📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.75 বালকাণ্ড - পঞ্চসপ্ততিতম সর্গঃ
1.75 Balakanda - Panchasaptatitama Sargah
Valmiki Bengali
শ্রীমদ্বাল্মীকীয রামাযণে বালকাণ্ডম্ ।
অথ পঞ্চসপ্ততিতমস্সর্গঃ ।
রাম দাশরথে রাম বীর্যং তে শ্রূযতেঽদ্ভুতম্ ।
ধনুষো ভেদনং চৈব নিখিলেন মযা শ্রুতম্ ॥ 1 ॥
তদদ্ভুতমচিন্ত্যং চ ভেদনং ধনুষস্ত্বযা ।
তচ্ছ্রুত্বাঽহমনুপ্রাপ্তো ধনুর্গৃহ্যাপরং শুভম্ ॥ 2 ॥
তদিদং ঘোরসঙ্কাশং জামদগ্ন্যং মহদ্ধনুঃ ।
পূরযস্ব শরেণৈব স্ববলং দর্শযস্ব চ ॥ 3 ॥
তদহং তে বলং দৃষ্ট্বা ধনুষোঽস্য প্রপূরণে ।
দ্বন্দ্বযুদ্ধং প্রদাস্যামি বীর্যশ্লাঘ্যস্য রাঘব ॥ 4 ॥
তস্য তদ্বচনং শ্রুত্বা রাজা দশরথস্তদা ।
বিষণ্ণবদনো দীনঃ প্রাঞ্জলির্বাক্যমব্রবীত্ ॥ 5 ॥
ক্ষত্ররোষাত্প্রশান্তস্ত্বং ব্রাহ্মণশ্চ মহাযশাঃ ।
বালানাং মম পুত্রাণামভযং দাতুমর্হসি ॥ 6 ॥
ভার্গবাণাং কুলে জাতঃ স্বাধ্যাযব্রতশালিনাম্ ।
সহাস্রাক্ষে প্রতিজ্ঞায শস্ত্রং নিক্ষিপ্তবানসি ॥ 7 ॥
স ত্বং ধর্মপরো ভূত্বা কাশ্যপায বসুন্ধরাম্ ।
দত্ত্বা বনমুপাগম্য মহেন্দ্রকৃতকেতনঃ ॥ 8 ॥
মম সর্ববিনাশায সম্প্রাপ্তস্ত্বং মহামুনে ।
ন চৈকস্মিন্ হতে রামে সর্বে জীবামহে বযম্ ॥ 9 ॥
ব্রুবত্যেবং দশরথে জামদগ্ন্যঃ প্রতাপবান্ ।
অনাদৃত্যৈব তদ্বাক্যং রামমেবাভ্যভাষত ॥ 10 ॥
ইমে দ্বে ধনুষী শ্রেষ্ঠে দিব্যে লোকাভিবিশ্রুতে ।
দৃঢে বলবতী মুখ্যে সুকৃতে বিশ্বকর্মণা ॥ 11 ॥
অতিসৃষ্টং সুরৈরেকং ত্র্যম্বকায যুযুত্সবে ।
ত্রিপুরঘ্নং নরশ্রেষ্ঠ ভগ্নং কাকুত্স্থ যত্ত্বযা ॥ 12 ॥
ইদং দ্বিতীযং দুর্ধর্ষং বিষ্ণোর্দত্তং সুরোত্তমৈঃ ।
তদিদং বৈষ্ণবং রাম ধনুঃ পরমভাস্বরম্ ।
সমানসারং কাকুত্স্থ রৌদ্রেণ ধনুষা ত্বিদম্ ॥ 13 ॥
তদা তু দেবতাস্সর্বাঃ পৃচ্ছন্তি স্ম পিতামহম্ ।
শিতিকণ্ঠস্য বিষ্ণোশ্চ বলাবলনিরীক্ষযা ॥ 14 ॥
অভিপ্রাযং তু বিজ্ঞায দেবতানাং পিতামহঃ ।
বিরোধং জনযামাস তযো স্সত্যবতাং বরঃ ॥ 15 ॥
বিরোধে চ মহদ্যুদ্ধমভবদ্রোমহর্ষণম্ ।
শিতিকণ্ঠস্য বিষ্ণোশ্চ পরস্পরজিগীষুণোঃ ॥ 16 ॥
তদা তু জৃম্ভিতং শৈবং ধনুর্ভীমপরাক্রমম্ ।
হুঙ্কারেণ মহাদেব স্তম্ভিতোঽথ ত্রিলোচনঃ ॥ 17 ॥
দেবৈস্তদা সমাগম্য সর্ষিসঘৈ স্সচারণৈঃ ।
যাচিতৌ প্রশমং তত্র জগ্মতুস্তৌ সুরোত্তমৌ ॥ 18 ॥
জৃম্ভিতং তদ্ধনুর্দ্রৃষ্ট্বা শৈবং বিষ্ণুপরাক্রমৈঃ ।
অধিকং মেনিরে বিষ্ণুং দেবা স্সর্ষিগণাস্তদা ॥ 19 ॥
ধনূ রুদ্রস্তু সঙ্কৃদ্ধো বিদেহেষু মহাযশাঃ ।
দেবরাতস্য রাজর্ষের্দদৌ হস্তে সসাযকম্ ॥ 20 ॥
ইদং চ বৈষ্ণবং রাম ধনুঃ পরপুরঞ্জযম্ ।
ঋচীকে ভার্গবে প্রাদাদ্বিষ্ণুঃ স ন্যাসমুত্তমম্ ॥ 21 ॥
ঋচীকস্তু মহাতেজাঃ পুত্রস্যাপ্রতিকর্মণঃ ।
পিতুর্মম দদৌ দিব্যং জমদগ্নের্মহাত্মনঃ ॥ 22 ॥
ন্যস্তশস্ত্রে পিতরি মে তপোবলসমন্বিতে ।
অর্জুনো বিদধে মৃত্যুং প্রাকৃতাং বুদ্ধিমাস্থিতঃ ॥ 23 ॥
বধমপ্রতিরূপং তু পিতু শ্শৃত্বা সুদারুণম্ ।
ক্ষত্রমুত্সাদযন্রোষাজ্জাতং জাতমনেকশঃ ॥ 24 ॥
পৃথিবীং চাখিলাং প্রাপ্য কাশ্যপায মহাত্মনে ।
যজ্ঞস্যান্তে তদা রাম দক্ষিণাং পুণ্যকর্মণে ।
দত্ত্বা মহেন্দ্রনিলযস্তপোবলসমন্বিতঃ ॥ 25 ॥
অদ্যতূত্তমবীর্যেণ ত্বযা রাম মহাবল ।
শ্রুতবান্ ধনুষো ভেদং ততোঽহং দ্রুতমাগতঃ ॥ 26 ॥
তদিদং বৈষ্ণবং রাম পিতৃপৈতামহং মহত্ ।
ক্ষত্রধর্মং পুরস্কৃত্য গৃহ্ণীষ্ব ধনুরুত্তমম্ ॥ 27 ॥
যোজযস্ব ধনুশ্শ্রেষ্ঠে শরং পরপুরঞ্জযম্ ।
যদি শক্নোষি কাকুত্স্থ দ্বন্দ্বং দাস্যামি তে ততঃ ॥ 28 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাণ্ডে পঞ্চসপ্ততিতমস্সর্গঃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha pañcasaptatitamassargaḥ |
rāma dāśarathe rāma vīryaṃ te śrūyate'dbhutam |
dhanuṣo bhedanaṃ caiva nikhilena mayā śrutam || 1 ||
tadadbhutamacintyaṃ ca bhedanaṃ dhanuṣastvayā |
tacchrutvā'hamanuprāpto dhanurgṛhyāparaṃ śubham || 2 ||
tadidaṃ ghorasaṅkāśaṃ jāmadagnyaṃ mahaddhanuḥ |
pūrayasva śareṇaiva svabalaṃ darśayasva ca || 3 ||
tadahaṃ te balaṃ dṛṣṭvā dhanuṣo'sya prapūraṇe |
dvandvayuddhaṃ pradāsyāmi vīryaślāghyasya rāghava || 4 ||
tasya tadvacanaṃ śrutvā rājā daśarathastadā |
viṣaṇṇavadano dīnaḥ prāñjalirvākyamabravīt || 5 ||
kṣatraroṣātpraśāntastvaṃ brāhmaṇaśca mahāyaśāḥ |
bālānāṃ mama putrāṇāmabhayaṃ dātumarhasi || 6 ||
bhārgavāṇāṃ kule jātaḥ svādhyāyavrataśālinām |
sahāsrākṣe pratijñāya śastraṃ nikṣiptavānasi || 7 ||
sa tvaṃ dharmaparo bhūtvā kāśyapāya vasundharām |
dattvā vanamupāgamya mahendrakṛtaketanaḥ || 8 ||
mama sarvavināśāya samprāptastvaṃ mahāmune |
na caikasmin hate rāme sarve jīvāmahe vayam || 9 ||
bruvatyevaṃ daśarathe jāmadagnyaḥ pratāpavān |
anādṛtyaiva tadvākyaṃ rāmamevābhyabhāṣata || 10 ||
ime dve dhanuṣī śreṣṭhe divye lokābhiviśrute |
dṛḍhe balavatī mukhye sukṛte viśvakarmaṇā || 11 ||
atisṛṣṭaṃ surairekaṃ tryambakāya yuyutsave |
tripuraghnaṃ naraśreṣṭha bhagnaṃ kākutstha yattvayā || 12 ||
idaṃ dvitīyaṃ durdharṣaṃ viṣṇordattaṃ surottamaiḥ |
tadidaṃ vaiṣṇavaṃ rāma dhanuḥ paramabhāsvaram |
samānasāraṃ kākutstha raudreṇa dhanuṣā tvidam || 13 ||
tadā tu devatāssarvāḥ pṛcchanti sma pitāmaham |
śitikaṇṭhasya viṣṇośca balābalanirīkṣayā || 14 ||
abhiprāyaṃ tu vijñāya devatānāṃ pitāmahaḥ |
virodhaṃ janayāmāsa tayo ssatyavatāṃ varaḥ || 15 ||
virodhe ca mahadyuddhamabhavadromaharṣaṇam |
śitikaṇṭhasya viṣṇośca parasparajigīṣuṇoḥ || 16 ||
tadā tu jṛmbhitaṃ śaivaṃ dhanurbhīmaparākramam |
huṅkāreṇa mahādeva stambhito'tha trilocanaḥ || 17 ||
devaistadā samāgamya sarṣisaghai ssacāraṇaiḥ |
yācitau praśamaṃ tatra jagmatustau surottamau || 18 ||
jṛmbhitaṃ taddhanurdrṛṣṭvā śaivaṃ viṣṇuparākramaiḥ |
adhikaṃ menire viṣṇuṃ devā ssarṣigaṇāstadā || 19 ||
dhanū rudrastu saṅkṛddho videheṣu mahāyaśāḥ |
devarātasya rājarṣerdadau haste sasāyakam || 20 ||
idaṃ ca vaiṣṇavaṃ rāma dhanuḥ parapurañjayam |
ṛcīke bhārgave prādādviṣṇuḥ sa nyāsamuttamam || 21 ||
ṛcīkastu mahātejāḥ putrasyāpratikarmaṇaḥ |
piturmama dadau divyaṃ jamadagnermahātmanaḥ || 22 ||
nyastaśastre pitari me tapobalasamanvite |
arjuno vidadhe mṛtyuṃ prākṛtāṃ buddhimāsthitaḥ || 23 ||
vadhamapratirūpaṃ tu pitu śśṛtvā sudāruṇam |
kṣatramutsādayanroṣājjātaṃ jātamanekaśaḥ || 24 ||
pṛthivīṃ cākhilāṃ prāpya kāśyapāya mahātmane |
yajñasyānte tadā rāma dakṣiṇāṃ puṇyakarmaṇe |
dattvā mahendranilayastapobalasamanvitaḥ || 25 ||
adyatūttamavīryeṇa tvayā rāma mahābala |
śrutavān dhanuṣo bhedaṃ tato'haṃ drutamāgataḥ || 26 ||
tadidaṃ vaiṣṇavaṃ rāma pitṛpaitāmahaṃ mahat |
kṣatradharmaṃ puraskṛtya gṛhṇīṣva dhanuruttamam || 27 ||
yojayasva dhanuśśreṣṭhe śaraṃ parapurañjayam |
yadi śaknoṣi kākutstha dvandvaṃ dāsyāmi te tataḥ || 28 ||
ityārṣe śrīmadrāmāyaṇe vālmīkīya ādikāvye bālakāṇḍe pañcasaptatitamassargaḥ ||
InfoLyter.in — Sacred Vedic Knowledge Portal · Free forever