Chanakya Niti - Dashamo'dhyayah

ॐ

চাণক্য নীতি - দশমোঽধ্যাযঃ

Chanakya Bengali

ধনহীনো ন হীনশ্চ ধনিকঃ স সুনিশ্চযঃ ।

বিদ্যারত্নেন হীনো যঃ স হীনঃ সর্ববস্তুষু ॥ 01 ॥

দৃষ্টিপূতং ন্যসেত্পাদং বস্ত্রপূতং পিবেজ্জলম্ ।

শাস্ত্রপূতং বদেদ্বাক্যঃ মনঃপূতং সমাচরেত্ ॥ 02 ॥

সুখার্থী চেত্ত্যজেদ্বিদ্যাং বিদ্যার্থী চেত্ত্যজেত্সুখম্ ।

সুখার্থিনঃ কুতো বিদ্যা সুখং বিদ্যার্থিনঃ কুতঃ ॥ 03 ॥

কবযঃ কিং ন পশ্যন্তি কিং ন ভক্ষন্তি বাযসাঃ ।

মদ্যপাঃ কিং ন জল্পন্তি কিং ন কুর্বন্তি যোষিতঃ ॥ 04 ॥

রঙ্কং করোতি রাজানং রাজানং রঙ্কমেব চ ।

ধনিনং নির্ধনং চৈব নির্ধনং ধনিনং বিধিঃ ॥ 05 ॥

লুব্ধানাং যাচকঃ শত্রুর্মূর্খানাং বোধকো রিপুঃ ।

জারস্ত্রীণাং পতিঃ শত্রুশ্চৌরাণাং চন্দ্রমা রিপুঃ ॥ 06 ॥

যেষাং ন বিদ্যা ন তপো ন দানং

জ্ঞানং ন শীলাং ন গুণো ন ধর্মঃ ।

তে মর্ত্যলোকে ভুবি ভারভূতা

মনুষ্যরূপেণ মৃগাশ্চরন্তি ॥ 07 ॥

অন্তঃসারবিহীনানামুপদেশো ন জাযতে ।

মলযাচলসংসর্গান্ন বেণুশ্চন্দনাযতে ॥ 08 ॥

যস্য নাস্তি স্বযং প্রজ্ঞা শাস্ত্রং তস্য করোতি কিম্ ।

লোচনাভ্যাং বিহীনস্য দর্পণঃ কিং করিষ্যতি ॥ 09 ॥

দুর্জনং সজ্জনং কর্তুমুপাযো নহি ভূতলে ।

অপানং শাতধা ধৌতং ন শ্রেষ্ঠমিন্দ্রিযং ভবেত্ ॥ 10 ॥

আপ্তদ্বেষাদ্ভবেন্মৃত্যুঃ পরদ্বেষাদ্ধনক্ষযঃ ।

রাজদ্বেষাদ্ভবেন্নাশো ব্রহ্মদ্বেষাত্কুলক্ষযঃ ॥ 11 ॥

বরং বনং ব্যাঘ্রগজেন্দ্রসেবিতং

দ্রুমালযং পত্রফলাম্বুসেবনম্ ।

তৃণেষু শয্যা শতজীর্ণবল্কলং

ন বন্ধুমধ্যে ধনহীনজীবনম্ ॥ 12 ॥

বিপ্রো বৃক্ষস্তস্য মূলং চ সন্ধ্যা

বেদঃ শাখা ধর্মকর্মাণি পত্রম্ ।

তস্মান্মূলং যত্নতো রক্ষণীযং

ছিন্নে মূলে নৈব শাখা ন পত্রম্ ॥ 13 ॥

মাতা চ কমলা দেবী পিতা দেবো জনার্দনঃ ।

বান্ধবা বিষ্ণুভক্তাশ্চ স্বদেশো ভুবনত্রযম্ ॥ 14 ॥

একবৃক্ষসমারূঢা নানাবর্ণা বিহঙ্গমাঃ ।

প্রভাতে দিক্ষু দশসু যান্তি কা তত্র বেদনা ॥ 15 ॥

বুদ্ধির্যস্য বলং তস্য নির্বুদ্ধেশ্চ কুতো বলম্ ।

বনে সিংহো যদোন্মত্তঃ মশকেন নিপাতিতঃ ॥ 16 ॥

কা চিন্তা মম জীবনে যদি হরির্বিশ্বম্ভরো গীযতে

নো চেদর্ভকজীবনায জননীস্তন্যং কথং নির্মমে ।

ইত্যালোচ্য মুহুর্মুহুর্যদুপতে লক্ষ্মীপতে কেবলং

ত্বত্পাদাম্বুজসেবনেন সততং কালো মযা নীযতে ॥ 17 ॥

গীর্বাণবাণীষু বিশিষ্টবুদ্ধি-

স্তথাপি ভাষান্তরলোলুপোঽহম্ ।

যথা সুধাযামমরেষু সত্যাং

স্বর্গাঙ্গনানামধরাসবে রুচিঃ ॥ 18 ॥

অন্নাদ্দশগুণং পিষ্টং পিষ্টাদ্দশগুণং পযঃ ।

পযসোঽষ্টগুণং মাংসাং মাংসাদ্দশগুণং ঘৃতম্ ॥ 19 ॥

শোকেন রোগা বর্ধন্তে পযসা বর্ধতে তনুঃ ।

ঘৃতেন বর্ধতে বীর্যং মাংসান্মাংসং প্রবর্ধতে ॥ 20 ॥

Roman (IAST) Transliteration

dhanahīno na hīnaśca dhanikaḥ sa suniścayaḥ |

vidyāratnena hīno yaḥ sa hīnaḥ sarvavastuṣu || 01 ||

dṛṣṭipūtaṃ nyasetpādaṃ vastrapūtaṃ pibejjalam |

śāstrapūtaṃ vadedvākyaḥ manaḥpūtaṃ samācaret || 02 ||

sukhārthī cettyajedvidyāṃ vidyārthī cettyajetsukham |

sukhārthinaḥ kuto vidyā sukhaṃ vidyārthinaḥ kutaḥ || 03 ||

kavayaḥ kiṃ na paśyanti kiṃ na bhakṣanti vāyasāḥ |

madyapāḥ kiṃ na jalpanti kiṃ na kurvanti yoṣitaḥ || 04 ||

raṅkaṃ karoti rājānaṃ rājānaṃ raṅkameva ca |

dhaninaṃ nirdhanaṃ caiva nirdhanaṃ dhaninaṃ vidhiḥ || 05 ||

lubdhānāṃ yācakaḥ śatrurmūrkhānāṃ bodhako ripuḥ |

jārastrīṇāṃ patiḥ śatruścaurāṇāṃ candramā ripuḥ || 06 ||

yeṣāṃ na vidyā na tapo na dānaṃ

jñānaṃ na śīlāṃ na guṇo na dharmaḥ |

te martyaloke bhuvi bhārabhūtā

manuṣyarūpeṇa mṛgāścaranti || 07 ||

antaḥsāravihīnānāmupadeśo na jāyate |

malayācalasaṃsargānna veṇuścandanāyate || 08 ||

yasya nāsti svayaṃ prajñā śāstraṃ tasya karoti kim |

locanābhyāṃ vihīnasya darpaṇaḥ kiṃ kariṣyati || 09 ||

durjanaṃ sajjanaṃ kartumupāyo nahi bhūtale |

apānaṃ śātadhā dhautaṃ na śreṣṭhamindriyaṃ bhavet || 10 ||

āptadveṣādbhavenmṛtyuḥ paradveṣāddhanakṣayaḥ |

rājadveṣādbhavennāśo brahmadveṣātkulakṣayaḥ || 11 ||

varaṃ vanaṃ vyāghragajendrasevitaṃ

drumālayaṃ patraphalāmbusevanam |

tṛṇeṣu śayyā śatajīrṇavalkalaṃ

na bandhumadhye dhanahīnajīvanam || 12 ||

vipro vṛkṣastasya mūlaṃ ca sandhyā

vedaḥ śākhā dharmakarmāṇi patram |

tasmānmūlaṃ yatnato rakṣaṇīyaṃ

chinne mūle naiva śākhā na patram || 13 ||

mātā ca kamalā devī pitā devo janārdanaḥ |

bāndhavā viṣṇubhaktāśca svadeśo bhuvanatrayam || 14 ||

ekavṛkṣasamārūḍhā nānāvarṇā vihaṅgamāḥ |

prabhāte dikṣu daśasu yānti kā tatra vedanā || 15 ||

buddhiryasya balaṃ tasya nirbuddheśca kuto balam |

vane siṃho yadonmattaḥ maśakena nipātitaḥ || 16 ||

kā cintā mama jīvane yadi harirviśvambharo gīyate

no cedarbhakajīvanāya jananīstanyaṃ kathaṃ nirmame |

ityālocya muhurmuhuryadupate lakṣmīpate kevalaṃ

tvatpādāmbujasevanena satataṃ kālo mayā nīyate || 17 ||

gīrvāṇavāṇīṣu viśiṣṭabuddhi-

stathāpi bhāṣāntaralolupo'ham |

yathā sudhāyāmamareṣu satyāṃ

svargāṅganānāmadharāsave ruciḥ || 18 ||

annāddaśaguṇaṃ piṣṭaṃ piṣṭāddaśaguṇaṃ payaḥ |

payaso'ṣṭaguṇaṃ māṃsāṃ māṃsāddaśaguṇaṃ ghṛtam || 19 ||

śokena rogā vardhante payasā vardhate tanuḥ |

ghṛtena vardhate vīryaṃ māṃsānmāṃsaṃ pravardhate || 20 ||