📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
মণিদ্বীপ বর্ণন - 3 (দেবী ভাগবতম্)
Manidvipa Varnana - 3 (devi Bhagavatam)
Devi Vyasa Bengali
(শ্রীদেবীভাগবতং, দ্বাদশ স্কন্ধং, দ্বাদশোঽধ্যাযঃ, মণিদ্বীপ বর্ণন - 3)
ব্যাস উবাচ ।
তদেব দেবীসদনং মধ্যভাগে বিরাজতে ।
সহস্র স্তম্ভসংযুক্তাশ্চত্বারস্তেষু মণ্ডপাঃ ॥ 1 ॥
শৃঙ্গারমণ্ডপশ্চৈকো মুক্তিমণ্ডপ এব চ ।
জ্ঞানমণ্ডপ সঞ্জ্ঞস্তু তৃতীযঃ পরিকীর্তিতঃ ॥ 2 ॥
একান্তমণ্ডপশ্চৈব চতুর্থঃ পরিকীর্তিতঃ ।
নানা বিতানসংযুক্তা নানা ধূপৈস্তু ধূপিতাঃ ॥ 3 ॥
কোটিসূর্যসমাঃ কান্ত্যা ভ্রাঞ্জন্তে মণ্ডপাঃ শুভাঃ ।
তন্মণ্ডপানাং পরিতঃ কাশ্মীরবনিকা স্মৃতা ॥ 4 ॥
মল্লিকাকুন্দবনিকা যত্র পুষ্কলকাঃ স্থিতাঃ ।
অসঙ্খ্যাতা মৃগমদৈঃ পূরিতাস্তত্স্রবা নৃপ ॥ 5 ॥
মহাপদ্মাটবী তদ্বদ্রত্নসোপাননির্মিতা ।
সুধারসেনসম্পূর্ণা গুঞ্জন্মত্তমধুব্রতা ॥ 6 ॥
হংসকারণ্ডবাকীর্ণা গন্ধপূরিত দিক্তটা ।
বনিকানাং সুগন্ধৈস্তু মণিদ্বীপং সুবাসিতম্ ॥ 7 ॥
শৃঙ্গারমণ্ডপে দেব্যো গাযন্তি বিবিধৈঃ স্বরৈঃ ।
সভাসদো দেববশা মধ্যে শ্রীজগদম্বিকা ॥ 8 ॥
মুক্তিমণ্ডপমধ্যে তু মোচযত্যনিশং শিবা ।
জ্ঞানোপদেশং কুরুতে তৃতীযে নৃপ মণ্ডপে ॥ 9 ॥
চতুর্থমণ্ডপে চৈব জগদ্রক্ষা বিচিন্তনম্ ।
মন্ত্রিণী সহিতা নিত্যং করোতি জগদম্বিকা ॥ 10 ॥
চিন্তামণিগৃহে রাজঞ্ছক্তি তত্ত্বাত্মকৈঃ পরৈঃ ।
সোপানৈর্দশভির্যুক্তো মঞ্চকোপ্যধিরাজতে ॥ 11 ॥
ব্রহ্মা বিষ্ণুশ্চ রুদ্রশ্চ ঈশ্বরশ্চ সদাশিবঃ ।
এতে মঞ্চখুরাঃ প্রোক্তাঃ ফলকস্তু সদাশিবঃ ॥ 12 ॥
তস্যোপরি মহাদেবো ভুবনেশো বিরাজতে ।
যা দেবী নিজলীলার্থং দ্বিধাভূতা বভূবহ ॥ 13 ॥
সৃষ্ট্যাদৌ তু স এবাযং তদর্ধাঙ্গো মহেশ্বরঃ ।
কন্দর্প দর্পনাশোদ্যত্কোটি কন্দর্পসুন্দরঃ ॥ 14 ॥
পঞ্চবক্ত্রস্ত্রিনেত্রশ্চ মণিভূষণ ভূষিতঃ ।
হরিণাভীতিপরশূন্বরং চ নিজবাহুভিঃ ॥ 15 ॥
দধানঃ ষোডশাব্দোঽসৌ দেবঃ সর্বেশ্বরো মহান্ ।
কোটিসূর্য প্রতীকাশশ্চন্দ্রকোটি সুশীতলঃ ॥ 16 ॥
শুদ্ধস্ফটিক সঙ্কাশস্ত্রিনেত্রঃ শীতল দ্যুতিঃ ।
বামাঙ্কে সন্নিষণ্ণাঽস্য দেবী শ্রীভুবনেশ্বরী ॥ 17 ॥
নবরত্নগণাকীর্ণ কাঞ্চীদাম বিরাজিতা ।
তপ্তকাঞ্চনসন্নদ্ধ বৈদূর্যাঙ্গদভূষণা ॥ 18 ॥
কনচ্ছ্রীচক্রতাটঙ্ক বিটঙ্ক বদনাম্বুজা ।
ললাটকান্তি বিভব বিজিতার্ধসুধাকরা ॥ 19 ॥
বিম্বকান্তি তিরস্কারিরদচ্ছদ বিরাজিতা ।
লসত্কুঙ্কুমকস্তূরীতিলকোদ্ভাসিতাননা ॥ 20 ॥
দিব্য চূডামণি স্ফার চঞ্চচ্চন্দ্রকসূর্যকা ।
উদ্যত্কবিসমস্বচ্ছ নাসাভরণ ভাসুরা ॥ 21 ॥
চিন্তাকলম্বিতস্বচ্ছ মুক্তাগুচ্ছ বিরাজিতা ।
পাটীর পঙ্ক কর্পূর কুঙ্কুমালঙ্কৃত স্তনী ॥ 22 ॥
বিচিত্র বিবিধা কল্পা কম্বুসঙ্কাশ কন্ধরা ।
দাডিমীফলবীজাভ দন্তপঙ্ক্তি বিরাজিতা ॥ 23 ॥
অনর্ঘ্য রত্নঘটিত মুকুটাঞ্চিত মস্তকা ।
মত্তালিমালাবিলসদলকাঢ্য মুখাম্বুজা ॥ 24 ॥
কলঙ্ককার্শ্যনির্মুক্ত শরচ্চন্দ্রনিভাননা ।
জাহ্নবীসলিলাবর্ত শোভিনাভিবিভূষিতা ॥ 25 ॥
মাণিক্য শকলাবদ্ধ মুদ্রিকাঙ্গুলিভূষিতা ।
পুণ্ডরীকদলাকার নযনত্রযসুন্দরী ॥ 26 ॥
কল্পিতাচ্ছ মহারাগ পদ্মরাগোজ্জ্বলপ্রভা ।
রত্নকিঙ্কিণিকাযুক্ত রত্নকঙ্কণশোভিতা ॥ 27 ॥
মণিমুক্তাসরাপার লসত্পদকসন্ততিঃ ।
রত্নাঙ্গুলিপ্রবিতত প্রভাজাললসত্করা ॥ 28 ॥
কঞ্চুকীগুম্ফিতাপার নানা রত্নততিদ্যুতিঃ ।
মল্লিকামোদি ধম্মিল্ল মল্লিকালিসরাবৃতা ॥ 29 ॥
সুবৃত্তনিবিডোত্তুঙ্গ কুচভারালসা শিবা ।
বরপাশাঙ্কুশাভীতি লসদ্বাহু চতুষ্টযা ॥ 30 ॥
সর্বশৃঙ্গারবেষাঢ্যা সুকুমারাঙ্গবল্লরী ।
সৌন্দর্যধারাসর্বস্বা নির্ব্যাজকরুণামযী ॥ 31 ॥
নিজসংলাপমাধুর্য বিনির্ভর্ত্সিতকচ্ছপী ।
কোটিকোটিরবীন্দূনাং কান্তিং যা বিভ্রতী পরা ॥ 32 ॥
নানা সখীভির্দাসীভিস্তথা দেবাঙ্গনাদিভিঃ ।
সর্বাভির্দেবতাভিস্তু সমন্তাত্পরিবেষ্টিতা ॥ 33 ॥
ইচ্ছাশক্ত্যা জ্ঞানশক্ত্যা ক্রিযাশক্ত্যা সমন্বিতা ।
লজ্জা তুষ্টিস্তথা পুষ্টিঃ কীর্তিঃ কান্তিঃ ক্ষমা দযা ॥ 34 ॥
বুদ্ধির্মেধাস্মৃতির্লক্ষ্মীর্মূর্তিমত্যোঙ্গনাঃ স্মৃতাঃ ।
জযা চ বিজযা চৈবাপ্যজিতা চাপরাজিতা ॥ 35 ॥
নিত্যা বিলাসিনী দোগ্ধ্রী ত্বঘোরা মঙ্গলা নবা ।
পীঠশক্তয এতাস্তু সেবন্তে যাং পরাম্বিকাম্ ॥ 36 ॥
যস্যাস্তু পার্শ্বভাগেস্তোনিধীতৌ শঙ্খপদ্মকৌ ।
নবরত্ন বহানদ্যস্তথা বৈ কাঞ্চনস্রবাঃ ॥ 37 ॥
সপ্তধাতুবহানদ্যো নিধিভ্যাং তু বিনির্গতাঃ ।
সুধাসিন্ধ্বন্তগামিন্যস্তাঃ সর্বা নৃপসত্তম ॥ 38 ॥
সা দেবী ভুবনেশানী তদ্বামাঙ্কে বিরাজতে ।
সর্বেশ ত্বং মহেশস্য যত্সঙ্গা দেব নান্যথা ॥ 39 ॥
চিন্তামণি গৃহস্যাঽস্য প্রমাণং শৃণু ভূমিপ ।
সহস্রযোজনাযামং মহান্তস্তত্প্রচক্ষতে ॥ 40 ॥
তদুত্তরে মহাশালাঃ পূর্বস্মাদ্ দ্বিগুণাঃ স্মৃতাঃ ।
অন্তরিক্ষগতং ত্বেতন্নিরাধারং বিরাজতে ॥ 41 ॥
সঙ্কোচশ্চ বিকাশশ্চ জাযতেঽস্য নিরন্তরম্ ।
পটবত্কার্যবশতঃ প্রলযে সর্জনে তথা ॥ 42 ॥
শালানাং চৈব সর্বেষাং সর্বকান্তিপরাবধি ।
চিন্তামণিগৃহং প্রোক্তং যত্র দেবী মহোমযী ॥ 43 ॥
যেযে উপাসকাঃ সন্তি প্রতিব্রহ্মাণ্ডবর্তিনঃ ।
দেবেষু নাগলোকেষু মনুষ্যেষ্বিতরেষু চ ॥ 44 ॥
শ্রীদেব্যাস্তে চ সর্বেপি ব্রজন্ত্যত্রৈব ভূমিপ ।
দেবীক্ষেত্রে যে ত্যজন্তি প্রাণান্দেব্যর্চনে রতাঃ ॥ 45 ॥
তে সর্বে যান্তি তত্রৈব যত্র দেবী মহোত্সবা ।
ঘৃতকুল্যা দুগ্ধকুল্যা দধিকুল্যা মধুস্রবাঃ ॥ 46 ॥
স্যন্দন্তি সরিতঃ সর্বাস্তথামৃতবহাঃ পরাঃ ।
দ্রাক্ষারসবহাঃ কাশ্চিজ্জম্বূরসবহাঃ পরাঃ ॥ 47 ॥
আম্রেক্ষুরসবাহিন্যো নদ্যস্তাস্তু সহস্রশঃ ।
মনোরথফলাবৃক্ষাবাপ্যঃ কূপাস্তথৈব চ ॥ 48 ॥
যথেষ্টপানফলদান ন্যূনং কিঞ্চিদস্তি হি ।
ন রোগপলিতং বাপি জরা বাপি কদাচন ॥ 49 ॥
ন চিন্তা ন চ মাত্সর্যং কামক্রোধাদিকং তথা ।
সর্বে যুবানঃ সস্ত্রীকাঃ সহস্রাদিত্যবর্চসঃ ॥ 50 ॥
ভজন্তি সততং দেবীং তত্র শ্রীভুবনেশ্বরীম্ ।
কেচিত্সলোকতাপন্নাঃ কেচিত্সামীপ্যতাং গতাঃ ॥ 51 ॥
সরূপতাং গতাঃ কেচিত্সার্ষ্টিতাং চ পরেগতাঃ ।
যাযাস্তু দেবতাস্তত্র প্রতিব্রহ্মাণ্ডবর্তিনাম্ ॥ 52 ॥
সমষ্টযঃ স্থিতাস্তাস্তু সেবন্তে জগদীশ্বরীম্ ।
সপ্তকোটিমহামন্ত্রা মূর্তিমন্ত উপাসতে ॥ 53 ॥
মহাবিদ্যাশ্চ সকলাঃ সাম্যাবস্থাত্মিকাং শিবাম্ ।
কারণব্রহ্মরূপাং তাং মাযা শবলবিগ্রহাম্ ॥ 54 ॥
ইত্থং রাজন্মযা প্রোক্তং মণিদ্বীপং মহত্তরম্ ।
ন সূর্যচন্দ্রৌ নো বিদ্যুত্কোটযোগ্নিস্তথৈব চ ॥ 55 ॥
এতস্য ভাসা কোট্যংশ কোট্যংশো নাপি তে সমাঃ ।
ক্বচিদ্বিদ্রুমসঙ্কাশং ক্বচিন্মরকতচ্ছবি ॥ 56 ॥
বিদ্যুদ্ভানুসমচ্ছাযং মধ্যসূর্যসমং ক্বচিত্ ।
বিদ্যুত্কোটিমহাধারা সারকান্তিততং ক্বচিত্ ॥ 57 ॥
ক্বচিত্সিন্দূর নীলেন্দ্রং মাণিক্য সদৃশচ্ছবি ।
হীরসার মহাগর্ভ ধগদ্ধগিত দিক্তটম্ ॥ 58 ॥
কান্ত্যা দাবানলসমং তপ্তকাঞ্চন সন্নিভম্ ।
ক্বচিচ্চন্দ্রোপলোদ্গারং সূর্যোদ্গারং চ কুত্র চিত্ ॥ 59 ॥
রত্নশৃঙ্গি সমাযুক্তং রত্নপ্রাকার গোপুরম্ ।
রত্নপত্রৈ রত্নফলৈর্বৃক্ষৈশ্চ পরিমণ্ডিতম্ ॥ 60 ॥
নৃত্যন্মযূরসঙ্ঘৈশ্চ কপোতরণিতোজ্জ্বলম্ ।
কোকিলাকাকলীলাপৈঃ শুকলাপৈশ্চ শোভিতম্ ॥ 61 ॥
সুরম্য রমণীযাম্বু লক্ষাবধি সরোবৃতম্ ।
তন্মধ্যভাগ বিলসদ্বিকচদ্রত্ন পঙ্কজৈঃ ॥ 62 ॥
সুগন্ধিভিঃ সমন্তাত্তু বাসিতং শতযোজনম্ ।
মন্দমারুত সম্ভিন্ন চলদ্দ্রুম সমাকুলম্ ॥ 63 ॥
চিন্তামণি সমূহানাং জ্যোতিষা বিততাম্বরম্ ।
রত্নপ্রভাভিরভিতো ধগদ্ধগিত দিক্তটম্ ॥ 64 ॥
বৃক্ষব্রাত মহাগন্ধবাতব্রাত সুপূরিতম্ ।
ধূপধূপাযিতং রাজন্মণিদীপাযুতোজ্জ্বলম্ ॥ 65 ॥
মণিজালক সচ্ছিদ্র তরলোদরকান্তিভিঃ ।
দিঙ্মোহজনকং চৈতদ্দর্পণোদর সংযুতম্ ॥ 66 ॥
ঐশ্বর্যস্য সমগ্রস্য শৃঙ্গারস্যাখিলস্য চ ।
সর্বজ্ঞতাযাঃ সর্বাযাস্তেজসশ্চাখিলস্য চ ॥ 67 ॥
পরাক্রমস্য সর্বস্য সর্বোত্তমগুণস্য চ ।
সকলা যা দযাযাশ্চ সমাপ্তিরিহ ভূপতে ॥ 68 ॥
রাজ্ঞ আনন্দমারভ্য ব্রহ্মলোকান্ত ভূমিষু ।
আনন্দা যে স্থিতাঃ সর্বে তেঽত্রৈবান্তর্ভবন্তি হি ॥ 69 ॥
ইতি তে বর্ণিতং রাজন্মণিদ্বীপং মহত্তরম্ ।
মহাদেব্যাঃ পরংস্থানং সর্বলোকোত্তমোত্তমম্ ॥ 70 ॥
এতস্য স্মরণাত্সদ্যঃ সর্বপাপং বিনশ্যতি ।
প্রাণোত্ক্রমণসন্ধৌ তু স্মৃত্বা তত্রৈব গচ্ছতি ॥ 71 ॥
অধ্যায পঞ্চকং ত্বেতত্পঠেন্নিত্যং সমাহিতঃ ।
ভূতপ্রেতপিশাচাদি বাধা তত্র ভবেন্ন হি ॥ 72 ॥
নবীন গৃহ নির্মাণে বাস্তুযাগে তথৈব চ ।
পঠিতব্যং প্রযত্নেন কল্যাণং তেন জাযতে ॥ 73 ॥
ইতি শ্রীদেবীভাগবতে মহাপুরাণে দ্বাদশস্কন্ধে দ্বাদশোধ্যাযঃ ॥
Roman (IAST) Transliteration
(śrīdevībhāgavataṃ, dvādaśa skandhaṃ, dvādaśo'dhyāyaḥ, maṇidvīpa varṇana - 3)
vyāsa uvāca |
tadeva devīsadanaṃ madhyabhāge virājate |
sahasra stambhasaṃyuktāścatvārasteṣu maṇḍapāḥ || 1 ||
śṛṅgāramaṇḍapaścaiko muktimaṇḍapa eva ca |
jñānamaṇḍapa sañjñastu tṛtīyaḥ parikīrtitaḥ || 2 ||
ekāntamaṇḍapaścaiva caturthaḥ parikīrtitaḥ |
nānā vitānasaṃyuktā nānā dhūpaistu dhūpitāḥ || 3 ||
koṭisūryasamāḥ kāntyā bhrāñjante maṇḍapāḥ śubhāḥ |
tanmaṇḍapānāṃ paritaḥ kāśmīravanikā smṛtā || 4 ||
mallikākundavanikā yatra puṣkalakāḥ sthitāḥ |
asaṅkhyātā mṛgamadaiḥ pūritāstatsravā nṛpa || 5 ||
mahāpadmāṭavī tadvadratnasopānanirmitā |
sudhārasenasampūrṇā guñjanmattamadhuvratā || 6 ||
haṃsakāraṇḍavākīrṇā gandhapūrita diktaṭā |
vanikānāṃ sugandhaistu maṇidvīpaṃ suvāsitam || 7 ||
śṛṅgāramaṇḍape devyo gāyanti vividhaiḥ svaraiḥ |
sabhāsado devavaśā madhye śrījagadambikā || 8 ||
muktimaṇḍapamadhye tu mocayatyaniśaṃ śivā |
jñānopadeśaṃ kurute tṛtīye nṛpa maṇḍape || 9 ||
caturthamaṇḍape caiva jagadrakṣā vicintanam |
mantriṇī sahitā nityaṃ karoti jagadambikā || 10 ||
cintāmaṇigṛhe rājañchakti tattvātmakaiḥ paraiḥ |
sopānairdaśabhiryukto mañcakopyadhirājate || 11 ||
brahmā viṣṇuśca rudraśca īśvaraśca sadāśivaḥ |
ete mañcakhurāḥ proktāḥ phalakastu sadāśivaḥ || 12 ||
tasyopari mahādevo bhuvaneśo virājate |
yā devī nijalīlārthaṃ dvidhābhūtā babhūvaha || 13 ||
sṛṣṭyādau tu sa evāyaṃ tadardhāṅgo maheśvaraḥ |
kandarpa darpanāśodyatkoṭi kandarpasundaraḥ || 14 ||
pañcavaktrastrinetraśca maṇibhūṣaṇa bhūṣitaḥ |
hariṇābhītiparaśūnvaraṃ ca nijabāhubhiḥ || 15 ||
dadhānaḥ ṣoḍaśābdo'sau devaḥ sarveśvaro mahān |
koṭisūrya pratīkāśaścandrakoṭi suśītalaḥ || 16 ||
śuddhasphaṭika saṅkāśastrinetraḥ śītala dyutiḥ |
vāmāṅke sanniṣaṇṇā'sya devī śrībhuvaneśvarī || 17 ||
navaratnagaṇākīrṇa kāñcīdāma virājitā |
taptakāñcanasannaddha vaidūryāṅgadabhūṣaṇā || 18 ||
kanacchrīcakratāṭaṅka viṭaṅka vadanāmbujā |
lalāṭakānti vibhava vijitārdhasudhākarā || 19 ||
bimbakānti tiraskāriradacchada virājitā |
lasatkuṅkumakastūrītilakodbhāsitānanā || 20 ||
divya cūḍāmaṇi sphāra cañcaccandrakasūryakā |
udyatkavisamasvaccha nāsābharaṇa bhāsurā || 21 ||
cintākalambitasvaccha muktāguccha virājitā |
pāṭīra paṅka karpūra kuṅkumālaṅkṛta stanī || 22 ||
vicitra vividhā kalpā kambusaṅkāśa kandharā |
dāḍimīphalabījābha dantapaṅkti virājitā || 23 ||
anarghya ratnaghaṭita mukuṭāñcita mastakā |
mattālimālāvilasadalakāḍhya mukhāmbujā || 24 ||
kalaṅkakārśyanirmukta śaraccandranibhānanā |
jāhnavīsalilāvarta śobhinābhivibhūṣitā || 25 ||
māṇikya śakalābaddha mudrikāṅgulibhūṣitā |
puṇḍarīkadalākāra nayanatrayasundarī || 26 ||
kalpitāccha mahārāga padmarāgojjvalaprabhā |
ratnakiṅkiṇikāyukta ratnakaṅkaṇaśobhitā || 27 ||
maṇimuktāsarāpāra lasatpadakasantatiḥ |
ratnāṅgulipravitata prabhājālalasatkarā || 28 ||
kañcukīgumphitāpāra nānā ratnatatidyutiḥ |
mallikāmodi dhammilla mallikālisarāvṛtā || 29 ||
suvṛttanibiḍottuṅga kucabhārālasā śivā |
varapāśāṅkuśābhīti lasadbāhu catuṣṭayā || 30 ||
sarvaśṛṅgāraveṣāḍhyā sukumārāṅgavallarī |
saundaryadhārāsarvasvā nirvyājakaruṇāmayī || 31 ||
nijasaṃlāpamādhurya vinirbhartsitakacchapī |
koṭikoṭiravīndūnāṃ kāntiṃ yā bibhratī parā || 32 ||
nānā sakhībhirdāsībhistathā devāṅganādibhiḥ |
sarvābhirdevatābhistu samantātpariveṣṭitā || 33 ||
icchāśaktyā jñānaśaktyā kriyāśaktyā samanvitā |
lajjā tuṣṭistathā puṣṭiḥ kīrtiḥ kāntiḥ kṣamā dayā || 34 ||
buddhirmedhāsmṛtirlakṣmīrmūrtimatyoṅganāḥ smṛtāḥ |
jayā ca vijayā caivāpyajitā cāparājitā || 35 ||
nityā vilāsinī dogdhrī tvaghorā maṅgalā navā |
pīṭhaśaktaya etāstu sevante yāṃ parāmbikām || 36 ||
yasyāstu pārśvabhāgestonidhītau śaṅkhapadmakau |
navaratna vahānadyastathā vai kāñcanasravāḥ || 37 ||
saptadhātuvahānadyo nidhibhyāṃ tu vinirgatāḥ |
sudhāsindhvantagāminyastāḥ sarvā nṛpasattama || 38 ||
sā devī bhuvaneśānī tadvāmāṅke virājate |
sarveśa tvaṃ maheśasya yatsaṅgā deva nānyathā || 39 ||
cintāmaṇi gṛhasyā'sya pramāṇaṃ śṛṇu bhūmipa |
sahasrayojanāyāmaṃ mahāntastatpracakṣate || 40 ||
taduttare mahāśālāḥ pūrvasmād dviguṇāḥ smṛtāḥ |
antarikṣagataṃ tvetannirādhāraṃ virājate || 41 ||
saṅkocaśca vikāśaśca jāyate'sya nirantaram |
paṭavatkāryavaśataḥ pralaye sarjane tathā || 42 ||
śālānāṃ caiva sarveṣāṃ sarvakāntiparāvadhi |
cintāmaṇigṛhaṃ proktaṃ yatra devī mahomayī || 43 ||
yeye upāsakāḥ santi pratibrahmāṇḍavartinaḥ |
deveṣu nāgalokeṣu manuṣyeṣvitareṣu ca || 44 ||
śrīdevyāste ca sarvepi vrajantyatraiva bhūmipa |
devīkṣetre ye tyajanti prāṇāndevyarcane ratāḥ || 45 ||
te sarve yānti tatraiva yatra devī mahotsavā |
ghṛtakulyā dugdhakulyā dadhikulyā madhusravāḥ || 46 ||
syandanti saritaḥ sarvāstathāmṛtavahāḥ parāḥ |
drākṣārasavahāḥ kāścijjambūrasavahāḥ parāḥ || 47 ||
āmrekṣurasavāhinyo nadyastāstu sahasraśaḥ |
manorathaphalāvṛkṣāvāpyaḥ kūpāstathaiva ca || 48 ||
yatheṣṭapānaphaladāna nyūnaṃ kiñcidasti hi |
na rogapalitaṃ vāpi jarā vāpi kadācana || 49 ||
na cintā na ca mātsaryaṃ kāmakrodhādikaṃ tathā |
sarve yuvānaḥ sastrīkāḥ sahasrādityavarcasaḥ || 50 ||
bhajanti satataṃ devīṃ tatra śrībhuvaneśvarīm |
kecitsalokatāpannāḥ kecitsāmīpyatāṃ gatāḥ || 51 ||
sarūpatāṃ gatāḥ kecitsārṣṭitāṃ ca paregatāḥ |
yāyāstu devatāstatra pratibrahmāṇḍavartinām || 52 ||
samaṣṭayaḥ sthitāstāstu sevante jagadīśvarīm |
saptakoṭimahāmantrā mūrtimanta upāsate || 53 ||
mahāvidyāśca sakalāḥ sāmyāvasthātmikāṃ śivām |
kāraṇabrahmarūpāṃ tāṃ māyā śabalavigrahām || 54 ||
itthaṃ rājanmayā proktaṃ maṇidvīpaṃ mahattaram |
na sūryacandrau no vidyutkoṭayognistathaiva ca || 55 ||
etasya bhāsā koṭyaṃśa koṭyaṃśo nāpi te samāḥ |
kvacidvidrumasaṅkāśaṃ kvacinmarakatacchavi || 56 ||
vidyudbhānusamacchāyaṃ madhyasūryasamaṃ kvacit |
vidyutkoṭimahādhārā sārakāntitataṃ kvacit || 57 ||
kvacitsindūra nīlendraṃ māṇikya sadṛśacchavi |
hīrasāra mahāgarbha dhagaddhagita diktaṭam || 58 ||
kāntyā dāvānalasamaṃ taptakāñcana sannibham |
kvaciccandropalodgāraṃ sūryodgāraṃ ca kutra cit || 59 ||
ratnaśṛṅgi samāyuktaṃ ratnaprākāra gopuram |
ratnapatrai ratnaphalairvṛkṣaiśca parimaṇḍitam || 60 ||
nṛtyanmayūrasaṅghaiśca kapotaraṇitojjvalam |
kokilākākalīlāpaiḥ śukalāpaiśca śobhitam || 61 ||
suramya ramaṇīyāmbu lakṣāvadhi sarovṛtam |
tanmadhyabhāga vilasadvikacadratna paṅkajaiḥ || 62 ||
sugandhibhiḥ samantāttu vāsitaṃ śatayojanam |
mandamāruta sambhinna caladdruma samākulam || 63 ||
cintāmaṇi samūhānāṃ jyotiṣā vitatāmbaram |
ratnaprabhābhirabhito dhagaddhagita diktaṭam || 64 ||
vṛkṣavrāta mahāgandhavātavrāta supūritam |
dhūpadhūpāyitaṃ rājanmaṇidīpāyutojjvalam || 65 ||
maṇijālaka sacchidra taralodarakāntibhiḥ |
diṅmohajanakaṃ caitaddarpaṇodara saṃyutam || 66 ||
aiśvaryasya samagrasya śṛṅgārasyākhilasya ca |
sarvajñatāyāḥ sarvāyāstejasaścākhilasya ca || 67 ||
parākramasya sarvasya sarvottamaguṇasya ca |
sakalā yā dayāyāśca samāptiriha bhūpate || 68 ||
rājña ānandamārabhya brahmalokānta bhūmiṣu |
ānandā ye sthitāḥ sarve te'traivāntarbhavanti hi || 69 ||
iti te varṇitaṃ rājanmaṇidvīpaṃ mahattaram |
mahādevyāḥ paraṃsthānaṃ sarvalokottamottamam || 70 ||
etasya smaraṇātsadyaḥ sarvapāpaṃ vinaśyati |
prāṇotkramaṇasandhau tu smṛtvā tatraiva gacchati || 71 ||
adhyāya pañcakaṃ tvetatpaṭhennityaṃ samāhitaḥ |
bhūtapretapiśācādi bādhā tatra bhavenna hi || 72 ||
navīna gṛha nirmāṇe vāstuyāge tathaiva ca |
paṭhitavyaṃ prayatnena kalyāṇaṃ tena jāyate || 73 ||
iti śrīdevībhāgavate mahāpurāṇe dvādaśaskandhe dvādaśodhyāyaḥ ||
InfoLyter.in — Sacred Vedic Knowledge Portal · Free forever