রভৃতযস্তদা ॥ 33 ॥
ক্রোশন্তঃ প্রযযুস্সর্বে বানরা হতবান্ধবাঃ ।
ততঃ প্রণিহিতাঃ সর্বা বানর্যোস্য বশানুগাঃ ॥ 34 ॥
চুক্রুশু র্বীর বীরেতি ভূযঃ ক্রোশন্তি তাঃ স্ত্রীযঃ ।
তারাপ্রভৃতযস্সর্বা বানর্যো হরিযূথপাঃ ।
অনুজগ্মুর্হি ভর্তারং ক্রোশন্ত্যঃ করুণস্বনাঃ ॥ 35 ॥
তাসাং রুদিতশব্দেন বানরীণাং বনান্তরে ।
বনানি গিরযশ্চৈব বিক্রোশন্তীব সর্বতঃ ॥ 36 ॥
পুলিনে গিরিনদ্যাস্তু বিবিক্তে জলসংবৃতে ॥ 37 ॥
চিতাং চক্রুস্সুবহবো বানরাশ্শোককর্শিতাঃ ।
অবরোপ্য ততস্স্কন্ধাচ্ছিবিকাং বাহনোচিতাঃ ।
তস্থুরেকান্তমাশ্রিত্য সর্বে শোকসমন্বিতাঃ ॥ 38 ॥
ততস্তারা পতিং দৃষ্ট্বা শিবিকাতলশাযিনম্ ॥ 39 ॥
আরোপ্যাঙ্কে শিরস্তস্য বিললাপ সুদুঃখিতা ।
হা বানর মহারাজ হা নাথ মম বত্সল ॥ 40 ॥
হা মহার্হ মহাবাহো হা মম প্রিয পশ্য মাম্ ।
জনং ন পশ্যসীমং ত্বং কস্মাচ্ছোকাভিপীডিতম্ ॥ 41 ॥
প্রহৃষ্টমিব তে বক্ত্রং গতাসোরপি মানদ আস্তার্কসমবর্ণং চ লক্ষ্যতে জীবতো যথা ॥ 42 ॥
এষ ত্বাং রামরূপেণ কালঃ কর্ষতি বানর ।
যেন স্ম বিধবাস্সর্বাঃ কৃতা একেষুণা বনে ॥ 43 ॥
ইমাস্তাস্তব রাজেন্দ্র বানর্যোবল্লভাস্সদা ।
পাদৈর্বিকৃষ্ট মধ্বানমাগতাঃ কিং ন বুধ্যসে ॥ 44 ॥
তবেষ্টা ননু নামৈতা ভার্যাশ্চন্দ্রনিভাননাঃ ।
ইদানীং নেক্ষসে কস্তাত্সুগ্রীবং প্লবগেশ্বরম্ ॥ 45 ॥
এতে হি সচিবা রাজং স্তারপ্রভৃতযস্তব ।
পুরবাসী জনশ্চাযং পরিবার্যাসতেঽনঘ ॥ 46 ॥
বিসর্জযৈতান্ প্লবগান্যথোচিতমরিন্দম ।
ততঃ ক্রীডামহে সর্বা বনেষু মদনোত্কটাঃ ॥ 47 ॥
এবং বিলপতীং তারাং পতিশোকপরিপ্লুতাম্ ।
উত্থাপযন্তি স্ম তদা বানর্যশ্শোককর্শিতাঃ ॥ 48 ॥
সুগ্রীবেণ ততস্সার্ধম্মঙ্গদঃ পিতরং রুদন্ ।
চিতামারোপযামাস শোকেনাভিহতেন্দ্রিযঃ ॥ 49 ॥
ততোঽগ্নিং বিধিবদ্দত্ত্বা সোঽপসব্যং চকার হ ।
পিতরং দীর্ঘমধ্বানং প্রস্থিতং ব্যাকুলেন্দ্রিযঃ ॥ 50 ॥
সংস্কৃত্য বালিনং তে তু বিধিপূর্বং প্লবঙ্গমাঃ ।
আজগ্মুরুদকং কর্তুং নদীং শুভজলাং শিবাম্ ॥ 51 ॥
ততস্তে সহিতাস্তত্র হ্যঙ্গদং স্থাপ্য চাগ্রতঃ ।
সুগ্রীবতারাসহিতাস্সিষিচুর্বালিনে জলম্ ॥ 52 ॥
সুগ্রীবেণেব দীনেন দীনো ভূত্বা মহাবলঃ ।
সমানশোকঃ কাকুত্স্থঃ প্রেতকার্যাণ্যকারযত্ ॥ 53 ॥
ততস্তু তং বালিনমগ্র্যপৌরুষং প্রকাশমিক্ষ্বাকুবরেষুণা হতম্ ।
প্রদীপ্য দীপ্তাগ্নিসমৌজসং তদা সলক্ষ্মণং রামমুপেযিবান্হরিঃ ॥ 54 ॥
ইত্যার্ষে শ্রীমদ্রামাযণে বাল্মীকীয আদিকাব্যে কিষ্কিন্ধাকাণ্ডে পঞ্চবিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe kiṣkindhākāṇḍam |
atha pañcaviṃśassargaḥ |
sugrīvaṃ caiva tārāṃ ca sāṅgadaṃ sahalakṣmaṇaḥ |
samānaśokaḥ kākutstha ssāntvayannidamabravīt || 1 ||
na śokaparitāpena śreyasā yujyate mṛtaḥ |
yadatrānantaraṃ kāryaṃ tatsamādhātumarhatha || 2 ||
lokavṛttamanuṣṭheyaṃ kṛtaṃ vo bāṣpamokṣaṇam |
na kālāduttaraṃ kiñcitkarma śakyamupāsitum || 3 ||
niyatiḥ kāraṇaṃ loke niyatiḥ karmasādhanam |
niyatissarvabhūtānāṃ niyogeṣviha kāraṇam || 4 ||
na kartā kasyacitkaścinniyoge cāpineśvaraḥ |
svabhāve vartate lokastasya kālaḥ parāyaṇam || 5 ||
na kālaḥ kālamatyeti na kālaḥ parihīyate |
svabhāvaṃ ca samāsādya na kaścidativartate || 6 ||
na kālasyāsti bandhutvaṃ na heturna parākramaḥ |
na mitrajñātisambandhaḥ kāraṇaṃ nātmano vaśaḥ || 7 ||
kiṃ tu kālaparīṇāmo draṣṭavyassādhu paśyatā |
dharmaścārthaśca kāmaśca kālakramasamāhitāḥ || 8 ||
itassvāṃ prakṛtiṃ vālī gataḥprāptaḥ kriyāphalam |
dharmārthakāma saṃyogaiḥ pavitraṃ plavageśvaraḥ || 9 ||
svadharmasya ca saṃyogājjitastena mahātmanā |
svargaḥ parigṛhītaśca prāṇānaparirakṣatā || 10 ||
eṣā vai niyatiśśeṣṭhā yāṃ gato hariyūthapaḥ |
tadalaṃ paritāpena prāptakālamupāsyatām || 11 ||
vacanānte tu rāmasya lakṣmaṇaḥ paravīrahā |
avadatpraśritaṃ vākyaṃ sugrīvaṃ gatacetasam || 12 ||
kuru tvamasya sugrīva pretakāryamanantaram |
tārāṅgadābhyāṃ sahito vālino dahanaṃ prati || 13 ||
samājñāpaya kāṣṭhāni śuṣkāni ca bahūni ca |
candanādīni divyāni vālisaṃskārakāraṇāt || 14 ||
samāśvāsaya cainaṃ tvamaṅgadaṃ dīnacetasam |
mā bhūrbāliśabuddhistvaṃ tvadadhīnamidaṃ puram || 15 ||
aṅgadastvānayenmālyaṃ vastrāṇi vividhāni ca |
ghṛtaṃ tailamatho gandhānyaccātra samanantaram || 16 ||
tvaṃ tāra śibikāṃ śīghramādāyāgaccha sambhramāt |
tvarā guṇavatī yuktā hyasminkāle viśeṣataḥ || 17 ||
sajjībhavantu plavagāśśibikāvāhanocitāḥ |
samarthā balinaścaiva nirhariṣyanti vālinam || 18 ||
evamuktvā tu sugrīvaṃ sumitrānandavardhanaḥ |
tasau bhrātṛsamīpastho lakṣmaṇaḥ paravīrahā || 19 ||
lakṣmaṇasya vacaśśrutvā tārassambhrāntamānasaḥ |
praviveśa guhāṃ śīghraṃ śibikāsaktamānasaḥ || 20 ||
ādāya śibikāṃ tārassa tu paryāpatatpunaḥ |
vānarairuhyamānāṃ tāṃ śūrairudvahanocitaiḥ || 21 ||
divyāṃ bhadrāsanayutāṃ śibikāṃ syandanopamām |
pakṣikarmabhirācitrāṃ drumakarmavibhūṣitām || 22 ||
ācitāṃ citrapattībhi ssuniviṣṭāṃ samantataḥ |
vimānamiva siddhānāṃ jālavātāyanānvitām || 23 ||
suniyuktāṃ viśālāṃ ca sukṛtāṃ viśvakarmaṇā |
dāruparvatakopetāṃ cārukarmapariṣkṛtām || 24 ||
varābharaṇahāraiśca citramālyopaśobhitām |
guhāgahanasañchannāṃ raktacandanabhūṣitām || 25 ||
puṣpaughaissamabhicchannāṃ padmamālābhireva ca |
taruṇādityavarṇābhirbhrājamānābhirāvṛtām || 26 ||
īdṛśīṃ śibikāṃ dṛṣṭvā rāmo lakṣmaṇamabravīt |
kṣipraṃ vinīyatāṃ vālī pretakāryaṃ vidhīyatām || 27 ||
tato vālinamudyamya sugrīvaśśibikāṃ tadā |
āropayata vikrośannaṅgadena sahaiva tu || 28 ||
āropya śibikāṃ caiva vālinaṃ gatajīvitam |
alaṅkāraiśca vividhairmālyairvastraiśca bhūṣitam || 29 ||
ājñāpayattadā rājā sugrīva plavageśvaraḥ |
aurdhvadaihikamāryasya kriyatāmanurūpataḥ || 30 ||
viśrāṇayanto ratnāni vividhāni bahūnyapi |
agrataḥ plavagā yāntu śibikā samanantaram || 31 ||
rājñāmṛddiviśeṣā hi dṛśyante bhuvi yādṛśāḥ |
tādṛśairiha kurvantu vānarā bhartṛsatkriyām || 32 ||
tādṛśaṃ vālinaḥ kṣipraṃ prākurvannaurdhvadaihikam |
aṅgadaṃ parigṛhyā'śu tāraprabhṛtayastadā || 33 ||
krośantaḥ prayayussarve vānarā hatabāndhavāḥ |
tataḥ praṇihitāḥ sarvā vānaryosya vaśānugāḥ || 34 ||
cukruśu rvīra vīreti bhūyaḥ krośanti tāḥ strīyaḥ |
tārāprabhṛtayassarvā vānaryo hariyūthapāḥ |
anujagmurhi bhartāraṃ krośantyaḥ karuṇasvanāḥ || 35 ||
tāsāṃ ruditaśabdena vānarīṇāṃ vanāntare |
vanāni girayaścaiva vikrośantīva sarvataḥ || 36 ||
puline girinadyāstu vivikte jalasaṃvṛte || 37 ||
citāṃ cakrussubahavo vānarāśśokakarśitāḥ |
avaropya tatasskandhācchibikāṃ vāhanocitāḥ |
tasthurekāntamāśritya sarve śokasamanvitāḥ || 38 ||
tatastārā patiṃ dṛṣṭvā śibikātalaśāyinam || 39 ||
āropyāṅke śirastasya vilalāpa suduḥkhitā |
hā vānara mahārāja hā nātha mama vatsala || 40 ||
hā mahārha mahābāho hā mama priya paśya mām |
janaṃ na paśyasīmaṃ tvaṃ kasmācchokābhipīḍitam || 41 ||
prahṛṣṭamiva te vaktraṃ gatāsorapi mānada āstārkasamavarṇaṃ ca lakṣyate jīvato yathā || 42 ||
eṣa tvāṃ rāmarūpeṇa kālaḥ karṣati vānara |
yena sma vidhavāssarvāḥ kṛtā ekeṣuṇā vane || 43 ||
imāstāstava rājendra vānaryovallabhāssadā |
pādairvikṛṣṭa madhvānamāgatāḥ kiṃ na budhyase || 44 ||
taveṣṭā nanu nāmaitā bhāryāścandranibhānanāḥ |
idānīṃ nekṣase kastātsugrīvaṃ plavageśvaram || 45 ||
ete hi sacivā rājaṃ stāraprabhṛtayastava |
puravāsī janaścāyaṃ parivāryāsate'nagha || 46 ||
visarjayaitān plavagānyathocitamarindama |
tataḥ krīḍāmahe sarvā vaneṣu madanotkaṭāḥ || 47 ||
evaṃ vilapatīṃ tārāṃ patiśokapariplutām |
utthāpayanti sma tadā vānaryaśśokakarśitāḥ || 48 ||
sugrīveṇa tatassārdhammaṅgadaḥ pitaraṃ rudan |
citāmāropayāmāsa śokenābhihatendriyaḥ || 49 ||
tato'gniṃ vidhivaddattvā so'pasavyaṃ cakāra ha |
pitaraṃ dīrghamadhvānaṃ prasthitaṃ vyākulendriyaḥ || 50 ||
saṃskṛtya vālinaṃ te tu vidhipūrvaṃ plavaṅgamāḥ |
ājagmurudakaṃ kartuṃ nadīṃ śubhajalāṃ śivām || 51 ||
tataste sahitāstatra hyaṅgadaṃ sthāpya cāgrataḥ |
sugrīvatārāsahitāssiṣicurvāline jalam || 52 ||
sugrīveṇeva dīnena dīno bhūtvā mahābalaḥ |
samānaśokaḥ kākutsthaḥ pretakāryāṇyakārayat || 53 ||
tatastu taṃ vālinamagryapauruṣaṃ prakāśamikṣvākuvareṣuṇā hatam |
pradīpya dīptāgnisamaujasaṃ tadā salakṣmaṇaṃ rāmamupeyivānhariḥ || 54 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe pañcaviṃśassargaḥ ||
InfoLyter.in — Sacred Vedic Knowledge Portal · Free forever