Viveka Chudamani — InfoLyter.in

ॐ

বিবেক চূডামণি

Viveka Chudamani

Adi Shankaracharya Bengali

সর্ববেদান্তসিদ্ধান্তগোচরং তমগোচরম্ ।

গোবিন্দং পরমানন্দং সদ্গুরুং প্রণতোঽস্ম্যহম্ ॥ 1॥

জন্তূনাং নরজন্ম দুর্লভমতঃ পুংস্ত্বং ততো বিপ্রতা

তস্মাদ্বৈদিকধর্মমার্গপরতা বিদ্বত্ত্বমস্মাত্পরম্ ।

আত্মানাত্মবিবেচনং স্বনুভবো ব্রহ্মাত্মনা সংস্থিতিঃ

মুক্তির্নো শতজন্মকোটিসুকৃতৈঃ পুণ্যৈর্বিনা লভ্যতে ॥ 2॥ (পাঠভেদঃ - শতকোটিজন্মসু কৃতৈঃ)

দুর্লভং ত্রযমেবৈতদ্দেবানুগ্রহহেতুকম্ ।

মনুষ্যত্বং মুমুক্ষুত্বং মহাপুরুষসংশ্রযঃ ॥ 3॥

লব্ধ্বা কথঞ্চিন্নরজন্ম দুর্লভং (পাঠভেদঃ - কথঞ্চিন্)

তত্রাপি পুংস্ত্বং শ্রুতিপারদর্শনম্ ।

যস্ত্বাত্মমুক্তৌ ন যতেত মূঢধীঃ

স হ্যাত্মহা স্বং বিনিহন্ত্যসদ্গ্রহাত্ ॥ 4॥ (পাঠভেদঃ - আত্মহা স্বং)

ইতঃ কো ন্বস্তি মূঢাত্মা যস্তু স্বার্থে প্রমাদ্যতি ।

দুর্লভং মানুষং দেহং প্রাপ্য তত্রাপি পৌরুষম্ ॥ 5॥

বদন্তু শাস্ত্রাণি যজন্তু দেবান্ (পাঠভেদঃ - পঠন্তু)

কুর্বন্তু কর্মাণি ভজন্তু দেবতাঃ ।

আত্মৈক্যবোধেন বিনাপি মুক্তি- (পাঠভেদঃ - বিনা বিমুক্তিঃ ন)

র্ন সিধ্যতি ব্রহ্মশতান্তরেঽপি ॥ 6॥

অমৃতত্ত্বস্য নাশাস্তি বিত্তেনেত্যেব হি শ্রুতিঃ ।

ব্রবীতি কর্মণো মুক্তেরহেতুত্বং স্ফুটং যতঃ ॥ 7॥

অতো বিমুক্ত্যৈ প্রযতেত বিদ্বান্

সন্ন্যস্তবাহ্যার্থসুখস্পৃহঃ সন্ ।

সন্তং মহান্তং সমুপেত্য দেশিকং

তেনোপদিষ্টার্থসমাহিতাত্মা ॥ 8॥

উদ্ধরেদাত্মনাঽঽত্মানং মগ্নং সংসারবারিধৌ ।

যোগারূঢত্বমাসাদ্য সম্যগ্দর্শননিষ্ঠযা ॥ 9॥

সন্ন্যস্য সর্বকর্মাণি ভববন্ধবিমুক্তযে ।

যত্যতাং পণ্ডিতৈর্ধীরৈরাত্মাভ্যাস উপস্থিতৈঃ ॥ 10॥

চিত্তস্য শুদ্ধযে কর্ম ন তু বস্তূপলব্ধযে ।

বস্তুসিদ্ধির্বিচারেণ ন কিঞ্চিত্কর্মকোটিভিঃ ॥ 11॥

সম্যগ্বিচারতঃ সিদ্ধা রজ্জুতত্ত্বাবধারণা ।

ভ্রান্তোদিতমহাসর্পভযদুঃখবিনাশিনী ॥ 12॥ (পাঠভেদঃ - ভ্রান্ত্যো)

অর্থস্য নিশ্চযো দৃষ্টো বিচারেণ হিতোক্তিতঃ ।

ন স্নানেন ন দানেন প্রাণাযামশতেন বা ॥ 13॥

অধিকারিণমাশাস্তে ফলসিদ্ধির্বিশেষতঃ ।

উপাযা দেশকালাদ্যাঃ সন্ত্যস্মিন্সহকারিণঃ ॥ 14॥ (পাঠভেদঃ - সন্ত্যস্যাং)

অতো বিচারঃ কর্তব্যো জিজ্ঞাসোরাত্মবস্তুনঃ ॥

সমাসাদ্য দযাসিন্ধুং গুরুং ব্রহ্মবিদুত্তমম্ ॥ 15॥

মেধাবী পুরুষো বিদ্বানূহাপোহবিচক্ষণঃ ।

অধিকার্যাত্মবিদ্যাযামুক্তলক্ষণলক্ষিতঃ ॥ 16॥

বিবেকিনো বিরক্তস্য শমাদিগুণশালিনঃ ।

মুমুক্ষোরেব হি ব্রহ্মজিজ্ঞাসাযোগ্যতা মতা ॥ 17॥

সাধনান্যত্র চত্বারি কথিতানি মনীষিভিঃ ।

যেষু সত্স্বেব সন্নিষ্ঠা যদভাবে ন সিধ্যতি ॥ 18॥

আদৌ নিত্যানিত্যবস্তুবিবেকঃ পরিগণ্যতে ।

ইহামুত্রফলভোগবিরাগস্তদনন্তরম্ ।

শমাদিষট্কসম্পত্তির্মুমুক্ষুত্বমিতি স্ফুটম্ ॥ 19॥

ব্রহ্ম সত্যং জগন্মিথ্যেত্যেবংরূপো বিনিশ্চযঃ ।

সোঽযং নিত্যানিত্যবস্তুবিবেকঃ সমুদাহৃতঃ ॥ 20॥

তদ্বৈরাগ্যং জিহাসা যা দর্শনশ্রবণাদিভিঃ । (পাঠভেদঃ - জুগুপ্সা যা)

দেহাদিব্রহ্মপর্যন্তে হ্যনিত্যে ভোগবস্তুনি ॥ 21॥ (পাঠভেদঃ - ভোগ্যবস্তুনি)

বিরজ্য বিষযব্রাতাদ্দোষদৃষ্ট্যা মুহুর্মুহুঃ ।

স্বলক্ষ্যে নিযতাবস্থা মনসঃ শম উচ্যতে ॥ 22॥

বিষযেভ্যঃ পরাবর্ত্য স্থাপনং স্বস্বগোলকে ।

উভযেষামিন্দ্রিযাণাং স দমঃ পরিকীর্তিতঃ ।

বাহ্যানালম্বনং বৃত্তেরেষোপরতিরুত্তমা ॥ 23॥

সহনং সর্বদুঃখানামপ্রতীকারপূর্বকম্ ।

চিন্তাবিলাপরহিতং সা তিতিক্ষা নিগদ্যতে ॥ 24॥

শাস্ত্রস্য গুরুবাক্যস্য সত্যবুদ্ধ্যবধারণম্ । (পাঠভেদঃ - সত্যবুদ্ধ্যাবধারণা)

সা শ্রদ্ধা কথিতা সদ্ভির্যযা বস্তূপলভ্যতে ॥ 25॥

সর্বদা স্থাপনং বুদ্ধেঃ শুদ্ধে ব্রহ্মণি সর্বদা । (পাঠভেদঃ - সম্যগাস্থাপনং)

তত্সমাধানমিত্যুক্তং ন তু চিত্তস্য লালনম্ ॥ 26॥

অহঙ্কারাদিদেহান্তান্ বন্ধানজ্ঞানকল্পিতান্ ।

স্বস্বরূপাববোধেন মোক্তুমিচ্ছা মুমুক্ষুতা ॥ 27॥

মন্দমধ্যমরূপাপি বৈরাগ্যেণ শমাদিনা ।

প্রসাদেন গুরোঃ সেযং প্রবৃদ্ধা সূযতে ফলম্ ॥ 28॥

বৈরাগ্যং চ মুমুক্ষুত্বং তীব্রং যস্য তু বিদ্যতে ।

তস্মিন্নেবার্থবন্তঃ স্যুঃ ফলবন্তঃ শমাদযঃ ॥ 29॥

এতযোর্মন্দতা যত্র বিরক্তত্বমুমুক্ষযোঃ ।

মরৌ সলিলবত্তত্র শমাদের্ভানমাত্রতা ॥ 30॥

মোক্ষকারণসামগ্র্যাং ভক্তিরেব গরীযসী ।

স্বস্বরূপানুসন্ধানং ভক্তিরিত্যভিধীযতে ॥ 31॥

স্বাত্মতত্ত্বানুসন্ধানং ভক্তিরিত্যপরে জগুঃ ।

উক্তসাধনসম্পন্নস্তত্ত্বজিজ্ঞাসুরাত্মনঃ ।

উপসীদেদ্গুরুং প্রাজ্ঞং যস্মাদ্বন্ধবিমোক্ষণম্ ॥ 32॥

শ্রোত্রিযোঽবৃজিনোঽকামহতো যো ব্রহ্মবিত্তমঃ ।

ব্রহ্মণ্যুপরতঃ শান্তো নিরিন্ধন ইবানলঃ ।

অহেতুকদযাসিন্ধুর্বন্ধুরানমতাং সতাম্ ॥ 33॥

তমারাধ্য গুরুং ভক্ত্যা প্রহ্বপ্রশ্রযসেবনৈঃ । (পাঠভেদঃ - প্রহ্বঃ)

প্রসন্নং তমনুপ্রাপ্য পৃচ্ছেজ্জ্ঞাতব্যমাত্মনঃ ॥ 34॥

স্বামিন্নমস্তে নতলোকবন্ধো

কারুণ্যসিন্ধো পতিতং ভবাব্ধৌ ।

মামুদ্ধরাত্মীযকটাক্ষদৃষ্ট্যা

ঋজ্ব্যাতিকারুণ্যসুধাভিবৃষ্ট্যা ॥ 35॥

দুর্বারসংসারদবাগ্নিতপ্তং

দোধূযমানং দুরদৃষ্টবাতৈঃ ।

ভীতং প্রপন্নং পরিপাহি মৃত্যোঃ

শরণ্যমন্যদ্যদহং ন জানে ॥ 36॥ (পাঠভেদঃ - অন্যং)

শান্তা মহান্তো নিবসন্তি সন্তো

বসন্তবল্লোকহিতং চরন্তঃ ।

তীর্ণাঃ স্বযং ভীমভবার্ণবং জনা-

নহেতুনান্যানপি তারযন্তঃ ॥ 37॥

অযং স্বভাবঃ স্বত এব যত্পর-

শ্রমাপনোদপ্রবণং মহাত্মনাম্ ।

সুধাংশুরেষ স্বযমর্ককর্কশ-

প্রভাভিতপ্তামবতি ক্ষিতিং কিল ॥ 38॥

ব্রহ্মানন্দরসানুভূতিকলিতৈঃ পূতৈঃ সুশীতৈর্যুতৈ- (পাঠভেদঃ - সুশীতৈঃ সিতৈঃ)

র্যুষ্মদ্বাক্কলশোজ্ঝিতৈঃ শ্রুতিসুখৈর্বাক্যামৃতৈঃ সেচয ।

সন্তপ্তং ভবতাপদাবদহনজ্বালাভিরেনং প্রভো

ধন্যাস্তে ভবদীক্ষণক্ষণগতেঃ পাত্রীকৃতাঃ স্বীকৃতাঃ ॥ 39॥

কথং তরেযং ভবসিন্ধুমেতং

কা বা গতির্মে কতমোঽস্ত্যুপাযঃ ।

জানে ন কিঞ্চিত্কৃপযাঽব মাং প্রভো

সংসারদুঃখক্ষতিমাতনুষ্ব ॥ 40॥

তথা বদন্তং শরণাগতং স্বং

সংসারদাবানলতাপতপ্তম্ ।

নিরীক্ষ্য কারুণ্যরসার্দ্রদৃষ্ট্যা

দদ্যাদভীতিং সহসা মহাত্মা ॥ 41॥

বিদ্বান্ স তস্মা উপসত্তিমীযুষে

মুমুক্ষবে সাধু যথোক্তকারিণে ।

প্রশান্তচিত্তায শমান্বিতায

তত্ত্বোপদেশং কৃপযৈব কুর্যাত্ ॥ 42॥

মা ভৈষ্ট বিদ্বংস্তব নাস্ত্যপাযঃ

সংসারসিন্ধোস্তরণেঽস্ত্যুপাযঃ ।

যেনৈব যাতা যতযোঽস্য পারং

তমেব মার্গং তব নির্দিশামি ॥ 43॥

অস্ত্যুপাযো মহান্কশ্চিত্সংসারভযনাশনঃ ।

তেন তীর্ত্বা ভবাম্ভোধিং পরমানন্দমাপ্স্যসি ॥ 44॥

বেদান্তার্থবিচারেণ জাযতে জ্ঞানমুত্তমম্ ।

তেনাত্যন্তিকসংসারদুঃখনাশো ভবত্যনু ॥ 45॥

শ্রদ্ধাভক্তিধ্যানযোগান্মুমুক্ষোঃ

মুক্তের্হেতূন্বক্তি সাক্ষাচ্ছ্রুতের্গীঃ ।

যো বা এতেষ্বেব তিষ্ঠত্যমুষ্য

মোক্ষোঽবিদ্যাকল্পিতাদ্দেহবন্ধাত্ ॥ 46॥

অজ্ঞানযোগাত্পরমাত্মনস্তব

হ্যনাত্মবন্ধস্তত এব সংসৃতিঃ ।

তযোর্বিবেকোদিতবোধবহ্নিঃ

অজ্ঞানকার্যং প্রদহেত্সমূলম্ ॥ 47॥

শিষ্য উবাচ ।

কৃপযা শ্রূযতাং স্বামিন্প্রশ্নোঽযং ক্রিযতে মযা ।

যদুত্তরমহং শ্রুত্বা কৃতার্থঃ স্যাং ভবন্মুখাত্ ॥ 48॥

কো নাম বন্ধঃ কথমেষ আগতঃ

কথং প্রতিষ্ঠাস্য কথং বিমোক্ষঃ ।

কোঽসাবনাত্মা পরমঃ ক আত্মা

তযোর্বিবেকঃ কথমেতদুচ্যতাম্ ॥ 49॥

শ্রীগুরুবাচ ।

ধন্যোঽসি কৃতকৃত্যোঽসি পাবিতং তে কুলং ত্বযা । (পাঠভেদঃ - পাবিতং)

যদবিদ্যাবন্ধমুক্ত্যা ব্রহ্মীভবিতুমিচ্ছসি ॥ 50॥

ঋণমোচনকর্তারঃ পিতুঃ সন্তি সুতাদযঃ ।

বন্ধমোচনকর্তা তু স্বস্মাদন্যো ন কশ্চন ॥ 51॥

মস্তকন্যস্তভারাদের্দুঃখমন্যৈর্নিবার্যতে ।

ক্ষুধাদিকৃতদুঃখং তু বিনা স্বেন ন কেনচিত্ ॥ 52॥

পথ্যমৌষধসেবা চ ক্রিযতে যেন রোগিণা ।

আরোগ্যসিদ্ধির্দৃষ্টাঽস্য নান্যানুষ্ঠিতকর্মণা ॥ 53॥

বস্তুস্বরূপং স্ফুটবোধচক্ষুষা

স্বেনৈব বেদ্যং ন তু পণ্ডিতেন ।

চন্দ্রস্বরূপং নিজচক্ষুষৈব

জ্ঞাতব্যমন্যৈরবগম্যতে কিম্ ॥ 54॥

অবিদ্যাকামকর্মাদিপাশবন্ধং বিমোচিতুম্ ।

কঃ শক্নুযাদ্বিনাঽঽত্মানং কল্পকোটিশতৈরপি ॥ 55॥

ন যোগেন ন সাঙ্খ্যেন কর্মণা নো ন বিদ্যযা ।

ব্রহ্মাত্মৈকত্ববোধেন মোক্ষঃ সিধ্যতি নান্যথা ॥ 56॥

বীণাযা রূপসৌন্দর্যং তন্ত্রীবাদনসৌষ্ঠবম্ ।

প্রজারঞ্জনমাত্রং তন্ন সাম্রাজ্যায কল্পতে ॥ 57॥

বাগ্বৈখরী শব্দঝরী শাস্ত্রব্যাখ্যানকৌশলম্ ।

বৈদুষ্যং বিদুষাং তদ্বদ্ভুক্তযে ন তু মুক্তযে ॥ 58॥

অবিজ্ঞাতে পরে তত্ত্বে শাস্ত্রাধীতিস্তু নিষ্ফলা ।

বিজ্ঞাতেঽপি পরে তত্ত্বে শাস্ত্রাধীতিস্তু নিষ্ফলা ॥ 59॥

শব্দজালং মহারণ্যং চিত্তভ্রমণকারণম্ ।

অতঃ প্রযত্নাজ্জ্ঞাতব্যং তত্ত্বজ্ঞৈস্তত্ত্বমাত্মনঃ ॥ 60॥ তত্ত্বজ্ঞাত্তত্ত্ব

অজ্ঞানসর্পদষ্টস্য ব্রহ্মজ্ঞানৌষধং বিনা ।

কিমু বেদৈশ্চ শাস্ত্রৈশ্চ কিমু মন্ত্রৈঃ কিমৌষধৈঃ ॥ 61॥

ন গচ্ছতি বিনা পানং ব্যাধিরৌষধশব্দতঃ ।

বিনাঽপরোক্ষানুভবং ব্রহ্মশব্দৈর্ন মুচ্যতে ॥ 62॥

অকৃত্বা দৃশ্যবিলযমজ্ঞাত্বা তত্ত্বমাত্মনঃ ।

ব্রহ্মশব্দৈঃ কুতো মুক্তিরুক্তিমাত্রফলৈর্নৃণাম্ ॥ 63॥ (পাঠভেদঃ - বাহ্যশব্দৈঃ)

অকৃত্বা শত্রুসংহারমগত্বাখিলভূশ্রিযম্ ।

রাজাহমিতি শব্দান্নো রাজা ভবিতুমর্হতি ॥ 64॥

আপ্তোক্তিং খননং তথোপরিশিলাদ্যুত্কর্ষণং স্বীকৃতিং (পাঠভেদঃ - পরিশিলাপাকর্ষণং)

নিক্ষেপঃ সমপেক্ষতে ন হি বহিঃশব্দৈস্তু নির্গচ্ছতি ।

তদ্বদ্ব্রহ্মবিদোপদেশমননধ্যানাদিভির্লভ্যতে

মাযাকার্যতিরোহিতং স্বমমলং তত্ত্বং ন দুর্যুক্তিভিঃ ॥ 65॥

তস্মাত্সর্বপ্রযত্নেন ভববন্ধবিমুক্তযে ।

স্বৈরেব যত্নঃ কর্তব্যো রোগাদাবিব পণ্ডিতৈঃ ॥ 66॥ (পাঠভেদঃ - রোগাদেরিব)

যস্ত্বযাদ্য কৃতঃ প্রশ্নো বরীযাঞ্ছাস্ত্রবিন্মতঃ । (পাঠভেদঃ - সম্মতঃ)

সূত্রপ্রাযো নিগূঢার্থো জ্ঞাতব্যশ্চ মুমুক্ষুভিঃ ॥ 67॥

শঋণুষ্বাবহিতো বিদ্বন্যন্মযা সমুদীর্যতে ।

তদেতচ্ছ্রবণাত্সদ্যো ভববন্ধাদ্বিমোক্ষ্যসে ॥ 68॥

মোক্ষস্য হেতুঃ প্রথমো নিগদ্যতে

বৈরাগ্যমত্যন্তমনিত্যবস্তুষু ।

ততঃ শমশ্চাপি দমস্তিতিক্ষা

ন্যাসঃ প্রসক্তাখিলকর্মণাং ভৃশম্ ॥ 69॥

ততঃ শ্রুতিস্তন্মননং সতত্ত্ব-

ধ্যানং চিরং নিত্যনিরন্তরং মুনেঃ ।

ততোঽবিকল্পং পরমেত্য বিদ্বান্

ইহৈব নির্বাণসুখং সমৃচ্ছতি ॥ 70॥

যদ্বোদ্ধব্যং তবেদানীমাত্মানাত্মবিবেচনম্ ।

তদুচ্যতে মযা সম্যক্ শ্রুত্বাত্মন্যবধারয ॥ 71॥

মজ্জাস্থিমেদঃপলরক্তচর্ম-

ত্বগাহ্বযৈর্ধাতুভিরেভিরন্বিতম্ ।

পাদোরুবক্ষোভুজপৃষ্ঠমস্তকৈঃ

অঙ্গৈরুপাঙ্গৈরুপযুক্তমেতত্ ॥ 72॥

অহম্মমেতি প্রথিতং শরীরং

মোহাস্পদং স্থূলমিতীর্যতে বুধৈঃ ।

নভোনভস্বদ্দহনাম্বুভূমযঃ

সূক্ষ্মাণি ভূতানি ভবন্তি তানি ॥ 73॥

পরস্পরাংশৈর্মিলিতানি ভূত্বা

স্থূলানি চ স্থূলশরীরহেতবঃ ।

মাত্রাস্তদীযা বিষযা ভবন্তি

শব্দাদযঃ পঞ্চ সুখায ভোক্তুঃ ॥ 74॥

য এষু মূঢা বিষযেষু বদ্ধা

রাগোরুপাশেন সুদুর্দমেন ।

আযান্তি নির্যান্ত্যধ ঊর্ধ্বমুচ্চৈঃ

স্বকর্মদূতেন জবেন নীতাঃ ॥ 75॥

শব্দাদিভিঃ পঞ্চভিরেব পঞ্চ

পঞ্চত্বমাপুঃ স্বগুণেন বদ্ধাঃ ।

কুরঙ্গমাতঙ্গপতঙ্গমীন-

ভৃঙ্গা নরঃ পঞ্চভিরঞ্চিতঃ কিম্ ॥ 76॥

দোষেণ তীব্রো বিষযঃ কৃষ্ণসর্পবিষাদপি ।

বিষং নিহন্তি ভোক্তারং দ্রষ্টারং চক্ষুষাপ্যযম্ ॥ 77॥

বিষযাশামহাপাশাদ্যো বিমুক্তঃ সুদুস্ত্যজাত্ ।

স এব কল্পতে মুক্ত্যৈ নান্যঃ ষট্শাস্ত্রবেদ্যপি ॥ 78॥

আপাতবৈরাগ্যবতো মুমুক্ষূন্

ভবাব্ধিপারং প্রতিযাতুমুদ্যতান্ ।

আশাগ্রহো মজ্জযতেঽন্তরালে

নিগৃহ্য কণ্ঠে বিনিবর্ত্য বেগাত্ ॥ 79॥

বিষযাখ্যগ্রহো যেন সুবিরক্ত্যসিনা হতঃ ।

স গচ্ছতি ভবাম্ভোধেঃ পারং প্রত্যূহবর্জিতঃ ॥ 80॥

বিষমবিষযমার্গৈর্গচ্ছতোঽনচ্ছবুদ্ধেঃ (পাঠভেদঃ - বিষযমার্গে গচ্ছতো)

প্রতিপদমভিযাতো মৃত্যুরপ্যেষ বিদ্ধি । (পাঠভেদঃ - প্রতিপদমভিঘাতো মৃত্যুরপ্যেষ সিদ্ধঃ)

হিতসুজনগুরূক্ত্যা গচ্ছতঃ স্বস্য যুক্ত্যা

প্রভবতি ফলসিদ্ধিঃ সত্যমিত্যেব বিদ্ধি ॥ 81॥

মোক্ষস্য কাঙ্ক্ষা যদি বৈ তবাস্তি

ত্যজাতিদূরাদ্বিষযান্বিষং যথা ।

পীযূষবত্তোষদযাক্ষমার্জব-

প্রশান্তিদান্তীর্ভজ নিত্যমাদরাত্ ॥ 82॥

অনুক্ষণং যত্পরিহৃত্য কৃত্যং

অনাদ্যবিদ্যাকৃতবন্ধমোক্ষণম্ ।

দেহঃ পরার্থোঽযমমুষ্য পোষণে

যঃ সজ্জতে স স্বমনেন হন্তি ॥ 83॥

শরীরপোষণার্থী সন্ য আত্মানং দিদৃক্ষতি । (পাঠভেদঃ - দিদৃক্ষতে)

গ্রাহং দারুধিযা ধৃত্বা নদীং তর্তুং স গচ্ছতি ॥ 84॥ (পাঠভেদঃ - স ইচ্ছতি)

মোহ এব মহামৃত্যুর্মুমুক্ষোর্বপুরাদিষু ।

মোহো বিনির্জিতো যেন স মুক্তিপদমর্হতি ॥ 85॥

মোহং জহি মহামৃত্যুং দেহদারসুতাদিষু ।

যং জিত্বা মুনযো যান্তি তদ্বিষ্ণোঃ পরমং পদম্ ॥ 86॥

ত্বঙ্মাংসরুধিরস্নাযুমেদোমজ্জাস্থিসঙ্কুলম্ ।

পূর্ণং মূত্রপুরীষাভ্যাং স্থূলং নিন্দ্যমিদং বপুঃ ॥ 87॥

পঞ্চীকৃতেভ্যো ভূতেভ্যঃ স্থূলেভ্যঃ পূর্বকর্মণা ।

সমুত্পন্নমিদং স্থূলং ভোগাযতনমাত্মনঃ ।

অবস্থা জাগরস্তস্য স্থূলার্থানুভবো যতঃ ॥ 88॥

বাহ্যেন্দ্রিযৈঃ স্থূলপদার্থসেবাং

স্রক্চন্দনস্ত্র্যাদিবিচিত্ররূপাম্ ।

করোতি জীবঃ স্বযমেতদাত্মনা

তস্মাত্প্রশস্তির্বপুষোঽস্য জাগরে ॥ 89॥

সর্বোঽপি বাহ্যসংসারঃ পুরুষস্য যদাশ্রযঃ ।

বিদ্ধি দেহমিদং স্থূলং গৃহবদ্গৃহমেধিনঃ ॥ 90॥

স্থূলস্য সম্ভবজরামরণানি ধর্মাঃ

স্থৌল্যাদযো বহুবিধাঃ শিশুতাদ্যবস্থাঃ ।

বর্ণাশ্রমাদিনিযমা বহুধাঽঽমযাঃ স্যুঃ

পূজাবমানবহুমানমুখা বিশেষাঃ ॥ 91॥

বুদ্ধীন্দ্রিযাণি শ্রবণং ত্বগক্ষি

ঘ্রাণং চ জিহ্বা বিষযাববোধনাত্ ।

বাক্পাণিপাদা গুদমপ্যুপস্থঃ (পাঠভেদঃ - উপস্থং)

কর্মেন্দ্রিযাণি প্রবণেন কর্মসু ॥ 92॥ (পাঠভেদঃ - প্রবণানি)

নিগদ্যতেঽন্তঃকরণং মনোধীঃ

অহঙ্কৃতিশ্চিত্তমিতি স্ববৃত্তিভিঃ ।

মনস্তু সঙ্কল্পবিকল্পনাদিভিঃ

বুদ্ধিঃ পদার্থাধ্যবসাযধর্মতঃ ॥ 93॥

অত্রাভিমানাদহমিত্যহঙ্কৃতিঃ ।

স্বার্থানুসন্ধানগুণেন চিত্তম্ ॥ 94॥

প্রাণাপানব্যানোদানসমানা ভবত্যসৌ প্রাণঃ ।

স্বযমেব বৃত্তিভেদাদ্বিকৃতিভেদাত্সুবর্ণসলিলাদিবত্ ॥ 95॥ (পাঠভেদঃ - বিকৃতের্ভেদাত্সুবর্ণসলিলমিব)

বাগাদি পঞ্চ শ্রবণাদি পঞ্চ

প্রাণাদি পঞ্চাভ্রমুখানি পঞ্চ ।

বুদ্ধ্যাদ্যবিদ্যাপি চ কামকর্মণী

পুর্যষ্টকং সূক্ষ্মশরীরমাহুঃ ॥ 96॥

ইদং শরীরং শ‍ঋণু সূক্ষ্মসঞ্জ্ঞিতং

লিঙ্গং ত্বপঞ্চীকৃতভূতসম্ভবম্ ।

সবাসনং কর্মফলানুভাবকং

স্বাজ্ঞানতোঽনাদিরুপাধিরাত্মনঃ ॥ 97॥

স্বপ্নো ভবত্যস্য বিভক্ত্যবস্থা

স্বমাত্রশেষেণ বিভাতি যত্র ।

স্বপ্নে তু বুদ্ধিঃ স্বযমেব জাগ্রত্

কালীননানাবিধবাসনাভিঃ ॥ 98॥

কর্ত্রাদিভাবং প্রতিপদ্য রাজতে

যত্র স্বযং ভাতি হ্যযং পরাত্মা । (পাঠভেদঃ - স্বযঞ্জ্যোতিরযং)

ধীমাত্রকোপাধিরশেষসাক্ষী

ন লিপ্যতে তত্কৃতকর্মলেশৈঃ । কর্মলেপৈঃ

যস্মাদসঙ্গস্তত এব কর্মভিঃ

ন লিপ্যতে কিঞ্চিদুপাধিনা কৃতৈঃ ॥ 99॥

সর্বব্যাপৃতিকরণং লিঙ্গমিদং স্যাচ্চিদাত্মনঃ পুংসঃ ।

বাস্যাদিকমিব তক্ষ্ণস্তেনৈবাত্মা ভবত্যসঙ্গোঽযম্ ॥ 100॥

অন্ধত্বমন্দত্বপটুত্বধর্মাঃ

সৌগুণ্যবৈগুণ্যবশাদ্ধি চক্ষুষঃ ।

বাধির্যমূকত্বমুখাস্তথৈব

শ্রোত্রাদিধর্মা ন তু বেত্তুরাত্মনঃ ॥ 101॥

উচ্ছ্বাসনিঃশ্বাসবিজৃম্ভণক্ষু-

ত্প্রস্যন্দনাদ্যুত্ক্রমণাদিকাঃ ক্রিযাঃ । (পাঠভেদঃ - প্রস্পন্দনাদ্য্)

প্রাণাদিকর্মাণি বদন্তি তজ্ঞাঃ (পাঠভেদঃ - তজ্জ্ঞাঃ)

প্রাণস্য ধর্মাবশনাপিপাসে ॥ 102॥

অন্তঃকরণমেতেষু চক্ষুরাদিষু বর্ষ্মণি ।

অহমিত্যভিমানেন তিষ্ঠত্যাভাসতেজসা ॥ 103॥

অহঙ্কারঃ স বিজ্ঞেযঃ কর্তা ভোক্তাভিমান্যযম্ ।

সত্ত্বাদিগুণযোগেন চাবস্থাত্রযমশ্নুতে ॥ 104॥ (পাঠভেদঃ - যোগেনাবস্থাত্রিতযম্শ্নুতে)

বিষযাণামানুকূল্যে সুখী দুঃখী বিপর্যযে ।

সুখং দুঃখং চ তদ্ধর্মঃ সদানন্দস্য নাত্মনঃ ॥ 105॥

আত্মার্থত্বেন হি প্রেযান্বিষযো ন স্বতঃ প্রিযঃ ।

স্বত এব হি সর্বেষামাত্মা প্রিযতমো যতঃ ।

তত আত্মা সদানন্দো নাস্য দুঃখং কদাচন ॥ 106॥

যত্সুষুপ্তৌ নির্বিষয আত্মানন্দোঽনুভূযতে ।

শ্রুতিঃ প্রত্যক্ষমৈতিহ্যমনুমানং চ জাগ্রতি ॥ 107॥

অব্যক্তনাম্নী পরমেশশক্তিঃ

অনাদ্যবিদ্যা ত্রিগুণাত্মিকা পরা ।

কার্যানুমেযা সুধিযৈব মাযা

যযা জগত্সর্বমিদং প্রসূযতে ॥ 108॥

সন্নাপ্যসন্নাপ্যুভযাত্মিকা নো

ভিন্নাপ্যভিন্নাপ্যুভযাত্মিকা নো ।

সাঙ্গাপ্যনঙ্গা হ্যুভযাত্মিকা নো (পাঠভেদঃ - অনঙ্গাপ্যুভযাত্মিকা)

মহাদ্ভুতাঽনির্বচনীযরূপা ॥ 109॥

শুদ্ধাদ্বযব্রহ্মবিবোধনাশ্যা

সর্পভ্রমো রজ্জুবিবেকতো যথা ।

রজস্তমঃসত্ত্বমিতি প্রসিদ্ধা

গুণাস্তদীযাঃ প্রথিতৈঃ স্বকার্যৈঃ ॥ 110॥

বিক্ষেপশক্তী রজসঃ ক্রিযাত্মিকা

যতঃ প্রবৃত্তিঃ প্রসৃতা পুরাণী ।

রাগাদযোঽস্যাঃ প্রভবন্তি নিত্যং

দুঃখাদযো যে মনসো বিকারাঃ ॥ 111॥

কামঃ ক্রোধো লোভদম্ভাদ্যসূযা (পাঠভেদঃ - লোভদম্ভাভ্যসূযা)

অহঙ্কারের্ষ্যামত্সরাদ্যাস্তু ঘোরাঃ ।

ধর্মা এতে রাজসাঃ পুম্প্রবৃত্তি-

র্যস্মাদেষা তদ্রজো বন্ধহেতুঃ ॥ 112॥ (পাঠভেদঃ - যস্মাদেতত্তদ্রজো)

এষাঽঽবৃতির্নাম তমোগুণস্য

শক্তির্মযা বস্ত্ববভাসতেঽন্যথা । শক্তির্যযা

সৈষা নিদানং পুরুষস্য সংসৃতেঃ

বিক্ষেপশক্তেঃ প্রবণস্য হেতুঃ ॥ 113॥ (পাঠভেদঃ - প্রসরস্য)

প্রজ্ঞাবানপি পণ্ডিতোঽপি চতুরোঽপ্যত্যন্তসূক্ষ্মাত্মদৃগ্- (পাঠভেদঃ - সূক্ষ্মার্থদৃগ্)

ব্যালীঢস্তমসা ন বেত্তি বহুধা সম্বোধিতোঽপি স্ফুটম্ ।

ভ্রান্ত্যারোপিতমেব সাধু কলযত্যালম্বতে তদ্গুণান্

হন্তাসৌ প্রবলা দুরন্ততমসঃ শক্তির্মহত্যাবৃতিঃ ॥ 114॥

অভাবনা বা বিপরীতভাবনাঽ- (পাঠভেদঃ - বিপরীতভাবনা)

সম্ভাবনা বিপ্রতিপত্তিরস্যাঃ ।

সংসর্গযুক্তং ন বিমুঞ্চতি ধ্রুবং

বিক্ষেপশক্তিঃ ক্ষপযত্যজস্রম্ ॥ 115॥

অজ্ঞানমালস্যজডত্বনিদ্রা-

প্রমাদমূঢত্বমুখাস্তমোগুণাঃ ।

এতৈঃ প্রযুক্তো ন হি বেত্তি কিঞ্চিত্

নিদ্রালুবত্স্তম্ভবদেব তিষ্ঠতি ॥ 116॥

সত্ত্বং বিশুদ্ধং জলবত্তথাপি

তাভ্যাং মিলিত্বা সরণায কল্পতে ।

যত্রাত্মবিম্বঃ প্রতিবিম্বিতঃ সন্

প্রকাশযত্যর্ক ইবাখিলং জডম্ ॥ 117॥

মিশ্রস্য সত্ত্বস্য ভবন্তি ধর্মাঃ

ত্বমানিতাদ্যা নিযমা যমাদ্যাঃ ।

শ্রদ্ধা চ ভক্তিশ্চ মুমুক্ষুতা চ

দৈবী চ সম্পত্তিরসন্নিবৃত্তিঃ ॥ 118॥

বিশুদ্ধসত্ত্বস্য গুণাঃ প্রসাদঃ

স্বাত্মানুভূতিঃ পরমা প্রশান্তিঃ ।

তৃপ্তিঃ প্রহর্ষঃ পরমাত্মনিষ্ঠা

যযা সদানন্দরসং সমৃচ্ছতি ॥ 119॥

অব্যক্তমেতত্ত্রিগুণৈর্নিরুক্তং

তত্কারণং নাম শরীরমাত্মনঃ ।

সুষুপ্তিরেতস্য বিভক্ত্যবস্থা

প্রলীনসর্বেন্দ্রিযবুদ্ধিবৃত্তিঃ ॥ 120॥

সর্বপ্রকারপ্রমিতিপ্রশান্তিঃ

বীজাত্মনাবস্থিতিরেব বুদ্ধেঃ ।

সুষুপ্তিরেতস্য কিল প্রতীতিঃ (পাঠভেদঃ - সুষুপ্তিরত্রাস্য)

কিঞ্চিন্ন বেদ্মীতি জগত্প্রসিদ্ধেঃ ॥ 121॥

দেহেন্দ্রিযপ্রাণমনোঽহমাদযঃ

সর্বে বিকারা বিষযাঃ সুখাদযঃ ।

ব্যোমাদিভূতান্যখিলং চ বিশ্বং

অব্যক্তপর্যন্তমিদং হ্যনাত্মা ॥ 122॥

মাযা মাযাকার্যং সর্বং মহদাদিদেহপর্যন্তম্ ।

অসদিদমনাত্মতত্ত্বং বিদ্ধি ত্বং মরুমরীচিকাকল্পম্ ॥ 123॥

অথ তে সম্প্রবক্ষ্যামি স্বরূপং পরমাত্মনঃ ।

যদ্বিজ্ঞায নরো বন্ধান্মুক্তঃ কৈবল্যমশ্নুতে ॥ 124॥

অস্তি কশ্চিত্স্বযং নিত্যমহম্প্রত্যযলম্বনঃ ।

অবস্থাত্রযসাক্ষী সন্পঞ্চকোশবিলক্ষণঃ ॥ 125॥

যো বিজানাতি সকলং জাগ্রত্স্বপ্নসুষুপ্তিষু ।

বুদ্ধিতদ্বৃত্তিসদ্ভাবমভাবমহমিত্যযম্ ॥ 126॥

যঃ পশ্যতি স্বযং সর্বং যং ন পশ্যতি কশ্চন । (পাঠভেদঃ - কিঞ্চন)

যশ্চেতযতি বুদ্ধ্যাদি ন তদ্যং চেতযত্যযম্ ॥ 127॥

যেন বিশ্বমিদং ব্যাপ্তং যং ন ব্যাপ্নোতি কিঞ্চন ।

আভারূপমিদং সর্বং যং ভান্তমনুভাত্যযম্ ॥ 128॥

যস্য সন্নিধিমাত্রেণ দেহেন্দ্রিযমনোধিযঃ ।

বিষযেষু স্বকীযেষু বর্তন্তে প্রেরিতা ইব ॥ 129॥

অহঙ্কারাদিদেহান্তা বিষযাশ্চ সুখাদযঃ ।

বেদ্যন্তে ঘটবদ্যেন নিত্যবোধস্বরূপিণা ॥ 130॥

এষোঽন্তরাত্মা পুরুষঃ পুরাণো

নিরন্তরাখণ্ডসুখানুভূতিঃ ।

সদৈকরূপঃ প্রতিবোধমাত্রো

যেনেষিতা বাগসবশ্চরন্তি ॥ 131॥

অত্রৈব সত্ত্বাত্মনি ধীগুহাযাং

অব্যাকৃতাকাশ উশত্প্রকাশঃ । (পাঠভেদঃ - উরুপ্রকাশঃ)

আকাশ উচ্চৈ রবিবত্প্রকাশতে

স্বতেজসা বিশ্বমিদং প্রকাশযন্ ॥ 132॥

জ্ঞাতা মনোঽহঙ্কৃতিবিক্রিযাণাং

দেহেন্দ্রিযপ্রাণকৃতক্রিযাণাম্ ।

অযোঽগ্নিবত্তাননুবর্তমানো

ন চেষ্টতে নো বিকরোতি কিঞ্চন ॥ 133॥

ন জাযতে নো ম্রিযতে ন বর্ধতে

ন ক্ষীযতে নো বিকরোতি নিত্যঃ ।

বিলীযমানেঽপি বপুষ্যমুষ্মি-

ন্ন লীযতে কুম্ভ ইবাম্বরং স্বযম্ ॥ 134॥

প্রকৃতিবিকৃতিভিন্নঃ শুদ্ধবোধস্বভাবঃ

সদসদিদমশেষং ভাসযন্নির্বিশেষঃ ।

বিলসতি পরমাত্মা জাগ্রদাদিষ্ববস্থা-

স্বহমহমিতি সাক্ষাত্সাক্ষিরূপেণ বুদ্ধেঃ ॥ 135॥

নিযমিতমনসামুং ত্বং স্বমাত্মানমাত্ম-

ন্যযমহমিতি সাক্ষাদ্বিদ্ধি বুদ্ধিপ্রসাদাত্ ।

জনিমরণতরঙ্গাপারসংসারসিন্ধুং

প্রতর ভব কৃতার্থো ব্রহ্মরূপেণ সংস্থঃ ॥ 136॥

অত্রানাত্মন্যহমিতি মতির্বন্ধ এষোঽস্য পুংসঃ

প্রাপ্তোঽজ্ঞানাজ্জননমরণক্লেশসম্পাতহেতুঃ ।

যেনৈবাযং বপুরিদমসত্সত্যমিত্যাত্মবুদ্ধ্যা

পুষ্যত্যুক্ষত্যবতি বিষযৈস্তন্তুভিঃ কোশকৃদ্বত্ ॥ 137॥

অতস্মিংস্তদ্বুদ্ধিঃ প্রভবতি বিমূঢস্য তমসা

বিবেকাভাবাদ্বৈ স্ফুরতি ভুজগে রজ্জুধিষণা ।

ততোঽনর্থব্রাতো নিপততি সমাদাতুরধিকঃ

ততো যোঽসদ্গ্রাহঃ স হি ভবতি বন্ধঃ শঋণু সখে ॥ 138॥

অখণ্ডনিত্যাদ্বযবোধশক্ত্যা

স্ফুরন্তমাত্মানমনন্তবৈভবম্ ।

সমাবৃণোত্যাবৃতিশক্তিরেষা

তমোমযী রাহুরিবার্কবিম্বম্ ॥ 139॥

তিরোভূতে স্বাত্মন্যমলতরতেজোবতি পুমান্

অনাত্মানং মোহাদহমিতি শরীরং কলযতি ।

ততঃ কামক্রোধপ্রভৃতিভিরমুং বন্ধনগুণৈঃ (পাঠভেদঃ - বন্ধকগুণৈঃ)

পরং বিক্ষেপাখ্যা রজস উরুশক্তির্ব্যথযতি ॥ 140॥

মহামোহগ্রাহগ্রসনগলিতাত্মাবগমনো

ধিযো নানাবস্থাং স্বযমভিনযংস্তদ্গুণতযা । (পাঠভেদঃ - নানাবস্থাঃ)

অপারে সংসারে বিষযবিষপূরে জলনিধৌ

নিমজ্যোন্মজ্যাযং ভ্রমতি কুমতিঃ কুত্সিতগতিঃ ॥ 141॥

ভানুপ্রভাসঞ্জনিতাভ্রপঙ্ক্তিঃ

ভানুং তিরোধায বিজৃম্ভতে যথা ।

আত্মোদিতাহঙ্কৃতিরাত্মতত্ত্বং

তথা তিরোধায বিজৃম্ভতে স্বযম্ ॥ 142॥

কবলিতদিননাথে দুর্দিনে সান্দ্রমেঘৈঃ

ব্যথযতি হিমঝঞ্ঝাবাযুরুগ্রো যথৈতান্ ।

অবিরততমসাঽঽত্মন্যাবৃতে মূঢবুদ্ধিং

ক্ষপযতি বহুদুঃখৈস্তীব্রবিক্ষেপশক্তিঃ ॥ 143॥

এতাভ্যামেব শক্তিভ্যাং বন্ধঃ পুংসঃ সমাগতঃ ।

যাভ্যাং বিমোহিতো দেহং মত্বাঽঽত্মানং ভ্রমত্যযম্ ॥ 144॥

বীজং সংসৃতিভূমিজস্য তু তমো দেহাত্মধীরঙ্কুরো

রাগঃ পল্লবমম্বু কর্ম তু বপুঃ স্কন্ধোঽসবঃ শাখিকাঃ ।

অগ্রাণীন্দ্রিযসংহতিশ্চ বিষযাঃ পুষ্পাণি দুঃখং ফলং

নানাকর্মসমুদ্ভবং বহুবিধং ভোক্তাত্র জীবঃ খগঃ ॥ 145॥

অজ্ঞানমূলোঽযমনাত্মবন্ধো

নৈসর্গিকোঽনাদিরনন্ত ঈরিতঃ ।

জন্মাপ্যযব্যাধিজরাদিদুঃখ-

প্রবাহপাতং জনযত্যমুষ্য ॥ 146॥

নাস্ত্রৈর্ন শস্ত্রৈরনিলেন বহ্নিনা

ছেত্তুং ন শক্যো ন চ কর্মকোটিভিঃ ।

বিবেকবিজ্ঞানমহাসিনা বিনা

ধাতুঃ প্রসাদেন শিতেন মঞ্জুনা ॥ 147॥

শ্রুতিপ্রমাণৈকমতেঃ স্বধর্ম

নিষ্ঠা তযৈবাত্মবিশুদ্ধিরস্য ।

বিশুদ্ধবুদ্ধেঃ পরমাত্মবেদনং

তেনৈব সংসারসমূলনাশঃ ॥ 148॥

কোশৈরন্নমযাদ্যৈঃ পঞ্চভিরাত্মা ন সংবৃতো ভাতি ।

নিজশক্তিসমুত্পন্নৈঃ শৈবালপটলৈরিবাম্বু বাপীস্থম্ ॥ 149॥

তচ্ছৈবালাপনযে সম্যক্ সলিলং প্রতীযতে শুদ্ধম্ ।

তৃষ্ণাসন্তাপহরং সদ্যঃ সৌখ্যপ্রদং পরং পুংসঃ ॥ 150॥

পঞ্চানামপি কোশানামপবাদে বিভাত্যযং শুদ্ধঃ ।

নিত্যানন্দৈকরসঃ প্রত্যগ্রূপঃ পরঃ স্বযঞ্জ্যোতিঃ ॥ 151॥

আত্মানাত্মবিবেকঃ কর্তব্যো বন্ধমুক্তযে বিদুষা ।

তেনৈবানন্দী ভবতি স্বং বিজ্ঞায সচ্চিদানন্দম্ ॥ 152॥

মুঞ্জাদিষীকামিব দৃশ্যবর্গাত্

প্রত্যঞ্চমাত্মানমসঙ্গমক্রিযম্ ।

বিবিচ্য তত্র প্রবিলাপ্য সর্বং

তদাত্মনা তিষ্ঠতি যঃ স মুক্তঃ ॥ 153॥

দেহোঽযমন্নভবনোঽন্নমযস্তু কোশ- (পাঠভেদঃ - কোশো)

শ্চান্নেন জীবতি বিনশ্যতি তদ্বিহীনঃ । (পাঠভেদঃ - হ্যন্নেন)

ত্বক্চর্মমাংসরুধিরাস্থিপুরীষরাশি-

র্নাযং স্বযং ভবিতুমর্হতি নিত্যশুদ্ধঃ ॥ 154॥

পূর্বং জনেরধিমৃতেরপি নাযমস্তি (পাঠভেদঃ - জনেরপিমৃতেরথ)

জাতক্ষণঃ ক্ষণগুণোঽনিযতস্বভাবঃ ।

নৈকো জডশ্চ ঘটবত্পরিদৃশ্যমানঃ

স্বাত্মা কথং ভবতি ভাববিকারবেত্তা ॥ 155॥

পাণিপাদাদিমান্দেহো নাত্মা ব্যঙ্গেঽপি জীবনাত্ ।

তত্তচ্ছক্তেরনাশাচ্চ ন নিযম্যো নিযামকঃ ॥ 156॥

দেহতদ্ধর্মতত্কর্মতদবস্থাদিসাক্ষিণঃ ।

সত এব স্বতঃসিদ্ধং তদ্বৈলক্ষণ্যমাত্মনঃ ॥ 157॥

শল্যরাশির্মাংসলিপ্তো মলপূর্ণোঽতিকশ্মলঃ ।

কথং ভবেদযং বেত্তা স্বযমেতদ্বিলক্ষণঃ ॥ 158॥

ত্বঙ্মাংসমেদোঽস্থিপুরীষরাশা-

বহম্মতিং মূঢজনঃ করোতি ।

বিলক্ষণং বেত্তি বিচারশীলো

নিজস্বরূপং পরমার্থভূতম্ ॥ 159॥

দেহোঽহমিত্যেব জডস্য বুদ্ধিঃ

দেহে চ জীবে বিদুষস্ত্বহন্ধীঃ ।

বিবেকবিজ্ঞানবতো মহাত্মনো

ব্রহ্মাহমিত্যেব মতিঃ সদাত্মনি ॥ 160॥

অত্রাত্মবুদ্ধিং ত্যজ মূঢবুদ্ধে

ত্বঙ্মাংসমেদোঽস্থিপুরীষরাশৌ ।

সর্বাত্মনি ব্রহ্মণি নির্বিকল্পে

কুরুষ্ব শান্তিং পরমাং ভজস্ব ॥ 161॥

দেহেন্দ্রিযাদাবসতি ভ্রমোদিতাং

বিদ্বানহন্তাং ন জহাতি যাবত্ ।

তাবন্ন তস্যাস্তি বিমুক্তিবার্তা-

প্যস্ত্বেষ বেদান্তনযান্তদর্শী ॥ 162॥

ছাযাশরীরে প্রতিবিম্বগাত্রে

যত্স্বপ্নদেহে হৃদি কল্পিতাঙ্গে ।

যথাত্মবুদ্ধিস্তব নাস্তি কাচি-

জ্জীবচ্ছরীরে চ তথৈব মাঽস্তু ॥ 163॥

দেহাত্মধীরেব নৃণামসদ্ধিযাং

জন্মাদিদুঃখপ্রভবস্য বীজম্ ।

যতস্ততস্ত্বং জহি তাং প্রযত্নাত্

ত্যক্তে তু চিত্তে ন পুনর্ভবাশা ॥ 164॥

কর্মেন্দ্রিযৈঃ পঞ্চভিরঞ্চিতোঽযং

প্রাণো ভবেত্প্রাণমযস্তু কোশঃ ॥

যেনাত্মবানন্নমযোঽনুপূর্ণঃ

প্রবর্ততেঽসৌ সকলক্রিযাসু ॥ 165॥

নৈবাত্মাপি প্রাণমযো বাযুবিকারো (পাঠভেদঃ - নৈবাত্মাযং)

গন্তাঽঽগন্তা বাযুবদন্তর্বহিরেষঃ ।

যস্মাত্কিঞ্চিত্ক্বাপি ন বেত্তীষ্টমনিষ্টং

স্বং বান্যং বা কিঞ্চন নিত্যং পরতন্ত্রঃ ॥ 166॥

জ্ঞানেন্দ্রিযাণি চ মনশ্চ মনোমযঃ স্যাত্

কোশো মমাহমিতি বস্তুবিকল্পহেতুঃ ।

সঞ্জ্ঞাদিভেদকলনাকলিতো বলীযাং-

স্তত্পূর্বকোশমভিপূর্য বিজৃম্ভতে যঃ ॥ 167॥ (পাঠভেদঃ - অনুপূর্য)

পঞ্চেন্দ্রিযৈঃ পঞ্চভিরেব হোতৃভিঃ

প্রচীযমানো বিষযাজ্যধারযা ।

জাজ্বল্যমানো বহুবাসনেন্ধনৈঃ

মনোমযাগ্নির্দহতি প্রপঞ্চম্ ॥ 168॥ (পাঠভেদঃ - মনোমযোঽগ্নির্দহতি)

ন হ্যস্ত্যবিদ্যা মনসোঽতিরিক্তা

মনো হ্যবিদ্যা ভববন্ধহেতুঃ ।

তস্মিন্বিনষ্টে সকলং বিনষ্টং

বিজৃম্ভিতেঽস্মিন্সকলং বিজৃম্ভতে ॥ 169॥

স্বপ্নেঽর্থশূন্যে সৃজতি স্বশক্ত্যা

ভোক্ত্রাদিবিশ্বং মন এব সর্বম্ ।

তথৈব জাগ্রত্যপি নো বিশেষঃ

তত্সর্বমেতন্মনসো বিজৃম্ভণম্ ॥ 170॥

সুষুপ্তিকালে মনসি প্রলীনে

নৈবাস্তি কিঞ্চিত্সকলপ্রসিদ্ধেঃ ।

অতো মনঃকল্পিত এব পুংসঃ

সংসার এতস্য ন বস্তুতোঽস্তি ॥ 171॥

বাযুনাঽঽনীযতে মেঘঃ পুনস্তেনৈব নীযতে । (পাঠভেদঃ - বাযুনা নীযতে মেঘঃ পুনস্তেনৈব লীযতে)

মনসা কল্প্যতে বন্ধো মোক্ষস্তেনৈব কল্প্যতে ॥ 172॥

দেহাদিসর্ববিষযে পরিকল্প্য রাগং

বধ্নাতি তেন পুরুষং পশুবদ্গুণেন ।

বৈরস্যমত্র বিষবত্ সুবিধায পশ্চাদ্

এনং বিমোচযতি তন্মন এব বন্ধাত্ ॥ 173॥

তস্মান্মনঃ কারণমস্য জন্তোঃ

বন্ধস্য মোক্ষস্য চ বা বিধানে ।

বন্ধস্য হেতুর্মলিনং রজোগুণৈঃ

মোক্ষস্য শুদ্ধং বিরজস্তমস্কম্ ॥ 174॥

বিবেকবৈরাগ্যগুণাতিরেকা-

চ্ছুদ্ধত্বমাসাদ্য মনো বিমুক্ত্যৈ ।

ভবত্যতো বুদ্ধিমতো মুমুক্ষো-

স্তাভ্যাং দৃঢাভ্যাং ভবিতব্যমগ্রে ॥ 175॥

মনো নাম মহাব্যাঘ্রো বিষযারণ্যভূমিষু ।

চরত্যত্র ন গচ্ছন্তু সাধবো যে মুমুক্ষবঃ ॥ 176॥

মনঃ প্রসূতে বিষযানশেষান্

স্থূলাত্মনা সূক্ষ্মতযা চ ভোক্তুঃ ।

শরীরবর্ণাশ্রমজাতিভেদান্

গুণক্রিযাহেতুফলানি নিত্যম্ ॥ 177॥

অসঙ্গচিদ্রূপমমুং বিমোহ্য

দেহেন্দ্রিযপ্রাণগুণৈর্নিবদ্ধ্য ।

অহম্মমেতি ভ্রমযত্যজস্রং

মনঃ স্বকৃত্যেষু ফলোপভুক্তিষু ॥ 178॥

অধ্যাসদোষাত্পুরুষস্য সংসৃতিঃ (পাঠভেদঃ - অধ্যাসযোগাত্)

অধ্যাসবন্ধস্ত্বমুনৈব কল্পিতঃ ।

রজস্তমোদোষবতোঽবিবেকিনো

জন্মাদিদুঃখস্য নিদানমেতত্ ॥ 179॥

অতঃ প্রাহুর্মনোঽবিদ্যাং পণ্ডিতাস্তত্ত্বদর্শিনঃ ।

যেনৈব ভ্রাম্যতে বিশ্বং বাযুনেবাভ্রমণ্ডলম্ ॥ 180॥

তন্মনঃশোধনং কার্যং প্রযত্নেন মুমুক্ষুণা ।

বিশুদ্ধে সতি চৈতস্মিন্মুক্তিঃ করফলাযতে ॥ 181॥

মোক্ষৈকসক্ত্যা বিষযেষু রাগং

নির্মূল্য সন্ন্যস্য চ সর্বকর্ম ।

সচ্ছ্রদ্ধযা যঃ শ্রবণাদিনিষ্ঠো

রজঃস্বভাবং স ধুনোতি বুদ্ধেঃ ॥ 182॥

মনোমযো নাপি ভবেত্পরাত্মা

হ্যাদ্যন্তবত্ত্বাত্পরিণামিভাবাত্ ।

দুঃখাত্মকত্বাদ্বিষযত্বহেতোঃ

দ্রষ্টা হি দৃশ্যাত্মতযা ন দৃষ্টঃ ॥ 183॥

বুদ্ধির্বুদ্ধীন্দ্রিযৈঃ সার্ধং সবৃত্তিঃ কর্তৃলক্ষণঃ ।

বিজ্ঞানমযকোশঃ স্যাত্পুংসঃ সংসারকারণম্ ॥ 184॥

অনুব্রজচ্চিত্প্রতিবিম্বশক্তিঃ

বিজ্ঞানসঞ্জ্ঞঃ প্রকৃতের্বিকারঃ ।

জ্ঞানক্রিযাবানহমিত্যজস্রং

দেহেন্দ্রিযাদিষ্বভিমন্যতে ভৃশম্ ॥ 185॥

অনাদিকালোঽযমহংস্বভাবো

জীবঃ সমস্তব্যবহারবোঢা ।

করোতি কর্মাণ্যপি পূর্ববাসনঃ (পাঠভেদঃ - কর্মাণ্যনু)

পুণ্যান্যপুণ্যানি চ তত্ফলানি ॥ 186॥

ভুঙ্ক্তে বিচিত্রাস্বপি যোনিষু ব্রজ-

ন্নাযাতি নির্যাত্যধ ঊর্ধ্বমেষঃ ।

অস্যৈব বিজ্ঞানমযস্য জাগ্রত্-

স্বপ্নাদ্যবস্থাঃ সুখদুঃখভোগঃ ॥ 187॥

দেহাদিনিষ্ঠাশ্রমধর্মকর্ম-

গুণাভিমানঃ সততং মমেতি ।

বিজ্ঞানকোশোঽযমতিপ্রকাশঃ

প্রকৃষ্টসান্নিধ্যবশাত্পরাত্মনঃ ।

অতো ভবত্যেষ উপাধিরস্য

যদাত্মধীঃ সংসরতি ভ্রমেণ ॥ 188॥

যোঽযং বিজ্ঞানমযঃ প্রাণেষু হৃদি স্ফুরত্যযং জ্যোতিঃ । (পাঠভেদঃ - স্ফুরত্স্বযঞ্জ্যোতিঃ)

কূটস্থঃ সন্নাত্মা কর্তা ভোক্তা ভবত্যুপাধিস্থঃ ॥ 189॥

স্বযং পরিচ্ছেদমুপেত্য বুদ্ধেঃ

তাদাত্ম্যদোষেণ পরং মৃষাত্মনঃ ।

সর্বাত্মকঃ সন্নপি বীক্ষতে স্বযং

স্বতঃ পৃথক্ত্বেন মৃদো ঘটানিব ॥ 190॥

উপাধিসম্বন্ধবশাত্পরাত্মা

হ্যুপাধিধর্মাননুভাতি তদ্গুণঃ । (পাঠভেদঃ - ঽপ্যুপাধি)

অযোবিকারানবিকারিবহ্নিবত্

সদৈকরূপোঽপি পরঃ স্বভাবাত্ ॥ 191॥

শিষ্য উবাচ ।

ভ্রমেণাপ্যন্যথা বাঽস্তু জীবভাবঃ পরাত্মনঃ ।

তদুপাধেরনাদিত্বান্নানাদের্নাশ ইষ্যতে ॥ 192॥

অতোঽস্য জীবভাবোঽপি নিত্যা ভবতি সংসৃতিঃ ।

ন নিবর্তেত তন্মোক্ষঃ কথং মে শ্রীগুরো বদ ॥ 193॥

শ্রীগুরুরুবাচ ।

সম্যক্পৃষ্টং ত্বযা বিদ্বন্সাবধানেন তচ্ছৃণু ।

প্রামাণিকী ন ভবতি ভ্রান্ত্যা মোহিতকল্পনা ॥ 194॥

ভ্রান্তিং বিনা ত্বসঙ্গস্য নিষ্ক্রিযস্য নিরাকৃতেঃ ।

ন ঘটেতার্থসম্বন্ধো নভসো নীলতাদিবত্ ॥ 195॥

স্বস্য দ্রষ্টুর্নির্গুণস্যাক্রিযস্য

প্রত্যগ্বোধানন্দরূপস্য বুদ্ধেঃ ।

ভ্রান্ত্যা প্রাপ্তো জীবভাবো ন সত্যো

মোহাপাযে নাস্ত্যবস্তুস্বভাবাত্ ॥ 196॥

যাবদ্ভ্রান্তিস্তাবদেবাস্য সত্তা

মিথ্যাজ্ঞানোজ্জৃম্ভিতস্য প্রমাদাত্ ।

রজ্জ্বাং সর্পো ভ্রান্তিকালীন এব

ভ্রান্তের্নাশে নৈব সর্পোঽপি তদ্বত্ ॥ 197॥ (পাঠভেদঃ - সর্পোঽস্তি)

অনাদিত্বমবিদ্যাযাঃ কার্যস্যাপি তথেষ্যতে ।

উত্পন্নাযাং তু বিদ্যাযামাবিদ্যকমনাদ্যপি ॥ 198॥

প্রবোধে স্বপ্নবত্সর্বং সহমূলং বিনশ্যতি ।

অনাদ্যপীদং নো নিত্যং প্রাগভাব ইব স্ফুটম্ ॥ 199॥

অনাদেরপি বিধ্বংসঃ প্রাগভাবস্য বীক্ষিতঃ ।

যদ্বুদ্ধ্যুপাধিসম্বন্ধাত্পরিকল্পিতমাত্মনি ॥ 200॥

জীবত্বং ন ততোঽন্যস্তু স্বরূপেণ বিলক্ষণঃ । (পাঠভেদঃ - ততোঽন্যত্তু)

সম্বন্ধস্ত্বাত্মনো বুদ্ধ্যা মিথ্যাজ্ঞানপুরঃসরঃ ॥ 201॥ (পাঠভেদঃ - সম্বন্ধঃ স্বাত্মনো)

বিনিবৃত্তির্ভবেত্তস্য সম্যগ্জ্ঞানেন নান্যথা ।

ব্রহ্মাত্মৈকত্ববিজ্ঞানং সম্যগ্জ্ঞানং শ্রুতের্মতম্ ॥ 202॥

তদাত্মানাত্মনোঃ সম্যগ্বিবেকেনৈব সিধ্যতি ।

ততো বিবেকঃ কর্তব্যঃ প্রত্যগাত্মসদাত্মনোঃ ॥ 203॥ (পাঠভেদঃ - প্রত্যগাত্মাসদাত্মনোঃ)

জলং পঙ্কবদত্যন্তং পঙ্কাপাযে জলং স্ফুটম্ । (পাঠভেদঃ - পঙ্কবদস্পষ্টং)

যথা ভাতি তথাত্মাপি দোষাভাবে স্ফুটপ্রভঃ ॥ 204॥

অসন্নিবৃত্তৌ তু সদাত্মনা স্ফুটং

প্রতীতিরেতস্য ভবেত্প্রতীচঃ ।

ততো নিরাসঃ করণীয এব

সদাত্মনঃ সাধ্বহমাদিবস্তুনঃ ॥ 205॥ (পাঠভেদঃ - অসদাত্মনঃ)

অতো নাযং পরাত্মা স্যাদ্বিজ্ঞানমযশব্দভাক্ ।

বিকারিত্বাজ্জডত্বাচ্চ পরিচ্ছিন্নত্বহেতুতঃ ।

দৃশ্যত্বাদ্ব্যভিচারিত্বান্নানিত্যো নিত্য ইষ্যতে ॥ 206॥

আনন্দপ্রতিবিম্বচুম্বিততনুর্বৃত্তিস্তমোজৃম্ভিতা

স্যাদানন্দমযঃ প্রিযাদিগুণকঃ স্বেষ্টার্থলাভোদযঃ ।

পুণ্যস্যানুভবে বিভাতি কৃতিনামানন্দরূপঃ স্বযং

সর্বো নন্দতি যত্র সাধু তনুভৃন্মাত্রঃ প্রযত্নং বিনা ॥ 207॥ (পাঠভেদঃ - ভূত্বা নন্দতি)

আনন্দমযকোশস্য সুষুপ্তৌ স্ফূর্তিরুত্কটা ।

স্বপ্নজাগরযোরীষদিষ্টসন্দর্শনাদিনা ॥ 208॥

নৈবাযমানন্দমযঃ পরাত্মা

সোপাধিকত্বাত্প্রকৃতের্বিকারাত্ ।

কার্যত্বহেতোঃ সুকৃতক্রিযাযা

বিকারসঙ্ঘাতসমাহিতত্বাত্ ॥ 209॥

পঞ্চানামপি কোশানাং নিষেধে যুক্তিতঃ শ্রুতেঃ । (পাঠভেদঃ - যুক্তিতঃ কৃতে)

তন্নিষেধাবধি সাক্ষী বোধরূপোঽবশিষ্যতে ॥ 210॥ (পাঠভেদঃ - তন্নিষেধাবধিঃ)

যোঽযমাত্মা স্বযঞ্জ্যোতিঃ পঞ্চকোশবিলক্ষণঃ ।

অবস্থাত্রযসাক্ষী সন্নির্বিকারো নিরঞ্জনঃ ।

সদানন্দঃ স বিজ্ঞেযঃ স্বাত্মত্বেন বিপশ্চিতা ॥ 211॥

শিষ্য উবাচ ।

মিথ্যাত্বেন নিষিদ্ধেষু কোশেষ্বেতেষু পঞ্চসু ।

সর্বাভাবং বিনা কিঞ্চিন্ন পশ্যাম্যত্র হে গুরো ।

বিজ্ঞেযং কিমু বস্ত্বস্তি স্বাত্মনাঽঽত্মবিপশ্চিতা ॥ 212॥ (পাঠভেদঃ - স্বাত্মনাত্র বিপশ্চিতা)

শ্রীগুরুরুবাচ ।

সত্যমুক্তং ত্বযা বিদ্বন্নিপুণোঽসি বিচারণে ।

অহমাদিবিকারাস্তে তদভাবোঽযমপ্যনু ॥ 213॥ (পাঠভেদঃ - ঽযমপ্যথ)

সর্বে যেনানুভূযন্তে যঃ স্বযং নানুভূযতে ।

তমাত্মানং বেদিতারং বিদ্ধি বুদ্ধ্যা সুসূক্ষ্মযা ॥ 214॥

তত্সাক্ষিকং ভবেত্তত্তদ্যদ্যদ্যেনানুভূযতে ।

কস্যাপ্যননুভূতার্থে সাক্ষিত্বং নোপযুজ্যতে ॥ 215॥ (পাঠভেদঃ - নোপপদ্যতে)

অসৌ স্বসাক্ষিকো ভাবো যতঃ স্বেনানুভূযতে ।

অতঃ পরং স্বযং সাক্ষাত্প্রত্যগাত্মা ন চেতরঃ ॥ 216॥

জাগ্রত্স্বপ্নসুষুপ্তিষু স্ফুটতরং যোঽসৌ সমুজ্জৃম্ভতে

প্রত্যগ্রূপতযা সদাহমহমিত্যন্তঃ স্ফুরন্নৈকধা । (পাঠভেদঃ - স্ফুরন্নেকধা)

নানাকারবিকারভাগিন ইমান্ পশ্যন্নহন্ধীমুখান্ (পাঠভেদঃ - ভাজিন)

নিত্যানন্দচিদাত্মনা স্ফুরতি তং বিদ্ধি স্বমেতং হৃদি ॥ 217॥

ঘটোদকে বিম্বিতমর্কবিম্ব-

মালোক্য মূঢো রবিমেব মন্যতে ।

তথা চিদাভাসমুপাধিসংস্থং

ভ্রান্ত্যাহমিত্যেব জডোঽভিমন্যতে ॥ 218॥

ঘটং জলং তদ্গতমর্কবিম্বং

বিহায সর্বং বিনিরীক্ষ্যতেঽর্কঃ । (পাঠভেদঃ - দিবি বীক্ষ্যতেঽর্কঃ)

তটস্থ এতত্ত্রিতযাবভাসকঃ (পাঠভেদঃ - তটস্থিতঃ তত্ত্রি)

স্বযম্প্রকাশো বিদুষা যথা তথা ॥ 219॥

দেহং ধিযং চিত্প্রতিবিম্বমেবং (পাঠভেদঃ - চিত্প্রতিবিম্বমেতং)

বিসৃজ্য বুদ্ধৌ নিহিতং গুহাযাম্ ।

দ্রষ্টারমাত্মানমখণ্ডবোধং

সর্বপ্রকাশং সদসদ্বিলক্ষণম্ ॥ 220॥

নিত্যং বিভুং সর্বগতং সুসূক্ষ্মং

অন্তর্বহিঃশূন্যমনন্যমাত্মনঃ ।

বিজ্ঞায সম্যঙ্নিজরূপমেতত্

পুমান্ বিপাপ্মা বিরজো বিমৃত্যুঃ ॥ 221॥

বিশোক আনন্দঘনো বিপশ্চিত্

স্বযং কুতশ্চিন্ন বিভেতি কশ্চিত্ ।

নান্যোঽস্তি পন্থা ভববন্ধমুক্তেঃ

বিনা স্বতত্ত্বাবগমং মুমুক্ষোঃ ॥ 222॥

ব্রহ্মাভিন্নত্ববিজ্ঞানং ভবমোক্ষস্য কারণম্ ।

যেনাদ্বিতীযমানন্দং ব্রহ্ম সম্পদ্যতে বুধৈঃ ॥ 223॥ (পাঠভেদঃ - সম্পদ্যতে বুধঃ)

ব্রহ্মভূতস্তু সংসৃত্যৈ বিদ্বান্নাবর্ততে পুনঃ ।

বিজ্ঞাতব্যমতঃ সম্যগ্ব্রহ্মাভিন্নত্বমাত্মনঃ ॥ 224॥

সত্যং জ্ঞানমনন্তং ব্রহ্ম বিশুদ্ধং পরং স্বতঃসিদ্ধম্ ।

নিত্যানন্দৈকরসং প্রত্যগভিন্নং নিরন্তরং জযতি ॥ 225॥

সদিদং পরমাদ্বৈতং স্বস্মাদন্যস্য বস্তুনোঽভাবাত্ ।

ন হ্যন্যদস্তি কিঞ্চিত্ সম্যক্ পরমার্থতত্ত্ববোধদশাযাম্ ॥ 226॥ (পাঠভেদঃ - পরতত্ত্ববোধসুদশাযাম্)

যদিদং সকলং বিশ্বং নানারূপং প্রতীতমজ্ঞানাত্ ।

তত্সর্বং ব্রহ্মৈব প্রত্যস্তাশেষভাবনাদোষম্ ॥ 227॥

মৃত্কার্যভূতোঽপি মৃদো ন ভিন্নঃ

কুম্ভোঽস্তি সর্বত্র তু মৃত্স্বরূপাত্ ।

ন কুম্ভরূপং পৃথগস্তি কুম্ভঃ

কুতো মৃষা কল্পিতনামমাত্রঃ ॥ 228॥

কেনাপি মৃদ্ভিন্নতযা স্বরূপং

ঘটস্য সন্দর্শযিতুং ন শক্যতে ।

অতো ঘটঃ কল্পিত এব মোহা-

ন্মৃদেব সত্যং পরমার্থভূতম্ ॥ 229॥

সদ্ব্রহ্মকার্যং সকলং সদেবং (পাঠভেদঃ - সদৈব)

তন্মাত্রমেতন্ন ততোঽন্যদস্তি । (পাঠভেদঃ - সন্মাত্রমেতন্ন)

অস্তীতি যো বক্তি ন তস্য মোহো

বিনির্গতো নিদ্রিতবত্প্রজল্পঃ ॥ 230॥

ব্রহ্মৈবেদং বিশ্বমিত্যেব বাণী

শ্রৌতী ব্রূতেঽথর্বনিষ্ঠা বরিষ্ঠা ।

তস্মাদেতদ্ব্রহ্মমাত্রং হি বিশ্বং

নাধিষ্ঠানাদ্ভিন্নতাঽঽরোপিতস্য ॥ 231॥

সত্যং যদি স্যাজ্জগদেতদাত্মনোঽ

নন্তত্ত্বহানির্নিগমাপ্রমাণতা ।

অসত্যবাদিত্বমপীশিতুঃ স্যা-

ন্নৈতত্ত্রযং সাধু হিতং মহাত্মনাম্ ॥ 232॥

ঈশ্বরো বস্তুতত্ত্বজ্ঞো ন চাহং তেষ্ববস্থিতঃ ।

ন চ মত্স্থানি ভূতানীত্যেবমেব ব্যচীক্লৃপত্ ॥ 233॥ (পাঠভেদঃ - ব্যচীকথত্)

যদি সত্যং ভবেদ্বিশ্বং সুষুপ্তাবুপলভ্যতাম্ ।

যন্নোপলভ্যতে কিঞ্চিদতোঽসত্স্বপ্নবন্মৃষা ॥ 234॥

অতঃ পৃথঙ্নাস্তি জগত্পরাত্মনঃ

পৃথক্প্রতীতিস্তু মৃষা গুণাদিবত্ । গুণাহিবত্

আরোপিতস্যাস্তি কিমর্থবত্তাঽ-

ধিষ্ঠানমাভাতি তথা ভ্রমেণ ॥ 235॥

ভ্রান্তস্য যদ্যদ্ভ্রমতঃ প্রতীতং

ব্রহ্মৈব তত্তদ্রজতং হি শুক্তিঃ ।

ইদন্তযা ব্রহ্ম সদৈব রূপ্যতে (পাঠভেদঃ - সদেব)

ত্বারোপিতং ব্রহ্মণি নামমাত্রম্ ॥ 236॥

অতঃ পরং ব্রহ্ম সদদ্বিতীযং

বিশুদ্ধবিজ্ঞানঘনং নিরঞ্জনম্ ।

প্রশান্তমাদ্যন্তবিহীনমক্রিযং

নিরন্তরানন্দরসস্বরূপম্ ॥ 237॥

নিরস্তমাযাকৃতসর্বভেদং

নিত্যং সুখং নিষ্কলমপ্রমেযম্ । (পাঠভেদঃ - নিত্যং ধ্রুবং)

অরূপমব্যক্তমনাখ্যমব্যযং

জ্যোতিঃ স্বযং কিঞ্চিদিদং চকাস্তি ॥ 238॥

জ্ঞাতৃজ্ঞেযজ্ঞানশূন্যমনন্তং নির্বিকল্পকম্ ।

কেবলাখণ্ডচিন্মাত্রং পরং তত্ত্বং বিদুর্বুধাঃ ॥ 239॥

অহেযমনুপাদেযং মনোবাচামগোচরম্ ।

অপ্রমেযমনাদ্যন্তং ব্রহ্ম পূর্ণমহং মহঃ ॥ 240॥ (পাঠভেদঃ - পূর্ণং মহন্মহঃ)

তত্ত্বম্পদাভ্যামভিধীযমানযোঃ

ব্রহ্মাত্মনোঃ শোধিতযোর্যদীত্থম্ । (পাঠভেদঃ - শোধিতযোর্যদিত্থম্)

শ্রুত্যা তযোস্তত্ত্বমসীতি সম্যগ্

একত্বমেব প্রতিপাদ্যতে মুহুঃ ॥ 241-

এক্যং তযোর্লক্ষিতযোর্ন বাচ্যযোঃ

নিগদ্যতেঽন্যোন্যবিরুদ্ধধর্মিণোঃ ।

খদ্যোতভান্বোরিব রাজভৃত্যযোঃ

কূপাম্বুরাশ্যোঃ পরমাণুমের্বোঃ ॥ 242॥

তযোর্বিরোধোঽযমুপাধিকল্পিতো

ন বাস্তবঃ কশ্চিদুপাধিরেষঃ ।

ঈশস্য মাযা মহদাদিকারণং

জীবস্য কার্যং শঋণু পঞ্চকোশম্ ॥ 243॥ (পাঠভেদঃ - পঞ্চকোশাঃ)

এতাবুপাধী পরজীবযোস্তযোঃ

সম্যঙ্নিরাসে ন পরো ন জীবঃ ।

রাজ্যং নরেন্দ্রস্য ভটস্য খেটক্-

স্তযোরপোহে ন ভটো ন রাজা ॥ 244॥

অথাত আদেশ ইতি শ্রুতিঃ স্বযং

নিষেধতি ব্রহ্মণি কল্পিতং দ্বযম্ ।

শ্রুতিপ্রমাণানুগৃহীতবোধা- (পাঠভেদঃ - প্রমাণানুগৃহীতযুক্ত্যা)

ত্তযোর্নিরাসঃ করণীয এব ॥ 245॥

নেদং নেদং কল্পিতত্বান্ন সত্যং

রজ্জুদৃষ্টব্যালবত্স্বপ্নবচ্চ । (পাঠভেদঃ - রজ্জৌ)

ইত্থং দৃশ্যং সাধুযুক্ত্যা ব্যপোহ্য

জ্ঞেযঃ পশ্চাদেকভাবস্তযোর্যঃ ॥ 246॥

ততস্তু তৌ লক্ষণযা সুলক্ষ্যৌ

তযোরখণ্ডৈকরসত্বসিদ্ধযে ।

নালং জহত্যা ন তথাঽজহত্যা

কিন্তূভযার্থাত্মিকযৈব ভাব্যম্ ॥ 247॥ (পাঠভেদঃ - ভযার্থৈকতযৈব)

স দেবদত্তোঽযমিতীহ চৈকতা

বিরুদ্ধধর্মাংশমপাস্য কথ্যতে ।

যথা তথা তত্ত্বমসীতিবাক্যে

বিরুদ্ধধর্মানুভযত্র হিত্বা ॥ 248॥

সংলক্ষ্য চিন্মাত্রতযা সদাত্মনোঃ

অখণ্ডভাবঃ পরিচীযতে বুধৈঃ ।

এবং মহাবাক্যশতেন কথ্যতে

ব্রহ্মাত্মনোরৈক্যমখণ্ডভাবঃ ॥ 249॥

অস্থূলমিত্যেতদসন্নিরস্য

সিদ্ধং স্বতো ব্যোমবদপ্রতর্ক্যম্ ।

অতো মৃষামাত্রমিদং প্রতীতং

জহীহি যত্স্বাত্মতযা গৃহীতম্ ।

ব্রহ্মাহমিত্যেব বিশুদ্ধবুদ্ধ্যা

বিদ্ধি স্বমাত্মানমখণ্ডবোধম্ ॥ 250॥

মৃত্কার্যং সকলং ঘটাদি সততং মৃন্মাত্রমেবাহিতং (পাঠভেদঃ - মৃন্মাত্রমেবাভিতঃ)

তদ্বত্সজ্জনিতং সদাত্মকমিদং সন্মাত্রমেবাখিলম্ ।

যস্মান্নাস্তি সতঃ পরং কিমপি তত্সত্যং স আত্মা স্বযং

তস্মাত্তত্ত্বমসি প্রশান্তমমলং ব্রহ্মাদ্বযং যত্পরম্ ॥ 251॥

নিদ্রাকল্পিতদেশকালবিষযজ্ঞাত্রাদি সর্বং যথা

মিথ্যা তদ্বদিহাপি জাগ্রতি জগত্স্বাজ্ঞানকার্যত্বতঃ ।

যস্মাদেবমিদং শরীরকরণপ্রাণাহমাদ্যপ্যসত্

তস্মাত্তত্ত্বমসি প্রশান্তমমলং ব্রহ্মাদ্বযং যত্পরম্ ॥ 252॥

যত্র ভ্রান্ত্যা কল্পিতং তদ্বিবেকে (পাঠভেদঃ - যদ্বিবেকে)

তত্তন্মাত্রং নৈব তস্মাদ্বিভিন্নম্ ।

স্বপ্নে নষ্টং স্বপ্নবিশ্বং বিচিত্রং

স্বস্মাদ্ভিন্নং কিন্নু দৃষ্টং প্রবোধে ॥ 253॥

জাতিনীতিকুলগোত্রদূরগং

নামরূপগুণদোষবর্জিতম্ ।

দেশকালবিষযাতিবর্তি যদ্

ব্রহ্ম তত্ত্বমসি ভাবযাত্মনি ॥ 254॥

যত্পরং সকলবাগগোচরং

গোচরং বিমলবোধচক্ষুষঃ ।

শুদ্ধচিদ্ঘনমনাদি বস্তু যদ্

ব্রহ্ম তত্ত্বমসি ভাবযাত্মনি ॥ 255॥

ষড্ভিরূর্মিভিরযোগি যোগিহৃদ্-

ভাবিতং ন করণৈর্বিভাবিতম্ ।

বুদ্ধ্যবেদ্যমনবদ্যমস্তি যদ্ (পাঠভেদঃ - ভূতি যদ্)

ব্রহ্ম তত্ত্বমসি ভাবযাত্মনি ॥ 256॥

ভ্রান্তিকল্পিতজগত্কলাশ্রযং

স্বাশ্রযং চ সদসদ্বিলক্ষণম্ ।

নিষ্কলং নিরুপমানবদ্ধি যদ্ (পাঠভেদঃ - নিরুপমানমৃদ্ধিমত্)

ব্রহ্ম তত্ত্বমসি ভাবযাত্মনি ॥ 257॥

জন্মবৃদ্ধিপরিণত্যপক্ষয-

ব্যাধিনাশনবিহীনমব্যযম্ ।

বিশ্বসৃষ্ট্যববিঘাতকারণং (পাঠভেদঃ - বনঘাতকারণং)

ব্রহ্ম তত্ত্বমসি ভাবযাত্মনি ॥ 258॥

অস্তভেদমনপাস্তলক্ষণং

নিস্তরঙ্গজলরাশিনিশ্চলম্ ।

নিত্যমুক্তমবিভক্তমূর্তি যদ্

ব্রহ্ম তত্ত্বমসি ভাবযাত্মনি ॥ 259॥

একমেব সদনেককারণং

কারণান্তরনিরাস্যকারণম্ । (পাঠভেদঃ - সকারণম্)

কার্যকারণবিলক্ষণং স্বযং

ব্রহ্ম তত্ত্বমসি ভাবযাত্মনি ॥ 260॥

নির্বিকল্পকমনল্পমক্ষরং

যত্ক্ষরাক্ষরবিলক্ষণং পরম্ ।

নিত্যমব্যযসুখং নিরঞ্জনং

ব্রহ্ম তত্ত্বমসি ভাবযাত্মনি ॥ 261॥

যদ্বিভাতি সদনেকধা ভ্রমা-

ন্নামরূপগুণবিক্রিযাত্মনা ।

হেমবত্স্বযমবিক্রিযং সদা

ব্রহ্ম তত্ত্বমসি ভাবযাত্মনি ॥ 262॥

যচ্চকাস্ত্যনপরং পরাত্পরং

প্রত্যগেকরসমাত্মলক্ষণম্ ।

সত্যচিত্সুখমনন্তমব্যযং

ব্রহ্ম তত্ত্বমসি ভাবযাত্মনি ॥ 263॥

উক্তমর্থমিমমাত্মনি স্বযং

ভাবযেত্প্রথিতযুক্তিভির্ধিযা । (পাঠভেদঃ - ভাবয প্রথিত)

সংশযাদিরহিতং করাম্বুবত্

তেন তত্ত্বনিগমো ভবিষ্যতি ॥ 264॥

সম্বোধমাত্রং পরিশুদ্ধতত্ত্বং (পাঠভেদঃ - স্বং বোধমাত্রং)

বিজ্ঞায সঙ্ঘে নৃপবচ্চ সৈন্যে ।

তদাশ্রযঃ স্বাত্মনি সর্বদা স্থিতো (পাঠভেদঃ - তদাত্মনৈবাত্মনি)

বিলাপয ব্রহ্মণি বিশ্বজাতম্ ॥ 265॥ (পাঠভেদঃ - দৃশ্যজাতম্)

বুদ্ধৌ গুহাযাং সদসদ্বিলক্ষণং

ব্রহ্মাস্তি সত্যং পরমদ্বিতীযম্ ।

তদাত্মনা যোঽত্র বসেদ্গুহাযাং

পুনর্ন তস্যাঙ্গগুহাপ্রবেশঃ ॥ 266॥

জ্ঞাতে বস্তুন্যপি বলবতী বাসনাঽনাদিরেষা

কর্তা ভোক্তাপ্যহমিতি দৃঢা যাঽস্য সংসারহেতুঃ ।

প্রত্যগ্দৃষ্ট্যাঽঽত্মনি নিবসতা সাপনেযা প্রযত্না-

ন্মুক্তিং প্রাহুস্তদিহ মুনযো বাসনাতানবং যত্ ॥ 267॥

অহং মমেতি যো ভাবো দেহাক্ষাদাবনাত্মনি ।

অধ্যাসোঽযং নিরস্তব্যো বিদুষা স্বাত্মনিষ্ঠযা ॥ 268॥

জ্ঞাত্বা স্বং প্রত্যগাত্মানং বুদ্ধিতদ্বৃত্তিসাক্ষিণম্ ।

সোঽহমিত্যেব সদ্বৃত্ত্যাঽনাত্মন্যাত্মমতিং জহি ॥ 269॥

লোকানুবর্তনং ত্যক্ত্বা ত্যক্ত্বা দেহানুবর্তনম্ ।

শাস্ত্রানুবর্তনং ত্যক্ত্বা স্বাধ্যাসাপনযং কুরু ॥ 270॥

লোকবাসনযা জন্তোঃ শাস্ত্রবাসনযাপি চ ।

271

দেহবাসনযা জ্ঞানং যথাবন্নৈব জাযতে ॥ 271

সংসারকারাগৃহমোক্ষমিচ্ছো-

রযোমযং পাদনিবন্ধশঋঙ্খলম্ । (পাঠভেদঃ - নিবদ্ধ)

বদন্তি তজ্জ্ঞাঃ পটু বাসনাত্রযং

যোঽস্মাদ্বিমুক্তঃ সমুপৈতি মুক্তিম্ ॥ 272॥

জলাদিসংসর্গবশাত্প্রভূত- (পাঠভেদঃ - জলাদিসম্পর্কবশাত্)

দুর্গন্ধধূতাঽগরুদিব্যবাসনা ।

সঙ্ঘর্ষণেনৈব বিভাতি সম্য-

গ্বিধূযমানে সতি বাহ্যগন্ধে ॥ 273॥

অন্তঃশ্রিতানন্তদুরন্তবাসনা-

ধূলীবিলিপ্তা পরমাত্মবাসনা ।

প্রজ্ঞাতিসঙ্ঘর্ষণতো বিশুদ্ধা

প্রতীযতে চন্দনগন্ধবত্ স্ফুটম্ ॥ 274॥ (পাঠভেদঃ - স্ফুটা)

অনাত্মবাসনাজালৈস্তিরোভূতাত্মবাসনা ।

নিত্যাত্মনিষ্ঠযা তেষাং নাশে ভাতি স্বযং স্ফুটম্ ॥ 275॥ (পাঠভেদঃ - স্ফুটা)

যথা যথা প্রত্যগবস্থিতং মনঃ

তথা তথা মুঞ্চতি বাহ্যবাসনাম্ । (পাঠভেদঃ - বাহ্যবাসনাঃ)

নিঃশেষমোক্ষে সতি বাসনানাং

আত্মানুভূতিঃ প্রতিবন্ধশূন্যা ॥ 276॥

স্বাত্মন্যেব সদা স্থিত্বা মনো নশ্যতি যোগিনঃ । (পাঠভেদঃ - স্থিত্যা)

বাসনানাং ক্ষযশ্চাতঃ স্বাধ্যাসাপনযং কুরু ॥ 277॥

তমো দ্বাভ্যাং রজঃ সত্ত্বাত্সত্ত্বং শুদ্ধেন নশ্যতি ।

তস্মাত্সত্ত্বমবষ্টভ্য স্বাধ্যাসাপনযং কুরু ॥ 278॥

প্রারব্ধং পুষ্যতি বপুরিতি নিশ্চিত্য নিশ্চলঃ ।

ধৈর্যমালম্ব্য যত্নেন স্বাধ্যাসাপনযং কুরু ॥ 279॥

নাহং জীবঃ পরং ব্রহ্মেত্যতদ্ব্যাবৃত্তিপূর্বকম্ ।

বাসনাবেগতঃ প্রাপ্তস্বাধ্যাসাপনযং কুরু ॥ 280॥

শ্রুত্যা যুক্ত্যা স্বানুভূত্যা জ্ঞাত্বা সার্বাত্ম্যমাত্মনঃ ।

ক্বচিদাভাসতঃ প্রাপ্তস্বাধ্যাসাপনযং কুরু ॥ 281॥

অনাদানবিসর্গাভ্যামীষন্নাস্তি ক্রিযা মুনেঃ । (পাঠভেদঃ - অন্নাদানবিসর্গা)

তদেকনিষ্ঠযা নিত্যং স্বাধ্যাসাপনযং কুরু ॥ 282॥

তত্ত্বমস্যাদিবাক্যোত্থব্রহ্মাত্মৈকত্ববোধতঃ ।

ব্রহ্মণ্যাত্মত্বদার্ঢ্যায স্বাধ্যাসাপনযং কুরু ॥ 283॥

অহম্ভাবস্য দেহেঽস্মিন্নিঃশেষবিলযাবধি ।

সাবধানেন যুক্তাত্মা স্বাধ্যাসাপনযং কুরু ॥ 284॥

প্রতীতির্জীবজগতোঃ স্বপ্নবদ্ভাতি যাবতা ।

তাবন্নিরন্তরং বিদ্বন্স্বাধ্যাসাপনযং কুরু ॥ 285॥

নিদ্রাযা লোকবার্তাযাঃ শব্দাদেরপি বিস্মৃতেঃ ।

ক্বচিন্নাবসরং দত্ত্বা চিন্তযাত্মানমাত্মনি ॥ 286॥

মাতাপিত্রোর্মলোদ্ভূতং মলমাংসমযং বপুঃ ।

ত্যক্ত্বা চাণ্ডালবদ্দূরং ব্রহ্মীভূয কৃতী ভব ॥ 287॥

ঘটাকাশং মহাকাশ ইবাত্মানং পরাত্মনি ।

বিলাপ্যাখণ্ডভাবেন তূষ্ণী ভব সদা মুনে ॥ 288॥ (পাঠভেদঃ - তূষ্ণীং)

স্বপ্রকাশমধিষ্ঠানং স্বযম্ভূয সদাত্মনা ।

ব্রহ্মাণ্ডমপি পিণ্ডাণ্ডং ত্যজ্যতাং মলভাণ্ডবত্ ॥ 289॥

চিদাত্মনি সদানন্দে দেহারূঢামহন্ধিযম্ ।

নিবেশ্য লিঙ্গমুত্সৃজ্য কেবলো ভব সর্বদা ॥ 290॥

যত্রৈষ জগদাভাসো দর্পণান্তঃ পুরং যথা ।

তদ্ব্রহ্মাহমিতি জ্ঞাত্বা কৃতকৃত্যো ভবিষ্যসি ॥ 291॥

যত্সত্যভূতং নিজরূপমাদ্যং

চিদদ্বযানন্দমরূপমক্রিযম্ ।

তদেত্য মিথ্যাবপুরুত্সৃজেত (পাঠভেদঃ - সৃজৈত)

শৈলূষবদ্বেষমুপাত্তমাত্মনঃ ॥ 292॥

সর্বাত্মনা দৃশ্যমিদং মৃষৈব

নৈবাহমর্থঃ ক্ষণিকত্বদর্শনাত্ ।

জানাম্যহং সর্বমিতি প্রতীতিঃ

কুতোঽহমাদেঃ ক্ষণিকস্য সিধ্যেত্ ॥ 293॥

অহম্পদার্থস্ত্বহমাদিসাক্ষী

নিত্যং সুষুপ্তাবপি ভাবদর্শনাত্ ।

ব্রূতে হ্যজো নিত্য ইতি শ্রুতিঃ স্বযং

তত্প্রত্যগাত্মা সদসদ্বিলক্ষণঃ ॥ 294॥

বিকারিণাং সর্ববিকারবেত্তা

নিত্যাবিকারো ভবিতুং সমর্হতি । (পাঠভেদঃ - নিত্যোঽবিকারো)

মনোরথস্বপ্নসুষুপ্তিষু স্ফুটং

পুনঃ পুনর্দৃষ্টমসত্ত্বমেতযোঃ ॥ 295॥

অতোঽভিমানং ত্যজ মাংসপিণ্ডে

পিণ্ডাভিমানিন্যপি বুদ্ধিকল্পিতে ।

কালত্রযাবাধ্যমখণ্ডবোধং

জ্ঞাত্বা স্বমাত্মানমুপৈহি শান্তিম্ ॥ 296॥

ত্যজাভিমানং কুলগোত্রনাম-

রূপাশ্রমেষ্বার্দ্রশবাশ্রিতেষু ।

লিঙ্গস্য ধর্মানপি কর্তৃতাদীং-

স্ত্যক্ত্বা ভবাখণ্ডসুখস্বরূপঃ ॥ 297॥

সন্ত্যন্যে প্রতিবন্ধাঃ পুংসঃ সংসারহেতবো দৃষ্টাঃ ।

তেষামেবং মূলং প্রথমবিকারো ভবত্যহঙ্কারঃ ॥ 298॥ (পাঠভেদঃ - তেষামেষাং)

যাবত্স্যাত্স্বস্য সম্বন্ধোঽহঙ্কারেণ দুরাত্মনা ।

তাবন্ন লেশমাত্রাপি মুক্তিবার্তা বিলক্ষণা ॥ 299॥

অহঙ্কারগ্রহান্মুক্তঃ স্বরূপমুপপদ্যতে ।

চন্দ্রবদ্বিমলঃ পূর্ণঃ সদানন্দঃ স্বযম্প্রভঃ ॥ 300॥

যো বা পুরে সোঽহমিতি প্রতীতো (পাঠভেদঃ - পুরৈষোঽহমিতি)

বুদ্ধ্যা প্রক্লৃপ্তস্তমসাঽতিমূঢযা । (পাঠভেদঃ - বুদ্ধ্যাঽবিবিক্তস্তমসা)

তস্যৈব নিঃশেষতযা বিনাশে

ব্রহ্মাত্মভাবঃ প্রতিবন্ধশূন্যঃ ॥ 301॥

ব্রহ্মানন্দনিধির্মহাবলবতাঽহঙ্কারঘোরাহিনা

সংবেষ্ট্যাত্মনি রক্ষ্যতে গুণমযৈশ্চণ্ডেস্ত্রিভির্মস্তকৈঃ (পাঠভেদঃ - চণ্ডৈ)

বিজ্ঞানাখ্যমহাসিনা শ্রুতিমতা বিচ্ছিদ্য শীর্ষত্রযং (পাঠভেদঃ - দ্যুতিমতা)

নির্মূল্যাহিমিমং নিধিং সুখকরং ধীরোঽনুভোক্তুঙ্ক্ষমঃ ॥ 302॥

যাবদ্বা যত্কিঞ্চিদ্বিষদোষস্ফূর্তিরস্তি চেদ্দেহে ।

কথমারোগ্যায ভবেত্তদ্বদহন্তাপি যোগিনো মুক্ত্যৈ ॥ 303॥

অহমোঽত্যন্তনিবৃত্ত্যা তত্কৃতনানাবিকল্পসংহৃত্যা ।

প্রত্যক্তত্ত্ববিবেকাদিদমহমস্মীতি বিন্দতে তত্ত্বম্ ॥ 304॥ (পাঠভেদঃ - বিবেকাদযম্)

অহঙ্কারে কর্তর্যহমিতি মতিং মুঞ্চ সহসা (পাঠভেদঃ - অহঙ্কর্তর্যস্মিন্নহমিতি)

বিকারাত্মন্যাত্মপ্রতিফলজুষি স্বস্থিতিমুষি ।

যদধ্যাসাত্প্রাপ্তা জনিমৃতিজরাদুঃখবহুলা

প্রতীচশ্চিন্মূর্তেস্তব সুখতনোঃ সংসৃতিরিযম্ ॥ 305॥

সদৈকরূপস্য চিদাত্মনো বিভো-

রানন্দমূর্তেরনবদ্যকীর্তেঃ ।

নৈবান্যথা ক্বাপ্যবিকারিণস্তে

বিনাহমধ্যাসমমুষ্য সংসৃতিঃ ॥ 306॥

তস্মাদহঙ্কারমিমং স্বশত্রুং

ভোক্তুর্গলে কণ্টকবত্প্রতীতম্ ।

বিচ্ছিদ্য বিজ্ঞানমহাসিনা স্ফুটং

ভুঙ্ক্ষ্বাত্মসাম্রাজ্যসুখং যথেষ্টম্ ॥ 307॥

ততোঽহমাদের্বিনিবর্ত্য বৃত্তিং

সন্ত্যক্তরাগঃ পরমার্থলাভাত্ ।

তূষ্ণীং সমাস্স্বাত্মসুখানুভূত্যা

পূর্ণাত্মনা ব্রহ্মণি নির্বিকল্পঃ ॥ 308॥

সমূলকৃত্তোঽপি মহানহং পুনঃ

ব্যুল্লেখিতঃ স্যাদ্যদি চেতসা ক্ষণম্ ।

সঞ্জীব্য বিক্ষেপশতং করোতি

নভস্বতা প্রাবৃষি বারিদো যথা ॥ 309॥

নিগৃহ্য শত্রোরহমোঽবকাশঃ

ক্বচিন্ন দেযো বিষযানুচিন্তযা ।

স এব সঞ্জীবনহেতুরস্য

প্রক্ষীণজম্বীরতরোরিবাম্বু ॥ 310॥

দেহাত্মনা সংস্থিত এব কামী

বিলক্ষণঃ কামযিতা কথং স্যাত্ ।

অতোঽর্থসন্ধানপরত্বমেব

ভেদপ্রসক্ত্যা ভববন্ধহেতুঃ ॥ 311॥

কার্যপ্রবর্ধনাদ্বীজপ্রবৃদ্ধিঃ পরিদৃশ্যতে ।

কার্যনাশাদ্বীজনাশস্তস্মাত্কার্যং নিরোধযেত্ ॥ 312॥

বাসনাবৃদ্ধিতঃ কার্যং কার্যবৃদ্ধ্যা চ বাসনা ।

বর্ধতে সর্বথা পুংসঃ সংসারো ন নিবর্ততে ॥ 313॥

সংসারবন্ধবিচ্ছিত্ত্যৈ তদ্ দ্বযং প্রদহেদ্যতিঃ ।

বাসনাবৃদ্ধিরেতাভ্যাং চিন্তযা ক্রিযযা বহিঃ ॥ 314॥ (পাঠভেদঃ - বাসনা প্রের্যতে হ্যন্তঃ)

তাভ্যাং প্রবর্ধমানা সা সূতে সংসৃতিমাত্মনঃ ।

ত্রযাণাং চ ক্ষযোপাযঃ সর্বাবস্থাসু সর্বদা ॥ 315॥

সর্বত্র সর্বতঃ সর্বব্রহ্মমাত্রাবলোকনৈঃ । (পাঠভেদঃ - মাত্রাবলোকনম্)

সদ্ভাববাসনাদার্ঢ্যাত্তত্ত্রযং লযমশ্নুতে ॥ 316॥

ক্রিযানাশে ভবেচ্চিন্তানাশোঽস্মাদ্বাসনাক্ষযঃ ।

বাসনাপ্রক্ষযো মোক্ষঃ সা জীবন্মুক্তিরিষ্যতে ॥ 317॥ (পাঠভেদঃ - স)

সদ্বাসনাস্ফূর্তিবিজৃম্ভণে সতি

হ্যসৌ বিলীনাপ্যহমাদিবাসনা । (পাঠভেদঃ - বিলীনা ত্বহমাদিবাসনা)

অতিপ্রকৃষ্টাপ্যরুণপ্রভাযাং

বিলীযতে সাধু যথা তমিস্রা ॥ 318॥

তমস্তমঃকার্যমনর্থজালং

ন দৃশ্যতে সত্যুদিতে দিনেশে ।

তথাঽদ্বযানন্দরসানুভূতৌ

নৈবাস্তি বন্ধো ন চ দুঃখগন্ধঃ ॥ 319॥

দৃশ্যং প্রতীতং প্রবিলাপযন্সন্ (পাঠভেদঃ - প্রবিলাপযন্স্বযং)

সন্মাত্রমানন্দঘনং বিভাবযন্ ।

সমাহিতঃ সন্বহিরন্তরং বা

কালং নযেথাঃ সতি কর্মবন্ধে ॥ 320॥

প্রমাদো ব্রহ্মনিষ্ঠাযাং ন কর্তব্যঃ কদাচন ।

প্রমাদো মৃত্যুরিত্যাহ ভগবান্ব্রহ্মণঃ সুতঃ ॥ 321॥

ন প্রমাদাদনর্থোঽন্যো জ্ঞানিনঃ স্বস্বরূপতঃ ।

ততো মোহস্ততোঽহন্ধীস্ততো বন্ধস্ততো ব্যথা ॥ 322॥

বিষযাভিমুখং দৃষ্ট্বা বিদ্বাংসমপি বিস্মৃতিঃ ।

বিক্ষেপযতি ধীদোষৈর্যোষা জারমিব প্রিযম্ ॥ 323॥

যথাপকৃষ্টং শৈবালং ক্ষণমাত্রং ন তিষ্ঠতি ।

আবৃণোতি তথা মাযা প্রাজ্ঞং বাপি পরাঙ্মুখম্ ॥ 324॥

লক্ষ্যচ্যুতং চেদ্যদি চিত্তমীষদ্

বহির্মুখং সন্নিপতেত্ততস্ততঃ ।

প্রমাদতঃ প্রচ্যুতকেলিকন্দুকঃ

সোপানপঙ্ক্তৌ পতিতো যথা তথা ॥ 325॥

বিষযেষ্বাবিশচ্চেতঃ সঙ্কল্পযতি তদ্গুণান্ ।

সম্যক্সঙ্কল্পনাত্কামঃ কামাত্পুংসঃ প্রবর্তনম্ ॥ 326॥

অতঃ প্রমাদান্ন পরোঽস্তি মৃত্যুঃ

বিবেকিনো ব্রহ্মবিদঃ সমাধৌ ।

সমাহিতঃ সিদ্ধিমুপৈতি সম্যক্

সমাহিতাত্মা ভব সাবধানঃ ॥ 327॥

ততঃ স্বরূপবিভ্রংশো বিভ্রষ্টস্তু পতত্যধঃ ।

পতিতস্য বিনা নাশং পুনর্নারোহ ঈক্ষ্যতে ॥ 328॥

সঙ্কল্পং বর্জযেত্তস্মাত্সর্বানর্থস্য কারণম্ ।

অপথ্যানি হি বস্তূনি ব্যাধিগ্রস্তো যথোত্সৃজে ।

জীবতো যস্য কৈবল্যং বিদেহে স চ কেবলঃ ।

যত্কিঞ্চিত্ পশ্যতো ভেদং ভযং ব্রূতে যজুঃশ্রুতিঃ ॥ 329॥

যদা কদা বাপি বিপশ্চিদেষ

ব্রহ্মণ্যনন্তেঽপ্যণুমাত্রভেদম্ ।

পশ্যত্যথামুষ্য ভযং তদৈব

যদ্বীক্ষিতং ভিন্নতযা প্রমাদাত্ ॥ 330॥ (পাঠভেদঃ - যদীক্ষিতং)

শ্রুতিস্মৃতিন্যাযশতৈর্নিষিদ্ধে

দৃশ্যেঽত্র যঃ স্বাত্মমতিং করোতি ।

উপৈতি দুঃখোপরি দুঃখজাতং

নিষিদ্ধকর্তা স মলিম্লুচো যথা ॥ 331॥

সত্যাভিসন্ধানরতো বিমুক্তো

মহত্ত্বমাত্মীযমুপৈতি নিত্যম্ ।

মিথ্যাভিসন্ধানরতস্তু নশ্যেদ্

দৃষ্টং তদেতদ্যদচৌরচৌরযোঃ ॥ 332॥ (পাঠভেদঃ - চোরচোরযোঃ)

যতিরসদনুসন্ধিং বন্ধহেতুং বিহায

স্বযমযমহমস্মীত্যাত্মদৃষ্ট্যৈব তিষ্ঠেত্

সুখযতি ননু নিষ্ঠা ব্রহ্মণি স্বানুভূত্যা

হরতি পরমবিদ্যাকার্যদুঃখং প্রতীতম্ ॥ 333॥

বাহ্যানুসন্ধিঃ পরিবর্ধযেত্ফলং (পাঠভেদঃ - বাহ্যাভিসন্ধিঃ)

দুর্বাসনামেব ততস্ততোঽধিকাম্ ।

জ্ঞাত্বা বিবেকৈঃ পরিহৃত্য বাহ্যং

স্বাত্মানুসন্ধিং বিদধীত নিত্যম্ ॥ 334॥

বাহ্যে নিরুদ্ধে মনসঃ প্রসন্নতা

মনঃপ্রসাদে পরমাত্মদর্শনম্ ।

তস্মিন্সুদৃষ্টে ভববন্ধনাশো

বহির্নিরোধঃ পদবী বিমুক্তেঃ ॥ 335॥

কঃ পণ্ডিতঃ সন্সদসদ্বিবেকী

শ্রুতিপ্রমাণঃ পরমার্থদর্শী ।

জানন্হি কুর্যাদসতোঽবলম্বং

স্বপাতহেতোঃ শিশুবন্মুমুক্ষুঃ ॥ 336॥

দেহাদিসংসক্তিমতো ন মুক্তিঃ

মুক্তস্য দেহাদ্যভিমত্যভাবঃ ।

সুপ্তস্য নো জাগরণং ন জাগ্রতঃ

স্বপ্নস্তযোর্ভিন্নগুণাশ্রযত্বাত্ ॥ 337॥

অন্তর্বহিঃ স্বং স্থিরজঙ্গমেষু

জ্ঞাত্বাঽঽত্মনাধারতযা বিলোক্য । (পাঠভেদঃ - জ্ঞানাত্মন্)

ত্যক্তাখিলোপাধিরখণ্ডরূপঃ

পূর্ণাত্মনা যঃ স্থিত এষ মুক্তঃ ॥ 338॥

সর্বাত্মনা বন্ধবিমুক্তিহেতুঃ

সর্বাত্মভাবান্ন পরোঽস্তি কশ্চিত্ ।

দৃশ্যাগ্রহে সত্যুপপদ্যতেঽসৌ

সর্বাত্মভাবোঽস্য সদাত্মনিষ্ঠযা ॥ 339॥

দৃশ্যস্যাগ্রহণং কথং নু ঘটতে দেহাত্মনা তিষ্ঠতো

বাহ্যার্থানুভবপ্রসক্তমনসস্তত্তত্ক্রিযাং কুর্বতঃ ।

সন্ন্যস্তাখিলধর্মকর্মবিষযৈর্নিত্যাত্মনিষ্ঠাপরৈঃ

তত্ত্বজ্ঞৈঃ করণীযমাত্মনি সদানন্দেচ্ছুভির্যত্নতঃ ॥ 340॥

সর্বাত্মসিদ্ধযে ভিক্ষোঃ কৃতশ্রবণকর্মণঃ । (পাঠভেদঃ - সার্বাত্ম্য)

সমাধিং বিদধাত্যেষা শান্তো দান্ত ইতি শ্রুতিঃ ॥ 341॥

আরূঢশক্তেরহমো বিনাশঃ

কর্তুন্ন শক্য সহসাপি পণ্ডিতৈঃ । (পাঠভেদঃ - কর্তুং ন)

যে নির্বিকল্পাখ্যসমাধিনিশ্চলাঃ

তানন্তরাঽনন্তভবা হি বাসনাঃ ॥ 342॥

অহম্বুদ্ধ্যৈব মোহিন্যা যোজযিত্বাঽঽবৃতের্বলাত্ ।

বিক্ষেপশক্তিঃ পুরুষং বিক্ষেপযতি তদ্গুণৈঃ ॥ 343॥

বিক্ষেপশক্তিবিজযো বিষমো বিধাতুং

নিঃশেষমাবরণশক্তিনিবৃত্ত্যভাবে ।

দৃগ্দৃশ্যযোঃ স্ফুটপযোজলবদ্বিভাগে

নশ্যেত্তদাবরণমাত্মনি চ স্বভাবাত্ ।

নিঃসংশযেন ভবতি প্রতিবন্ধশূন্যো

বিক্ষেপণং ন হি তদা যদি চেন্মৃষার্থে ॥ 344॥ (পাঠভেদঃ - নিক্ষেপণং)

সম্যগ্বিবেকঃ স্ফুটবোধজন্যো

বিভজ্য দৃগ্দৃশ্যপদার্থতত্ত্বম্ ।

ছিনত্তি মাযাকৃতমোহবন্ধং

যস্মাদ্বিমুক্তস্তু পুনর্ন সংসৃতিঃ ॥ 345॥ (পাঠভেদঃ - বিমুক্তস্য)

পরাবরৈকত্ববিবেকবহ্নিঃ

দহত্যবিদ্যাগহনং হ্যশেষম্ ।

কিং স্যাত্পুনঃ সংসরণস্য বীজং

অদ্বৈতভাবং সমুপেযুষোঽস্য ॥ 346॥

আবরণস্য নিবৃত্তির্ভবতি হি সম্যক্পদার্থদর্শনতঃ ।

মিথ্যাজ্ঞানবিনাশস্তদ্বিক্ষেপজনিতদুঃখনিবৃত্তিঃ ॥ 347॥

এতত্ত্রিতযং দৃষ্টং সম্যগ্রজ্জুস্বরূপবিজ্ঞানাত্ ।

তস্মাদ্বস্তুসতত্ত্বং জ্ঞাতব্যং বন্ধমুক্তযে বিদুষা ॥ 348॥

অযোঽগ্নিযোগাদিব সত্সমন্বযান্

মাত্রাদিরূপেণ বিজৃম্ভতে ধীঃ ।

তত্কার্যমেতদ্দ্বিতযং যতো মৃষা (পাঠভেদঃ - তত্কার্যমেব ত্রিতযং)

দৃষ্টং ভ্রমস্বপ্নমনোরথেষু ॥ 349॥

ততো বিকারাঃ প্রকৃতেরহম্মুখা

দেহাবসানা বিষযাশ্চ সর্বে ।

ক্ষণেঽন্যথাভাবিতযা হ্যমীষা- (পাঠভেদঃ - ভাবিন এষ আত্মা)

মসত্ত্বমাত্মা তু কদাপি নান্যথা ॥ 350॥ (পাঠভেদঃ - মসত্ত্বমাত্মা তু কদাপি)

নিত্যাদ্বযাখণ্ডচিদেকরূপো

বুদ্ধ্যাদিসাক্ষী সদসদ্বিলক্ষণঃ ।

অহম্পদপ্রত্যযলক্ষিতার্থঃ

প্রত্যক্ সদানন্দঘনঃ পরাত্মা ॥ 351॥

ইত্থং বিপশ্চিত্সদসদ্বিভজ্য

নিশ্চিত্য তত্ত্বং নিজবোধদৃষ্ট্যা ।

জ্ঞাত্বা স্বমাত্মানমখণ্ডবোধং

তেভ্যো বিমুক্তঃ স্বযমেব শাম্যতি ॥ 352॥

অজ্ঞানহৃদযগ্রন্থের্নিঃশেষবিলযস্তদা ।

সমাধিনাঽবিকল্পেন যদাঽদ্বৈতাত্মদর্শনম্ ॥ 353॥

ত্বমহমিদমিতীযং কল্পনা বুদ্ধিদোষাত্

প্রভবতি পরমাত্মন্যদ্বযে নির্বিশেষে ।

প্রবিলসতি সমাধাবস্য সর্বো বিকল্পো

বিলযনমুপগচ্ছেদ্বস্তুতত্ত্বাবধৃত্যা ॥ 354॥

শান্তো দান্তঃ পরমুপরতঃ ক্ষান্তিযুক্তঃ সমাধিং

কুর্বন্নিত্যং কলযতি যতিঃ স্বস্য সর্বাত্মভাবম্ ।

তেনাবিদ্যাতিমিরজনিতান্সাধু দগ্ধ্বা বিকল্পান্

ব্রহ্মাকৃত্যা নিবসতি সুখং নিষ্ক্রিযো নির্বিকল্পঃ ॥ 355॥

সমাহিতা যে প্রবিলাপ্য বাহ্যং

শ্রোত্রাদি চেতঃ স্বমহং চিদাত্মনি ।

ত এব মুক্তা ভবপাশবন্ধৈঃ

নান্যে তু পারোক্ষ্যকথাভিধাযিনঃ ॥ 356॥

উপাধিভেদাত্স্বযমেব ভিদ্যতে (পাঠভেদঃ - যোগাত্স্বযমেব)

চোপাধ্যপোহে স্বযমেব কেবলঃ ।

তস্মাদুপাধের্বিলযায বিদ্বান্

বসেত্সদাঽকল্পসমাধিনিষ্ঠযা ॥ 357॥

সতি সক্তো নরো যাতি সদ্ভাবং হ্যেকনিষ্ঠযা ।

কীটকো ভ্রমরং ধ্যাযন্ ভ্রমরত্বায কল্পতে ॥ 358॥

ক্রিযান্তরাসক্তিমপাস্য কীটকো

ধ্যাযন্নলিত্বং হ্যলিভাবমৃচ্ছতি । (পাঠভেদঃ - ধ্যাযন্যথালিং)

তথৈব যোগী পরমাত্মতত্ত্বং

ধ্যাত্বা সমাযাতি তদেকনিষ্ঠযা ॥ 359॥

অতীব সূক্ষ্মং পরমাত্মতত্ত্বং

ন স্থূলদৃষ্ট্যা প্রতিপত্তুমর্হতি ।

সমাধিনাত্যন্তসুসূক্ষ্মবৃত্ত্যা

জ্ঞাতব্যমার্যৈরতিশুদ্ধবুদ্ধিভিঃ ॥ 360॥

যথা সুবর্ণং পুটপাকশোধিতং

ত্যক্ত্বা মলং স্বাত্মগুণং সমৃচ্ছতি ।

তথা মনঃ সত্ত্বরজস্তমোমলং

ধ্যানেন সন্ত্যজ্য সমেতি তত্ত্বম্ ॥ 361॥

নিরন্তরাভ্যাসবশাত্তদিত্থং

পক্বং মনো ব্রহ্মণি লীযতে যদা ।

তদা সমাধিঃ সবিকল্পবর্জিতঃ (পাঠভেদঃ - স বিকল্পবর্জিতঃ)

স্বতোঽদ্বযানন্দরসানুভাবকঃ ॥ 362॥

সমাধিনাঽনেন সমস্তবাসনা-

গ্রন্থের্বিনাশোঽখিলকর্মনাশঃ ।

অন্তর্বহিঃ সর্বত এব সর্বদা

স্বরূপবিস্ফূর্তিরযত্নতঃ স্যাত্ ॥ 363॥

শ্রুতেঃ শতগুণং বিদ্যান্মননং মননাদপি ।

নিদিধ্যাসং লক্ষগুণমনন্তং নির্বিকল্পকম্ ॥ 364॥

নির্বিকল্পকসমাধিনা স্ফুটং

ব্রহ্মতত্ত্বমবগম্যতে ধ্রুবম্ ।

নান্যথা চলতযা মনোগতেঃ

প্রত্যযান্তরবিমিশ্রিতং ভবেত্ ॥ 365॥

অতঃ সমাধত্স্ব যতেন্দ্রিযঃ সন্

নিরন্তরং শান্তমনাঃ প্রতীচি ।

বিধ্বংসয ধ্বান্তমনাদ্যবিদ্যযা

কৃতং সদেকত্ববিলোকনেন ॥ 366॥

যোগস্য প্রথমদ্বারং বাঙ্নিরোধোঽপরিগ্রহঃ । (পাঠভেদঃ - প্রথমং দ্বারং)

নিরাশা চ নিরীহা চ নিত্যমেকান্তশীলতা ॥ 367॥

একান্তস্থিতিরিন্দ্রিযোপরমণে হেতুর্দমশ্চেতসঃ

সংরোধে করণং শমেন বিলযং যাযাদহংবাসনা ।

তেনানন্দরসানুভূতিরচলা ব্রাহ্মী সদা যোগিনঃ

তস্মাচ্চিত্তনিরোধ এব সততং কার্যঃ প্রযত্নো মুনেঃ ॥ 368॥ প্রযত্নান্মুনেঃ

বাচং নিযচ্ছাত্মনি তং নিযচ্ছ

বুদ্ধৌ ধিযং যচ্ছ চ বুদ্ধিসাক্ষিণি ।

তং চাপি পূর্ণাত্মনি নির্বিকল্পে

বিলাপ্য শান্তিং পরমাং ভজস্ব ॥ 369॥

দেহপ্রাণেন্দ্রিযমনোবুদ্ধ্যাদিভিরুপাধিভিঃ ।

যৈর্যৈর্বৃত্তেঃসমাযোগস্তত্তদ্ভাবোঽস্য যোগিনঃ ॥ 370॥

তন্নিবৃত্ত্যা মুনেঃ সম্যক্ সর্বোপরমণং সুখম্ ।

সন্দৃশ্যতে সদানন্দরসানুভববিপ্লবঃ ॥ 371॥

অন্তস্ত্যাগো বহিস্ত্যাগো বিরক্তস্যৈব যুজ্যতে ।

ত্যজত্যন্তর্বহিঃসঙ্গং বিরক্তস্তু মুমুক্ষযা ॥ 372॥

বহিস্তু বিষযৈঃ সঙ্গং তথান্তরহমাদিভিঃ । (পাঠভেদঃ - সঙ্গঃ)

বিরক্ত এব শক্নোতি ত্যক্তুং ব্রহ্মণি নিষ্ঠিতঃ ॥ 373॥

বৈরাগ্যবোধৌ পুরুষস্য পক্ষিবত্

পক্ষৌ বিজানীহি বিচক্ষণ ত্বম্ ।

বিমুক্তিসৌধাগ্রলতাধিরোহণং

তাভ্যাং বিনা নান্যতরেণ সিধ্যতি ॥ 374॥

অত্যন্তবৈরাগ্যবতঃ সমাধিঃ

সমাহিতস্যৈব দৃঢপ্রবোধঃ ।

প্রবুদ্ধতত্ত্বস্য হি বন্ধমুক্তিঃ

মুক্তাত্মনো নিত্যসুখানুভূতিঃ ॥ 375॥

বৈরাগ্যান্ন পরং সুখস্য জনকং পশ্যামি বশ্যাত্মনঃ

তচ্চেচ্ছুদ্ধতরাত্মবোধসহিতং স্বারাজ্যসাম্রাজ্যধুক্ ।

এতদ্দ্বারমজস্রমুক্তিযুবতের্যস্মাত্ত্বমস্মাত্পরং

সর্বত্রাস্পৃহযা সদাত্মনি সদা প্রজ্ঞাং কুরু শ্রেযসে ॥ 376॥

আশাং ছিন্দ্ধি বিষোপমেষু বিষযেষ্বেষৈব মৃত্যোঃ কৃতি- (পাঠভেদঃ - মৃত্যোঃ সৃতি)

স্ত্যক্ত্বা জাতিকুলাশ্রমেষ্বভিমতিং মুঞ্চাতিদূরাত্ক্রিযাঃ ।

দেহাদাবসতি ত্যজাত্মধিষণাং প্রজ্ঞাং কুরুষ্বাত্মনি

ত্বং দ্রষ্টাস্যমনোঽসি নির্দ্বযপরং ব্রহ্মাসি যদ্বস্তুতঃ ॥ 377॥ (পাঠভেদঃ - দ্রষ্টাস্যমলো)

লক্ষ্যে ব্রহ্মণি মানসং দৃঢতরং সংস্থাপ্য বাহ্যেন্দ্রিযং

স্বস্থানে বিনিবেশ্য নিশ্চলতনুশ্চোপেক্ষ্য দেহস্থিতিম্ ।

ব্রহ্মাত্মৈক্যমুপেত্য তন্মযতযা চাখণ্ডবৃত্ত্যাঽনিশং

ব্রহ্মানন্দরসং পিবাত্মনি মুদা শূন্যৈঃ কিমন্যৈর্ভৃশম্ ॥ 378॥ (পাঠভেদঃ - কিমন্যৈর্ভ্রমৈঃ)

অনাত্মচিন্তনং ত্যক্ত্বা কশ্মলং দুঃখকারণম্ ।

চিন্তযাত্মানমানন্দরূপং যন্মুক্তিকারণম্ ॥ 379॥

এষ স্বযঞ্জ্যোতিরশেষসাক্ষী

বিজ্ঞানকোশো বিলসত্যজস্রম্ । বিজ্ঞানকোশে

লক্ষ্যং বিধাযৈনমসদ্বিলক্ষণ-

মখণ্ডবৃত্ত্যাঽঽত্মতযাঽনুভাবয ॥ 380॥

এতমচ্ছিন্নযা বৃত্ত্যা প্রত্যযান্তরশূন্যযা ।

উল্লেখযন্বিজানীযাত্স্বস্বরূপতযা স্ফুটম্ ॥ 381॥

অত্রাত্মত্বং দৃঢীকুর্বন্নহমাদিষু সন্ত্যজন্ ।

উদাসীনতযা তেষু তিষ্ঠেত্স্ফুটঘটাদিবত্ ॥ 382॥ (পাঠভেদঃ - তিষ্ঠেদ্ঘটপটাদিবত্)

বিশুদ্ধমন্তঃকরণং স্বরূপে

নিবেশ্য সাক্ষিণ্যববোধমাত্রে ।

শনৈঃ শনৈর্নিশ্চলতামুপানযন্

পূর্ণং স্বমেবানুবিলোকযেত্ততঃ ॥ 383॥ (পাঠভেদঃ - পূর্ণত্বমেবানু)

দেহেন্দ্রিযপ্রাণমনোঽহমাদিভিঃ

স্বাজ্ঞানক্লৃপ্তৈরখিলৈরুপাধিভিঃ ।

বিমুক্তমাত্মানমখণ্ডরূপং

পূর্ণং মহাকাশমিবাবলোকযেত্ ॥ 384॥

ঘটকলশকুসূলসূচিমুখ্যৈঃ

গগনমুপাধিশতৈর্বিমুক্তমেকম্ ।

ভবতি ন বিবিধং তথৈব শুদ্ধং

পরমহমাদিবিমুক্তমেকমেব ॥ 385॥

ব্রহ্মাদিস্তম্বপর্যন্তা মৃষামাত্রা উপাধযঃ । (পাঠভেদঃ - ব্রহ্মাদ্যাঃ স্তম্ব)

ততঃ পূর্ণং স্বমাত্মানং পশ্যেদেকাত্মনা স্থিতম্ ॥ 386॥

যত্র ভ্রান্ত্যা কল্পিতং তদ্বিবেকে (পাঠভেদঃ - যদ্বিবেকে)

তত্তন্মাত্রং নৈব তস্মাদ্বিভিন্নম্ ।

ভ্রান্তের্নাশে ভাতি দৃষ্টাহিতত্ত্বং (পাঠভেদঃ - ভ্রান্তিদৃষ্টা)

রজ্জুস্তদ্বদ্বিশ্বমাত্মস্বরূপম্ ॥ 387॥

স্বযং ব্রহ্মা স্বযং বিষ্ণুঃ স্বযমিন্দ্রঃ স্বযং শিবঃ ।

স্বযং বিশ্বমিদং সর্বং স্বস্মাদন্যন্ন কিঞ্চন ॥ 388॥

অন্তঃ স্বযং চাপি বহিঃ স্বযং চ

স্বযং পুরস্তাত্ স্বযমেব পশ্চাত্ ।

স্বযং হ্যাবাচ্যাং স্বযমপ্যুদীচ্যাং (পাঠভেদঃ - হ্যবাচ্যাং)

তথোপরিষ্টাত্স্বযমপ্যধস্তাত্ ॥ 389॥

তরঙ্গফেনভ্রমবুদ্বুদাদি

সর্বং স্বরূপেণ জলং যথা তথা ।

চিদেব দেহাদ্যহমন্তমেতত্

সর্বং চিদেবৈকরসং বিশুদ্ধম্ ॥ 390॥

সদেবেদং সর্বং জগদবগতং বাঙ্মনসযোঃ

সতোঽন্যন্নাস্ত্যেব প্রকৃতিপরসীম্নি স্থিতবতঃ ।

পৃথক্ কিং মৃত্স্নাযাঃ কলশঘটকুম্ভাদ্যবগতং

বদত্যেষ ভ্রান্তস্ত্বমহমিতি মাযামদিরযা ॥ 391॥

ক্রিযাসমভিহারেণ যত্র নান্যদিতি শ্রুতিঃ ।

ব্রবীতি দ্বৈতরাহিত্যং মিথ্যাধ্যাসনিবৃত্তযে ॥ 392॥

আকাশবন্নির্মলনির্বিকল্পং (পাঠভেদঃ - নির্বিকল্প)

নিঃসীমনিঃস্পন্দননির্বিকারম্ ।

অন্তর্বহিঃশূন্যমনন্যমদ্বযং

স্বযং পরং ব্রহ্ম কিমস্তি বোধ্যম্ ॥ 393॥

বক্তব্যং কিমু বিদ্যতেঽত্র বহুধা ব্রহ্মৈব জীবঃ স্বযং

ব্রহ্মৈতজ্জগদাততং নু সকলং ব্রহ্মাদ্বিতীযং শ্রুতিঃ । (পাঠভেদঃ - জগদাপরাণু সকলং)

ব্রহ্মৈবাহমিতি প্রবুদ্ধমতযঃ সন্ত্যক্তবাহ্যাঃ স্ফুটং

ব্রহ্মীভূয বসন্তি সন্ততচিদানন্দাত্মনৈতদ্ধ্রুবম্ ॥ 394॥ (পাঠভেদঃ - আনন্দাত্মনৈব ধ্রুবম্)

জহি মলমযকোশেঽহন্ধিযোত্থাপিতাশাং

প্রসভমনিলকল্পে লিঙ্গদেহেঽপি পশ্চাত্ ।

নিগমগদিতকীর্তিং নিত্যমানন্দমূর্তিং

স্বযমিতি পরিচীয ব্রহ্মরূপেণ তিষ্ঠ ॥ 395॥

শবাকারং যাবদ্ভজতি মনুজস্তাবদশুচিঃ

পরেভ্যঃ স্যাত্ক্লেশো জননমরণব্যাধিনিলযঃ । (পাঠভেদঃ - ব্যাধিনিরযাঃ)

যদাত্মানং শুদ্ধং কলযতি শিবাকারমচলম্

তদা তেভ্যো মুক্তো ভবতি হি তদাহ শ্রুতিরপি ॥ 396॥

স্বাত্মন্যারোপিতাশেষাভাসবস্তুনিরাসতঃ ।

স্বযমেব পরং ব্রহ্ম পূর্ণমদ্বযমক্রিযম্ ॥ 397॥

সমাহিতাযাং সতি চিত্তবৃত্তৌ

পরাত্মনি ব্রহ্মণি নির্বিকল্পে ।

ন দৃশ্যতে কশ্চিদযং বিকল্পঃ

প্রজল্পমাত্রঃ পরিশিষ্যতে যতঃ ॥ 398॥ (পাঠভেদঃ - ততঃ)

অসত্কল্পো বিকল্পোঽযং বিশ্বমিত্যেকবস্তুনি ।

নির্বিকারে নিরাকারে নির্বিশেষে ভিদা কুতঃ ॥ 399॥

দ্রষ্টুদর্শনদৃশ্যাদিভাবশূন্যৈকবস্তুনি । (পাঠভেদঃ - দ্রষ্টৃদর্শন)

নির্বিকারে নিরাকারে নির্বিশেষে ভিদা কুতঃ ॥ 400॥

কল্পার্ণব ইবাত্যন্তপরিপূর্ণৈকবস্তুনি ।

নির্বিকারে নিরাকারে নির্বিশেষে ভিদা কুতঃ ॥ 401॥

তেজসীব তমো যত্র প্রলীনং ভ্রান্তিকারণম্ । (পাঠভেদঃ - যত্র বিলীনং)

অদ্বিতীযে পরে তত্ত্বে নির্বিশেষে ভিদা কুতঃ ॥ 402॥

একাত্মকে পরে তত্ত্বে ভেদবার্তা কথং বসেত্ । (পাঠভেদঃ - কথং ভবেত্)

সুষুপ্তৌ সুখমাত্রাযাং ভেদঃ কেনাবলোকিতঃ ॥ 403॥

ন হ্যস্তি বিশ্বং পরতত্ত্ববোধাত্

সদাত্মনি ব্রহ্মণি নির্বিকল্পে ।

কালত্রযে নাপ্যহিরীক্ষিতো গুণে

ন হ্যম্বুবিন্দুর্মৃগতৃষ্ণিকাযাম্ ॥ 404॥

মাযামাত্রমিদং দ্বৈতমদ্বৈতং পরমার্থতঃ ।

ইতি ব্রূতে শ্রুতিঃ সাক্ষাত্সুষুপ্তাবনুভূযতে ॥ 405॥

অনন্যত্বমধিষ্ঠানাদারোপ্যস্য নিরীক্ষিতম্ ।

পণ্ডিতৈ রজ্জুসর্পাদৌ বিকল্পো ভ্রান্তিজীবনঃ ॥ 406॥

চিত্তমূলো বিকল্পোঽযং চিত্তাভাবে ন কশ্চন ।

অতশ্চিত্তং সমাধেহি প্রত্যগ্রূপে পরাত্মনি ॥ 407॥

কিমপি সততবোধং কেবলানন্দরূপং

নিরুপমমতিবেলং নিত্যমুক্তং নিরীহম্ ।

নিরবধিগগনাভং নিষ্কলং নির্বিকল্পং

হৃদি কলযতি বিদ্বান্ ব্রহ্ম পূর্ণং সমাধৌ ॥ 408॥

প্রকৃতিবিকৃতিশূন্যং ভাবনাতীতভাবং

সমরসমসমানং মানসম্বন্ধদূরম্ ।

নিগমবচনসিদ্ধং নিত্যমস্মত্প্রসিদ্ধং

হৃদি কলযতি বিদ্বান্ ব্রহ্ম পূর্ণং সমাধৌ ॥ 409॥

অজরমমরমস্তাভাববস্তুস্বরূপং (পাঠভেদঃ - ভাসবস্তু)

স্তিমিতসলিলরাশিপ্রখ্যমাখ্যাবিহীনম্ ।

শমিতগুণবিকারং শাশ্বতং শান্তমেকং

হৃদি কলযতি বিদ্বান্ ব্রহ্ম পূর্ণং সমাধৌ ॥ 410॥

সমাহিতান্তঃকরণঃ স্বরূপে

বিলোকযাত্মানমখণ্ডবৈভবম্ ।

বিচ্ছিন্দ্ধি বন্ধং ভবগন্ধগন্ধিতং (পাঠভেদঃ - গন্ধগন্ধিলং)

যত্নেন পুংস্ত্বং সফলীকুরুষ্ব ॥ 411-

সর্বোপাধিবিনির্মুক্তং সচ্চিদানন্দমদ্বযম্ ।

ভাবযাত্মানমাত্মস্থং ন ভূযঃ কল্পসেঽধ্বনে ॥ 412॥

ছাযেব পুংসঃ পরিদৃশ্যমান-

মাভাসরূপেণ ফলানুভূত্যা ।

শরীরমারাচ্ছববন্নিরস্তং

পুনর্ন সন্ধত্ত ইদং মহাত্মা ॥ 413॥

সততবিমলবোধানন্দরূপং সমেত্য (পাঠভেদঃ - স্বমেত্য)

ত্যজ জডমলরূপোপাধিমেতং সুদূরে ।

অথ পুনরপি নৈষ স্মর্যতাং বান্তবস্তু (পাঠভেদঃ - পুনরপি নৈব)

স্মরণবিষযভূতং কল্পতে কুত্সনায ॥ 414॥

সমূলমেতত্পরিদাহ্য বহ্নৌ (পাঠভেদঃ - পরিদহ্য)

সদাত্মনি ব্রহ্মণি নির্বিকল্পে ।

ততঃ স্বযং নিত্যবিশুদ্ধবোধা-

নন্দাত্মনা তিষ্ঠতি বিদ্বরিষ্ঠঃ ॥ 415॥

প্রারব্ধসূত্রগ্রথিতং শরীরং

প্রযাতু বা তিষ্ঠতু গোরিব স্রক্ ।

ন তত্পুনঃ পশ্যতি তত্ত্ববেত্তা-

ঽঽনন্দাত্মনি ব্রহ্মণি লীনবৃত্তিঃ ॥ 416॥

অখণ্ডানন্দমাত্মানং বিজ্ঞায স্বস্বরূপতঃ ।

কিমিচ্ছন্ কস্য বা হেতোর্দেহং পুষ্ণাতি তত্ত্ববিত্ ॥ 417॥

সংসিদ্ধস্য ফলং ত্বেতজ্জীবন্মুক্তস্য যোগিনঃ ।

বহিরন্তঃ সদানন্দরসাস্বাদনমাত্মনি ॥ 418॥

বৈরাগ্যস্য ফলং বোধো বোধস্যোপরতিঃ ফলম্ ।

স্বানন্দানুভবাচ্ছান্তিরেষৈবোপরতেঃ ফলম্ ॥ 419॥

যদ্যুত্তরোত্তরাভাবঃ পূর্বপূর্বন্তু নিষ্ফলম্ ।

নিবৃত্তিঃ পরমা তৃপ্তিরানন্দোঽনুপমঃ স্বতঃ ॥ 420॥

দৃষ্টদুঃখেষ্বনুদ্বেগো বিদ্যাযাঃ প্রস্তুতং ফলম্ ।

যত্কৃতং ভ্রান্তিবেলাযাং নানা কর্ম জুগুপ্সিতম্ ।

পশ্চান্নরো বিবেকেন তত্কথং কর্তুমর্হতি ॥ 421॥

বিদ্যাফলং স্যাদসতো নিবৃত্তিঃ

প্রবৃত্তিরজ্ঞানফলং তদীক্ষিতম্ ।

তজ্জ্ঞাজ্ঞযোর্যন্মৃগতৃষ্ণিকাদৌ

নোচেদ্বিদাং দৃষ্টফলং কিমস্মাত্ ॥ 422॥ (পাঠভেদঃ - নোচেদ্বিদো)

অজ্ঞানহৃদযগ্রন্থের্বিনাশো যদ্যশেষতঃ ।

অনিচ্ছোর্বিষযঃ কিং নু প্রবৃত্তেঃ কারণং স্বতঃ ॥ 423॥ (পাঠভেদঃ - বিদুষঃ কিং)

বাসনানুদযো ভোগ্যে বৈরাগ্যস্য তদাবধিঃ ।

অহম্ভাবোদযাভাবো বোধস্য পরমাবধিঃ ।

লীনবৃত্তৈরনুত্পত্তির্মর্যাদোপরতেস্তু সা ॥ 424॥ (পাঠভেদঃ - বৃত্তের)

ব্রহ্মাকারতযা সদা স্থিততযা নির্মুক্তবাহ্যার্থধী-

রন্যাবেদিতভোগ্যভোগকলনো নিদ্রালুবদ্বালবত্ ।

স্বপ্নালোকিতলোকবজ্জগদিদং পশ্যন্ক্বচিল্লব্ধধী-

রাস্তে কশ্চিদনন্তপুণ্যফলভুগ্ধন্যঃ স মান্যো ভুবি ॥ 425॥

স্থিতপ্রজ্ঞো যতিরযং যঃ সদানন্দমশ্নুতে ।

ব্রহ্মণ্যেব বিলীনাত্মা নির্বিকারো বিনিষ্ক্রিযঃ ॥ 426॥

ব্রহ্মাত্মনোঃ শোধিতযোরেকভাবাবগাহিনী ।

নির্বিকল্পা চ চিন্মাত্রা বৃত্তিঃ প্রজ্ঞেতি কথ্যতে ।

সুস্থিতাঽসৌ ভবেদ্যস্য স্থিতপ্রজ্ঞঃ স উচ্যতে ॥ 427॥

যস্য স্থিতা ভবেত্প্রজ্ঞা যস্যানন্দো নিরন্তরঃ ।

প্রপঞ্চো বিস্মৃতপ্রাযঃ স জীবন্মুক্ত ইষ্যতে ॥ 428॥

লীনধীরপি জাগর্তি জাগ্রদ্ধর্মবিবর্জিতঃ ।

বোধো নির্বাসনো যস্য স জীবন্মুক্ত ইষ্যতে ॥ 429॥

শান্তসংসারকলনঃ কলাবানপি নিষ্কলঃ ।

যস্য চিত্তং বিনিশ্চিন্তং স জীবন্মুক্ত ইষ্যতে ॥ 430॥ (পাঠভেদঃ - যঃ সচিত্তোঽপি নিশ্চিত্তঃ)

বর্তমানেঽপি দেহেঽস্মিঞ্ছাযাবদনুবর্তিনি ।

অহন্তামমতাঽভাবো জীবন্মুক্তস্য লক্ষণম্ ॥ 431॥

অতীতাননুসন্ধানং ভবিষ্যদবিচারণম্ ।

ঔদাসীন্যমপি প্রাপ্তং জীবন্মুক্তস্য লক্ষণম্ ॥ 432॥ (পাঠভেদঃ - প্রাপ্তে)

গুণদোষবিশিষ্টেঽস্মিন্স্বভাবেন বিলক্ষণে ।

সর্বত্র সমদর্শিত্বং জীবন্মুক্তস্য লক্ষণম্ ॥ 433॥

ইষ্টানিষ্টার্থসম্প্রাপ্তৌ সমদর্শিতযাঽঽত্মনি ।

উভযত্রাবিকারিত্বং জীবন্মুক্তস্য লক্ষণম্ ॥ 434॥

ব্রহ্মানন্দরসাস্বাদাসক্তচিত্ততযা যতেঃ ।

অন্তর্বহিরবিজ্ঞানং জীবন্মুক্তস্য লক্ষণম্ ॥ 435॥

দেহেন্দ্রিযাদৌ কর্তব্যে মমাহম্ভাববর্জিতঃ ।

ঔদাসীন্যেন যস্তিষ্ঠেত্স জীবন্মুক্তলক্ষণঃ ॥ 436॥ (পাঠভেদঃ - স জীবন্মুক্ত ইষ্যতে)

বিজ্ঞাত আত্মনো যস্য ব্রহ্মভাবঃ শ্রুতের্বলাত্ ।

ভববন্ধবিনির্মুক্তঃ স জীবন্মুক্তলক্ষণঃ ॥ 437॥ (পাঠভেদঃ - স জীবন্মুক্ত ইষ্যতে)

দেহেন্দ্রিযেষ্বহম্ভাব ইদম্ভাবস্তদন্যকে ।

যস্য নো ভবতঃ ক্বাপি স জীবন্মুক্ত ইষ্যতে ॥ 438॥

জীবেশোভযসংসাররূপদুর্বাসনোজ্ঝিতা ।

সা সর্বদা ভবেদ্যস্য স জীবন্মুক্ত ইষ্যতে ॥

ন প্রত্যগ্ব্রহ্মণোর্ভেদং কদাপি ব্রহ্মসর্গযোঃ ।

প্রজ্ঞযা যো বিজানিতি স জীবন্মুক্তলক্ষণঃ ॥ 439॥ (পাঠভেদঃ - স জীবন্মুক্ত ইষ্যতে)

সাধুভিঃ পূজ্যমানেঽস্মিন্পীড্যমানেঽপি দুর্জনৈঃ ।

সমভাবো ভবেদ্যস্য স জীবন্মুক্তলক্ষণঃ ॥ 440॥ (পাঠভেদঃ - স জীবন্মুক্ত ইষ্যতে)

যত্র প্রবিষ্টা বিষযাঃ পরেরিতা

নদীপ্রবাহা ইব বারিরাশৌ ।

লিনন্তি সন্মাত্রতযা ন বিক্রিযাং

উত্পাদযন্ত্যেষ যতির্বিমুক্তঃ ॥ 441॥

বিজ্ঞাতব্রহ্মতত্ত্বস্য যথাপূর্বং ন সংসৃতিঃ ।

অস্তি চেন্ন স বিজ্ঞাতব্রহ্মভাবো বহির্মুখঃ ॥ 442॥

প্রাচীনবাসনাবেগাদসৌ সংসরতীতি চেত্ ।

ন সদেকত্ববিজ্ঞানান্মন্দী ভবতি বাসনা ॥ 443॥

অত্যন্তকামুকস্যাপি বৃত্তিঃ কুণ্ঠতি মাতরি ।

তথৈব ব্রহ্মণি জ্ঞাতে পূর্ণানন্দে মনীষিণঃ ॥ 444॥

নিদিধ্যাসনশীলস্য বাহ্যপ্রত্যয ঈক্ষ্যতে ।

ব্রবীতি শ্রুতিরেতস্য প্রারব্ধং ফলদর্শনাত্ ॥ 445॥

সুখাদ্যনুভবো যাবত্তাবত্প্রারব্ধমিষ্যতে ।

ফলোদযঃ ক্রিযাপূর্বো নিষ্ক্রিযো ন হি কুত্রচিত্ ॥ 446॥

অহং ব্রহ্মেতি বিজ্ঞানাত্কল্পকোটিশতার্জিতম্ ।

সঞ্চিতং বিলযং যাতি প্রবোধাত্স্বপ্নকর্মবত্ ॥ 447॥

যত্কৃতং স্বপ্নবেলাযাং পুণ্যং বা পাপমুল্বণম্ ।

সুপ্তোত্থিতস্য কিন্তত্স্যাত্স্বর্গায নরকায বা ॥ 448॥

স্বমসঙ্গমুদাসীনং পরিজ্ঞায নভো যথা ।

ন শ্লিষ্যতি চ যত্কিঞ্চিত্কদাচিদ্ভাবিকর্মভিঃ ॥ 449॥ (পাঠভেদঃ - শ্লিষ্যতে যতিঃ কিঞ্চিত্)

ন নভো ঘটযোগেন সুরাগন্ধেন লিপ্যতে ।

তথাত্মোপাধিযোগেন তদ্ধর্মৈর্নৈব লিপ্যতে ॥ 450॥

জ্ঞানোদযাত্পুরারব্ধং কর্মজ্ঞানান্ন নশ্যতি ।

অদত্বা স্বফলং লক্ষ্যমুদ্দিশ্যোত্সৃষ্টবাণবত্ ॥ 451॥

ব্যাঘ্রবুদ্ধ্যা বিনির্মুক্তো বাণঃ পশ্চাত্তু গোমতৌ ।

ন তিষ্ঠতি ছিনত্যেব লক্ষ্যং বেগেন নির্ভরম্ ॥ 452॥

প্রারব্ধং বলবত্তরং খলু বিদাং ভোগেন তস্য ক্ষযঃ

সম্যগ্জ্ঞানহুতাশনেন বিলযঃ প্রাক্সঞ্চিতাগামিনাম্ ।

ব্রহ্মাত্মৈক্যমবেক্ষ্য তন্মযতযা যে সর্বদা সংস্থিতাঃ

তেষাং তত্ত্রিতযং নহি ক্বচিদপি ব্রহ্মৈব তে নির্গুণম্ ॥ 453॥

উপাধিতাদাত্ম্যবিহীনকেবল-

ব্রহ্মাত্মনৈবাত্মনি তিষ্ঠতো মুনেঃ ।

প্রারব্ধসদ্ভাবকথা ন যুক্তা

স্বপ্নার্থসম্বন্ধকথেব জাগ্রতঃ ॥ 454॥

ন হি প্রবুদ্ধঃ প্রতিভাসদেহে

দেহোপযোগিন্যপি চ প্রপঞ্চে ।

করোত্যহন্তাং মমতামিদন্তাং

কিন্তু স্বযং তিষ্ঠতি জাগরেণ ॥ 455॥

ন তস্য মিথ্যার্থসমর্থনেচ্ছা

ন সঙ্গ্রহস্তজ্জগতোঽপি দৃষ্টঃ ।

তত্রানুবৃত্তির্যদি চেন্মৃষার্থে

ন নিদ্রযা মুক্ত ইতীষ্যতে ধ্রুবম্ ॥ 456॥

তদ্বত্পরে ব্রহ্মণি বর্তমানঃ

সদাত্মনা তিষ্ঠতি নান্যদীক্ষতে ।

স্মৃতির্যথা স্বপ্নবিলোকিতার্থে

তথা বিদঃ প্রাশনমোচনাদৌ ॥ 457॥

কর্মণা নির্মিতো দেহঃ প্রারব্ধং তস্য কল্প্যতাম্ ।

নানাদেরাত্মনো যুক্তং নৈবাত্মা কর্মনির্মিতঃ ॥ 458॥

অজো নিত্যঃ শাশ্বত ইতি ব্রূতে শ্রুতিরমোঘবাক্ । (পাঠভেদঃ - অজো নিত্য ইতি ব্রূতে শ্রুতিরেষা ত্বমোঘবাক্)

তদাত্মনা তিষ্ঠতোঽস্য কুতঃ প্রারব্ধকল্পনা ॥ 459॥

প্রারব্ধং সিধ্যতি তদা যদা দেহাত্মনা স্থিতিঃ ।

দেহাত্মভাবো নৈবেষ্টঃ প্রারব্ধং ত্যজ্যতামতঃ ॥ 460॥

শরীরস্যাপি প্রারব্ধকল্পনা ভ্রান্তিরেব হি ।

অধ্যস্তস্য কুতঃ সত্ত্বমসত্যস্য কুতো জনিঃ । (পাঠভেদঃ - সত্ত্বমসত্ত্বস্য)

অজাতস্য কুতো নাশঃ প্রারব্ধমসতঃ কুতঃ ॥ 461॥

জ্ঞানেনাজ্ঞানকার্যস্য সমূলস্য লযো যদি ।

তিষ্ঠত্যযং কথং দেহ ইতি শঙ্কাবতো জডান্ ॥ 462॥

সমাধাতুং বাহ্যদৃষ্ট্যা প্রারব্ধং বদতি শ্রুতিঃ ।

ন তু দেহাদিসত্যত্ববোধনায বিপশ্চিতাম্ ।

যতঃ শ্রুতেরভিপ্রাযঃ পরমার্থৈকগোচরঃ ॥ 463॥

পরিপূর্ণমনাদ্যন্তমপ্রমেযমবিক্রিযম্ ।

একমেবাদ্বযং ব্রহ্ম নেহ নানাস্তি কিঞ্চন ॥ 464॥

সদ্ঘনং চিদ্ঘনং নিত্যমানন্দঘনমক্রিযম্ ।

একমেবাদ্বযং ব্রহ্ম নেহ নানাস্তি কিঞ্চন ॥ 465॥

প্রত্যগেকরসং পূর্ণমনন্তং সর্বতোমুখম্ ।

একমেবাদ্বযং ব্রহ্ম নেহ নানাস্তি কিঞ্চন ॥ 466॥

অহেযমনুপাদেযমনাদেযমনাশ্রযম্ । মনাধেযমনা

একমেবাদ্বযং ব্রহ্ম নেহ নানাস্তি কিঞ্চন ॥ 467॥

নির্গুণং নিষ্কলং সূক্ষ্মং নির্বিকল্পং নিরঞ্জনম্ ।

একমেবাদ্বযং ব্রহ্ম নেহ নানাস্তি কিঞ্চন ॥ 468॥

অনিরূপ্য স্বরূপং যন্মনোবাচামগোচরম্ ।

একমেবাদ্বযং ব্রহ্ম নেহ নানাস্তি কিঞ্চন ॥ 469॥

সত্সমৃদ্ধং স্বতঃসিদ্ধং শুদ্ধং বুদ্ধমনীদৃশম্ ।

একমেবাদ্বযং ব্রহ্ম নেহ নানাস্তি কিঞ্চন ॥ 470॥

নিরস্তরাগা বিনিরস্তভোগাঃ (পাঠভেদঃ - নিরপাস্তভোগাঃ)

শান্তাঃ সুদান্তা যতযো মহান্তঃ ।

বিজ্ঞায তত্ত্বং পরমেতদন্তে

প্রাপ্তাঃ পরাং নির্বৃতিমাত্মযোগাত্ ॥ 471॥

ভবানপীদং পরতত্ত্বমাত্মনঃ

স্বরূপমানন্দঘনং বিচার্য । (পাঠভেদঃ - নিচায্য)

বিধূয মোহং স্বমনঃপ্রকল্পিতং

মুক্তঃ কৃতার্থো ভবতু প্রবুদ্ধঃ ॥ 472॥

সমাধিনা সাধুবিনিশ্চলাত্মনা (পাঠভেদঃ - সুনিশ্চলাত্মনা)

পশ্যাত্মতত্ত্বং স্ফুটবোধচক্ষুষা ।

নিঃসংশযং সম্যগবেক্ষিতশ্চে-

চ্ছ্রুতঃ পদার্থো ন পুনর্বিকল্প্যতে ॥ 473॥ (পাঠভেদঃ - পুনর্বিকল্পতে)

স্বস্যাবিদ্যাবন্ধসম্বন্ধমোক্ষা-

ত্সত্যজ্ঞানানন্দরূপাত্মলব্ধৌ ।

শাস্ত্রং যুক্তির্দেশিকোক্তিঃ প্রমাণং

চান্তঃসিদ্ধা স্বানুভূতিঃ প্রমাণম্ ॥ 474॥

বন্ধো মোক্ষশ্চ তৃপ্তিশ্চ চিন্তাঽঽরোগ্যক্ষুধাদযঃ ।

স্বেনৈব বেদ্যা যজ্জ্ঞানং পরেষামানুমানিকম্ ॥ 475॥

তটস্থিতা বোধযন্তি গুরবঃ শ্রুতযো যথা ।

প্রজ্ঞযৈব তরেদ্বিদ্বানীশ্বরানুগৃহীতযা ॥ 476॥

স্বানুভূত্যা স্বযং জ্ঞাত্বা স্বমাত্মানমখণ্ডিতম্ ।

সংসিদ্ধঃ সম্মুখং তিষ্ঠেন্নির্বিকল্পাত্মনাঽঽত্মনি ॥ 477॥ (পাঠভেদঃ - সুসুখং তিষ্ঠেন্)

বেদান্তসিদ্ধান্তনিরুক্তিরেষা

ব্রহ্মৈব জীবঃ সকলং জগচ্চ ।

অখণ্ডরূপস্থিতিরেব মোক্ষো

ব্রহ্মাদ্বিতীযে শ্রুতযঃ প্রমাণম্ ॥ 478॥ (পাঠভেদঃ - ব্রহ্মাদ্বিতীযং)

ইতি গুরুবচনাচ্ছ্রুতিপ্রমাণাত্

পরমবগম্য সতত্ত্বমাত্মযুক্ত্যা ।

প্রশমিতকরণঃ সমাহিতাত্মা

ক্বচিদচলাকৃতিরাত্মনিষ্ঠতোঽভূত্ ॥ 479॥ (পাঠভেদঃ - আত্মনিষ্ঠিতো)

কিঞ্চিত্কালং সমাধায পরে ব্রহ্মণি মানসম্ । (পাঠভেদঃ - কঞ্চিত্কালং)

উত্থায পরমানন্দাদিদং বচনমব্রবীত্ ॥ 480॥ (পাঠভেদঃ - ব্যুত্থায)

বুদ্ধির্বিনষ্টা গলিতা প্রবৃত্তিঃ

ব্রহ্মাত্মনোরেকতযাঽধিগত্যা ।

ইদং ন জানেঽপ্যনিদং ন জানে

কিং বা কিযদ্বা সুখমস্ত্যপারম্ ॥ 481॥ (পাঠভেদঃ - সুখমস্য পারম্)

বাচা বক্তুমশক্যমেব মনসা মন্তুং ন বা শক্যতে

স্বানন্দামৃতপূরপূরিতপরব্রহ্মাম্বুধের্বৈভবম্ ।

অম্ভোরাশিবিশীর্ণবার্ষিকশিলাভাবং ভজন্মে মনো

যস্যাংশাংশলবে বিলীনমধুনাঽঽনন্দাত্মনা নির্বৃতম্ ॥ 482॥

ক্ব গতং কেন বা নীতং কুত্র লীনমিদং জগত্ ।

অধুনৈব মযা দৃষ্টং নাস্তি কিং মহদদ্ভুতম্ ॥ 483॥

কিং হেযং কিমুপাদেযং কিমন্যত্কিং বিলক্ষণম্ ।

অখণ্ডানন্দপীযূষপূর্ণে ব্রহ্মমহার্ণবে ॥ 484॥

ন কিঞ্চিদত্র পশ্যামি ন শঋণোমি ন বেদ্ম্যহম্ ।

স্বাত্মনৈব সদানন্দরূপেণাস্মি বিলক্ষণঃ ॥ 485॥

নমো নমস্তে গুরবে মহাত্মনে

বিমুক্তসঙ্গায সদুত্তমায ।

নিত্যাদ্বযানন্দরসস্বরূপিণে

ভূম্নে সদাঽপারদযাম্বুধাম্নে ॥ 486॥

যত্কটাক্ষশশিসান্দ্রচন্দ্রিকা-

পাতধূতভবতাপজশ্রমঃ ।

প্রাপ্তবানহমখণ্ডবৈভবা-

নন্দমাত্মপদমক্ষযং ক্ষণাত্ ॥ 487॥

ধন্যোঽহং কৃতকৃত্যোঽহং বিমুক্তোঽহং ভবগ্রহাত্ ।

নিত্যানন্দস্বরূপোঽহং পূর্ণোঽহং ত্বদনুগ্রহাত্ ॥ 488॥

অসঙ্গোঽহমনঙ্গোঽহমলিঙ্গোঽহমভঙ্গুরঃ ।

প্রশান্তোঽহমনন্তোঽহমমলোঽহং চিরন্তনঃ ॥ 489॥ (পাঠভেদঃ - ঽহমতান্তোঽহং)

অকর্তাহমভোক্তাহমবিকারোঽহমক্রিযঃ ।

শুদ্ধবোধস্বরূপোঽহং কেবলোঽহং সদাশিবঃ ॥ 490॥

দ্রষ্টুঃ শ্রোতুর্বক্তুঃ কর্তুর্ভোক্তুর্বিভিন্ন এবাহম্ ।

নিত্যনিরন্তরনিষ্ক্রিযনিঃসীমাসঙ্গপূর্ণবোধাত্মা ॥ 491॥

নাহমিদং নাহমদোঽপ্যুভযোরবভাসকং পরং শুদ্ধম্ ।

বাহ্যাভ্যন্তরশূন্যং পূর্ণং ব্রহ্মাদ্বিতীযমেবাহম্ ॥ 492॥

নিরুপমমনাদিতত্ত্বং ত্বমহমিদমদ ইতি কল্পনাদূরম্ ।

নিত্যানন্দৈকরসং সত্যং ব্রহ্মাদ্বিতীযমেবাহম্ ॥ 493॥

নারাযণোঽহং নরকান্তকোঽহং

পুরান্তকোঽহং পুরুষোঽহমীশঃ ।

অখণ্ডবোধোঽহমশেষসাক্ষী

নিরীশ্বরোঽহং নিরহং চ নির্মমঃ ॥ 494॥

সর্বেষু ভূতেষ্বহমেব সংস্থিতো

জ্ঞানাত্মনাঽন্তর্বহিরাশ্রযঃ সন্ ।

ভোক্তা চ ভোগ্যং স্বযমেব সর্বং

যদ্যত্পৃথগ্দৃষ্টমিদন্তযা পুরা ॥ 495॥

ময্যখণ্ডসুখাম্ভোধৌ বহুধা বিশ্ববীচযঃ ।

উত্পদ্যন্তে বিলীযন্তে মাযামারুতবিভ্রমাত্ ॥ 496॥

স্থুলাদিভাবা মযি কল্পিতা ভ্রমা-

দারোপিতানুস্ফুরণেন লোকৈঃ ।

কালে যথা কল্পকবত্সরায-

ণর্ত্বাদযো নিষ্কলনির্বিকল্পে ॥ 497॥

আরোপিতং নাশ্রযদূষকং ভবেত্

কদাপি মূঢৈরতিদোষদূষিতৈঃ । মূঢৈর্মতি

নার্দ্রীকরোত্যূষরভূমিভাগং

মরীচিকাবারি মহাপ্রবাহঃ ॥ 498॥

আকাশবল্লেপবিদূরগোঽহং (পাঠভেদঃ - আকাশবত্ কল্পবি)

আদিত্যবদ্ভাস্যবিলক্ষণোঽহম্ ।

অহার্যবন্নিত্যবিনিশ্চলোঽহং

অম্ভোধিবত্পারবিবর্জিতোঽহম্ ॥ 499॥

ন মে দেহেন সম্বন্ধো মেঘেনেব বিহাযসঃ ।

অতঃ কুতো মে তদ্ধর্মা জাগ্রত্স্বপ্নসুষুপ্তযঃ ॥ 500॥

উপাধিরাযাতি স এব গচ্ছতি

স এব কর্মাণি করোতি ভুঙ্ক্তে ।

স এব জীর্যন্ ম্রিযতে সদাহং (পাঠভেদঃ - এব জীবন্)

কুলাদ্রিবন্নিশ্চল এব সংস্থিতঃ ॥ 501॥

ন মে প্রবৃত্তির্ন চ মে নিবৃত্তিঃ

সদৈকরূপস্য নিরংশকস্য ।

একাত্মকো যো নিবিডো নিরন্তরো (পাঠভেদঃ - নিবিডো)

ব্যোমেব পূর্ণঃ স কথং নু চেষ্টতে ॥ 502॥

পুণ্যানি পাপানি নিরিন্দ্রিযস্য

নিশ্চেতসো নির্বিকৃতের্নিরাকৃতেঃ ।

কুতো মমাখণ্ডসুখানুভূতেঃ

ব্রূতে হ্যনন্বাগতমিত্যপি শ্রুতিঃ ॥ 503॥

ছাযযা স্পৃষ্টমুষ্ণং বা শীতং বা সুষ্ঠু দুঃষ্ঠু বা ।

ন স্পৃশত্যেব যত্কিঞ্চিত্পুরুষং তদ্বিলক্ষণম্ ॥ 504॥

ন সাক্ষিণং সাক্ষ্যধর্মাঃ সংস্পৃশন্তি বিলক্ষণম্ ।

অবিকারমুদাসীনং গৃহধর্মাঃ প্রদীপবত্ ।

দেহেন্দ্রিযমনোধর্মা নৈবাত্মানং স্পৃশন্ত্যহো ॥ 505॥ এক্ষ্ত্র

রবের্যথা কর্মণি সাক্ষিভাবো

বহ্নের্যথা দাহনিযামকত্বম্ । (পাঠভেদঃ - বাঽযসি দাহকত্বম্)

রজ্জোর্যথাঽঽরোপিতবস্তুসঙ্গঃ

তথৈব কূটস্থচিদাত্মনো মে ॥ 506॥

কর্তাপি বা কারযিতাপি নাহং

ভোক্তাপি বা ভোজযিতাপি নাহম্ ।

দ্রষ্টাপি বা দর্শযিতাপি নাহং

সোঽহং স্বযঞ্জ্যোতিরনীদৃগাত্মা ॥ 507॥

চলত্যুপাধৌ প্রতিবিম্বলৌল্য-

মৌপাধিকং মূঢধিযো নযন্তি ।

স্ববিম্বভূতং রবিবদ্বিনিষ্ক্রিযং

কর্তাস্মি ভোক্তাস্মি হতোঽস্মি হেতি ॥ 508॥

জলে বাপি স্থলে বাপি লুঠত্বেষ জডাত্মকঃ ।

নাহং বিলিপ্যে তদ্ধর্মৈর্ঘটধর্মৈর্নভো যথা ॥ 509॥

কর্তৃত্বভোক্তৃত্বখলত্বমত্ততা-

জডত্ববদ্ধত্ববিমুক্ততাদযঃ ।

বুদ্ধের্বিকল্পা ন তু সন্তি বস্তুতঃ

স্বস্মিন্পরে ব্রহ্মণি কেবলেঽদ্বযে ॥ 510॥

সন্তু বিকারাঃ প্রকৃতের্দশধা শতধা সহস্রধা বাপি ।

কিং মেঽসঙ্গচিতস্তৈর্ন ঘনঃ ক্বচিদম্বরং স্পৃশতি ॥ 511॥ (পাঠভেদঃ - তৈঃ কিং মেঽসঙ্গচিতের্ন হ্যম্বুদডম্বরোঽম্বরং)

অব্যক্তাদিস্থূলপর্যন্তমেতত্

বিশ্বং যত্রাভাসমাত্রং প্রতীতম্ ।

ব্যোমপ্রখ্যং সূক্ষ্মমাদ্যন্তহীনং

ব্রহ্মাদ্বৈতং যত্তদেবাহমস্মি ॥ 512॥

সর্বাধারং সর্ববস্তুপ্রকাশং

সর্বাকারং সর্বগং সর্বশূন্যম্ ।

নিত্যং শুদ্ধং নিশ্চলং নির্বিকল্পং (পাঠভেদঃ - নিষ্কলং)

ব্রহ্মাদ্বৈতং যত্তদেবাহমস্মি ॥ 513॥

যত্প্রত্যস্তাশেষমাযাবিশেষং

প্রত্যগ্রূপং প্রত্যযাগম্যমানম্ ।

সত্যজ্ঞানানন্তমানন্দরূপং

ব্রহ্মাদ্বৈতং যত্তদেবাহমস্মি ॥ 514॥

নিষ্ক্রিযোঽস্ম্যবিকারোঽস্মি

নিষ্কলোঽস্মি নিরাকৃতিঃ ।

নির্বিকল্পোঽস্মি নিত্যোঽস্মি

নিরালম্বোঽস্মি নির্দ্বযঃ ॥ 515॥

সর্বাত্মকোঽহং সর্বোঽহং সর্বাতীতোঽহমদ্বযঃ ।

কেবলাখণ্ডবোধোঽহমানন্দোঽহং নিরন্তরঃ ॥ 516॥

স্বারাজ্যসাম্রাজ্যবিভূতিরেষা

ভবত্কৃপাশ্রীমহিমপ্রসাদাত্ ।

প্রাপ্তা মযা শ্রীগুরবে মহাত্মনে

নমো নমস্তেঽস্তু পুনর্নমোঽস্তু ॥ 517॥

মহাস্বপ্নে মাযাকৃতজনিজরামৃত্যুগহনে

ভ্রমন্তং ক্লিশ্যন্তং বহুলতরতাপৈরনুদিনম্ । (পাঠভেদঃ - রনুকলম্)

অহঙ্কারব্যাঘ্রব্যথিতমিমমত্যন্তকৃপযা

প্রবোধ্য প্রস্বাপাত্পরমবিতবান্মামসি গুরো ॥ 518॥

নমস্তস্মৈ সদৈকস্মৈ কস্মৈচিন্মহসে নমঃ । (পাঠভেদঃ - সদেকস্মৈ নমশ্চিন্মহসে মুহুঃ)

যদেতদ্বিশ্বরূপেণ রাজতে গুরুরাজ তে ॥ 519॥

ইতি নতমবলোক্য শিষ্যবর্যং

সমধিগতাত্মসুখং প্রবুদ্ধতত্ত্বম্ ।

প্রমুদিতহৃদযং স দেশিকেন্দ্রঃ (পাঠভেদঃ - হৃদযঃ)

পুনরিদমাহ বচঃ পরং মহাত্মা ॥ 520॥

ব্রহ্মপ্রত্যযসন্ততির্জগদতো ব্রহ্মৈব তত্সর্বতঃ (পাঠভেদঃ - সত্সর্বতঃ)

পশ্যাধ্যাত্মদৃশা প্রশান্তমনসা সর্বাস্ববস্থাস্বপি ।

রূপাদন্যদবেক্ষিতং কিমভিতশ্চক্ষুষ্মতাং দৃশ্যতে (পাঠভেদঃ - বিদ্যতে)

তদ্বদ্ব্রহ্মবিদঃ সতঃ কিমপরং বুদ্ধের্বিহারাস্পদম্ ॥ 521॥

কস্তাং পরানন্দরসানুভূতি-

মৃত্সৃজ্য শূন্যেষু রমেত বিদ্বান্ । (পাঠভেদঃ - মুত্সৃজ্য

চন্দ্রে মহাহ্লাদিনি দীপ্যমানে)

চিত্রেন্দুমালোকযিতুং ক ইচ্ছেত্ ॥ 522॥

অসত্পদার্থানুভবেন কিঞ্চিন্

ন হ্যস্তি তৃপ্তির্ন চ দুঃখহানিঃ ।

তদদ্বযানন্দরসানুভূত্যা

তৃপ্তঃ সুখং তিষ্ঠ সদাত্মনিষ্ঠযা ॥ 523॥

স্বমেব সর্বথা পশ্যন্মন্যমানঃ স্বমদ্বযম্ । (পাঠভেদঃ - সর্বতঃ)

স্বানন্দমনুভুঞ্জানঃ কালং নয মহামতে ॥ 524॥

অখণ্ডবোধাত্মনি নির্বিকল্পে

বিকল্পনং ব্যোম্নি পুরপ্রকল্পনম্ ।

তদদ্বযানন্দমযাত্মনা সদা

শান্তিং পরামেত্য ভজস্ব মৌনম্ ॥ 525॥

তূষ্ণীমবস্থা পরমোপশান্তিঃ

বুদ্ধেরসত্কল্পবিকল্পহেতোঃ ।

ব্রহ্মাত্মনো ব্রহ্মবিদো মহাত্মনো

যত্রাদ্বযানন্দসুখং নিরন্তরম্ ॥ 526॥

নাস্তি নির্বাসনান্মৌনাত্পরং সুখকৃদুত্তমম্ ।

বিজ্ঞাতাত্মস্বরূপস্য স্বানন্দরসপাযিনঃ ॥ 527॥

গচ্ছংস্তিষ্ঠন্নুপবিশঞ্ছযানো বাঽন্যথাপি বা ।

যথেচ্ছযা বসেদ্বিদ্বানাত্মারামঃ সদা মুনিঃ ॥ 528॥

ন দেশকালাসনদিগ্যমাদি-

লক্ষ্যাদ্যপেক্ষাঽপ্রতিবদ্ধবৃত্তেঃ । (পাঠভেদঃ - প্রতিবদ্ধ

সংসিদ্ধতত্ত্বস্য মহাত্মনোঽস্তি)

স্ববেদনে কা নিযমাদ্যবস্থা ॥ 529॥

ঘটোঽযমিতি বিজ্ঞাতুং নিযমঃ কোঽন্ববেক্ষতে । (পাঠভেদঃ - অপেক্ষ্যতে)

বিনা প্রমাণসুষ্ঠুত্বং যস্মিন্সতি পদার্থধীঃ ॥ 530॥

অযমাত্মা নিত্যসিদ্ধঃ প্রমাণে সতি ভাসতে ।

ন দেশং নাপি বা কালং ন শুদ্ধিং বাপ্যপেক্ষতে ॥ 531॥

দেবদত্তোঽহমিত্যেতদ্বিজ্ঞানং নিরপেক্ষকম্ ।

তদ্বদ্ব্রহ্মবিদোঽপ্যস্য ব্রহ্মাহমিতি বেদনম্ ॥ 532॥

ভানুনেব জগত্সর্বং ভাসতে যস্য তেজসা ।

অনাত্মকমসত্তুচ্ছং কিং নু তস্যাবভাসকম্ ॥ 533॥

বেদশাস্ত্রপুরাণানি ভূতানি সকলান্যপি ।

যেনার্থবন্তি তং কিন্নু বিজ্ঞাতারং প্রকাশযেত্ ॥ 534॥

এষ স্বযঞ্জ্যোতিরনন্তশক্তিঃ

আত্মাঽপ্রমেযঃ সকলানুভূতিঃ ।

যমেব বিজ্ঞায বিমুক্তবন্ধো

জযত্যযং ব্রহ্মবিদুত্তমোত্তমঃ ॥ 535॥

ন খিদ্যতে নো বিষযৈঃ প্রমোদতে

ন সজ্জতে নাপি বিরজ্যতে চ ।

স্বস্মিন্সদা ক্রীডতি নন্দতি স্বযং

নিরন্তরানন্দরসেন তৃপ্তঃ ॥ 536॥

ক্ষুধাং দেহব্যথাং ত্যক্ত্বা বালঃ ক্রীডতি বস্তুনিঃ । (পাঠভেদঃ - বস্তুনি)

তথৈব বিদ্বান্ রমতে নির্মমো নিরহং সুখী ॥ 537॥

চিন্তাশূন্যমদৈন্যভৈক্ষমশনং পানং সরিদ্বারিষু

স্বাতন্ত্র্যেণ নিরঙ্কুশা স্থিতিরভীর্নিদ্রা শ্মশানে বনে ।

বস্ত্রং ক্ষালনশোষণাদিরহিতং দিগ্বাস্তু শয্যা মহী

সঞ্চারো নিগমান্তবীথিষু বিদাং ক্রীডা পরে ব্রহ্মণি ॥ 538॥

বিমানমালম্ব্য শরীরমেতদ্

ভুনক্ত্যশেষান্বিষযানুপস্থিতান্ ।

পরেচ্ছযা বালবদাত্মবেত্তা

যোঽব্যক্তলিঙ্গোঽননুষক্তবাহ্যঃ ॥ 539॥

দিগম্বরো বাপি চ সাম্বরো বা

ত্বগম্বরো বাপি চিদম্বরস্থঃ ।

উন্মত্তবদ্বাপি চ বালবদ্বা

পিশাচবদ্বাপি চরত্যবন্যাম্ ॥ 540॥

কামান্নিষ্কামরূপী সংশ্চরত্যেকচরো মুনিঃ । (পাঠভেদঃ - কামান্নী কামরূপী)

স্বাত্মনৈব সদা তুষ্টঃ স্বযং সর্বাত্মনা স্থিতঃ ॥ 541॥

ক্বচিন্মূঢো বিদ্বান্ ক্বচিদপি মহারাজবিভবঃ

ক্বচিদ্ভ্রান্তঃ সৌম্যঃ ক্বচিদজগরাচারকলিতঃ ।

ক্বচিত্পাত্রীভূতঃ ক্বচিদবমতঃ ক্বাপ্যবিদিতঃ

চরত্যেবং প্রাজ্ঞঃ সততপরমানন্দসুখিতঃ ॥ 542॥

নির্ধনোঽপি সদা তুষ্টোঽপ্যসহাযো মহাবলঃ ।

নিত্যতৃপ্তোঽপ্যভুঞ্জানোঽপ্যসমঃ সমদর্শনঃ ॥ 543॥

অপি কুর্বন্নকুর্বাণশ্চাভোক্তা ফলভোগ্যপি ।

শরীর্যপ্যশরীর্যেষ পরিচ্ছিন্নোঽপি সর্বগঃ ॥ 544॥

অশরীরং সদা সন্তমিমং ব্রহ্মবিদং ক্বচিত্ ।

প্রিযাপ্রিযে ন স্পৃশতস্তথৈব চ শুভাশুভে ॥ 545॥

স্থূলাদিসম্বন্ধবতোঽভিমানিনঃ

সুখং চ দুঃখং চ শুভাশুভে চ ।

বিধ্বস্তবন্ধস্য সদাত্মনো মুনেঃ

কুতঃ শুভং বাঽপ্যশুভং ফলং বা ॥ 546॥

তমসা গ্রস্তবদ্ভানাদগ্রস্তোঽপি রবির্জনৈঃ ।

গ্রস্ত ইত্যুচ্যতে ভ্রান্ত্যাং হ্যজ্ঞাত্বা বস্তুলক্ষণম্ ॥ 547॥ (পাঠভেদঃ - ভ্রান্ত্যা)

তদ্বদ্দেহাদিবন্ধেভ্যো বিমুক্তং ব্রহ্মবিত্তমম্ ।

পশ্যন্তি দেহিবন্মূঢাঃ শরীরাভাসদর্শনাত্ ॥ 548॥

অহির্নির্ল্বযনীং বাযং মুক্ত্বা দেহং তু তিষ্ঠতি । (পাঠভেদঃ - অহিনি)

ইতস্ততশ্চাল্যমানো যত্কিঞ্চিত্প্রাণবাযুনা ॥ 549॥

স্ত্রোতসা নীযতে দারু যথা নিম্নোন্নতস্থলম্ ।

দৈবেন নীযতে দেহো যথাকালোপভুক্তিষু ॥ 550॥

প্রারব্ধকর্মপরিকল্পিতবাসনাভিঃ

সংসারিবচ্চরতি ভুক্তিষু মুক্তদেহঃ ।

সিদ্ধঃ স্বযং বসতি সাক্ষিবদত্র তূষ্ণীং

চক্রস্য মূলমিব কল্পবিকল্পশূন্যঃ ॥ 551॥

নৈবেন্দ্রিযাণি বিষযেষু নিযুঙ্ক্ত এষ

নৈবাপযুঙ্ক্ত উপদর্শনলক্ষণস্থঃ ।

নৈব ক্রিযাফলমপীষদবেক্ষতে স (পাঠভেদঃ - অপীষদপেক্ষতে সঃ)

স্বানন্দসান্দ্ররসপানসুমত্তচিত্তঃ ॥ 552॥

লক্ষ্যালক্ষ্যগতিং ত্যক্ত্বা যস্তিষ্ঠেত্কেবলাত্মনা ।

শিব এব স্বযং সাক্ষাদযং ব্রহ্মবিদুত্তমঃ ॥ 553॥

জীবন্নেব সদা মুক্তঃ কৃতার্থো ব্রহ্মবিত্তমঃ ।

উপাধিনাশাদ্ব্রহ্মৈব সন্ ব্রহ্মাপ্যেতি নির্দ্বযম্ ॥ 554॥

শৈলূষো বেষসদ্ভাবাভাবযোশ্চ যথা পুমান্ ।

তথৈব ব্রহ্মবিচ্ছ্রেষ্ঠঃ সদা ব্রহ্মৈব নাপরঃ ॥ 555॥

যত্র ক্বাপি বিশীর্ণং সত্পর্ণমিব তরোর্বপুঃ পততাত্ । (পাঠভেদঃ - বিশীর্ণং পর্ণমিব)

ব্রহ্মীভূতস্য যতেঃ প্রাগেব তচ্চিদগ্নিনা দগ্ধম্ ॥ 556॥

সদাত্মনি ব্রহ্মণি তিষ্ঠতো মুনেঃ

পূর্ণাঽদ্বযানন্দমযাত্মনা সদা ।

ন দেশকালাদ্যুচিতপ্রতীক্ষা

ত্বঙ্মাংসবিট্পিণ্ডবিসর্জনায ॥ 557॥

দেহস্য মোক্ষো নো মোক্ষো ন দণ্ডস্য কমণ্ডলোঃ ।

অবিদ্যাহৃদযগ্রন্থিমোক্ষো মোক্ষো যতস্ততঃ ॥ 558॥

কুল্যাযামথ নদ্যাং বা শিবক্ষেত্রেঽপি চত্বরে ।

পর্ণং পততি চেত্তেন তরোঃ কিং নু শুভাশুভম্ ॥ 559॥

পত্রস্য পুষ্পস্য ফলস্য নাশবদ্-

দেহেন্দ্রিযপ্রাণধিযাং বিনাশঃ ।

নৈবাত্মনঃ স্বস্য সদাত্মকস্যা-

নন্দাকৃতের্বৃক্ষবদস্তি চৈষঃ ॥ 560॥ (পাঠভেদঃ - বদাস্ত এষঃ)

প্রজ্ঞানঘন ইত্যাত্মলক্ষণং সত্যসূচকম্ ।

অনূদ্যৌপাধিকস্যৈব কথযন্তি বিনাশনম্ ॥ 561॥

অবিনাশী বা অরেঽযমাত্মেতি শ্রুতিরাত্মনঃ ।

প্রব্রবীত্যবিনাশিত্বং বিনশ্যত্সু বিকারিষু ॥ 562॥

পাষাণবৃক্ষতৃণধান্যকডঙ্করাদ্যা (পাঠভেদঃ - কটাম্বরাদ্যা)

দগ্ধা ভবন্তি হি মৃদেব যথা তথৈব ।

দেহেন্দ্রিযাসুমন আদি সমস্তদৃশ্যং

জ্ঞানাগ্নিদগ্ধমুপযাতি পরাত্মভাবম্ ॥ 563॥

বিলক্ষণং যথা ধ্বান্তং লীযতে ভানুতেজসি ।

তথৈব সকলং দৃশ্যং ব্রহ্মণি প্রবিলীযতে ॥ 564॥

ঘটে নষ্টে যথা ব্যোম ব্যোমৈব ভবতি স্ফুটম্ ।

তথৈবোপাধিবিলযে ব্রহ্মৈব ব্রহ্মবিত্স্বযম্ ॥ 565॥

ক্ষীরং ক্ষীরে যথা ক্ষিপ্তং তৈলং তৈলে জলং জলে ।

সংযুক্তমেকতাং যাতি তথাঽঽত্মন্যাত্মবিন্মুনিঃ ॥ 566॥

এবং বিদেহকৈবল্যং সন্মাত্রত্বমখণ্ডিতম্ ।

ব্রহ্মভাবং প্রপদ্যৈষ যতির্নাবর্ততে পুনঃ ॥ 567॥

সদাত্মৈকত্ববিজ্ঞানদগ্ধাবিদ্যাদিবর্ষ্মণঃ ।

অমুষ্য ব্রহ্মভূতত্বাদ্ ব্রহ্মণঃ কুত উদ্ভবঃ ॥ 568॥

মাযাক্লৃপ্তৌ বন্ধমোক্ষৌ ন স্তঃ স্বাত্মনি বস্তুতঃ ।

যথা রজ্জৌ নিষ্ক্রিযাযাং সর্পাভাসবিনির্গমৌ ॥ 569॥

আবৃতেঃ সদসত্ত্বাভ্যাং বক্তব্যে বন্ধমোক্ষণে ।

নাবৃতির্ব্রহ্মণঃ কাচিদন্যাভাবাদনাবৃতম্ ।

যদ্যস্ত্যদ্বৈতহানিঃ স্যাদ্ দ্বৈতং নো সহতে শ্রুতিঃ ॥ 570॥

বন্ধঞ্চ মোক্ষঞ্চ মৃষৈব মূঢা

বুদ্ধের্গুণং বস্তুনি কল্পযন্তি ।

দৃগাবৃতিং মেঘকৃতাং যথা রবৌ

যতোঽদ্বযাঽসঙ্গচিদেতদক্ষরম্ ॥ 571॥ (পাঠভেদঃ - চিদেকমক্ষরম্)

অস্তীতি প্রত্যযো যশ্চ যশ্চ নাস্তীতি বস্তুনি ।

বুদ্ধেরেব গুণাবেতৌ ন তু নিত্যস্য বস্তুনঃ ॥ 572॥

অতস্তৌ মাযযা ক্লৃপ্তৌ বন্ধমোক্ষৌ ন চাত্মনি ।

নিষ্কলে নিষ্ক্রিযে শান্তে নিরবদ্যে নিরঞ্জনে ।

অদ্বিতীযে পরে তত্ত্বে ব্যোমবত্কল্পনা কুতঃ ॥ 573॥

ন নিরোধো ন চোত্পত্তির্ন বদ্ধো ন চ সাধকঃ ।

ন মুমুক্ষুর্ন বৈ মুক্ত ইত্যেষা পরমার্থতা ॥ 574॥

সকলনিগমচূডাস্বান্তসিদ্ধান্তরূপং

পরমিদমতিগুহ্যং দর্শিতং তে মযাদ্য ।

অপগতকলিদোষং কামনির্মুক্তবুদ্ধিং (পাঠভেদঃ - বুদ্ধিঃ)

স্বসুতবদসকৃত্ত্বাং ভাবযিত্বা মুমুক্ষুম্ ॥ 575॥

ইতি শ্রুত্বা গুরোর্বাক্যং প্রশ্রযেণ কৃতানতিঃ ।

স তেন সমনুজ্ঞাতো যযৌ নির্মুক্তবন্ধনঃ ॥ 576॥

গুরুরেব সদানন্দসিন্ধৌ নির্মগ্নমানসঃ । (পাঠভেদঃ - গুরুরেষ)

পাবযন্বসুধাং সর্বাং বিচচার নিরন্তরঃ ॥ 577॥

ইত্যাচার্যস্য শিষ্যস্য সংবাদেনাত্মলক্ষণম্ ।

নিরূপিতং মুমুক্ষূণাং সুখবোধোপপত্তযে ॥ 578॥

হিতমিদমুপদেশমাদ্রিযন্তাং

বিহিতনিরস্তসমস্তচিত্তদোষাঃ ।

ভবসুখবিরতাঃ প্রশান্তচিত্তাঃ (পাঠভেদঃ - সুখবিমুখাঃ)

শ্রুতিরসিকা যতযো মুমুক্ষবো যে ॥ 579॥

সংসারাধ্বনি তাপভানুকিরণপ্রোদ্ভূতদাহব্যথা-

খিন্নানাং জলকাঙ্ক্ষযা মরুভুবি ভ্রান্ত্যা পরিভ্রাম্যতাম্ ।

অত্যাসন্নসুধাম্বুধিং সুখকরং ব্রহ্মাদ্বযং দর্শয-

ত্যেষা শঙ্করভারতী বিজযতে নির্বাণসন্দাযিনী ॥ 580॥

॥ ইতি শঙ্করাচার্যবিরচিতং বিবেকচূডামণিঃ ॥

॥ ওঁ তত্সত্ ॥

Roman (IAST) Transliteration

sarvavedāntasiddhāntagocaraṃ tamagocaram |

govindaṃ paramānandaṃ sadguruṃ praṇato'smyaham || 1||

jantūnāṃ narajanma durlabhamataḥ puṃstvaṃ tato vipratā

tasmādvaidikadharmamārgaparatā vidvattvamasmātparam |

ātmānātmavivecanaṃ svanubhavo brahmātmanā saṃsthitiḥ

muktirno śatajanmakoṭisukṛtaiḥ puṇyairvinā labhyate || 2|| (pāṭhabhedaḥ - śatakoṭijanmasu kṛtaiḥ)

durlabhaṃ trayamevaitaddevānugrahahetukam |

manuṣyatvaṃ mumukṣutvaṃ mahāpuruṣasaṃśrayaḥ || 3||

labdhvā kathañcinnarajanma durlabhaṃ (pāṭhabhedaḥ - kathañcin)

tatrāpi puṃstvaṃ śrutipāradarśanam |

yastvātmamuktau na yateta mūḍhadhīḥ

sa hyātmahā svaṃ vinihantyasadgrahāt || 4|| (pāṭhabhedaḥ - ātmahā svaṃ)

itaḥ ko nvasti mūḍhātmā yastu svārthe pramādyati |

durlabhaṃ mānuṣaṃ dehaṃ prāpya tatrāpi pauruṣam || 5||

vadantu śāstrāṇi yajantu devān (pāṭhabhedaḥ - paṭhantu)

kurvantu karmāṇi bhajantu devatāḥ |

ātmaikyabodhena vināpi mukti- (pāṭhabhedaḥ - vinā vimuktiḥ na)

rna sidhyati brahmaśatāntare'pi || 6||

amṛtattvasya nāśāsti vittenetyeva hi śrutiḥ |

bravīti karmaṇo mukterahetutvaṃ sphuṭaṃ yataḥ || 7||

ato vimuktyai prayateta vidvān

sannyastabāhyārthasukhaspṛhaḥ san |

santaṃ mahāntaṃ samupetya deśikaṃ

tenopadiṣṭārthasamāhitātmā || 8||

uddharedātmanā''tmānaṃ magnaṃ saṃsāravāridhau |

yogārūḍhatvamāsādya samyagdarśananiṣṭhayā || 9||

sannyasya sarvakarmāṇi bhavabandhavimuktaye |

yatyatāṃ paṇḍitairdhīrairātmābhyāsa upasthitaiḥ || 10||

cittasya śuddhaye karma na tu vastūpalabdhaye |

vastusiddhirvicāreṇa na kiñcitkarmakoṭibhiḥ || 11||

samyagvicārataḥ siddhā rajjutattvāvadhāraṇā |

bhrāntoditamahāsarpabhayaduḥkhavināśinī || 12|| (pāṭhabhedaḥ - bhrāntyo)

arthasya niścayo dṛṣṭo vicāreṇa hitoktitaḥ |

na snānena na dānena prāṇāyāmaśatena vā || 13||

adhikāriṇamāśāste phalasiddhirviśeṣataḥ |

upāyā deśakālādyāḥ santyasminsahakāriṇaḥ || 14|| (pāṭhabhedaḥ - santyasyāṃ)

ato vicāraḥ kartavyo jijñāsorātmavastunaḥ ||

samāsādya dayāsindhuṃ guruṃ brahmaviduttamam || 15||

medhāvī puruṣo vidvānūhāpohavicakṣaṇaḥ |

adhikāryātmavidyāyāmuktalakṣaṇalakṣitaḥ || 16||

vivekino viraktasya śamādiguṇaśālinaḥ |

mumukṣoreva hi brahmajijñāsāyogyatā matā || 17||

sādhanānyatra catvāri kathitāni manīṣibhiḥ |

yeṣu satsveva sanniṣṭhā yadabhāve na sidhyati || 18||

ādau nityānityavastuvivekaḥ parigaṇyate |

ihāmutraphalabhogavirāgastadanantaram |

śamādiṣaṭkasampattirmumukṣutvamiti sphuṭam || 19||

brahma satyaṃ jaganmithyetyevaṃrūpo viniścayaḥ |

so'yaṃ nityānityavastuvivekaḥ samudāhṛtaḥ || 20||

tadvairāgyaṃ jihāsā yā darśanaśravaṇādibhiḥ | (pāṭhabhedaḥ - jugupsā yā)

dehādibrahmaparyante hyanitye bhogavastuni || 21|| (pāṭhabhedaḥ - bhogyavastuni)

virajya viṣayavrātāddoṣadṛṣṭyā muhurmuhuḥ |

svalakṣye niyatāvasthā manasaḥ śama ucyate || 22||

viṣayebhyaḥ parāvartya sthāpanaṃ svasvagolake |

ubhayeṣāmindriyāṇāṃ sa damaḥ parikīrtitaḥ |

bāhyānālambanaṃ vṛttereṣoparatiruttamā || 23||

sahanaṃ sarvaduḥkhānāmapratīkārapūrvakam |

cintāvilāparahitaṃ sā titikṣā nigadyate || 24||

śāstrasya guruvākyasya satyabuddhyavadhāraṇam | (pāṭhabhedaḥ - satyabuddhyāvadhāraṇā)

sā śraddhā kathitā sadbhiryayā vastūpalabhyate || 25||

sarvadā sthāpanaṃ buddheḥ śuddhe brahmaṇi sarvadā | (pāṭhabhedaḥ - samyagāsthāpanaṃ)

tatsamādhānamityuktaṃ na tu cittasya lālanam || 26||

ahaṅkārādidehāntān bandhānajñānakalpitān |

svasvarūpāvabodhena moktumicchā mumukṣutā || 27||

mandamadhyamarūpāpi vairāgyeṇa śamādinā |

prasādena guroḥ seyaṃ pravṛddhā sūyate phalam || 28||

vairāgyaṃ ca mumukṣutvaṃ tīvraṃ yasya tu vidyate |

tasminnevārthavantaḥ syuḥ phalavantaḥ śamādayaḥ || 29||

etayormandatā yatra viraktatvamumukṣayoḥ |

marau salilavattatra śamāderbhānamātratā || 30||

mokṣakāraṇasāmagryāṃ bhaktireva garīyasī |

svasvarūpānusandhānaṃ bhaktirityabhidhīyate || 31||

svātmatattvānusandhānaṃ bhaktirityapare jaguḥ |

uktasādhanasampannastattvajijñāsurātmanaḥ |

upasīdedguruṃ prājñaṃ yasmādbandhavimokṣaṇam || 32||

śrotriyo'vṛjino'kāmahato yo brahmavittamaḥ |

brahmaṇyuparataḥ śānto nirindhana ivānalaḥ |

ahetukadayāsindhurbandhurānamatāṃ satām || 33||

tamārādhya guruṃ bhaktyā prahvapraśrayasevanaiḥ | (pāṭhabhedaḥ - prahvaḥ)

prasannaṃ tamanuprāpya pṛcchejjñātavyamātmanaḥ || 34||

svāminnamaste natalokabandho

kāruṇyasindho patitaṃ bhavābdhau |

māmuddharātmīyakaṭākṣadṛṣṭyā

ṛjvyātikāruṇyasudhābhivṛṣṭyā || 35||

durvārasaṃsāradavāgnitaptaṃ

dodhūyamānaṃ duradṛṣṭavātaiḥ |

bhītaṃ prapannaṃ paripāhi mṛtyoḥ

śaraṇyamanyadyadahaṃ na jāne || 36|| (pāṭhabhedaḥ - anyaṃ)

śāntā mahānto nivasanti santo

vasantavallokahitaṃ carantaḥ |

tīrṇāḥ svayaṃ bhīmabhavārṇavaṃ janā-

nahetunānyānapi tārayantaḥ || 37||

ayaṃ svabhāvaḥ svata eva yatpara-

śramāpanodapravaṇaṃ mahātmanām |

sudhāṃśureṣa svayamarkakarkaśa-

prabhābhitaptāmavati kṣitiṃ kila || 38||

brahmānandarasānubhūtikalitaiḥ pūtaiḥ suśītairyutai- (pāṭhabhedaḥ - suśītaiḥ sitaiḥ)

ryuṣmadvākkalaśojjhitaiḥ śrutisukhairvākyāmṛtaiḥ secaya |

santaptaṃ bhavatāpadāvadahanajvālābhirenaṃ prabho

dhanyāste bhavadīkṣaṇakṣaṇagateḥ pātrīkṛtāḥ svīkṛtāḥ || 39||

kathaṃ tareyaṃ bhavasindhumetaṃ

kā vā gatirme katamo'styupāyaḥ |

jāne na kiñcitkṛpayā'va māṃ prabho

saṃsāraduḥkhakṣatimātanuṣva || 40||

tathā vadantaṃ śaraṇāgataṃ svaṃ

saṃsāradāvānalatāpataptam |

nirīkṣya kāruṇyarasārdradṛṣṭyā

dadyādabhītiṃ sahasā mahātmā || 41||

vidvān sa tasmā upasattimīyuṣe

mumukṣave sādhu yathoktakāriṇe |

praśāntacittāya śamānvitāya

tattvopadeśaṃ kṛpayaiva kuryāt || 42||

mā bhaiṣṭa vidvaṃstava nāstyapāyaḥ

saṃsārasindhostaraṇe'styupāyaḥ |

yenaiva yātā yatayo'sya pāraṃ

tameva mārgaṃ tava nirdiśāmi || 43||

astyupāyo mahānkaścitsaṃsārabhayanāśanaḥ |

tena tīrtvā bhavāmbhodhiṃ paramānandamāpsyasi || 44||

vedāntārthavicāreṇa jāyate jñānamuttamam |

tenātyantikasaṃsāraduḥkhanāśo bhavatyanu || 45||

śraddhābhaktidhyānayogānmumukṣoḥ

mukterhetūnvakti sākṣācchrutergīḥ |

yo vā eteṣveva tiṣṭhatyamuṣya

mokṣo'vidyākalpitāddehabandhāt || 46||

ajñānayogātparamātmanastava

hyanātmabandhastata eva saṃsṛtiḥ |

tayorvivekoditabodhavahniḥ

ajñānakāryaṃ pradahetsamūlam || 47||

śiṣya uvāca |

kṛpayā śrūyatāṃ svāminpraśno'yaṃ kriyate mayā |

yaduttaramahaṃ śrutvā kṛtārthaḥ syāṃ bhavanmukhāt || 48||

ko nāma bandhaḥ kathameṣa āgataḥ

kathaṃ pratiṣṭhāsya kathaṃ vimokṣaḥ |

ko'sāvanātmā paramaḥ ka ātmā

tayorvivekaḥ kathametaducyatām || 49||

śrīguruvāca |

dhanyo'si kṛtakṛtyo'si pāvitaṃ te kulaṃ tvayā | (pāṭhabhedaḥ - pāvitaṃ)

yadavidyābandhamuktyā brahmībhavitumicchasi || 50||

ṛṇamocanakartāraḥ pituḥ santi sutādayaḥ |

bandhamocanakartā tu svasmādanyo na kaścana || 51||

mastakanyastabhārāderduḥkhamanyairnivāryate |

kṣudhādikṛtaduḥkhaṃ tu vinā svena na kenacit || 52||

pathyamauṣadhasevā ca kriyate yena rogiṇā |

ārogyasiddhirdṛṣṭā'sya nānyānuṣṭhitakarmaṇā || 53||

vastusvarūpaṃ sphuṭabodhacakṣuṣā

svenaiva vedyaṃ na tu paṇḍitena |

candrasvarūpaṃ nijacakṣuṣaiva

jñātavyamanyairavagamyate kim || 54||

avidyākāmakarmādipāśabandhaṃ vimocitum |

kaḥ śaknuyādvinā''tmānaṃ kalpakoṭiśatairapi || 55||

na yogena na sāṅkhyena karmaṇā no na vidyayā |

brahmātmaikatvabodhena mokṣaḥ sidhyati nānyathā || 56||

vīṇāyā rūpasaundaryaṃ tantrīvādanasauṣṭhavam |

prajārañjanamātraṃ tanna sāmrājyāya kalpate || 57||

vāgvaikharī śabdajharī śāstravyākhyānakauśalam |

vaiduṣyaṃ viduṣāṃ tadvadbhuktaye na tu muktaye || 58||

avijñāte pare tattve śāstrādhītistu niṣphalā |

vijñāte'pi pare tattve śāstrādhītistu niṣphalā || 59||

śabdajālaṃ mahāraṇyaṃ cittabhramaṇakāraṇam |

ataḥ prayatnājjñātavyaṃ tattvajñaistattvamātmanaḥ || 60|| tattvajñāttattva

ajñānasarpadaṣṭasya brahmajñānauṣadhaṃ vinā |

kimu vedaiśca śāstraiśca kimu mantraiḥ kimauṣadhaiḥ || 61||

na gacchati vinā pānaṃ vyādhirauṣadhaśabdataḥ |

vinā'parokṣānubhavaṃ brahmaśabdairna mucyate || 62||

akṛtvā dṛśyavilayamajñātvā tattvamātmanaḥ |

brahmaśabdaiḥ kuto muktiruktimātraphalairnṛṇām || 63|| (pāṭhabhedaḥ - bāhyaśabdaiḥ)

akṛtvā śatrusaṃhāramagatvākhilabhūśriyam |

rājāhamiti śabdānno rājā bhavitumarhati || 64||

āptoktiṃ khananaṃ tathopariśilādyutkarṣaṇaṃ svīkṛtiṃ (pāṭhabhedaḥ - pariśilāpākarṣaṇaṃ)

nikṣepaḥ samapekṣate na hi bahiḥśabdaistu nirgacchati |

tadvadbrahmavidopadeśamananadhyānādibhirlabhyate

māyākāryatirohitaṃ svamamalaṃ tattvaṃ na duryuktibhiḥ || 65||

tasmātsarvaprayatnena bhavabandhavimuktaye |

svaireva yatnaḥ kartavyo rogādāviva paṇḍitaiḥ || 66|| (pāṭhabhedaḥ - rogāderiva)

yastvayādya kṛtaḥ praśno varīyāñchāstravinmataḥ | (pāṭhabhedaḥ - sammataḥ)

sūtraprāyo nigūḍhārtho jñātavyaśca mumukṣubhiḥ || 67||

śaṛṇuṣvāvahito vidvanyanmayā samudīryate |

tadetacchravaṇātsadyo bhavabandhādvimokṣyase || 68||

mokṣasya hetuḥ prathamo nigadyate

vairāgyamatyantamanityavastuṣu |

tataḥ śamaścāpi damastitikṣā

nyāsaḥ prasaktākhilakarmaṇāṃ bhṛśam || 69||

tataḥ śrutistanmananaṃ satattva-

dhyānaṃ ciraṃ nityanirantaraṃ muneḥ |

tato'vikalpaṃ parametya vidvān

ihaiva nirvāṇasukhaṃ samṛcchati || 70||

yadboddhavyaṃ tavedānīmātmānātmavivecanam |

taducyate mayā samyak śrutvātmanyavadhāraya || 71||

majjāsthimedaḥpalaraktacarma-

tvagāhvayairdhātubhirebhiranvitam |

pādoruvakṣobhujapṛṣṭhamastakaiḥ

aṅgairupāṅgairupayuktametat || 72||

ahammameti prathitaṃ śarīraṃ

mohāspadaṃ sthūlamitīryate budhaiḥ |

nabhonabhasvaddahanāmbubhūmayaḥ

sūkṣmāṇi bhūtāni bhavanti tāni || 73||

parasparāṃśairmilitāni bhūtvā

sthūlāni ca sthūlaśarīrahetavaḥ |

mātrāstadīyā viṣayā bhavanti

śabdādayaḥ pañca sukhāya bhoktuḥ || 74||

ya eṣu mūḍhā viṣayeṣu baddhā

rāgorupāśena sudurdamena |

āyānti niryāntyadha ūrdhvamuccaiḥ

svakarmadūtena javena nītāḥ || 75||

śabdādibhiḥ pañcabhireva pañca

pañcatvamāpuḥ svaguṇena baddhāḥ |

kuraṅgamātaṅgapataṅgamīna-

bhṛṅgā naraḥ pañcabhirañcitaḥ kim || 76||

doṣeṇa tīvro viṣayaḥ kṛṣṇasarpaviṣādapi |

viṣaṃ nihanti bhoktāraṃ draṣṭāraṃ cakṣuṣāpyayam || 77||

viṣayāśāmahāpāśādyo vimuktaḥ sudustyajāt |

sa eva kalpate muktyai nānyaḥ ṣaṭśāstravedyapi || 78||

āpātavairāgyavato mumukṣūn

bhavābdhipāraṃ pratiyātumudyatān |

āśāgraho majjayate'ntarāle

nigṛhya kaṇṭhe vinivartya vegāt || 79||

viṣayākhyagraho yena suviraktyasinā hataḥ |

sa gacchati bhavāmbhodheḥ pāraṃ pratyūhavarjitaḥ || 80||

viṣamaviṣayamārgairgacchato'nacchabuddheḥ (pāṭhabhedaḥ - viṣayamārge gacchato)

pratipadamabhiyāto mṛtyurapyeṣa viddhi | (pāṭhabhedaḥ - pratipadamabhighāto mṛtyurapyeṣa siddhaḥ)

hitasujanagurūktyā gacchataḥ svasya yuktyā

prabhavati phalasiddhiḥ satyamityeva viddhi || 81||

mokṣasya kāṅkṣā yadi vai tavāsti

tyajātidūrādviṣayānviṣaṃ yathā |

pīyūṣavattoṣadayākṣamārjava-

praśāntidāntīrbhaja nityamādarāt || 82||

anukṣaṇaṃ yatparihṛtya kṛtyaṃ

anādyavidyākṛtabandhamokṣaṇam |

dehaḥ parārtho'yamamuṣya poṣaṇe

yaḥ sajjate sa svamanena hanti || 83||

śarīrapoṣaṇārthī san ya ātmānaṃ didṛkṣati | (pāṭhabhedaḥ - didṛkṣate)

grāhaṃ dārudhiyā dhṛtvā nadīṃ tartuṃ sa gacchati || 84|| (pāṭhabhedaḥ - sa icchati)

moha eva mahāmṛtyurmumukṣorvapurādiṣu |

moho vinirjito yena sa muktipadamarhati || 85||

mohaṃ jahi mahāmṛtyuṃ dehadārasutādiṣu |

yaṃ jitvā munayo yānti tadviṣṇoḥ paramaṃ padam || 86||

tvaṅmāṃsarudhirasnāyumedomajjāsthisaṅkulam |

pūrṇaṃ mūtrapurīṣābhyāṃ sthūlaṃ nindyamidaṃ vapuḥ || 87||

pañcīkṛtebhyo bhūtebhyaḥ sthūlebhyaḥ pūrvakarmaṇā |

samutpannamidaṃ sthūlaṃ bhogāyatanamātmanaḥ |

avasthā jāgarastasya sthūlārthānubhavo yataḥ || 88||

bāhyendriyaiḥ sthūlapadārthasevāṃ

srakcandanastryādivicitrarūpām |

karoti jīvaḥ svayametadātmanā

tasmātpraśastirvapuṣo'sya jāgare || 89||

sarvo'pi bāhyasaṃsāraḥ puruṣasya yadāśrayaḥ |

viddhi dehamidaṃ sthūlaṃ gṛhavadgṛhamedhinaḥ || 90||

sthūlasya sambhavajarāmaraṇāni dharmāḥ

sthaulyādayo bahuvidhāḥ śiśutādyavasthāḥ |

varṇāśramādiniyamā bahudhā''mayāḥ syuḥ

pūjāvamānabahumānamukhā viśeṣāḥ || 91||

buddhīndriyāṇi śravaṇaṃ tvagakṣi

ghrāṇaṃ ca jihvā viṣayāvabodhanāt |

vākpāṇipādā gudamapyupasthaḥ (pāṭhabhedaḥ - upasthaṃ)

karmendriyāṇi pravaṇena karmasu || 92|| (pāṭhabhedaḥ - pravaṇāni)

nigadyate'ntaḥkaraṇaṃ manodhīḥ

ahaṅkṛtiścittamiti svavṛttibhiḥ |

manastu saṅkalpavikalpanādibhiḥ

buddhiḥ padārthādhyavasāyadharmataḥ || 93||

atrābhimānādahamityahaṅkṛtiḥ |

svārthānusandhānaguṇena cittam || 94||

prāṇāpānavyānodānasamānā bhavatyasau prāṇaḥ |

svayameva vṛttibhedādvikṛtibhedātsuvarṇasalilādivat || 95|| (pāṭhabhedaḥ - vikṛterbhedātsuvarṇasalilamiva)

vāgādi pañca śravaṇādi pañca

prāṇādi pañcābhramukhāni pañca |

buddhyādyavidyāpi ca kāmakarmaṇī

puryaṣṭakaṃ sūkṣmaśarīramāhuḥ || 96||

idaṃ śarīraṃ śa‍ṛṇu sūkṣmasañjñitaṃ

liṅgaṃ tvapañcīkṛtabhūtasambhavam |

savāsanaṃ karmaphalānubhāvakaṃ

svājñānato'nādirupādhirātmanaḥ || 97||

svapno bhavatyasya vibhaktyavasthā

svamātraśeṣeṇa vibhāti yatra |

svapne tu buddhiḥ svayameva jāgrat

kālīnanānāvidhavāsanābhiḥ || 98||

kartrādibhāvaṃ pratipadya rājate

yatra svayaṃ bhāti hyayaṃ parātmā | (pāṭhabhedaḥ - svayañjyotirayaṃ)

dhīmātrakopādhiraśeṣasākṣī

na lipyate tatkṛtakarmaleśaiḥ | karmalepaiḥ

yasmādasaṅgastata eva karmabhiḥ

na lipyate kiñcidupādhinā kṛtaiḥ || 99||

sarvavyāpṛtikaraṇaṃ liṅgamidaṃ syāccidātmanaḥ puṃsaḥ |

vāsyādikamiva takṣṇastenaivātmā bhavatyasaṅgo'yam || 100||

andhatvamandatvapaṭutvadharmāḥ

sauguṇyavaiguṇyavaśāddhi cakṣuṣaḥ |

bādhiryamūkatvamukhāstathaiva

śrotrādidharmā na tu vetturātmanaḥ || 101||

ucchvāsaniḥśvāsavijṛmbhaṇakṣu-

tprasyandanādyutkramaṇādikāḥ kriyāḥ | (pāṭhabhedaḥ - praspandanādy)

prāṇādikarmāṇi vadanti tajñāḥ (pāṭhabhedaḥ - tajjñāḥ)

prāṇasya dharmāvaśanāpipāse || 102||

antaḥkaraṇameteṣu cakṣurādiṣu varṣmaṇi |

ahamityabhimānena tiṣṭhatyābhāsatejasā || 103||

ahaṅkāraḥ sa vijñeyaḥ kartā bhoktābhimānyayam |

sattvādiguṇayogena cāvasthātrayamaśnute || 104|| (pāṭhabhedaḥ - yogenāvasthātritayamśnute)

viṣayāṇāmānukūlye sukhī duḥkhī viparyaye |

sukhaṃ duḥkhaṃ ca taddharmaḥ sadānandasya nātmanaḥ || 105||

ātmārthatvena hi preyānviṣayo na svataḥ priyaḥ |

svata eva hi sarveṣāmātmā priyatamo yataḥ |

tata ātmā sadānando nāsya duḥkhaṃ kadācana || 106||

yatsuṣuptau nirviṣaya ātmānando'nubhūyate |

śrutiḥ pratyakṣamaitihyamanumānaṃ ca jāgrati || 107||

avyaktanāmnī parameśaśaktiḥ

anādyavidyā triguṇātmikā parā |

kāryānumeyā sudhiyaiva māyā

yayā jagatsarvamidaṃ prasūyate || 108||

sannāpyasannāpyubhayātmikā no

bhinnāpyabhinnāpyubhayātmikā no |

sāṅgāpyanaṅgā hyubhayātmikā no (pāṭhabhedaḥ - anaṅgāpyubhayātmikā)

mahādbhutā'nirvacanīyarūpā || 109||

śuddhādvayabrahmavibodhanāśyā

sarpabhramo rajjuvivekato yathā |

rajastamaḥsattvamiti prasiddhā

guṇāstadīyāḥ prathitaiḥ svakāryaiḥ || 110||

vikṣepaśaktī rajasaḥ kriyātmikā

yataḥ pravṛttiḥ prasṛtā purāṇī |

rāgādayo'syāḥ prabhavanti nityaṃ

duḥkhādayo ye manaso vikārāḥ || 111||

kāmaḥ krodho lobhadambhādyasūyā (pāṭhabhedaḥ - lobhadambhābhyasūyā)

ahaṅkārerṣyāmatsarādyāstu ghorāḥ |

dharmā ete rājasāḥ pumpravṛtti-

ryasmādeṣā tadrajo bandhahetuḥ || 112|| (pāṭhabhedaḥ - yasmādetattadrajo)

eṣā''vṛtirnāma tamoguṇasya

śaktirmayā vastvavabhāsate'nyathā | śaktiryayā

saiṣā nidānaṃ puruṣasya saṃsṛteḥ

vikṣepaśakteḥ pravaṇasya hetuḥ || 113|| (pāṭhabhedaḥ - prasarasya)

prajñāvānapi paṇḍito'pi caturo'pyatyantasūkṣmātmadṛg- (pāṭhabhedaḥ - sūkṣmārthadṛg)

vyālīḍhastamasā na vetti bahudhā sambodhito'pi sphuṭam |

bhrāntyāropitameva sādhu kalayatyālambate tadguṇān

hantāsau prabalā durantatamasaḥ śaktirmahatyāvṛtiḥ || 114||

abhāvanā vā viparītabhāvanā'- (pāṭhabhedaḥ - viparītabhāvanā)

sambhāvanā vipratipattirasyāḥ |

saṃsargayuktaṃ na vimuñcati dhruvaṃ

vikṣepaśaktiḥ kṣapayatyajasram || 115||

ajñānamālasyajaḍatvanidrā-

pramādamūḍhatvamukhāstamoguṇāḥ |

etaiḥ prayukto na hi vetti kiñcit

nidrāluvatstambhavadeva tiṣṭhati || 116||

sattvaṃ viśuddhaṃ jalavattathāpi

tābhyāṃ militvā saraṇāya kalpate |

yatrātmabimbaḥ pratibimbitaḥ san

prakāśayatyarka ivākhilaṃ jaḍam || 117||

miśrasya sattvasya bhavanti dharmāḥ

tvamānitādyā niyamā yamādyāḥ |

śraddhā ca bhaktiśca mumukṣutā ca

daivī ca sampattirasannivṛttiḥ || 118||

viśuddhasattvasya guṇāḥ prasādaḥ

svātmānubhūtiḥ paramā praśāntiḥ |

tṛptiḥ praharṣaḥ paramātmaniṣṭhā

yayā sadānandarasaṃ samṛcchati || 119||

avyaktametattriguṇairniruktaṃ

tatkāraṇaṃ nāma śarīramātmanaḥ |

suṣuptiretasya vibhaktyavasthā

pralīnasarvendriyabuddhivṛttiḥ || 120||

sarvaprakārapramitipraśāntiḥ

bījātmanāvasthitireva buddheḥ |

suṣuptiretasya kila pratītiḥ (pāṭhabhedaḥ - suṣuptiratrāsya)

kiñcinna vedmīti jagatprasiddheḥ || 121||

dehendriyaprāṇamano'hamādayaḥ

sarve vikārā viṣayāḥ sukhādayaḥ |

vyomādibhūtānyakhilaṃ ca viśvaṃ

avyaktaparyantamidaṃ hyanātmā || 122||

māyā māyākāryaṃ sarvaṃ mahadādidehaparyantam |

asadidamanātmatattvaṃ viddhi tvaṃ marumarīcikākalpam || 123||

atha te sampravakṣyāmi svarūpaṃ paramātmanaḥ |

yadvijñāya naro bandhānmuktaḥ kaivalyamaśnute || 124||

asti kaścitsvayaṃ nityamahampratyayalambanaḥ |

avasthātrayasākṣī sanpañcakośavilakṣaṇaḥ || 125||

yo vijānāti sakalaṃ jāgratsvapnasuṣuptiṣu |

buddhitadvṛttisadbhāvamabhāvamahamityayam || 126||

yaḥ paśyati svayaṃ sarvaṃ yaṃ na paśyati kaścana | (pāṭhabhedaḥ - kiñcana)

yaścetayati buddhyādi na tadyaṃ cetayatyayam || 127||

yena viśvamidaṃ vyāptaṃ yaṃ na vyāpnoti kiñcana |

ābhārūpamidaṃ sarvaṃ yaṃ bhāntamanubhātyayam || 128||

yasya sannidhimātreṇa dehendriyamanodhiyaḥ |

viṣayeṣu svakīyeṣu vartante preritā iva || 129||

ahaṅkārādidehāntā viṣayāśca sukhādayaḥ |

vedyante ghaṭavadyena nityabodhasvarūpiṇā || 130||

eṣo'ntarātmā puruṣaḥ purāṇo

nirantarākhaṇḍasukhānubhūtiḥ |

sadaikarūpaḥ pratibodhamātro

yeneṣitā vāgasavaścaranti || 131||

atraiva sattvātmani dhīguhāyāṃ

avyākṛtākāśa uśatprakāśaḥ | (pāṭhabhedaḥ - uruprakāśaḥ)

ākāśa uccai ravivatprakāśate

svatejasā viśvamidaṃ prakāśayan || 132||

jñātā mano'haṅkṛtivikriyāṇāṃ

dehendriyaprāṇakṛtakriyāṇām |

ayo'gnivattānanuvartamāno

na ceṣṭate no vikaroti kiñcana || 133||

na jāyate no mriyate na vardhate

na kṣīyate no vikaroti nityaḥ |

vilīyamāne'pi vapuṣyamuṣmi-

nna līyate kumbha ivāmbaraṃ svayam || 134||

prakṛtivikṛtibhinnaḥ śuddhabodhasvabhāvaḥ

sadasadidamaśeṣaṃ bhāsayannirviśeṣaḥ |

vilasati paramātmā jāgradādiṣvavasthā-

svahamahamiti sākṣātsākṣirūpeṇa buddheḥ || 135||

niyamitamanasāmuṃ tvaṃ svamātmānamātma-

nyayamahamiti sākṣādviddhi buddhiprasādāt |

janimaraṇataraṅgāpārasaṃsārasindhuṃ

pratara bhava kṛtārtho brahmarūpeṇa saṃsthaḥ || 136||

atrānātmanyahamiti matirbandha eṣo'sya puṃsaḥ

prāpto'jñānājjananamaraṇakleśasampātahetuḥ |

yenaivāyaṃ vapuridamasatsatyamityātmabuddhyā

puṣyatyukṣatyavati viṣayaistantubhiḥ kośakṛdvat || 137||

atasmiṃstadbuddhiḥ prabhavati vimūḍhasya tamasā

vivekābhāvādvai sphurati bhujage rajjudhiṣaṇā |

tato'narthavrāto nipatati samādāturadhikaḥ

tato yo'sadgrāhaḥ sa hi bhavati bandhaḥ śaṛṇu sakhe || 138||

akhaṇḍanityādvayabodhaśaktyā

sphurantamātmānamanantavaibhavam |

samāvṛṇotyāvṛtiśaktireṣā

tamomayī rāhurivārkabimbam || 139||

tirobhūte svātmanyamalataratejovati pumān

anātmānaṃ mohādahamiti śarīraṃ kalayati |

tataḥ kāmakrodhaprabhṛtibhiramuṃ bandhanaguṇaiḥ (pāṭhabhedaḥ - bandhakaguṇaiḥ)

paraṃ vikṣepākhyā rajasa uruśaktirvyathayati || 140||

mahāmohagrāhagrasanagalitātmāvagamano

dhiyo nānāvasthāṃ svayamabhinayaṃstadguṇatayā | (pāṭhabhedaḥ - nānāvasthāḥ)

apāre saṃsāre viṣayaviṣapūre jalanidhau

nimajyonmajyāyaṃ bhramati kumatiḥ kutsitagatiḥ || 141||

bhānuprabhāsañjanitābhrapaṅktiḥ

bhānuṃ tirodhāya vijṛmbhate yathā |

ātmoditāhaṅkṛtirātmatattvaṃ

tathā tirodhāya vijṛmbhate svayam || 142||

kavalitadinanāthe durdine sāndrameghaiḥ

vyathayati himajhañjhāvāyurugro yathaitān |

aviratatamasā''tmanyāvṛte mūḍhabuddhiṃ

kṣapayati bahuduḥkhaistīvravikṣepaśaktiḥ || 143||

etābhyāmeva śaktibhyāṃ bandhaḥ puṃsaḥ samāgataḥ |

yābhyāṃ vimohito dehaṃ matvā''tmānaṃ bhramatyayam || 144||

bījaṃ saṃsṛtibhūmijasya tu tamo dehātmadhīraṅkuro

rāgaḥ pallavamambu karma tu vapuḥ skandho'savaḥ śākhikāḥ |

agrāṇīndriyasaṃhatiśca viṣayāḥ puṣpāṇi duḥkhaṃ phalaṃ

nānākarmasamudbhavaṃ bahuvidhaṃ bhoktātra jīvaḥ khagaḥ || 145||

ajñānamūlo'yamanātmabandho

naisargiko'nādirananta īritaḥ |

janmāpyayavyādhijarādiduḥkha-

pravāhapātaṃ janayatyamuṣya || 146||

nāstrairna śastrairanilena vahninā

chettuṃ na śakyo na ca karmakoṭibhiḥ |

vivekavijñānamahāsinā vinā

dhātuḥ prasādena śitena mañjunā || 147||

śrutipramāṇaikamateḥ svadharma

niṣṭhā tayaivātmaviśuddhirasya |

viśuddhabuddheḥ paramātmavedanaṃ

tenaiva saṃsārasamūlanāśaḥ || 148||

kośairannamayādyaiḥ pañcabhirātmā na saṃvṛto bhāti |

nijaśaktisamutpannaiḥ śaivālapaṭalairivāmbu vāpīstham || 149||

tacchaivālāpanaye samyak salilaṃ pratīyate śuddham |

tṛṣṇāsantāpaharaṃ sadyaḥ saukhyapradaṃ paraṃ puṃsaḥ || 150||

pañcānāmapi kośānāmapavāde vibhātyayaṃ śuddhaḥ |

nityānandaikarasaḥ pratyagrūpaḥ paraḥ svayañjyotiḥ || 151||

ātmānātmavivekaḥ kartavyo bandhamuktaye viduṣā |

tenaivānandī bhavati svaṃ vijñāya saccidānandam || 152||

muñjādiṣīkāmiva dṛśyavargāt

pratyañcamātmānamasaṅgamakriyam |

vivicya tatra pravilāpya sarvaṃ

tadātmanā tiṣṭhati yaḥ sa muktaḥ || 153||

deho'yamannabhavano'nnamayastu kośa- (pāṭhabhedaḥ - kośo)

ścānnena jīvati vinaśyati tadvihīnaḥ | (pāṭhabhedaḥ - hyannena)

tvakcarmamāṃsarudhirāsthipurīṣarāśi-

rnāyaṃ svayaṃ bhavitumarhati nityaśuddhaḥ || 154||

pūrvaṃ janeradhimṛterapi nāyamasti (pāṭhabhedaḥ - janerapimṛteratha)

jātakṣaṇaḥ kṣaṇaguṇo'niyatasvabhāvaḥ |

naiko jaḍaśca ghaṭavatparidṛśyamānaḥ

svātmā kathaṃ bhavati bhāvavikāravettā || 155||

pāṇipādādimāndeho nātmā vyaṅge'pi jīvanāt |

tattacchakteranāśācca na niyamyo niyāmakaḥ || 156||

dehataddharmatatkarmatadavasthādisākṣiṇaḥ |

sata eva svataḥsiddhaṃ tadvailakṣaṇyamātmanaḥ || 157||

śalyarāśirmāṃsalipto malapūrṇo'tikaśmalaḥ |

kathaṃ bhavedayaṃ vettā svayametadvilakṣaṇaḥ || 158||

tvaṅmāṃsamedo'sthipurīṣarāśā-

vahammatiṃ mūḍhajanaḥ karoti |

vilakṣaṇaṃ vetti vicāraśīlo

nijasvarūpaṃ paramārthabhūtam || 159||

deho'hamityeva jaḍasya buddhiḥ

dehe ca jīve viduṣastvahandhīḥ |

vivekavijñānavato mahātmano

brahmāhamityeva matiḥ sadātmani || 160||

atrātmabuddhiṃ tyaja mūḍhabuddhe

tvaṅmāṃsamedo'sthipurīṣarāśau |

sarvātmani brahmaṇi nirvikalpe

kuruṣva śāntiṃ paramāṃ bhajasva || 161||

dehendriyādāvasati bhramoditāṃ

vidvānahantāṃ na jahāti yāvat |

tāvanna tasyāsti vimuktivārtā-

pyastveṣa vedāntanayāntadarśī || 162||

chāyāśarīre pratibimbagātre

yatsvapnadehe hṛdi kalpitāṅge |

yathātmabuddhistava nāsti kāci-

jjīvaccharīre ca tathaiva mā'stu || 163||

dehātmadhīreva nṛṇāmasaddhiyāṃ

janmādiduḥkhaprabhavasya bījam |

yatastatastvaṃ jahi tāṃ prayatnāt

tyakte tu citte na punarbhavāśā || 164||

karmendriyaiḥ pañcabhirañcito'yaṃ

prāṇo bhavetprāṇamayastu kośaḥ ||

yenātmavānannamayo'nupūrṇaḥ

pravartate'sau sakalakriyāsu || 165||

naivātmāpi prāṇamayo vāyuvikāro (pāṭhabhedaḥ - naivātmāyaṃ)

gantā''gantā vāyuvadantarbahireṣaḥ |

yasmātkiñcitkvāpi na vettīṣṭamaniṣṭaṃ

svaṃ vānyaṃ vā kiñcana nityaṃ paratantraḥ || 166||

jñānendriyāṇi ca manaśca manomayaḥ syāt

kośo mamāhamiti vastuvikalpahetuḥ |

sañjñādibhedakalanākalito balīyāṃ-

statpūrvakośamabhipūrya vijṛmbhate yaḥ || 167|| (pāṭhabhedaḥ - anupūrya)

pañcendriyaiḥ pañcabhireva hotṛbhiḥ

pracīyamāno viṣayājyadhārayā |

jājvalyamāno bahuvāsanendhanaiḥ

manomayāgnirdahati prapañcam || 168|| (pāṭhabhedaḥ - manomayo'gnirdahati)

na hyastyavidyā manaso'tiriktā

mano hyavidyā bhavabandhahetuḥ |

tasminvinaṣṭe sakalaṃ vinaṣṭaṃ

vijṛmbhite'sminsakalaṃ vijṛmbhate || 169||

svapne'rthaśūnye sṛjati svaśaktyā

bhoktrādiviśvaṃ mana eva sarvam |

tathaiva jāgratyapi no viśeṣaḥ

tatsarvametanmanaso vijṛmbhaṇam || 170||

suṣuptikāle manasi pralīne

naivāsti kiñcitsakalaprasiddheḥ |

ato manaḥkalpita eva puṃsaḥ

saṃsāra etasya na vastuto'sti || 171||

vāyunā''nīyate meghaḥ punastenaiva nīyate | (pāṭhabhedaḥ - vāyunā nīyate meghaḥ punastenaiva līyate)

manasā kalpyate bandho mokṣastenaiva kalpyate || 172||

dehādisarvaviṣaye parikalpya rāgaṃ

badhnāti tena puruṣaṃ paśuvadguṇena |

vairasyamatra viṣavat suvidhāya paścād

enaṃ vimocayati tanmana eva bandhāt || 173||

tasmānmanaḥ kāraṇamasya jantoḥ

bandhasya mokṣasya ca vā vidhāne |

bandhasya heturmalinaṃ rajoguṇaiḥ

mokṣasya śuddhaṃ virajastamaskam || 174||

vivekavairāgyaguṇātirekā-

cchuddhatvamāsādya mano vimuktyai |

bhavatyato buddhimato mumukṣo-

stābhyāṃ dṛḍhābhyāṃ bhavitavyamagre || 175||

mano nāma mahāvyāghro viṣayāraṇyabhūmiṣu |

caratyatra na gacchantu sādhavo ye mumukṣavaḥ || 176||

manaḥ prasūte viṣayānaśeṣān

sthūlātmanā sūkṣmatayā ca bhoktuḥ |

śarīravarṇāśramajātibhedān

guṇakriyāhetuphalāni nityam || 177||

asaṅgacidrūpamamuṃ vimohya

dehendriyaprāṇaguṇairnibaddhya |

ahammameti bhramayatyajasraṃ

manaḥ svakṛtyeṣu phalopabhuktiṣu || 178||

adhyāsadoṣātpuruṣasya saṃsṛtiḥ (pāṭhabhedaḥ - adhyāsayogāt)

adhyāsabandhastvamunaiva kalpitaḥ |

rajastamodoṣavato'vivekino

janmādiduḥkhasya nidānametat || 179||

ataḥ prāhurmano'vidyāṃ paṇḍitāstattvadarśinaḥ |

yenaiva bhrāmyate viśvaṃ vāyunevābhramaṇḍalam || 180||

tanmanaḥśodhanaṃ kāryaṃ prayatnena mumukṣuṇā |

viśuddhe sati caitasminmuktiḥ karaphalāyate || 181||

mokṣaikasaktyā viṣayeṣu rāgaṃ

nirmūlya sannyasya ca sarvakarma |

sacchraddhayā yaḥ śravaṇādiniṣṭho

rajaḥsvabhāvaṃ sa dhunoti buddheḥ || 182||

manomayo nāpi bhavetparātmā

hyādyantavattvātpariṇāmibhāvāt |

duḥkhātmakatvādviṣayatvahetoḥ

draṣṭā hi dṛśyātmatayā na dṛṣṭaḥ || 183||

buddhirbuddhīndriyaiḥ sārdhaṃ savṛttiḥ kartṛlakṣaṇaḥ |

vijñānamayakośaḥ syātpuṃsaḥ saṃsārakāraṇam || 184||

anuvrajaccitpratibimbaśaktiḥ

vijñānasañjñaḥ prakṛtervikāraḥ |

jñānakriyāvānahamityajasraṃ

dehendriyādiṣvabhimanyate bhṛśam || 185||

anādikālo'yamahaṃsvabhāvo

jīvaḥ samastavyavahāravoḍhā |

karoti karmāṇyapi pūrvavāsanaḥ (pāṭhabhedaḥ - karmāṇyanu)

puṇyānyapuṇyāni ca tatphalāni || 186||

bhuṅkte vicitrāsvapi yoniṣu vraja-

nnāyāti niryātyadha ūrdhvameṣaḥ |

asyaiva vijñānamayasya jāgrat-

svapnādyavasthāḥ sukhaduḥkhabhogaḥ || 187||

dehādiniṣṭhāśramadharmakarma-

guṇābhimānaḥ satataṃ mameti |

vijñānakośo'yamatiprakāśaḥ

prakṛṣṭasānnidhyavaśātparātmanaḥ |

ato bhavatyeṣa upādhirasya

yadātmadhīḥ saṃsarati bhrameṇa || 188||

yo'yaṃ vijñānamayaḥ prāṇeṣu hṛdi sphuratyayaṃ jyotiḥ | (pāṭhabhedaḥ - sphuratsvayañjyotiḥ)

kūṭasthaḥ sannātmā kartā bhoktā bhavatyupādhisthaḥ || 189||

svayaṃ paricchedamupetya buddheḥ

tādātmyadoṣeṇa paraṃ mṛṣātmanaḥ |

sarvātmakaḥ sannapi vīkṣate svayaṃ

svataḥ pṛthaktvena mṛdo ghaṭāniva || 190||

upādhisambandhavaśātparātmā

hyupādhidharmānanubhāti tadguṇaḥ | (pāṭhabhedaḥ - 'pyupādhi)

ayovikārānavikārivahnivat

sadaikarūpo'pi paraḥ svabhāvāt || 191||

śiṣya uvāca |

bhrameṇāpyanyathā vā'stu jīvabhāvaḥ parātmanaḥ |

tadupādheranāditvānnānādernāśa iṣyate || 192||

ato'sya jīvabhāvo'pi nityā bhavati saṃsṛtiḥ |

na nivarteta tanmokṣaḥ kathaṃ me śrīguro vada || 193||

śrīgururuvāca |

samyakpṛṣṭaṃ tvayā vidvansāvadhānena tacchṛṇu |

prāmāṇikī na bhavati bhrāntyā mohitakalpanā || 194||

bhrāntiṃ vinā tvasaṅgasya niṣkriyasya nirākṛteḥ |

na ghaṭetārthasambandho nabhaso nīlatādivat || 195||

svasya draṣṭurnirguṇasyākriyasya

pratyagbodhānandarūpasya buddheḥ |

bhrāntyā prāpto jīvabhāvo na satyo

mohāpāye nāstyavastusvabhāvāt || 196||

yāvadbhrāntistāvadevāsya sattā

mithyājñānojjṛmbhitasya pramādāt |

rajjvāṃ sarpo bhrāntikālīna eva

bhrānternāśe naiva sarpo'pi tadvat || 197|| (pāṭhabhedaḥ - sarpo'sti)

anāditvamavidyāyāḥ kāryasyāpi tatheṣyate |

utpannāyāṃ tu vidyāyāmāvidyakamanādyapi || 198||

prabodhe svapnavatsarvaṃ sahamūlaṃ vinaśyati |

anādyapīdaṃ no nityaṃ prāgabhāva iva sphuṭam || 199||

anāderapi vidhvaṃsaḥ prāgabhāvasya vīkṣitaḥ |

yadbuddhyupādhisambandhātparikalpitamātmani || 200||

jīvatvaṃ na tato'nyastu svarūpeṇa vilakṣaṇaḥ | (pāṭhabhedaḥ - tato'nyattu)

sambandhastvātmano buddhyā mithyājñānapuraḥsaraḥ || 201|| (pāṭhabhedaḥ - sambandhaḥ svātmano)

vinivṛttirbhavettasya samyagjñānena nānyathā |

brahmātmaikatvavijñānaṃ samyagjñānaṃ śrutermatam || 202||

tadātmānātmanoḥ samyagvivekenaiva sidhyati |

tato vivekaḥ kartavyaḥ pratyagātmasadātmanoḥ || 203|| (pāṭhabhedaḥ - pratyagātmāsadātmanoḥ)

jalaṃ paṅkavadatyantaṃ paṅkāpāye jalaṃ sphuṭam | (pāṭhabhedaḥ - paṅkavadaspaṣṭaṃ)

yathā bhāti tathātmāpi doṣābhāve sphuṭaprabhaḥ || 204||

asannivṛttau tu sadātmanā sphuṭaṃ

pratītiretasya bhavetpratīcaḥ |

tato nirāsaḥ karaṇīya eva

sadātmanaḥ sādhvahamādivastunaḥ || 205|| (pāṭhabhedaḥ - asadātmanaḥ)

ato nāyaṃ parātmā syādvijñānamayaśabdabhāk |

vikāritvājjaḍatvācca paricchinnatvahetutaḥ |

dṛśyatvādvyabhicāritvānnānityo nitya iṣyate || 206||

ānandapratibimbacumbitatanurvṛttistamojṛmbhitā

syādānandamayaḥ priyādiguṇakaḥ sveṣṭārthalābhodayaḥ |

puṇyasyānubhave vibhāti kṛtināmānandarūpaḥ svayaṃ

sarvo nandati yatra sādhu tanubhṛnmātraḥ prayatnaṃ vinā || 207|| (pāṭhabhedaḥ - bhūtvā nandati)

ānandamayakośasya suṣuptau sphūrtirutkaṭā |

svapnajāgarayorīṣadiṣṭasandarśanādinā || 208||

naivāyamānandamayaḥ parātmā

sopādhikatvātprakṛtervikārāt |

kāryatvahetoḥ sukṛtakriyāyā

vikārasaṅghātasamāhitatvāt || 209||

pañcānāmapi kośānāṃ niṣedhe yuktitaḥ śruteḥ | (pāṭhabhedaḥ - yuktitaḥ kṛte)

tanniṣedhāvadhi sākṣī bodharūpo'vaśiṣyate || 210|| (pāṭhabhedaḥ - tanniṣedhāvadhiḥ)

yo'yamātmā svayañjyotiḥ pañcakośavilakṣaṇaḥ |

avasthātrayasākṣī sannirvikāro nirañjanaḥ |

sadānandaḥ sa vijñeyaḥ svātmatvena vipaścitā || 211||

śiṣya uvāca |

mithyātvena niṣiddheṣu kośeṣveteṣu pañcasu |

sarvābhāvaṃ vinā kiñcinna paśyāmyatra he guro |

vijñeyaṃ kimu vastvasti svātmanā''tmavipaścitā || 212|| (pāṭhabhedaḥ - svātmanātra vipaścitā)

śrīgururuvāca |

satyamuktaṃ tvayā vidvannipuṇo'si vicāraṇe |

ahamādivikārāste tadabhāvo'yamapyanu || 213|| (pāṭhabhedaḥ - 'yamapyatha)

sarve yenānubhūyante yaḥ svayaṃ nānubhūyate |

tamātmānaṃ veditāraṃ viddhi buddhyā susūkṣmayā || 214||

tatsākṣikaṃ bhavettattadyadyadyenānubhūyate |

kasyāpyananubhūtārthe sākṣitvaṃ nopayujyate || 215|| (pāṭhabhedaḥ - nopapadyate)

asau svasākṣiko bhāvo yataḥ svenānubhūyate |

ataḥ paraṃ svayaṃ sākṣātpratyagātmā na cetaraḥ || 216||

jāgratsvapnasuṣuptiṣu sphuṭataraṃ yo'sau samujjṛmbhate

pratyagrūpatayā sadāhamahamityantaḥ sphurannaikadhā | (pāṭhabhedaḥ - sphurannekadhā)

nānākāravikārabhāgina imān paśyannahandhīmukhān (pāṭhabhedaḥ - bhājina)

nityānandacidātmanā sphurati taṃ viddhi svametaṃ hṛdi || 217||

ghaṭodake bimbitamarkabimba-

mālokya mūḍho ravimeva manyate |

tathā cidābhāsamupādhisaṃsthaṃ

bhrāntyāhamityeva jaḍo'bhimanyate || 218||

ghaṭaṃ jalaṃ tadgatamarkabimbaṃ

vihāya sarvaṃ vinirīkṣyate'rkaḥ | (pāṭhabhedaḥ - divi vīkṣyate'rkaḥ)

taṭastha etattritayāvabhāsakaḥ (pāṭhabhedaḥ - taṭasthitaḥ tattri)

svayamprakāśo viduṣā yathā tathā || 219||

dehaṃ dhiyaṃ citpratibimbamevaṃ (pāṭhabhedaḥ - citpratibimbametaṃ)

visṛjya buddhau nihitaṃ guhāyām |

draṣṭāramātmānamakhaṇḍabodhaṃ

sarvaprakāśaṃ sadasadvilakṣaṇam || 220||

nityaṃ vibhuṃ sarvagataṃ susūkṣmaṃ

antarbahiḥśūnyamananyamātmanaḥ |

vijñāya samyaṅnijarūpametat

pumān vipāpmā virajo vimṛtyuḥ || 221||

viśoka ānandaghano vipaścit

svayaṃ kutaścinna bibheti kaścit |

nānyo'sti panthā bhavabandhamukteḥ

vinā svatattvāvagamaṃ mumukṣoḥ || 222||

brahmābhinnatvavijñānaṃ bhavamokṣasya kāraṇam |

yenādvitīyamānandaṃ brahma sampadyate budhaiḥ || 223|| (pāṭhabhedaḥ - sampadyate budhaḥ)

brahmabhūtastu saṃsṛtyai vidvānnāvartate punaḥ |

vijñātavyamataḥ samyagbrahmābhinnatvamātmanaḥ || 224||

satyaṃ jñānamanantaṃ brahma viśuddhaṃ paraṃ svataḥsiddham |

nityānandaikarasaṃ pratyagabhinnaṃ nirantaraṃ jayati || 225||

sadidaṃ paramādvaitaṃ svasmādanyasya vastuno'bhāvāt |

na hyanyadasti kiñcit samyak paramārthatattvabodhadaśāyām || 226|| (pāṭhabhedaḥ - paratattvabodhasudaśāyām)

yadidaṃ sakalaṃ viśvaṃ nānārūpaṃ pratītamajñānāt |

tatsarvaṃ brahmaiva pratyastāśeṣabhāvanādoṣam || 227||

mṛtkāryabhūto'pi mṛdo na bhinnaḥ

kumbho'sti sarvatra tu mṛtsvarūpāt |

na kumbharūpaṃ pṛthagasti kumbhaḥ

kuto mṛṣā kalpitanāmamātraḥ || 228||

kenāpi mṛdbhinnatayā svarūpaṃ

ghaṭasya sandarśayituṃ na śakyate |

ato ghaṭaḥ kalpita eva mohā-

nmṛdeva satyaṃ paramārthabhūtam || 229||

sadbrahmakāryaṃ sakalaṃ sadevaṃ (pāṭhabhedaḥ - sadaiva)

tanmātrametanna tato'nyadasti | (pāṭhabhedaḥ - sanmātrametanna)

astīti yo vakti na tasya moho

vinirgato nidritavatprajalpaḥ || 230||

brahmaivedaṃ viśvamityeva vāṇī

śrautī brūte'tharvaniṣṭhā variṣṭhā |

tasmādetadbrahmamātraṃ hi viśvaṃ

nādhiṣṭhānādbhinnatā''ropitasya || 231||

satyaṃ yadi syājjagadetadātmano'

nantattvahānirnigamāpramāṇatā |

asatyavāditvamapīśituḥ syā-

nnaitattrayaṃ sādhu hitaṃ mahātmanām || 232||

īśvaro vastutattvajño na cāhaṃ teṣvavasthitaḥ |

na ca matsthāni bhūtānītyevameva vyacīklṛpat || 233|| (pāṭhabhedaḥ - vyacīkathat)

yadi satyaṃ bhavedviśvaṃ suṣuptāvupalabhyatām |

yannopalabhyate kiñcidato'satsvapnavanmṛṣā || 234||

ataḥ pṛthaṅnāsti jagatparātmanaḥ

pṛthakpratītistu mṛṣā guṇādivat | guṇāhivat

āropitasyāsti kimarthavattā'-

dhiṣṭhānamābhāti tathā bhrameṇa || 235||

bhrāntasya yadyadbhramataḥ pratītaṃ

brahmaiva tattadrajataṃ hi śuktiḥ |

idantayā brahma sadaiva rūpyate (pāṭhabhedaḥ - sadeva)

tvāropitaṃ brahmaṇi nāmamātram || 236||

ataḥ paraṃ brahma sadadvitīyaṃ

viśuddhavijñānaghanaṃ nirañjanam |

praśāntamādyantavihīnamakriyaṃ

nirantarānandarasasvarūpam || 237||

nirastamāyākṛtasarvabhedaṃ

nityaṃ sukhaṃ niṣkalamaprameyam | (pāṭhabhedaḥ - nityaṃ dhruvaṃ)

arūpamavyaktamanākhyamavyayaṃ

jyotiḥ svayaṃ kiñcididaṃ cakāsti || 238||

jñātṛjñeyajñānaśūnyamanantaṃ nirvikalpakam |

kevalākhaṇḍacinmātraṃ paraṃ tattvaṃ vidurbudhāḥ || 239||

aheyamanupādeyaṃ manovācāmagocaram |

aprameyamanādyantaṃ brahma pūrṇamahaṃ mahaḥ || 240|| (pāṭhabhedaḥ - pūrṇaṃ mahanmahaḥ)

tattvampadābhyāmabhidhīyamānayoḥ

brahmātmanoḥ śodhitayoryadīttham | (pāṭhabhedaḥ - śodhitayoryadittham)

śrutyā tayostattvamasīti samyag

ekatvameva pratipādyate muhuḥ || 241-

ekyaṃ tayorlakṣitayorna vācyayoḥ

nigadyate'nyonyaviruddhadharmiṇoḥ |

khadyotabhānvoriva rājabhṛtyayoḥ

kūpāmburāśyoḥ paramāṇumervoḥ || 242||

tayorvirodho'yamupādhikalpito

na vāstavaḥ kaścidupādhireṣaḥ |

īśasya māyā mahadādikāraṇaṃ

jīvasya kāryaṃ śaṛṇu pañcakośam || 243|| (pāṭhabhedaḥ - pañcakośāḥ)

etāvupādhī parajīvayostayoḥ

samyaṅnirāse na paro na jīvaḥ |

rājyaṃ narendrasya bhaṭasya kheṭak-

stayorapohe na bhaṭo na rājā || 244||

athāta ādeśa iti śrutiḥ svayaṃ

niṣedhati brahmaṇi kalpitaṃ dvayam |

śrutipramāṇānugṛhītabodhā- (pāṭhabhedaḥ - pramāṇānugṛhītayuktyā)

ttayornirāsaḥ karaṇīya eva || 245||

nedaṃ nedaṃ kalpitatvānna satyaṃ

rajjudṛṣṭavyālavatsvapnavacca | (pāṭhabhedaḥ - rajjau)

itthaṃ dṛśyaṃ sādhuyuktyā vyapohya

jñeyaḥ paścādekabhāvastayoryaḥ || 246||

tatastu tau lakṣaṇayā sulakṣyau

tayorakhaṇḍaikarasatvasiddhaye |

nālaṃ jahatyā na tathā'jahatyā

kintūbhayārthātmikayaiva bhāvyam || 247|| (pāṭhabhedaḥ - bhayārthaikatayaiva)

sa devadatto'yamitīha caikatā

viruddhadharmāṃśamapāsya kathyate |

yathā tathā tattvamasītivākye

viruddhadharmānubhayatra hitvā || 248||

saṃlakṣya cinmātratayā sadātmanoḥ

akhaṇḍabhāvaḥ paricīyate budhaiḥ |

evaṃ mahāvākyaśatena kathyate

brahmātmanoraikyamakhaṇḍabhāvaḥ || 249||

asthūlamityetadasannirasya

siddhaṃ svato vyomavadapratarkyam |

ato mṛṣāmātramidaṃ pratītaṃ

jahīhi yatsvātmatayā gṛhītam |

brahmāhamityeva viśuddhabuddhyā

viddhi svamātmānamakhaṇḍabodham || 250||

mṛtkāryaṃ sakalaṃ ghaṭādi satataṃ mṛnmātramevāhitaṃ (pāṭhabhedaḥ - mṛnmātramevābhitaḥ)

tadvatsajjanitaṃ sadātmakamidaṃ sanmātramevākhilam |

yasmānnāsti sataḥ paraṃ kimapi tatsatyaṃ sa ātmā svayaṃ

tasmāttattvamasi praśāntamamalaṃ brahmādvayaṃ yatparam || 251||

nidrākalpitadeśakālaviṣayajñātrādi sarvaṃ yathā

mithyā tadvadihāpi jāgrati jagatsvājñānakāryatvataḥ |

yasmādevamidaṃ śarīrakaraṇaprāṇāhamādyapyasat

tasmāttattvamasi praśāntamamalaṃ brahmādvayaṃ yatparam || 252||

yatra bhrāntyā kalpitaṃ tadviveke (pāṭhabhedaḥ - yadviveke)

tattanmātraṃ naiva tasmādvibhinnam |

svapne naṣṭaṃ svapnaviśvaṃ vicitraṃ

svasmādbhinnaṃ kinnu dṛṣṭaṃ prabodhe || 253||

jātinītikulagotradūragaṃ

nāmarūpaguṇadoṣavarjitam |

deśakālaviṣayātivarti yad

brahma tattvamasi bhāvayātmani || 254||

yatparaṃ sakalavāgagocaraṃ

gocaraṃ vimalabodhacakṣuṣaḥ |

śuddhacidghanamanādi vastu yad

brahma tattvamasi bhāvayātmani || 255||

ṣaḍbhirūrmibhirayogi yogihṛd-

bhāvitaṃ na karaṇairvibhāvitam |

buddhyavedyamanavadyamasti yad (pāṭhabhedaḥ - bhūti yad)

brahma tattvamasi bhāvayātmani || 256||

bhrāntikalpitajagatkalāśrayaṃ

svāśrayaṃ ca sadasadvilakṣaṇam |

niṣkalaṃ nirupamānavaddhi yad (pāṭhabhedaḥ - nirupamānamṛddhimat)

brahma tattvamasi bhāvayātmani || 257||

janmavṛddhipariṇatyapakṣaya-

vyādhināśanavihīnamavyayam |

viśvasṛṣṭyavavighātakāraṇaṃ (pāṭhabhedaḥ - vanaghātakāraṇaṃ)

brahma tattvamasi bhāvayātmani || 258||

astabhedamanapāstalakṣaṇaṃ

nistaraṅgajalarāśiniścalam |

nityamuktamavibhaktamūrti yad

brahma tattvamasi bhāvayātmani || 259||

ekameva sadanekakāraṇaṃ

kāraṇāntaranirāsyakāraṇam | (pāṭhabhedaḥ - sakāraṇam)

kāryakāraṇavilakṣaṇaṃ svayaṃ

brahma tattvamasi bhāvayātmani || 260||

nirvikalpakamanalpamakṣaraṃ

yatkṣarākṣaravilakṣaṇaṃ param |

nityamavyayasukhaṃ nirañjanaṃ

brahma tattvamasi bhāvayātmani || 261||

yadvibhāti sadanekadhā bhramā-

nnāmarūpaguṇavikriyātmanā |

hemavatsvayamavikriyaṃ sadā

brahma tattvamasi bhāvayātmani || 262||

yaccakāstyanaparaṃ parātparaṃ

pratyagekarasamātmalakṣaṇam |

satyacitsukhamanantamavyayaṃ

brahma tattvamasi bhāvayātmani || 263||

uktamarthamimamātmani svayaṃ

bhāvayetprathitayuktibhirdhiyā | (pāṭhabhedaḥ - bhāvaya prathita)

saṃśayādirahitaṃ karāmbuvat

tena tattvanigamo bhaviṣyati || 264||

sambodhamātraṃ pariśuddhatattvaṃ (pāṭhabhedaḥ - svaṃ bodhamātraṃ)

vijñāya saṅghe nṛpavacca sainye |

tadāśrayaḥ svātmani sarvadā sthito (pāṭhabhedaḥ - tadātmanaivātmani)

vilāpaya brahmaṇi viśvajātam || 265|| (pāṭhabhedaḥ - dṛśyajātam)

buddhau guhāyāṃ sadasadvilakṣaṇaṃ

brahmāsti satyaṃ paramadvitīyam |

tadātmanā yo'tra vasedguhāyāṃ

punarna tasyāṅgaguhāpraveśaḥ || 266||

jñāte vastunyapi balavatī vāsanā'nādireṣā

kartā bhoktāpyahamiti dṛḍhā yā'sya saṃsārahetuḥ |

pratyagdṛṣṭyā''tmani nivasatā sāpaneyā prayatnā-

nmuktiṃ prāhustadiha munayo vāsanātānavaṃ yat || 267||

ahaṃ mameti yo bhāvo dehākṣādāvanātmani |

adhyāso'yaṃ nirastavyo viduṣā svātmaniṣṭhayā || 268||

jñātvā svaṃ pratyagātmānaṃ buddhitadvṛttisākṣiṇam |

so'hamityeva sadvṛttyā'nātmanyātmamatiṃ jahi || 269||

lokānuvartanaṃ tyaktvā tyaktvā dehānuvartanam |

śāstrānuvartanaṃ tyaktvā svādhyāsāpanayaṃ kuru || 270||

lokavāsanayā jantoḥ śāstravāsanayāpi ca |

dehavāsanayā jñānaṃ yathāvannaiva jāyate || 271

saṃsārakārāgṛhamokṣamiccho-

rayomayaṃ pādanibandhaśaṛṅkhalam | (pāṭhabhedaḥ - nibaddha)

vadanti tajjñāḥ paṭu vāsanātrayaṃ

yo'smādvimuktaḥ samupaiti muktim || 272||

jalādisaṃsargavaśātprabhūta- (pāṭhabhedaḥ - jalādisamparkavaśāt)

durgandhadhūtā'garudivyavāsanā |

saṅgharṣaṇenaiva vibhāti samya-

gvidhūyamāne sati bāhyagandhe || 273||

antaḥśritānantadurantavāsanā-

dhūlīviliptā paramātmavāsanā |

prajñātisaṅgharṣaṇato viśuddhā

pratīyate candanagandhavat sphuṭam || 274|| (pāṭhabhedaḥ - sphuṭā)

anātmavāsanājālaistirobhūtātmavāsanā |

nityātmaniṣṭhayā teṣāṃ nāśe bhāti svayaṃ sphuṭam || 275|| (pāṭhabhedaḥ - sphuṭā)

yathā yathā pratyagavasthitaṃ manaḥ

tathā tathā muñcati bāhyavāsanām | (pāṭhabhedaḥ - bāhyavāsanāḥ)

niḥśeṣamokṣe sati vāsanānāṃ

ātmānubhūtiḥ pratibandhaśūnyā || 276||

svātmanyeva sadā sthitvā mano naśyati yoginaḥ | (pāṭhabhedaḥ - sthityā)

vāsanānāṃ kṣayaścātaḥ svādhyāsāpanayaṃ kuru || 277||

tamo dvābhyāṃ rajaḥ sattvātsattvaṃ śuddhena naśyati |

tasmātsattvamavaṣṭabhya svādhyāsāpanayaṃ kuru || 278||

prārabdhaṃ puṣyati vapuriti niścitya niścalaḥ |

dhairyamālambya yatnena svādhyāsāpanayaṃ kuru || 279||

nāhaṃ jīvaḥ paraṃ brahmetyatadvyāvṛttipūrvakam |

vāsanāvegataḥ prāptasvādhyāsāpanayaṃ kuru || 280||

śrutyā yuktyā svānubhūtyā jñātvā sārvātmyamātmanaḥ |

kvacidābhāsataḥ prāptasvādhyāsāpanayaṃ kuru || 281||

anādānavisargābhyāmīṣannāsti kriyā muneḥ | (pāṭhabhedaḥ - annādānavisargā)

tadekaniṣṭhayā nityaṃ svādhyāsāpanayaṃ kuru || 282||

tattvamasyādivākyotthabrahmātmaikatvabodhataḥ |

brahmaṇyātmatvadārḍhyāya svādhyāsāpanayaṃ kuru || 283||

ahambhāvasya dehe'sminniḥśeṣavilayāvadhi |

sāvadhānena yuktātmā svādhyāsāpanayaṃ kuru || 284||

pratītirjīvajagatoḥ svapnavadbhāti yāvatā |

tāvannirantaraṃ vidvansvādhyāsāpanayaṃ kuru || 285||

nidrāyā lokavārtāyāḥ śabdāderapi vismṛteḥ |

kvacinnāvasaraṃ dattvā cintayātmānamātmani || 286||

mātāpitrormalodbhūtaṃ malamāṃsamayaṃ vapuḥ |

tyaktvā cāṇḍālavaddūraṃ brahmībhūya kṛtī bhava || 287||

ghaṭākāśaṃ mahākāśa ivātmānaṃ parātmani |

vilāpyākhaṇḍabhāvena tūṣṇī bhava sadā mune || 288|| (pāṭhabhedaḥ - tūṣṇīṃ)

svaprakāśamadhiṣṭhānaṃ svayambhūya sadātmanā |

brahmāṇḍamapi piṇḍāṇḍaṃ tyajyatāṃ malabhāṇḍavat || 289||

cidātmani sadānande dehārūḍhāmahandhiyam |

niveśya liṅgamutsṛjya kevalo bhava sarvadā || 290||

yatraiṣa jagadābhāso darpaṇāntaḥ puraṃ yathā |

tadbrahmāhamiti jñātvā kṛtakṛtyo bhaviṣyasi || 291||

yatsatyabhūtaṃ nijarūpamādyaṃ

cidadvayānandamarūpamakriyam |

tadetya mithyāvapurutsṛjeta (pāṭhabhedaḥ - sṛjaita)

śailūṣavadveṣamupāttamātmanaḥ || 292||

sarvātmanā dṛśyamidaṃ mṛṣaiva

naivāhamarthaḥ kṣaṇikatvadarśanāt |

jānāmyahaṃ sarvamiti pratītiḥ

kuto'hamādeḥ kṣaṇikasya sidhyet || 293||

ahampadārthastvahamādisākṣī

nityaṃ suṣuptāvapi bhāvadarśanāt |

brūte hyajo nitya iti śrutiḥ svayaṃ

tatpratyagātmā sadasadvilakṣaṇaḥ || 294||

vikāriṇāṃ sarvavikāravettā

nityāvikāro bhavituṃ samarhati | (pāṭhabhedaḥ - nityo'vikāro)

manorathasvapnasuṣuptiṣu sphuṭaṃ

punaḥ punardṛṣṭamasattvametayoḥ || 295||

ato'bhimānaṃ tyaja māṃsapiṇḍe

piṇḍābhimāninyapi buddhikalpite |

kālatrayābādhyamakhaṇḍabodhaṃ

jñātvā svamātmānamupaihi śāntim || 296||

tyajābhimānaṃ kulagotranāma-

rūpāśrameṣvārdraśavāśriteṣu |

liṅgasya dharmānapi kartṛtādīṃ-

styaktvā bhavākhaṇḍasukhasvarūpaḥ || 297||

santyanye pratibandhāḥ puṃsaḥ saṃsārahetavo dṛṣṭāḥ |

teṣāmevaṃ mūlaṃ prathamavikāro bhavatyahaṅkāraḥ || 298|| (pāṭhabhedaḥ - teṣāmeṣāṃ)

yāvatsyātsvasya sambandho'haṅkāreṇa durātmanā |

tāvanna leśamātrāpi muktivārtā vilakṣaṇā || 299||

ahaṅkāragrahānmuktaḥ svarūpamupapadyate |

candravadvimalaḥ pūrṇaḥ sadānandaḥ svayamprabhaḥ || 300||

yo vā pure so'hamiti pratīto (pāṭhabhedaḥ - puraiṣo'hamiti)

buddhyā praklṛptastamasā'timūḍhayā | (pāṭhabhedaḥ - buddhyā'viviktastamasā)

tasyaiva niḥśeṣatayā vināśe

brahmātmabhāvaḥ pratibandhaśūnyaḥ || 301||

brahmānandanidhirmahābalavatā'haṅkāraghorāhinā

saṃveṣṭyātmani rakṣyate guṇamayaiścaṇḍestribhirmastakaiḥ (pāṭhabhedaḥ - caṇḍai)

vijñānākhyamahāsinā śrutimatā vicchidya śīrṣatrayaṃ (pāṭhabhedaḥ - dyutimatā)

nirmūlyāhimimaṃ nidhiṃ sukhakaraṃ dhīro'nubhoktuṅkṣamaḥ || 302||

yāvadvā yatkiñcidviṣadoṣasphūrtirasti ceddehe |

kathamārogyāya bhavettadvadahantāpi yogino muktyai || 303||

ahamo'tyantanivṛttyā tatkṛtanānāvikalpasaṃhṛtyā |

pratyaktattvavivekādidamahamasmīti vindate tattvam || 304|| (pāṭhabhedaḥ - vivekādayam)

ahaṅkāre kartaryahamiti matiṃ muñca sahasā (pāṭhabhedaḥ - ahaṅkartaryasminnahamiti)

vikārātmanyātmapratiphalajuṣi svasthitimuṣi |

yadadhyāsātprāptā janimṛtijarāduḥkhabahulā

pratīcaścinmūrtestava sukhatanoḥ saṃsṛtiriyam || 305||

sadaikarūpasya cidātmano vibho-

rānandamūrteranavadyakīrteḥ |

naivānyathā kvāpyavikāriṇaste

vināhamadhyāsamamuṣya saṃsṛtiḥ || 306||

tasmādahaṅkāramimaṃ svaśatruṃ

bhokturgale kaṇṭakavatpratītam |

vicchidya vijñānamahāsinā sphuṭaṃ

bhuṅkṣvātmasāmrājyasukhaṃ yatheṣṭam || 307||

tato'hamādervinivartya vṛttiṃ

santyaktarāgaḥ paramārthalābhāt |

tūṣṇīṃ samāssvātmasukhānubhūtyā

pūrṇātmanā brahmaṇi nirvikalpaḥ || 308||

samūlakṛtto'pi mahānahaṃ punaḥ

vyullekhitaḥ syādyadi cetasā kṣaṇam |

sañjīvya vikṣepaśataṃ karoti

nabhasvatā prāvṛṣi vārido yathā || 309||

nigṛhya śatrorahamo'vakāśaḥ

kvacinna deyo viṣayānucintayā |

sa eva sañjīvanaheturasya

prakṣīṇajambīratarorivāmbu || 310||

dehātmanā saṃsthita eva kāmī

vilakṣaṇaḥ kāmayitā kathaṃ syāt |

ato'rthasandhānaparatvameva

bhedaprasaktyā bhavabandhahetuḥ || 311||

kāryapravardhanādbījapravṛddhiḥ paridṛśyate |

kāryanāśādbījanāśastasmātkāryaṃ nirodhayet || 312||

vāsanāvṛddhitaḥ kāryaṃ kāryavṛddhyā ca vāsanā |

vardhate sarvathā puṃsaḥ saṃsāro na nivartate || 313||

saṃsārabandhavicchittyai tad dvayaṃ pradahedyatiḥ |

vāsanāvṛddhiretābhyāṃ cintayā kriyayā bahiḥ || 314|| (pāṭhabhedaḥ - vāsanā preryate hyantaḥ)

tābhyāṃ pravardhamānā sā sūte saṃsṛtimātmanaḥ |

trayāṇāṃ ca kṣayopāyaḥ sarvāvasthāsu sarvadā || 315||

sarvatra sarvataḥ sarvabrahmamātrāvalokanaiḥ | (pāṭhabhedaḥ - mātrāvalokanam)

sadbhāvavāsanādārḍhyāttattrayaṃ layamaśnute || 316||

kriyānāśe bhaveccintānāśo'smādvāsanākṣayaḥ |

vāsanāprakṣayo mokṣaḥ sā jīvanmuktiriṣyate || 317|| (pāṭhabhedaḥ - sa)

sadvāsanāsphūrtivijṛmbhaṇe sati

hyasau vilīnāpyahamādivāsanā | (pāṭhabhedaḥ - vilīnā tvahamādivāsanā)

atiprakṛṣṭāpyaruṇaprabhāyāṃ

vilīyate sādhu yathā tamisrā || 318||

tamastamaḥkāryamanarthajālaṃ

na dṛśyate satyudite dineśe |

tathā'dvayānandarasānubhūtau

naivāsti bandho na ca duḥkhagandhaḥ || 319||

dṛśyaṃ pratītaṃ pravilāpayansan (pāṭhabhedaḥ - pravilāpayansvayaṃ)

sanmātramānandaghanaṃ vibhāvayan |

samāhitaḥ sanbahirantaraṃ vā

kālaṃ nayethāḥ sati karmabandhe || 320||

pramādo brahmaniṣṭhāyāṃ na kartavyaḥ kadācana |

pramādo mṛtyurityāha bhagavānbrahmaṇaḥ sutaḥ || 321||

na pramādādanartho'nyo jñāninaḥ svasvarūpataḥ |

tato mohastato'handhīstato bandhastato vyathā || 322||

viṣayābhimukhaṃ dṛṣṭvā vidvāṃsamapi vismṛtiḥ |

vikṣepayati dhīdoṣairyoṣā jāramiva priyam || 323||

yathāpakṛṣṭaṃ śaivālaṃ kṣaṇamātraṃ na tiṣṭhati |

āvṛṇoti tathā māyā prājñaṃ vāpi parāṅmukham || 324||

lakṣyacyutaṃ cedyadi cittamīṣad

bahirmukhaṃ sannipatettatastataḥ |

pramādataḥ pracyutakelikandukaḥ

sopānapaṅktau patito yathā tathā || 325||

viṣayeṣvāviśaccetaḥ saṅkalpayati tadguṇān |

samyaksaṅkalpanātkāmaḥ kāmātpuṃsaḥ pravartanam || 326||

ataḥ pramādānna paro'sti mṛtyuḥ

vivekino brahmavidaḥ samādhau |

samāhitaḥ siddhimupaiti samyak

samāhitātmā bhava sāvadhānaḥ || 327||

tataḥ svarūpavibhraṃśo vibhraṣṭastu patatyadhaḥ |

patitasya vinā nāśaṃ punarnāroha īkṣyate || 328||

saṅkalpaṃ varjayettasmātsarvānarthasya kāraṇam |

apathyāni hi vastūni vyādhigrasto yathotsṛje |

jīvato yasya kaivalyaṃ videhe sa ca kevalaḥ |

yatkiñcit paśyato bhedaṃ bhayaṃ brūte yajuḥśrutiḥ || 329||

yadā kadā vāpi vipaścideṣa

brahmaṇyanante'pyaṇumātrabhedam |

paśyatyathāmuṣya bhayaṃ tadaiva

yadvīkṣitaṃ bhinnatayā pramādāt || 330|| (pāṭhabhedaḥ - yadīkṣitaṃ)

śrutismṛtinyāyaśatairniṣiddhe

dṛśye'tra yaḥ svātmamatiṃ karoti |

upaiti duḥkhopari duḥkhajātaṃ

niṣiddhakartā sa malimluco yathā || 331||

satyābhisandhānarato vimukto

mahattvamātmīyamupaiti nityam |

mithyābhisandhānaratastu naśyed

dṛṣṭaṃ tadetadyadacauracaurayoḥ || 332|| (pāṭhabhedaḥ - coracorayoḥ)

yatirasadanusandhiṃ bandhahetuṃ vihāya

svayamayamahamasmītyātmadṛṣṭyaiva tiṣṭhet

sukhayati nanu niṣṭhā brahmaṇi svānubhūtyā

harati paramavidyākāryaduḥkhaṃ pratītam || 333||

bāhyānusandhiḥ parivardhayetphalaṃ (pāṭhabhedaḥ - bāhyābhisandhiḥ)

durvāsanāmeva tatastato'dhikām |

jñātvā vivekaiḥ parihṛtya bāhyaṃ

svātmānusandhiṃ vidadhīta nityam || 334||

bāhye niruddhe manasaḥ prasannatā

manaḥprasāde paramātmadarśanam |

tasminsudṛṣṭe bhavabandhanāśo

bahirnirodhaḥ padavī vimukteḥ || 335||

kaḥ paṇḍitaḥ sansadasadvivekī

śrutipramāṇaḥ paramārthadarśī |

jānanhi kuryādasato'valambaṃ

svapātahetoḥ śiśuvanmumukṣuḥ || 336||

dehādisaṃsaktimato na muktiḥ

muktasya dehādyabhimatyabhāvaḥ |

suptasya no jāgaraṇaṃ na jāgrataḥ

svapnastayorbhinnaguṇāśrayatvāt || 337||

antarbahiḥ svaṃ sthirajaṅgameṣu

jñātvā''tmanādhāratayā vilokya | (pāṭhabhedaḥ - jñānātman)

tyaktākhilopādhirakhaṇḍarūpaḥ

pūrṇātmanā yaḥ sthita eṣa muktaḥ || 338||

sarvātmanā bandhavimuktihetuḥ

sarvātmabhāvānna paro'sti kaścit |

dṛśyāgrahe satyupapadyate'sau

sarvātmabhāvo'sya sadātmaniṣṭhayā || 339||

dṛśyasyāgrahaṇaṃ kathaṃ nu ghaṭate dehātmanā tiṣṭhato

bāhyārthānubhavaprasaktamanasastattatkriyāṃ kurvataḥ |

sannyastākhiladharmakarmaviṣayairnityātmaniṣṭhāparaiḥ

tattvajñaiḥ karaṇīyamātmani sadānandecchubhiryatnataḥ || 340||

sarvātmasiddhaye bhikṣoḥ kṛtaśravaṇakarmaṇaḥ | (pāṭhabhedaḥ - sārvātmya)

samādhiṃ vidadhātyeṣā śānto dānta iti śrutiḥ || 341||

ārūḍhaśakterahamo vināśaḥ

kartunna śakya sahasāpi paṇḍitaiḥ | (pāṭhabhedaḥ - kartuṃ na)

ye nirvikalpākhyasamādhiniścalāḥ

tānantarā'nantabhavā hi vāsanāḥ || 342||

ahambuddhyaiva mohinyā yojayitvā''vṛterbalāt |

vikṣepaśaktiḥ puruṣaṃ vikṣepayati tadguṇaiḥ || 343||

vikṣepaśaktivijayo viṣamo vidhātuṃ

niḥśeṣamāvaraṇaśaktinivṛttyabhāve |

dṛgdṛśyayoḥ sphuṭapayojalavadvibhāge

naśyettadāvaraṇamātmani ca svabhāvāt |

niḥsaṃśayena bhavati pratibandhaśūnyo

vikṣepaṇaṃ na hi tadā yadi cenmṛṣārthe || 344|| (pāṭhabhedaḥ - nikṣepaṇaṃ)

samyagvivekaḥ sphuṭabodhajanyo

vibhajya dṛgdṛśyapadārthatattvam |

chinatti māyākṛtamohabandhaṃ

yasmādvimuktastu punarna saṃsṛtiḥ || 345|| (pāṭhabhedaḥ - vimuktasya)

parāvaraikatvavivekavahniḥ

dahatyavidyāgahanaṃ hyaśeṣam |

kiṃ syātpunaḥ saṃsaraṇasya bījaṃ

advaitabhāvaṃ samupeyuṣo'sya || 346||

āvaraṇasya nivṛttirbhavati hi samyakpadārthadarśanataḥ |

mithyājñānavināśastadvikṣepajanitaduḥkhanivṛttiḥ || 347||

etattritayaṃ dṛṣṭaṃ samyagrajjusvarūpavijñānāt |

tasmādvastusatattvaṃ jñātavyaṃ bandhamuktaye viduṣā || 348||

ayo'gniyogādiva satsamanvayān

mātrādirūpeṇa vijṛmbhate dhīḥ |

tatkāryametaddvitayaṃ yato mṛṣā (pāṭhabhedaḥ - tatkāryameva tritayaṃ)

dṛṣṭaṃ bhramasvapnamanoratheṣu || 349||

tato vikārāḥ prakṛterahammukhā

dehāvasānā viṣayāśca sarve |

kṣaṇe'nyathābhāvitayā hyamīṣā- (pāṭhabhedaḥ - bhāvina eṣa ātmā)

masattvamātmā tu kadāpi nānyathā || 350|| (pāṭhabhedaḥ - masattvamātmā tu kadāpi)

nityādvayākhaṇḍacidekarūpo

buddhyādisākṣī sadasadvilakṣaṇaḥ |

ahampadapratyayalakṣitārthaḥ

pratyak sadānandaghanaḥ parātmā || 351||

itthaṃ vipaścitsadasadvibhajya

niścitya tattvaṃ nijabodhadṛṣṭyā |

jñātvā svamātmānamakhaṇḍabodhaṃ

tebhyo vimuktaḥ svayameva śāmyati || 352||

ajñānahṛdayagrantherniḥśeṣavilayastadā |

samādhinā'vikalpena yadā'dvaitātmadarśanam || 353||

tvamahamidamitīyaṃ kalpanā buddhidoṣāt

prabhavati paramātmanyadvaye nirviśeṣe |

pravilasati samādhāvasya sarvo vikalpo

vilayanamupagacchedvastutattvāvadhṛtyā || 354||

śānto dāntaḥ paramuparataḥ kṣāntiyuktaḥ samādhiṃ

kurvannityaṃ kalayati yatiḥ svasya sarvātmabhāvam |

tenāvidyātimirajanitānsādhu dagdhvā vikalpān

brahmākṛtyā nivasati sukhaṃ niṣkriyo nirvikalpaḥ || 355||

samāhitā ye pravilāpya bāhyaṃ

śrotrādi cetaḥ svamahaṃ cidātmani |

ta eva muktā bhavapāśabandhaiḥ

nānye tu pārokṣyakathābhidhāyinaḥ || 356||

upādhibhedātsvayameva bhidyate (pāṭhabhedaḥ - yogātsvayameva)

copādhyapohe svayameva kevalaḥ |

tasmādupādhervilayāya vidvān

vasetsadā'kalpasamādhiniṣṭhayā || 357||

sati sakto naro yāti sadbhāvaṃ hyekaniṣṭhayā |

kīṭako bhramaraṃ dhyāyan bhramaratvāya kalpate || 358||

kriyāntarāsaktimapāsya kīṭako

dhyāyannalitvaṃ hyalibhāvamṛcchati | (pāṭhabhedaḥ - dhyāyanyathāliṃ)

tathaiva yogī paramātmatattvaṃ

dhyātvā samāyāti tadekaniṣṭhayā || 359||

atīva sūkṣmaṃ paramātmatattvaṃ

na sthūladṛṣṭyā pratipattumarhati |

samādhinātyantasusūkṣmavṛttyā

jñātavyamāryairatiśuddhabuddhibhiḥ || 360||

yathā suvarṇaṃ puṭapākaśodhitaṃ

tyaktvā malaṃ svātmaguṇaṃ samṛcchati |

tathā manaḥ sattvarajastamomalaṃ

dhyānena santyajya sameti tattvam || 361||

nirantarābhyāsavaśāttaditthaṃ

pakvaṃ mano brahmaṇi līyate yadā |

tadā samādhiḥ savikalpavarjitaḥ (pāṭhabhedaḥ - sa vikalpavarjitaḥ)

svato'dvayānandarasānubhāvakaḥ || 362||

samādhinā'nena samastavāsanā-

granthervināśo'khilakarmanāśaḥ |

antarbahiḥ sarvata eva sarvadā

svarūpavisphūrtirayatnataḥ syāt || 363||

śruteḥ śataguṇaṃ vidyānmananaṃ mananādapi |

nididhyāsaṃ lakṣaguṇamanantaṃ nirvikalpakam || 364||

nirvikalpakasamādhinā sphuṭaṃ

brahmatattvamavagamyate dhruvam |

nānyathā calatayā manogateḥ

pratyayāntaravimiśritaṃ bhavet || 365||

ataḥ samādhatsva yatendriyaḥ san

nirantaraṃ śāntamanāḥ pratīci |

vidhvaṃsaya dhvāntamanādyavidyayā

kṛtaṃ sadekatvavilokanena || 366||

yogasya prathamadvāraṃ vāṅnirodho'parigrahaḥ | (pāṭhabhedaḥ - prathamaṃ dvāraṃ)

nirāśā ca nirīhā ca nityamekāntaśīlatā || 367||

ekāntasthitirindriyoparamaṇe heturdamaścetasaḥ

saṃrodhe karaṇaṃ śamena vilayaṃ yāyādahaṃvāsanā |

tenānandarasānubhūtiracalā brāhmī sadā yoginaḥ

tasmāccittanirodha eva satataṃ kāryaḥ prayatno muneḥ || 368|| prayatnānmuneḥ

vācaṃ niyacchātmani taṃ niyaccha

buddhau dhiyaṃ yaccha ca buddhisākṣiṇi |

taṃ cāpi pūrṇātmani nirvikalpe

vilāpya śāntiṃ paramāṃ bhajasva || 369||

dehaprāṇendriyamanobuddhyādibhirupādhibhiḥ |

yairyairvṛtteḥsamāyogastattadbhāvo'sya yoginaḥ || 370||

tannivṛttyā muneḥ samyak sarvoparamaṇaṃ sukham |

sandṛśyate sadānandarasānubhavaviplavaḥ || 371||

antastyāgo bahistyāgo viraktasyaiva yujyate |

tyajatyantarbahiḥsaṅgaṃ viraktastu mumukṣayā || 372||

bahistu viṣayaiḥ saṅgaṃ tathāntarahamādibhiḥ | (pāṭhabhedaḥ - saṅgaḥ)

virakta eva śaknoti tyaktuṃ brahmaṇi niṣṭhitaḥ || 373||

vairāgyabodhau puruṣasya pakṣivat

pakṣau vijānīhi vicakṣaṇa tvam |

vimuktisaudhāgralatādhirohaṇaṃ

tābhyāṃ vinā nānyatareṇa sidhyati || 374||

atyantavairāgyavataḥ samādhiḥ

samāhitasyaiva dṛḍhaprabodhaḥ |

prabuddhatattvasya hi bandhamuktiḥ

muktātmano nityasukhānubhūtiḥ || 375||

vairāgyānna paraṃ sukhasya janakaṃ paśyāmi vaśyātmanaḥ

taccecchuddhatarātmabodhasahitaṃ svārājyasāmrājyadhuk |

etaddvāramajasramuktiyuvateryasmāttvamasmātparaṃ

sarvatrāspṛhayā sadātmani sadā prajñāṃ kuru śreyase || 376||

āśāṃ chinddhi viṣopameṣu viṣayeṣveṣaiva mṛtyoḥ kṛti- (pāṭhabhedaḥ - mṛtyoḥ sṛti)

styaktvā jātikulāśrameṣvabhimatiṃ muñcātidūrātkriyāḥ |

dehādāvasati tyajātmadhiṣaṇāṃ prajñāṃ kuruṣvātmani

tvaṃ draṣṭāsyamano'si nirdvayaparaṃ brahmāsi yadvastutaḥ || 377|| (pāṭhabhedaḥ - draṣṭāsyamalo)

lakṣye brahmaṇi mānasaṃ dṛḍhataraṃ saṃsthāpya bāhyendriyaṃ

svasthāne viniveśya niścalatanuścopekṣya dehasthitim |

brahmātmaikyamupetya tanmayatayā cākhaṇḍavṛttyā'niśaṃ

brahmānandarasaṃ pibātmani mudā śūnyaiḥ kimanyairbhṛśam || 378|| (pāṭhabhedaḥ - kimanyairbhramaiḥ)

anātmacintanaṃ tyaktvā kaśmalaṃ duḥkhakāraṇam |

cintayātmānamānandarūpaṃ yanmuktikāraṇam || 379||

eṣa svayañjyotiraśeṣasākṣī

vijñānakośo vilasatyajasram | vijñānakośe

lakṣyaṃ vidhāyainamasadvilakṣaṇa-

makhaṇḍavṛttyā''tmatayā'nubhāvaya || 380||

etamacchinnayā vṛttyā pratyayāntaraśūnyayā |

ullekhayanvijānīyātsvasvarūpatayā sphuṭam || 381||

atrātmatvaṃ dṛḍhīkurvannahamādiṣu santyajan |

udāsīnatayā teṣu tiṣṭhetsphuṭaghaṭādivat || 382|| (pāṭhabhedaḥ - tiṣṭhedghaṭapaṭādivat)

viśuddhamantaḥkaraṇaṃ svarūpe

niveśya sākṣiṇyavabodhamātre |

śanaiḥ śanairniścalatāmupānayan

pūrṇaṃ svamevānuvilokayettataḥ || 383|| (pāṭhabhedaḥ - pūrṇatvamevānu)

dehendriyaprāṇamano'hamādibhiḥ

svājñānaklṛptairakhilairupādhibhiḥ |

vimuktamātmānamakhaṇḍarūpaṃ

pūrṇaṃ mahākāśamivāvalokayet || 384||

ghaṭakalaśakusūlasūcimukhyaiḥ

gaganamupādhiśatairvimuktamekam |

bhavati na vividhaṃ tathaiva śuddhaṃ

paramahamādivimuktamekameva || 385||

brahmādistambaparyantā mṛṣāmātrā upādhayaḥ | (pāṭhabhedaḥ - brahmādyāḥ stamba)

tataḥ pūrṇaṃ svamātmānaṃ paśyedekātmanā sthitam || 386||

yatra bhrāntyā kalpitaṃ tadviveke (pāṭhabhedaḥ - yadviveke)

tattanmātraṃ naiva tasmādvibhinnam |

bhrānternāśe bhāti dṛṣṭāhitattvaṃ (pāṭhabhedaḥ - bhrāntidṛṣṭā)

rajjustadvadviśvamātmasvarūpam || 387||

svayaṃ brahmā svayaṃ viṣṇuḥ svayamindraḥ svayaṃ śivaḥ |

svayaṃ viśvamidaṃ sarvaṃ svasmādanyanna kiñcana || 388||

antaḥ svayaṃ cāpi bahiḥ svayaṃ ca

svayaṃ purastāt svayameva paścāt |

svayaṃ hyāvācyāṃ svayamapyudīcyāṃ (pāṭhabhedaḥ - hyavācyāṃ)

tathopariṣṭātsvayamapyadhastāt || 389||

taraṅgaphenabhramabudbudādi

sarvaṃ svarūpeṇa jalaṃ yathā tathā |

cideva dehādyahamantametat

sarvaṃ cidevaikarasaṃ viśuddham || 390||

sadevedaṃ sarvaṃ jagadavagataṃ vāṅmanasayoḥ

sato'nyannāstyeva prakṛtiparasīmni sthitavataḥ |

pṛthak kiṃ mṛtsnāyāḥ kalaśaghaṭakumbhādyavagataṃ

vadatyeṣa bhrāntastvamahamiti māyāmadirayā || 391||

kriyāsamabhihāreṇa yatra nānyaditi śrutiḥ |

bravīti dvaitarāhityaṃ mithyādhyāsanivṛttaye || 392||

ākāśavannirmalanirvikalpaṃ (pāṭhabhedaḥ - nirvikalpa)

niḥsīmaniḥspandananirvikāram |

antarbahiḥśūnyamananyamadvayaṃ

svayaṃ paraṃ brahma kimasti bodhyam || 393||

vaktavyaṃ kimu vidyate'tra bahudhā brahmaiva jīvaḥ svayaṃ

brahmaitajjagadātataṃ nu sakalaṃ brahmādvitīyaṃ śrutiḥ | (pāṭhabhedaḥ - jagadāparāṇu sakalaṃ)

brahmaivāhamiti prabuddhamatayaḥ santyaktabāhyāḥ sphuṭaṃ

brahmībhūya vasanti santatacidānandātmanaitaddhruvam || 394|| (pāṭhabhedaḥ - ānandātmanaiva dhruvam)

jahi malamayakośe'handhiyotthāpitāśāṃ

prasabhamanilakalpe liṅgadehe'pi paścāt |

nigamagaditakīrtiṃ nityamānandamūrtiṃ

svayamiti paricīya brahmarūpeṇa tiṣṭha || 395||

śavākāraṃ yāvadbhajati manujastāvadaśuciḥ

parebhyaḥ syātkleśo jananamaraṇavyādhinilayaḥ | (pāṭhabhedaḥ - vyādhinirayāḥ)

yadātmānaṃ śuddhaṃ kalayati śivākāramacalam

tadā tebhyo mukto bhavati hi tadāha śrutirapi || 396||

svātmanyāropitāśeṣābhāsavastunirāsataḥ |

svayameva paraṃ brahma pūrṇamadvayamakriyam || 397||

samāhitāyāṃ sati cittavṛttau

parātmani brahmaṇi nirvikalpe |

na dṛśyate kaścidayaṃ vikalpaḥ

prajalpamātraḥ pariśiṣyate yataḥ || 398|| (pāṭhabhedaḥ - tataḥ)

asatkalpo vikalpo'yaṃ viśvamityekavastuni |

nirvikāre nirākāre nirviśeṣe bhidā kutaḥ || 399||

draṣṭudarśanadṛśyādibhāvaśūnyaikavastuni | (pāṭhabhedaḥ - draṣṭṛdarśana)

nirvikāre nirākāre nirviśeṣe bhidā kutaḥ || 400||

kalpārṇava ivātyantaparipūrṇaikavastuni |

nirvikāre nirākāre nirviśeṣe bhidā kutaḥ || 401||

tejasīva tamo yatra pralīnaṃ bhrāntikāraṇam | (pāṭhabhedaḥ - yatra vilīnaṃ)

advitīye pare tattve nirviśeṣe bhidā kutaḥ || 402||

ekātmake pare tattve bhedavārtā kathaṃ vaset | (pāṭhabhedaḥ - kathaṃ bhavet)

suṣuptau sukhamātrāyāṃ bhedaḥ kenāvalokitaḥ || 403||

na hyasti viśvaṃ paratattvabodhāt

sadātmani brahmaṇi nirvikalpe |

kālatraye nāpyahirīkṣito guṇe

na hyambubindurmṛgatṛṣṇikāyām || 404||

māyāmātramidaṃ dvaitamadvaitaṃ paramārthataḥ |

iti brūte śrutiḥ sākṣātsuṣuptāvanubhūyate || 405||

ananyatvamadhiṣṭhānādāropyasya nirīkṣitam |

paṇḍitai rajjusarpādau vikalpo bhrāntijīvanaḥ || 406||

cittamūlo vikalpo'yaṃ cittābhāve na kaścana |

ataścittaṃ samādhehi pratyagrūpe parātmani || 407||

kimapi satatabodhaṃ kevalānandarūpaṃ

nirupamamativelaṃ nityamuktaṃ nirīham |

niravadhigaganābhaṃ niṣkalaṃ nirvikalpaṃ

hṛdi kalayati vidvān brahma pūrṇaṃ samādhau || 408||

prakṛtivikṛtiśūnyaṃ bhāvanātītabhāvaṃ

samarasamasamānaṃ mānasambandhadūram |

nigamavacanasiddhaṃ nityamasmatprasiddhaṃ

hṛdi kalayati vidvān brahma pūrṇaṃ samādhau || 409||

ajaramamaramastābhāvavastusvarūpaṃ (pāṭhabhedaḥ - bhāsavastu)

stimitasalilarāśiprakhyamākhyāvihīnam |

śamitaguṇavikāraṃ śāśvataṃ śāntamekaṃ

hṛdi kalayati vidvān brahma pūrṇaṃ samādhau || 410||

samāhitāntaḥkaraṇaḥ svarūpe

vilokayātmānamakhaṇḍavaibhavam |

vicchinddhi bandhaṃ bhavagandhagandhitaṃ (pāṭhabhedaḥ - gandhagandhilaṃ)

yatnena puṃstvaṃ saphalīkuruṣva || 411-

sarvopādhivinirmuktaṃ saccidānandamadvayam |

bhāvayātmānamātmasthaṃ na bhūyaḥ kalpase'dhvane || 412||

chāyeva puṃsaḥ paridṛśyamāna-

mābhāsarūpeṇa phalānubhūtyā |

śarīramārācchavavannirastaṃ

punarna sandhatta idaṃ mahātmā || 413||

satatavimalabodhānandarūpaṃ sametya (pāṭhabhedaḥ - svametya)

tyaja jaḍamalarūpopādhimetaṃ sudūre |

atha punarapi naiṣa smaryatāṃ vāntavastu (pāṭhabhedaḥ - punarapi naiva)

smaraṇaviṣayabhūtaṃ kalpate kutsanāya || 414||

samūlametatparidāhya vahnau (pāṭhabhedaḥ - paridahya)

sadātmani brahmaṇi nirvikalpe |

tataḥ svayaṃ nityaviśuddhabodhā-

nandātmanā tiṣṭhati vidvariṣṭhaḥ || 415||

prārabdhasūtragrathitaṃ śarīraṃ

prayātu vā tiṣṭhatu goriva srak |

na tatpunaḥ paśyati tattvavettā-

''nandātmani brahmaṇi līnavṛttiḥ || 416||

akhaṇḍānandamātmānaṃ vijñāya svasvarūpataḥ |

kimicchan kasya vā hetordehaṃ puṣṇāti tattvavit || 417||

saṃsiddhasya phalaṃ tvetajjīvanmuktasya yoginaḥ |

bahirantaḥ sadānandarasāsvādanamātmani || 418||

vairāgyasya phalaṃ bodho bodhasyoparatiḥ phalam |

svānandānubhavācchāntireṣaivoparateḥ phalam || 419||

yadyuttarottarābhāvaḥ pūrvapūrvantu niṣphalam |

nivṛttiḥ paramā tṛptirānando'nupamaḥ svataḥ || 420||

dṛṣṭaduḥkheṣvanudvego vidyāyāḥ prastutaṃ phalam |

yatkṛtaṃ bhrāntivelāyāṃ nānā karma jugupsitam |

paścānnaro vivekena tatkathaṃ kartumarhati || 421||

vidyāphalaṃ syādasato nivṛttiḥ

pravṛttirajñānaphalaṃ tadīkṣitam |

tajjñājñayoryanmṛgatṛṣṇikādau

nocedvidāṃ dṛṣṭaphalaṃ kimasmāt || 422|| (pāṭhabhedaḥ - nocedvido)

ajñānahṛdayagranthervināśo yadyaśeṣataḥ |

anicchorviṣayaḥ kiṃ nu pravṛtteḥ kāraṇaṃ svataḥ || 423|| (pāṭhabhedaḥ - viduṣaḥ kiṃ)

vāsanānudayo bhogye vairāgyasya tadāvadhiḥ |

ahambhāvodayābhāvo bodhasya paramāvadhiḥ |

līnavṛttairanutpattirmaryādoparatestu sā || 424|| (pāṭhabhedaḥ - vṛttera)

brahmākāratayā sadā sthitatayā nirmuktabāhyārthadhī-

ranyāveditabhogyabhogakalano nidrāluvadbālavat |

svapnālokitalokavajjagadidaṃ paśyankvacillabdhadhī-

rāste kaścidanantapuṇyaphalabhugdhanyaḥ sa mānyo bhuvi || 425||

sthitaprajño yatirayaṃ yaḥ sadānandamaśnute |

brahmaṇyeva vilīnātmā nirvikāro viniṣkriyaḥ || 426||

brahmātmanoḥ śodhitayorekabhāvāvagāhinī |

nirvikalpā ca cinmātrā vṛttiḥ prajñeti kathyate |

susthitā'sau bhavedyasya sthitaprajñaḥ sa ucyate || 427||

yasya sthitā bhavetprajñā yasyānando nirantaraḥ |

prapañco vismṛtaprāyaḥ sa jīvanmukta iṣyate || 428||

līnadhīrapi jāgarti jāgraddharmavivarjitaḥ |

bodho nirvāsano yasya sa jīvanmukta iṣyate || 429||

śāntasaṃsārakalanaḥ kalāvānapi niṣkalaḥ |

yasya cittaṃ viniścintaṃ sa jīvanmukta iṣyate || 430|| (pāṭhabhedaḥ - yaḥ sacitto'pi niścittaḥ)

vartamāne'pi dehe'smiñchāyāvadanuvartini |

ahantāmamatā'bhāvo jīvanmuktasya lakṣaṇam || 431||

atītānanusandhānaṃ bhaviṣyadavicāraṇam |

audāsīnyamapi prāptaṃ jīvanmuktasya lakṣaṇam || 432|| (pāṭhabhedaḥ - prāpte)

guṇadoṣaviśiṣṭe'sminsvabhāvena vilakṣaṇe |

sarvatra samadarśitvaṃ jīvanmuktasya lakṣaṇam || 433||

iṣṭāniṣṭārthasamprāptau samadarśitayā''tmani |

ubhayatrāvikāritvaṃ jīvanmuktasya lakṣaṇam || 434||

brahmānandarasāsvādāsaktacittatayā yateḥ |

antarbahiravijñānaṃ jīvanmuktasya lakṣaṇam || 435||

dehendriyādau kartavye mamāhambhāvavarjitaḥ |

audāsīnyena yastiṣṭhetsa jīvanmuktalakṣaṇaḥ || 436|| (pāṭhabhedaḥ - sa jīvanmukta iṣyate)

vijñāta ātmano yasya brahmabhāvaḥ śruterbalāt |

bhavabandhavinirmuktaḥ sa jīvanmuktalakṣaṇaḥ || 437|| (pāṭhabhedaḥ - sa jīvanmukta iṣyate)

dehendriyeṣvahambhāva idambhāvastadanyake |

yasya no bhavataḥ kvāpi sa jīvanmukta iṣyate || 438||

jīveśobhayasaṃsārarūpadurvāsanojjhitā |

sā sarvadā bhavedyasya sa jīvanmukta iṣyate ||

na pratyagbrahmaṇorbhedaṃ kadāpi brahmasargayoḥ |

prajñayā yo vijāniti sa jīvanmuktalakṣaṇaḥ || 439|| (pāṭhabhedaḥ - sa jīvanmukta iṣyate)

sādhubhiḥ pūjyamāne'sminpīḍyamāne'pi durjanaiḥ |

samabhāvo bhavedyasya sa jīvanmuktalakṣaṇaḥ || 440|| (pāṭhabhedaḥ - sa jīvanmukta iṣyate)

yatra praviṣṭā viṣayāḥ pareritā

nadīpravāhā iva vārirāśau |

linanti sanmātratayā na vikriyāṃ

utpādayantyeṣa yatirvimuktaḥ || 441||

vijñātabrahmatattvasya yathāpūrvaṃ na saṃsṛtiḥ |

asti cenna sa vijñātabrahmabhāvo bahirmukhaḥ || 442||

prācīnavāsanāvegādasau saṃsaratīti cet |

na sadekatvavijñānānmandī bhavati vāsanā || 443||

atyantakāmukasyāpi vṛttiḥ kuṇṭhati mātari |

tathaiva brahmaṇi jñāte pūrṇānande manīṣiṇaḥ || 444||

nididhyāsanaśīlasya bāhyapratyaya īkṣyate |

bravīti śrutiretasya prārabdhaṃ phaladarśanāt || 445||

sukhādyanubhavo yāvattāvatprārabdhamiṣyate |

phalodayaḥ kriyāpūrvo niṣkriyo na hi kutracit || 446||

ahaṃ brahmeti vijñānātkalpakoṭiśatārjitam |

sañcitaṃ vilayaṃ yāti prabodhātsvapnakarmavat || 447||

yatkṛtaṃ svapnavelāyāṃ puṇyaṃ vā pāpamulbaṇam |

suptotthitasya kintatsyātsvargāya narakāya vā || 448||

svamasaṅgamudāsīnaṃ parijñāya nabho yathā |

na śliṣyati ca yatkiñcitkadācidbhāvikarmabhiḥ || 449|| (pāṭhabhedaḥ - śliṣyate yatiḥ kiñcit)

na nabho ghaṭayogena surāgandhena lipyate |

tathātmopādhiyogena taddharmairnaiva lipyate || 450||

jñānodayātpurārabdhaṃ karmajñānānna naśyati |

adatvā svaphalaṃ lakṣyamuddiśyotsṛṣṭabāṇavat || 451||

vyāghrabuddhyā vinirmukto bāṇaḥ paścāttu gomatau |

na tiṣṭhati chinatyeva lakṣyaṃ vegena nirbharam || 452||

prārabdhaṃ balavattaraṃ khalu vidāṃ bhogena tasya kṣayaḥ

samyagjñānahutāśanena vilayaḥ prāksañcitāgāminām |

brahmātmaikyamavekṣya tanmayatayā ye sarvadā saṃsthitāḥ

teṣāṃ tattritayaṃ nahi kvacidapi brahmaiva te nirguṇam || 453||

upādhitādātmyavihīnakevala-

brahmātmanaivātmani tiṣṭhato muneḥ |

prārabdhasadbhāvakathā na yuktā

svapnārthasambandhakatheva jāgrataḥ || 454||

na hi prabuddhaḥ pratibhāsadehe

dehopayoginyapi ca prapañce |

karotyahantāṃ mamatāmidantāṃ

kintu svayaṃ tiṣṭhati jāgareṇa || 455||

na tasya mithyārthasamarthanecchā

na saṅgrahastajjagato'pi dṛṣṭaḥ |

tatrānuvṛttiryadi cenmṛṣārthe

na nidrayā mukta itīṣyate dhruvam || 456||

tadvatpare brahmaṇi vartamānaḥ

sadātmanā tiṣṭhati nānyadīkṣate |

smṛtiryathā svapnavilokitārthe

tathā vidaḥ prāśanamocanādau || 457||

karmaṇā nirmito dehaḥ prārabdhaṃ tasya kalpyatām |

nānāderātmano yuktaṃ naivātmā karmanirmitaḥ || 458||

ajo nityaḥ śāśvata iti brūte śrutiramoghavāk | (pāṭhabhedaḥ - ajo nitya iti brūte śrutireṣā tvamoghavāk)

tadātmanā tiṣṭhato'sya kutaḥ prārabdhakalpanā || 459||

prārabdhaṃ sidhyati tadā yadā dehātmanā sthitiḥ |

dehātmabhāvo naiveṣṭaḥ prārabdhaṃ tyajyatāmataḥ || 460||

śarīrasyāpi prārabdhakalpanā bhrāntireva hi |

adhyastasya kutaḥ sattvamasatyasya kuto janiḥ | (pāṭhabhedaḥ - sattvamasattvasya)

ajātasya kuto nāśaḥ prārabdhamasataḥ kutaḥ || 461||

jñānenājñānakāryasya samūlasya layo yadi |

tiṣṭhatyayaṃ kathaṃ deha iti śaṅkāvato jaḍān || 462||

samādhātuṃ bāhyadṛṣṭyā prārabdhaṃ vadati śrutiḥ |

na tu dehādisatyatvabodhanāya vipaścitām |

yataḥ śruterabhiprāyaḥ paramārthaikagocaraḥ || 463||

paripūrṇamanādyantamaprameyamavikriyam |

ekamevādvayaṃ brahma neha nānāsti kiñcana || 464||

sadghanaṃ cidghanaṃ nityamānandaghanamakriyam |

ekamevādvayaṃ brahma neha nānāsti kiñcana || 465||

pratyagekarasaṃ pūrṇamanantaṃ sarvatomukham |

ekamevādvayaṃ brahma neha nānāsti kiñcana || 466||

aheyamanupādeyamanādeyamanāśrayam | manādheyamanā

ekamevādvayaṃ brahma neha nānāsti kiñcana || 467||

nirguṇaṃ niṣkalaṃ sūkṣmaṃ nirvikalpaṃ nirañjanam |

ekamevādvayaṃ brahma neha nānāsti kiñcana || 468||

anirūpya svarūpaṃ yanmanovācāmagocaram |

ekamevādvayaṃ brahma neha nānāsti kiñcana || 469||

satsamṛddhaṃ svataḥsiddhaṃ śuddhaṃ buddhamanīdṛśam |

ekamevādvayaṃ brahma neha nānāsti kiñcana || 470||

nirastarāgā vinirastabhogāḥ (pāṭhabhedaḥ - nirapāstabhogāḥ)

śāntāḥ sudāntā yatayo mahāntaḥ |

vijñāya tattvaṃ parametadante

prāptāḥ parāṃ nirvṛtimātmayogāt || 471||

bhavānapīdaṃ paratattvamātmanaḥ

svarūpamānandaghanaṃ vicārya | (pāṭhabhedaḥ - nicāyya)

vidhūya mohaṃ svamanaḥprakalpitaṃ

muktaḥ kṛtārtho bhavatu prabuddhaḥ || 472||

samādhinā sādhuviniścalātmanā (pāṭhabhedaḥ - suniścalātmanā)

paśyātmatattvaṃ sphuṭabodhacakṣuṣā |

niḥsaṃśayaṃ samyagavekṣitaśce-

cchrutaḥ padārtho na punarvikalpyate || 473|| (pāṭhabhedaḥ - punarvikalpate)

svasyāvidyābandhasambandhamokṣā-

tsatyajñānānandarūpātmalabdhau |

śāstraṃ yuktirdeśikoktiḥ pramāṇaṃ

cāntaḥsiddhā svānubhūtiḥ pramāṇam || 474||

bandho mokṣaśca tṛptiśca cintā''rogyakṣudhādayaḥ |

svenaiva vedyā yajjñānaṃ pareṣāmānumānikam || 475||

taṭasthitā bodhayanti guravaḥ śrutayo yathā |

prajñayaiva taredvidvānīśvarānugṛhītayā || 476||

svānubhūtyā svayaṃ jñātvā svamātmānamakhaṇḍitam |

saṃsiddhaḥ sammukhaṃ tiṣṭhennirvikalpātmanā''tmani || 477|| (pāṭhabhedaḥ - susukhaṃ tiṣṭhen)

vedāntasiddhāntaniruktireṣā

brahmaiva jīvaḥ sakalaṃ jagacca |

akhaṇḍarūpasthitireva mokṣo

brahmādvitīye śrutayaḥ pramāṇam || 478|| (pāṭhabhedaḥ - brahmādvitīyaṃ)

iti guruvacanācchrutipramāṇāt

paramavagamya satattvamātmayuktyā |

praśamitakaraṇaḥ samāhitātmā

kvacidacalākṛtirātmaniṣṭhato'bhūt || 479|| (pāṭhabhedaḥ - ātmaniṣṭhito)

kiñcitkālaṃ samādhāya pare brahmaṇi mānasam | (pāṭhabhedaḥ - kañcitkālaṃ)

utthāya paramānandādidaṃ vacanamabravīt || 480|| (pāṭhabhedaḥ - vyutthāya)

buddhirvinaṣṭā galitā pravṛttiḥ

brahmātmanorekatayā'dhigatyā |

idaṃ na jāne'pyanidaṃ na jāne

kiṃ vā kiyadvā sukhamastyapāram || 481|| (pāṭhabhedaḥ - sukhamasya pāram)

vācā vaktumaśakyameva manasā mantuṃ na vā śakyate

svānandāmṛtapūrapūritaparabrahmāmbudhervaibhavam |

ambhorāśiviśīrṇavārṣikaśilābhāvaṃ bhajanme mano

yasyāṃśāṃśalave vilīnamadhunā''nandātmanā nirvṛtam || 482||

kva gataṃ kena vā nītaṃ kutra līnamidaṃ jagat |

adhunaiva mayā dṛṣṭaṃ nāsti kiṃ mahadadbhutam || 483||

kiṃ heyaṃ kimupādeyaṃ kimanyatkiṃ vilakṣaṇam |

akhaṇḍānandapīyūṣapūrṇe brahmamahārṇave || 484||

na kiñcidatra paśyāmi na śaṛṇomi na vedmyaham |

svātmanaiva sadānandarūpeṇāsmi vilakṣaṇaḥ || 485||

namo namaste gurave mahātmane

vimuktasaṅgāya saduttamāya |

nityādvayānandarasasvarūpiṇe

bhūmne sadā'pāradayāmbudhāmne || 486||

yatkaṭākṣaśaśisāndracandrikā-

pātadhūtabhavatāpajaśramaḥ |

prāptavānahamakhaṇḍavaibhavā-

nandamātmapadamakṣayaṃ kṣaṇāt || 487||

dhanyo'haṃ kṛtakṛtyo'haṃ vimukto'haṃ bhavagrahāt |

nityānandasvarūpo'haṃ pūrṇo'haṃ tvadanugrahāt || 488||

asaṅgo'hamanaṅgo'hamaliṅgo'hamabhaṅguraḥ |

praśānto'hamananto'hamamalo'haṃ cirantanaḥ || 489|| (pāṭhabhedaḥ - 'hamatānto'haṃ)

akartāhamabhoktāhamavikāro'hamakriyaḥ |

śuddhabodhasvarūpo'haṃ kevalo'haṃ sadāśivaḥ || 490||

draṣṭuḥ śroturvaktuḥ karturbhokturvibhinna evāham |

nityanirantaraniṣkriyaniḥsīmāsaṅgapūrṇabodhātmā || 491||

nāhamidaṃ nāhamado'pyubhayoravabhāsakaṃ paraṃ śuddham |

bāhyābhyantaraśūnyaṃ pūrṇaṃ brahmādvitīyamevāham || 492||

nirupamamanāditattvaṃ tvamahamidamada iti kalpanādūram |

nityānandaikarasaṃ satyaṃ brahmādvitīyamevāham || 493||

nārāyaṇo'haṃ narakāntako'haṃ

purāntako'haṃ puruṣo'hamīśaḥ |

akhaṇḍabodho'hamaśeṣasākṣī

nirīśvaro'haṃ nirahaṃ ca nirmamaḥ || 494||

sarveṣu bhūteṣvahameva saṃsthito

jñānātmanā'ntarbahirāśrayaḥ san |

bhoktā ca bhogyaṃ svayameva sarvaṃ

yadyatpṛthagdṛṣṭamidantayā purā || 495||

mayyakhaṇḍasukhāmbhodhau bahudhā viśvavīcayaḥ |

utpadyante vilīyante māyāmārutavibhramāt || 496||

sthulādibhāvā mayi kalpitā bhramā-

dāropitānusphuraṇena lokaiḥ |

kāle yathā kalpakavatsarāya-

ṇartvādayo niṣkalanirvikalpe || 497||

āropitaṃ nāśrayadūṣakaṃ bhavet

kadāpi mūḍhairatidoṣadūṣitaiḥ | mūḍhairmati

nārdrīkarotyūṣarabhūmibhāgaṃ

marīcikāvāri mahāpravāhaḥ || 498||

ākāśavallepavidūrago'haṃ (pāṭhabhedaḥ - ākāśavat kalpavi)

ādityavadbhāsyavilakṣaṇo'ham |

ahāryavannityaviniścalo'haṃ

ambhodhivatpāravivarjito'ham || 499||

na me dehena sambandho megheneva vihāyasaḥ |

ataḥ kuto me taddharmā jāgratsvapnasuṣuptayaḥ || 500||

upādhirāyāti sa eva gacchati

sa eva karmāṇi karoti bhuṅkte |

sa eva jīryan mriyate sadāhaṃ (pāṭhabhedaḥ - eva jīvan)

kulādrivanniścala eva saṃsthitaḥ || 501||

na me pravṛttirna ca me nivṛttiḥ

sadaikarūpasya niraṃśakasya |

ekātmako yo niviḍo nirantaro (pāṭhabhedaḥ - nibiḍo)

vyomeva pūrṇaḥ sa kathaṃ nu ceṣṭate || 502||

puṇyāni pāpāni nirindriyasya

niścetaso nirvikṛternirākṛteḥ |

kuto mamākhaṇḍasukhānubhūteḥ

brūte hyananvāgatamityapi śrutiḥ || 503||

chāyayā spṛṣṭamuṣṇaṃ vā śītaṃ vā suṣṭhu duḥṣṭhu vā |

na spṛśatyeva yatkiñcitpuruṣaṃ tadvilakṣaṇam || 504||

na sākṣiṇaṃ sākṣyadharmāḥ saṃspṛśanti vilakṣaṇam |

avikāramudāsīnaṃ gṛhadharmāḥ pradīpavat |

dehendriyamanodharmā naivātmānaṃ spṛśantyaho || 505|| ekṣtra

raveryathā karmaṇi sākṣibhāvo

vahneryathā dāhaniyāmakatvam | (pāṭhabhedaḥ - vā'yasi dāhakatvam)

rajjoryathā''ropitavastusaṅgaḥ

tathaiva kūṭasthacidātmano me || 506||

kartāpi vā kārayitāpi nāhaṃ

bhoktāpi vā bhojayitāpi nāham |

draṣṭāpi vā darśayitāpi nāhaṃ

so'haṃ svayañjyotiranīdṛgātmā || 507||

calatyupādhau pratibimbalaulya-

maupādhikaṃ mūḍhadhiyo nayanti |

svabimbabhūtaṃ ravivadviniṣkriyaṃ

kartāsmi bhoktāsmi hato'smi heti || 508||

jale vāpi sthale vāpi luṭhatveṣa jaḍātmakaḥ |

nāhaṃ vilipye taddharmairghaṭadharmairnabho yathā || 509||

kartṛtvabhoktṛtvakhalatvamattatā-

jaḍatvabaddhatvavimuktatādayaḥ |

buddhervikalpā na tu santi vastutaḥ

svasminpare brahmaṇi kevale'dvaye || 510||

santu vikārāḥ prakṛterdaśadhā śatadhā sahasradhā vāpi |

kiṃ me'saṅgacitastairna ghanaḥ kvacidambaraṃ spṛśati || 511|| (pāṭhabhedaḥ - taiḥ kiṃ me'saṅgaciterna hyambudaḍambaro'mbaraṃ)

avyaktādisthūlaparyantametat

viśvaṃ yatrābhāsamātraṃ pratītam |

vyomaprakhyaṃ sūkṣmamādyantahīnaṃ

brahmādvaitaṃ yattadevāhamasmi || 512||

sarvādhāraṃ sarvavastuprakāśaṃ

sarvākāraṃ sarvagaṃ sarvaśūnyam |

nityaṃ śuddhaṃ niścalaṃ nirvikalpaṃ (pāṭhabhedaḥ - niṣkalaṃ)

brahmādvaitaṃ yattadevāhamasmi || 513||

yatpratyastāśeṣamāyāviśeṣaṃ

pratyagrūpaṃ pratyayāgamyamānam |

satyajñānānantamānandarūpaṃ

brahmādvaitaṃ yattadevāhamasmi || 514||

niṣkriyo'smyavikāro'smi

niṣkalo'smi nirākṛtiḥ |

nirvikalpo'smi nityo'smi

nirālambo'smi nirdvayaḥ || 515||

sarvātmako'haṃ sarvo'haṃ sarvātīto'hamadvayaḥ |

kevalākhaṇḍabodho'hamānando'haṃ nirantaraḥ || 516||

svārājyasāmrājyavibhūtireṣā

bhavatkṛpāśrīmahimaprasādāt |

prāptā mayā śrīgurave mahātmane

namo namaste'stu punarnamo'stu || 517||

mahāsvapne māyākṛtajanijarāmṛtyugahane

bhramantaṃ kliśyantaṃ bahulataratāpairanudinam | (pāṭhabhedaḥ - ranukalam)

ahaṅkāravyāghravyathitamimamatyantakṛpayā

prabodhya prasvāpātparamavitavānmāmasi guro || 518||

namastasmai sadaikasmai kasmaicinmahase namaḥ | (pāṭhabhedaḥ - sadekasmai namaścinmahase muhuḥ)

yadetadviśvarūpeṇa rājate gururāja te || 519||

iti natamavalokya śiṣyavaryaṃ

samadhigatātmasukhaṃ prabuddhatattvam |

pramuditahṛdayaṃ sa deśikendraḥ (pāṭhabhedaḥ - hṛdayaḥ)

punaridamāha vacaḥ paraṃ mahātmā || 520||

brahmapratyayasantatirjagadato brahmaiva tatsarvataḥ (pāṭhabhedaḥ - satsarvataḥ)

paśyādhyātmadṛśā praśāntamanasā sarvāsvavasthāsvapi |

rūpādanyadavekṣitaṃ kimabhitaścakṣuṣmatāṃ dṛśyate (pāṭhabhedaḥ - vidyate)

tadvadbrahmavidaḥ sataḥ kimaparaṃ buddhervihārāspadam || 521||

kastāṃ parānandarasānubhūti-

mṛtsṛjya śūnyeṣu rameta vidvān | (pāṭhabhedaḥ - mutsṛjya

candre mahāhlādini dīpyamāne)

citrendumālokayituṃ ka icchet || 522||

asatpadārthānubhavena kiñcin

na hyasti tṛptirna ca duḥkhahāniḥ |

tadadvayānandarasānubhūtyā

tṛptaḥ sukhaṃ tiṣṭha sadātmaniṣṭhayā || 523||

svameva sarvathā paśyanmanyamānaḥ svamadvayam | (pāṭhabhedaḥ - sarvataḥ)

svānandamanubhuñjānaḥ kālaṃ naya mahāmate || 524||

akhaṇḍabodhātmani nirvikalpe

vikalpanaṃ vyomni puraprakalpanam |

tadadvayānandamayātmanā sadā

śāntiṃ parāmetya bhajasva maunam || 525||

tūṣṇīmavasthā paramopaśāntiḥ

buddherasatkalpavikalpahetoḥ |

brahmātmano brahmavido mahātmano

yatrādvayānandasukhaṃ nirantaram || 526||

nāsti nirvāsanānmaunātparaṃ sukhakṛduttamam |

vijñātātmasvarūpasya svānandarasapāyinaḥ || 527||

gacchaṃstiṣṭhannupaviśañchayāno vā'nyathāpi vā |

yathecchayā vasedvidvānātmārāmaḥ sadā muniḥ || 528||

na deśakālāsanadigyamādi-

lakṣyādyapekṣā'pratibaddhavṛtteḥ | (pāṭhabhedaḥ - pratibaddha

saṃsiddhatattvasya mahātmano'sti)

svavedane kā niyamādyavasthā || 529||

ghaṭo'yamiti vijñātuṃ niyamaḥ ko'nvavekṣate | (pāṭhabhedaḥ - apekṣyate)

vinā pramāṇasuṣṭhutvaṃ yasminsati padārthadhīḥ || 530||

ayamātmā nityasiddhaḥ pramāṇe sati bhāsate |

na deśaṃ nāpi vā kālaṃ na śuddhiṃ vāpyapekṣate || 531||

devadatto'hamityetadvijñānaṃ nirapekṣakam |

tadvadbrahmavido'pyasya brahmāhamiti vedanam || 532||

bhānuneva jagatsarvaṃ bhāsate yasya tejasā |

anātmakamasattucchaṃ kiṃ nu tasyāvabhāsakam || 533||

vedaśāstrapurāṇāni bhūtāni sakalānyapi |

yenārthavanti taṃ kinnu vijñātāraṃ prakāśayet || 534||

eṣa svayañjyotiranantaśaktiḥ

ātmā'prameyaḥ sakalānubhūtiḥ |

yameva vijñāya vimuktabandho

jayatyayaṃ brahmaviduttamottamaḥ || 535||

na khidyate no viṣayaiḥ pramodate

na sajjate nāpi virajyate ca |

svasminsadā krīḍati nandati svayaṃ

nirantarānandarasena tṛptaḥ || 536||

kṣudhāṃ dehavyathāṃ tyaktvā bālaḥ krīḍati vastuniḥ | (pāṭhabhedaḥ - vastuni)

tathaiva vidvān ramate nirmamo nirahaṃ sukhī || 537||

cintāśūnyamadainyabhaikṣamaśanaṃ pānaṃ saridvāriṣu

svātantryeṇa niraṅkuśā sthitirabhīrnidrā śmaśāne vane |

vastraṃ kṣālanaśoṣaṇādirahitaṃ digvāstu śayyā mahī

sañcāro nigamāntavīthiṣu vidāṃ krīḍā pare brahmaṇi || 538||

vimānamālambya śarīrametad

bhunaktyaśeṣānviṣayānupasthitān |

parecchayā bālavadātmavettā

yo'vyaktaliṅgo'nanuṣaktabāhyaḥ || 539||

digambaro vāpi ca sāmbaro vā

tvagambaro vāpi cidambarasthaḥ |

unmattavadvāpi ca bālavadvā

piśācavadvāpi caratyavanyām || 540||

kāmānniṣkāmarūpī saṃścaratyekacaro muniḥ | (pāṭhabhedaḥ - kāmānnī kāmarūpī)

svātmanaiva sadā tuṣṭaḥ svayaṃ sarvātmanā sthitaḥ || 541||

kvacinmūḍho vidvān kvacidapi mahārājavibhavaḥ

kvacidbhrāntaḥ saumyaḥ kvacidajagarācārakalitaḥ |

kvacitpātrībhūtaḥ kvacidavamataḥ kvāpyaviditaḥ

caratyevaṃ prājñaḥ satataparamānandasukhitaḥ || 542||

nirdhano'pi sadā tuṣṭo'pyasahāyo mahābalaḥ |

nityatṛpto'pyabhuñjāno'pyasamaḥ samadarśanaḥ || 543||

api kurvannakurvāṇaścābhoktā phalabhogyapi |

śarīryapyaśarīryeṣa paricchinno'pi sarvagaḥ || 544||

aśarīraṃ sadā santamimaṃ brahmavidaṃ kvacit |

priyāpriye na spṛśatastathaiva ca śubhāśubhe || 545||

sthūlādisambandhavato'bhimāninaḥ

sukhaṃ ca duḥkhaṃ ca śubhāśubhe ca |

vidhvastabandhasya sadātmano muneḥ

kutaḥ śubhaṃ vā'pyaśubhaṃ phalaṃ vā || 546||

tamasā grastavadbhānādagrasto'pi ravirjanaiḥ |

grasta ityucyate bhrāntyāṃ hyajñātvā vastulakṣaṇam || 547|| (pāṭhabhedaḥ - bhrāntyā)

tadvaddehādibandhebhyo vimuktaṃ brahmavittamam |

paśyanti dehivanmūḍhāḥ śarīrābhāsadarśanāt || 548||

ahirnirlvayanīṃ vāyaṃ muktvā dehaṃ tu tiṣṭhati | (pāṭhabhedaḥ - ahini)

itastataścālyamāno yatkiñcitprāṇavāyunā || 549||

strotasā nīyate dāru yathā nimnonnatasthalam |

daivena nīyate deho yathākālopabhuktiṣu || 550||

prārabdhakarmaparikalpitavāsanābhiḥ

saṃsārivaccarati bhuktiṣu muktadehaḥ |

siddhaḥ svayaṃ vasati sākṣivadatra tūṣṇīṃ

cakrasya mūlamiva kalpavikalpaśūnyaḥ || 551||

naivendriyāṇi viṣayeṣu niyuṅkta eṣa

naivāpayuṅkta upadarśanalakṣaṇasthaḥ |

naiva kriyāphalamapīṣadavekṣate sa (pāṭhabhedaḥ - apīṣadapekṣate saḥ)

svānandasāndrarasapānasumattacittaḥ || 552||

lakṣyālakṣyagatiṃ tyaktvā yastiṣṭhetkevalātmanā |

śiva eva svayaṃ sākṣādayaṃ brahmaviduttamaḥ || 553||

jīvanneva sadā muktaḥ kṛtārtho brahmavittamaḥ |

upādhināśādbrahmaiva san brahmāpyeti nirdvayam || 554||

śailūṣo veṣasadbhāvābhāvayośca yathā pumān |

tathaiva brahmavicchreṣṭhaḥ sadā brahmaiva nāparaḥ || 555||

yatra kvāpi viśīrṇaṃ satparṇamiva tarorvapuḥ patatāt | (pāṭhabhedaḥ - viśīrṇaṃ parṇamiva)

brahmībhūtasya yateḥ prāgeva taccidagninā dagdham || 556||

sadātmani brahmaṇi tiṣṭhato muneḥ

pūrṇā'dvayānandamayātmanā sadā |

na deśakālādyucitapratīkṣā

tvaṅmāṃsaviṭpiṇḍavisarjanāya || 557||

dehasya mokṣo no mokṣo na daṇḍasya kamaṇḍaloḥ |

avidyāhṛdayagranthimokṣo mokṣo yatastataḥ || 558||

kulyāyāmatha nadyāṃ vā śivakṣetre'pi catvare |

parṇaṃ patati cettena taroḥ kiṃ nu śubhāśubham || 559||

patrasya puṣpasya phalasya nāśavad-

dehendriyaprāṇadhiyāṃ vināśaḥ |

naivātmanaḥ svasya sadātmakasyā-

nandākṛtervṛkṣavadasti caiṣaḥ || 560|| (pāṭhabhedaḥ - vadāsta eṣaḥ)

prajñānaghana ityātmalakṣaṇaṃ satyasūcakam |

anūdyaupādhikasyaiva kathayanti vināśanam || 561||

avināśī vā are'yamātmeti śrutirātmanaḥ |

prabravītyavināśitvaṃ vinaśyatsu vikāriṣu || 562||

pāṣāṇavṛkṣatṛṇadhānyakaḍaṅkarādyā (pāṭhabhedaḥ - kaṭāmbarādyā)

dagdhā bhavanti hi mṛdeva yathā tathaiva |

dehendriyāsumana ādi samastadṛśyaṃ

jñānāgnidagdhamupayāti parātmabhāvam || 563||

vilakṣaṇaṃ yathā dhvāntaṃ līyate bhānutejasi |

tathaiva sakalaṃ dṛśyaṃ brahmaṇi pravilīyate || 564||

ghaṭe naṣṭe yathā vyoma vyomaiva bhavati sphuṭam |

tathaivopādhivilaye brahmaiva brahmavitsvayam || 565||

kṣīraṃ kṣīre yathā kṣiptaṃ tailaṃ taile jalaṃ jale |

saṃyuktamekatāṃ yāti tathā''tmanyātmavinmuniḥ || 566||

evaṃ videhakaivalyaṃ sanmātratvamakhaṇḍitam |

brahmabhāvaṃ prapadyaiṣa yatirnāvartate punaḥ || 567||

sadātmaikatvavijñānadagdhāvidyādivarṣmaṇaḥ |

amuṣya brahmabhūtatvād brahmaṇaḥ kuta udbhavaḥ || 568||

māyāklṛptau bandhamokṣau na staḥ svātmani vastutaḥ |

yathā rajjau niṣkriyāyāṃ sarpābhāsavinirgamau || 569||

āvṛteḥ sadasattvābhyāṃ vaktavye bandhamokṣaṇe |

nāvṛtirbrahmaṇaḥ kācidanyābhāvādanāvṛtam |

yadyastyadvaitahāniḥ syād dvaitaṃ no sahate śrutiḥ || 570||

bandhañca mokṣañca mṛṣaiva mūḍhā

buddherguṇaṃ vastuni kalpayanti |

dṛgāvṛtiṃ meghakṛtāṃ yathā ravau

yato'dvayā'saṅgacidetadakṣaram || 571|| (pāṭhabhedaḥ - cidekamakṣaram)

astīti pratyayo yaśca yaśca nāstīti vastuni |

buddhereva guṇāvetau na tu nityasya vastunaḥ || 572||

atastau māyayā klṛptau bandhamokṣau na cātmani |

niṣkale niṣkriye śānte niravadye nirañjane |

advitīye pare tattve vyomavatkalpanā kutaḥ || 573||

na nirodho na cotpattirna baddho na ca sādhakaḥ |

na mumukṣurna vai mukta ityeṣā paramārthatā || 574||

sakalanigamacūḍāsvāntasiddhāntarūpaṃ

paramidamatiguhyaṃ darśitaṃ te mayādya |

apagatakalidoṣaṃ kāmanirmuktabuddhiṃ (pāṭhabhedaḥ - buddhiḥ)

svasutavadasakṛttvāṃ bhāvayitvā mumukṣum || 575||

iti śrutvā gurorvākyaṃ praśrayeṇa kṛtānatiḥ |

sa tena samanujñāto yayau nirmuktabandhanaḥ || 576||

gurureva sadānandasindhau nirmagnamānasaḥ | (pāṭhabhedaḥ - gurureṣa)

pāvayanvasudhāṃ sarvāṃ vicacāra nirantaraḥ || 577||

ityācāryasya śiṣyasya saṃvādenātmalakṣaṇam |

nirūpitaṃ mumukṣūṇāṃ sukhabodhopapattaye || 578||

hitamidamupadeśamādriyantāṃ

vihitanirastasamastacittadoṣāḥ |

bhavasukhaviratāḥ praśāntacittāḥ (pāṭhabhedaḥ - sukhavimukhāḥ)

śrutirasikā yatayo mumukṣavo ye || 579||

saṃsārādhvani tāpabhānukiraṇaprodbhūtadāhavyathā-

khinnānāṃ jalakāṅkṣayā marubhuvi bhrāntyā paribhrāmyatām |

atyāsannasudhāmbudhiṃ sukhakaraṃ brahmādvayaṃ darśaya-

tyeṣā śaṅkarabhāratī vijayate nirvāṇasandāyinī || 580||

|| iti śaṅkarācāryaviracitaṃ vivekacūḍāmaṇiḥ ||

|| oṃ tatsat ||