📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.24 অরণ্যকাণ্ড - চতুর্বিংশ সর্গঃ
3.24 Aranyakanda - Chaturvimsha Sargah
Valmiki Bengali
শ্রীমদ্বাল্মীকীয রামাযণে অরণ্যকাণ্ডম্ ।
অথ চতুর্বিংশস্সর্গঃ ।
আশ্রমং প্রতি যাতে তু খরে খরপরাক্রমে ।
তানেবৌত্পাতিকান্রামস্সহ ভ্রাত্রা দদর্শ হ ॥ 1 ॥
তানুত্পাতান্মহোঘোরানুত্থিতান্রোমহর্ষণান্ ।
প্রজানামহিতান্দৃষ্ট্বা রামো লক্ষ্মণমব্রবীত্ ॥ 2 ॥
ইমান্পশ্য মহাবাহো সর্বভূতাপহারিণঃ ।
সমুত্থিতান্মহোত্পাতান্সংহর্তুং সর্বরাক্ষসান্ ॥ 3 ॥
অমী রুধিরধারাস্তু বিসৃজন্তঃ খরস্বনাঃ ।
ব্যোম্নি মেঘা বিবর্তন্তে পরুষা গর্দভারুণাঃ ॥ 4 ॥
সধূমাশ্চ শরাস্সর্বে মম যুদ্ধাভিনন্দিনঃ ।
রুক্মপৃষ্ঠানি চাপানি বিচেষ্টন্তে চ লক্ষ্মণ ॥ 5 ॥
যাদৃশা ইহ কূজন্তি পক্ষিণঃ বনচারিণঃ ।
অগ্রতো নো ভযং প্রাপ্তং সংশযো জীবিতস্য চ ॥ 6 ॥
সম্প্রহারস্তু সুমহান্ভবিষ্যতি ন সংশযঃ ।
অযমাখ্যাতি মে বাহুস্স্ফুরমাণো মুহুর্মুহুঃ ॥ 7 ॥
সন্নিকর্ষে তু ন শ্শূর জযং শত্রোঃ পরাজযম্ ।
সপ্রভং চ প্রসন্নং চ তব বক্ত্রং হি লক্ষ্যতে ॥ 8 ॥
উদ্যতানাং হি যুদ্ধার্থং যেষাং ভবতি লক্ষ্মণ ।
নিষ্প্রভং বদনং তেষাং ভবত্যাযুঃ পরিক্ষযঃ ॥ 9 ॥
রক্ষসাং নর্দতাং ঘোরশ্শ্রূযতে চ মহাধ্বনিঃ ।
আহতানাং চ ভেরীণাং রাক্ষসৈঃ ক্রূরকর্মভিঃ ॥ 10 ॥
অনাগতবিধানং তু কর্তব্যং শুভমিচ্ছতা ।
আপদং শঙ্কমানেন পুরুষেণ বিপশ্চিতা ॥ 11 ॥
তস্মাদ্গৃহীত্বা বৈদেহীং শরপাণির্ধনুর্ধরঃ ।
গুহামাশ্রয শৈলস্য দুর্গাং পাদপসঙ্কুলাম্ ॥ 12 ॥
প্রতিকূলিতুমিচ্ছামি ন হি বাক্যমিদং ত্বযা ।
শাপিতো মম পাদাভ্যাং গম্যতাং বত্স মা চিরম্ ॥ 13 ॥
ত্বং হি শূরশ্চ বলবান্হন্যাহ্যেতান্ন সংশযঃ ।
স্বযং তু হন্তুমিচ্ছামি সর্বানেব নিশাচরান্ ॥ 14 ॥
এবমুক্তস্তু রামেণ লক্ষ্মণস্সহ সীতাযা ।
শরানাদায চাপং চ গুহাং দুর্গাং সমাশ্রযত্ ॥ 15 ॥
তস্মিন্প্রবিষ্টে তু গুহাং লক্ষ্মণে সহ সীতযা ।
হন্ত নির্যুক্তমিত্যুক্ত্বা রামঃ কবচমাবিশত্ ॥ 16 ॥
স তেনাগ্নি নিকাশেন কবচেন বিভূষিতঃ ।
বভূব রাম স্তিমিরে বিধূমোঽগ্নিরিবোত্থিতঃ ॥ 17 ॥
স চাপমুদ্যম্য মহচ্ছরানাদায বীর্যবান্ ।
বভূবাবস্থিতস্তত্র জ্যাস্বনৈঃ পূরযন্দিশঃ ॥ 18 ॥
ততো দেবাস্সগন্ধর্বাস্সিদ্ধাশ্চ সহ চারণৈঃ ।
সমেযুশ্চ মহাত্মানো যুদ্ধদর্শনকাঙ্ক্ষিণঃ ॥ 19 ॥
ঋষযশ্চ মহাত্মানো লোকে ব্রহ্মর্ষিসত্তমাঃ ।
সমেত্য চোচুস্সহিতা অন্যোন্যং পুণ্যকর্মণঃ ॥ 20 ॥
স্বস্তি গোব্রাহ্মণেভ্যোঽস্তু লোকানাং যেঽভিসঙ্গতাঃ ।
জযতাং রাঘবো যুদ্ধে পৌলস্ত্যান্ রজনীচরান্ ॥ 21 ॥
চক্রহস্তো যথা যুদ্ধে সর্বানসুর পুঙ্গবান্ ।
এবমুক্ত্বা পুনঃ প্রোচুরালোক্য চ পরস্পরম্ ॥ 22 ॥
চতুর্দশ সহস্রাণি রক্ষসাং ভীমকর্মণাম্ ।
একশ্চ রামো ধর্মাত্মা কথং যুদ্ধং ভবিষ্যতি ॥ 23 ॥
ইতি রাজর্ষযস্সিদ্ধাস্সগণাশ্চ দ্বিজর্ষভাঃ ।
জাতকৌতূহলাস্তস্থুর্বিমানস্থাশ্চ দেবতাঃ ॥ 24 ॥
আবিষ্টং তেজসা রামং সঙ্গ্রামশিরসি স্থিতম্ ।
দৃষ্ট্বা সর্বাণি ভূতানি ভযাদ্বিব্যথিরে তদা ॥ 25 ॥
রূপমপ্রতিমং তস্য রামস্যাক্লিষ্টকর্মণঃ ।
বভূব রূপং ক্রুদ্ধস্য রুদ্রস্যেব পিনাকিনঃ ॥ 26 ॥
ততো গম্ভীরনির্হ্রাদং ঘোরবর্মাযুধধ্বজম্ ।
অনীকং যাতুধানানাং সমন্তাত্প্রত্যদৃশ্যত ॥ 27 ॥
সিংহনাদং বিসৃজতামন্যোন্যমভিগর্জতাম্ ।
চাপানি বিস্ফারযতাং জৃম্ভতামপ্যভীক্ষ্ণশঃ ॥ 28 ॥
বিপ্রঘুষ্টস্বনানাং চ দুন্ধুভীংশ্চাপি নিঘ্নতাম্ ।
তেষাং সুতুমুলশ্শব্দঃ পূরযামাস তদ্বনম্ ॥ 29 ॥
তেন শব্দেন বিত্রস্তাশ্বাপদা বনচারিণঃ ।
দুদ্রুবুর্যত্র নিশ্শব্দং পৃষ্ঠতো ন ব্যলোকযন্ ॥ 30 ॥
তত্ত্বনীকং মহাঘোরং রামং সমুপসর্পত ।
ধৃতনানাপ্রহরণং গম্ভীরং সাগরোপমম্ ॥ 31 ॥
রামোঽপি চারযংশ্চক্ষুস্সর্বতো রণপণ্ডিতঃ ।
দদর্শ খরসৈন্যং তদ্যুদ্ধাভিমুখমুত্থিতম্ ॥ 32 ॥
বিতত্য চ ধনুর্ভীমং তূণ্যাশ্চোদ্ধৃত্য সাযকান্ ।
ক্রোধমাহারযত্তীব্রং বধার্থং সর্বরক্ষসাম্ ॥ 33 ॥
দুষ্প্রেক্ষ্যস্সোঽভবত্কৃদ্ধো যুগান্তাগ্নিরিব জ্বলন্ ।
তং দৃষ্ট্বা তেজসাবিষ্টং প্রাদ্রবন্বনদেবতাঃ ॥ 34 ॥
তস্য ক্রুদ্ধস্য রূপং তু রামস্য দদৃশে তদা ।
দক্ষস্যেব ক্রতুং হন্তুমুদ্যতস্য পিনাকিনঃ ॥ 35 ॥
আবিষ্টং তেজসা রামং সঙ্গ্রামশিরসি স্থিতম্ ।
দৃষ্ট্বা সর্বাণি ভূতানি ভযার্তানি প্রদুদ্রুবুঃ ॥ 36 ॥
তত্কার্মুকৈরাভরণৈর্ধ্বজৈশ্চ তৈর্বর্মভিশ্চাগ্নিসমানবর্ণৈঃ ।
বভূব সৈন্যং পিশিতাশনানাং সূর্যোদযে নীলমিবাভ্রবৃন্দম্ ॥ 37 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে চতুর্বিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha caturviṃśassargaḥ |
āśramaṃ prati yāte tu khare kharaparākrame |
tānevautpātikānrāmassaha bhrātrā dadarśa ha || 1 ||
tānutpātānmahoghorānutthitānromaharṣaṇān |
prajānāmahitāndṛṣṭvā rāmo lakṣmaṇamabravīt || 2 ||
imānpaśya mahābāho sarvabhūtāpahāriṇaḥ |
samutthitānmahotpātānsaṃhartuṃ sarvarākṣasān || 3 ||
amī rudhiradhārāstu visṛjantaḥ kharasvanāḥ |
vyomni meghā vivartante paruṣā gardabhāruṇāḥ || 4 ||
sadhūmāśca śarāssarve mama yuddhābhinandinaḥ |
rukmapṛṣṭhāni cāpāni viceṣṭante ca lakṣmaṇa || 5 ||
yādṛśā iha kūjanti pakṣiṇaḥ vanacāriṇaḥ |
agrato no bhayaṃ prāptaṃ saṃśayo jīvitasya ca || 6 ||
samprahārastu sumahānbhaviṣyati na saṃśayaḥ |
ayamākhyāti me bāhussphuramāṇo muhurmuhuḥ || 7 ||
sannikarṣe tu na śśūra jayaṃ śatroḥ parājayam |
saprabhaṃ ca prasannaṃ ca tava vaktraṃ hi lakṣyate || 8 ||
udyatānāṃ hi yuddhārthaṃ yeṣāṃ bhavati lakṣmaṇa |
niṣprabhaṃ vadanaṃ teṣāṃ bhavatyāyuḥ parikṣayaḥ || 9 ||
rakṣasāṃ nardatāṃ ghoraśśrūyate ca mahādhvaniḥ |
āhatānāṃ ca bherīṇāṃ rākṣasaiḥ krūrakarmabhiḥ || 10 ||
anāgatavidhānaṃ tu kartavyaṃ śubhamicchatā |
āpadaṃ śaṅkamānena puruṣeṇa vipaścitā || 11 ||
tasmādgṛhītvā vaidehīṃ śarapāṇirdhanurdharaḥ |
guhāmāśraya śailasya durgāṃ pādapasaṅkulām || 12 ||
pratikūlitumicchāmi na hi vākyamidaṃ tvayā |
śāpito mama pādābhyāṃ gamyatāṃ vatsa mā ciram || 13 ||
tvaṃ hi śūraśca balavānhanyāhyetānna saṃśayaḥ |
svayaṃ tu hantumicchāmi sarvāneva niśācarān || 14 ||
evamuktastu rāmeṇa lakṣmaṇassaha sītāyā |
śarānādāya cāpaṃ ca guhāṃ durgāṃ samāśrayat || 15 ||
tasminpraviṣṭe tu guhāṃ lakṣmaṇe saha sītayā |
hanta niryuktamityuktvā rāmaḥ kavacamāviśat || 16 ||
sa tenāgni nikāśena kavacena vibhūṣitaḥ |
babhūva rāma stimire vidhūmo'gnirivotthitaḥ || 17 ||
sa cāpamudyamya mahaccharānādāya vīryavān |
babhūvāvasthitastatra jyāsvanaiḥ pūrayandiśaḥ || 18 ||
tato devāssagandharvāssiddhāśca saha cāraṇaiḥ |
sameyuśca mahātmāno yuddhadarśanakāṅkṣiṇaḥ || 19 ||
ṛṣayaśca mahātmāno loke brahmarṣisattamāḥ |
sametya cocussahitā anyonyaṃ puṇyakarmaṇaḥ || 20 ||
svasti gobrāhmaṇebhyo'stu lokānāṃ ye'bhisaṅgatāḥ |
jayatāṃ rāghavo yuddhe paulastyān rajanīcarān || 21 ||
cakrahasto yathā yuddhe sarvānasura puṅgavān |
evamuktvā punaḥ procurālokya ca parasparam || 22 ||
caturdaśa sahasrāṇi rakṣasāṃ bhīmakarmaṇām |
ekaśca rāmo dharmātmā kathaṃ yuddhaṃ bhaviṣyati || 23 ||
iti rājarṣayassiddhāssagaṇāśca dvijarṣabhāḥ |
jātakautūhalāstasthurvimānasthāśca devatāḥ || 24 ||
āviṣṭaṃ tejasā rāmaṃ saṅgrāmaśirasi sthitam |
dṛṣṭvā sarvāṇi bhūtāni bhayādvivyathire tadā || 25 ||
rūpamapratimaṃ tasya rāmasyākliṣṭakarmaṇaḥ |
babhūva rūpaṃ kruddhasya rudrasyeva pinākinaḥ || 26 ||
tato gambhīranirhrādaṃ ghoravarmāyudhadhvajam |
anīkaṃ yātudhānānāṃ samantātpratyadṛśyata || 27 ||
siṃhanādaṃ visṛjatāmanyonyamabhigarjatām |
cāpāni visphārayatāṃ jṛmbhatāmapyabhīkṣṇaśaḥ || 28 ||
vipraghuṣṭasvanānāṃ ca dundhubhīṃścāpi nighnatām |
teṣāṃ sutumulaśśabdaḥ pūrayāmāsa tadvanam || 29 ||
tena śabdena vitrastāśvāpadā vanacāriṇaḥ |
dudruvuryatra niśśabdaṃ pṛṣṭhato na vyalokayan || 30 ||
tattvanīkaṃ mahāghoraṃ rāmaṃ samupasarpata |
dhṛtanānāpraharaṇaṃ gambhīraṃ sāgaropamam || 31 ||
rāmo'pi cārayaṃścakṣussarvato raṇapaṇḍitaḥ |
dadarśa kharasainyaṃ tadyuddhābhimukhamutthitam || 32 ||
vitatya ca dhanurbhīmaṃ tūṇyāścoddhṛtya sāyakān |
krodhamāhārayattīvraṃ vadhārthaṃ sarvarakṣasām || 33 ||
duṣprekṣyasso'bhavatkṛddho yugāntāgniriva jvalan |
taṃ dṛṣṭvā tejasāviṣṭaṃ prādravanvanadevatāḥ || 34 ||
tasya kruddhasya rūpaṃ tu rāmasya dadṛśe tadā |
dakṣasyeva kratuṃ hantumudyatasya pinākinaḥ || 35 ||
āviṣṭaṃ tejasā rāmaṃ saṅgrāmaśirasi sthitam |
dṛṣṭvā sarvāṇi bhūtāni bhayārtāni pradudruvuḥ || 36 ||
tatkārmukairābharaṇairdhvajaiśca tairvarmabhiścāgnisamānavarṇaiḥ |
babhūva sainyaṃ piśitāśanānāṃ sūryodaye nīlamivābhrabṛndam || 37 ||
ityārṣe śrīmadrāmāyaṇe vālmīkīya ādikāvye araṇyakāṇḍe caturviṃśassargaḥ ||
InfoLyter.in — Sacred Vedic Knowledge Portal · Free forever