📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.79 অযোধ্যাকাণ্ড - একোনাশীতিতম সর্গঃ
2.79 Ayodhyakanda - Ekonashititama Sargah
Valmiki Bengali
শ্রীমদ্বাল্মীকীয রামাযণে অযোধ্যাকাণ্ডম্ ।
অথ একোনাশীতিতমস্সর্গঃ ।
ততঃ প্রভাতসমযে দিবসেঽথ চতুর্দশে ।
সমেত্য রাজকর্তারো ভরতং বাক্যমব্রুবন্ ॥ 1 ॥
গতো দশরথস্স্বর্গং যো নো গুরুতরো গুরুঃ ।
রামং প্রব্রাজ্য বৈ জ্যেষ্ঠং লক্ষ্মণং চ মহাবলম্ ॥ 2 ॥
ত্বমদ্য ভব নো রাজা রাজপুত্র মহাযশঃ ।
সঙ্গত্যা নাপরাধ্নোতি রাজ্যমেতদনাযকম্ ॥ 3 ॥
অভিষেচনিকং সর্বমিদমাদায রাঘব ।
প্রতীক্ষতে ত্বাং স্বজনশ্শ্রেণযশ্চ নৃপাত্মজ ॥ 4 ॥
রাজ্যং গৃহাণ ভরত পিতৃপৈতামহং ধ্রুবম্ ।
অভিষেচয চাত্মানং পাহি চাস্মান্নরর্ষভ ॥ 5 ॥
অভিষেচনিকং ভাণ্ডং কৃত্বা সর্বং প্রদক্ষিণম্ ।
ভরতস্তং জনং সর্বং প্রত্যুবাচ ধৃতব্রতঃ ॥ 6 ॥
জ্যেষ্ঠস্য রাজতা নিত্যমুচিতা হি কুলস্য নঃ ।
নৈবং ভবন্তো মাং বক্তুমর্হন্তি কুশলা জনাঃ ॥ 7 ॥
রামঃ পূর্বো হি নো ভ্রাতা ভবিষ্যতি মহীপতিঃ ।
অহং ত্বরণ্যে বত্স্যামি বর্ষাণি নব পঞ্চ চ ॥ 8 ॥
যুজ্যতাং মহতী সেনা চতুরঙ্গমহাবলা ।
আনযিষ্যাম্যহং জ্যেষ্ঠং ভ্রাতরং রাঘবং বনাত্ ॥ 9 ॥
অভিষেচনিকং চৈব সর্বমেতদুপস্কৃতম্ ।
পুরস্কৃত্য গমিষ্যামি রামহেতোর্বনং প্রতি ॥ 10 ॥
তত্রৈবং তং নরব্যাঘ্রমভিষিচ্য পুরস্কৃতম্ ।
আনেষ্যামি তু বৈ রামং হব্যবাহমিবাধ্বরাত্ ॥ 11 ॥
ন সকামাং করিষ্যামি স্বামিমাং মাতৃগন্ধিনীম্ ।
বনে বত্স্যাম্যহং দুর্গে রামো রাজা ভবিষ্যতি ॥ 12 ॥
ক্রিযতাং শিল্পিভিঃ পন্থা স্সমানি বিষমাণি চ ।
রক্ষিণশ্চানুসম্যান্তু পথি দুর্গবিচারকাঃ ॥ 13 ॥
এবং সম্ভাষমাণং তং রামহেতোর্নৃপাত্মজম্ ।
প্রত্যুবাচ জনস্সর্ব শ্শ্রীমদ্বাক্যমনুত্তমম্ ॥ 14 ॥
এবং তে ভাষমাণস্য পদ্মা শ্রীরুপতিষ্ঠতাত্ ।
যস্ত্বং জ্যেষ্ঠে নৃপসুতে পৃথিবীং দাতুমিচ্ছসি ॥ 15 ॥
অনুত্তমং তদ্বচনং নৃপাত্মজপ্রভাষিতং সংশ্রবণে নিশম্য চ ।
প্রহর্ষজাস্তং প্রতি বাষ্পবিন্দবো নিপেতুরার্যানননেত্রসম্ভবাঃ ॥ 16 ॥
ঊচুস্তে বচনমিদং নিশম্য হৃষ্টা স্সামাত্যা স্সপরিষদো বিযাতশোকাঃ ।
পন্থানং নরবর ভক্তিমান্ জনশ্চ ব্যাদিষ্টস্তব বচনাচ্চ শিল্পিবর্গঃ ॥ 17 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাণ্ডে একোনাশীতিতমস্সর্গঃ ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha ekonāśītitamassargaḥ |
tataḥ prabhātasamaye divase'tha caturdaśe |
sametya rājakartāro bharataṃ vākyamabruvan || 1 ||
gato daśarathassvargaṃ yo no gurutaro guruḥ |
rāmaṃ pravrājya vai jyeṣṭhaṃ lakṣmaṇaṃ ca mahābalam || 2 ||
tvamadya bhava no rājā rājaputra mahāyaśaḥ |
saṅgatyā nāparādhnoti rājyametadanāyakam || 3 ||
abhiṣecanikaṃ sarvamidamādāya rāghava |
pratīkṣate tvāṃ svajanaśśreṇayaśca nṛpātmaja || 4 ||
rājyaṃ gṛhāṇa bharata pitṛpaitāmahaṃ dhruvam |
abhiṣecaya cātmānaṃ pāhi cāsmānnararṣabha || 5 ||
abhiṣecanikaṃ bhāṇḍaṃ kṛtvā sarvaṃ pradakṣiṇam |
bharatastaṃ janaṃ sarvaṃ pratyuvāca dhṛtavrataḥ || 6 ||
jyeṣṭhasya rājatā nityamucitā hi kulasya naḥ |
naivaṃ bhavanto māṃ vaktumarhanti kuśalā janāḥ || 7 ||
rāmaḥ pūrvo hi no bhrātā bhaviṣyati mahīpatiḥ |
ahaṃ tvaraṇye vatsyāmi varṣāṇi nava pañca ca || 8 ||
yujyatāṃ mahatī senā caturaṅgamahābalā |
ānayiṣyāmyahaṃ jyeṣṭhaṃ bhrātaraṃ rāghavaṃ vanāt || 9 ||
abhiṣecanikaṃ caiva sarvametadupaskṛtam |
puraskṛtya gamiṣyāmi rāmahetorvanaṃ prati || 10 ||
tatraivaṃ taṃ naravyāghramabhiṣicya puraskṛtam |
āneṣyāmi tu vai rāmaṃ havyavāhamivādhvarāt || 11 ||
na sakāmāṃ kariṣyāmi svāmimāṃ mātṛgandhinīm |
vane vatsyāmyahaṃ durge rāmo rājā bhaviṣyati || 12 ||
kriyatāṃ śilpibhiḥ panthā ssamāni viṣamāṇi ca |
rakṣiṇaścānusamyāntu pathi durgavicārakāḥ || 13 ||
evaṃ sambhāṣamāṇaṃ taṃ rāmahetornṛpātmajam |
pratyuvāca janassarva śśrīmadvākyamanuttamam || 14 ||
evaṃ te bhāṣamāṇasya padmā śrīrupatiṣṭhatāt |
yastvaṃ jyeṣṭhe nṛpasute pṛthivīṃ dātumicchasi || 15 ||
anuttamaṃ tadvacanaṃ nṛpātmajaprabhāṣitaṃ saṃśravaṇe niśamya ca |
praharṣajāstaṃ prati bāṣpabindavo nipeturāryānananetrasambhavāḥ || 16 ||
ūcuste vacanamidaṃ niśamya hṛṣṭā ssāmātyā ssapariṣado viyātaśokāḥ |
panthānaṃ naravara bhaktimān janaśca vyādiṣṭastava vacanācca śilpivargaḥ || 17 ||
ityārṣe śrīmadrāmāyaṇe vālmīkīya ādikāvye ayodhyākāṇḍe ekonāśītitamassargaḥ ||
InfoLyter.in — Sacred Vedic Knowledge Portal · Free forever