Vishnu Padadi Keshanta Varnana Stotram

ॐ

বিষ্ণু পাদাদি কেশান্ত বর্ণন স্তোত্রং

Vishnu Stotram Bengali

লক্ষ্মীভর্তুর্ভুজাগ্রে কৃতবসতি সিতং যস্য রূপং বিশালং

নীলাদ্রেস্তুঙ্গশৃঙ্গস্থিতমিব রজনীনাথবিম্বং বিভাতি ।

পাযান্নঃ পাঞ্চজন্যঃ স দিতিসুতকুলত্রাসনৈঃ পূরযন্স্বৈ-

-র্নিধ্বানৈর্নীরদৌঘধ্বনিপরিভবদৈরম্বরং কম্বুরাজঃ ॥ 1 ॥

আহুর্যস্য স্বরূপং ক্ষণমুখমখিলং সূরযঃ কালমেতং

ধ্বান্তস্যৈকান্তমন্তং যদপি চ পরমং সর্বধাম্নাং চ ধাম ।

চক্রং তচ্চক্রপাণের্দিতিজতনুগলদ্রক্তধারাক্তধারং

শশ্বন্নো বিশ্ববন্দ্যং বিতরতু বিপুলং শর্ম ধর্মাংশুশোভম্ ॥ 2 ॥

অব্যান্নির্ঘাতঘোরো হরিভুজপবনামর্শনাধ্মাতমূর্তে-

-রস্মান্বিস্মেরনেত্রত্রিদশনুতিবচঃসাধুকারৈঃ সুতারঃ ।

সর্বং সংহর্তুমিচ্ছোররিকুলভুবন স্ফারবিষ্ফারনাদঃ

সংযত্কল্পান্তসিন্ধৌ শরসলিলঘটাবার্মুচঃ কার্মুকস্য ॥ 3 ॥

জীমূতশ্যামভাসা মুহুরপি ভগবদ্বাহুনা মোহযন্তী

যুদ্ধেষূদ্ধূযমানা ঝটিতি তটিদিবালক্ষ্যতে যস্য মূর্তিঃ ।

সোঽসিস্ত্রাসাকুলাক্ষত্রিদশরিপুবপুঃশোণিতাস্বাদতৃপ্তো

নিত্যানন্দায ভূযান্মধুমথনমনোনন্দনো নন্দকো নঃ ॥ 4 ॥

কম্রাকারা মুরারেঃ করকমলতলেনানুরাগাদ্গৃহীতা

সম্যগ্বৃত্তা স্থিতাগ্রে সপদি ন সহতে দর্শনং যা পরেষাম্ ।

রাজন্তী দৈত্যজীবাসবমদমুদিতা লোহিতালেপনার্দ্রা

কামং দীপ্তাংশুকান্তা প্রদিশতু দযিতেবাস্য কৌমোদকী নঃ ॥ 5 ॥

যো বিশ্বপ্রাণভূতস্তনুরপি চ হরের্যানকেতুস্বরূপো

যং সঞ্চিন্ত্যৈব সদ্যঃ স্বযমুরগবধূবর্গগর্ভাঃ পতন্তি ।

চঞ্চচ্চণ্ডোরুতুণ্ডত্রুটিতফণিবসারক্তপঙ্কাঙ্কিতস্যং

বন্দে ছন্দোমযং তং খগপতিমমলস্বর্ণবর্ণং সুপর্ণম্ ॥ 6 ॥

বিষ্ণোর্বিশ্বেশ্বরস্য প্রবরশযনকৃত্সর্বলোকৈকধর্তা

সোঽনন্তঃ সর্বভূতঃ পৃথুবিমলযশাঃ সর্ববেদৈশ্চ বেদ্যঃ ।

পাতা বিশ্বস্য শশ্বত্সকলসুররিপুধ্বংসনঃ পাপহন্তা

সর্বজ্ঞঃ সর্বসাক্ষী সকলবিষভযাত্পাতু ভোগীশ্বরো নঃ ॥ 7 ॥

বাগ্ভূগৈর্যাদিভেদৈর্বিদুরিহ মুনযো যাং যদীযৈশ্চ পুংসাং

কারুণ্যার্দ্রৈঃ কটাক্ষৈঃ সকৃদপি পতিতৈঃ সম্পদঃ স্যুঃ সমগ্রাঃ ।

কুন্দেন্দুস্বচ্ছমন্দস্মিতমধুরমুখাম্ভোরুহাং সুন্দরাঙ্গীং

বন্দে বন্দ্যামশেষৈরপি মুরভিদুরোমন্দিরামিন্দিরাং তাম্ ॥ 8 ॥

যা সূতে সত্ত্বজালং সকলমপি সদা সন্নিধানেন পুংসো

ধত্তে যা তত্ত্বযোগাচ্চরমচরমিদং ভূতযে ভূতজাতম্ ।

ধাত্রীং স্থাত্রীং জনিত্রীং প্রকৃতিমবিকৃতিং বিশ্বশক্তিং বিধাত্রীং

বিষ্ণোর্বিশ্বাত্মনস্তাং বিপুলগুণমযীং প্রাণনাথাং প্রণৌমি ॥ 9 ॥

যেভ্যোঽসূযদ্ভিরুচ্চৈঃ সপদি পদমুরু ত্যজ্যতে দৈত্যবর্গৈ-

-র্যেভো ধর্তুং চ মূর্ধ্না স্পৃহযতি সততং সর্বগীর্বাণবর্গঃ ।

নিত্যং নির্মূলযেযুর্নিচিততরমমী ভক্তিনিঘ্নাত্মনাং নঃ

পদ্মাক্ষস্যাঙ্ঘ্রিপদ্মদ্বযতলনিলযাঃ পাংসবঃ পাপপঙ্কম্ ॥ 10 ॥

রেখা লেখাদিবন্দ্যাশ্চরণতলগতাশ্চক্রমত্স্যাদিরূপাঃ

স্নিগ্ধাঃ সূক্ষ্মাঃ সুজাতা মৃদুললিততরক্ষৌমসূত্রাযমাণাঃ ।

দদ্যুর্নো মঙ্গলানি ভ্রমরভরজুষা কোমলেনাব্ধিজাযাঃ

কম্রেণাম্রেড্যমানাঃ কিসলযমৃদুনা পাণিনা চক্রপাণেঃ ॥ 11 ॥

যস্মাদাক্রামতো দ্যাং গরুডমণিশিলাকেতুদণ্ডাযমানা

দাশ্চ্যোতন্তী বভাসে সুরসরিদমলা বৈজযন্তীব কান্তা ।

ভূমিষ্ঠো যস্তথান্যো ভুবনগৃহবৃহত্‍স্তম্ভশোভাং দধৌ নঃ

পাতামেতৌ পাযোজোদরললিততলৌ পঙ্কজাক্ষস্য পাদৌ ॥ 12 ॥

আক্রামদ্ভ্যাং ত্রিলোকীমসুরসুরপতী তত্ক্ষণাদেব নীতৌ

যাভ্যাং বৈরোচনীন্দ্রৌ যুগপদপি বিপত্সম্পদোরেকধামঃ ।

তাভ্যাং তাম্রোদরাভ্যাং মুহুরহমজিতস্যাঞ্চিতাভ্যামুভাভ্যাং

প্রাজ্যৈশ্বর্যপ্রদাভ্যাং প্রণতিমুপগতঃ পাদপঙ্কেরুহাভ্যাম্ ॥ 13 ॥

যেভ্যো বর্ণশ্চতুর্থশ্চরমত উদভূদাদিসর্গে প্রজানাং

সাহস্রী চাপি সঙ্খ্যা প্রকটমভিহিতা সর্ববেদেষু যেষাম্ ।

প্রাপ্তা বিশ্বম্ভরা যৈরতিবিতততনোর্বিশ্বমূর্তের্বিরাজো

বিষ্ণোস্তেভ্যো মহদ্ভ্যঃ সততমপি নমোঽস্ত্বঙ্ঘ্রিপঙ্কেরুহেভ্যঃ ॥ 14 ॥

বিষ্ণোঃ পাদদ্বযাগ্রে বিমলনখমণিভ্রাজিতা রাজতে যা

রাজীবস্যেব রম্যা হিমজলকণিকালঙ্কৃতাগ্রা দলালী ।

অস্মাকং বিস্মযার্হাণ্যখিলজনমন প্রার্থনীযা হি সেযং

দদ্যাদাদ্যানবদ্যা ততিরতিরুচিরা মঙ্গলান্যঙ্গুলীনাম্ ॥ 15 ॥

যস্যাং দৃষ্ট্বামলাযাং প্রতিকৃতিমমরাঃ সম্ভবন্ত্যানমন্তঃ

সেন্দ্রাঃ সান্দ্রীকৃতের্ষ্যাস্ত্বপরসুরকুলাশঙ্কযাতঙ্কবন্তঃ ।

সা সদ্যঃ সাতিরেকাং সকলসুখকরীং সম্পদং সাধযেন্ন-

-শ্চঞ্চচ্চার্বংশুচক্রা চরণনলিনযোশ্চক্রপাণের্নখালী ॥ 16 ॥

পাদাম্ভোজন্মসেবাসমবনতসুরব্রাতভাস্বত্কিরীট-

-প্রত্যুপ্তোচ্চাবচাশ্মপ্রবরকরগণৈশ্চিন্তিতং যদ্বিভাতি ।

নম্রাঙ্গানাং হরের্নো হরিদুপলমহাকূর্মসৌন্দর্যহারি-

-চ্ছাযং শ্রেযঃপ্রদাযি প্রপদযুগমিদং প্রাপযেত্পাপমন্তম্ ॥ 17 ॥

শ্রীমত্যৌ চারুবৃত্তে করপরিমলনানন্দহৃষ্টে রমাযাঃ

সৌন্দর্যাঢ্যেন্দ্রনীলোপলরচিতমহাদণ্ডযোঃ কান্তিচোরে ।

সূরীন্দ্রৈঃ স্তূযমানে সুরকুলসুখদে সূদিতারাতিসঙ্ঘে

জঙ্ঘে নারাযণীযে মুহুরপি জযতামস্মদংহো হরন্ত্যৌ ॥ 18 ॥

সম্যক্সাহ্যং বিধাতুং সমমিব সততং জঙ্ঘযোঃ খিন্নযোর্যে

ভারীভূতোরুদণ্ডদ্বযভরণকৃতোত্তম্ভভাবং ভজেতে ।

চিত্তাদর্শং নিধাতুং মহিতমিব সতাং তে সমুদ্রাযমানে

বৃত্তাকারে বিধত্তাং হ্যদি মুদমজিতস্যানিশং জানুনী নঃ ॥ 19 ॥

দেবো ভীতিং বিধাতুঃ সপদি বিদধতৌ কৈটভাখ্যং মধুং চা-

-প্যারোপ্যারূঢগর্বাবধিজলধি যযোরাদিদৈত্যৌ জঘান ।

বৃত্তাবন্যোন্যতুল্যৌ চতুরমুপচযং বিভ্রতাবভ্রনীলা-

-বূরূ চারূ হরেস্তৌ মুদমতিশযিনীং মানসে নো বিধত্তাম্ ॥ 20 ॥

পীতেন দ্যোততে যচ্চতুরপরিহিতেনাম্বরেণাত্যুদারং

জাতালঙ্কারযোগং জলমিব জলধের্বাডবাগ্নিপ্রভাভিঃ ।

এতত্পাতিত্যদান্নো জঘনমতিঘনাদেনসো মাননীযং

সাতত্যেনৈব চেতোবিষযমবতরত্পাতু পীতাম্বরস্য ॥ 21 ॥

যস্যা দাম্না ত্রিধাম্নো জঘনকলিতযা ভ্রাজতেঽঙ্গং যথাব্ধে-

-র্মধ্যস্থো মন্দরাদ্রির্ভুজগপতিমহাভোগসন্নদ্ধমধ্যঃ ।

কাঞ্চী সা কাঞ্চনাভা মণিবরকিরণৈরুল্লসদ্ভিঃ প্রদীপ্তা

কল্যাং কল্যাণদাত্রীং মম মতিমনিশং কম্ররূপাং করোতু ॥ 22 ॥

উন্নম্রং কম্রমুচ্চৈরুপচিতমুদভূদ্যত্র পত্রৈর্বিচিত্রৈঃ

পূর্বং গীর্বাণপূজ্যং কমলজমধুপস্যাস্পদং তত্পযোজম্ ।

যস্মিন্নীলাশ্মনীলৈস্তরলরুচিজলৈঃ পূরিতে কেলিবুদ্ধ্যা

নালীকাক্ষস্য নাভীসরসি বসতু নশ্চিত্তহংসশ্চিরায ॥ 23 ॥

পাতালং যস্য নালং বলযমপি দিশাং পত্রপঙ্ক্তীর্নগেন্দ্রা-

-ন্বিদ্বাংসঃ কেসরালীর্বিদুরিহ বিপুলাং কর্ণিকাং স্বর্ণশৈলম্ ।

ভূযাদ্গাযত্স্বযম্ভূমধুকরভবনং ভূমযং কামদং নো

নালীকং নাভিপদ্মাকরভবমুরু তন্নাগশয্যস্য শৌরেঃ ॥ 24 ॥

আদৌ কল্পস্য যস্মাত্প্রভবতি বিততং বিশ্বমেতদ্বিকল্পৈঃ

কল্পান্তে যস্য চান্ত প্রবিশতি সকলং স্থাবরং জঙ্গমং চ ।

অত্যন্তাচিন্ত্যমূর্তেশ্চিরতরমজিতস্যান্তরিক্ষস্বরূপে

তস্মিন্নস্মাকমন্তঃকরণমতিমুদা ক্রীডতাত্ক্রোডভাগে ॥ 25 ॥

কান্ত্যম্ভঃপূরপূর্ণে লসদসিতবলীভঙ্গভাস্বত্তরঙ্গে

গম্ভীরাকারনাভীচতুরতরমহাবর্তশোভিন্যুদারে ।

ক্রীডত্বানদ্বহেমোদরনহনমহাবাডবাগ্নিপ্রভাঢ্যে

কামং দামোদরীযোদরসলিলনিধৌ চিত্তমত্স্যশ্চিরং নঃ ॥ 26 ॥

নাভীনালীকমূলাদধিকপরিমলোন্মোহিতানামলীনাং

মালা নীলেব যান্তী স্ফুরতি রুচিমতী বক্ত্রপদ্মোন্মুখী যা ।

রম্যা সা রোমরাজির্মহিতরুচিকরী মধ্যভাগস্য বিষ্ণো-

-শ্চিত্তস্থা মা বিরংসীচ্চিরতরমুচিতাং সাধযন্তী শ্রিযং নঃ ॥ 27 ॥

সংস্তীর্ণং কৌস্তুভাংশুপ্রসরকিসলযৈর্মুগ্ধমুক্তাফলাঢ্যং

শ্রীবত্সোল্লাসি ফুল্লপ্রতিনববনমালাঙ্কি রাজদ্ভুজান্তম্ ।

বক্ষঃ শ্রীবৃক্ষকান্তং মধুকরনিকরশ্যামলং শার্ঙ্গপাণেঃ

সংসারাধ্বশ্রমার্তৈরুপবনমিব যত্সেবিতং তত্প্রপদ্যে ॥ 28 ॥

কান্তং বক্ষো নিতান্তং বিদধদিব গলং কালিমা কালশত্রো-

-রিন্দোর্বিম্বং যথাঙ্কো মধুপ ইব তরোর্মঞ্জরীং রাজতে যঃ ।

শ্রীমান্নিত্যং বিধেযাদবিরলমিলিতঃ কৌস্তুভশ্রীপ্রতানৈঃ

শ্রীবত্সঃ শ্রীপতেঃ স শ্রিয ইব দযিতো বত্স উচ্চৈঃশ্রিযং নঃ ॥ 29 ॥

সম্ভূযাম্ভোধিমধ্যাত্সপদি সহজযা যঃ শ্রিযা সন্নিধত্তে

নীলে নারাযণোরঃস্থলগগনতলে হারতারোপসেব্যে ।

আশাঃ সর্বাঃ প্রকাশা বিদধদপিদধচ্চাত্মভাসান্যতেজা-

-স্যাশ্চর্যস্যাকরো নো দ্যুমণিরিব মণিঃ কৌস্তুভঃ সোঽস্তুভূত্যৈ ॥ 30 ॥

যা বাযাবানুকূল্যাত্সরতি মণিরুচা ভাসমানা সমানা

সাকং সাকম্পমংসে বসতি বিদধতী বাসুভদ্রং সুভদ্রম্ ।

সারং সারঙ্গসঙ্ঘৈর্মুখরিতকুসুমা মেচকান্তা চ কান্তা

মালা মালালিতাস্মান্ন বিরমতু সুখৈর্যোজযন্তী জযন্তী ॥ 31 ॥

হারস্যোরুপ্রভাভিঃ প্রতিনববনমালাশুভিঃ প্রাংশুরূপৈঃ

শ্রীভিশ্চাপ্যঙ্গদানাং কবলিতরুচি যন্নিষ্কভাভিশ্চ ভাতি ।

বাহুল্যেনৈব বদ্ধাঞ্জলিপুটমজিতস্যাভিযাচামহে ত-

-দ্বন্ধার্তিং বাধতাং নো বহুবিহতিকরীং বন্ধুরং বাহুমূলম্ ॥ 32 ॥

বিশ্বত্রাণৈকদীক্ষাস্তদনুগুণগুণক্ষত্রনির্মাণদক্ষাঃ

কর্তারো দুর্নিরূপস্ফুটগুণযশসা কর্মণামদ্ভুতানাম্ ।

শার্ঙ্গং বাণং কৃপাণং ফলকমরিগদে পদ্মশঙ্খৌ সহস্রং

বিভ্রাণাঃ শস্ত্রজালং মম দধতু হরের্বাহবো মোহহানিম্ ॥ 33 ॥

কণ্ঠাকল্পোদ্গতৈর্যঃ কনকমযলসত্কুণ্ডলোত্থৈরুদারৈ-

-রুদ্যোতৈঃ কৌস্তুভস্যাপ্যুরুভিরুপচিতশ্চিত্রবর্ণো বিভাতি ।

কণ্ঠাশ্লেষে রমাযাঃ করবলযপদৈর্মুদ্রিতে ভদ্ররূপে

বৈকুণ্ঠীযেঽত্র কণ্ঠে বসতু মম মতিঃ কুণ্ঠভাবং বিহায ॥ 34 ॥

পদ্মানন্দপ্রদাতা পরিলসদরুণশ্রীপরীতাগ্রভাগঃ

কালে কালে চ কম্বুপ্রবরশশধরাপূরণে যঃ প্রবীণঃ ।

বক্ত্রাকাশান্তরস্থস্তিরযতি নিতরাং দন্ততারৌঘশোভাং

শ্রীভর্তুর্দন্তবাসোদ্যুমণিরঘতমোনাশনাযাস্ত্বসৌ নঃ ॥ 35 ॥

নিত্যং স্নেহাতিরেকান্নিজকমিতুরলং বিপ্রযোগাক্ষমা যা

বক্ত্রেন্দোরন্তরালে কৃতবসতিরিবাভাতি নক্ষত্ররাজিঃ ।

লক্ষ্মীকান্তস্য কান্তাকৃতিরতিবিলসন্মুগ্ধমুক্তাবলিশ্রী-

-র্দন্তালী সন্ততং সা নতিনুতিনিরতানক্ষতান্রক্ষতান্নঃ ॥ 36 ॥

ব্রহ্মন্ব্রহ্মণ্যজিহ্মাং মতিমপি কুরুষে দেব সম্ভাবযে ত্বাং

শম্ভো শক্র ত্রিলোকীমবসি কিমমরৈর্নারদাদ্যাঃ সুখং বঃ ।

ইত্থং সেবাবনম্রং সুরমুনিনিকরং বীক্ষ্য বিষ্ণোঃ প্রসন্ন-

-স্যাস্যেন্দোরাস্রবন্তী বরবচনসুধাহ্লাদযেন্মানসং নঃ ॥ 37 ॥

কর্ণস্থস্বর্ণকম্রোজ্জ্বলমকরমহাকুণ্ডলপ্রোতদীপ্য-

-ন্মাণিক্যশ্রীপ্রতানৈঃ পরিমিলিতমলিশ্যামলং কোমলং যত্ ।

প্রোদ্যত্সূর্যাংশুরাজন্মরকতমুকুরাকারচোরং মুরারে-

-র্গাঢামাগামিনীং নঃ শমযতু বিপদং গণ্ডযোর্মণ্ডলং তত্ ॥ 38 ॥

বক্ত্রাম্ভোজে লসন্তং মুহুরধরমণিং পক্ববিম্বাভিরামং

দৃষ্ট্বা দ্রষ্টুং শুকস্য স্ফুটমবতরতস্তুণ্ডদণ্ডাযতে যঃ ।

ঘোণঃ শোণীকৃতাত্মা শ্রবণযুগলসত্কুণ্ডলোস্রৈর্মুরারেঃ

প্রাণাখ্যস্যানিলস্য প্রসরণসরণিঃ প্রাণদানায নঃ স্যাত্ ॥ 39 ॥

দিক্কালৌ বেদযন্তৌ জগতি মুহুরিমৌ সঞ্চরন্তৌ রবীন্দূ

ত্রৈলোক্যালোকদীপাবভিদধতি যযোরেব রূপং মুনীন্দ্রাঃ ।

অস্মানব্জপ্রভে তে প্রচুরতরকৃপানির্ভরং প্রেক্ষমাণে

পাতামাতাম্রশুক্লাসিতরুচিরুচিরে পদ্মনেত্রস্য নেত্রে ॥ 40 ॥

পাতাত্পাতালপাতাত্পতগপতিগতের্ভ্রূযুগং ভুগ্নমধ্যং

যেনেষচ্চালিতেন স্বপদনিযমিতাঃ সাসুরা দেবসঙ্ঘাঃ ।

নৃত্যল্লালাটরঙ্গে রজনিকরতনোরর্ধখণ্ডাবদাতে

কালব্যালদ্বযং বা বিলসতি সমযা বালিকামাতরং নঃ ॥ 41 ॥

লক্ষ্মাকারালকালিস্ফুরদলিকশশাঙ্কার্ধসন্দর্শমীল-

-ন্নেত্রাম্ভোজপ্রবোধোত্সুকনিভৃততরালীনভৃঙ্গচ্ছটাভে ।

লক্ষ্মীনাথস্য লক্ষ্যীকৃতবিবুধগণাপাঙ্গবাণাসনার্ধ-

-চ্ছাযে নো ভূরিভূতিপ্রসবকুশলতে ভ্রূলতে পালযেতাম্ ॥ 42 ॥

রূক্ষস্মারেক্ষুচাপচ্যুতশরনিকরক্ষীণলক্ষ্মীকটাক্ষ-

-প্রোত্ফুল্লত্পদ্মমালাবিলসিতমহিতস্ফাটিকৈশানলিঙ্গম্ ।

ভূযাদ্ভূযো বিভূত্যৈ মম ভুবনপতের্ভ্রূলতাদ্বন্দ্বমধ্যা-

-দুত্থং তত্পুণ্ড্রমূর্ধ্বং জনিমরণতমঃখণ্ডনং মণ্ডনং চ ॥ 43 ॥

পীঠীভূতালকান্তে কৃতমকুটমহাদেবলিঙ্গপ্রতিষ্ঠে

লালাটে নাট্যরঙ্গে বিকটতরতটে কৈটভারেশ্চিরায ।

প্রোদ্ধাট্যৈবাত্মতন্দ্রীপ্রকটপটকুটীং প্রস্ফুরন্তীং স্ফুটাঙ্গং

পট্বীযং ভাবনাখ্যাং চটুলমতিনটী নাটিকাং নাটযেন্নঃ ॥ 44 ॥

মালালীবালিধাম্নঃ কুবলযকলিতা শ্রীপতেঃ কুন্তলালী

কালিন্দ্যারুহ্য মূর্ধ্নো গলতি হরশিরঃস্বর্ধুনীস্পর্ধযা নু ।

রাহুর্বা যাতি বক্ত্রং সকলশশিকলাভ্রান্তিলোলান্তরাত্মা

লোকৈরালোক্যতে যা প্রদিশতু সততং সাখিলং মঙ্গলং নঃ ॥ 45 ॥

সুপ্তাকারাঃ প্রসুপ্তে ভগবতি বিবুধৈরপ্যদৃষ্টস্বরূপা

ব্যাপ্তব্যোমান্তরালাস্তরলমণিরুচা রঞ্জিতাঃ স্পষ্টভাসঃ ।

দেহচ্ছাযোদ্গমাভা রিপুবপুরগুরুপ্লোষরোষাগ্নিধূম্যাঃ

কেশাঃ কেশিদ্বিষো নো বিদধতু বিপুলক্লেশপাশপ্রণাশম্ ॥ 46 ॥

যত্র প্রত্যুপ্তরত্নপ্রবরপরিলসদ্ভূরিরোচিষ্প্রতান-

-স্ফূর্ত্যাং মূর্তির্মুরারের্দ্যুমণিশতচিতব্যোমবদ্দুর্নিরীক্ষ্যা ।

কুর্বত্পারেপযোধি জ্বলদকৃশশিখাভাস্বদৌর্বাগ্নিশঙ্কাং

শশ্বন্নঃ শর্ম দিশ্যাত্কলিকলুষতমঃপাটনং তত্কিরীটম্ ॥ 47 ॥

ভ্রান্ত্বা ভ্রান্ত্বা যদন্তস্ত্রিভুবনগুরুরপ্যব্দকোটীরনেকা

গন্তুং নান্তং সমর্থো ভ্রমর ইব পুনর্নাভিনালীকনালাত্ ।

উন্মজ্জন্নূর্জিতশ্রীস্ত্রিভুবনমপরং নির্মমে তত্সদৃক্ষং

দেহাম্ভোধিঃ স দেযান্নিরবধিরমৃতং দৈত্যবিদ্বেষিণো নঃ ॥ 48 ॥

মত্স্যঃ কূর্মো বরাহো নরহরিণপতির্বামনো জামদগ্ন্যঃ

কাকুত্স্থঃ কংসঘাতী মনসিজবিজযী যশ্চ কল্কির্ভবিষ্যন্ ।

বিষ্ণোরংশাবতরা ভুবনহিতকরা ধর্মসংস্থাপনার্থাঃ

পাযাসুর্মাং ত এতে গুরুতরকরুণাভারখিন্নাশযা যে ॥ 49 ॥

যস্মাদ্বাচো নিবৃত্তাঃ সমমপি মনসা লক্ষণামীক্ষমাণাঃ

স্বার্থালাভাত্পরার্থব্যপগমকথনশ্লাঘিনো বেদবাদাঃ ।

নিত্যানন্দং স্বসংবিন্নিরবধিবিমলস্বান্তসঙ্ক্রান্তবিম্ব-

-চ্ছাযাপত্যাপি নিত্যং সুখযতি যমিনো যত্তদব্যান্মহো নঃ ॥ 50 ॥

আপাদাদা চ শীর্ষাদ্বপুরিদমনঘং বৈষ্ণবং যঃ স্বচিত্তে

ধত্তে নিত্যং নিরস্তাখিলকলিকলুষ সন্ততান্তঃ প্রমোদম্ ।

জুহ্বজ্জিহ্বাকৃশানৌ হরিচরিতহবিঃ স্তোত্রমন্ত্রানুপাঠৈ-

-স্তত্পাদাম্ভোরুহাভ্যাং সততমপি নমস্কুর্মহে নির্মলাভ্যাম্ ॥ 51 ॥

মোদাত্পাদাদিকেশস্তুতিমিতিরচিতা কীর্তযিত্বা ত্রিধাম্ন

পাদাব্জদ্বন্দ্বসেবাসমযনতমতির্মস্তকেনানমেদ্য ।

উন্মুচ্যৈবাত্মনৈনোনিচযকবচক পঞ্চতামেত্য ভানো-

-র্বিম্বান্তর্গোচর স প্রবিশতি পরমানন্দমাত্মস্বরূপম্ ॥ 52 ॥

ইতি শ্রীমত্পরমহংসপরিব্রাজকাচার্যস্য শ্রীগোবিন্দভগবত্পূজ্যপাদশিষ্যস্য শ্রীমচ্ছঙ্করভগবতঃ কৃতৌ শ্রী বিষ্ণু পাদাদিকেশান্তবর্ণণ স্তোত্রং সম্পূর্ণম্ ।

Roman (IAST) Transliteration

lakṣmībharturbhujāgre kṛtavasati sitaṃ yasya rūpaṃ viśālaṃ

nīlādrestuṅgaśṛṅgasthitamiva rajanīnāthabimbaṃ vibhāti |

pāyānnaḥ pāñcajanyaḥ sa ditisutakulatrāsanaiḥ pūrayansvai-

-rnidhvānairnīradaughadhvaniparibhavadairambaraṃ kamburājaḥ || 1 ||

āhuryasya svarūpaṃ kṣaṇamukhamakhilaṃ sūrayaḥ kālametaṃ

dhvāntasyaikāntamantaṃ yadapi ca paramaṃ sarvadhāmnāṃ ca dhāma |

cakraṃ taccakrapāṇerditijatanugaladraktadhārāktadhāraṃ

śaśvanno viśvavandyaṃ vitaratu vipulaṃ śarma dharmāṃśuśobham || 2 ||

avyānnirghātaghoro haribhujapavanāmarśanādhmātamūrte-

-rasmānvismeranetratridaśanutivacaḥsādhukāraiḥ sutāraḥ |

sarvaṃ saṃhartumicchorarikulabhuvana sphāraviṣphāranādaḥ

saṃyatkalpāntasindhau śarasalilaghaṭāvārmucaḥ kārmukasya || 3 ||

jīmūtaśyāmabhāsā muhurapi bhagavadbāhunā mohayantī

yuddheṣūddhūyamānā jhaṭiti taṭidivālakṣyate yasya mūrtiḥ |

so'sistrāsākulākṣatridaśaripuvapuḥśoṇitāsvādatṛpto

nityānandāya bhūyānmadhumathanamanonandano nandako naḥ || 4 ||

kamrākārā murāreḥ karakamalatalenānurāgādgṛhītā

samyagvṛttā sthitāgre sapadi na sahate darśanaṃ yā pareṣām |

rājantī daityajīvāsavamadamuditā lohitālepanārdrā

kāmaṃ dīptāṃśukāntā pradiśatu dayitevāsya kaumodakī naḥ || 5 ||

yo viśvaprāṇabhūtastanurapi ca hareryānaketusvarūpo

yaṃ sañcintyaiva sadyaḥ svayamuragavadhūvargagarbhāḥ patanti |

cañcaccaṇḍorutuṇḍatruṭitaphaṇivasāraktapaṅkāṅkitasyaṃ

vande chandomayaṃ taṃ khagapatimamalasvarṇavarṇaṃ suparṇam || 6 ||

viṣṇorviśveśvarasya pravaraśayanakṛtsarvalokaikadhartā

so'nantaḥ sarvabhūtaḥ pṛthuvimalayaśāḥ sarvavedaiśca vedyaḥ |

pātā viśvasya śaśvatsakalasuraripudhvaṃsanaḥ pāpahantā

sarvajñaḥ sarvasākṣī sakalaviṣabhayātpātu bhogīśvaro naḥ || 7 ||

vāgbhūgairyādibhedairviduriha munayo yāṃ yadīyaiśca puṃsāṃ

kāruṇyārdraiḥ kaṭākṣaiḥ sakṛdapi patitaiḥ sampadaḥ syuḥ samagrāḥ |

kundendusvacchamandasmitamadhuramukhāmbhoruhāṃ sundarāṅgīṃ

vande vandyāmaśeṣairapi murabhiduromandirāmindirāṃ tām || 8 ||

yā sūte sattvajālaṃ sakalamapi sadā sannidhānena puṃso

dhatte yā tattvayogāccaramacaramidaṃ bhūtaye bhūtajātam |

dhātrīṃ sthātrīṃ janitrīṃ prakṛtimavikṛtiṃ viśvaśaktiṃ vidhātrīṃ

viṣṇorviśvātmanastāṃ vipulaguṇamayīṃ prāṇanāthāṃ praṇaumi || 9 ||

yebhyo'sūyadbhiruccaiḥ sapadi padamuru tyajyate daityavargai-

-ryebho dhartuṃ ca mūrdhnā spṛhayati satataṃ sarvagīrvāṇavargaḥ |

nityaṃ nirmūlayeyurnicitataramamī bhaktinighnātmanāṃ naḥ

padmākṣasyāṅghripadmadvayatalanilayāḥ pāṃsavaḥ pāpapaṅkam || 10 ||

rekhā lekhādivandyāścaraṇatalagatāścakramatsyādirūpāḥ

snigdhāḥ sūkṣmāḥ sujātā mṛdulalitatarakṣaumasūtrāyamāṇāḥ |

dadyurno maṅgalāni bhramarabharajuṣā komalenābdhijāyāḥ

kamreṇāmreḍyamānāḥ kisalayamṛdunā pāṇinā cakrapāṇeḥ || 11 ||

yasmādākrāmato dyāṃ garuḍamaṇiśilāketudaṇḍāyamānā

dāścyotantī babhāse surasaridamalā vaijayantīva kāntā |

bhūmiṣṭho yastathānyo bhuvanagṛhabṛhat‍stambhaśobhāṃ dadhau naḥ

pātāmetau pāyojodaralalitatalau paṅkajākṣasya pādau || 12 ||

ākrāmadbhyāṃ trilokīmasurasurapatī tatkṣaṇādeva nītau

yābhyāṃ vairocanīndrau yugapadapi vipatsampadorekadhāmaḥ |

tābhyāṃ tāmrodarābhyāṃ muhurahamajitasyāñcitābhyāmubhābhyāṃ

prājyaiśvaryapradābhyāṃ praṇatimupagataḥ pādapaṅkeruhābhyām || 13 ||

yebhyo varṇaścaturthaścaramata udabhūdādisarge prajānāṃ

sāhasrī cāpi saṅkhyā prakaṭamabhihitā sarvavedeṣu yeṣām |

prāptā viśvambharā yairativitatatanorviśvamūrtervirājo

viṣṇostebhyo mahadbhyaḥ satatamapi namo'stvaṅghripaṅkeruhebhyaḥ || 14 ||

viṣṇoḥ pādadvayāgre vimalanakhamaṇibhrājitā rājate yā

rājīvasyeva ramyā himajalakaṇikālaṅkṛtāgrā dalālī |

asmākaṃ vismayārhāṇyakhilajanamana prārthanīyā hi seyaṃ

dadyādādyānavadyā tatiratirucirā maṅgalānyaṅgulīnām || 15 ||

yasyāṃ dṛṣṭvāmalāyāṃ pratikṛtimamarāḥ sambhavantyānamantaḥ

sendrāḥ sāndrīkṛterṣyāstvaparasurakulāśaṅkayātaṅkavantaḥ |

sā sadyaḥ sātirekāṃ sakalasukhakarīṃ sampadaṃ sādhayenna-

-ścañcaccārvaṃśucakrā caraṇanalinayoścakrapāṇernakhālī || 16 ||

pādāmbhojanmasevāsamavanatasuravrātabhāsvatkirīṭa-

-pratyuptoccāvacāśmapravarakaragaṇaiścintitaṃ yadvibhāti |

namrāṅgānāṃ harerno haridupalamahākūrmasaundaryahāri-

-cchāyaṃ śreyaḥpradāyi prapadayugamidaṃ prāpayetpāpamantam || 17 ||

śrīmatyau cāruvṛtte karaparimalanānandahṛṣṭe ramāyāḥ

saundaryāḍhyendranīlopalaracitamahādaṇḍayoḥ kānticore |

sūrīndraiḥ stūyamāne surakulasukhade sūditārātisaṅghe

jaṅghe nārāyaṇīye muhurapi jayatāmasmadaṃho harantyau || 18 ||

samyaksāhyaṃ vidhātuṃ samamiva satataṃ jaṅghayoḥ khinnayorye

bhārībhūtorudaṇḍadvayabharaṇakṛtottambhabhāvaṃ bhajete |

cittādarśaṃ nidhātuṃ mahitamiva satāṃ te samudrāyamāne

vṛttākāre vidhattāṃ hyadi mudamajitasyāniśaṃ jānunī naḥ || 19 ||

devo bhītiṃ vidhātuḥ sapadi vidadhatau kaiṭabhākhyaṃ madhuṃ cā-

-pyāropyārūḍhagarvāvadhijaladhi yayorādidaityau jaghāna |

vṛttāvanyonyatulyau caturamupacayaṃ bibhratāvabhranīlā-

-vūrū cārū harestau mudamatiśayinīṃ mānase no vidhattām || 20 ||

pītena dyotate yaccaturaparihitenāmbareṇātyudāraṃ

jātālaṅkārayogaṃ jalamiva jaladherbāḍabāgniprabhābhiḥ |

etatpātityadānno jaghanamatighanādenaso mānanīyaṃ

sātatyenaiva cetoviṣayamavataratpātu pītāmbarasya || 21 ||

yasyā dāmnā tridhāmno jaghanakalitayā bhrājate'ṅgaṃ yathābdhe-

-rmadhyastho mandarādrirbhujagapatimahābhogasannaddhamadhyaḥ |

kāñcī sā kāñcanābhā maṇivarakiraṇairullasadbhiḥ pradīptā

kalyāṃ kalyāṇadātrīṃ mama matimaniśaṃ kamrarūpāṃ karotu || 22 ||

unnamraṃ kamramuccairupacitamudabhūdyatra patrairvicitraiḥ

pūrvaṃ gīrvāṇapūjyaṃ kamalajamadhupasyāspadaṃ tatpayojam |

yasminnīlāśmanīlaistaralarucijalaiḥ pūrite kelibuddhyā

nālīkākṣasya nābhīsarasi vasatu naścittahaṃsaścirāya || 23 ||

pātālaṃ yasya nālaṃ valayamapi diśāṃ patrapaṅktīrnagendrā-

-nvidvāṃsaḥ kesarālīrviduriha vipulāṃ karṇikāṃ svarṇaśailam |

bhūyādgāyatsvayambhūmadhukarabhavanaṃ bhūmayaṃ kāmadaṃ no

nālīkaṃ nābhipadmākarabhavamuru tannāgaśayyasya śaureḥ || 24 ||

ādau kalpasya yasmātprabhavati vitataṃ viśvametadvikalpaiḥ

kalpānte yasya cānta praviśati sakalaṃ sthāvaraṃ jaṅgamaṃ ca |

atyantācintyamūrteścirataramajitasyāntarikṣasvarūpe

tasminnasmākamantaḥkaraṇamatimudā krīḍatātkroḍabhāge || 25 ||

kāntyambhaḥpūrapūrṇe lasadasitavalībhaṅgabhāsvattaraṅge

gambhīrākāranābhīcaturataramahāvartaśobhinyudāre |

krīḍatvānadvahemodaranahanamahābāḍabāgniprabhāḍhye

kāmaṃ dāmodarīyodarasalilanidhau cittamatsyaściraṃ naḥ || 26 ||

nābhīnālīkamūlādadhikaparimalonmohitānāmalīnāṃ

mālā nīleva yāntī sphurati rucimatī vaktrapadmonmukhī yā |

ramyā sā romarājirmahitarucikarī madhyabhāgasya viṣṇo-

-ścittasthā mā viraṃsīccirataramucitāṃ sādhayantī śriyaṃ naḥ || 27 ||

saṃstīrṇaṃ kaustubhāṃśuprasarakisalayairmugdhamuktāphalāḍhyaṃ

śrīvatsollāsi phullapratinavavanamālāṅki rājadbhujāntam |

vakṣaḥ śrīvṛkṣakāntaṃ madhukaranikaraśyāmalaṃ śārṅgapāṇeḥ

saṃsārādhvaśramārtairupavanamiva yatsevitaṃ tatprapadye || 28 ||

kāntaṃ vakṣo nitāntaṃ vidadhadiva galaṃ kālimā kālaśatro-

-rindorbimbaṃ yathāṅko madhupa iva tarormañjarīṃ rājate yaḥ |

śrīmānnityaṃ vidheyādaviralamilitaḥ kaustubhaśrīpratānaiḥ

śrīvatsaḥ śrīpateḥ sa śriya iva dayito vatsa uccaiḥśriyaṃ naḥ || 29 ||

sambhūyāmbhodhimadhyātsapadi sahajayā yaḥ śriyā sannidhatte

nīle nārāyaṇoraḥsthalagaganatale hāratāropasevye |

āśāḥ sarvāḥ prakāśā vidadhadapidadhaccātmabhāsānyatejā-

-syāścaryasyākaro no dyumaṇiriva maṇiḥ kaustubhaḥ so'stubhūtyai || 30 ||

yā vāyāvānukūlyātsarati maṇirucā bhāsamānā samānā

sākaṃ sākampamaṃse vasati vidadhatī vāsubhadraṃ subhadram |

sāraṃ sāraṅgasaṅghairmukharitakusumā mecakāntā ca kāntā

mālā mālālitāsmānna viramatu sukhairyojayantī jayantī || 31 ||

hārasyoruprabhābhiḥ pratinavavanamālāśubhiḥ prāṃśurūpaiḥ

śrībhiścāpyaṅgadānāṃ kabalitaruci yanniṣkabhābhiśca bhāti |

bāhulyenaiva baddhāñjalipuṭamajitasyābhiyācāmahe ta-

-dvandhārtiṃ bādhatāṃ no bahuvihatikarīṃ bandhuraṃ bāhumūlam || 32 ||

viśvatrāṇaikadīkṣāstadanuguṇaguṇakṣatranirmāṇadakṣāḥ

kartāro durnirūpasphuṭaguṇayaśasā karmaṇāmadbhutānām |

śārṅgaṃ bāṇaṃ kṛpāṇaṃ phalakamarigade padmaśaṅkhau sahasraṃ

bibhrāṇāḥ śastrajālaṃ mama dadhatu harerbāhavo mohahānim || 33 ||

kaṇṭhākalpodgatairyaḥ kanakamayalasatkuṇḍalotthairudārai-

-rudyotaiḥ kaustubhasyāpyurubhirupacitaścitravarṇo vibhāti |

kaṇṭhāśleṣe ramāyāḥ karavalayapadairmudrite bhadrarūpe

vaikuṇṭhīye'tra kaṇṭhe vasatu mama matiḥ kuṇṭhabhāvaṃ vihāya || 34 ||

padmānandapradātā parilasadaruṇaśrīparītāgrabhāgaḥ

kāle kāle ca kambupravaraśaśadharāpūraṇe yaḥ pravīṇaḥ |

vaktrākāśāntarasthastirayati nitarāṃ dantatāraughaśobhāṃ

śrībharturdantavāsodyumaṇiraghatamonāśanāyāstvasau naḥ || 35 ||

nityaṃ snehātirekānnijakamituralaṃ viprayogākṣamā yā

vaktrendorantarāle kṛtavasatirivābhāti nakṣatrarājiḥ |

lakṣmīkāntasya kāntākṛtirativilasanmugdhamuktāvaliśrī-

-rdantālī santataṃ sā natinutiniratānakṣatānrakṣatānnaḥ || 36 ||

brahmanbrahmaṇyajihmāṃ matimapi kuruṣe deva sambhāvaye tvāṃ

śambho śakra trilokīmavasi kimamarairnāradādyāḥ sukhaṃ vaḥ |

itthaṃ sevāvanamraṃ suramuninikaraṃ vīkṣya viṣṇoḥ prasanna-

-syāsyendorāsravantī varavacanasudhāhlādayenmānasaṃ naḥ || 37 ||

karṇasthasvarṇakamrojjvalamakaramahākuṇḍalaprotadīpya-

-nmāṇikyaśrīpratānaiḥ parimilitamaliśyāmalaṃ komalaṃ yat |

prodyatsūryāṃśurājanmarakatamukurākāracoraṃ murāre-

-rgāḍhāmāgāminīṃ naḥ śamayatu vipadaṃ gaṇḍayormaṇḍalaṃ tat || 38 ||

vaktrāmbhoje lasantaṃ muhuradharamaṇiṃ pakvabimbābhirāmaṃ

dṛṣṭvā draṣṭuṃ śukasya sphuṭamavataratastuṇḍadaṇḍāyate yaḥ |

ghoṇaḥ śoṇīkṛtātmā śravaṇayugalasatkuṇḍalosrairmurāreḥ

prāṇākhyasyānilasya prasaraṇasaraṇiḥ prāṇadānāya naḥ syāt || 39 ||

dikkālau vedayantau jagati muhurimau sañcarantau ravīndū

trailokyālokadīpāvabhidadhati yayoreva rūpaṃ munīndrāḥ |

asmānabjaprabhe te pracuratarakṛpānirbharaṃ prekṣamāṇe

pātāmātāmraśuklāsitarucirucire padmanetrasya netre || 40 ||

pātātpātālapātātpatagapatigaterbhrūyugaṃ bhugnamadhyaṃ

yeneṣaccālitena svapadaniyamitāḥ sāsurā devasaṅghāḥ |

nṛtyallālāṭaraṅge rajanikaratanorardhakhaṇḍāvadāte

kālavyāladvayaṃ vā vilasati samayā vālikāmātaraṃ naḥ || 41 ||

lakṣmākārālakālisphuradalikaśaśāṅkārdhasandarśamīla-

-nnetrāmbhojaprabodhotsukanibhṛtatarālīnabhṛṅgacchaṭābhe |

lakṣmīnāthasya lakṣyīkṛtavibudhagaṇāpāṅgabāṇāsanārdha-

-cchāye no bhūribhūtiprasavakuśalate bhrūlate pālayetām || 42 ||

rūkṣasmārekṣucāpacyutaśaranikarakṣīṇalakṣmīkaṭākṣa-

-protphullatpadmamālāvilasitamahitasphāṭikaiśānaliṅgam |

bhūyādbhūyo vibhūtyai mama bhuvanapaterbhrūlatādvandvamadhyā-

-dutthaṃ tatpuṇḍramūrdhvaṃ janimaraṇatamaḥkhaṇḍanaṃ maṇḍanaṃ ca || 43 ||

pīṭhībhūtālakānte kṛtamakuṭamahādevaliṅgapratiṣṭhe

lālāṭe nāṭyaraṅge vikaṭatarataṭe kaiṭabhāreścirāya |

proddhāṭyaivātmatandrīprakaṭapaṭakuṭīṃ prasphurantīṃ sphuṭāṅgaṃ

paṭvīyaṃ bhāvanākhyāṃ caṭulamatinaṭī nāṭikāṃ nāṭayennaḥ || 44 ||

mālālīvālidhāmnaḥ kuvalayakalitā śrīpateḥ kuntalālī

kālindyāruhya mūrdhno galati haraśiraḥsvardhunīspardhayā nu |

rāhurvā yāti vaktraṃ sakalaśaśikalābhrāntilolāntarātmā

lokairālokyate yā pradiśatu satataṃ sākhilaṃ maṅgalaṃ naḥ || 45 ||

suptākārāḥ prasupte bhagavati vibudhairapyadṛṣṭasvarūpā

vyāptavyomāntarālāstaralamaṇirucā rañjitāḥ spaṣṭabhāsaḥ |

dehacchāyodgamābhā ripuvapuraguruploṣaroṣāgnidhūmyāḥ

keśāḥ keśidviṣo no vidadhatu vipulakleśapāśapraṇāśam || 46 ||

yatra pratyuptaratnapravaraparilasadbhūrirociṣpratāna-

-sphūrtyāṃ mūrtirmurārerdyumaṇiśatacitavyomavaddurnirīkṣyā |

kurvatpārepayodhi jvaladakṛśaśikhābhāsvadaurvāgniśaṅkāṃ

śaśvannaḥ śarma diśyātkalikaluṣatamaḥpāṭanaṃ tatkirīṭam || 47 ||

bhrāntvā bhrāntvā yadantastribhuvanagururapyabdakoṭīranekā

gantuṃ nāntaṃ samartho bhramara iva punarnābhinālīkanālāt |

unmajjannūrjitaśrīstribhuvanamaparaṃ nirmame tatsadṛkṣaṃ

dehāmbhodhiḥ sa deyānniravadhiramṛtaṃ daityavidveṣiṇo naḥ || 48 ||

matsyaḥ kūrmo varāho narahariṇapatirvāmano jāmadagnyaḥ

kākutsthaḥ kaṃsaghātī manasijavijayī yaśca kalkirbhaviṣyan |

viṣṇoraṃśāvatarā bhuvanahitakarā dharmasaṃsthāpanārthāḥ

pāyāsurmāṃ ta ete gurutarakaruṇābhārakhinnāśayā ye || 49 ||

yasmādvāco nivṛttāḥ samamapi manasā lakṣaṇāmīkṣamāṇāḥ

svārthālābhātparārthavyapagamakathanaślāghino vedavādāḥ |

nityānandaṃ svasaṃvinniravadhivimalasvāntasaṅkrāntabimba-

-cchāyāpatyāpi nityaṃ sukhayati yamino yattadavyānmaho naḥ || 50 ||

āpādādā ca śīrṣādvapuridamanaghaṃ vaiṣṇavaṃ yaḥ svacitte

dhatte nityaṃ nirastākhilakalikaluṣa santatāntaḥ pramodam |

juhvajjihvākṛśānau haricaritahaviḥ stotramantrānupāṭhai-

-statpādāmbhoruhābhyāṃ satatamapi namaskurmahe nirmalābhyām || 51 ||

modātpādādikeśastutimitiracitā kīrtayitvā tridhāmna

pādābjadvandvasevāsamayanatamatirmastakenānamedya |

unmucyaivātmanainonicayakavacaka pañcatāmetya bhāno-

-rbimbāntargocara sa praviśati paramānandamātmasvarūpam || 52 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrī viṣṇu pādādikeśāntavarṇaṇa stotraṃ sampūrṇam |