Chanakya Niti - Shashtho'dhyayah

ॐ

চাণক্য নীতি - ষষ্ঠোঽধ্যাযঃ

Bengali

শ্রুত্বা ধর্মং বিজানাতি শ্রুত্বা ত্যজতি দুর্মতিম্ ।

শ্রুত্বা জ্ঞানমবাপ্নোতি শ্রুত্বা মোক্ষমবাপ্নুযাত্ ॥ 01 ॥

পক্ষিণঃ কাকশ্চণ্ডালঃ পশূনাং চৈব কুক্কুরঃ ।

মুনীনাং পাপশ্চণ্ডালঃ সর্বচাণ্ডালনিন্দকঃ ॥ 02 ॥

ভস্মনা শুদ্ধ্যতে কাস্যং তাম্রমম্লেন শুদ্ধ্যতি ।

রজসা শুদ্ধ্যতে নারী নদী বেগেন শুদ্ধ্যতি ॥ 03 ॥

ভ্রমন্সম্পূজ্যতে রাজা ভ্রমন্সম্পূজ্যতে দ্বিজঃ ।

ভ্রমন্সম্পূজ্যতে যোগী স্ত্রী ভ্রমন্তী বিনশ্যতি ॥ 04 ॥

যস্যার্থাস্তস্য মিত্রাণি যস্যার্থাস্তস্য বান্ধবাঃ ।

যস্যার্থাঃ স পুমাঁল্লোকে যস্যার্থাঃ স চ পণ্ডিতঃ ॥ 05 ॥

তাদৃশী জাযতে বুদ্ধির্ব্যবসাযোঽপি তাদৃশঃ ।

সহাযাস্তাদৃশা এব যাদৃশী ভবিতব্যতা ॥ 06 ॥

কালঃ পচতি ভূতানি কালঃ সংহরতে প্রজাঃ ।

কালঃ সুপ্তেষু জাগর্তি কালো হি দুরতিক্রমঃ ॥ 07 ॥

ন পশ্যতি চ জন্মান্ধঃ কামান্ধো নৈব পশ্যতি ।

মদোন্মত্তা ন পশ্যন্তি অর্থী দোষং ন পশ্যতি ॥ 08 ॥

স্বযং কর্ম করোত্যাত্মা স্বযং তত্ফলমশ্নুতে ।

স্বযং ভ্রমতি সংসারে স্বযং তস্মাদ্বিমুচ্যতে ॥ 09 ॥

রাজা রাষ্ট্রকৃতং পাপং রাজ্ঞঃ পাপং পুরোহিতঃ ।

ভর্তা চ স্ত্রীকৃতং পাপং শিষ্যপাপং গুরুস্তথা ॥ 10 ॥

ঋণকর্তা পিতা শত্রুর্মাতা চ ব্যভিচারিণী ।

ভার্যা রূপবতী শত্রুঃ পুত্রঃ শত্রুরপণ্ডিতঃ ॥ 11 ॥

লুব্ধমর্থেন গৃহ্ণীযাত্ স্তব্ধমঞ্জলিকর্মণা ।

মূর্খং ছন্দোঽনুবৃত্ত্যা চ যথার্থত্বেন পণ্ডিতম্ ॥ 12 ॥

বরং ন রাজ্যং ন কুরাজরাজ্যং

বরং ন মিত্রং ন কুমিত্রমিত্রম্ ।

বরং ন শিষ্যো ন কুশিষ্যশিষ্যো

বরং ন দার ন কুদরদারঃ ॥ 13 ॥

কুরাজরাজ্যেন কুতঃ প্রজাসুখং

কুমিত্রমিত্রেণ কুতোঽভিনির্বৃতিঃ ।

কুদারদারৈশ্চ কুতো গৃহে রতিঃ

কুশিষ্যশিষ্যমধ্যাপযতঃ কুতো যশঃ ॥ 14 ॥

সিংহাদেকং বকাদেকং শিক্ষেচ্চত্বারি কুক্কুটাত্ ।

বাযসাত্পঞ্চ শিক্ষেচ্চ ষট্শুনস্ত্রীণি গর্দভাত্ ॥ 15 ॥

প্রভূতং কার্যমল্পং বা যন্নরঃ কর্তুমিচ্ছতি ।

সর্বারম্ভেণ তত্কার্যং সিংহাদেকং প্রচক্ষতে ॥ 16 ॥

ইন্দ্রিযাণি চ সংযম্য রাগদ্বেষবিবর্জিতঃ ।

সমদুঃখসুখঃ শান্তঃ তত্ত্বজ্ঞঃ সাধুরুচ্যতে ॥ 17 ॥

প্রত্যুত্থানং চ যুদ্ধং চ সংবিভাগং চ বন্ধুষু ।

স্বযমাক্রম্য ভুক্তং চ শিক্ষেচ্চত্বারি কুক্কুটাত্ ॥ 18 ॥

গূঢমৈথুনচারিত্বং কালে কালে চ সঙ্গ্রহম্ ।

অপ্রমত্তমবিশ্বাসং পঞ্চ শিক্ষেচ্চ বাযসাত্ ॥ 19 ॥

বহ্বাশী স্বল্পসন্তুষ্টঃ সনিদ্রো লঘুচেতনঃ ।

স্বামিভক্তশ্চ শূরশ্চ ষডেতে শ্বানতো গুণাঃ ॥ 20 ॥

সুশ্রান্তোঽপি বহেদ্ভারং শীতোষ্ণং ন চ পশ্যতি ।

সন্তুষ্টশ্চরতে নিত্যং ত্রীণি শিক্ষেচ্চ গর্দভাত্ ॥ 21 ॥

য এতান্বিংশতিগুণানাচরিষ্যতি মানবঃ ।

কার্যাবস্থাসু সর্বাসু অজেযঃ স ভবিষ্যতি ॥ 22 ॥

Roman (IAST) Transliteration

śrutvā dharmaṃ vijānāti śrutvā tyajati durmatim |

śrutvā jñānamavāpnoti śrutvā mokṣamavāpnuyāt || 01 ||

pakṣiṇaḥ kākaścaṇḍālaḥ paśūnāṃ caiva kukkuraḥ |

munīnāṃ pāpaścaṇḍālaḥ sarvacāṇḍālanindakaḥ || 02 ||

bhasmanā śuddhyate kāsyaṃ tāmramamlena śuddhyati |

rajasā śuddhyate nārī nadī vegena śuddhyati || 03 ||

bhramansampūjyate rājā bhramansampūjyate dvijaḥ |

bhramansampūjyate yogī strī bhramantī vinaśyati || 04 ||

yasyārthāstasya mitrāṇi yasyārthāstasya bāndhavāḥ |

yasyārthāḥ sa pumā~lloke yasyārthāḥ sa ca paṇḍitaḥ || 05 ||

tādṛśī jāyate buddhirvyavasāyo'pi tādṛśaḥ |

sahāyāstādṛśā eva yādṛśī bhavitavyatā || 06 ||

kālaḥ pacati bhūtāni kālaḥ saṃharate prajāḥ |

kālaḥ supteṣu jāgarti kālo hi duratikramaḥ || 07 ||

na paśyati ca janmāndhaḥ kāmāndho naiva paśyati |

madonmattā na paśyanti arthī doṣaṃ na paśyati || 08 ||

svayaṃ karma karotyātmā svayaṃ tatphalamaśnute |

svayaṃ bhramati saṃsāre svayaṃ tasmādvimucyate || 09 ||

rājā rāṣṭrakṛtaṃ pāpaṃ rājñaḥ pāpaṃ purohitaḥ |

bhartā ca strīkṛtaṃ pāpaṃ śiṣyapāpaṃ gurustathā || 10 ||

ṛṇakartā pitā śatrurmātā ca vyabhicāriṇī |

bhāryā rūpavatī śatruḥ putraḥ śatrurapaṇḍitaḥ || 11 ||

lubdhamarthena gṛhṇīyāt stabdhamañjalikarmaṇā |

mūrkhaṃ chando'nuvṛttyā ca yathārthatvena paṇḍitam || 12 ||

varaṃ na rājyaṃ na kurājarājyaṃ

varaṃ na mitraṃ na kumitramitram |

varaṃ na śiṣyo na kuśiṣyaśiṣyo

varaṃ na dāra na kudaradāraḥ || 13 ||

kurājarājyena kutaḥ prajāsukhaṃ

kumitramitreṇa kuto'bhinirvṛtiḥ |

kudāradāraiśca kuto gṛhe ratiḥ

kuśiṣyaśiṣyamadhyāpayataḥ kuto yaśaḥ || 14 ||

siṃhādekaṃ bakādekaṃ śikṣeccatvāri kukkuṭāt |

vāyasātpañca śikṣecca ṣaṭśunastrīṇi gardabhāt || 15 ||

prabhūtaṃ kāryamalpaṃ vā yannaraḥ kartumicchati |

sarvārambheṇa tatkāryaṃ siṃhādekaṃ pracakṣate || 16 ||

indriyāṇi ca saṃyamya rāgadveṣavivarjitaḥ |

samaduḥkhasukhaḥ śāntaḥ tattvajñaḥ sādhurucyate || 17 ||

pratyutthānaṃ ca yuddhaṃ ca saṃvibhāgaṃ ca bandhuṣu |

svayamākramya bhuktaṃ ca śikṣeccatvāri kukkuṭāt || 18 ||

gūḍhamaithunacāritvaṃ kāle kāle ca saṅgraham |

apramattamaviśvāsaṃ pañca śikṣecca vāyasāt || 19 ||

bahvāśī svalpasantuṣṭaḥ sanidro laghucetanaḥ |

svāmibhaktaśca śūraśca ṣaḍete śvānato guṇāḥ || 20 ||

suśrānto'pi vahedbhāraṃ śītoṣṇaṃ na ca paśyati |

santuṣṭaścarate nityaṃ trīṇi śikṣecca gardabhāt || 21 ||

ya etānviṃśatiguṇānācariṣyati mānavaḥ |

kāryāvasthāsu sarvāsu ajeyaḥ sa bhaviṣyati || 22 ||