Narayaniyam Dashaka 96 - Bhagavadvibhutayah Tatha Jnanakarmabhaktiyogah

ॐ

নারাযণীযং দশক 96 - ভগবদ্বিভূতযঃ তথা জ্ঞানকর্মভক্তিযোগাঃ

Vishnu Narayana Bhattatiri Bengali

ত্বং হি ব্রহ্মৈব সাক্ষাত্ পরমুরুমহিমন্নক্ষরাণামকার-

স্তারো মন্ত্রেষু রাজ্ঞাং মনুরসি মুনিষু ত্বং ভৃগুর্নারদোঽপি ।

প্রহ্লাদো দানবানাং পশুষু চ সুরভিঃ পক্ষিণাং বৈনতেযো

নাগানামস্যনন্তস্সুরসরিদপি চ স্রোতসাং বিশ্বমূর্তে ॥1॥

ব্রহ্মণ্যানাং বলিস্ত্বং ক্রতুষু চ জপযজ্ঞোঽসি বীরেষু পার্থো

ভক্তানামুদ্ধবস্ত্বং বলমসি বলিনাং ধাম তেজস্বিনাং ত্বম্ ।

নাস্ত্যন্তস্ত্বদ্বিভূতের্বিকসদতিশযং বস্তু সর্বং ত্বমেব

ত্বং জীবস্ত্বং প্রধানং যদিহ ভবদৃতে তন্ন কিঞ্চিত্ প্রপঞ্চে ॥2॥

ধর্মং বর্ণাশ্রমাণাং শ্রুতিপথবিহিতং ত্বত্পরত্বেন ভক্ত্যা

কুর্বন্তোঽন্তর্বিরাগে বিকসতি শনকৈঃ সন্ত্যজন্তো লভন্তে ।

সত্তাস্ফূর্তিপ্রিযত্বাত্মকমখিলপদার্থেষু ভিন্নেষ্বভিন্নং

নির্মূলং বিশ্বমূলং পরমমহমিতি ত্বদ্বিবোধং বিশুদ্ধম্ ॥3॥

জ্ঞানং কর্মাপি ভক্তিস্ত্রিতযমিহ ভবত্প্রাপকং তত্র তাব-

ন্নির্বিণ্ণানামশেষে বিষয ইহ ভবেত্ জ্ঞানযোগেঽধিকারঃ ।

সক্তানাং কর্মযোগস্ত্বযি হি বিনিহিতো যে তু নাত্যন্তসক্তাঃ

নাপ্যত্যন্তং বিরক্তাস্ত্বযি চ ধৃতরসা ভক্তিযোগো হ্যমীষাম্ ॥4॥

জ্ঞানং ত্বদ্ভক্ততাং বা লঘু সুকৃতবশান্মর্ত্যলোকে লভন্তে

তস্মাত্তত্রৈব জন্ম স্পৃহযতি ভগবন্ নাকগো নারকো বা ।

আবিষ্টং মাং তু দৈবাদ্ভবজলনিধিপোতাযিতে মর্ত্যদেহে

ত্বং কৃত্বা কর্ণধারং গুরুমনুগুণবাতাযিতস্তারযেথাঃ ॥5॥

অব্যক্তং মার্গযন্তঃ শ্রুতিভিরপি নযৈঃ কেবলজ্ঞানলুব্ধাঃ

ক্লিশ্যন্তেঽতীব সিদ্ধিং বহুতরজনুষামন্ত এবাপ্নুবন্তি ।

দূরস্থঃ কর্মযোগোঽপি চ পরমফলে নন্বযং ভক্তিযোগ-

স্ত্বামূলাদেব হৃদ্যস্ত্বরিতমযি ভবত্প্রাপকো বর্ধতাং মে ॥6॥

জ্ঞানাযৈবাতিযত্নং মুনিরপবদতে ব্রহ্মতত্ত্বং তু শৃণ্বন্

গাঢং ত্বত্পাদভক্তিং শরণমযতি যস্তস্য মুক্তিঃ করাগ্রে ।

ত্বদ্ধ্যানেঽপীহ তুল্যা পুনরসুকরতা চিত্তচাঞ্চল্যহেতো-

রভ্যাসাদাশু শক্যং তদপি বশযিতুং ত্বত্কৃপাচারুতাভ্যাম্ ॥7॥

নির্বিণ্ণঃ কর্মমার্গে খলু বিষমতমে ত্বত্কথাদৌ চ গাঢং

জাতশ্রদ্ধোঽপি কামানযি ভুবনপতে নৈব শক্নোমি হাতুম্ ।

তদ্ভূযো নিশ্চযেন ত্বযি নিহিতমনা দোষবুদ্ধ্যা ভজংস্তান্

পুষ্ণীযাং ভক্তিমেব ত্বযি হৃদযগতে মঙ্ক্ষু নঙ্ক্ষ্যন্তি সঙ্গাঃ ॥8॥

কশ্চিত্ ক্লেশার্জিতার্থক্ষযবিমলমতির্নুদ্যমানো জনৌঘৈঃ

প্রাগেবং প্রাহ বিপ্রো ন খলু মম জনঃ কালকর্মগ্রহা বা।

চেতো মে দুঃখহেতুস্তদিহ গুণগণং ভাবযত্সর্বকারী-

ত্যুক্ত্বা শান্তো গতস্ত্বাং মম চ কুরু বিভো তাদৃশী চিত্তশান্তিম্ ॥9॥

ঐলঃ প্রাগুর্বশীং প্রত্যতিবিবশমনাঃ সেবমানশ্চিরং তাং

গাঢং নির্বিদ্য ভূযো যুবতিসুখমিদং ক্ষুদ্রমেবেতি গাযন্ ।

ত্বদ্ভক্তিং প্রাপ্য পূর্ণঃ সুখতরমচরত্তদ্বদুদ্ধূতসঙ্গং

ভক্তোত্তংসং ক্রিযা মাং পবনপুরপতে হন্ত মে রুন্ধি রোগান্ ॥10॥

Roman (IAST) Transliteration

tvaṃ hi brahmaiva sākṣāt paramurumahimannakṣarāṇāmakāra-

stāro mantreṣu rājñāṃ manurasi muniṣu tvaṃ bhṛgurnārado'pi |

prahlādo dānavānāṃ paśuṣu ca surabhiḥ pakṣiṇāṃ vainateyo

nāgānāmasyanantassurasaridapi ca srotasāṃ viśvamūrte ||1||

brahmaṇyānāṃ balistvaṃ kratuṣu ca japayajño'si vīreṣu pārtho

bhaktānāmuddhavastvaṃ balamasi balināṃ dhāma tejasvināṃ tvam |

nāstyantastvadvibhūtervikasadatiśayaṃ vastu sarvaṃ tvameva

tvaṃ jīvastvaṃ pradhānaṃ yadiha bhavadṛte tanna kiñcit prapañce ||2||

dharmaṃ varṇāśramāṇāṃ śrutipathavihitaṃ tvatparatvena bhaktyā

kurvanto'ntarvirāge vikasati śanakaiḥ santyajanto labhante |

sattāsphūrtipriyatvātmakamakhilapadārtheṣu bhinneṣvabhinnaṃ

nirmūlaṃ viśvamūlaṃ paramamahamiti tvadvibodhaṃ viśuddham ||3||

jñānaṃ karmāpi bhaktistritayamiha bhavatprāpakaṃ tatra tāva-

nnirviṇṇānāmaśeṣe viṣaya iha bhavet jñānayoge'dhikāraḥ |

saktānāṃ karmayogastvayi hi vinihito ye tu nātyantasaktāḥ

nāpyatyantaṃ viraktāstvayi ca dhṛtarasā bhaktiyogo hyamīṣām ||4||

jñānaṃ tvadbhaktatāṃ vā laghu sukṛtavaśānmartyaloke labhante

tasmāttatraiva janma spṛhayati bhagavan nākago nārako vā |

āviṣṭaṃ māṃ tu daivādbhavajalanidhipotāyite martyadehe

tvaṃ kṛtvā karṇadhāraṃ gurumanuguṇavātāyitastārayethāḥ ||5||

avyaktaṃ mārgayantaḥ śrutibhirapi nayaiḥ kevalajñānalubdhāḥ

kliśyante'tīva siddhiṃ bahutarajanuṣāmanta evāpnuvanti |

dūrasthaḥ karmayogo'pi ca paramaphale nanvayaṃ bhaktiyoga-

stvāmūlādeva hṛdyastvaritamayi bhavatprāpako vardhatāṃ me ||6||

jñānāyaivātiyatnaṃ munirapavadate brahmatattvaṃ tu śṛṇvan

gāḍhaṃ tvatpādabhaktiṃ śaraṇamayati yastasya muktiḥ karāgre |

tvaddhyāne'pīha tulyā punarasukaratā cittacāñcalyaheto-

rabhyāsādāśu śakyaṃ tadapi vaśayituṃ tvatkṛpācārutābhyām ||7||

nirviṇṇaḥ karmamārge khalu viṣamatame tvatkathādau ca gāḍhaṃ

jātaśraddho'pi kāmānayi bhuvanapate naiva śaknomi hātum |

tadbhūyo niścayena tvayi nihitamanā doṣabuddhyā bhajaṃstān

puṣṇīyāṃ bhaktimeva tvayi hṛdayagate maṅkṣu naṅkṣyanti saṅgāḥ ||8||

kaścit kleśārjitārthakṣayavimalamatirnudyamāno janaughaiḥ

prāgevaṃ prāha vipro na khalu mama janaḥ kālakarmagrahā vā|

ceto me duḥkhahetustadiha guṇagaṇaṃ bhāvayatsarvakārī-

tyuktvā śānto gatastvāṃ mama ca kuru vibho tādṛśī cittaśāntim ||9||

ailaḥ prāgurvaśīṃ pratyativivaśamanāḥ sevamānaściraṃ tāṃ

gāḍhaṃ nirvidya bhūyo yuvatisukhamidaṃ kṣudrameveti gāyan |

tvadbhaktiṃ prāpya pūrṇaḥ sukhataramacarattadvaduddhūtasaṅgaṃ

bhaktottaṃsaṃ kriyā māṃ pavanapurapate hanta me rundhi rogān ||10||