📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
মহা সরস্বতী স্তবম্
Maha Sarasvati Stavam
Saraswati Bengali
অশ্বতর উবাচ ।
জগদ্ধাত্রীমহং দেবীমারিরাধযিষুঃ শুভাম্ ।
স্তোষ্যে প্রণম্য শিরসা ব্রহ্মযোনিং সরস্বতীম্ ॥ 1 ॥
সদসদ্দেবি যত্কিঞ্চিন্মোক্ষবচ্চার্থবত্পদম্ ।
তত্সর্বং ত্বয্যসংযোগং যোগবদ্দেবি সংস্থিতম্ ॥ 2 ॥
ত্বমক্ষরং পরং দেবি যত্র সর্বং প্রতিষ্ঠিতম্ ।
অক্ষরং পরমং দেবি সংস্থিতং পরমাণুবত্ ॥ 3 ॥
অক্ষরং পরমং ব্রহ্ম বিশ্বঞ্চৈতত্ক্ষরাত্মকম্ ।
দারুণ্যবস্থিতো বহ্নির্ভৌমাশ্চ পরমাণবঃ ॥ 4 ॥
তথা ত্বযি স্থিতং ব্রহ্ম জগচ্চেদমশেষতঃ ।
ওঙ্কারাক্ষরসংস্থানং যত্তু দেবি স্থিরাস্থিরম্ ॥ 5 ॥
তত্র মাত্রাত্রযং সর্বমস্তি যদ্দেবি নাস্তি চ ।
ত্রযো লোকাস্ত্রযো বেদাস্ত্রৈবিদ্যং পাবকত্রযম্ ॥ 6 ॥
ত্রীণি জ্যোতীংষি বর্ণাশ্চ ত্রযো ধর্মাগমাস্তথা ।
ত্রযো গুণাস্ত্রযঃ শব্দস্ত্রযো বেদাস্তথাশ্রমাঃ ॥ 7 ॥
ত্রযঃ কালাস্তথাবস্থাঃ পিতরোঽহর্নিশাদযঃ ।
এতন্মাত্রাত্রযং দেবি তব রূপং সরস্বতি ॥ 8 ॥
বিভিন্নদর্শিনামাদ্যা ব্রহ্মণো হি সনাতনাঃ ।
সোমসংস্থা হবিঃ সংস্থাঃ পাকসংস্থাশ্চ সপ্ত যাঃ ॥ 9 ॥
তাস্ত্বদুচ্চারণাদ্দেবি ক্রিযন্তে ব্রহ্মবাদিভিঃ ।
অনির্দেশ্যং তথা চান্যদর্ধমাত্রান্বিতং পরম্ ॥ 10 ॥
অবিকার্যক্ষযং দিব্যং পরিণামবিবর্জিতম্ ।
তবৈতত্পরমং রূপং যন্ন শক্যং মযোদিতুম্ ॥ 11 ॥
ন চাস্যেন চ তজ্জিহ্বা তাম্রোষ্ঠাদিভিরুচ্যতে ।
ইন্দ্রোঽপি বসবো ব্রহ্মা চন্দ্রার্কৌ জ্যোতিরেব চ ॥ 12 ॥
বিশ্বাবাসং বিশ্বরূপং বিশ্বেশং পরমেশ্বরম্ ।
সাঙ্খ্যবেদান্তবাদোক্তং বহুশাখাস্থিরীকৃতম্ ॥ 13 ॥
অনাদিমধ্যনিধনং সদসন্ন সদেব যত্ ।
একন্ত্বনেকং নাপ্যেকং ভবভেদসমাশ্রিতম্ ॥ 14 ॥
অনাখ্যং ষড্গুণাখ্যঞ্চ বর্গাখ্যং ত্রিগুণাশ্রযম্ ।
নানাশক্তিমতামেকং শক্তিবৈভবিকং পরম্ ॥ 15 ॥
সুখাসুখং মহাসৌখ্যরূপং ত্বযি বিভাব্যতে ।
এবং দেবি ত্বযা ব্যাপ্তং সকলং নিষ্কলঞ্চ যত্ ।
অদ্বৈতাবস্থিতং ব্রহ্ম যচ্চ দ্বৈতে ব্যবস্থিতম্ ॥ 16 ॥
যেঽর্থা নিত্যা যে বিনশ্যন্তি চান্যে
যে বা স্থূলা যে চ সূক্ষ্মাতিসূক্ষ্মাঃ ।
যে বা ভূমৌ যেঽন্তরীক্ষেঽন্যতো বা
তেষাং তেষাং ত্বত্ত এবোপলব্ধিঃ ॥ 17 ॥
যচ্চামূর্তং যচ্চ মূর্তং সমস্তং
যদ্বা ভূতেষ্বেকমেকঞ্চ কিঞ্চিত্ ।
যদ্দিব্যস্তি ক্ষ্মাতলে খেঽন্যতো বা
ত্বত্সম্বন্ধং ত্বত্স্বরৈর্ব্যঞ্জনৈশ্চ ॥ 18 ॥
ইতি শ্রীমার্কণ্ডেযপুরাণে ত্রযোবিংশোঽধ্যাযে অশ্বতর প্রোক্ত মহাসরস্বতী স্তবম্ ।
Roman (IAST) Transliteration
aśvatara uvāca |
jagaddhātrīmahaṃ devīmārirādhayiṣuḥ śubhām |
stoṣye praṇamya śirasā brahmayoniṃ sarasvatīm || 1 ||
sadasaddevi yatkiñcinmokṣavaccārthavatpadam |
tatsarvaṃ tvayyasaṃyogaṃ yogavaddevi saṃsthitam || 2 ||
tvamakṣaraṃ paraṃ devi yatra sarvaṃ pratiṣṭhitam |
akṣaraṃ paramaṃ devi saṃsthitaṃ paramāṇuvat || 3 ||
akṣaraṃ paramaṃ brahma viśvañcaitatkṣarātmakam |
dāruṇyavasthito vahnirbhaumāśca paramāṇavaḥ || 4 ||
tathā tvayi sthitaṃ brahma jagaccedamaśeṣataḥ |
oṅkārākṣarasaṃsthānaṃ yattu devi sthirāsthiram || 5 ||
tatra mātrātrayaṃ sarvamasti yaddevi nāsti ca |
trayo lokāstrayo vedāstraividyaṃ pāvakatrayam || 6 ||
trīṇi jyotīṃṣi varṇāśca trayo dharmāgamāstathā |
trayo guṇāstrayaḥ śabdastrayo vedāstathāśramāḥ || 7 ||
trayaḥ kālāstathāvasthāḥ pitaro'harniśādayaḥ |
etanmātrātrayaṃ devi tava rūpaṃ sarasvati || 8 ||
vibhinnadarśināmādyā brahmaṇo hi sanātanāḥ |
somasaṃsthā haviḥ saṃsthāḥ pākasaṃsthāśca sapta yāḥ || 9 ||
tāstvaduccāraṇāddevi kriyante brahmavādibhiḥ |
anirdeśyaṃ tathā cānyadardhamātrānvitaṃ param || 10 ||
avikāryakṣayaṃ divyaṃ pariṇāmavivarjitam |
tavaitatparamaṃ rūpaṃ yanna śakyaṃ mayoditum || 11 ||
na cāsyena ca tajjihvā tāmroṣṭhādibhirucyate |
indro'pi vasavo brahmā candrārkau jyotireva ca || 12 ||
viśvāvāsaṃ viśvarūpaṃ viśveśaṃ parameśvaram |
sāṅkhyavedāntavādoktaṃ bahuśākhāsthirīkṛtam || 13 ||
anādimadhyanidhanaṃ sadasanna sadeva yat |
ekantvanekaṃ nāpyekaṃ bhavabhedasamāśritam || 14 ||
anākhyaṃ ṣaḍguṇākhyañca vargākhyaṃ triguṇāśrayam |
nānāśaktimatāmekaṃ śaktivaibhavikaṃ param || 15 ||
sukhāsukhaṃ mahāsaukhyarūpaṃ tvayi vibhāvyate |
evaṃ devi tvayā vyāptaṃ sakalaṃ niṣkalañca yat |
advaitāvasthitaṃ brahma yacca dvaite vyavasthitam || 16 ||
ye'rthā nityā ye vinaśyanti cānye
ye vā sthūlā ye ca sūkṣmātisūkṣmāḥ |
ye vā bhūmau ye'ntarīkṣe'nyato vā
teṣāṃ teṣāṃ tvatta evopalabdhiḥ || 17 ||
yaccāmūrtaṃ yacca mūrtaṃ samastaṃ
yadvā bhūteṣvekamekañca kiñcit |
yaddivyasti kṣmātale khe'nyato vā
tvatsambandhaṃ tvatsvarairvyañjanaiśca || 18 ||
iti śrīmārkaṇḍeyapurāṇe trayoviṃśo'dhyāye aśvatara prokta mahāsarasvatī stavam |
InfoLyter.in — Sacred Vedic Knowledge Portal · Free forever