3.6 Aranyakanda - Shashtha Sargah

ॐ

3.6 অরণ্যকাণ্ড - ষষ্ঠ সর্গঃ

Valmiki Bengali

শ্রীমদ্বাল্মীকীয রামাযণে অরণ্যকাণ্ডম্ ।

অথ ষষ্ঠস্সর্গঃ ।

শরভঙ্গে দিবং প্রাপ্তে মুনিসঙ্ঘাস্সমাগতাঃ ।

অভ্যগচ্ছন্ত কাকুত্স্থং রামং জ্বলিততেজসম্ ॥ 1 ॥

বৈখানসা বালখিল্যাস্সম্প্রক্ষালা মরীচিপাঃ ।

অশ্মকুট্টাশ্চ বহবঃ পত্রাহারাশ্চ তাপসাঃ ॥ 2 ॥

দন্তোলূখলিনশ্চৈব তথৈবোন্মজ্জকাঃ পরে ।

গাত্রশয্যা অশয্যাশ্চ তথৈবাভ্রাবকাশকাঃ ॥ 3 ॥

মুনযস্সলিলাহারাবাযুভক্ষা স্তথাপরে ।

আকাশনিলযাশ্চৈব তথা স্থণ্ডিলশাযিনঃ ॥ 4 ॥

ব্রতোপবাসিনো দান্তাস্তথাঽর্দ্রপটবাসসঃ ।

সজপাশ্চ তপোনিত্যাস্তথা পঞ্চতপোঽন্বিতাঃ ॥ 5 ॥

সর্বে ব্রাহ্ম্যা শ্রিযা জুষ্টা দৃঢযোগাস্সমাহিতাঃ ।

শরভঙ্গাশ্রমে রামমভিজগ্মুশ্চ তাপসাঃ ॥ 6 ॥

অভিগম্য চ ধর্মজ্ঞা রামং ধর্মভৃতাং বরম্ ।

ঊচুঃ পরমধর্মজ্ঞমৃষিসঙ্ঘাস্সমাহিতাঃ ॥ 7 ॥

ত্বমিক্ষ্বাকুকুলস্যাস্য পৃথিব্যাশ্চ মহারথ ।

প্রধানশ্চাসি নাথশ্চ দেবানাং মঘবানিব ॥ 8 ॥

বিশ্রুতস্ত্রিষু লোকেষু যশসা বিক্রমেণ চ ।

পিতৃভক্তিশ্চ সত্যং চ ত্বযি ধর্মশ্চ পুষ্কলঃ ॥ 9 ॥

ত্বামাসাদ্য মহাত্মানং ধর্মজ্ঞং ধর্মবত্সলম্ ।

অর্থিত্বান্নাথ বক্ষ্যামস্তচ্চ নঃ ক্ষন্তুমর্হসি ॥ 10 ॥

অধর্মস্সুমহাংস্তাত ভবেত্তস্য মহীপতেঃ ।

যো হরেদ্বলিষড্ভাগাং ন চ রক্ষতি পুত্রবত্ ॥ 11 ॥

যুঞ্জানস্স্বানিব প্রাণান্প্রাণৈরিষ্টান্সুতানিব ।

নিত্যযুক্তস্সদা রক্ষন্সর্বান্বিষযবাসিনঃ ॥ 12 ॥

প্রাপ্নোতি শাশ্বতীং রাম কীর্তিং স বহুবার্ষিকীম্ ।

ব্রহ্মণস্স্থানমাসাদ্য তত্র চাপি মহীযতে ॥ 13 ॥

যত্করোতি পরং ধর্ম মুনির্মূলফলাশনঃ ।

তত্র রাজ্ঞশ্চতুর্ভাগ প্রজা ধর্মেণ রক্ষিতঃ ॥ 14 ॥

সোঽযং ব্রাহ্মণভূযিষ্ঠো বানপ্রস্থগণো মহান্ ।

ত্বন্নাথোঽনাথবদ্রাম রাক্ষসৈর্বধ্যতে ভৃশম্ ॥ 15 ॥

এহি পশ্য শরীরাণি মুনীনাং ভাবিতাত্মনাম্ ।

হতানাং রাক্ষসৈর্ঘোরৈর্বহূনাং বহুধা বনে ॥ 16 ॥

পম্পানদীনিবাসানামনুমন্দাকিনীমপি ।

চিত্রকূটালযানাং চ ক্রিযতে কদনং মহত্ ॥ 17 ॥

এবং বযং ন মৃষ্যামো বিপ্রকারং তপস্বিনাম্ ।

ক্রিযমাণং বনে ঘোরং রক্ষোভির্ভীমকর্মভিঃ ॥ 18 ॥

ততস্ত্বাং শরণার্থং চ শরণ্যং সমুপস্থিতাঃ ।

পরিপালয নো রাম বধ্যমানান্নিশাচরৈঃ ॥ 19 ॥

পরা ত্বত্তো গতির্বীর পৃথিব্যাং নোপপদ্যতে ।

পরিপালয ন স্সর্বান্রাক্ষসেভ্যো নৃপাত্মজ ॥ 20 ॥

এতচ্ছ্রুত্বা তু কাকুত্স্থস্তাপসানাং তপস্বিনাম্ ।

ইদং প্রোবাচ ধর্মাত্মা সর্বানেব তপস্বিনঃ ॥ 21 ॥

নৈবমর্হথ মাং বক্তুমাজ্ঞাপ্যোঽহং তপস্বিনাম্ ।

কেবলেনাত্মকার্যেণ প্রবেষ্টব্যং মযা বনম্ ॥ 22 ॥

বিপ্রকারমপাক্রষ্টুং রাক্ষসৈর্ভবতামিমম্ ।

পিতুস্তু নির্দেশকরঃ প্রবিষ্টোঽহমিদং বনম্ ॥ 23 ॥

ভবতামর্থসিদ্ধ্যর্থমাগতোঽহং যদৃচ্ছযা ।

তস্য মেঽযং বনে বাসো ভবিষ্যতি মহাফলঃ ॥ 24 ॥

তপস্বিনাং রণে শত্রূন্হন্তুমিচ্ছামি রাক্ষসান্ ।

পশ্যন্তু বীর্যমৃষযস্সভ্রাতুর্মে তপোধনাঃ ॥ 25 ॥

দত্ত্বাঽভযং চাপি তপোধনানাং ধর্মে ধৃতাত্মা সহ লক্ষ্মণেন ।

তপোধনৈশ্চাপি সভাজ্যবৃত্তঃ সুতীক্ষ্ণমেবাভিজগাম বীরঃ ॥ 26 ॥

ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে ষষ্ঠস্সর্গঃ ॥

Roman (IAST) Transliteration

śrīmadvālmīkīya rāmāyaṇe araṇyakāṇḍam |

atha ṣaṣṭhassargaḥ |

śarabhaṅge divaṃ prāpte munisaṅghāssamāgatāḥ |

abhyagacchanta kākutsthaṃ rāmaṃ jvalitatejasam || 1 ||

vaikhānasā vālakhilyāssamprakṣālā marīcipāḥ |

aśmakuṭṭāśca bahavaḥ patrāhārāśca tāpasāḥ || 2 ||

dantolūkhalinaścaiva tathaivonmajjakāḥ pare |

gātraśayyā aśayyāśca tathaivābhrāvakāśakāḥ || 3 ||

munayassalilāhārāvāyubhakṣā stathāpare |

ākāśanilayāścaiva tathā sthaṇḍilaśāyinaḥ || 4 ||

vratopavāsino dāntāstathā'rdrapaṭavāsasaḥ |

sajapāśca taponityāstathā pañcatapo'nvitāḥ || 5 ||

sarve brāhmyā śriyā juṣṭā dṛḍhayogāssamāhitāḥ |

śarabhaṅgāśrame rāmamabhijagmuśca tāpasāḥ || 6 ||

abhigamya ca dharmajñā rāmaṃ dharmabhṛtāṃ varam |

ūcuḥ paramadharmajñamṛṣisaṅghāssamāhitāḥ || 7 ||

tvamikṣvākukulasyāsya pṛthivyāśca mahāratha |

pradhānaścāsi nāthaśca devānāṃ maghavāniva || 8 ||

viśrutastriṣu lokeṣu yaśasā vikrameṇa ca |

pitṛbhaktiśca satyaṃ ca tvayi dharmaśca puṣkalaḥ || 9 ||

tvāmāsādya mahātmānaṃ dharmajñaṃ dharmavatsalam |

arthitvānnātha vakṣyāmastacca naḥ kṣantumarhasi || 10 ||

adharmassumahāṃstāta bhavettasya mahīpateḥ |

yo haredbaliṣaḍbhāgāṃ na ca rakṣati putravat || 11 ||

yuñjānassvāniva prāṇānprāṇairiṣṭānsutāniva |

nityayuktassadā rakṣansarvānviṣayavāsinaḥ || 12 ||

prāpnoti śāśvatīṃ rāma kīrtiṃ sa bahuvārṣikīm |

brahmaṇassthānamāsādya tatra cāpi mahīyate || 13 ||

yatkaroti paraṃ dharma munirmūlaphalāśanaḥ |

tatra rājñaścaturbhāga prajā dharmeṇa rakṣitaḥ || 14 ||

so'yaṃ brāhmaṇabhūyiṣṭho vānaprasthagaṇo mahān |

tvannātho'nāthavadrāma rākṣasairvadhyate bhṛśam || 15 ||

ehi paśya śarīrāṇi munīnāṃ bhāvitātmanām |

hatānāṃ rākṣasairghorairbahūnāṃ bahudhā vane || 16 ||

pampānadīnivāsānāmanumandākinīmapi |

citrakūṭālayānāṃ ca kriyate kadanaṃ mahat || 17 ||

evaṃ vayaṃ na mṛṣyāmo viprakāraṃ tapasvinām |

kriyamāṇaṃ vane ghoraṃ rakṣobhirbhīmakarmabhiḥ || 18 ||

tatastvāṃ śaraṇārthaṃ ca śaraṇyaṃ samupasthitāḥ |

paripālaya no rāma vadhyamānānniśācaraiḥ || 19 ||

parā tvatto gatirvīra pṛthivyāṃ nopapadyate |

paripālaya na ssarvānrākṣasebhyo nṛpātmaja || 20 ||

etacchrutvā tu kākutsthastāpasānāṃ tapasvinām |

idaṃ provāca dharmātmā sarvāneva tapasvinaḥ || 21 ||

naivamarhatha māṃ vaktumājñāpyo'haṃ tapasvinām |

kevalenātmakāryeṇa praveṣṭavyaṃ mayā vanam || 22 ||

viprakāramapākraṣṭuṃ rākṣasairbhavatāmimam |

pitustu nirdeśakaraḥ praviṣṭo'hamidaṃ vanam || 23 ||

bhavatāmarthasiddhyarthamāgato'haṃ yadṛcchayā |

tasya me'yaṃ vane vāso bhaviṣyati mahāphalaḥ || 24 ||

tapasvināṃ raṇe śatrūnhantumicchāmi rākṣasān |

paśyantu vīryamṛṣayassabhrāturme tapodhanāḥ || 25 ||

dattvā'bhayaṃ cāpi tapodhanānāṃ dharme dhṛtātmā saha lakṣmaṇena |

tapodhanaiścāpi sabhājyavṛttaḥ sutīkṣṇamevābhijagāma vīraḥ || 26 ||

ityārṣe śrīmadrāmāyaṇe vālmīkīya ādikāvye araṇyakāṇḍe ṣaṣṭhassargaḥ ||