📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.67 বালকাণ্ড - সপ্তষষ্টিতম সর্গঃ
1.67 Balakanda - Saptashashtitama Sargah
Valmiki Bengali
শ্রীমদ্বাল্মীকীয রামাযণে বালকাণ্ডম্ ।
অথ সপ্তষষ্টিতমস্সর্গঃ ।
. জনকস্য বচশ্শ্রুত্বা বিশ্বামিত্রো মহামুনিঃ ।
ধনুর্দর্শয রামায ইতি হোবাচ পার্থিবম্ ॥ 1 ॥
ততস্স রাজা জনকঃ সামন্তান্ব্যাদিদেশ হ ।
ধনুরানীযতাং দিব্যং গন্ধমাল্যবিভূষিতম্ ॥ 2 ॥
জনকেন সমাদিষ্টাঃ সচিবা প্রাবিশন্ পুরীম্ ।
তদ্ধনুঃ পুরতঃ কৃত্বা নির্জগ্মুঃ পার্থিবাজ্ঞযা ॥ 3 ॥
নৃণাং শতানি পঞ্চাশদ্ব্যাযতানাং মহাত্মনাম্ ।
মঞ্জূষামষ্টচক্রাং তাং সমূহুস্তে কথঞ্চন ॥ 4 ॥
তামাদায তু মঞ্জূষামাযসীং যত্র তদ্ধনুঃ ।
সুরোপমং তে জনকমূচুর্নৃপতিমন্ত্রিণঃ ॥ 5 ॥
ইদং ধনুর্বরং রাজন্ পূজিতং সর্বরাজভিঃ ।
মিথিলাধিপ রাজেন্দ্র দর্শনীযং যদিচ্ছসি ॥ 6 ॥
তেষাং নৃপো বচঃ শ্রুত্বা কৃতাঞ্জলিরভাষত ।
বিশ্বামিত্রং মহাত্মানং তৌ চোভৌ রামলক্ষ্মণৌ ॥ 7 ॥
ইদং ধনুর্বরং ব্রহ্মন্ জনকৈরভিপূজিতম্ ।
রাজভিশ্চ মহাবীর্যৈঃ অশক্তৈঃ পূরিতুং পুরা ॥ 8 ॥
নৈতত্সুরগণাস্সর্বে নাসুরা ন চ রাক্ষসাঃ ।
গন্ধর্বযক্ষপ্রবরাঃ সকিন্নরমহোরগাঃ ॥ 9 ॥
ক্ব গতির্মানুষাণাং চ ধনুষোঽস্য প্রপূরণে ।
আরোপণে সমাযোগে বেপনে তোলনেঽপি বা ॥ 10 ॥
তদেতদ্ধনুষাং শ্রেষ্ঠমানীতং মুনিপুঙ্গব ।
দর্শযৈতন্মহাভাগ অনযোঃ রাজপুত্রযোঃ ॥ 11 ॥
বিশ্বামিত্রস্তু ধর্মাত্মা শ্রুত্বা জনকভাষিতম্ ।
বত্স রাম ধনুঃ পশ্য ইতি রাঘবমব্রবীত্ ॥ 12 ॥
ব্রহ্মর্ষের্বচনাদ্রামো যত্র তিষ্ঠতি তদ্ধনুঃ ।
মঞ্জূষাং তামপাবৃত্য দৃষ্ট্বা ধনুরথাব্রবীত্ ॥ 13 ॥
ইদং ধনুর্বরং ব্রহ্মন্ সংস্পৃশামীহ পাণিনা ।
যত্নবাংশ্চ ভবিষ্যামি তোলনে পূরণেঽপি বা ॥ 14 ॥
বাঢমিত্যেব তং রাজা মুনিশ্চ সমভাষত ।
লীলযা স ধনুর্মধ্যে জগ্রাহ বচনান্মুনেঃ ॥ 15 ॥
পশ্যতাং নৃপসহস্রাণাং বহূনাং রঘুনন্দনঃ ।
আরোপযত্স ধর্মাত্মা সলীলমিব তদ্ধনুঃ ॥ 16 ॥
আরোপযিত্বা ধর্মাত্মা পূরযামাস তদ্ধনুঃ ।
তদ্বভঞ্জ ধনুর্মধ্যে নরশ্রেষ্ঠো মহাযশাঃ ॥ 17 ॥
তস্য শব্দো মহানাসীত্ নির্ঘাতসমনিস্বনঃ ।
ভূমিকম্পশ্চ সুমহান্ পর্বতস্যেব দীর্যতঃ ॥ 18 ॥
নিপেতুশ্চ নরা স্সর্বে তেন শব্দেন মোহিতাঃ ।
বর্জযিত্বা মুনিবরং রাজানং তৌ চ রাঘবৌ ॥ 19 ॥
প্রত্যাশ্বস্তে জনে তস্মিন্রাজা বিগতসাধ্বসঃ ।
উবাচ প্রাঞ্জলির্বাক্যং বাক্যজ্ঞো মুনিপুঙ্গবম্ ॥ 20 ॥
ভগবন্ দৃষ্টবীর্যো মে রামো দশরথাত্মজঃ ।
অত্যদ্ভুতমচিন্ত্যং চ ন তর্কিতমিদং মযা ॥ 21 ॥
জনকানাং কুলে কীর্তিমাহরিষ্যতি মে সুতা ।
সীতা ভর্তারমাসাদ্য রামং দশরথাত্মজম্ ॥ 22 ॥
মম সত্যা প্রতিজ্ঞা চ বীর্যশুল্কেতি কৌশিক ।
সীতা প্রাণৈর্বহুমতা দেযা রামায মে সুতা ॥ 23 ॥
ভবতোঽনুমতে ব্রহ্মন্ শীঘ্রং গচ্ছন্তু মন্ত্রিণঃ ।
মম কৌশিক ভদ্রং তে অযোধ্যাং ত্বরিতা রথৈঃ ॥ 24 ॥
রাজানং প্রশ্রিতৈর্বাক্যৈরানযন্তু পুরং মম ।
প্রদানং বীর্যশুল্কাযাঃ কথযন্তু চ সর্বশঃ ॥ 25 ॥
মুনিগুপ্তৌ চ কাকুত্স্থৌ কথযন্তু নৃপায বৈ ।
প্রীযমাণং তু রাজানমানযন্তু সুশীঘ্রগাঃ ॥ 26 ॥
কৌশিকশ্চ তথেত্যাহ রাজা চাভাষ্য মন্ত্রিণঃ ॥ 27 ॥
অযোধ্যাং প্রেষযামাস ধর্মাত্মা কৃতশাসনান্ ।
যথাবৃত্তং সমাখ্যাতুমানেতুং চ নৃপং তদা ॥ 28 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাণ্ডে সপ্তষষ্টিতমস্সর্গঃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha saptaṣaṣṭitamassargaḥ |
. janakasya vacaśśrutvā viśvāmitro mahāmuniḥ |
dhanurdarśaya rāmāya iti hovāca pārthivam || 1 ||
tatassa rājā janakaḥ sāmantānvyādideśa ha |
dhanurānīyatāṃ divyaṃ gandhamālyavibhūṣitam || 2 ||
janakena samādiṣṭāḥ sacivā prāviśan purīm |
taddhanuḥ purataḥ kṛtvā nirjagmuḥ pārthivājñayā || 3 ||
nṛṇāṃ śatāni pañcāśadvyāyatānāṃ mahātmanām |
mañjūṣāmaṣṭacakrāṃ tāṃ samūhuste kathañcana || 4 ||
tāmādāya tu mañjūṣāmāyasīṃ yatra taddhanuḥ |
suropamaṃ te janakamūcurnṛpatimantriṇaḥ || 5 ||
idaṃ dhanurvaraṃ rājan pūjitaṃ sarvarājabhiḥ |
mithilādhipa rājendra darśanīyaṃ yadicchasi || 6 ||
teṣāṃ nṛpo vacaḥ śrutvā kṛtāñjalirabhāṣata |
viśvāmitraṃ mahātmānaṃ tau cobhau rāmalakṣmaṇau || 7 ||
idaṃ dhanurvaraṃ brahman janakairabhipūjitam |
rājabhiśca mahāvīryaiḥ aśaktaiḥ pūrituṃ purā || 8 ||
naitatsuragaṇāssarve nāsurā na ca rākṣasāḥ |
gandharvayakṣapravarāḥ sakinnaramahoragāḥ || 9 ||
kva gatirmānuṣāṇāṃ ca dhanuṣo'sya prapūraṇe |
āropaṇe samāyoge vepane tolane'pi vā || 10 ||
tadetaddhanuṣāṃ śreṣṭhamānītaṃ munipuṅgava |
darśayaitanmahābhāga anayoḥ rājaputrayoḥ || 11 ||
viśvāmitrastu dharmātmā śrutvā janakabhāṣitam |
vatsa rāma dhanuḥ paśya iti rāghavamabravīt || 12 ||
brahmarṣervacanādrāmo yatra tiṣṭhati taddhanuḥ |
mañjūṣāṃ tāmapāvṛtya dṛṣṭvā dhanurathābravīt || 13 ||
idaṃ dhanurvaraṃ brahman saṃspṛśāmīha pāṇinā |
yatnavāṃśca bhaviṣyāmi tolane pūraṇe'pi vā || 14 ||
bāḍhamityeva taṃ rājā muniśca samabhāṣata |
līlayā sa dhanurmadhye jagrāha vacanānmuneḥ || 15 ||
paśyatāṃ nṛpasahasrāṇāṃ bahūnāṃ raghunandanaḥ |
āropayatsa dharmātmā salīlamiva taddhanuḥ || 16 ||
āropayitvā dharmātmā pūrayāmāsa taddhanuḥ |
tadbabhañja dhanurmadhye naraśreṣṭho mahāyaśāḥ || 17 ||
tasya śabdo mahānāsīt nirghātasamanisvanaḥ |
bhūmikampaśca sumahān parvatasyeva dīryataḥ || 18 ||
nipetuśca narā ssarve tena śabdena mohitāḥ |
varjayitvā munivaraṃ rājānaṃ tau ca rāghavau || 19 ||
pratyāśvaste jane tasminrājā vigatasādhvasaḥ |
uvāca prāñjalirvākyaṃ vākyajño munipuṅgavam || 20 ||
bhagavan dṛṣṭavīryo me rāmo daśarathātmajaḥ |
atyadbhutamacintyaṃ ca na tarkitamidaṃ mayā || 21 ||
janakānāṃ kule kīrtimāhariṣyati me sutā |
sītā bhartāramāsādya rāmaṃ daśarathātmajam || 22 ||
mama satyā pratijñā ca vīryaśulketi kauśika |
sītā prāṇairbahumatā deyā rāmāya me sutā || 23 ||
bhavato'numate brahman śīghraṃ gacchantu mantriṇaḥ |
mama kauśika bhadraṃ te ayodhyāṃ tvaritā rathaiḥ || 24 ||
rājānaṃ praśritairvākyairānayantu puraṃ mama |
pradānaṃ vīryaśulkāyāḥ kathayantu ca sarvaśaḥ || 25 ||
muniguptau ca kākutsthau kathayantu nṛpāya vai |
prīyamāṇaṃ tu rājānamānayantu suśīghragāḥ || 26 ||
kauśikaśca tathetyāha rājā cābhāṣya mantriṇaḥ || 27 ||
ayodhyāṃ preṣayāmāsa dharmātmā kṛtaśāsanān |
yathāvṛttaṃ samākhyātumānetuṃ ca nṛpaṃ tadā || 28 ||
ityārṣe śrīmadrāmāyaṇe vālmīkīya ādikāvye bālakāṇḍe saptaṣaṣṭitamassargaḥ ||
InfoLyter.in — Sacred Vedic Knowledge Portal · Free forever