📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.21 অরণ্যকাণ্ড - একবিংশ সর্গঃ
3.21 Aranyakanda - Ekavimsha Sargah
Valmiki Bengali
শ্রীমদ্বাল্মীকীয রামাযণে অরণ্যকাণ্ডম্ ।
অথ একবিংশস্সর্গঃ ।
স পুনঃ পতিতাং দৃষ্ট্বা ক্রোধাচ্ছূর্পণখাং খরঃ ।
উবাচ ব্যক্তযা বাচা তামনর্থার্থমাগতাম্ ॥ 1 ॥
মযা ত্বিদানীং শূরাস্তে রাক্ষসা রুধিরাশনাঃ ।
ত্বত্প্রিযার্থং বিনির্দিষ্টাঃ কিমর্থং রুদ্যতে পুনঃ ॥ 2 ॥
ভক্তাশ্চৈবানুরক্তাশ্চ হিতাশ্চ মম নিত্যশঃ ।
হন্যমানা ন হন্যন্তে ন ন কুর্যুর্বচো মম ॥ 3 ॥
কিমেতচ্ছ্রোতুমিচ্ছামি কারণং যত্কৃতে পুনঃ ।
হা নাথেতি বিনর্দন্তী সর্পবল্লুঠসি ক্ষিতৌ ॥ 4 ॥
অনাথবদ্বিলপসি নাথে তু মযি সংস্থিতে ।
উত্তিষ্ঠোত্তিষ্ঠ মাভৈষীর্বৈক্লব্যং ত্যজ্যতামিহ ॥ 5 ॥
ইত্যেবমুক্তা দুর্ধর্ষা খরেণ পরিসান্ত্বিতা ।
বিমৃজ্য নযনে সাস্রে খরং ভ্রাতরমব্রবীত্ ॥ 6 ॥
অস্মীদানীমহং প্রাপ্তা হৃতশ্রবণনাসিকা ।
শোণিতৌঘপরিক্লিন্না ত্বযা চ পরিসান্ত্বিতা ॥ 7 ॥
প্রেষিতাশ্চ ত্বযা বীর রাক্ষসাস্তে চতুর্দশ ।
নিহন্তুং রাঘবং ক্রোধান্মত্প্রিযার্থং সলক্ষণম্ ॥ 8 ॥
তে তু রামেণ সামর্ষাঃ শূলপট্টসপাণযঃ ।
সমরে নিহতাস্সর্বে সাযকৈর্মর্মভেদিভিঃ ॥ 9 ॥
তান্দৃষ্ট্বা পতিতান্ভূমৌ ক্ষণেনৈব মহাবলান্ ।
রামস্য চ মহত্কর্ম মহাংস্ত্রাসোঽভবন্মম ॥ 10 ॥
অহমস্মি সমুদ্বিগ্না বিষণ্ণা চ নিশাচর ।
শরণং ত্বাং পুনঃ প্রাপ্তা সর্বতোভযদর্শিনী ॥ 11 ॥
বিষাদনক্রাধ্যুষিতে পরিত্রাসোর্মিমালিনি ।
কিং মাং ন ত্রাযসে মগ্নাং বিপুলে শোকসাগরে ॥ 12 ॥
এতে চ নিহতা ভূমৌ রামেণ নিশিতৈঃ শরৈঃ ।
যেঽপি মে পদবীং প্রাপ্তা রাক্ষসাঃ পিশিতাশনাঃ ॥ 13 ॥
মযি তে যদ্যনুক্রোশো যদি রক্ষস্সু তেষু চ ।
রামেণ যদি তে শক্তিস্তেজো বাস্তি নিশাচর ॥ 14 ॥
দণ্ডকারণ্যনিলযং জহি রাক্ষসকণ্টকম্ ।
যদি রামং মমামিত্রং ন ত্বমদ্যবধিষ্যসি ॥ 15 ॥
তবৈব চাগ্রতঃ প্রাণাংস্ত্যক্ষামি নিরপত্রপ ।
বুদ্ধ্যাহমনুপশ্যামি ন ত্বং রামস্য সংযুগে ॥ 16 ॥
স্থাতুং প্রতিমুখে শক্তস্সবলশ্চ মহাত্মনঃ ।
শূরমানী ন শূরস্ত্বং মিথ্যারোপিতবিক্রমঃ ॥ 17 ॥
মানুষৌ যো ন শক্নোষি হন্তুং তৌ রামলক্ষ্মণৌ ।
রামেণ যদি তে শক্তিস্তেজো বাস্তি নিশাচর ॥ 18 ॥
দণ্ডকারণ্যনিলযং জহি তং কুলপাংসন ।
নিস্সত্বস্যাল্প বীর্যস্য বাসস্তে কীদৃশস্ত্বিহ ॥ 19 ॥
অপযাহি জনস্থানাতত্বরিতস্সহবান্ধবঃ ।
রামতেজোভিভূতো হি ত্বং ক্ষিপ্রং বিনশিষ্যসি ॥ 20 ॥
স হি তেজস্সমাযুক্তো রামো দশরথাত্মজঃ ।
ভ্রাতা চাস্য মহাবীর্যো যেন চাস্মি বিরূপিতা ॥ 21 ॥
এবং বিলপ্য বহুশো রাক্ষসী বিততোদরী ।
করাভ্যামুদরং হত্বা রুরোদ ভৃশদুঃখিতা ॥ 22 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাণ্ডে একবিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha ekaviṃśassargaḥ |
sa punaḥ patitāṃ dṛṣṭvā krodhācchūrpaṇakhāṃ kharaḥ |
uvāca vyaktayā vācā tāmanarthārthamāgatām || 1 ||
mayā tvidānīṃ śūrāste rākṣasā rudhirāśanāḥ |
tvatpriyārthaṃ vinirdiṣṭāḥ kimarthaṃ rudyate punaḥ || 2 ||
bhaktāścaivānuraktāśca hitāśca mama nityaśaḥ |
hanyamānā na hanyante na na kuryurvaco mama || 3 ||
kimetacchrotumicchāmi kāraṇaṃ yatkṛte punaḥ |
hā nātheti vinardantī sarpavalluṭhasi kṣitau || 4 ||
anāthavadvilapasi nāthe tu mayi saṃsthite |
uttiṣṭhottiṣṭha mābhaiṣīrvaiklavyaṃ tyajyatāmiha || 5 ||
ityevamuktā durdharṣā khareṇa parisāntvitā |
vimṛjya nayane sāsre kharaṃ bhrātaramabravīt || 6 ||
asmīdānīmahaṃ prāptā hṛtaśravaṇanāsikā |
śoṇitaughapariklinnā tvayā ca parisāntvitā || 7 ||
preṣitāśca tvayā vīra rākṣasāste caturdaśa |
nihantuṃ rāghavaṃ krodhānmatpriyārthaṃ salakṣaṇam || 8 ||
te tu rāmeṇa sāmarṣāḥ śūlapaṭṭasapāṇayaḥ |
samare nihatāssarve sāyakairmarmabhedibhiḥ || 9 ||
tāndṛṣṭvā patitānbhūmau kṣaṇenaiva mahābalān |
rāmasya ca mahatkarma mahāṃstrāso'bhavanmama || 10 ||
ahamasmi samudvignā viṣaṇṇā ca niśācara |
śaraṇaṃ tvāṃ punaḥ prāptā sarvatobhayadarśinī || 11 ||
viṣādanakrādhyuṣite paritrāsormimālini |
kiṃ māṃ na trāyase magnāṃ vipule śokasāgare || 12 ||
ete ca nihatā bhūmau rāmeṇa niśitaiḥ śaraiḥ |
ye'pi me padavīṃ prāptā rākṣasāḥ piśitāśanāḥ || 13 ||
mayi te yadyanukrośo yadi rakṣassu teṣu ca |
rāmeṇa yadi te śaktistejo vāsti niśācara || 14 ||
daṇḍakāraṇyanilayaṃ jahi rākṣasakaṇṭakam |
yadi rāmaṃ mamāmitraṃ na tvamadyavadhiṣyasi || 15 ||
tavaiva cāgrataḥ prāṇāṃstyakṣāmi nirapatrapa |
buddhyāhamanupaśyāmi na tvaṃ rāmasya saṃyuge || 16 ||
sthātuṃ pratimukhe śaktassabalaśca mahātmanaḥ |
śūramānī na śūrastvaṃ mithyāropitavikramaḥ || 17 ||
mānuṣau yo na śaknoṣi hantuṃ tau rāmalakṣmaṇau |
rāmeṇa yadi te śaktistejo vāsti niśācara || 18 ||
daṇḍakāraṇyanilayaṃ jahi taṃ kulapāṃsana |
nissatvasyālpa vīryasya vāsaste kīdṛśastviha || 19 ||
apayāhi janasthānātatvaritassahabāndhavaḥ |
rāmatejobhibhūto hi tvaṃ kṣipraṃ vinaśiṣyasi || 20 ||
sa hi tejassamāyukto rāmo daśarathātmajaḥ |
bhrātā cāsya mahāvīryo yena cāsmi virūpitā || 21 ||
evaṃ vilapya bahuśo rākṣasī vitatodarī |
karābhyāmudaraṃ hatvā ruroda bhṛśaduḥkhitā || 22 ||
ityārṣe śrīmadrāmāyaṇe vālmīkīya ādikāvye araṇyakāṇḍe ekaviṃśassargaḥ ||
InfoLyter.in — Sacred Vedic Knowledge Portal · Free forever