asya śrībagalāmukhīmahāmantrasya
nārado bhagavān ṛṣiḥ
atijagatīchandaḥ
śrī bagalāmukhī devatā
lāṃ bījaṃ iṃ śaktiḥ
laṃ kīlakaṃ-mama dūrasthānāṃ samīpasthānāṃ gati mati vāktsambhanārthe jape viniyogaḥ
oṃ hrīṃ aṅguṣṭhābhyāṃ namaḥ
bagalāmukhī tarjanībhyāṃ namaḥ
sarvaduṣṭānāṃ madhyamābhyāṃ namaḥ
vācaṃ mukhaṃ padaṃ stambhaya anāmikābhyāṃ namaḥ
jihvāṃ kīlaya buddhiṃ vināśaya kaniṣṭhikābhyāṃ namaḥ
hrīṃ oṃ svāhā karatalakarapṛṣṭābhyāṃ namaḥ
oṃ hrīṃ hṛdayāya namaḥ
bagalāmukhī śirase svāhā
sarvaduṣṭānāṃ śikhāyai vaṣat
vācaṃ mukhaṃ padaṃ stambhaya kavacā huṃ
jihvāṃ kīlaya buddhiṃ vināśaya netratrayāya vauṣaṭ
hrīṃ oṃ svāhā astrāya phaṭ
bhūrbhuvassuvaromiti digbandhaḥ |
dhyānam |
pītāmbarāṃ triṇetrāṃ ca dvibhujāṃ dahanojvalām |
śilāparvatahastāṃ ca ripukampāṃ mahotkaṭām || 1 ||
gambhīrāṃ ca madonmattāṃ svarṇakāntisamaprabhām |
vairinirdalanārthāya smarettāṃ bagalāmukhīm || 2 ||
caturbhujāṃ triṇayanāṃ kamalāsanasaṃsthitām |
dakṣiṇe mudgaraṃ pāśaṃ vāme jihvāṃ ca vajrakam || 3 ||
pītāmbaradharāṃ sāndrāṃ dṛḍhapīnayodharām |
vairivāktsambhinīṃ devīṃ smarāmi bagalāmukhīm || 4 ||
hemakuṇḍalabhūṣāṅgīṃ śītacandrārdhaśekharīm |
pītabhūṣaṇabhūṣāḍhyāṃ svarṇasiṃhāsanesthitām || 5 ||
triśūladhāriṇīmambāṃ sarvasaubhāgyadāyinīm |
sarvaśṛṅgāraveṣāḍhyāṃ bhajettāṃ bagalāmukhīm || 6 ||
madhye sudhābdhimaṇimaṇṭapa ratna vedyāṃ
siṃhāsanoparigatāṃ paripītavarṇām |
pītāmbarābharaṇamālyavibhūṣitāṅgīṃ
devīṃ namāmi dhṛta mudgaravairi jihvām || 7 ||
calatkanakakuṇḍalollasitacārugaṇḍasthalāṃ
lasatkanakacampaka dyutimadardhendu bimbāñcitām |
sadāhitavipakṣakāṃ dalitavairi jihvāñcalāṃ
namāmi bagalāmukhīṃ dhīmatāṃ vāṅmanasstambhinīm || 8 ||
pīyūṣo dadhimadhyacāru vilasadratnojvale maṇṭape
yāsiṃhāsana maulipātitaripu pretāsanādhyāsinīm |
svarṇābhāṃ karapīḍitāriraśanāṃ bhrāmyadgadāṃ bibhratīṃ
yastvāṃ paśyati tasya yānti vilayaṃ sadyohi sarvāpadaḥ || 9 ||
devi tvaccaraṇāmbujārcanakṛte yaḥ pītapuṣpāñjaliṃ
mudrāṃ vāmakare nidhāya ca punarmantrī manojñākṣarīm |
pīṭhadhyānaparopi kumbhakavaśādbījaṃ smaretprārthitaṃ
tasyā mitracayasya saṃsadi mukha stambho bhavettatkṣaṇāt || 10 ||
(oṃ hrīṃ bagalāmukhi sarvaduṣṭānāṃ vācaṃ mukhaṃ padaṃ stambhaya jihvāṃ kīlaya buddhiṃ vināśaya hrīṃ oṃ svāhā)
mantrastāvadayaṃ vipakṣadalane stotraṃ pavitraṃ ca te
yantraṃvādini yantriṇaṃ trijagatāṃ jaitraṃ sa citraṃ ca tat |
śrīmātarbagaleti nāma lalitaṃ yasyāsti jantormukhe
tannāmasmaraṇena vāgbhavamukha stambhobhavettatkṣaṇāt || 11 ||
duṣṭastambhanamugravighnaśamanaṃ dāridryavidrāvaṇaṃ
bhūbhṛttsambhanakāraṇaṃ mṛgadṛśāṃ cetassamākarṣaṇam |
saubhāgyaikaniketanaṃ mama dṛśāṃ kāruṇyapūrṇekṣaṇe
mṛtyormāraṇamāvirastu purato mātastvadīyaṃ vapuḥ || 12 ||
saṅkhyāgre coradaṇḍa praharaṇasamaye bandhane vairimadhye
vidyāvāde vivāde prakaṭitanṛpatau yuddhakāle niśāyām |
vaśye ca stambhane vā ripuvadhasamaye prāṇabādhe raṇe vā
gacchantīṣṭaṃ trikālaṃ tava paṭhanamidaṃ kārayedāśu dhīraḥ || 13 ||
mātarbhañjaya madvipakṣavadanaṃ jihvāṃ ca saṅkīlaya
brāhmīṃ mudraya mudrayāśudhiṣaṇāmaṅghryorgatiṃ stambhaya |
śatrūn cūrṇaya cūrṇayāśu gadayā gaurāṅgi pītāmbare
vighnaughaṃ bagale hara pratidinaṃ kaumāri vāmekṣaṇe || 14 ||
mātarbhairavi bhadrakāli vijaye vārāhi viśvāśraye
śrīnitye bagale maheśi samaye rāme surāme rame |
mātaṅgi tripure parātparatare svargāpavargaprade
vandehaṃ śaraṇāgatosmikṛpayā viśveśvarī trāhi mām || 15 ||
tvaṃ vidyā paramā trilokajananī vyoṣānanaṃ chedinī
yoṣākarṣaṇakāriṇī ca sumahābandhaikasambhedinī |
duṣṭoccāṭanakāriṇī ripumanassandohasandāyinī
jihvākīlanabhairavī vijayate brahmāstrasārāyaṇī || 16 ||
yaḥ kṛtaṃ japasaṅkhyānāṃ cintitaṃ parameśvarī |
śatrūṇāṃ buddhināśāya gṛhāṇa madanugrahāt || 17 ||
vaiḍūryahārapariśobhitahemamālāṃ
madhyetipīna kucayordhṛtapītavastrām |
vyāghrādhirūḍha paripūrita ratnaśobhāṃ
nityaṃ smarāmi bagalāṃ ripuvaktra kīlām || 18 ||
ekāgra mānaso bhūtvā stoṣyatyambāṃ suśobhanām |
rajanyā racitāṃ mālāṃ kare dhṛtvā japecchuciḥ || 19 ||
vāme pāṇau tu pāśaṃ ca tasyādhastāddhṛḍhaṃ śubham |
dakṣe kare'kṣasūtraṃ ca adhaḥpadmaṃ ca dhāriṇīm || 20 ||
cāmuṇḍe caṇḍikoṣṭre hutavahadayite śyāmale śrībhujaṅgī
durge pratyaṅgirādye muraripubhaginī bhārgavīvāmanetre |
nānārūpaprabhede sthitilayajananaṃ pālayadbhargahṛdye
viśvādye viśvajaitrī tripuraḥ bagale viśvavandye tvamekā || 21 ||
cakraṃ khaḍgaṃ musalamabhayaṃ dakṣiṇābhiśca dorbhiḥ
śaṅkhaṃ kheṭaṃ halamapi ca gadāṃ bibhratīṃ vāmadorbhiḥ |
siṃhārūḍhāmayuganayanāṃ śyāmalāṃ kañjavaktrāṃ
vande devīṃ sakalavaradāṃ pañcamīṃ mātṛmadhyām || 22 ||
dvātriṃśadāyutayutaiścaturaṣṭahastai-
raṣṭottaraiśśatakaraiśca sahasrahastaiḥ |
sarvāyudhairayuta bāhubhiranvitāṃ tāṃ
devīṃ bhajāmi bagalāṃ rasanāgrahastām || 23 ||
sarvataśśubhakarāṃ dvibhujāṃ tāṃ
kambuhema navakuṇḍala karṇām |
śatrunirdalanakāraṇakopāṃ
cintayāmi bagalāṃ hṛdayābje || 24 ||
jihvāgramādāya kareṇa devīṃ
vāmena śatrūn paripīḍayantīm |
gadābhighātena ca dakṣiṇena
pītāmbarāḍhyāṃ dvibhujāṃ namāmi || 25 ||
vande vārijalocanāṃ vasukarāṃ pītāmbarāḍambarāṃ
pītāmbhoruhasaṃsthitāṃ trinayanāṃ pītāṅgarāgojjvalām |
śabdabrahmamayīṃ mahākavijayīṃ trailokyasammohanīṃ
vidyutkoṭi nibhāṃ prasanna bagalāṃ pratyarthivāktsambhinīm || 26 ||
duḥkhena vā yadi sukhena ca vā tvadīyaṃ
stutvā'tha nāmabagale samupaiti vaśyam |
niścitya śatrumabalaṃ vijayaṃ tvadaṅghri
padmārcakasya bhavatīti kimatra citram || 27 ||
vimohitajagattrayāṃ vaśagatāvanavallabhāṃ
bhajāmi bagalāmukhīṃ bhavasukhaikasandhāyinīm |
gehaṃ nātati garvitaḥ praṇamati strīsaṅgamo mokṣati
dveṣī mitrati pāpakṛtsukṛtati kṣmāvallabhodhāvati || 28 ||
mṛtyurvaidhṛtidūṣaṇaṃ suguṇati tvatpādasaṃsevanāt
tvāṃ vande bhavabhītibhañjanakarīṃ gaurīṃ girīśapriyām |
nityaṃ yastu manoharaṃ stavamidaṃ divyaṃ paṭhetsādaraṃ
dhṛtvā yantramidaṃ tathaiva samare bāhvoḥ kare vā gale || 29 ||
rājāno varayoṣitothakariṇassarvāmṛgendrā vaśāḥ
stotrairyānti vimohitā ripugaṇā lakṣmīḥ sthirā siddhayaḥ |
nirnidre bagale samudranilaye raudryādi vāṅmudrike
bhadre rudramanohare tribhuvanatrāṇe daridrāpahe || 30 ||
sadratnākara bhūmigojvala karī nistandri cāndrānane
nīhārādrisute nisargasarale vidye surādye namaḥ |
devī tasya nirāmayātmajamukhānyāyūṃṣi dadyādidaṃ
ye nityaṃ prajapanti bhakti bharitāstebhyasstavaṃ niścitam || 31 ||
nūnaṃ śreyo vaśyamārogyatāṃ ca prāptassarvaṃ bhūtale sādhakastu |
bhaktyā nityaṃ stotrametatpaṭhanvai vidyāṃ kīrtiṃ vaṃśavṛddhiṃ ca vindet || 32 ||
iti śrīrudrayāmale śrībagalāmukhīstotram ||