📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.19 বালকাণ্ড - একোনবিংশ সর্গঃ
1.19 Balakanda - Ekonavimsha Sargah
Valmiki Bengali
শ্রীমদ্বাল্মীকীয রামাযণে বালকাণ্ডম্ ।
অথ একোনবিংশস্সর্গঃ ।
তচ্ছ্রুত্বা রাজসিংহস্য বাক্যমদ্ভুতবিস্তরম্ ।
হৃষ্টরোমা মহাতেজা বিশ্বামিত্রোঽভ্যভাষত ॥ 1 ॥
সদৃশং রাজশার্দূল তবৈতদ্ভুবি নান্যথা ।
মহাবংশপ্রসূতস্য বসিষ্ঠব্যপদেশিনঃ ॥ 2 ॥
যত্তু মে হৃদ্গতং বাক্যং তস্য কার্যস্য নিশ্চযম্ ।
কুরূষ্ব রাজশার্দূল ভব সত্যপ্রতিশ্রবঃ ॥ 3 ॥
অহন্নিযমমাতিষ্ঠে সিধ্যর্থং পুরুষর্ষভ ।
তস্য বিঘ্নকরৌ দ্বৌ তু রাক্ষসৌ কামরূপিণৌ ॥ 4 ॥
ব্রতে মে বহুশশ্চীর্ণে সমাপ্ত্যাং রাক্ষসাবিমৌ ।
মারীচশ্চ সুবাহুশ্চ বীর্যবন্তৌ সুশিক্ষিতৌ ॥ 5 ॥
সমাংসরুধিরৌঘেণ বেদিং তামভ্যবর্ষতাম্ ।
অবধূতে তথাভূতে তস্মিন্নিযমনিশ্চযে ॥ 6 ॥
কৃতশ্রমো নিরুত্সাহস্তস্মাদ্দেশাদপাক্রমে ।
ন চ মে ক্রোধমুত্স্রষ্টুং বুদ্ধির্ভবতি পার্থিব ॥ 7 ॥
তথা ভূতা হি সা চর্যা ন শাপস্তত্র মুচ্যতে ।
স্বপুত্রং রাজশার্দূল রামং সত্যপরাক্রমম্ ॥ 8 ॥
কাকপক্ষধরং শূরং জ্যেষ্ঠং মে দাতুমর্হসি ।
শক্তো হ্যেষ মযা গুপ্তো দিব্যেন স্বেন তেজসা ॥ 9 ॥
রাক্ষসা যে বিকর্তারস্তেষামপি বিনাশনে ।
শ্রেযশ্চাস্মৈ প্রদাস্যামি বহুরূপং ন সংশযঃ ॥ 10 ॥
ত্রযাণামপি লোকানাং যেন খ্যাতিং গমিষ্যতি ।
ন চ তৌ রামমাসাদ্য শক্তৌ স্থাতুং কথঞ্চন ॥ 11 ॥
ন চ তৌ রাঘবাদন্যো হন্তুমুত্সহতে পুমান্ ।
বীর্যোত্সিক্তৌ হি তৌ পাপৌ কালপাশবশং গতৌ ॥ 12 ॥
রামস্য রাজশার্দূল ন পর্যাপ্তৌ মহাত্মনঃ ।
ন চ পুত্রকৃতস্নেহং কর্তুমর্হসি পার্থিব ॥ 13 ॥
অহং তে প্রতিজানামি হতৌ তৌ বিদ্ধি রাক্ষসৌ ।
অহং বেদ্মি মহাত্মানং রামং সত্যপরাক্রমম্ ॥ 14 ॥
বসিষ্ঠোঽপি মহাতেজা যে চেমে তপসি স্থিতাঃ ।
যদি তে ধর্মলাভং চ যশশ্চ পরমং ভুবি ॥ 15 ॥
স্থিতমিচ্ছসি রাজেন্দ্র রামং মে দাতুমর্হসি ।
যদিহ্যনুজ্ঞাং কাকুত্স্থ দদতে তব মন্ত্রিণঃ ॥ 16 ॥
বসিষ্ঠপ্রমুখাঃ সর্বে ততো রামং বিসর্জয ।
অভিপ্রেতমসংসক্তমাত্মজং দাতুমর্হসি ॥ 17 ॥
দশরাত্রং হি যজ্ঞস্য রামং রাজীবলোচনম্ ।
নাত্যেতি কালো যজ্ঞস্য যথাঽযং মম রাঘব ॥ 18 ॥
তথা কুরুষ্ব ভদ্রং তে মা চ শোকে মনঃ কৃথাঃ ।
ইত্যেবমুক্ত্বা ধর্মাত্মা ধর্মার্থসহিতং বচঃ ॥ 19 ॥
বিররাম মহাতেজা বিশ্বামিত্রো মহামুনিঃ ।
স তন্নিশম্য রাজেন্দ্রো বিশ্বামিত্রবচশ্শুভম্ ॥ 20 ॥
শোকমভ্যগমত্তীব্রং ব্যষীদত ভযান্বিতঃ ।
ইতি হৃদযমনোবিদারণং মুনিবচনং তদতীব শুশ্রুবান্ ।
নরপতিরভবন্মহাংস্তদা ব্যথিতমনাঃ প্রচচাল চাসনাত্ ॥ 21 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাণ্ডে একোনবিংশস্সর্গঃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha ekonaviṃśassargaḥ |
tacchrutvā rājasiṃhasya vākyamadbhutavistaram |
hṛṣṭaromā mahātejā viśvāmitro'bhyabhāṣata || 1 ||
sadṛśaṃ rājaśārdūla tavaitadbhuvi nānyathā |
mahāvaṃśaprasūtasya vasiṣṭhavyapadeśinaḥ || 2 ||
yattu me hṛdgataṃ vākyaṃ tasya kāryasya niścayam |
kurūṣva rājaśārdūla bhava satyapratiśravaḥ || 3 ||
ahanniyamamātiṣṭhe sidhyarthaṃ puruṣarṣabha |
tasya vighnakarau dvau tu rākṣasau kāmarūpiṇau || 4 ||
vrate me bahuśaścīrṇe samāptyāṃ rākṣasāvimau |
mārīcaśca subāhuśca vīryavantau suśikṣitau || 5 ||
samāṃsarudhiraugheṇa vediṃ tāmabhyavarṣatām |
avadhūte tathābhūte tasminniyamaniścaye || 6 ||
kṛtaśramo nirutsāhastasmāddeśādapākrame |
na ca me krodhamutsraṣṭuṃ buddhirbhavati pārthiva || 7 ||
tathā bhūtā hi sā caryā na śāpastatra mucyate |
svaputraṃ rājaśārdūla rāmaṃ satyaparākramam || 8 ||
kākapakṣadharaṃ śūraṃ jyeṣṭhaṃ me dātumarhasi |
śakto hyeṣa mayā gupto divyena svena tejasā || 9 ||
rākṣasā ye vikartārasteṣāmapi vināśane |
śreyaścāsmai pradāsyāmi bahurūpaṃ na saṃśayaḥ || 10 ||
trayāṇāmapi lokānāṃ yena khyātiṃ gamiṣyati |
na ca tau rāmamāsādya śaktau sthātuṃ kathañcana || 11 ||
na ca tau rāghavādanyo hantumutsahate pumān |
vīryotsiktau hi tau pāpau kālapāśavaśaṃ gatau || 12 ||
rāmasya rājaśārdūla na paryāptau mahātmanaḥ |
na ca putrakṛtasnehaṃ kartumarhasi pārthiva || 13 ||
ahaṃ te pratijānāmi hatau tau viddhi rākṣasau |
ahaṃ vedmi mahātmānaṃ rāmaṃ satyaparākramam || 14 ||
vasiṣṭho'pi mahātejā ye ceme tapasi sthitāḥ |
yadi te dharmalābhaṃ ca yaśaśca paramaṃ bhuvi || 15 ||
sthitamicchasi rājendra rāmaṃ me dātumarhasi |
yadihyanujñāṃ kākutstha dadate tava mantriṇaḥ || 16 ||
vasiṣṭhapramukhāḥ sarve tato rāmaṃ visarjaya |
abhipretamasaṃsaktamātmajaṃ dātumarhasi || 17 ||
daśarātraṃ hi yajñasya rāmaṃ rājīvalocanam |
nātyeti kālo yajñasya yathā'yaṃ mama rāghava || 18 ||
tathā kuruṣva bhadraṃ te mā ca śoke manaḥ kṛthāḥ |
ityevamuktvā dharmātmā dharmārthasahitaṃ vacaḥ || 19 ||
virarāma mahātejā viśvāmitro mahāmuniḥ |
sa tanniśamya rājendro viśvāmitravacaśśubham || 20 ||
śokamabhyagamattīvraṃ vyaṣīdata bhayānvitaḥ |
iti hṛdayamanovidāraṇaṃ munivacanaṃ tadatīva śuśruvān |
narapatirabhavanmahāṃstadā vyathitamanāḥ pracacāla cāsanāt || 21 ||
ityārṣe śrīmadrāmāyaṇe vālmīkīya ādikāvye bālakāṇḍe ekonaviṃśassargaḥ ||
InfoLyter.in — Sacred Vedic Knowledge Portal · Free forever