Narayaniyam Dashaka 26 - Gajendramoksham

ॐ

নারাযণীযং দশক 26 - গজেন্দ্রমোক্ষম্

Vishnu Bengali

ইন্দ্রদ্যুম্নঃ পাণ্ড্যখণ্ডাধিরাজ-

স্ত্বদ্ভক্তাত্মা চন্দনাদ্রৌ কদাচিত্ ।

ত্বত্ সেবাযাং মগ্নধীরালুলোকে

নৈবাগস্ত্যং প্রাপ্তমাতিথ্যকামম্ ॥1॥

কুম্ভোদ্ভূতিঃ সম্ভৃতক্রোধভারঃ

স্তব্ধাত্মা ত্বং হস্তিভূযং ভজেতি ।

শপ্ত্বাঽথৈনং প্রত্যগাত্ সোঽপি লেভে

হস্তীন্দ্রত্বং ত্বত্স্মৃতিব্যক্তিধন্যম্ ॥2॥

দগ্ধাম্ভোধের্মধ্যভাজি ত্রিকূটে

ক্রীডঞ্ছৈলে যূথপোঽযং বশাভিঃ ।

সর্বান্ জন্তূনত্যবর্তিষ্ট শক্ত্যা

ত্বদ্ভক্তানাং কুত্র নোত্কর্ষলাভঃ ॥3॥

স্বেন স্থেম্না দিব্যদেশত্বশক্ত্যা

সোঽযং খেদানপ্রজানন্ কদাচিত্ ।

শৈলপ্রান্তে ঘর্মতান্তঃ সরস্যাং

যূথৈস্সার্ধং ত্বত্প্রণুন্নোঽভিরেমে ॥4॥

হূহূস্তাবদ্দেবলস্যাপি শাপাত্

গ্রাহীভূতস্তজ্জলে বর্তমানঃ ।

জগ্রাহৈনং হস্তিনং পাদদেশে

শান্ত্যর্থং হি শ্রান্তিদোঽসি স্বকানাম্ ॥5॥

ত্বত্সেবাযা বৈভবাত্ দুর্নিরোধং

যুধ্যন্তং তং বত্সরাণাং সহস্রম্ ।

প্রাপ্তে কালে ত্বত্পদৈকাগ্র্যসিধ্যৈ

নক্রাক্রান্তং হস্তিবর্যং ব্যধাস্ত্বম্ ॥6॥

আর্তিব্যক্তপ্রাক্তনজ্ঞানভক্তিঃ

শুণ্ডোত্ক্ষিপ্তৈঃ পুণ্ডরীকৈঃ সমর্চন্ ।

পূর্বাভ্যস্তং নির্বিশেষাত্মনিষ্ঠং

স্তোত্রং শ্রেষ্ঠং সোঽন্বগাদীত্ পরাত্মন্ ॥7॥

শ্রুত্বা স্তোত্রং নির্গুণস্থং সমস্তং

ব্রহ্মেশাদ্যৈর্নাহমিত্যপ্রযাতে ।

সর্বাত্মা ত্বং ভূরিকারুণ্যবেগাত্

তার্ক্ষ্যারূঢঃ প্রেক্ষিতোঽভূঃ পুরস্তাত্ ॥8॥

হস্তীন্দ্রং তং হস্তপদ্মেন ধৃত্বা

চক্রেণ ত্বং নক্রবর্যং ব্যদারীঃ ।

গন্ধর্বেঽস্মিন্ মুক্তশাপে স হস্তী

ত্বত্সারূপ্যং প্রাপ্য দেদীপ্যতে স্ম ॥9॥

এতদ্বৃত্তং ত্বাং চ মাং চ প্রগে যো

গাযেত্সোঽযং ভূযসে শ্রেযসে স্যাত্ ।

ইত্যুক্ত্বৈনং তেন সার্ধং গতস্ত্বং

ধিষ্ণ্যং বিষ্ণো পাহি বাতালযেশ ॥10॥

Roman (IAST) Transliteration

indradyumnaḥ pāṇḍyakhaṇḍādhirāja-

stvadbhaktātmā candanādrau kadācit |

tvat sevāyāṃ magnadhīrāluloke

naivāgastyaṃ prāptamātithyakāmam ||1||

kumbhodbhūtiḥ sambhṛtakrodhabhāraḥ

stabdhātmā tvaṃ hastibhūyaṃ bhajeti |

śaptvā'thainaṃ pratyagāt so'pi lebhe

hastīndratvaṃ tvatsmṛtivyaktidhanyam ||2||

dagdhāmbhodhermadhyabhāji trikūṭe

krīḍañchaile yūthapo'yaṃ vaśābhiḥ |

sarvān jantūnatyavartiṣṭa śaktyā

tvadbhaktānāṃ kutra notkarṣalābhaḥ ||3||

svena sthemnā divyadeśatvaśaktyā

so'yaṃ khedānaprajānan kadācit |

śailaprānte gharmatāntaḥ sarasyāṃ

yūthaissārdhaṃ tvatpraṇunno'bhireme ||4||

hūhūstāvaddevalasyāpi śāpāt

grāhībhūtastajjale bartamānaḥ |

jagrāhainaṃ hastinaṃ pādadeśe

śāntyarthaṃ hi śrāntido'si svakānām ||5||

tvatsevāyā vaibhavāt durnirodhaṃ

yudhyantaṃ taṃ vatsarāṇāṃ sahasram |

prāpte kāle tvatpadaikāgryasidhyai

nakrākrāntaṃ hastivaryaṃ vyadhāstvam ||6||

ārtivyaktaprāktanajñānabhaktiḥ

śuṇḍotkṣiptaiḥ puṇḍarīkaiḥ samarcan |

pūrvābhyastaṃ nirviśeṣātmaniṣṭhaṃ

stotraṃ śreṣṭhaṃ so'nvagādīt parātman ||7||

śrutvā stotraṃ nirguṇasthaṃ samastaṃ

brahmeśādyairnāhamityaprayāte |

sarvātmā tvaṃ bhūrikāruṇyavegāt

tārkṣyārūḍhaḥ prekṣito'bhūḥ purastāt ||8||

hastīndraṃ taṃ hastapadmena dhṛtvā

cakreṇa tvaṃ nakravaryaṃ vyadārīḥ |

gandharve'smin muktaśāpe sa hastī

tvatsārūpyaṃ prāpya dedīpyate sma ||9||

etadvṛttaṃ tvāṃ ca māṃ ca prage yo

gāyetso'yaṃ bhūyase śreyase syāt |

ityuktvainaṃ tena sārdhaṃ gatastvaṃ

dhiṣṇyaṃ viṣṇo pāhi vātālayeśa ||10||